ཁྱིམ་ཚང་ཕལ་བའི་བྱིས་པ་ཞིག་ལ་མཚོན་ན་ཆུང་དུས་ནས་ཁྱིམ་ལས་ལ་བརྩོན་དགོས་མོད། ལི་ཆུང་ཕིང་ཀྱང་དེ་བཞིན་དུ་ཆུང་དུས་ནས་ཕ་མའི་ངལ་དུབ་དང་འཚོ་བའི་དཀའ་སྡུག་ལ་མྱོང་རོལ་ཟབ་མོ་འདུག ཁོ་མོས་ཉིན་རྒྱུན་དུ་རི་ངོར་ར་མ་འཚོ་རུ་འགྲོ་བ་དང་ར་རྫི་འགྲོ་རོགས་མུ་ལ་སི་ཡུལ་ཚོའི་ཨ་ཕྱི་རྒན་མོས་ལི་ཆུང་ཕིང་གིས་འབྲི་དེབ་རྙིང་པའི་ཐོག་ཏུ་བྲིས་པའི་རི་མོ་དང་ལྷམ་གདན། དེ་མིན་མགོ་རིས་གཙག་དྲུབ་མ་མཐོང་དུས་བསྟོད་བསྔགས་བྱས་ཤིང་ཡག་པོར་སྦྱོང་ཞེས་སྐུལ་མ་གནང་། རྗེས་ནས་ཨ་ཕྱི་ཁོང་གིས་མོ་ལ་རས་ཆ་གསར་པ་དང་གཙག་དྲུབ་བཟོ་བྱེད་ཀྱི་སྐུད་པ་མདོག་སྣ་ཚོགས་སྦྱིན་པར་མ་ཟད་གཙག་དྲུབ་ལག་རྩལ་བསླབས།
གཙག་དྲུབ་རྒྱུན་འཛིན་པ་ལི་ཆུང་ཕིང་།
དེ་བཞིན་དུ་ལི་ཆུང་ཕིང་གི་ཨ་མའང་སྡེ་པའི་ནང་གི་གཙག་དྲུབ་མཁས་ཤོས་ཡིན། རྒྱུས་ལོན་ལྟར་ན་ལི་ཆུང་ཕིང་ནི་ལི་ཚང་གི་གཙག་དྲུབ་རྒྱུད་འཛིན་པ་རབས་བཞི་པ་དང་། ཡང་མེས་བཀྲ་སྨན་དང་ཨ་ཕྱི་གསེར་སྨན། ཨ་མ་རིག་འཛིན་སྨན་བཅས་ཚང་མ་ནོར་ལུག་གི་ཁལ་དང་དར་ཁྲ། གཙག་དྲུབ་བཟོ་འཐག་བྱེད་པའི་རྒྱུད་འཛིན་པ་ཡིན་ཞིང་། ཆུང་དུས་ནས་དམངས་ཁྲོད་ལག་རྩལ་གྱི་རིགས་འདི་དག་ལ་སྤྲོ་བ་ལྡན་ཞིང་། ལོ་བཅོ་ལྔའི་སྟེང་ལ། ཨ་མས་ཁོ་མོར་སྐ་རགས་མེ་ཏོག་མ་གཙག་ལུགས་དང་གོན་པ་གཅོད་སྟངས་ཁྲིད། ཐེངས་དང་པོར་མོས་རང་ཉིད་ལ་ཕྱིང་བའི་སྟོད་གོས་ཤིག་བཟོས་ལ། ལུས་ལ་དེ་འདྲ་འཚམས་པ་མིན་མོད། རང་ཉིད་ཀྱི་སེམས་ཤུགས་དང་ངལ་རྩོལ་ལས་ཐོན་པའི་འབྲས་བུ་ཡིན་སྟབས། སེམས་ལ་དགའ་ཚོར་ཆེན་པོ་སྐྱེས། ཐེངས་ཤིག་ལ། ཨ་མ་ནད་ཀྱི་བཟུང་ནས་སྨན་ཁང་དུ་ཕྱིན་པ་དང་ཨ་ཕ་ནད་གཡོག་བྱེད་དུ་སོང་། དེ་བས་ཁྱིམ་མཚེས་ཚང་གིས་ལས་རྒྱུ་བཞག་པའི་ཝ་ཞྭ་བཟོ་རྒྱུ་དེ་འགོར་འགྱང་བྱས། མོས་ཐེངས་དང་པོར་ཝ་ཞྭ་བཟོ་གཅོད་བྱས་པ་ཡིན་པས། ཚད་ཐིགས་མ་ཤེས་པས་གཞན་གྱི་ཝ་པགས་བརླག་སོང་། ཨ་མ་སྨན་ཁང་ནས་བུད་རྗེས་ཡང་བསྐྱར་བཟོས་ནས་ལས་གླ་མི་ལེན་པར་མ་ཟད། གཞན་ལ་ཝ་པགས་ཀྱི་སྐྱིན་ཚབ་སྤྲད། དོན་དག་འདི་ཡིས་ལི་ཆུང་ཕིང་ལ་བག་ཆགས་ཟབ་མོ་བཞག་ཅིང་། དེ་ནི་མོ་རང་གི་གཙག་གྲུབ་མི་ཚེའི་ཁྲོད་ཆེས་བརྗེད་པར་དཀའ་བའི་སློབ་ཁྲིད་ཞིག་ཏུ་གྱུར།ལོ་24ཡི་དུས་སུ། གཞན་གྱི་ངོ་སྤྲོད་བྱས་པ་བརྒྱུད་ཀྱོ་སྨད་ཡུལ་ཚོའི་ཁྲིན་ཧྲང་ཆོན་ངོ་ཤེས་ཤིང་།1993ལོར་བཟའ་སྒྲིག་བྱས་ནས་ཁྱིམ་ཚང་ཆགས། ཁྱིམ་གྱི་བྱིས་པ་གཉིས་ཀྱང་སྦྱངས་འབྲས་ཤིན་ཏུ་བཟང་བས་ཁོ་མོའི་རྒྱན་དུ་གྱུར། ལི་ཆུང་ཕིང་ལ་མཚོན་ན་གཙག་གྲུབ་གྱི་ལག་རྩལ་ཡར་རྒྱས་ཆེན་པོ་བྱུང་ཡོད་པར་མ་ཟད། བདེ་སྐྱིད་ཀྱི་ཁྱིམ་གཞིས་ཤིག་ཀྱང་ལྡན། 2002ལོར་མོས་ཝང་ཅ་ཡུལ་ཚོ་ནས་ཁང་པ་7བཟོ་སྐྲུན་བྱས་ཤིང་། དེའི་ཁྲོད་ནས་ཁང་པ་གཅིག་ཆེད་དུ་གཙག་གྲུབ་དང་བོད་ལྭ་བཟོ་གཅོད་ལ་བཀོལ་སྤྱོད་བྱས་ཤིང་། ཁྱིམ་མཚེས་དག་གི་མགོ་དཀྲིས་དང་སྐ་རགས། ལྭ་བ་བཟོ་བ་སོགས་སྒྲུབ་པ་དང་། ཁྱིམ་མཚེས་ཚོས་མོ་ལ་ཞིང་ལས་དང་ཁྱིམ་གྱི་ལས་ཀ་གཉེར་གྲོགས་བྱས། ཁྱིམ་མཚེས་ཚོར་རོགས་བྱེད་དུས་གླ་ཆ་ཅི་ཡང་ལེན་བཞིན་མེད་ལ། དེ་བས་ཁྱིམ་མཚེས་ཚོས་དུས་རྒྱུན་མོ་ལ་སྔོ་ཚལ་དང་ཕག་ཤ མར་དང་ཕྱུར་བ་སོགས་གནང་བཞིན་འདུག འདི་ལྟར་མོ་རང་ཁྱིམ་མཚེས་དང་འབྲེལ་བ་བཟང་ཞིང་། ཡུལ་ལུང་ཁྲོད་ཀུན་གྱི་ཁ་ཆོད་པའི་མ་སྲིན་ཡ་རབས་ཤིག་ཏུ་གྱུར།
2012ལོར། གཙག་གྲུབ་ཀྱི་ལས་འདི་རྒྱ་བསྐྱེད་པ་དང་བཟོ་རིགས་གཞི་ཁྱོན་ཆེ་བར་བཟོ་ཆེད། མོ་དང་མོའི་ཁྱོ་གས་སྒོར་ཁྲི་12ལྷག་བཏང་ནས་མཁོ་ཚོང་ཐོག་ཁང་འོག་ནས་ཚོང་ཁང་འཛུགས་ས་གཅིག་ཉོས། དུས་དེ་ནས་བཟུང་། ཡུལ་མི་མང་པོ་ཞིག་བོད་ལ་བཟོ་བ་དང་བོད་ལྭ་གཙག་གྲུབ་སྐོར་གྱི་ཉམས་མྱོང་བརྗེ་རེས་སོགས་བྱེད་མཁན་གྱི་མགྲོན་པོ་རྒྱུན་མི་ཆད། ཁོ་ཚོས་བཤད་ན། ང་ཚོ་ཚང་མ་ལི་ཆུང་ཕིང་གི་སྐུ་མགྲོན་ཡིན་ལ། དེ་བས་ཀྱང་ང་ཚོའི་གྲོགས་པོ་བཟང་པོ་ཡིན་ཟེར། ཁོ་མོའི་བཟོ་ཁང་དུ་ཐོན་དུས་གྱང་ངོས་སུ་གནའ་བོའི་གཙག་གྲུབ་དང་འདྲ་བའི་མི་སྣ་དང་མཛེས་ལྗོངས། བྱ་བྱིའུ་འབའ་འབུ་ལ་སོགས་མང་པོ་བཀལ་ཡོད།
ལི་ཆུང་ཕིང་གི་ཁྱིམ་དུ་གཙག་གྲུབ་དངོས་པོ་གཉིས་ཉར་ཚགས་བྱས་ཡོད་ལ། དེ་དག་ལ་ངོ་མཚར་གཏམ་རྒྱུད་ཡོད་ལ། ལྭ་བ་འདི་གཉིས་ལ་ལོ་ངོ་ཉིས་བརྒྱ་ལྷག་གི་ལོ་རྒྱུས་ལྡན་ཞིང་། མ་གཞི་དེ་ནི་ཞེ་ཆི་འགོ་པའི་ལྭ་བ་ཡིན་ལ། རིག་གསར་གྱི་དུས་སུ། ཞེ་ཆི་འགོ་པའི་བུ་བཀྲ་ཤིས་ཚོགས་ཀྱིས་ལྭ་བ་འདི་གཉིས་དང་འདོགས་ཆ་སོགས་བྲག་ཕུགས་ཁྲོད་ཀྱི་དུར་སྒམ་དུ་སྦས། སྦས་པའི་གནས་ཚུལ་ཡིག་ཐོག་ཏུ་བྲིས་ནས་གཙུག་ལག་ཁང་གི་གྱང་སྲིབས་སུ་བཅུགས། ལོ་ངོ་40ཡི་སྔོན་ལ། འགོ་པའི་རྒྱུད་པ་ཚོས་གཙུག་ལག་ཁང་བསྐྱར་གསོ་བྱེད་དུས། ཁྱིམ་རྒྱུད་ཀྱི་ནོར་བུ་འདི་རྙེད་པ་རེད་ཟེར།
རྒྱལ་རོང་གི་བོད་ཀྱི་གཙག་གྲུབ་རིག་གནས་རྒྱུད་འཛིན་བྱེད་པའི་ཁྲོད་དུ། ལི་ཆུང་ཕིང་ལ་རིམ་པ་སོ་སོའི་བྱ་དགའ་མང་པོ་ཐོབ་མྱོང་ལ། ད་ལྟ་བཙན་ལྷ་རྫོང་གི་བོད་སྨན་གོས་རྒྱན་རིག་གནས་ལས་གཞི་དེ་རྔ་བ་ཁུལ་གྱི་ཤུལ་བཞག་རིག་གནས་ཀྱི་རྣམ་གྲངས་སུ་བཞག་ཡོད་ལ། མོ་ལ་ཁུལ་རིམ་པའི་བོད་སྨན་གོས་རྒྱན་རིག་གནས་ཀྱི་རྒྱུད་འཛིན་པའི་དཔང་ཡིག་ཐོབ། 2013ལོར་མོ་ལ་རྔ་བ་ཁུལ་སྐབས་གསུམ་པའི་ཞིང་པའི་ལག་རྩལ་འགྲན་སྡུར་ཆེན་མོའི་སྐབས་སུ་གོས་རྒྱན་ཇུས་འགོད་ཀྱི་བྱ་དགའ་ཨང་གཉིས་པ་ཐོབ། 2017ལོའི་ཟླ་6པར། སྐབས་དྲུག་པའི་ཀྲུང་གོ་ཁྲེན་ཏུའུ་རྒྱལ་སྤྱིའི་གཟུགས་མེད་ཤུག་བཞག་རིག་གནས་དུས་ཆེན་ལ་ཞུགས་ནས། ཉི་མའི་ལྷ་བྱའི་བྱ་དགའ་ཐོབ་པ་དང་། མི་རབས་གསར་པའི་རྒྱུད་འཛིན་སྐར་ཆེན་གྱི་བྱ་དགའ་ཡང་ཐོབ་པ་རེད། །