མདོ་ཁམས་སྡེ་དགེ་རྫོང་སྨན་རྩིས་ཁང་གི་བགྲང་བྱ་དྲུག་ཅུའི་ལོ་རྒྱུས་ཀྱི་འོད་མདངས།

དེ་ཡང་འཛམ་གླིང་གི་གནའ་བོའི་གསོ་རིག་ཐམས་ཅད་ཀྱི་ཉིང་ཁུའམ་སྲོག་ཤིང་ལྟར་གྱུར་པའི་བོད་ཀྱི་གསོ་བ་རིག་པ་ནི་ཆེས་སྔ་བའི་རྒྱུན་རིང་གི་ལོ་རྒྱུས་ལྡན་པ་དང་། དེར་ཆ་ཚང་བའི་རིག་པའི་གཞུང་ལུགས་ཀྱི་མ་ལག་ཡོད་ཅིང་མཐོང་བ་བརྒྱུད་པའི་ཕྱག་ལེན་བར་མ་ཆད་པར་བཞུགས་པའི་འཛམ་གླིང་ཡུལ་གྲུ་ཁག་ཏུ་མཐོང་དཀོན་པའི་གསོ་རིག་རླབས་པོ་ཆེ་ཞིག་ཡིན་པ་མ་ཟད། འཛམ་གླིང་སྲོལ་རྒྱུན་གསོ་རིག་ཆེན་པོ་བཞིའི་ཡ་གྱལ་ཞིག་ཀྱང་ཡིན།

གཅིག ལོ་རྒྱུས་ཐོག་གི་སྡེ་དགེའི་བོད་སྨན།

དཀར་མཛེས་ཁུལ་ཨུའི་ཧྲུའུ་ཅི་ལིའུ་ཁྲེང་མིང་དང་སྡེ་དགེ་རྫོང་ཨུའི་ཧྲུའི་ཅི་སྐལ་བཟང་གཡུང་དྲུང་གཉིས་སྡེ་དགེ་རྫོང་བོད་ལུགས་གསོ་རིག་ཤེས་ལྡན་མི་སྣ་གསོ་སྐྱོང་ཟབ་སྦྱོང་སློབ་གྲྭར་གཟིགས་ཞིབ་ཏུ་ཕེབས་པ།
甘孜州委书记刘成鸣和德格县委书记嘎绒拥忠等领导到德格南派藏医药人才培养培训学校考察指导

  མདོ་ཁམས་སྡེ་དགེའི་བོད་སྨན་ཞེས་རྒྱལ་ཕྱི་ནང་ཀུན་ཏུ་ཡོངས་སུ་གྲགས་པའི་སྨན་རྩིས་ཁང་འདི་ཉིད་ཀྱང་ཆུ་མགོ་གངས་ལ་ཐུག་པའི་དཔེ་བཞིན་ཐོག་མར་ཞང་བོད་རྒྱལ་རབས་རིམ་བྱོན་དུས་ནས་མེད་པ་ཡོད་པ་དང་ཡོད་པ་དར་རྒྱས་སུ་ཕྱིན་པ་གོར་མ་ཆག །བསྟན་པ་སྔ་དར་གྱི་དུས་སུ་ཆོས་རྒྱལ་ཁྲི་སྲོང་ལྡེའུ་བཙན་གྱི་བླ་སྨན་པ་བོད་སྨན་གྱི་མཁས་པ་མི་དགུའི་གཙོ་བོ་གཡུ་ཐོག་རྙིང་མ་ཡོན་ཏན་མགོན་པོ་མདོ་ཁམས་ཕྱོགས་སུ་ཕེབས་ནས་འགྲོ་བ་ནད་པའི་དོན་དང་གསོ་རིག་གི་བསྟན་པ་སྤེལ། དེ་རྗེས་མཉམ་མེད་དྭགས་པོ་ལྷ་རྗེའི་སློབ་མ་རྗེ་ཕག་མོ་གྲུ་པ་དང་ཀ་དམ་པ་བདེ་གཤེགས་སམ་མཚན་གཞན་ལ་བླ་མ་ཤར་པ་སྤོབས་པ་མཐའ་ཡས་སམ་ཤེས་རབ་སེང་གེ་ཞུ་བ་གཉིས་སྤུན་མཆེད་ཀྱི་ཚུལ་དུ་སྤྱི་ལོ་1110ལོ་དང་1122ལོར་མདོ་ཁམས་ལྷོ་རྒྱུད་དཔེ་ཝར་དང་རྨེ་ཤོད་གཉིས་ཀྱི་མདོ་འབལ་མོ་གསེར་ཁང་ཞེས་པར་(དེང་སང་སྡེ་དགེ་རྫོང་དཔེ་ཝར་ཤང་འབོས་མོ་གྲོང་སྡེར་)འཁྲུངས། 1159ལོར་ཀ་དམ་པ་བདེ་གཤེགས་ཀྱིས་བླ་མའི་ལུང་བསྟན་བཞིན་ཁམས་ཀ་ཐིལ་གྱི་ལུང་པའི་ཕུ་ཡི་གེ་ཀ་འདྲ་བའི་སའི་ཆར་ཀཿཐོག་དགོན་ཆེན་ཐོག་མར་ཕྱག་བཏབ། དེ་ནས་ཀ་ཐོག་དགོན་དུ་བཅུ་ཕྲག་རིག་གནས་ཀྱི་སློབ་གླིང་བཙུགས་ནས་སྨན་པ་གྲྭ་ཚང་དུ་གསོ་རིག་འཆད་ཉན་གྱི་དབུ་ཚུགས། དེ་དང་ད་བར་སྡེ་དགེའི་ས་ཁུལ་དུ་བོད་ལུགས་གསོ་རིག་དངོས་སུ་འཆད་རྩོད་རྩོམ་པ་དར་ནས་བགྲང་བྱ་860ལྷག་གི་ལོ་རྒྱུས་ལྡན།

དཀར་མཛེས་སྲིད་གྲོས་ཀྱི་ཀྲུའུ་ཞི་བྱང་ཆུབ་དང་སྡེ་དགེ་རྫོང་གི་རྫོང་ཨུའི་ཧྲུའུ་ཅི་སྐལ་བཟང་གཡུང་དྲུང་། རྫོང་དཔོན་ཧོ་ཅེ་སོགས་སྡེ་དགེ་རྫོང་བོད་སྨན་སློབ་གྲྭར་གཟིགས་ཞིབ་ཏུ་ཕེབས་པ།
甘孜州政协主席向秋、德格县委书记嘎绒拥忠、县长黄杰等领导到德格藏医学校视察。

སྨན་རྩིས་ཁང་གི་ནད་སྡོད་ཚན་ཁག་གི་སྨན་པས་ནད་ཁང་ཞིབ་བཤེར་བྱེད་བཞིན་པ།
藏医院住院部主任医师查房

  སྤྱི་ལོ་1450ལོར་བོད་རབ་བྱུང་བརྒྱད་པའི་ལྕགས་ཕོ་རྟའི་ལོར་གྲུབ་ཆེན་ཐང་སྟོང་རྒྱལ་པོས་སྡེ་དགེ་ལྷུན་འགྲུབ་སྟེང་དུ་ཐང་རྒྱལ་ལྷ་ཁང་བཞེངས་པ་དང་དགོན་ཆེན་དགོན་གྱི་དགོན་ས་བཏབ། དེ་ནས་རིམ་བཞིན་དགོན་པས་གྲྭ་མང་སྨན་ཁང་ཞེས་པ་བཙུགས། སྨན་ཁང་འདི་ནི་ཁམས་ཕྱོགས་ཙམ་མ་ཟད་བོད་ཁུལ་ཡོངས་དང་། རྒྱལ་ཕྱི་ནང་ལ་ཡང་སྙན་གྲགས་ཀྱི་བ་དན་གཡོ་བའི་བོད་ལུགས་སྨན་ཁང་ཞིག་ཏུ་ཆགས། སྨན་བཅོས་ལག་རྩལ་དང་སྨན་སྦྱོར་གྱི་སྡེ་ཁ་སྲོལ་རྒྱུན་བཞིན་ལག་ལེན་གྱི་ཆིག་བརྒྱུད་ཟམ་མ་ཆད་པར་ཁུངས་ལྡན་བརྒྱུད་པ་ལྡན་པའི་ཁྱད་ཆོས་སོགས་ཀྱིས་རྒྱལ་ཕྱི་ནང་གི་ནད་པའི་སྲོག་གི་དཔུང་གཉེན་དུ་གྱུར་ལ་ཕན་བདེ་ཉི་ཟླ་ལྟ་བུའི་སྡེ་དགེ་བོད་སྨན་ཞེས་ཀུན་གྱིས་བསྔགས་གཞིར་གྱུར། གནའ་དུས་ནས་སྡེ་དགེའི་ཆོས་རྒྱལ་རིམ་བྱོན་དང་བླ་སྨན་རིམ་བྱོན། ཁྱད་པར་དུ་གྲགས་ཆེ་བའི་སྡེ་དགེའི་སྔོན་བྱོན་ལོ་པཎ་གྱི་བུ་སློབ་རྒྱུ་སྐར་གྱི་གྲངས་ལས་འདས་པ་ཉི་ཟླའི་སྐར་ཚོགས་ལྟ་བུ་བྱུང་ཡོད་པ་སྟེ། དེ་ཡང་རྗེ་ཕག་མོ་གྲུ་པ་དང་། ཀ་དམ་པ་བདེ་གཤེགས། སི་ཏུ་ཆོས་ཀྱི་འབྱུང་གནས། དེའུ་དམར་བསྟན་འཛིན་ཕུན་ཚོགས། ཆོས་རྒྱལ་བསྟན་པ་ཚེ་རིང་། བླ་སྨན་གུ་རུ་འཕེལ། དབོན་བསམ་འཕེལ་ནོར་བུ། དབོན་ཀརྨ་ངེས་ལེགས་བསྟན་འཛིན། དབོན་ཀརྨ་བསམ་གཏན། ཀརྨ་རཏྞའམ་ཀརྨ་ངེས་དོན།  གླིང་སྨན་བཀྲ་ཤིས་འབུམ། བེ་ལོ་ཚེ་དབང་ཀུན་ཁྱབ། མཁྱེན་ཀོང་མཆོག་གསུམ། བླ་སྨན་ཆོས་གྲགས་རྒྱ་མཚོ། བླ་སྨན་རིན་ཆེན་འོད་ཟེར། འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོ། འཚོ་བྱེད་ཚེ་རིང་ཕུན་ཚོགས་སོགས་བྱོན་ཏེ་མཁས་དབང་དེ་དག་གིས་བོད་ཀྱི་སྲོལ་རྒྱུན་རིག་གནས་སྤྱི་དང་བྱེ་བྲག་ཟུར་ལུགས་གསོ་རིག་གཙོས་པའི་བོད་ཀྱི་སྨན་རྩིས་རིག་པའི་བསྟན་བཅོས་གྲངས་མང་བརྩམས་ཡོད་པ་དང་། ལག་ལེན་གྱི་ཐད་ནས་ཀྱང་རྒྱུད་འཛིན་དང་། དར་སྤེལ། ཉམས་ཞིབ་སོགས་རྒྱས་པར་མཛད། དེ་དག་གིས་ཐུགས་རྗེའི་འོད་ཟེར་ཁམས་ཁུལ་ཙམ་མ་ཟད་བོད་ཁུལ་ཡོངས་ལ་ཕྱོགས་མེད་དུ་འཕྲོས་པས་འགྲོ་བ་ནད་པའི་ལུས་ཁམས་བདེ་སྲུང་དང་། ནད་རིགས་སྔོན་འགོག །གསོ་བཅོས། ཞིབ་འཇུག །རྒྱུད་འཛིན་མི་སྣ་གསོ་སྐྱོང་གནང་བས་ཁམས་སྡེ་དགེའི་ཡུལ་གྱི་ཆབ་དཔལ་རིག་གསུམ་འཕེལ་རྒྱས་འགྲོ་བར་བསམ་གྱིས་མི་ཁྱབ་པའི་མཛད་རྗེས་རླབས་པོ་ཆེ་བཞག་ཡོད། ཁོང་རྣམ་པའི་སྨན་བཅོས་ལག་རྩལ་ཕུལ་བྱུང་དང་། ཡ་རབས་ཀུན་སྤྱོད་བཟང་པོ། གཞན་ཕན་སྙིང་རྗེའི་སྐུ་དྲིན་ལ་བརྟེན་ནས་གནས་འདི་ནི་ཟུར་ལུགས་གསོ་རིག་གི་འཕེལ་རྒྱས་འགྲོ་བའི་གནས་གཞི་གཙོ་བོར་ལྟ་བུར་གྱུར།

  1727ལོར་སི་ཏུ་ཆོས་འབྱུང་གིས་དཔལ་སྤུངས་ཐུབ་བསྟན་ཆོས་འཁོར་གླིང་ཕྱག་བཏབ་ནས་རིམ་བཞིན་བཅུ་ཕྲག་རིག་གནས་ཀྱི་སློབ་གླིང་བཙུགས་པ་དང་། སྨན་རྩིས་སྐོར་གྱི་བརྒྱུད་པའི་སློབ་འབངས་གྲངས་མང་གསོ་སྐྱོང་གནང་བས། དུས་རབས་བཅོ་བརྒྱད་པའི་ཡས་མས་སུ་ཁམས་སྡེ་དགེའི་ཡུལ་དུ་སྨན་རྩིས་རིག་པ་མཚོན་བོད་ཀྱི་རིག་པའི་གནས་ཀུན་འཕེལ་རྒྱས་ཀྱི་ལྟེ་གནས་གཙོ་བོར་གྱུར། ལྷག་པར་དུ་སྤྱི་ལོ་1729ལོར་ཆོས་རྒྱལ་བསྟན་པ་ཚེ་རིང་གིས་སྡེ་དགེ་པར་ཁང་ཆོས་མཛོད་ཆེན་མོ་གསར་བཞེངས་མཛད་པ་དང་། སྤྱི་ལོ་1767ལོར་སི་ཏུ་ཆོས་འབྱུང་གིས་སྦྱིན་བདག་མཛད་དེ་སྨན་རྒྱལ་དངུལ་ཆུ་བཙོ་བཀྲུ་ཆེན་མོ་དང་རིན་ཆེན་རིལ་ནག་ཆེན་མོ་སོགས་སྦྱར་བས་བོད་ལུགས་གསོ་རིག་ལག་ལེན་ལ་རྨང་གཞི་བརྟན་པོར་བཞག་པ་དང་། དེ་རྗེས་བླ་སྨན་རིམ་བྱོན་གྱིས་དངུལ་ཆུ་བཙོ་བཀྲུ་ཆེན་མོ་ཐེངས་མང་མཛད་པ་དང་སྨན་གྲྭའམ་བཅུ་ཕྲག་རིག་གནས་མཚོན་པའི་སྨན་གྱི་སློབ་གླིང་བཙུགས།

སྡེ་དགེ་སྨན་རྩིས་ཁང་གི་ཐེངས་དང་པོའི་སྒོ་བསྟེན་ཁང་རྙིང་།
德格藏医院门诊（70年代）

སྡེ་དགེ་སྨན་རྩིས་ཁང་གི་ཐེངས་གཉིས་པའི་སྒོ་བསྟེན་ཁང་རྙིང་།

德格县藏医院门诊（90年代）

སྡེ་དགེ་སྨན་རྩིས་ཁང་ཐེངས་གསུམ་པའི་ཁྱོན་ཡོངས་ཀྱི་འཛུགས་སྐྲུན་གསར་པའི་སྨན་ཁང་སྤྱི་ཡོངས།

德格县藏医院（2013年）

སྨན་རྩིས་ཁང་གི་གནའ་སྔ་མོའི་ལས་བཟོ་པའི་མཉམ་པར། 
1979年的藏医院工作人员

2018ལོར་སྨན་ཁང་རིམ་གཉིས་ཀ་པའི་ཚད་ལེན་ཞིབ་བཤེར་སྐབས་ཀྱི་ཆེད་མཁས་དང་ལས་བཟོ་ཡོངས་ཀྱི་དྲན་རྟེན།

2018年医院创建二级甲等医院专家及职工合影留念

སྨན་པས་རྩ་ལ་བརྟག་བཞིན་པ།
医生给患者把脉

སྨན་བཅོས་འགན་བཅོལ་ཞབས་ཞུའི་སྒེའུ་ཁུང་།

藏医院社保服务窗口

གཉིས། ཀྲུང་གོ་གསར་པ་དབུ་བརྙེས་རྗེས་ཀྱི་སྡེ་དགེ་རྫོང་སྨན་རྩིས་ཁང་།

   སྡེ་དགེ་ལྷུན་འགྲུབ་སྟེང་གྲྭ་མང་སྨན་ཁང་གི་རྨང་གཞིའི་སྟེང་། བཅིངས་གྲོལ་ཐོབ་རྗེས། ཏང་དང་སྲིད་གཞུང་གིས་ཤུགས་ཆེའི་ཐུགས་ཁུར་འོག །སྤྱི་ལོ་1959ལོར་སྙན་གྲགས་གོ་ལ་ཟླུམ་པོར་ཁྱབ་པའི་མི་རིགས་སྲོལ་རྒྱུན་རིག་གནས་བོད་ལུགས་གསོ་བ་རིག་པ་འདི་སླར་ཡང་དར་སྤེལ་གཏོང་ཆེད་སྡེ་དགེ་རྫོང་གི་དབུ་ཁྲིད་མཁྱེན་རབ་ཀྱིས་དགོན་སྡེ་དང་རིག་གནས་སྡེ་ཁག་གཉིས་སོ་སོར་ཕྱེས་ནས་དགོན་ཆེན་དགོན་གྲྭ་མང་སྨན་ཁང་གི་རྨང་གཞིའི་སྟེང་པར་ཁང་ཆོས་མཛོད་ཆེན་མོའི་ནང་དུ་བོད་ལུགས་སྨན་བཅོས་ཁང་འཛུགས་རྒྱུའི་འཆར་གཞི་བཞག །དེ་རྗེས་ཁོང་གིས་དར་རྩེ་མདོ་རུ་ཀྲུང་ལུགས་མཉམ་འབྲེལ་སྨན་བཅོས་ཁང་ཞེས་པ་  བཙུགས་ཡོད་པ་མཁྱེན་པས། མཚན་ཡང་སྡེ་དགེ་རྫོང་བོད་ལུགས་མཉམ་འབྲེལ་སྨན་བཅོས་ཁང་ཞེས་གསོལ། སྐབས་དེར་སྨན་ཁང་གི་འགོ་འཛིན་པ་འདྲེ་རིག་རྡོ་རྗེ་ཚེ་རིང་དང་། སྨན་པ་གྲྭ་མང་ལྷ་རྗེ་འཇམ་དབྱངས་བཟང་པོ། ནང་ཆེན་ལྷ་རྗེ། སྨན་པ་ཟངས་སྐུ་ཚེ་རིང་ཕུན་ཚོགས། སྨན་པ་ཚེ་རིང་རྡོ་རྗེ་ལྔ་དང་། དེ་ནས་རིམ་བཞིན་ཐམ་ཁ་ངག་དབང་རྒྱ་མཚོ་སོགས་གདན་ཞུས་མཛད་ནས་ནད་ཐོག་སྨན་བཅོས་དང་། རྒྱུད་འཛིན་གསོ་སྐྱོང་། དཔེ་རྙིང་འཚོལ་ཞིབ། སྨན་རིགས་སྦྱར་བཟོ་སོགས་ཉམས་ཞིབ་མི་དམན་པར་གཞི་ཡོངས་སུ་ཚང་ཞིང་མི་རིགས་ཀྱི་ཁྱད་ཆོས་མངོན་པར་གསལ་བའི་སི་ཁྲོན་བོད་ཁུལ་ཡོངས་སུ་ཆེས་སྔ་བའི་སྲིད་གཞུང་གིས་འཛུགས་གཉེར་བྱས་པའི་བོད་ལུགས་མཉམ་འབྲེལ་སྨན་བཅོས་ཁང་ཞིག་ཡིན། ལྷག་པར་རིག་གསར་གྱི་སྐབས་སུ་མཉམ་འབྲེལ་སྨན་བཅོས་ཁང་གིས་པར་ཁང་ཆོས་མཛོད་ཆེན་མོའི་སྲུང་སྐྱོབ་ཀྱི་ཐད་ལ་བླ་ན་མེད་པའི་མཛད་རྗེས་དང་ནད་པའི་འགྲོ་དོན་རྒྱ་ཆེན་མཛད།

1980ལོར་སྡེ་དགེ་རྫོང་ཁྲོ་མཎྜ་དགོན་དུ་མཁན་ཆེན་ཁྲོ་རུ་ཚེ་རྣམ་གྱིས་དངུལ་ཆུ་བཙོ་བཀྲུ་ཆེན་མོ་མཛད་སྐབས་དཔལ་ལྡན་རྒྱུད་བཞིའི་ཆ་ལག་དང་བཅས་པ་ཁྲིད་ལུང་གནང་བཞིན་པ།
1980年德格县雀儿山下曼扎寺配制佐塔时，措如·才郎大师传授《四部医典》等藏医经典著作。

སྡེ་དགེ་སྨན་རྩིས་ཁང་གི་སྨན་པ་རྒན་རབས་ཀྱིས་རྩ་ཆུ་བརྟག་བཞིན་པ།
藏医院老医生给患者看病

སྨན་རྩིས་ཁང་གི་སྨན་པ་རྒན་རབས་རྣམས་ཀྱིས་ལོ་ཆུང་སྨན་པ་ལ་ཆེད་ལས་སློབ་བཞིན་པ།
藏医老医为年青医生学传授专业知识
\

སྨན་པ་རྒན་རབས་ཚོས་སྨན་དཔེ་རྙིང་པ་བསྡུ་སྒྲིག་བྱེད་བཞིན་པ།
藏医专家收集藏医文献资料

གསུམ། བཅོས་བསྒྱུར་སྒོ་འབྱེད་རྗེས་ཀྱི་སྡེ་དགེ་རྫོང་སྨན་རྩིས་ཁང་།

སྨན་རྩིས་ཁང་གི་འགན་འཛིན་རྣམ་པས་ལས་ཀར་གྲོས་བསྡུར་བྱེད་བཞིན་པ།
藏医院领导班子研究工作

1986ལོར་པཎ་ཆེན་སྐུ་ཕྲེང་བཅུ་པ་མཆོག་སྡེ་དགེར་ཕེབས།

十世班禅到德格视察工作（1986年）

  སྤྱི་ལོ་1978ལོར་བཅོས་བསྒྱུར་སྒོ་འབྱེད་དཔྱིད་ཀྱི་དཔལ་ཡོན་བཞད་དུས་སུ། སྡེ་དགེ་པར་ཁང་ཆོས་མཛོད་ཆེན་མོ་བཀྲ་ཤིས་སྒོ་མང་སྒོ་འབྱེད་བྱེད་པ་དང་དུས་མཚུངས་སུ་རྫོང་སྲིད་གཞུང་གིས་བོད་ལུགས་མཉམ་འབྲེལ་སྨན་བཅོས་ཁང་ཡང་རྒྱ་སྐྱེད་བཏང་བའི་ཆེད་དུ། ས་ཆ་ལོགས་སུ་ཕྱེས་ཏེ་སྡེ་དགེ་རྫོང་དགོན་ཆེན་གྲོང་བརྡལ་སྲིབ་དགོན་རྒྱབ་དུ་གནས་སྤོས་ནས་སྡེ་དགེ་རྫོང་སྨན་རྩིས་ཁང་གསར་དུ་དབུ་བརྙེས། སྐབས་དེར་སྒོ་བསྟེན་ཁང་། ནད་སྡོད་ཁང་། སྨན་སྦྱོར་ཁང་། སྨན་མཛོད་ཁང་། བོད་སྨན་སློབ་གྲྭ སྨན་ལུམས་ཁང་སོགས་ཕྱོགས་ཡོངས་ཀྱི་ཆ་རྐྱེན་འཛོམས་པའི་སི་ཁྲོན་བོད་ཁུལ་གྱི་བོད་ལུགས་སྨན་ཁང་གཅིག་ཁོ་ན་ཞིག་ཏུ་ཆགས་ཡོད་པའོ། 1979ལོར་སི་ཁྲོན་ཞིང་ཆེན་ཀྲུང་ལུགས་དོ་དམ་ཅུས་དང་ཁུལ་རྫོང་བཅས་ཀྱི་འཆར་འགོད་ལྟར། སྡེ་དགེ་རྫོང་སྨན་རྩིས་ཁང་དུ་རྐང་འཛིན་སྨན་པར་དཔལ་སྤུངས་ཡོན་ཏན་ཕུན་ཚོགས་དང་། མཁར་ལེགས་བཟོད་པ། ཚེ་གྲུབ་རྡོ་རྗེ། འཇམ་རྡོ་བཅས་སྨན་དོན་མི་སྣ་དུས་མཉམ་དུ་སྡེ་དགེ་རྫོང་བོད་སྨན་ཁང་དུ་དམངས་ཁྲོད་ནས་འདེམས་བསྐོས་བྱས་པས། སྡེ་དགེ་སྨན་རྩིས་ཁང་སྨན་པའི་དཔུང་ཁག་ཇེ་རྒྱས་སུ་སོང་ཏེ་སྨན་བཅོས་དང་། སྨན་སྦྱོར་། ཚན་རིག་ཉམས་ཞིབ་བཅས་ཕྱོགས་ཡོངས་ཀྱི་ནུས་པ་ཇེ་རྒྱས་ཕྱིན་པ་དང་། དེ་ནས་དཀར་མཛེས་ཁུལ་དང་ཁུལ་ཡོངས་ཀྱི་རྫོང་ཁག་སོ་སོའི་བོད་ལུགས་སྨན་ཁང་ཕལ་མོ་ཆེ་ནི་སྨན་ཁང་འདིའི་རྐང་འཛིན་སྨན་པ་མངག་གཏོང་བྱས་ནས་གསར་དུ་བཙུགས་པ་ཤ་སྟག་ཡིན། 1980ལོར་བོད་སྨན་ཁང་གི་འགོ་འཛིན་པ་ཟླ་བ་ཚེ་རིང་ལགས་ཀྱིས་ངེས་པར་དོན་གྱི་མཁས་པའི་དབང་པོ་ཁྲོ་རུ་མཁན་ཆེན་ཚེ་རྣམ་རིན་པོ་ཆེ་མཆོག་ཀོང་པོ་སྤོ་བོ་རྫོང་ནས་སྡེ་དགེ་ཁྲོ་མནྜལ་དགོན་ཕུན་ཚོགས་བཀྲ་ཤིས་ཆོས་གླིང་དུ་ཆེད་དུ་གདན་དྲངས་པ་དང་ལྷན་དུ་ཐེངས་དང་པོའི་དངུལ་ཆུ་བཙོ་བཀྲུ་ཆེན་མོ་དང་རིན་ཆེན་སྨན་རིགས་བསྡུ་སྦྱོར་སོགས་མཐོང་བརྒྱུད་ཕྱག་ལེན་ཀུན་འཁྲུལ་མེད་སྤེལ་ཅིང་། ཞོར་དུ་རྒྱུད་བཞིའི་ཆ་ལག་ལྷན་ཐབས་སོགས་ཁྲིད་ལུང་སྤེལ་བས། བགྲང་བྱ་དུས་རབས་ཕྱེད་ཙམ་དུ་ཁྲིད་རྒྱུན་ཆད་པའི་སྨན་རྒྱལ་དངུལ་ཆུ་བཙོ་བཀྲུ་ཆེན་མོའི་ལག་ལེན་གྱི་བསྟན་པའི་མེ་རོ་དུས་དེ་ནས་སློང་། 1986ལོར་པཎ་ཆེན་ཨེར་ཏེ་ཎི་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་ཁམས་སྡེ་དགེ་སྨན་རྩིས་ཁང་དུ་ཞབས་སོར་འཁོད་ཅིང་《སྡེ་དགེ་དཔལ་ལྡན་གསོ་རིག་ཁང་》ཞེས་མཚན་གསོལ་ཕྱག་བྲིས་གནང་བ་དང་སྨན་དོན་ལས་བཟོ་ཡོངས་ལ་བཀའ་སློབ་དང་ཆོས་འབྲེལ་ཟབ་མོ་གནང་།

1987ལོར་སི་ཁྲོན་ཞིང་ཆེན་འཕྲོད་བསྟེན་ཐིང་གིས་ཐད་ཀར་སྡེ་དགེ་བོད་གསོ་རིག་ཞིབ་འཇུག་ཁང་གི་ཟུར་གཏོགས་སྨན་རྩིས་ཁང་ཞེས་མཚན་བྱང་ཆོག་མཆན་གནང་བས་སྐབས་དེར་ཞིང་ཆེན་ཡོངས་སུ་བོད་ལུགས་གསོ་རིག་གི་ཞིབ་འཇུག་ཁང་ཐེངས་དང་པོ་དེ་ཡིན། དེ་ནས་རིམ་བཞིན་སྡེ་དགེ་རྫོང་ཁོངས་ཙམ་མ་ཚད་ཁམས་ཁུལ་ཡོངས་ནས་དམངས་ཁྲོད་ཀྱི་བོད་ལུགས་སྨན་པ་གདན་ཞུས་བྱས་པའི་དབུ་ཚུགས་པ་དང་། སྲིད་གཞུང་གིས་མ་དངུལ་གཏོང་ནས་སྒྲིག་ཆས་སོགས་ཉེར་སྤྱོད་རྣམས་བསྐྲུན་པས་སྨན་ཁང་གི་སྐྱེས་སྟོབས་དང་གསོན་ཤུགས་གསར་པ་སྐྱེས་ཏེ་ཡུན་རིང་འཕེལ་རྒྱས་འགྲོ་བའི་རྨང་གཞི་བརྟན་པོར་བཏིང་།

བཞི། དུས་རབས་ཉེར་གཅིག་པའི་སྡེ་དགེ་རྫོང་སྨན་རྩིས་ཁང་།

སྨན་པས་ནད་པའི་རྩ་ལ་བརྟག་བཞིན་པ། 
医生给为患者把脉

སྨན་དོན་སྡེ་ཁག་གི་སྨན་པས་ལས་དོན་སྒྲུབ་བཞིན་པ། 
医务科医生正在工作

སྨན་ཁང་གི་ཏང་ཀྲི་པུའུ་ཡིས་ལས་དོན་ལ་གྲོས་བསྡུར་བྱེད་བཞིན་པ།

医院党支部商讨工作

ནད་སྡོད་ཁང་གི་སྨན་གཡོག་ས་ཚིགས། 
住院部护士站

ནད་སྡོད་ཁང་དུ་ནད་པར་བརྟག་དཔྱད་བྱེད་བཞིན་པ། 

医生在住院部巡房检查

   དུས་རབས་ཉེར་གཅིག་པའི་སྐལ་བཟང་གི་དུས་སུ་ཏང་དང་རྒྱལ་ཁབ་ཀྱི་བོད་ཀྱི་སྲོལ་རྒྱུན་རིག་གནས་ལ་བརྩི་མཐོང་ཆེན་པོ་གནང་ཞིང་། ལྷག་པར་དུ་བོད་ཀྱི་གསོ་རིག་རྒྱུད་འཛིན་དར་སྤེལ་ཐད་ལ་ལས་གཞིའི་རྣམ་གྲངས་དང་མ་དངུལ་གཏོང་ཚད་ཇེ་མཐོ་བཏང་ནས་ཕྱིའི་ཆ་རྐྱེན་དང་ནང་གི་སྒྲིག་ཆས། སྨན་པ་གསོ་སྐྱོང་སོགས་ཀྱི་ལས་དོན་ལ་འགྱུར་ལྡོག་ཆེན་པོ་བྱུང་དང་འབྱུང་བཞིན་པ་ལྟའོ། །ད་ལྟ་སྡེ་དགེ་རྫོང་སྨན་རྩིས་ཁང་གི་ཕྱི་ནང་གི་ཆ་རྐྱེན་ཕུན་སུམ་ཚོགས་པོར་ལྡན་ཞིང་། སྨན་ཁང་གི་རྒྱ་ཁྱོན་སྨི་གྲུ་བཞི་མ་5542ཡོད་པ་དང་། དེ་ཡང་བོད་ལུགས་གསོ་རིག་གི་སྡེ་ཁག་སོ་སོར་ལྡན་པའི་སྒོ་བསྟེན་ཐོག་ཁང་དང་། མལ་ཁྲི་60ལྡན་པའི་ནད་སྡོད་ཐོག་ཁང་། GMPཚད་ལེན་སྨན་སྦྱོར་ལྟེ་གནས། བོད་སྨན་སློབ་གྲྭ །བོད་སྨན་ཞིབ་འཇུག་ཁང་། བོད་ལུགས་གསོ་རིག་རིག་གནས་འགྲེམ་སྟོན་ཁང་སོགས་ཕྱོགས་བསྡུས་རང་བཞིན་གྱི་རིམ་གཉིས་ཀ་པའི་བོད་ལུགས་གསོ་རིག་གི་སྨན་ཁང་ཞིག་ཡིན། ཕྱོགས་ཡོངས་ཀྱི་འཛུགས་སྐྲུན་རྒྱ་ཁྱོན་སྨི་གྲུ་བཞི་མ་7752ཟིན་ཡོད་པ་དང་སྒྲིག་ཆས་ཀྱང་ཅུང་སྔོན་ཐོན་ཅན་གྱི་ཆ་རྐྱེན་ཚང་། ལས་བཟོའི་སྒྲིག་གཞི་ལ་མི་སྣ་46དང་། ད་ཡོད་ལས་བཟོ་མི་སྣ་56ཡོད། དེ་ཡང་སྨན་པའི་གོ་མིང་ལ་སྨན་པ་འབུམ་རམས་པ་དང་འབུམ་རམས་སྐུ་གཞོན་པ། རབ་འབྱམས་སྨན་པ། བཀའ་བཅུ་སྨན་པ་དང་བསླབ་གནས་ཀྱི་ཐད་ནས་ཞིབ་འཇུག་སློབ་ཐོན་དང་དངོས་ཚན་སློབ་ཐོན། ཆེད་ལས་སློབ་ཆེན་སློབ་ཐོན། ཆེད་ལས་འབྲིང་རིམ་སློབ་ཐོན་ཡན་ཆོད་ཀྱི་ཆེད་ལས་མི་སྣ་ཤ་སྟག་ལྡན། སྨན་ཁང་ལ་ཞིང་ཆེན་རིམ་པའི་ཕོ་ནད་ཆེད་བཅོས་སྡེ་ཁག་གཅིག་དང་། ཁུལ་རིམ་པའི་བོད་ལུགས་དཔྱད་བཅོས་སྡེ་ཁག །སྨན་ལུམས་ཁང་། སྨན་སྦྱོར་ཁ་ཚར་ཁང་དང་རྒྱུན་སྤྱོད་སྨན་སྦྱོར་200ལྷག་བསྡུ་སྦྱོར་བྱེད་ཀྱི་ཡོད་པ་དང་། སྨན་སྦྱོར་རིགས་135ལ་ཞིང་ཆེན་གྱིས་སྨན་ཁང་གི་སྨན་སྦྱོར་ཆོག་མཆན་ཨང་རྟགས་ཐོབ་པ། དེ་ཡང་སྨན་སྦྱོར་ཕལ་མོ་ཆེའི་སྨན་རྒྱུའི་འབྱུང་ཁུངས་བོད་ས་མཐོ་སྡེ་དགེའི་ཕྱོགས་ཀྱི་རང་བྱུང་རྩི་ཤིང་སྔོ་ལྡུམ་རིགས་ཁོ་ན་ཡིན་པས་ཡུལ་མི་རྣམས་ལ་ལོ་རེར་ཡོང་འབབ་སྒོར་ཁྲི་200གཡས་གཡོན་འབྱུང་གི་ཡོད། མདོར་ན་ཉེ་བའི་ལོ་ཤས་རིང་རྒྱལ་ཁབ་དང་ཞིང་ཆེན་ཁུལ་རྫོང་རིམ་པ་སོགས་ཀྱིས་མ་དངུལ་ཁྲི་9000ལྷག་རོགས་དངུལ་བཏང་ནས་སྨན་ཁང་གི་འཛུགས་སྐྲུན་གནང་། སྨན་ཁང་རང་གིས་ལོ་རེ་ཆ་སྙོམས་ནད་པ་ཁྲི་5 གཡས་གཡོན་ལ་བརྟག་དཔྱད་སྨན་བཅོས་བྱེད་ཀྱི་ཡོད་པ་དང་ཡོང་འབབ་སྒོར་ཁྲི་800ལྷག་ཡོད། དེ་སྔོན་སྨན་པ་རྒན་རབས་རྣམས་ཀྱི་སྲོལ་རྒྱུན་སློབ་གསོ་བཞིན་དགེ་ཕྲུག་དྲུང་དུ་ཁྲིད་ནས་གསོ་སྐྱོང་མཛད་པ་དང་། དེ་བཞིན་བོད་སྨན་སློབ་གྲྭ་ཆེ་འབྲིང་ཁག་ནས་ཕེབས་པའི་དངོས་སྦྱོང་སློབ་མའི་ནད་ཐོག་མཛུབ་ཁྲིད། དེང་རབས་སློབ་གྲྭའི་སློབ་གསོ་ལྟར་གསོ་སྐྱོང་གནང་བའི་ཨ་དཀོན་རིན་པོ་ཆེའི་སྡེ་དགེ་བོད་སྨན་སློབ་གྲྭ་དང་། སྡེ་དགེ་བོད་སྨན་ཤེས་ལྡན་མི་སྣ་དཀར་མཛེས་འཕྲོད་བསྟེན་སློབ་གྲྭ་མཉམ་འབྲེལ་བོད་སྨན་སློབ་གྲྭ་སོགས་མདོར་ན་བཅོས་བསྒྱུར་སྒོ་འབྱེད་ཚུན་ཆད་སྔོན་རྗེས་སུ་སློབ་མ་400ལ་ཉེ་བར་གསོ་བསྐྱངས་གནང་ཡོད།

ལྔ། སྡེ་དགེ་རྫོང་སྨན་རྩིས་ཁང་གི་བགྲང་བྱ་དྲུག་ཅུའི་གྲུབ་འབྲས།

1979ལོའི་སྨན་རྩིས་ཁང་གི་སྨན་ལེན་ཁང་།
1979年的藏医院药房

ད་ལྟའི་སྨན་རྩིས་ཁང་གི་སྨན་ལེན་ཁང་།
现代藏医院药房

ད་ལྟའི་ལས་བཟོ་རྣམས་ཀྱིས་ཆེད་ལས་སློབ་སྦྱོབ་བྱེད་བཞིན་པ།
藏医院工作人员学习专业知识

   དེ་སྔོན་ལས་བཟོ་ཡོངས་ཀྱིས་མཐུན་སྒྲིལ་གྱི་རྡོག་རྩ་གཅིག་ཏུ་སྒྲིལ་ཞིང་ལྷག་བསམ་ཟོལ་མེད་ཀྱིས་ལྷོད་མེད་འབད་འབུངས་བྱས་པར་བརྒྱུད། སྔ་ཕྱི་བར་གསུམ་དུ་མཚན་སྙན་དང་སྔོན་ཐོན་གྱི་བྱ་དགའ་དང་མིག་དཔེ་མི་ཉུང་བ་ཡང་ཐོབ་པ་སྟེ། 1988ལོར་རྒྱལ་ཁབ་འཕྲོད་བསྟེན་པུའུ་ཡིས་སྔོན་ཐོན་འཛུགས་སྐྲུན་འཕྲོད་བསྟེན་ལས་ཁུངས་ཀྱི་མཚན་སྙན་བསྩལ། 1990ལོར་རྒྱལ་ཁབ་རིམ་པའི་གལ་ཆེའི་ཚན་རྩལ་ཞིབ་འཇུག་རྣམ་གྲངས་ཀྱི་དཔེ་དཀོན་བསྡུ་སྒྲིག་དོན་ཆེན་གྲུབ་སྟེ་སི་ཁྲོན་ཞིང་ཆེན་ཀྲུང་ལུགས་དོ་དམ་ཅུས་ཀྱིས་ཚན་རྩལ་ཞིབ་འཇུག་སྔོན་ཐོན་སྡེ་ཁག་གི་གཟེངས་བསྟོད་གནང་། 1996ལོར་ཐེངས་གཉིས་པའི་དངུལ་ཆུ་བཙོ་བཀྲུ་ཆེན་མོ་དང་རིན་ཆེན་རིགས་སྦྱོར་བཟོ་ལེགས་འགྲུབ་བྱུང་བ་དང་1997ལོར་རྒྱལ་ཁབ་རིམ་པའི་རྩ་ཆེའི་ཚན་རིག་ཞིབ་འཇུག་གི་རྣམ་གྲངས་《རིན་ཆེན་གཏེར་མཛོད་ལས་གསོ་རིག》གི་སྐོར་ཞུ་དག་གློག་རྡུལ་བསྡུ་སྒྲིག་པར་སྐྲུན་ལས་གཞི་ལེགས་འགྲུབ་བྱུང་བ་དང་། 1998ལོར་ཞིང་ཆེན་ཀྲུང་ལུགས་དོ་དམ་ཅུས་ནས་ཚན་རྩལ་སློབ་གསོ་སྔོན་ཐོན་གྱི་ལས་ཁུངས་ཞེས་མཚན་སྙན་གསོལ། 2000ལོར་སི་ཁྲོན་ཞིང་ཆེན་ཚད་ལེན་བོད་སྨན་ཁང་ཞེས་གཟེངས་བསྟོད་དང་། 2002ལོར་གསར་འཛུགས་བྱས་པའི་སི་ཁྲོན་ཞིང་ཆེན་གྲོབ་གསེབ་ཀྲུང་སྨན་ལས་དོན་སྔོན་ཐོན་རྫོང་ཞེས་ཞིབ་བཤེར་རྩིས་ལེན་ཐོབ། 2003ལོར་ཐེངས་གསུམ་པའི་དངུལ་ཆུ་བཙོ་བཀྲུ་སོགས་ལེགས་འགྲུབ་བྱུང་། 2003ལོར་ཞིང་ཆེན་རིམ་པའི་དཔལ་ཡོན་ལྡན་པའི་སྨན་ཁང་གཟེངས་བསྟོད་ཐོབ། 2006ལོར་ཞིང་ཆེན་རིམ་པའི་ཕོ་ནད་ཆེད་བཅོས་སྨན་ཁང་གི་ཆོག་མཆན་ཐོབ་པ་དང་ལོ་དེར་GMPཚད་ལེན་སྨན་སྦྱོར་ལྟེ་གནས་ཆོག་མཆན་ཐོབ། 2011ལོར་ལས་བཟོ་ཡོངས་ཀྱི་འབད་བརྩོན་ལ་བརྟེན་ནས་རིན་ཆེན་རིལ་ནག་ཆེན་མོ་བསྡུ་སྦྱོར་ལེགས་པོར་གྲུབ་པ་དང་ཐེངས་བཞི་པའི་དངུལ་ཆུ་བཙོ་བཀྲུ་ལེགས་འགྲུབ་བྱུང་།

སྨན་པ་གསོ་སྐྱོང་བྱ་བ་ནི་བོད་སྨན་ཁང་དེས་ཐོག་མཐའ་བར་གསུམ་དུ་ལྷོད་དུ་མི་གཏོང་བའི་དོན་ཆེན་ཨང་དང་པོ་བརྩིས་ནས་ 2012ལོར་མཁས་དབང་གོ་འཇོ་དབང་འདུས་མཆོག་གདན་ཞུས་བྱས་ནས་སྡེ་དགེ་དང་། ཆབ་མདོ། སྐྱེ་དགུ་མདོ། དར་རྩེ་མདོ། དཔལ་ཡུལ་སོགས་ཉེ་འཁོར་གྱི་སློབ་མ་170ཙམ་ལ་༧འཇམ་མགོན་ཀོང་སྤྲུལ་རིན་པོ་ཆེའི་ཟིན་ཏིག་འཆད་ཁྲིད་གནང་ནས་འགྲོ་དོན་བསྐྱངས། 2014ལོར་རྒྱལ་ཁབ་རིམ་གཉིས་པའི་སྨན་ཁང་འཛུགས་སྐྲུན་བྱས། 2016ལོར་བོད་ལྗོངས་སྨན་རྩིས་ཁང་དབུ་བརྙེས་ནས་ལོ་ངོ་100འཁོར་བའི་ལེགས་སྐྱེས་《གངས་ལྗོངས་སྨན་རྩིས་རིག་མཛོད་ཆེན་མོ།》 དཔེ་རྙིང་དེབ་130འཚོལ་སྒྲིག་སྐབས་སུ་མཉམ་འབྲེལ་བསྡུ་སྒྲིག་མཛད་པས་བོད་ལྗོངས་ཚན་རྩལ་ཐིང་གིས་བྱ་དགའ་གནང་། 2016ལོར་རྒྱལ་ཁབ་ཀྲུང་ལུགས་དོ་དམ་ཇུས་མི་རིགས་གསོ་རིག་དཔེ་ཚོགས་བསྡུ་སྒྲིག་ལས་གཞི་ལས་《སི་ཏུ་ཆོས་འབྱུང་གི་སྨན་རྩིས་གསུང་རྩོམ་ཕྱོགས་བསྒྲིགས》ལེགས་འགྲུབ་བྱུང་བས་སི་ཁྲོན་ཚན་རྩལ་ཐིང་སོགས་ཀྱི་བྱ་དགའ་ཐོབ།

2017ལོའི་ཟླ་9པའི་8ཉིན་སྡེ་དགེ་རྫོང་ཟུར་ལུགས་གསོ་རིག་ཤེས་ལྡན་མི་སྣ་གསོ་སྐྱོང་ཟབ་སྦྱོང་སློབ་གྲྭ་བཙུགས། 2018ལོར་རྒྱལ་ཁབ་རིམ་གཉིས་ཀ་པའི་སྨན་ཁང་འཛུགས་སྐྲུན་བྱས་པ་སོགས་མདོར་ན་སྡེ་དགེའི་བོད་ལུགས་གསོ་བ་རིག་པའི་སྨན་པའི་རྒྱུད་འཛིན་པ་དག་གིས་མི་རབས་ནས་མི་རབས་བར་ཐོག་མཐའ་བར་གསུམ་དུ་ནད་པ་གཙོ་བོར་བྱེད་པ་དང་། སྨན་བཅོས་སྤུས་ཚད་ཟམ་མི་ཆད་པར་མཐོ་རུ་གཏོང་བ། ཕྱོགས་ཡོངས་ནས་ནད་པར་ཞབས་ཞུ་བྱེད་པའི་དམིགས་ཡུལ་མཐའ་འཁྱོངས་བྱེད་པ། བྱམས་བརྩེ་ཟོལ་མེད་ཀྱིས་སྨན་པའི་སྙིང་སྟོབས་སྤེལ་བ། བོད་ལུགས་གསོ་རིག་གི་བསྟན་བཅོས་རྒྱུན་འཛིན་གསར་བཏོད་བྱེད་པ་བཅས་བྱེད་ཅིང་། ཏང་གི་ཚོགས་ཆེན་བཅུ་དགུ་པའི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཐའ་འཁྱོངས་བྱེད་པ། བློ་བརྟན་འགྱུར་མེད་ཀྱིས་ཞིང་ཆེན་དང་ཁུལ་ཨུའི་ཐབས་ཇུས་བཀོད་སྒྲིག་ལག་བསྟར་བྱས་ཏེ། བདེ་ཐང་སྡེ་དགེའི་དམིགས་ཚད་མངོན་འགྱུར་བྱེད་པ། འཚོ་བའི་དམིགས་འབེན་འགྲུབ་པ། མང་ཚོགས་ལ་ཞབས་འདེགས་ཞུ་བ། འབད་འབུངས་ཀྱིས་མདུན་སྐྱོད་བྱེད་པ་བཅས་ཀྱིས་བོད་ལུགས་གསོ་རིག་དང་བོད་སྨན་གྱི་བྱ་གཞག་རྒྱུན་འཛིན་དང་འཕེལ་རྒྱས་སུ་གཏོང་བ་དང་མཐུན་སྒྲིལ་རྡོག་རྩ་གཅིག་སྒྲིལ་གྱིས་འབྱུང་འགྱུར་ལ་རྒྱང་ལྟ་བྱས་ནས་སྡེ་དགེའི་བོད་ལུགས་གསོ་བ་རིག་པ་རྒྱུན་འཛིན་གསར་བཏོད་བྱས་ཏེ། ནན་ཏན་ངང་ཁྱད་ཆོས་ལྡན་པའི་ལེགས་ཆ་མངོན་གསལ་དོད་པ། རྫོང་རིམ་པའི་བོད་ལུགས་སྨན་ཁང་གི་ཞིང་ཆེན་ལས་སྔོན་གྲལ་དུ་སླེབས་པ་དང་། རྒྱལ་ཕྱི་ནང་ལས་སྐད་གྲགས་ཆོད་པ། སྲོལ་རྒྱུན་རྒྱུད་འཛིན་དང་། དེང་རབས་ལེགས་ཆ་གསར་གཏོད། མཁའ་མཉམ་འགྲོ་ཕན། གྲུབ་འབྲས་མཉམ་སྤྱོད་ཀྱི་རྩ་དོན་འཛིན་ནས་ཚད་ལྡན་རང་བཞིན་གྱི་དེང་རབས་ཕྱོགས་བསྡུས་རིམ་གཉིས་ཀ་པའི་སྨན་ཁང་ལུགས་ཀྱིས་སྡེ་དགེ་རྫོང་སྨན་རྩིས་ཁང་ཉིད་ཀྱི་མ་འོངས་པ་སྔར་བས་མཛེས་སྡུག་ལྡན་པ་དང་སྤྱི་དམངས་བདེ་ཐང་འགན་ལེན་བྱ་ཆེད་འབད་འཐབ་ལྷོད་མེད་བྱས་དང་བྱེད་མུས་སུ་མཆིས་སོ། །