ཤིས་ཚིག་དར་དཀར་རིང་མོ།

    གངས་རིའི་ར་བས་ཡོངས་སུ་བསྐོར་བའི་བོད་གངས་ཅན་གྱི་ལྗོངས་འདིར་མདོ་དབུས་ཁམས་གསུམ་གྲགས་པའི་ནང་གསེས་མདོ་ཁམས་སྡེ་བཞི་དགེ་བཅུས་ཕྱུག་པའི་ཞིང་ཁམས་ཀྱི་རྒྱལ་སའི་ལྟོ་བ་རུ་མཐོ་དམན་དང་ཕྱུག་ཞན་མེད་པར་མི་ན་བར་ཚེ་རིང་དུ་གནས་ནས་མི་ལུས་རིན་ཆེན་དེ་ཉིད་དོན་དང་ལྡན་པར་བདེ་དགའི་དཔལ་ལ་ཡུན་རིང་དུ་རོལ་བར་བྱེད་པ་དང་། གལ་ཏེ་འབྱུང་བཞི་འཁྲུགས་ནས་མི་འདོད་པའི་ནད་དང་གདོན་གྱིས་མནར་བའི་འགྲོ་བ་རིགས་སུ་མ་ཆད་པར་ནད་ཀྱི་སྡུག་བསྔལ་ལས་གྲོལ་བར་བྱེད་པའི་བོད་ཀྱི་གསོ་བ་རིག་པའི་སྨན་ཁང་སྡེ་དགེ་རྫོང་སྨན་རྩིས་ཁང་ཞེས་གྲགས་པ་འདི་འཁྲུངས་ནས་ད་བར་བགྲང་བྱ་60འཁོར་བར་བཀྲ་ཤིས་བདེ་ལེགས་ཞུ་རྒྱུ་དང་། སྡེ་དགེ་རྫོང་སྨན་རྩིས་ཁང་ནི་འདས་མ་ད་གསུམ་ལས་འདས་པའི་ལོ་ཟླ་དང་ད་ལྟའི་ཆར་འགྲོ་བ་མིའི་རིགས་ལ་ཕན་པ་བླ་མེད་སྒྲུབ་མཁན་གྱི་མཁས་དབང་གསེར་རི་ལྟ་བུ་མིང་དོན་མཚུངས་པ་དུ་མ་བྱོན་དང་འབྱོན་བཞིན་པ་དང་དེ་དག་གིས་ནད་འགོག་སྨན་བཅོས་དང་མི་སྣ་གསོ་སྐྱོང་སོགས་ཀྱི་མཛད་རྗེས་བླ་ན་མཐོ་ཞིང་སྨྲ་བརྗོད་ལས་འདས་པའི་ཕྱག་རྗེས་བཟང་པོ་དུ་མ་བཞག་དང་འཇོག་བཞིན་ཡོད།

དེས་ན་མ་འོངས་པར་མུ་མཐུད་དུ་མེས་པོ་གོང་མ་རྣམ་པར་བྱ་མིག་གྱེན་ལྟས་ཀྱིས་སོ་སོའི་ཁྱད་དུ་འཕགས་པའི་ཁྱད་ཆོས་དང་འབུར་དུ་ཐོན་པའི་ལེགས་སྐྱེས་རྣམས་མི་ཉམས་གོང་སྤེལ་དང་ཉམས་པ་སླར་གསོའི་ཐོགས་མགོན་མེད་འགྲོ་བ་ཉམས་ཐག་ནད་པའི་ཚོགས་ཀྱི་མགོན་སྐྱབས་མིང་དོན་མཚུངས་པ་ཡོང་བའི་ཡིད་ཆེས་དང་རེ་སྨོན་གྲངས་མང་བཅས་སོ། །

ཞེས་གུས་ཁྲོ་ཚ་བསོད་ནམས་འཆི་མེད་ནས་བོད་རབ་བྱུང་17པའི་སྒྱུར་བྱེད་ལོའི་ཟླ་ཚེས་བཟང་པོར་ཕུལ།