ང་ནི་གྱེས་གདུང་ལ་སྐྲག་པའི་མི་ཞིག་ཡིན། (གཞན་གཉིས)

གློག་འོད་ཁྲ་ཆིལ་དགུ་ཆིལ་གྱི་གྲོང་ཁྱེར་ནས།

ང་ཁྱེད་ཀྱི་ཟབ་སར་ཉུལ་མྱོང་།

ཕྲག་ཐུག་དེ་ཆེས་ཐོག་མ་ཡིན་ལ་ཆེས་མཐའ་མཇུག་ཀྱང་ཡིན་ངེས།

ང་ནི་གྱེས་གདུང་ལ་སྐྲག་པའི་མི་ཞིག་ཡིན།

ཁྱོད་ཀྱིས་བདག་གི་སྤོབས་པའི་ཕ་བོང་རྨང་ནས་སྒུལ་སོང་མོད།

ཡུལ་དུས་གནས་བབ་ག་འདྲ་ཇི་འདྲའི་དབང་གིས།

སྐྱིད་སྡུག་ལས་དབང་ཇི་འདྲ་འདི་འདྲའི་རྐྱེན་གྱིས།

ཉིས་ཤད་ཅིག་ཅིས་ཀྱང་ཚོམ་མེད་དུ་འབྲི་དགོས་བྱུང་།

ལས་སྐལ་སླེབས་པ་འཕྱི་དྲགས་པས།

ང་ཁྱོད་ལ་ལོབས་ནས་གཏིང་དུ་ཕྱིན་ཅིང་།

ཅིས་ཀྱང་ཕྱིར་འབུད་མཁན་དེ་ཡིན།

འུ་གཉིས་ཀྱི་བར་ན་མུན་པ་ཁམ་གང་དང་བརྩེ་བ་མཐོ་གང་ཡོད་པ་བདེན་ཡོད།

མ་འོངས་པར།

དེ་ནི་ཁྲེལ་དགོད་དུ་འགྱུར་ཡང་སྲིད།

ང་ནི་མྱི་ཁར་སྐྲག་པའི་མི་ཞིག་ཡིན།

ཁྱོད་ནི་བདག་གི་ཡིད་ལ་བརྣག་ཆོག་ཅིང་།

གཤོག་པ་ཐར་ཆོད་ཡོད་པའི་བྱེའུ་ཆུང་ཞིག་ཡིན།

ནམ་མཁའ་ཡངས་དོན་ཁྱོད་ཁོ་ནའི་ཕྱིར་དུ་ཡིན།

༢༠༡༩.༣.༡༧གྱི་མཚན་མོར་ཀ་མདོ་ནས་སྦྱར།

ཞོགས་པ་ཞིག་ལ།

བྱ་རྒོད་ཀྱིས་བསྐྱུར་ཟིན་པའི་ནམ་མཁའ།

སུ་ཞིག་ལ་སྨྲེང་སྐྱོ་འཇོག་པ་བཞིན།

ཇེ་ཆུང་ནས་ཇེ་ཆུང་།

རེ་སྒུག་མེད་པའི་ལོ་ཟླའི་ནང་།

ཉི་མའི་འཆར་ནུབ་ཀྱི་ཁྲོད་ནས།

ཁྱོད་དེ་ལྟར་རྒས།

ཨུ་ཚུགས་ཀྱི་ལྟ་གྲུབ་དེའི་མདུན་དུ།

ང་ཡང་འདི་ལྟར་ངལ་བྱུང་།

མཉམ་དུ་རྡོག་པ་བརྒྱབ་མྱོང་བའི་ལམ་བུ།

ད་ནི་ཅིས་ཀྱང་ཁེར་ཧྲེང་ཡིན་དགོས།

ད་ནས་བཟུང་།

མི་ཚེ་ནི་ངལ་དུབ་ཀྱི་འགྲེལ་བཤད་གཞན་ཞིག་ཡིན།

མཚན་མོའི་ཟབ་ས་རུ།

ཐག་རིང་གི་ཀི་སྒྲ་ངས་ཐོས་ཀྱིན་མི་འདུག

གློ་བུར་ཡིད་ལ་ལྟུང་བའི་ཆུ་རྡོག

གཞས་ཀྱི་གཏིང་ནས་ཉི་འོད་བཞིན་ཐོར་སོང་།

མཚན་མོ་རེ་རེའི་རྗེས་སུ།

ང་ནི་གཏམ་རྒྱུད་ཡོད་པའི་མི་ཞིག་ལ་ཆགས།

ངའི་བརྩེ་དུང་གཏམ་རྒྱུད་ཡིན་བཞིན་དུ།

མིག་ཆུའང་གཏམ་རྒྱུད་ཡིན།

མཚན་མོའི་ཟབ་ས་རུ།

ཞེ་འདང་གི་སྐར་ཚོགས་ཤིན་ཏུ་འཁྱགས།

སྙན་ངག་ནི་ཆེས་མཐའ་མའི་ལག་པ་བསྲོ་ས་དེ་ཡིན།

ང་རྒྱང་རིང་ལ་འཁྲེང་དོན།

ངའི་གདུང་བ་རྒྱང་རིང་ལ་ཡལ་སོང་བ་བཞིན།

དགོད་སྒྲའང་རྒྱང་རིང་དུ་ཡིབ་ཡོད་པས་ཡིན།