ཀ་དག་གངས་རིའི་རྒྱན་མཆོག་མཚོ་སྔོན་པོ། །
ཁ་ལྗོངས་རྣམ་འདྲེན་འཇམ་མགོན་བླ་མ་མཆོག །
ག་ལེར་བལྟམས་ཡུལ་དེང་ཡང་སྤྱན་མི་འཛུམ། །
ང་ཚོའི་མགོན་དུ་བསེ་ཚང་ལ་སོགས་བྱོན། །
ཅ་ཅོའི་ངག་མིན་ཐར་པའི་ལམ་བཟང་པོ། །
ཆ་ཚང་སྟོན་བཞིན་སྙིང་རྗེ་ཟུང་འཇུག་ལམ། །
ཇ་ཞིམ་ལྟར་སྟོན་མ་རྒན་རིགས་དྲུག་པོ། །
ཉ་མོའི་འཁྱུག་འགྲོས་ཐར་པའི་ལམ་ལ་བཀོད། །
ཏ་ཐཱ་ག་ཏཱ་རྒྱལ་བའི་བསྟན་པ་ཡིས། །
ཐ་ཆད་ལམ་ལས་མངོན་མཐོ་ངེས་ལེགས་ནས། །
ད་དུང་བདུད་བཞིའི་འཚེ་བ་རྨེག་མེད་ཀྱིས། །
ན་རྒ་འཆི་བའི་སྡུག་བསྔལ་རབ་ཏུ་བསལ། །
པ་ཝ་སངས་ལྟར་ཕུལ་བྱུང་གཞོན་ནུའི་ཚོགས། །
ཕ་ལམ་ལྟ་བུའི་དག་པ་རབ་འབྱམས་ལ། །
བ་བེར་མ་ཡིན་འགོད་པའི་དུས་དེབ་འདི། །
མ་རིག་བསལ་བའི་སློབ་གསོ་སྟོན་ལ་བསྔགས། །
ཙ་རི་བས་ལྷག་སྐུ་འབུམ་བྱ་ཁྱུང་དགོན། །
ཚ་རླབས་འཕྱུར་བའི་འདུས་སྡེའི་བཤད་སྒྲུབ་བསྟན། །
ཛ་ཡའི་ལུང་རིགས་རྣམ་པར་དག་པའི་གནད། །
ཝ་ལེར་སྟོན་པའི་འདུས་སྡེ་ཡུལ་གྲུའི་རྒྱན། །
ཞྭ་སེར་བསྟན་སོགས་གྲུབ་མཐའ་རིས་མེད་སྡེ། །
ཟ་ཟིར་མ་ཡིན་ཐུགས་མཐུན་ཁྲིམས་གཙང་གིས། །
འ་འུར་མིན་པའི་རྨད་བྱུང་སྤྱོད་བཟང་ཡང་། །
ཡ་མཚན་ངོ་མཚར་ཡུལ་དེའི་རྒྱན་དུ་མཛེས། །
ར་བ་གངས་རིས་བསྐོར་བའི་ཞིང་མཆོག་འདིར། །
ལ་ཀླུང་ཀུན་ཀྱང་དཔལ་འབྱོར་ཡར་རྒྱས་ཆེད། །
ཤ་ཚའི་གཏམ་གྱིས་འཛུགས་སྐྲུན་བྱ་དགོས་སོགས། །
ས་སྟེང་རྟག་པར་སྟོན་པའི་དུས་དེབ་བསྔགས། །
ཧ་ཅང་ཚིག་འགྲོས་གཙང་མའི་རྒྱུ་མཚན་གྱིས། །
ཨ་ནི་ཡིག་འབྲུ་མཆོག་ལྟར་རབ་སྟོན་པ། །
ཧ་ཅང་སྙན་ཚིག་ལྡན་པའི་དུས་དེབ་རྨད། །
ཨ་ཏི་ཡོ་གའི་ལྟ་བའི་ཡང་རྩེ་སོགས། །
ཧ་ཅང་མདོར་བསྡུས་ཚིག་གིས་སྐྱེ་བོའི་བློར། །
ཨ་ཕའི་ངག་བཞིན་རེ་རེ་བཞིན་སྟོན་པ། །
ཧ་ཅང་སློབ་གསོས་སྐྱེ་བོའི་ཡིད་དབང་འཕྲོག །
ས་ཀུན་མཛེས་པའི་ཡུལ་ལུང་བཀོད་པ་སོགས། །
ཤ་ཚའི་གཏམ་གྱིས་ཇི་ལྟར་བསྐྲུན་དགོས་པ། །
ལ་གཞས་ལྟ་བུས་སྐྱེ་བོའི་ཡིད་ངོ་རུ། །
ར་མ་ལུག་དཀྲི་མིན་པའི་སློབ་གསོ་ལེགས། །
ཝ་ལེར་སེམས་ལ་བཟུང་འོས་གང་དང་གང། །
ཛ་ཛོར་མིན་པར་སྟོན་པའི་གདམས་ངག་གང། །
ཚ་རླབས་འཕྱུར་བའི་ངག་གི་གནད་ཐིག་པོས། །
ཙ་ཀ་ལི་ལྟར་སྟོན་པའི་སློབ་གསོའི་དེབ། །
མ་ཚང་མེད་པའི་དྲང་པོའི་གཏམ་བཟང་པོ། །
བ་གམ་ལྟ་བུའི་ཡུལ་གྱི་འཛུགས་སྐྲུན་སོགས། །
ཕ་ཁག་བུ་དཀྲི་མེད་པར་སྐྲུན་ཅེས་གཏམ། །
ཅུང་ཟད་སྨྲས་འདི་ཐུགས་ཀྱི་དཀྱིལ་དུ་སྟིམས། །
རབ་དཀར་ལྷག་བསམ་བཟང་པོའི་ལྷ་རེག་གི །
གཤོག་ཟུང་བརྐྱངས་བྱས་ལྷ་ལྡན་ཞིང་མཆོག་ནས། །
བཅོས་མིན་གཏམ་གྱི་སྦྲུལ་འདི་འཛིན་བྱས་ནས། །
མཁའ་ལ་ལྡིང་ཁྱོད་མཚོ་སྔོན་ཕྱོགས་ལའོ། །
དགེའོ། ། ། །
* ནོར་བྲང་ཨོ་རྒྱན། བོད་ལྗོངས་སྤྱི་ཚོགས་ཚན་རིག་ཁང་ནས་ལས་འཁྱུར་ངལ་གསོ་གནང་།