བོད་སྨན་ཁམས་གསོའི་སྡོམ་ཚིག་བཞུགས།

  ཆོས་ཀུན་གནད་ལུགས་ཇི་བཞིན་དུ། །དེ་ལྟར་གཟིགས་པའི་སྟོན་པ་ཡིས། །འགྲོ་རྣམས་རྨི་ལམ་ལྟར་འཁྲུལ་བའི། །མ་རིག་གཉིད་ལས་སངས་བར་མཛོད། །མི་རྣམས་ཚེ་རིང་བདེ་སྐྱིད་ཕྱིར། ལུས་དང་སེམས་ཀྱི་ཁམས་ཉམས་པ། །གསོ་ཕྱིར་ཁམས་གསོའི་ཆོ་ག་བསྟན། དེ་ཡང་བོད་ཀྱི་གསོ་རིག་བརྒྱུད་བཞི་ཡི། །ཐོག་མའི་གླེང་གཞིའི་སྐབས་ནས་འདི་ལྟར་གསུང་། །མི་ན་གནས་དང་ན་བ་གསོ་ཕྱིར་ཞེས། །ས་བཅད་ཆེན་པོ་རྣམ་པ་གཉིས་ཀྱིས་དབྱེས། །དེ་ལ་སྐབས་འདིར་མི་ན་གནས་པ་ལ། །ལུས་ཁམས་མི་ན་ཡུན་དུ་གནས་པ་དང་། སེམས་ཁམས་བདེ་ཞིང་སྤྲོ་བ་འབྱུང་བའི་ཕྱིར། །ལུས་དང་སེམས་ཀྱི་ཁམས་གསོ་གཉིས་སུ་དབྱེ། །དེ་ལ་ལུས་བདེ་ཚེ་རིང་འབྱུང་བའི་ཕྱིར། ལུས་ཀྱི་འབྱུང་ཁམས་གསོ་བར་བྱ་བའི་ཕྱིར། །ལུས་སྦྱང་བསྐུ་མཉེ་ལུམས་དང་བཅུད་ལེན་སྟེ། །རྒྱུན་སྤྱོད་ལག་ལེན་རྣམ་པ་བཞི་རུ་དབྱེ། །དེ་ལ་དང་པོ་འདུག་ཆེས་ཚོ་ཆེས་དང་། །བད་ཀན་རང་བཞིན་མི་ལ་རྩོལ་བས་བཅག། །གཡུ་ཐོག་པ་ཡི་འཕྲུལ་འཁོར་རྒྱས་བསྡུས་དང་། ། ལུས་སྦྱོང་འཕྲུལ་འཁོར་ཅི་རིགས་རྒྱུན་དུ་བརྩོན། ། གཉིས་པ་མྱ་ངན་སེམས་ལས་ཆེས་པ་དང་། །གཉིད་ཆག་སྟོབས་ཞན་དུབ་ཞིང་ཐང་ཆད་དང་། །རླུང་གི་རང་བཞིན་མི་ལ་བསྐུ་མཉེ་མཆོག། གསུམ་པ་རྩ་དང་རྒྱུས་པ་རེངས་དང་འཁུམ། རྐང་ལག་རྒལ་ཚིག་ལྷུ་ཚིག་མ་བདེ་ན། །ལུམས་ནི་མཆོག་ཡིན་དེའང་ཆུ་ལུམས་དང་། རླངས་ལུམས་བཅིང་ལུམས་ཅི་རིགས་བྱ་བར་ཤིས། །བཞི་པ་རྒྱུད་ཀྱི་གསོ་ཐབས་རྣམ་གཉིས་ལྟར། །སྦམ་པོ་དབྲི་དང་སྐེམ་པོ་རྒྱས་བྱེད་དང་། རྒས་པ་གསོ་དང་རོ་ཙ་གསོ་བ་སོགས། །ཟས་དང་སྨན་གྱི་སྦྱོར་བ་ཅི་རིགས་བྱ། །ས་བཅད་གཉིས་པ་སེམས་ཁམས་གསོ་བ་ལ། ། སེམས་ལ་སེམས་ཀྱིས་གནད་དུ་བསྣུན་པ་ན། །སེམས་ཁམས་བདེ་ཞིང་བདེ་བའི་དཔལ་སྟེར་བ། །བོད་ཀྱི་གསོ་རིག་གཞན་ལས་ཁྱད་དུ་འཕགས། །ཆོས་རྣམ་ཀུན་གྱི་གནད་ལུགས་མཐར་ཐུག་པ། །ཅི་ཡང་མ་ཡིན་ཅི་ཡང་འཆར་རུང་བའི། །སེམས་ཁམས་རིག་པའི་གནད་འདི་སུས་ཤེས་ན། །ལུས་དང་སེམས་ཀྱི་ནད་རྣམས་འཇའ་ལྟར་ཡལ། །དེ་ལྟར་གོ་ཡང་གོམས་པ་མ་གྱུར་ན། །རང་གི་རྒྱུད་ལ་ཕན་པར་མི་འགྱུར་བས། །ཐོག་མར་རང་སེམས་རྣལ་དུ་ཕབས་པའི་ཐབས། །རྣམ་པར་མི་རྟོག་ཞི་གནས་སྒོམ་པར་བྱ། དེ་ནས་རང་གི་སེམས་ཁམས་ལ་བརྟག་ནས། །གང་ལ་གང་དགོས་དེ་ཡི་གཉེན་པོ་བསྒོམ། །དེ་ལྟར་འབད་པས་སེམས་ཁམས་བདེ་བར་གནས། །སྡུག་བསྔལ་ཐམས་ཅད་རང་སར་ཞི་བར་འགྱུར། །གཞན་ཡང་བཤད་རྒྱུད་སྤྱོད་ལམ་བསྟན་པའི་སྐབས། །ལ་སོགས་དུས་རྒྱུན་ཟས་དང་སྤྱོད་ལམ་གྱི། ། སྤངས་བླང་འཕྲོད་བསྟེན་ཇི་ལྟར་དགོས་པའི་གནད། ། བདེ་འདོད་རྣམས་ལ་རྟག་ཏུ་བསླབ་བྱ་དགོས། །དེ་ནས་སངས་རྒྱས་པ་ཡི་རིག་གཞུང་ལས། །ཇི་ལྟར་འབྱུང་བའི་མཐར་ཐུག་གཏན་གྱི་བདེ། །ཐོབ་པར་འདོད་ན་དེ་ཡི་གཞུང་ལ་ལྟོས། །དེ་ལྟར་ལུས་དང་སེམས་ཀྱི་ཁམས་གསོ་བའི། །སྡོམ་ཚིགས་འདི་ནི་ས་བོན་ཙམ་དུ་བྱས། །བོད་ཀྱི་ལུས་སེམས་ཁམས་གསོའི་རིག་པ་འདི། འཛམ་གླིང་འཛིན་མའི་ཁྱོན་ཀུན་ཁྱབ་གྱུར་ཅིག། །ཅེས་སྡེ་དགེ་རྫོང་སར་བ་བློ་གྲོས་ཕུན་ཚོགས་ནས་རབ་བྱུང་བཅུ་བདུན་པའི་མེ་བྱ་ལོའི་ཟླ་བ་དགུ་པའི་ཚེས་བཅུ་ཉིན་རང་ཤག་ཏུ་ཐུན་བར་ལ་ཤར་མར་བྲིས་པ་དགེ་ཤིང་བཀྲ་ཤིས་པར་གྱུར་ཅིག །