དྲ་བ་དང་ཆ་འཕྲིན་ཅན་གྱི་དུས་རབས་སུ་སླེབས་དུས། ཡིག་གཟུགས་ཇུས་འགོད་ཀྱི་ནུས་པ་འདོན་སྤེལ་ཆེན་པོ་བྱུང་དང་འབྱུང་བཞིན་ཡོད་མོད། འོན་ཀྱང་རྩིས་འཕྲུལ་དང་ལག་ཁྱེར་ཁ་པར་སོགས་དར་ཁྱབ་ཆེ་བ་དང་བསྟུན་ནས་སུག་བྲིས་མི་འབྱོར་བའི་མི་ཚོགས་ཇེ་མང་ནས་ཇེ་མང་དུ་འགྲོ་བཞིན་ཡོད་ལ། ཡིག་གཟུགས་ཀྱི་བྲིས་རྒྱུན་ཡང་ལོ་རེ་ནས་ཟླ་རེར་ཆད་འགྲོ་བའི་ཉེན་ཁ་ཤིན་ཏུ་ཆེ། དེ་ནས་ཡིག་གཟུགས་བྱ་གཞག་དར་རྒུད་ཀྱི་འགག་མདོར་སླེབས་པའི་སྐབས་འདིར་རིག་བསྟན་གྱི་བོད་ཡིག་དངོས་སྣང་ཡིག་གཟུགས་ནི་གཟི་འོད་འཕྲོ་བའི་ནོར་བུ་དགའ་འཁྱིལ་ཞིག་དང་མཚུངས་པ་ཚང་མའི་བསོད་ནམས་ཀྱི་བགོ་སྐལ་དུ་བབས། རིག་བསྟན་གྱི་གསར་གཏོད་ཀྱི་ཆ་ལྡན་པའི་བོད་ཡིག་དངོས་སྣང་ཡིག་གཟུགས་ནི་བོད་ཡིག་གི་སྲོལ་རྒྱུན་བྲིས་རྒྱུན་གྱི་རྩ་དོན་གཞིར་བཟུང་བའི་རྨང་གཞིའི་ཐོག དེང་རབས་སྤྱི་ཚོགས་སུ་ཡིག་གཟུགས་ཇུས་འགོད་ཀྱི་དགོས་མཁོ་བསྐང་ཆེད། བོད་ཀྱི་ཡིག་གཟུགས་དེ་བྱ་དངོས་ཀྱི་སྣང་བརྙན་དང་བསྟུན་ནས་བསྡུར་འབྲེལ་མཐུད་ལྟེབ་དང་། རྒྱབ་ལྗོངས་མཛེས་བཟོ་སོགས་ཀྱི་བྱེད་ཐབས་བརྒྱུད་ནས་མཚོན་སྟངས་སྣ་མང་དང་བྲིས་སྲོལ་མི་འདྲ་བའི་དངོས་སྣང་གི་སྒྱུ་རྩལ་ཡིག་གཟུགས་བརྩམས་ཆོས་ལ་ཟེར་ཞིང་། བོད་ཀྱི་ཡིག་གཟུགས་འཕེལ་རྒྱས་ཀྱི་ལོ་རྒྱུས་དང་སྒྱུ་རྩལ་ཐོག་གསར་གཏོད་ཀྱི་ཉམས་ཆེ་ཤོས་ཤིག་ཡིན།
དགེ་རྒན་ཆེན་མོ་རིག་འཛིན་བསྟན་སྲུང་གིས་བོད་ཀྱི་སྐད་ཡིག་སློབ་ཁྲིད་དང་ཞིབ་འཇུག་གནང་ནས་ལོ་30ལྷག་སོང་བ་དང་དུས་མཉམ་དུ། བོད་ཀྱི་ཡིག་གཟུགས་སྒྱུ་རྩལ་སློབ་ཁྲིད་དང་ཞིབ་འཇུག་ལས་ཀའི་ཁུར་ཆེན་ཡང་མ་བསྐུལ་དང་བླངས་ཀྱིས་བཞེས་པ་རེད། ཁོང་གིས1986ལོར་ནས་བཟུང་བོད་ཡིག་དངོས་སྣང་ཡིག་གཟུགས་གསར་འབྲི་དང་ཞིབ་འཇུག་བྱས་པ་དང་། རིམ་བཞིན་ཉམས་མྱོང་གསོག་འཇོག་དང་ལག་ལེན་བྱེད་པའི་ཁྲོད་དུ་ཐུན་མོང་མ་ཡིན་པའི་ཁྱད་ཆོས་ལྡན་པའི་བོད་ཡིག་ཡིག་གཟུགས་སྒྱུ་རྩལ་གྱི་རྣམ་པ་མཚོན་སྟངས་གསར་པ་ཞིག་ཚང་མའི་མིག་གི་དགའ་སྟོན་དུ་ཕུལ་བ་དང་ཆབས་ཅིག བོད་ཡིག་ཡིག་གཟུགས་སྒྱུ་རྩལ་ཕུན་སུམ་ཇེ་ཚོགས་སུ་བཏང་།
ཁོང་གིས་ཕྱག་བྲིས་གནང་བའི་ཡིག་གཟུགས་བརྩམས་ཆོས་ཞིང་ཆེན་དང་ཁུལ་གྱི་ཡིག་གཟུགས་འགྲེམས་སྟོན་དང་འགྲན་བསྡུར་རིགས་མང་ཁྲོད་དུ་ཞུགས་པར་མ་ཟད་གསེར་གྱི་རྟགས་མ་དང་ཕུལ་བྱུང་བྱ་དགའ་དུ་མ་ཐོབ་པ་དང་། 《བོད་ཀྱི་ཡིག་གཟུགས་ཀྱི་རིགས་གཞུང་དང་ལག་ལེན།》ཞེས་པའི་ཆེད་རྩོམ་ཡང་བྲིས་ནས་པར་སྐྲུན་བྱས།
རིག་བསྟན་གྱི་བོད་ཡིག་དངོས་སྣང་ཡིག་གཟུགས་ལ་ཡིག་གཟུགས་ཇུས་འགོད་རང་བཞིན་དང་དབྱེ་འབྱེད་རང་བཞིན། སྒྱུ་རྩལ་རང་བཞིན་ལྡན་པར་མ་ཟད། སྒྲིབ་མེད་མཐོང་ཐབས་དང་། འབུར་རྐོས་ཀྱི་ཐབས། གྲིབ་ནག་གི་ཐབས་སོགས་ཡིག་གཟུགས་ཀྱི་དངོས་སྣང་བྱེད་ཐབས་བཀོལ་ནས་རྩ་གཉིས་བར་གསེང་ལས་རིང་དུ་བརྒལ་ཞིང་མི་རྣམས་ཀྱི་མཐོང་ཚོར་དབང་པོ་ལ་ངོ་མཚར་བའི་ལོངས་སྤྱོད་ཀྱང་སྟེར་བའོ།།
ང་ཚོས་རིག་བསྟན་གྱི་བོད་ཡིག་དངོས་སྣང་ཡིག་གཟུགས་ལ་བལྟས་པ་ཙམ་གྱིས་སྙོམ་གཙང་འགྲིག་གསུམ་ལྡན་པ་དང་། །ལེགས་མགྱོགས་དག་གསུམ་ཚང་བ། ཞྭ་ནི་མི་ཆེ་ཆར་མི་ཁོགས། །རྐང་ནི་མི་རིང་ཆུ་མི་འབོག །ལྟོ་བ་མི་ཆེ་མུ་གེ་མེད། །ཉེས་ནི་མ་བྱས་མིག་མ་བཅར། །ཡིག་འབྲུ་ཚོ་ན་བཤའ་མི་དགོས། །ཁྱིམ་མཚེས་དག་ལ་གནོད་མ་བྱེད་ཅེས་པའི་ཚད་གཞི་ཚང་ཡོད་པ་ཤེས་ནུས་སོ། །