ས་སྲོད་ཀྱི་ཡིད་བརྙན།

ཟླ་འོད་ལྟ་བུའི་དྲི་བྲལ་གྱི་བུ་མོ་ཞིག་ལ་གཉེན་བསྒྲིག་བྱས་ནས།

ནགས་ཚལ་གྱི་ཡལ་ག་རེ་རེ་འབྲི་འདོད།

སྟོང་ཉིད་ཀྱིས་རྟེན་འབྲེལ་ཡོད་ཚད་མོག་པར་བྱས།

ལྗང་ལོ་ལྟ་བུའི་དྭངས་གཙང་གི་ཁང་ཆུང་ཞིག་བཟོས་ནས།

མཚར་སྡུག་འབར་བའི་དབྱར་ཁ་ཞིག་འབྲི་འདོད།

དུས་ཚིགས་ཀྱི་རླུང་བུས་གྲང་ངར་བསུ།

མཚོ་མོ་ལྟ་བུའི་ཤེར་དཀར་གྱི་ཁྱིམ་གཞིས་བཟོས་ནས།

ངས་རང་གི་གྲིབ་ཡོལ་ཁྲིད་དེ་ལྷ་སར་ལོག་འདོད།

འཇིགས་རྔམ་གྱི་སེང་གེས་གཏམ་རྒྱུད་ལ་བཞི་ཤད་བྲིས།

སྤྲིན་དཀར་ལྟ་བུའི་དྭངས་གཙང་གི་སྟེགས་བུར་སྨོན་བཞིན།

གསེར་མདོག་གི་རྨི་ལམ་ཞིག་འབྲི་འདོད།

མཁྱེན་རྩལ་དམན་པས་ཤེས་རབ་གྱིས་མྱ་ངན་བཟོས།

ཐང་དཀར་ལྟ་བུའི་རྨི་ལམ་གྱི་རྟ་མཆོག་བཞོན་ནས།

དཔའ་རྩལ་ལྡན་པའི་མིག་ཟུང་སྤྱད་འདོད།

ཐོལ་གྱིས་ལྡིང་བའི་དུས་ནད་ཀྱིས་མཐོང་ལམ་ཡོད་ཚད་འགོག་པར་བྱས།