སློབ་དཔོན་ཆེན་མོ་ཤར་པ་ཐོགས་མེད།
西南民族大学教授、博士生导师同美
གཟའ་ཉི་མའི་ཕྱི་དྲོ་ས་འོག་ལྕགས་ལམ་ལ་བསྡད་ནས་ལྷོ་ནུབ་མི་རིགས་སློབ་གྲྭ་ཆེན་མོའི་སློབ་ཁུལ་རྙིང་པའི་ཕྱོགས་སུ་སྐྱོད། གཟའ་མཇུག་གི་སློབ་ར་ནི་ཧ་ཅང་སྙིང་ཉེ་བའི་ཟོལ་གྱིས་ལྷིང་འཇགས་ཀྱི་ཁམས་སུ་རོལ་ལ། ཉི་འོད་ཀྱི་མཚན་དུ་གསོལ་བའི་དགེ་བའི་བཤེས་གཉེན་རྣམ་པ་དང་ཤེས་བརྩོན་གྱི་སྨོན་པ་ལང་ཚོའི་དཔལ་སྟོབས་སུ་འཕྱོ་བའི་སློབ་མ་ཚོའི་འོ་ཆུ་ལྟ་བུའི་བརྩེ་འདང་དང་བ་དཀར་ལྟ་བུའི་ཞི་དུལ་བག་ཡོད་ཀྱི་གཤིས་རྒྱུད་ཀྱིས་ཡིད་སེམས་དབང་མེད་དུ་འཕྲོག །ཉིན་དེར་རང་ཉིད་གསར་ལམ་གྱི་ལས་སུ་འགྲེང་བའི་བྱེད་པོ་ཞིག་གི་ཚུལ་དུ་བཅར་འདྲི་ཞིག་གི་ལས་འགན་ཡོད་པས། ཤེས་བློའི་སྣང་ཁམས་སུ་འཚབ་འཚུབ་ཀྱི་སྣང་བ་ཞིག་དབང་མེད་དུ་སྐྱེས་བྱུང་། རྒྱུ་མཚན་ནི་གུས་པའི་དགེ་རྒན་འབུམ་རམས་པའི་སློབ་མ་གསར་པ་བསྡུ་བར་བྲེལ་བཞིན་ཡོད་པས། ཡོན་ཏན་གྱི་ལྕི་བོ་ཉིད་ཀྱི་གཟའ་མཇུག་གི་ངལ་གསོའི་དུས་ཚོད་མི་སྤྱོད་ཐབས་མེད་བྱུང་། དེ་ནས་ལྷོ་ནུབ་མི་རིགས་སློབ་གྲྭ་ཆེན་མོའི་སློབ་ཁང་དང་པོའི་ཐོག་བརྩེགས་དྲུག་པའི་སྟེང་ནས་སློབ་དཔོན་ཆེན་མོ་ཐོགས་མེད་ལ་བཅར་འདྲི་བྱེད་པའི་སྐལ་བ་ལྡན་བྱུང་། ཁེངས་སྐྱུང་དང་བག་ཡངས། དེ་མིན་རྩེད་མཚར་ཅན་གྱི་གཤིས་ཀ་ནི་ཁོང་གིས་ང་ལ་སྦྱིན་པའི་བག་ཆགས་ཐོག་མ་ཡིན། ངའི་འཚབ་འཚུབ་ཀྱི་སེམས་པ་ལ་ལྷོད་དུ་བབས་པའི་ཁོར་ཡུག་ཅིག་ཀྱང་སྦྱིན།
1989ལོར་མཁས་དབང་དམུ་དགེ་བསམ་གཏན་དང་མཉམ་དུ་བསྐྱོན་པའི་འདྲ་པར།
1989年与毛尔盖桑木旦大师合影留念
2018ལོར་ཁོང་གིས་མཛུབ་སྟོན་གནང་བའི་འབུམ་རམས་སློབ་མ་རྣམ་འབྱོར་འཕྲིན་ལས་དང་ཀུན་དཔལ་ཚེ་རིང་གཉིས་ཀྱི་དཔྱད་རྩོམ་ཁ་བྱང་གཏན་འབེབས་ཀྱི་བགྲོ་གླེང་ཚོགས་འདུའི་ཐོག་གི་མཉམ་པར།
2018年同美教授指导的博士研究生闹久次力和更合才让两位同学开题留影。
ཁོང་གིས་དཀའ་ངལ་གང་མང་བརྒྱུད་ནས་ཀྲུང་གོའི་བོན་ཆོས་ཞིབ་འཇུག་ལྟེ་གནས་གསར་སྒྲུབ་མཛད་ཅིང་། སྔ་གཞུག་ཏུ་རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་རྣམ་གྲངས་གལ་ཆེན《བོན་ཆོས་རྣམ་བཤད།》ཅེས་པའི་དབུ་བཞུགས་ཆེད་མཁས་པའི་འགན་འཁུར་བ་དང་། སི་ཁྲོན་ཞིང་ཆེན་གྱི་ཞིང་ཆེན་རིམ་པའི་སྤུས་ལེགས་སློབ་ཚན་《རིིག་གནས་ལྔའི་རྣམ་བཤད།》སློབ་ཁྲིད་ཀྱི་འགན་བཞེས་པ། རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་རྣམ་གྲངས་གལ་ཆེན་གཅིག་དང་། རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་སྤྱིར་བཏང་རྣམ་གྲངས་གཅིག །ཞིང་ཆེན་དང་པུའུ་རིམ་པའི་སྤྱི་ཚོགས་ཚན་རིག་ཐེབས་རྩའི་རྣམ་གྲངས་དྲུག །ཆེད་དེབ་10(འདིའི་གྲལ་དུ་མཉམ་ལས་བྱས་པའང་ཚུད)དཔེ་སྐྲུན་བྱས་པ། ཚད་ལྡན་དུས་དེབ་ཐོག་ཏུ་དཔྱད་རྩོམ་50ལྷག་སྤེལ་ཡོད། རྒྱལ་ཁབ་རིམ་པའི་སྤྱི་ཚོགས་ཚན་རིག་གི་ཕུལ་བྱུང་གྲུབ་འབྲས་བྱ་དགའ་གཅིག་དང་། ཞིང་ཆེན་དང་པུའུ་རིམ་པའི་ཕུལ་བྱུང་སློབ་ཁྲིད་གྲུབ་འབྲས་བྱ་དགའ་གཅིག་བཅས་ཐོབ་ཡོད།
国际本教文化研讨会（法国）马克、查理森兰博、同美
ཉེ་བའི་ལོ་འགའི་རིང་ཞིབ་འཇུག་བྱེད་ཡུལ་གཙོ་བོ་ནི་བོད་ཀྱི་ཆོས་ལུགས་རིག་པ་དང་བོད་ཡིག་ཡིག་ཚགས་རིག་པ་རེད། སྔ་རྗེས་སུ་བོད་ཀྱི་ཆོས་ལུགས་དང་ཡིག་ཚགས་འབྲེལ་ཡོད་ཞིབ་འཇུག་བྱ་གཞི་གཙོ་སྐྱོང་བྱས་ནས་ལེགས་སྒྲུབ་བྱས་པ་ནི་2011ལོའི་རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་རྣམ་གྲངས་《བོན་ཆོས་ཀྱི་བཀའ་བསྟན་ལས་བསྟན་འགྱུར་སྡེ་ཁག་གི་དཀར་ཆག་གནད་བསྡུས》(རྣམ་གྲངས་མཆན་ཨང་། 11BZJ006)ཡིན་པ་དང་། 2014ལོའི་རྒྱལ་ཁབ་སློབ་གསོ་པུའུ་ཡི་སྤྱི་ཚོགས་ཚན་རིག་ཐེབས་རྩའི་དུས་མཇུག་གི་རོགས་དངུལ་རྣམ་གྲངས《བོན་ཆོས་དང་དེའི་ཉེ་འཁོར་གྱི་ཆོས་ལུགས་རིག་གནས་འབྲེལ་བའི་ཞིབ་འཇུག》(རྣམ་གྲངས་མཆན་ཨང་14JHQ004)དང་། 2015ལོའི་ལྷོ་ནུབ་མི་རིགས་སློབ་ཆེན་གྱི་ཀྲུང་དབྱང་མཐོ་སློབ་ཕུལ་བྱུང་ཚོགས་པའི་གསོ་སྦྱོང་རྣམ་གྲངས་ཀྲུང་གོའི་ལྷོ་ནུབ་ཁུལ་གྱི་མི་རིགས་མང་པོའི་འབྲེལ་མཚམས་ཁུལ་ནས་གསར་དུ་རྙེད་པའི་བོད་ཡིག་ཡིག་རྙིང་དང་ཡིག་ཚགས་སྲུང་སྐྱོབ་དང་བསྡུ་སྒྲིག་ཞིབ་འཇུག(ལས་གཞིའི་ཨང་ཀི་2015SZYTD01)དང་། ཚབ་མཚོན་བརྩམས་ཆོས་ལ་《ཞང་ཞུང་ཤེས་རིག་གི་ཞིབ་འཇུག》《བོན་ཆོས་ཞིབ་འཇུག་》《རྒྱལ་རོང་བོད་རིགས་ཀྱི་ལོ་རྒྱུས་དང་རིག་གནས།》《བོད་རིག་གནས་ཀྱི་འཚོལ་ཞིབ་གསར་པ།》བཅས་ཡོད། ཚབ་མཚོན་དཔྱད་རྩོམ་ལ་《གཡུང་དྲུང་བོན་ནི་བོད་བརྒྱུད་ནང་བསྟན་གྱི་ཁྱད་ཆོས་མཚོན་བྱེད་ཆེས་ཁྱད་པར་ཅན་དེའོ།》《བོད་དང་རྒྱ་གར་རིག་གནས་ཀྱི་མཐོང་རྒྱའི་འོག་གི་གངས་ཏི་སེ་རི་བོའི་དད་བཀུར་དང་དེའི་ཁྱད་ཆོས།》《བོད་ཀྱི་རིག་གནས་ཐད་ནས་སན་ཤིན་ཏའུ་ས་འོག་ནས་རྙེད་པའི་འཁར་ཞལ་འཁར་ཞུའི་མཚོན་དོན་གང་ཡིན་ལ་དཔྱད་པ།》《བོད་ཀྱི་རིག་གནས་ཐད་ནས་ཁྲེན་ཏུའུ་ཅིན་ཧྲ་ས་འོག་ན་རྙེད་པའི་གསེར་འཁོར་གསེར་ཞལ་གྱི་མཚོན་དོན་གང་ཡིན་ལ་དཔྱད་པ།》བཅས་ཡོད།
十一届国际藏学会（波恩）与康噶格桑次成教授合影留念
ཁོང་གིས་ནམ་ཡང་སེམས་པ་རྣམ་དག་དང་ཁ་ཞེ་གཉིས་མེད་སྒོས་སློབ་གསོའི་བྱ་གཞག་དང་། རང་མི་རིགས་རིག་གནས་འཕེལ་རྒྱས། ལྷག་པར་དུ་བོད་ཀྱི་ཞང་ཞུང་རིག་གནས་དང་ཡིག་ཚགས་རིག་གནས་སྐོར་ལ་འཛིན་སྐྱོང་སྤེལ་གསུམ་ལ་འབད་པ་རྒྱུན་སྐྱོང་བྱེད་བཞིན་ཡོད། ཁོང་གིས་གསུང་རྒྱུར། ཁོ་རང་ཕྱི་རྒྱལ་དང་རང་རྒྱལ་གྱི་སློབ་གྲྭ་མིང་གྲགས་ཅན་དུ་རིག་གཞུང་བགྲོ་གླེང་བྱེད་པར་འགྲོ་སྐབས། ཁོང་ཚོས་བོད་མི་རིགས་ཀྱི་རིག་གནས་ལ་མཐོང་ཆེན་དང་གདེང་འཇོག་མཐོན་པོ་བྱེད་བཞིན་ཡོད། སྣང་ཚུལ་དེ་དག་མཐོང་དུས་བོད་པ་ཞིག་གི་ཆ་ནས་དེ་ལས་ལྷག་པར་རང་མི་རིགས་ཀྱི་རིག་གནས་ལ་སློབ་སྦྱོང་དང་ཞིབ་འཇུག་བྱེད་པའི་འོས་འགན་ཡོད་པའི་བསམ་བློ་སྐྱེས། ང་ཚོའི་མེས་པོ་ཚོས་དེ་འདྲའི་གྱ་ནོམ་པའི་རིག་གནས་བསྐྲུན་ཡོད་ལ། ང་ཚོས་ལོངས་སྤྱོད་རྐྱང་པ་ལས་ཕུལ་བྱུང་གི་རིག་གནས་ནང་འདྲེན་དང་གསར་སྐྲུན་བྱེད་པར་འབད་ནས་། ཉམས་པ་སླར་གསོ་དང་མ་ཉམས་པ་གོང་སྤེལ་བྱ་རྒྱུ་ནི་ང་ཚོའི་འོས་འགན་ཡིན། ང་རང་དགེ་རྒན་ཞིག་ཡིན་པའི་ཆ་ནས། རིག་གཞུང་ལ་ཞིབ་འཇུག་དང་སློབ་མ་སྐྱོང་རྒྱུའི་མཐུན་རྐྱེན་ལྡན་པ་ནི་རང་ཉིད་ཀྱི་སྔོན་བསགས་ཀྱི་བསོད་ནམས་ཡིན་པར་མ་ཟད། རང་གི་འགན་འཁྲི་ཡང་ཡིན་ཞེས་གསུངས་བྱུང་།
创办中国西藏本教研究中心
སློབ་དཔོན་ཆེན་མོ་ཤར་བ་ཐོགས་མེད་ལགས་ནི་བོད་ཀྱི་རིག་གནས་ཞིབ་འཇུག་ལ་དགའ་ཞེན་ཡོད་པ་དང་སློབ་མ་ལ་ལྷག་བསམ་རྣམ་དག་བཅངས་པའི་དོན་དངོས་ཀྱི་སློབ་དཔོན་ཆེན་མོ་དང་། མི་ཚེ་ཧྲིལ་པོར་བོད་ཀྱི་རིག་གནས་ཞིབ་འཇུག་ལ་བློ་སེམས་རྩེ་གཅིག་ཏུ་གཞོལ་བས་མཛུབ་མོ་ནང་འགུག་གིས་བགྲང་དུ་རུང་བའི་ཆེད་མཁས་པ་ཞིག་རེད། །
སློབ་དཔོན་ཐོགས་མེད་ཚང་།
同美教授一家人在尼泊尔