ཏང་གི་ཚོགས་ཆེན་བཅུ་དགུ་པའི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དར་སྤེལ་གཏང་རྒྱུའི་སྐོར་བཀའ་སློབ་རབ་དང་རིམ་པ་ལག་བསྟར་དོན་འཁྱོལ་གཏིང་ཟབ་བྱ་རྒྱུ་དང་། ཀྲུང་གོ་གསར་པ་དབུ་བརྙེས་ནས་ལོ་ངོ་70འཁོར་བར་རྟེན་འབྲེལ་ཞུ་ཆེད། དཀར་མཛེས་བོད་རིགས་རང་སྐྱོང་ཁུལ་ཏང་ཨུ་དང་ཁུལ་མི་དམངས་སྲིད་གཞུང་གིས་གཙོ་གཉེར་གནང་བ་དང་། དཀར་མཛེས་ཁུལ་ཁམས་པའི་རིག་གནས་ཞིབ་འཇུག་གླིང་དང་། ཀྲུང་གུང་སྡེ་དགེ་རྫོང་ཨུ་དང་རྫོང་མི་དམངས་སྲིད་གཞུང་། ཁམས་པའི་བརྙན་འཕྲིན་ཁང་བཅས་ཀྱིས་ཐུན་མོང་ཐོག་འགན་གཉེར་བྱས་པའི་ཁམས་ཁུལ་དུ་བསྐྱོད་ནས་གླིང་གེ་སར་རྒྱལ་པོའི་ཞབས་རྗེས་འཚོལ་ཞིབ་བྱེད་སྒོའི་རྡོག་ཐོན་མཛད་སྒོ་དེ་སྤྱི་ལོ་2019ལོའི་ཟླ་8པའི་ཚེས་1ཉིན་གྱི་སྔ་དྲོར་གླིང་གེ་སར་རྒྱལ་པོའི་འཁྲུངས་ཡུལ་སྡེ་དགེ་ཨ་ཕྱུག་རྩྭ་ཐང་དུ་སྤེལ།
ཁམས་སྡེ་དགེ་ནི་ཁམས་ཁུལ་རིག་གནས་ཀྱི་ལྟེ་བ་དང་། གླིང་གེ་སར་རྒྱལ་པོའི་འཁྲུངས་ཡུལ། བོད་ཀྱི་ཟུར་ལུགས་གསོ་བ་རིག་པ་དར་སྤེལ་བྱུང་ཡུལ་ཞེས་བརྗོད་སྲོལ་མཆིས་ཤིང་། བོད་ལྗོངས་ལྷ་ས་དང་། ཁམས་སྡེ་དགེ །ཀན་ལྷོའི་བླ་བྲང་བཅས་ནི་སྙན་གྲགས་ལྡན་པའི་བོད་ཁུལ་གྱི་གནའ་བོའི་རིག་གནས་ལྟེ་བ་གསུམ་དུ་གྲགས་ཤིང་བོད་ཀྱི་རིག་གནས་བསྟན་བཅོས་རིག་གཞུང་བརྒྱ་ཆ་བདུན་ཅུ་ཙམ་ཉར་ཚགས་བྱས་པའི་སྡེ་དགེ་པར་ཁང་ཆོས་མཛོད་ཆེན་མོ་དང་། གྲུབ་མཐའ་ཆེན་པོ་ལྔ་འཆམ་མཐུན་མཉམ་གནས་ཀྱི་ཆོས་ལུགས། ཐུན་མོང་མ་ཡིན་པའི་དམངས་སྲོལ་དང་དགོན་སྡེའི་འཛུགས་སྐྲུན། བོད་ཀྱི་སྲོལ་རྒྱུན་རི་མོ། རྩོམ་རིག་སྒྱུ་རྩལ། སྲོལ་རྒྱུན་གསོ་རིག་སོགས་ནི་སྡེ་དགེ་མི་དམངས་ཀྱི་བློ་གྲོས་ཀྱི་ཉིང་བཅུད་ཡིན། ཐུན་མོང་མ་ཡིན་པའི་རིག་གནས་དང་། མཛེས་སྡུག་ལྡན་པའི་ཡུལ་ལྗོངས། ཕུན་ཕུམ་ཚོགས་པའི་ཐོན་ཁུངས་བཅས་ཀྱིས་གནམ་སྡེ་དགེ་ས་སྡེ་དགེ་ཞེས་པའི་སྡེ་དགེ་བླ་ན་མེད་པའི་མཚན་སྙན་ཐོབ་ཡོད།