ངའི་མིང་ལ་ཡེ་ཤེས་ཟེར། ཕ་ཡུལ་སྡེ་དགེ་སྙན་མདའ་ནས་ཡིན། 1949ལོའི་ཟླ་10པའིི་ཚེས་1ལ་སྐྱེས་པ་ཡིན། ང་རང་ལོ་བདུན་གྱི་ཐོག་སྡེ་དགེ་རྫོང་སློབ་ཆུང་དུ་སོང་བ་ཡིན། སྐབས་དེ་དུས་སློབ་གྲྭ་དེ་བོད་ཁང་རྐྱང་རྐྱང་རེད། དེ་ནས་སློབ་གྲྭ་བསྐྱར་བསྐྲུན་བྱས་ཏེ་སྡེ་དགེའི་ཕོ་བྲང་ནང་དུ་སྤོས། ང་རང་སྐབས་དེར་ལོ་རིམ་བཞི་པ་མཐར་མ་ཕྱིན་ཙམ་དུ་ཕ་ཡུལ་དུ་ར་ལུག་དང་ཟོག་རྫི་བྱེད་དུ་སོང་བ་ཡིན།
རྗེས་སུ་འབྲིང་རིམ་སློབ་གྲྭ་དང་སློབ་ཆེན་དུ་སོང་། 1982ལོའི་སྔོན་དུ་དམངས་གཉེར་སློབ་གྲྭ་བཙུགས་སྐབས་ངས་སྔོན་གྱི་སློབ་ཆུང་གི་ཡོན་ཚད་རྨང་གཞི་ལ་བརྟེན་ནས་རྒྱུགས་སྤྲད་དེ་དགེ་རྒན་བྱས། དེ་ནས་ཀྲུང་དབྱང་མི་རིགས་སློབ་ཆེན་དུ་ལོ་གཉིས་ལ་ཟབ་སྦྱོང་བྱེད་དུ་སོང་བ་ཡིན། སྐབས་དེ་དུས་འཚོ་བ་ཆེས་སྡུག་བའི་སྒང་རེད། མི་དམངས་ལ་དཀའ་ངལ་ཆེན་པོ་འདུག །མི་དམངས་ཀུང་ཧྲེ་ཟེར་བ་བཙུགས་ཡོད་དེ་མཉམ་ལས་སྤྱི་ཡིས་སྤྱོད་རྒྱུ་མ་གཏོགས་མི་སྒེར་ལ་དེ་ཙམ་སྤྱོད་རྒྱུ་མེད། སྐབས་དེར་ལས་བྱེད་པ་རེ་ལ་ཉིན་རེར་རྩམ་པ་རྒྱ་མ་ཕྱེད་ཙམ་ལས་ཟ་རྒྱུ་མི་འདུག །འབྲས་སོགས་ཟ་འདོད་ཆེ་ཡང་ཟ་རྒྱུ་ཤིན་ཏུ་རྙེད་དཀའ། དགེ་རྒན་རྣམས་ཀྱང་འཚོ་བ་སྡུག་པོ་རེད་དེ་འབྲས་ཅུང་ཙམ་ཡོད་རེད། དགེ་རྒན་གྱིས་རྩམ་པ་ཟ་འདོད་ན་སློབ་མའི་རྩམ་པ་དང་འབྲས་གཉིས་བརྗེ་ཆོག་རེད། འབྲས་ཉུང་ཙམ་དེ་ལས་མ་གཏོགས་དེ་རིང་ཁ་སང་གི་དགེ་རྒན་རྣམས་དང་འདྲ་བ་ཚལ་རིགས་འདྲ་མིན་དང་། ཞིམ་པོ་མངར་མོ་དེ་ཚོ་གཏན་ནས་ཟ་རྒྱུ་ཡོད་མ་རེད།
ངས་1981ལོ་ནས་2001ལོའི་བར་དུ་དགེ་རྒན་གྱི་འགན་ཁུར་བ་ཡིན། སྐབས་དེར་ངས་དམངས་བཙུགས་སློབ་གྲྭའི་དགེ་རྒན་བྱེད་དུས་སློབ་མ་རྣམས་ལ་རྐུབ་སྟེགས་དང་ཅོག་ཙེ་གང་ཡང་ཡོད་མ་རེད། དེ་ནས་ཤིང་ལེབ་ཅིག་གིས་རྐུབ་སྟེགས་རིང་པོ་ཞིག་བཟོས་ནས་ཡི་གེ་འདོན་དུས་རྐུབ་སྟེགས་དང་ཡི་གེ་འབྲི་དུས་ཅོག་ཙེའི་ཚབ་བྱས་པ་ཡིན། དེ་རྗེས་ཅོག་ཙེ་དང་རྐུབ་སྟེགས་ཐབས་ཆག་རེ་ཡོད། ཡིན་ན་ཡང་དེང་སང་ལྟ་བུའི་མཛེས་སྤྲས་ཆེ་ཞིང་སྲ་བརྟན་ཅན་གཏན་ནས་མེད། སློབ་དེབ་དང་འབྲི་དེབ་སོགས་ཀྱང་དེང་སང་གི་སྤུས་ཀ་ཅན་འདི་འདྲ་མ་རེད། སློབ་གྲྭ་གཞུང་ལ་སྒོར་མོ་མེད་པས་རྐུབ་སྟེགས་སོགས་ཀྱང་ཆག་གྲུག་བྱུང་ན་སློབ་མ་སོ་སོས་ཞིག་གསོ་བྱེད་དགོས།
དགེ་རྒན་ལ་དེ་དུས་ས་སྨྱུག་ཅིག་དང་། སྐད་ཡིག་སློབ་དེབ་ཅིག་ལས་ཅི་ཡང་མེད། སློབ་གྲྭ་གཞུང་ལ་དག་ཡིག་གསར་བསྒྲིགས་གཡར་རྒྱུ་ཡོད་རེད། གཞན་ལྕགས་སྨྱུག་དང་སྣག་ཚ་ནི་རང་རང་གིས་ཉོ་དགོས། སྐབས་དེར་སློབ་ཆུང་སློབ་མ་ཚོས་སློབ་ཡོན་སྤྲད་དགོས་པས་འབྲི་ཤོག་སོགས་སློབ་གྲྭ་གཞུང་གིས་སྤྲད་རྒྱུ་ཡོད།
1967ལོར་ང་རང་གུང་ཁྲན་ཏང་ཡོན་ཞིག་ཏུ་གྱུར། དགེ་རྒན་ཐོག་མར་བྱེད་དུས་ཟླ་ཕོགས་ཟླ་རེ་ལ་སྒོར་སུམ་ཅུ་ཙམ་ལས་མེད། རྗེས་མར་རྒྱལ་ཁབ་ཀྱི་དཔལ་འབྱོར་ཉིན་རེ་ནས་ཉིན་རེར་ཇེ་རྒྱས་ཕྱིན་པ་དང་བསྟུན་ཟླ་ཕོགས་ཀྱང་ཉིན་བཞིན་གོང་འཕར་བྱུང་། དཔེར་ན་ང་པེ་ཅིན་ཀྲུང་དབྱང་མི་རིགས་སློབ་ཆེན་དུ་ཟབ་སྦྱོང་འགྲོ་དུས་ཟླ་རེ་ལ་སྒོར་ལྔ་བཅུ་རེ་ཡོད་རེད།
ངས་ཁྱེད་རང་བྱིས་དུས་ནས་གཞོན་དུས། དེ་ནས་རྒན་དུས་བར། མདོར་ན་མངར་སྐྱུར་འདྲེས་མའི་མི་ཚེའི་བརྒྱུད་རིམ་དེའི་ནང་། སྤྱི་ཚོགས་ལ་ཡར་རྒྱས་དང་འཆམ་མཐུན། འགྱུར་ལྡོག་ག་འདྲ་བྱུང་བ་དང་། ཉམས་མྱོང་ག་འདྲ་བྱུང་ཡོད་ཅེས་དྲིས་སྐབས། ཁོང་གིས། འགྱུར་ལྡོག་ཧ་ལས་པ་བྱུང་སོང་། ང་བྱིས་པ་ཡིན་པའི་སྐབས་དེར་རླངས་འཁོར་ཞེས་པ་དེ་རིགས་མཐོང་ཐོས་བྱུང་མ་མྱོང་། དཔེར་ན་ང་ཚོའི་ཕ་ཡུལ་ནས་སྡེ་དགེ་རྫོང་མཁར་དུ་ཤིང་ཁུར་ནས་འོང་། སྡེ་དགེ་རྫོང་མཁར་དུ་ཤིང་ཁུར་པོ་རེ་ལ་སྒོར་རེ་བྱས་ནས་བཙོང་སྟེ། ཤ་སྙིགས་དང་རུས་པའི་རིགས་ཉོས་ཏེ་ཁྱིམ་ལ་ཁུར་ནས་འཚོ་བ་རོལ་དགོས། སྐབས་དེར་ཁུར་པོ་ཁུར་མི་དགོས་པར་རྐང་ཐང་འགྲོ་དུས་སྐྱིད་པོ་ཡིན་སྣང་ཤར་མྱོང་། དེང་སང་གྲོང་པའི་མགོ་མཇུག་འགྲོ་དུས་ཀྱང་རླངས་འཁོར་ནང་སྡོད་པ་ལས་རྐང་ཐང་སོང་ན་དཀའ་སྣང་ཤར་མཁན་ཆགས་ཚར་རེད། སྐབས་དེར་རྫོང་གི་འགོ་ཁྲིད་རྣམས་ལའང་རླངས་འཁོར་ཡོད་མ་རེད། ཕལ་ཆེ་བར་ལྕགས་རྟ་ཡང་མེད། ལྕགས་རྟ་རིག་དུས་མཚར་སྣང་ཡང་ཤར་མྱོང་། མི་སྒེར་ཞིག་ཡིན་ན་གྱོན་གོས་ཀྱང་ལྷན་པ་ཡོད་མཁན་ཞིག་མ་གཏོགས་དེང་སང་རྒྱགས་ཆེ་ནས་གོས་འདི་ཚོ་ལྷན་པ་ཅན་དང་ཧྲུལ་པོ་བྱེད་ནས་གྱོན་བཞིན་འདུག །
མ་ཚད་ཟ་མ་ཡིན་ནའང་བཟང་ངན་བཤད་ནས་ཟ་བཞིན་འདུག །འགྱུར་ལྡོག་དེ་འདྲ་རེད། དེང་སང་རྒྱལ་ཁབ་སྟོབས་འབྱོར་རྒྱས་ཤིང་མི་སེར་ཕྱུག་པོར་གྱུར་ནས་འདི་ལས་སྐྱིད་པའི་འཚོ་བ་ཞིག་ཡོད་རྒྱུ་མ་རེད་སྙམ་ཞེས་གསུངས།
དེ་ཡང་ཁོང་ཉིད་དགེ་རྒན་ཞིག་ཡིན་པའི་ཆ་ནས་སྔོན་མ་དང་ད་ལྟའི་བར་གྱི་སློབ་གསོའི་ཐད་ཀྱི་འགྱུར་ལྡོག་སྐོར་འདི་སྐད་ཅེས་གསུངས།
སྐབས་དེར་ཕྱི་ཡི་ཆ་རྐྱེན་ཞན་ཡང་། ནང་གི་བསམ་བློའི་སྤོབས་པ་དང་ལྷག་བསམ། སྤྲོ་སྣང་ཚད་མཐོན་པོ་རེད། སློབ་མར་འབད་བརྩོན་དྲག་པོའི་སྒོ་ནས་སློབ་གསོ་དང་སློབ་ཁྲིད་བྱེད་ཅིང་། ཡོན་ཚད་དམའ་བའི་སློབ་མ་ལ་དམིགས་བསལ་དུ་སློབ་ཁྲིད་དང་སློབ་གསོ་བྱེད་ཅིང་། ཟུར་ཁྲིད་སྐབས་སུའང་སློབ་ཡོན་སྐར་མ་གང་ཡང་ལེན་སྲོལ་མེད། སློབ་གྲྭའི་ཅོང་བརྡ་མ་དཀྲོལ་བའི་སྔོན་ནས་དགེ་རྒན་ཡར་ལངས་ཏེ་སློབ་མར་སྐུལ་འདེད་དང་། སློབ་གསོ་གཏོང་བ། གློག་ཀྱང་གསལ་ལ་མི་གསལ་བ་ཞིག་ལས་མེད་ཀྱང་། དགོང་མོ་སློབ་ཚན་གྲོལ་ཚར་དུས་རང་འགུལ་གྱིས་ཟུར་ཁྲིད་བྱེད་རེད། དེང་སང་གློག་གི་ཆ་རྐྱེན་དང་གློག་ཀླད་སོགས་ཀྱི་ཆ་རྐྱེན་ཕུན་སུམ་ཚོགས་པོ་རེད།
མཇུག་མཐར་ཁོང་གིས་མ་འོངས་པའི་ཀྲུང་གོ་གསར་པ་དང་ཕ་ཡུལ་གོང་ནས་གོང་དུ་འཕེལ་བའི་སྨོན་འདུན་ཞུས། །