རྒད་པོ་རྒོད་པོ།

མགོ་ཐོག་ནམ་མཁའ་བརྡིབས་ན། །

གྱད་ཆེན་ཤེད་ཀྱིས་འདེགས་མཁན། །

ས་ཡི་དཀྱིལ་འཁོར་འཁྲུགས་ཚེ། །

བརྗིད་པོ་སྐུ་ཡིས་གནོན་མཁན། །

ནང་གི་མདུན་ས་རལ་ན། །

དཀར་བོ་དར་གྱིས་འཆིང་མཁན། །

ཕྱི་ཡི་སོ་ཁ་ཞིག་ན། །

དམར་བོ་སྲོག་གིས་སྲུང་མཁན། །

ལུས་ཟུངས་ཉམས་བཟང་ཟད་ཀྱང་། །

དཔའ་བའི་གདེངས་ནི་ལྡན་པ། །

སྐུ་ཡི་གངས་རི་འཇིག་ཀྱང་། །

ཐུགས་ཀྱི་ཉི་ཟླ་གསལ་བ། །

དགྲ་ལ་ད་རྒོལ་ལབ་ན། །

སྟག་མོ་ནགས་ནས་མཆོངས་འདྲ། །

གཉེན་ལ་ཨེ་བྱམས་ཞེས་ན། །

དུང་གི་ཚ་རུ་འདྲ་བ། །

ཚེ་ཕྱེད་ཉི་མ་གཟུར་ཀྱང་། །

དགྲ་འདུལ་གཉེན་སྐྱོང་ནུས་པ། །

དོན་ཆེན་འགགས་ལ་ཐུག་ཀྱང་། །

རང་སྣང་རིག་པ་གསལ་བ། །

འཇིག་རྟེན་སྲིད་པའི་ཆགས་འཇིག །

ཟབ་མོ་བློ་ལ་ངེས་པ། །

དཀའ་སྡུག་ཚེར་མའི་ལམ་བུ། །

ཞབས་ཐང་བརྒལ་བའི་དྲེད་པོ། །

རང་ཚུགས་ལྕགས་ཀྱི་ཀ་བ། །

ཐབས་ཤེས་འོད་ཀྱིས་ལྷན་པ། །

ཕོ་རབ་ཚིག་གི་མདུད་པ། །

མནའ་ཡི་གཟེར་མས་བཏབ་པ། །

ཚེ་ནི་ཡང་མོ་ཡང་མོ། །

རླུང་གི་གཤོག་པས་བཏེགས་འདྲ། །

དྲིན་ནི་ལྗིད་པོ་ལྗིད་པོ། །

གངས་ཀྱི་ལྷུན་པོ་འདྲ་བ། །

ཚེ་ཡི་འཕེན་པ་ཟད་དེ། །

བར་དོར་འཁྱམ་དགོས་བྱུང་ཡང་། །

ཡིག་དྲུག་སྲུང་བ་བཙན་པས། །

མི་འཇིགས་གདེངས་ནི་ཐོབ་འདུག །

༢༠༡༩/༢/༢༣ལ།

— བསམ་པ་དཀར་ལ་རང་ཚུགས་བརྟན་པའི་བགྲེས་པོ་དག་ལ།