སྡེ་དགེ་རྫོང་སྨན་རྩིས་ཁང་བཙུགས་ནས་ལོ་འཁོར་དྲུག་ཅུ་ལོན་པའི་ཤིས་ཚིག

ཁམས་ཀྱི་སྡེ་དགེ་རིག་པ་འབྱུང་བའི་ས་སྒང་གོ་ལའི་གཙུག་རྒྱན་ཡིན། །

བཅུ་ཕྲག་རིག་གནས་མངལ་དུ་སྦྲུམ་པའི་བཀྲ་ཤིས་སྒོ་མང་མངོན་པར་མཐོ། །

ཟུར་ལུགས་བསྟན་པའི་བ་དན་དཀར་པོ་གནས་མཆོག་འདི་ནས་ལྷབ་ལྷབ་གཡོ། །

ས་ལ་བཀྲ་ཤིས་དགེ་བཅུ་ཚང་ཞིང་རིག་པའི་མེ་ཏོག་ཕྱོགས་ཀུན་མཐོར། །

ཕུན་ཚོགས་སྡེ་བཞིས་གནས་འདི་ཕྱུག་ཅིང་དགེ་བཅུ་སྲོལ་བཟང་མ་ཉམས་པའི། །

ཡ་རབས་གོམས་གཤིས་གཙུག་ཏུ་བཀུར་ཞིང་གདོད་མའི་ལོ་རྒྱུས་གཏིང་ཟབ་པའི། །

ཁམས་པའི་རིག་གནས་ལྟེ་བ་གྲགས་པའི་འབྲི་ཟླ་ཟལ་མོ་སྒང་གི་ཆར། །

གནས་ཀྱི་མཆོག་དང་ས་ཡི་ཡང་རྩེ་ཀུན་གྱིས་སྨོན་པའི་སྡེ་དགེ་བ། །

རྒྱལ་རབས་རིམ་བྱོན་དུ་མའི་དབུས་སུ་མཛད་རྗེས་གཞན་ལས་འཕགས་པ་ཞིག །

འབངས་ལ་རྟག་ཏུ་ཐུགས་བརྩེས་བསྐྱངས་ཤིང་ཆོས་སྲིད་བསྟན་པ་སྲོག་ལྟར་གཅེས། །

ཤར་གྱི་དཔལ་སྤུངས་དྲན་ཐང་ལ་སོགས་དགོན་སྡེ་བཅུ་བདུན་གསར་བཞེངས་མཛད། །

སེར་པོ་གསེར་དང་དངུལ་གྱིས་བྲིས་པའི་བཀའ་དང་བསྟན་འགྱུར་ཨེ་མ་རྨད། །

རྟེན་དང་བརྟེན་པ་ཁྱད་དུ་འཕགས་པའི་སྤར་ཁང་ཆོས་མཛོད་ཆེན་མོ་སྟེ། །

རྒྱལ་བའི་བཀའ་དང་བསྟན་འགྱུར་ལ་སོགས་བཅུ་ཕྲག་རིག་པའི་གནས་ཆེན་ཀུན། །

གཞན་ལ་མེད་པའི་སྒྲོན་མེ་ཚེ་འབར་ས་སྒང་གོ་ལའི་ཏོག་མཛེས་པའི། །

བཀའ་དྲིན་སྲིད་ན་གཞལ་དུ་མེད་པའི་ཆོས་རྒྱལ་བསྟན་པ་ཚེ་རིང་ལགས། །

གྲུབ་པའི་སྐྱེས་བུ་ཐང་སྟོང་རྒྱལ་པོ་གནས་མཆོག་འདི་རུ་ཞབས་ཀྱིས་བཅགས། །

སྤྱི་ལོ་གཅིག་བཞི་ལྔ་ཐིག་ལོ་དེར་ཐང་རྒྱལ་ལྷ་ཁང་གསར་བཞེངས་མཛད། །

བཞི་བརྒྱ་རྩ་བཞི་ནད་རིགས་ཀུན་འཇོམས་རིལ་བུ་དཀར་པོའི་སྦྱོར་བ་གནང་། །

ཁྱེད་ནི་འགྲོ་བའི་མགོན་པོ་དངོས་ཡིན་འཚོ་མཛད་སྨན་པའི་ཡབ་ཆེན་ཞིག །

མཁས་པའི་མཚན་ཅན་གྲུབ་པའི་སྐྱེས་བུ་གནས་མཆོག་འདི་རུ་སྐུ་འཁྲུངས་ཏེ། །

བཅུ་ཕྲག་རིག་པའི་གནས་ཀྱིས་ཕྱུག་པའི་ཀུན་མཁྱེན་སི་ཏུ་ཆོས་འབྱུང་དང་། །

དཀར་ནག་རྩིས་དང་གསོ་རིག་མཁས་དབང་ཀོང་སྤྲུལ་ཀརྨ་ངེས་ལེགས་ཟུང་། །

མདོ་སྔགས་རིག་གནས་ཐུགས་རྒྱུད་སྤྲས་པའི་འཇམ་དབྱངས་མཁྱེན་བརྩེ་དབང་པོ་ཞབས། །

ཤེས་བྱ་ཀུན་ལ་མཁྱེན་པར་མངའ་བའི་མི་ཕམ་འཇམ་དབྱངས་རྣམ་རྒྱལ་ཚང་། །

སྐུ་རབས་བཅུ་གཉིས་བྱང་ཆུབ་རྡོ་རྗེ་དབོན་སྟོད་སྐུ་འཁྲུངས་ཀརྨ་པ། །

སྙན་ངག་སྡེབ་སྦྱོར་དཀར་ནག་རྩིས་ཏེ་ཀ་ཙན་དབྱངས་གསུམ་ཐུགས་སུ་ཆུད། །

མཁས་མཆོག་དམ་པ་རྒྱལ་ཚབ་འགྱུར་མེད་པདྨ་རྣམ་རྒྱལ་རབ་བྱུང་བ། །

གངས་ཅན་ལྗོངས་སུ་མཁས་མཛངས་གཉིས་ལྡན་སྐྱེས་བུ་དམ་པ་མང་ན་ཡང་། །

གསོ་རིག་བསྟན་པ་ཕྱོགས་བཅུར་སྤེལ་བའི་སྙིགས་དུས་སངས་རྒྱས་སྨན་བླ་དངོས། །

སྔོན་དུས་སྡེ་དགེའི་ཁོངས་གཏོགས་ཡིན་པའི་དེང་དུས་འཇོ་མདའི་ཡུལ་ཆགས་པ། །

ཤེས་བྱ་ཀུན་ལ་ཐུགས་རྒྱ་ཡངས་པའི་མཁས་དབང་ཁྲོ་རུ་ཚེ་རྣམ་རྗེ། །

པར་ཁང་ཆེན་མོའི་ཞུ་དག་མཁན་པོ་ཞུ་ཆེན་ལོ་ཙཱ་ཞེས་བྱ་བའི། །

ཀུན་དགའ་བསོད་ནམས་ཞེས་སུ་གྲགས་པས་གསུངས་ཆོས་པོ་ཏི་བཅུ་གསུམ་མཛད། །

རིག་པའི་གནས་ལ་ཐུགས་རྒྱུད་འདྲིས་ཤིང་ལྷག་བསམ་སྐྲ་ལོ་དུང་ལས་དཀར། །

ཉེ་ལམ་གཟུགས་སྐུ་ཆོས་དབྱིངས་བསྡུས་པའི་མཁས་དབང་ནམ་མཁའི་ནོར་བུ་མཆོག།

ཡུལ་ལ་ཁྱད་འཕགས་གླིང་དཀར་སྟོད་ཅེས་དེང་གི་ཨ་ཕྱུག་རྩྭ་ཐང་སྟེ། །

ས་དང་ཆུ་ལ་ཁྱད་ཆོས་ལྡན་པའི་སྐྱིད་སོས་ཡག་གི་ཁ་མདོ་རུ། །

གེ་སར་ནོར་བུ་གནས་འདིར་བལྟམས་ཤིང་བཀྲ་ཤིས་རྟགས་མཚན་དུ་མ་བྱུང་། །

སྐུ་རྗེན་བྲག་ལ་རྒྱ་བཟས་བརྡབས་པའི་སྐུ་རྗེས་གསོན་པོ་ཨེ་མ་མཚར། །

བཙན་པོའི་དཔུང་སྡེ་གཉའ་ནས་མནན་ཞིང་མ་རུངས་བདུད་འདུལ་སེང་ཆེན་རྗེ། །

སྡང་དགྲ་འདུལ་བའི་གེ་སར་དཔའ་བོ་ཉམ་ཆུང་དཔུང་གཉེན་པདྨ་འབྱུང་། །

རྒྱལ་ཁྲིམས་བསྐྱངས་ཤིང་དམ་ཆོས་སྤེལ་བའི་ཆོས་སྲིད་ཟུང་གི་བསྟན་པ་སྤེལ། །

ཁྱེད་ནི་ཁམས་པ་སྡེ་དགེའི་མི་ཡིན་འཛམ་གླིང་གྲགས་པའི་མི་སྣ་ཞིག །

ལུགས་ཆེན་གཉིས་ཀྱི་ཡ་གྱལ་གྱུར་པའི་ཟུར་ལུགས་བསྟན་པའི་འབྱུང་ཁུངས་དངོས། །

ཚེ་ཡི་རིག་བྱེད་འཛིན་པར་མཁས་པའི་མཁྱེན་ཀོང་ངེས་ལེགས་མི་ཕམ་སོགས། །

མཁས་བཙུན་བཟང་གསུམ་རྒྱན་དུ་སྤྲས་ཏེ་སྲིད་པའི་སྒོ་མོ་རིག་པས་ཕྱེས། །

འགྲོ་བའི་མགོན་དང་འཇིག་རྟེན་མིག་ཡིན་ཁྱེད་རྣམས་སྐུ་དྲིན་བསམ་མི་ཁྱབ། །

སྡེ་དགེའི་དཔལ་ལྡན་གསོ་རིག་ཁང་ཞེས་ཀུན་གཟིགས་བཅུ་པས་མཚན་གསོལ་གནང་། །

དུས་ཀྱི་འགྱུར་བ་རིམ་པའི་ཁྲོད་ནས་ཡར་ངོའི་ཟླ་བཞིན་གཟི་བྱིན་འབར། །

དགུང་གྲངས་དྲུག་ཅུ་ཏག་ཏག་སོན་པའི་གནས་མཆོག་སྡེ་དགེ་སྨན་རྩིས་ཁང་། །

མདོ་ཁམས་རིག་པའི་ཞིང་ཁམས་འདི་ན་བགྲེས་པོ་ཁྱེད་ལས་མེད་ཚོད་གདའ། །

ནུས་པ་བརྒྱད་ལྡན་ཡོན་ཏན་ཚང་བའི་ཁམས་པའི་སྨན་ལུང་ཞེས་བྱ་བའི། །

དངུལ་ཆུ་ལ་སོགས་རིན་ཆེན་སྦྱོར་བས་འགྲོ་ཀུན་ནད་ལས་གྲོལ་བར་མཛད། །

མཁས་པའི་དབང་པོ་ཞིང་ཆེན་རིམ་པས་དགའ་གུས་མཚན་སྙན་གྲངས་མེད་ཐོབ། །

མདོ་ཁམས་ས་ཡི་སྡེ་དགེའི་བོད་སྨན་འཆི་མེད་ཚེ་ཡི་རིལ་བུ་ཡིན། །

ཞེས་སྡེ་དགེ་རྫོང་རྩོམ་པ་པོ་མཐུན་ཚོགས་ཀྱི་ཚོགས་མི་གླིང་ཚང་མདའ་སྨྱུག་གམ་འཁྱམས་པོ་རྩམ་སྲས་ཀྱིས་ཕུལ་བ་ལགས་སོ། །