ས་མཐོའི་གང་སར་རྣམ་པ་གསར་པ་བཀྲ་།——སི་ཁྲོན་བོད་ཁུལ་དབུལ་གྲོལ་འགག་སྒྲོལ་གྱི་རྒྱལ་ཁ་ཕུ་ཐག་ཆོད་པའི་དུས་རིམ་དུ་བྲིས་པ།

འདབ་པ་རྫོང་གི་གྲོང་དམངས་ཚོས་ཁྱིམ་གཞིས་གསར་སྐྲུན་བྱེད་བཞིན་པ།

撸起袖子加油干——稻城红草地村建设新居

2019ལོར་སི་ཁྲོན་གྱི་དབུལ་གྲོལ་འགག་སྒྲོལ་གྱི་ལོ་གཅིག་གི་དམིགས་འབེན་ནི་སྤུས་ཚད་མཐོ་བའི་སྒོས་དབུལ་ཕོངས་མི་འབོར་ཁྲི་50དབུལ་གྲོལ་བྱ་རྒྱུ་དང་། དབུལ་ཕོངས་སྡེ་པ་1482དབུལ་ཕོངས་ལས་ཐར་རྒྱུ། དབུལ་ཕོངས་རྫོང་31གི་ཞྭ་མོ་ཕུད་ཐུབ་པ་བྱ་རྒྱུ་དེ་ཡིན། དེ་དང་དུས་མཚུངས་སུ་བོད་ཁུལ་གྱི་དབུལ་ཕོངས་རྫོང་ཡོད་ཚད་ཀྱིས་དབུལ་ཕོངས་ཀྱི་ཞྭ་མོ་ཕུད་ཐུབ་པ་ཁག་ཐེག་བྱས་ཏེ། དབུལ་གྲོལ་འགག་སྒྲོལ་གྱི་འགག་རྩའི་ལོ་དེར་རྦད་ཐག་ཆོད་པའི་རྒྱལ་ཁ་ལེན་རྒྱུ་དེ་ཡིན།

ལག་རྩལ་སྣ་གཅིག་ཤེས་ན། འཚོ་བ་ཇེ་བཟང་ནས་ཇེ་བཟང་རེད།

བྲག་འགོ་རྫོང་མི་རིགས་ལག་ཤེས་བཟོ་ལས་ལག་རྩལ་གསོ་སྦྱོང་ལྟེ་གནས་ཀྱིས་རིན་མེད་སྒོས་དབུལ་ཕོངས་བྱིས་པར་འཚེམ་བཟོ་སློབ་སྦྱོང་བྱེད་པའི་མཐུན་རྐྱེན་བསྐྲུན།
甘孜州炉霍县民族手工艺技术培训基地免费招收的贫困孩子学习特殊技能

2019ལོའི་ཟླ་12པར་སླེབས། སི་ཁྲོན་གྱི་ལས་ཞུགས་དབུལ་སྐྱོར་ཐད་ནས་དགའ་འོས་པའི་འབྲས་བུ་ཐོབ། གྲོང་གསེབ་ཀྱི་ངལ་རྩོལ་ནུས་ཤུགས་དབུལ་པོ་ཁྲི་112.7ལས་ཞུགས་གཞན་སྒྱུར་མངོན་འགྱུར་བྱུང་སྟེ། ལོ་གཅིག་སྔ་སྣུར་དུ་《སི་ཁྲོན་ཞིང་ཆེན་གྱི་གནད་སྨིན་ལས་ཞུགས་དབུལ་སྐྱོར་ལག་བསྟར་ཇུས་གཞི(2016ལོ་ནས་2020ལོ་བར)》ནང་བཏོན་པའི་2020ལོར་སླེབས་སྐབས་དབུལ་པོའི་ངལ་ནུས་གཞན་སྒྱུར་ལས་ཞུགས་ཀྱི་གཞི་ཁྱོན་མི་ཁྲི་100ལས་བརྒལ་བའི་ལས་འགན་དང་། ལོ་དེར་དབུལ་གྲོལ་འཆར་གཞི་ཡོད་པ་དང་ངལ་རྩོལ་ནུས་པ་ལྡན་པའི་ཁྱིམ་ཚང་དབུལ་པོར་ཉུང་མཐར་ཡང་མི་གཅིག་ལས་ཞུགས་ཐུབ་པའི་དམིགས་ཚད་མངོན་འགྱུར་ཐུབ་ཡོད།

 བྲག་འགོ་རྫོང་མི་རིགས་ལག་ཤེས་བཟོ་ལས་ལག་རྩལ་གསོ་སྦྱོང་ལྟེ་གནས་ཀྱིས་རིན་མེད་སྒོས་དབུལ་ཕོངས་བྱིས་པར་ཐང་ཀ་འབྲི་སྦྱོང་བྱེད་པའི་མཐུན་རྐྱེན་བསྐྲུན།
甘孜州炉霍县民族手工艺技术培训基地免费招收的贫困孩子学习特殊技能

གྲུབ་འབྲས་བཟང་པོ་འདི་གནད་སྨིན་དངོས་སྒྲུབ་ལས་བྱུང་བ་ཡིན། ཏང་གི་ཚོགས་ཆེན་བཅོ་བརྒྱད་པའི་ཚུན། ཞིང་ཆེན་ཡོངས་ཀྱི་ལས་ཞུགས་མ་ལག་གིས་གནད་སྨིན་དབུལ་སྐྱོར་དང་གནད་སྨིན་དབུལ་གྲོལ་སྐོར་གྱི་ཏང་ཀྲུང་དབྱང་དང་། རྒྱལ་སྲིད་སྤྱི་ཁྱབ་ཁང་། ཞིང་ཨུ་དང་ཞིང་ཆེན་སྲིད་གཞུང་བཅས་ཀྱི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱས་པ། གནད་སྨིན་དབུལ་སྐྱོར་དང་གནད་སྨིན་དབུལ་སྒྲོལ་ཁྲོད་ཀྱི་ལས་ཞུགས་ཀྱི་འཐབ་ཇུས་གནས་བབ་ཁོང་དུ་ཡང་དག་ཆུད་པ། དབུལ་ཕོངས་མང་ཚོགས་ཀྱི་ཡོང་འབབ་འཕར་སྣོན་གཏོང་རྒྱུ་ལྟེ་བར་བཟུང་བ། དབུལ་སྐྱོར་འཁོར་ཁང་བསྡུ་ལེན་འཕེལ་རྒྱས་གཏོང་བར་འཚོལ་ཞིབ་དང་ལག་བསྟར་སྐུལ་འདེད་གཏོང་བ། རྩ་འཛུགས་ཡོད་པའི་ངལ་ནུས་ཕྱིར་གཏོང་གི་ལས་ཀ་སྤེལ་བ་དང་། སྤྱི་ཕན་རང་བཞིན་གྱི་ལས་གནས་བཀོད་སྒྲིག་སོགས་ལས་ཞུགས་དབུལ་སྐྱོར་བྱེད་ཐབས་རབ་དང་རིམ་པ་གསར་འབྱེད་བྱེད་པ། “འཚེམ་དྲུབ”ལྟ་བུའི་འབད་བརྩོན་ལ་བརྟེན་ནས་གནད་སྨིན་དངོས་སྒྲུབ་བྱེད་པ་དང་། ངལ་རྩོལ་ནུས་ཤུགས་དབུལ་པོའི་འབབ་འཕར་དབུལ་གྲོལ་ལ་རོགས་རམ་བྱས་ཏེ་དགེ་མཚན་ལྡན་པའི་གྲུབ་འབྲས་ཐོབ་ཡོད།

“སྔོན་ཆད་ང་དཀའ་ངལ་གྱི་གནས་སུ་ལྷུང་ཡང་ལག་ཟུང་ལ་བརྟེན་ནས་ལས་བརྩོན་ཕྱུག་འགྱུར་ཡོང་བར་བྱ་འདོད་མོད། འོན་ཀྱང་ཡོན་ཏན་ཅི་ཡང་མེད། དོན་ངོ་མར་ཅི་ཞིག་བསྒྲུབ་ན་ད་གཟོད་ཕྱུག་འགྱུར་ཡོང་ཐུབ། དུས་ཡུན་ངེས་ཅན་ཞིག་གི་ནང་དུ་ང་ལ་འགལ་རྐྱེན་བྱུང་། 2016ལོའི་ཟླ་6པར། ཉག་རོང་རྫོང་གི་ཤེས་ལྡན་པ་སྤེལ་རེས་དང་ལས་ཞུགས་ཞབས་ཞུ་ཅུས་ཀྱིས་ང་ལ་ལས་ཞུགས་དབུལ་སྐྱོར་གྱི་འཕྲུལ་རྟའི་རྩལ་ནུས་གསོ་སྦྱོང་ནང་ཞུགས་རྒྱུའི་བརྡ་ཐོ་བཏང་། གསོ་སྦྱོང་བྱས་པར་བརྒྱུད། ངས་འཕྲུལ་རྟ་འཁོར་ལོ་ཉམས་གསོའི་ལག་རྩལ་ཁོང་དུ་ཆུད། ད་ལྟ་ངས་རྫོང་ཐོག་ཏུ་འཕྲུལ་རྟ་ཉམས་གསོ་ཁང་ཞིག་བཙུགས་ཡོད། ཚོང་ཆེས་བཟང་བའི་སྐབས་སུ་ད་དུང་ལག་རོགས་3གདན་འདྲེན་བྱས་ཡོད། ཉིན་རེར་སྒོར་བརྒྱ་ཕྲག་ཁ་ཤས་བཙལ་ཐུབ། ངའི་འགྲམ་དུ་ཡུལ་མི་དབུལ་པོ་ཡོད། ཁོ་ཚོ་དབུལ་སྐྱོར་རྩལ་ནུས་གསོ་སྦྱོང་བྱས་པར་བརྒྱུད། རླངས་འཁོར་ཉམས་གསོ་དང་། གཡོས་སྦྱོར། ཐང་ག་འབྲི་བ། གློག་དང་ཤིང་བཟོ་བ། འཚེམ་བཟོ་སོགས་ཀྱི་ལག་རྩལ་ཤེས་སོང་། འཚོ་བ་ཇེ་བཟང་ནས་ཇེ་བཟང་རེད། ད་ལྟ་འཕྲུལ་རྟ་ཉམས་གསོ་ཁང་གི་ཚོང་བཟང་པོ་འདུག ངས་བསམ་ན་འོས་འཚམ་གྱི་དུས་སུ་གཞི་ཁྱོན་རྒྱ་བསྐྱེད་དེ་འཕྲུལ་རྟ་ཉམས་གསོ་བྱེད་འདོད་ཡོད་པའི་དབུལ་ཕོངས་ཁྱིམ་ཚང་མཉམ་དུ་ཕྱུག་འགྱུར་བྱེད་པར་སྐུལ་ཁྲིད་བྱེད་འདོད།”ཅེས་དཀར་མཛེས་ཁུལ་ཉག་རོང་རྫོང་སྟོད་ཡུལ་ཤོག་ཧོར་རྩ་སྡེ་པའི་སྡེ་མི་མཁས་རྒྱམ་གྱིས་འདི་ལྟར་བཤད།

དེ་ཡང་རྔ་བ་ཁུལ་འབར་ཁམས་གྲོང་ཁྱེར་ཀྱོམ་ཀྱོ་ཡུལ་ཤོག་མཁོ་ནི་སྡེ་པའི་སྡེ་མི་ཀརྨ་ཚེ་རྡོས་གསར་འགོད་པའི་དྲི་བར་ལན་དུ་འདི་ལྟར་བཤད། སྔོན་ཆད་ངེད་ཚང་ང་གཅིག་པུས་ཞོར་ལས་བཙལ་ནས་འཚོ་བ་གཏོང་བཞིན་ཡོད། 2017ལོའི་ལོ་མཇུག་ཏུ་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་སྡེ་ཚན་གྱིས་གྲོང་ཚོར་བརྟག་དཔྱད་བྱེད་པར་ཡོང་སྟེ་ཚང་མར་རྐོ་འདྲུའི་འཕྲུལ་འཁོར་བཟོ་ཤེས་མིན་དྲིས། ངས་དང་པོར་མིང་ཐོ་བཀོད་པ་ཡིན། 2018ལོའི་ཟླ་དང་པོར། ངས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་སྡེ་ཁག་གིས་སྒྲིག་འཛུགས་བྱས་པའི་རྐོ་འདྲུའི་འཕྲུལ་འཁོར་གྱི་རྩལ་ནུས་གསོ་སྦྱོང་ལ་ཞུགས། ཁྲེན་ཏུའུ་ནས་ཉིན་25ཡི་རིང་རིགས་གཞུང་དང་དོན་དངོས་ཀྱི་བཀོལ་སྤྱོད་ལ་སློབ་སྦྱོང་བྱས་ཏེ། ལས་རིགས་ཐོབ་ཐང་ལག་ཁྱེར་དང་རྐོ་འདྲུའི་འཕྲུལ་འཁོར་བཀོལ་སྤྱོད་ལག་ཁྱེར་བླངས། ད་ལྟ་ངས་རྐོ་འདྲུའི་འཕྲུལ་འཁོར་བསྐོར་ནས་ཟླ་རེའི་ཡོང་འབབ་སྒོར་5000ཡས་མས་ཡོད། ངས་རྩལ་ནུས་སློབ་སྦྱོང་ལ་བརྟེན་ནས་དབུལ་གྲོལ་བྱུང་། 
ཧུང་ཡོན་རྫོང་ཨ་མཆོག་ཡུལ་ཤོག གཡར་བའི་འབྲི་མོས་དབུལ་གྲོལ་བཏང་བ།

2019ལོའི་ཟླ་12པའི་ཚེས་15ཉིན་གྱི་ཞོགས་ཀའི་སྐྱ་རེངས་དང་འགྲོགས་ནས། རྔ་བ་ཁུལ་ཧུང་ཡོན་རྫོང་ཨ་མོ་ཁོག་ཡུལ་ཤོག་མཁལ་ཁུག་སྡེ་པའི་སྡེ་མི་དཀོན་མཆོག་ཚེ་དབང་གིས་འབྲི་མོ་ཚང་མ་རང་གི་སླས་ར་ནས་རྩྭ་སར་བརྒྱབ།

འབྲི་འདི་དག་ནི་གཞན་ནས་གཡར་བ་རེད། དེ་ངེད་ཚང་གི་དབུལ་གྲོལ་ཕྱུག་འགྱུར་གྱི་མ་རྩ་ཁོ་ན་རེད། ཅེས་དཀོན་མཆོག་ཚེ་དབང་གིས་སར་འདུག་ཞོར་གསར་འགོད་པར་ཁ་བརྡ་གླེང་།





  ཁྱུང་མཆུའི་འབྲོག་པས་འོ་མ་འཚོང་བཞིན་པ།
 红原牧民排队销售鲜奶 

ཆོས་ཉིད་རྡོ་རྗེ་ནི་ཨ་མོ་ཁོག་ཡུལ་ཤོག་རྒོད་ར་སྡེ་པའི་ཡིག་ཚགས་དང་ཁཱ་འཛུགས་བྱས་པའི་དབུལ་ཕོངས་དུད་ཚང་ཡིན། 2015ལོའི་ཟླ་6པར། སྡེ་པའི་མཉམ་ལས་ཁང་སྟེ་ཧུང་ཡོན་རྫོང་ནོར་གཡང་ནོར་གནག་གསོ་སྤེལ་ཆེད་ལས་མཉམ་ལས་ཁང་གིས་ཁོང་ཚང་ལ་འབྲི་12གཡར་བ་དང་། འབྲི་དེ་དག་གི་ལོ་ཚད་ལོ་4ཡི་ཡན་ཟིན་པས། བེའུ་བཙའ་བའི་དུས་ལ་སླེབས་འདུག

ཆོས་ཉིད་རྡོ་རྗེ་དགའ་བའི་ངང་ནས་བཤད་རྒྱུར། 2015ལོ་ནས་2017ལོའི་བར། གཡར་ཡོང་བའི་འབྲི་འདི་དག་ལ་འོ་མ་འབབ་པར་མ་ཟད། རྒྱུན་མ་ཆད་པར་བེའུ་བཙས་བྱུང་།

རྒོད་ར་སྡེ་པའི་ཀྲུའུ་རེན་དཔལ་ལྡན་གྱིས་ཞིབ་རྩིས་བྱས་པ་ལྟར་ན། འབྲི་མོ་12ཀྱིས་ལོ་གཅིག་ལ་འོ་མ་རྒྱ་མ་4500འབབ་ཐུབ་པ་སྟེ་ཕལ་ཆེར་རིན་སྒོར་ཁྲི་1.8ལོན། ལོ་གཉིས་ཀྱི་ནང་འབྲི་མོ་12ཀྱིས་ཆོས་ཉིད་རྡོ་རྗེ་ཚང་ལ་བེའུ་12བཙས་པ་དང་ཁྲི་3གྱི་རིན་སྒོར་བབས་ཡོད། འདི་གཉིས་པོ་ལས་ཆོས་ཉིད་རྡོ་རྗེ་ཚང་ལ་ལོ་གཉིས་རིང་ཡོང་འབབ་སྒོར་ཁྲི་6.6ལོན་ཏེ། ལས་སླ་མོའི་སྒོས་དབུལ་ཕོངས་ཚད་ཐིག་ལས་བརྒལ་འདུག

2015ལོ་ནས་2019ལོའི་བར། ཨ་མོ་ཁོག་ཡུལ་ཤོག་གིས་དབུལ་ཕོངས་སྡེ་པའི་ཐོན་ལས་འཕེལ་རྒྱས་མ་དངུལ་དང་ནོར་གནག་ཐོན་ལས་འཕེལ་རྒྱས་རྣམ་གྲངས་མ་དངུལ། དེ་མིན་རོགས་སྐྱོར་མ་དངུལ་སོགས་སྡེབ་སྒྲིག་བྱེད་པ་བརྒྱུད་དེ་འབྲི་མོ་200ཉོས་པ་དང་། འབྲི་མོ་དེ་དག་རྒོད་ར་སྡེ་པ་དང་མཁར་ཁུག་སྡེ་པའི་མཉམ་ལས་ཁང་བརྒྱུད་ནས་སྡེ་པ་གཉིས་ཀྱི་དབུལ་ཕོངས་དུད་ཚང་14ལ་གཡར་ཡོད་པ་རེད།

དབུལ་ཕོངས་དུད་ཚང་འདི་དག་ཚང་མར་གསོ་སྤེལ་གྱི་འདུན་པ་དང་ནུས་པ་ཡོད། ཅེས་ཨ་མོ་ཁོག་ཡུལ་ཤོག་ཏང་ཨུའི་ཧྲུའུ་ཅི་ཧུའུ་ཞའོ་ཆང་གིས་འདི་ལྟར་མཚམས་སྦྱོར་བྱས། གན་རྒྱ་ལས་ཁ་ཆད་ལྟར་ན། འབྲི་མོ་གཡར་ཡུན་ལོ་གཉིས་དང་། ལོ་གཉིས་ཀྱི་ཁྲོད་དུ་ཐོན་སྐྱེད་བྱས་པའི་འོ་མ་དང་གསར་དུ་བཙས་པའི་བེའུ་ཚང་མ་དབུལ་ཕོངས་དུད་ཚང་ལ་དབང་བ། དུས་ཚོད་ཁ་གང་རྗེས། གཡར་བའི་འབྲི་མོ་ཕྱིར་མཉམ་ལས་ཁང་དུ་སྤྲོད་དགོས་པ་དང་། མཉམ་ལས་ཁང་གིས་སླར་ཡང་སྐོར་རེས་རྗེས་མའི་དབུལ་ཕོངས་དུད་ཚང་ལ་གཡར་རྒྱུ་རེད།

གསོ་སྤེལ་དུད་ཚང་གིས་གསོ་སྤེལ་བྱེད་སྟངས་ཚན་རིག་དང་མཐུན་པ་དང་བདེ་འཇགས་ཡོང་ཆེད། ཤང་སྲིད་གཞུང་གིས་ཆེད་དུ་རྫོང་ཕྱུགས་ལས་ཆེད་མཁས་པ་མངགས་ཏེ་དབུལ་ཕོངས་དུད་ཚང་ལ་སློབ་ཁྲིད་བྱེད་པར་མ་ཟད་ཡུལ་དངོས་ནས་མཛུབ་སྟོན་གནང་བ་རེད། དབུལ་སྐྱོར་འབྲི་མོ་ཚང་མར་གོང་ཚད་མཐོ་བའི་ཚོང་ལས་འགན་བཅོལ་ཉོས་ཡོད་དེ། གལ་སྲིད་སྟབས་མ་ལེགས་པར་བར་ཆད་འབྱུང་སྟེ་འབྲི་མོ་གྲངས་ཀ་ཉུར་བར་གྱུར་ན། འགན་བཅོལ་མ་དངུལ་དང་དེར་བསྟུན་གྱི་དབུལ་སྐྱོར་མ་དངུལ་ཁ་གསབ་བྱེད་པ་རེད། འབྲི་མོ་གཡར་ནས་དབུལ་སྐྱོར་བྱེད་པའི་རྣམ་པ་དུས་དང་རྣམ་པ་ཀུན་དུ་ལྟ་སྐུལ་རབ་དང་རིམ་པའི་ཁྲོད་གནས་ཤིང་། ཡུལ་ཤོག་དང་སྡེ་པའི་རིམ་པ་གཉིས་པར་ལྟ་སྐུལ་དོ་དམ་ཚོ་ཆུང་བཙུགས་ཡོད་པ་དང་། སྡེ་པའི་ལས་བྱེད་པ་དང་སྡེ་མིའང་ལྟ་སྐུལ་དུ་ཞུགས་ཡོད།

2015ལོ་ནས་2019ལོའི་བར། ཨ་མོ་ཁོག་ཡུལ་ཤོག་གིས་འབྲི་མོ་200བཀོལ་ཏེ་དབུལ་སྐྱོར་ལས་འགན་སྐོར་རེས་ཐེངས་གཉིས་ལེགས་གྲུབ་བྱུང་བ་དང་། བསྡོམས་པས་དབུལ་ཕོངས་དུད་ཚང་28ལ་འོ་མ་རྒྱ་མ་ཁྲི་7.5དང་བེའུ་460ལྷག་ཐོན་སྐྱེད་བྱས་འདུག

ཨ་མོ་ཁོག་ཡུལ་ཤོག་ཏང་ཨུའི་ཧྲུའུ་ཅི་མགོན་པོས་གསར་འགོད་པར་འབྲི་གཡར་སྟངས་ཀྱི་ཡོངས་ཁུངས་ངོ་སྤྲོད་བྱས།

2012ལོར། ཡུལ་ཤོག་གིས་དབུལ་ཕོངས་དུད་ཚང་20ལ་རིན་མེད་སྒོས་འབྲི་མོ་40སྤྲད་ཡོད་དེ། མ་བསམ་ས་ནས་80%བཙོང་འདུག

ཁ་ཚོས་གསོ་སྤེལ་ལག་རྩལ་མེད་པ་དང་གཞི་རྒྱ་མེད་པས་གསོ་སྤེལ་བྱ་མི་འདོད་པ། རང་ཉིད་ཀྱི་ཅ་དངོས་ཅི་བསམ་གང་འདོད་ཀྱིས་བཀོད་སྒྲིག་བྱེད་བཞིན་འདུག ཅེས་མགོན་པོས་འདི་ལྟར་ཕྱོགས་བསྡོམས་བྱས།

ཅི་ལྟར་བྱས་ན་དབུལ་ཕོངས་མང་ཚོགས་ཀྱིས་རང་འདོད་དུ་རྨང་གཞིའི་འབྲི་མོ་དེ་དག་མེད་པ་མི་བཟོ་བ་དང་དེའི་ཁྲོད་ནས་ཕན་ནུས་ཐོན་ཐུབ་པ་ཞེ་ན། མགོན་པོས་སྒྲིག་ལམ་གསལ་བཤད་བྱས་རྒྱུར། འབྲོག་ཁུལ་ལ་འདྲི་རྟོག་བྱེད་པར་བརྒྱུད། འབྲོག་མོའི་བར་གྱི་‘铁牦牛’规则ཞེས་པའི་སྒྲིག་ལམ་དམ་པོ་ཞིག་ཤེས་བྱུང་། དེ་ནི་སྒོ་ཕྱུགས་མང་ཞིང་ངལ་རྩོལ་ནུས་ཤུགས་ཞན་པའི་ཁྱིམ་ཚང་གིས་འབྲི་གཡག་ངལ་རྩོལ་ནུས་ཤུགས་ལྡན་པའི་དུད་ཚང་ལ་གཡར་ཏེ། དེ་ལས་ཐོན་པའི་འོ་མ་དང་ཁལ་རྩིད་གསོ་སྤེལ་མཁན་ཚང་ལ་དབང་བ་དང་། གསར་དུ་བཙས་པའི་བེའུའི་70%ཡང་གསོ་སྤེལ་མཁན་ཚང་ལ་དབང་བ། རྨང་གཞིའི་འབྲི་གཡག་དང་30%ཡི་གསར་བཙས་བེའུ་གཡར་བདག་ལ་དབང་འདུག དེ་བཞིན་ཨ་མོ་ཁོག་ཡུལ་ཤོག་གི་འབྲི་མོ་གཡར་ནས་དབུལ་གྲོལ་བྱ་ཐབས་ཀྱིས་སྒྲིག་ལམ་དེར་དཔེ་ལྟ་བྱས་ཏེ། དབུལ་ཕོངས་དུད་ཚང་གི་གསོ་སྤེལ་གྱི་འཇལ་ལན་དེ་ལས་མང་བ་དང་ཉེན་འགོག་སྔོན་འགོག་དེ་ལས་འཐུས་སྒོ་ཚང་བ་བྱས་འདུག །

ལི་ཐང་རྫོང་ལ་འོག་ཡུལ་ཚོ། ཤ་མོ་ཕོ་སུལ་ལ་བརྟེན་ནས་དབུལ་གྲོལ་ཕྱུག་འགྱུར་གྱི་སྐྱོབ་གདུགས་བཀར།

  དྲོད་ཁང་ནང་གི་ཤ་མོ་ཕོ་སུལ། 
大棚里生长的羊肚菌

གཞི་རྒྱ་ད་དུང་དེ་འཚམ་གྱིས་རྒྱ་བསྐྱེད་ཆོག་འདུག །འཚོང་ལམ་ད་དུང་རྒྱ་ཆེར་གཏོང་ཆོག་འདུག་་་་་་

2019ལོའི་ཟླ་12པའི་ཚེས་23ཉིན། སི་ཁྲོན་ཞིང་ཆེན་ལི་ཐང་རྫོང་རོང་པ་ཡུལ་ཤོག་ལ་འོག་སྡེ་པའི་སྡེ་མིའི་ཚོགས་ཆེན་ཐོག ཚང་མས་སང་ལོའི་ཤ་མོ་ཕོ་སུལ་ཐོན་ལས་ཅི་ལྟར་ལེགས་པོར་སྒྲུབ་རྒྱུར་གླེང་མོལ་བྱེད་བཞིན་འདུག

ཀྱག་ཀྱོག་གི་རྐང་ལམ་ཕྲ་མོ་དང་། རྡོ་ཁང་བཅུ་གྲངས་ཁ་ཤས་ཤིག ལ་འོག་སྡེ་པ་རི་ཕུག་ཏུ་ཆགས་ཡོད། ཉེ་འགྲམ་གྱི་སྐས་ཞིང་དུ་ཤ་མོ་ཕོ་སུལ་རྨོ་ཁང་109གྲལ་སྟར་བསྒྲིགས་ཡོད་དེ། ཐོན་ལས་འདི་ག་རི་གྲོང་དེའི་དབུལ་གྲོལ་ཕྱུག་འགྱུར་གྱི་རེ་བ་ཉག་གཅིག་ཡིན།

ས་གནས་དེ་གའི་ས་རྒྱུ་ཞན་པ་སོགས་ཕྱོགས་གང་ཐད་ལེགས་པོ་མེད་པས། ཆ་རྐྱེན་ཅན་གྱི་སྡེ་མི་མང་ཤོས་ཤིག་རྫོང་ཐོག་གམ་གནས་གཞན་པར་གནས་སྤོ་བྱས་ཏེ། ཤུལ་དུ་ལྷག་པའི་དུད་ཚང་19ཡི་ཁྲོད་མང་ཤོས་དབུལ་ཕོངས་དུད་ཚང་ཡིན། དེར་བརྟེན་ཧྲུའུ་ཅི་དང་པོ་ཝང་ཏཱ་ཅིན་གྱིས་སྡེ་མིར་དབུལ་གྲོལ་ཕྱུག་འགྱུར་གྱི་སྣེ་ཁྲིད་བྱ་ཆེད། ས་གནས་དེ་གའི་དོན་དངོས་ལ་གཞིར་ཏེ། ཡུལ་བབ་དང་བསྟུན་ནས་ས་ཞིང་མུའུ་70སྐོར་སྐྱོད་བྱས་ནས། 2018ལོའི་ཟླ་8པ་ནས་ཟླ་11པའི་བར། སྡེ་མིས་འོས་འགན་གྱིས་ངལ་རྩོལ་དུས་ཚོད་2500གཏོང་འཇོག་བྱས་པ་དང་། མི་ཤུགས་འགྲུལ་སྐྱེལ་དང་དབུལ་གྲོལ་གྱི་སེམས་ཤུགས་བརྟན་པོ་ལས་ལུང་ཕུག་དེ་གར་རླམ་རྩྭ་ཕོ་སུལ་གྱི་ཐོན་ལས་རྟེན་གཞི་བཙུགས།

2018ལོའི་ཚོད་ལྟའི་རྨོ་འདེབས་ལེགས་གྲུབ་བྱུང་བ་བརྒྱུད། 2019ལོར་རྨོ་འདེབས་གཞི་རྒྱ་མུའུ་45རུ་རྒྱ་བསྐྱེད་དེ། དྲོད་ཁང་109བསྐྲུན་ནས་ཤ་མོ་ཕོ་སུལ་ཆེད་ལས་མཉམ་ལས་ཁང་བཙུགས་པ་དང་། མཉམ་ལས་ཁང་དང་ཞིང་དུད་མཉམ་སྡེབ་ཀྱི་འཕེལ་རྒྱས་རྣམ་པ་སྤྱད་ཡོད། མཉམ་ལས་ཁང་གིས་སྣེ་ཁྲིད་བྱས་ཏེ་སྡེ་མིར་ཤ་མོ་ཕོ་སུལ་རྨོ་འདེབས་བྱེད་དུ་བཅུག

དྲོད་ཁང་ནང་དུ་རེ་བའི་མྱུ་གུ་འབུས་བཞིན་འདུག །ཚན་རིག་དང་མཐུན་པའི་སྒོས་རྨོ་འདེབས་བྱེད་པ་དང་། ཕན་ནུས་ཆེས་ཆེར་གཏོང་ཆེད། སྔོན་ཐོན་ཅན་གྱི་ཞིང་ཆུ་གཏོར་བའི་ལག་རྩལ་གྱིས་ནུས་པ་གལ་ཆེན་བཏོན་ཡོད། ཝང་ཏཱ་ཅིན་གྱིས་བཤད་རྒྱུར། ཉིན་རྒྱུན་དུ་དྲོད་ཁང་ནང་གི་མཐོ་དྲོད་ཀྱིས་བསྲེགས་རྗེས། ཉི་མ་ནུབ་མཚམས་ལ་ཆུ་ཚོད་གཉིས་རིང་ཞིང་ཆུ་གཏོར་ཏེ་འཚར་སྐྱེས་ཀྱི་ཁོར་ཡུག་ལེགས་ཤོས་བསྐྲུན་པ་རེད།

2019ལོའི་ཟླ་5པར། ཤ་མོ་ཕོ་སུལ་ཁག་དང་པོར་རྒྱ་མ་4000ལྷག་བརྔ་བསྡུ་བྱས་ཏེ་ཕྱིར་འཚོང་སྒོར་གྲངས་ཁྲི་13གྱི་ཡོང་འབབ་ཡོད། འགྲིམ་འགྲུལ་སྟབས་བདེ་བའི་ཕྱིར་ཤ་མོ་ཕོ་སུལ་འཐུས་རྗེས་ཐད་ཀར་དུ་གནས་དེ་ནས་རྐམ་དུ་བཅུག་སྟེ་ཚོང་པ་སྒོ་ཁར་ཉོ་སྒྲུབ་བྱ་རུ་ཡོང་བ་ཡིན།

ཤ་མོ་ཕོ་སུལ་བརྔ་བསྡུ་ཚར་རྗེས་དྲོད་ཁང་ཡོད་ཚད་བཀོག་རྒྱུ་རེད། དེ་ནས་སླར་ཡང་བེད་མེད་ཀྱི་ས་སྟོང་པར་དུས་ཚིགས་གཉིས་པའི་འདེབས་འཛུགས་བྱེད་པ་དང་། འདེབས་འཛུགས་བྱས་པའི་པད་ཁ་རྒྱ་མ་16000ཡས་མས་བསྡུས་ཏེ། ཚོད་དཔག་བྱས་ན་ཐོན་རྫས་རིན་ཐང་སྒོར་60000ཡས་མས་ཡོད། ཝང་ཏཱ་ཅིན་གྱིས་རྩིས་ཤིག་བརྒྱབ་ཏེ་བཤད་རྒྱུར། ད་ལོར་ང་ཚོའི་སྡེ་པར་ཡོང་འབབ་སྒོར་ཁྲི་19ཡས་མས་བྱུང་ཡོད། དབུལ་ཕོངས་དུད་ཚང་གི་ཆ་སྙོམས་མི་རེའི་ཡོང་འབབ་སྒོར་2000དང་། དབུལ་ཕོངས་མིན་པའི་དུད་ཚང་གི་ཡོང་འབབ་སྒོར་1600ཡས་མས་ཡོད་འདུག

ཤ་མོ་ཕོ་སུལ་འདེབས་འཛུགས་ལེགས་གྲུབ་བྱུང་བ་ན་ལ་འོག་སྡེ་པར་དབུལ་གྲོལ་ཕྱུག་འགྱུར་ཡོང་བར་ཐབས་ལམ་གསར་པ་ཞིག་བཏོད་ཡོད། ཉིན་དེའི་སྡེ་མིའི་ཚོགས་ཆེན་ཐོག སྡེ་མི་རྣམས་ཀྱིས་ཤ་མོ་འདེབས་འཛུགས་ཀྱི་མ་རྩ་ཇེ་ཉུང་དུ་གཏོང་བ་དང་ཕྱིར་འཚོང་ཐབས་ལམ་གསར་འབྱེད་བྱེད་པའི་སྐོར་ནས་བགྲོ་གླེང་བྱེད་བཞིན་འདུག སྡེ་པའི་ཨུ་ལྷན་ཀྲུའུ་རེན་ཨ་དབང་གིས་བཤད་རྒྱུར། སང་ལོར་ཁྱབ་གདལ་ཤུགས་ཆེན་བཏང་ནས་ཤ་མོ་ཕོ་སུལ་ཐོན་ལས་འཕེལ་རྒྱས་དེ་དབུལ་གྲོལ་འགག་སྒྲོལ་དང་གྲོང་གསེབ་དར་རྒྱས་དང་ཟུང་འབྲེལ་བྱས་ཏེ། ཤ་མོ་ཕོ་སུལ་དེ་ལ་འོག་སྡེ་པའི་དབུལ་ཕོངས་དུད་ཚང་དབུལ་གྲོལ་ཕྱུག་འགྱུར་ཡོང་བའི་ཐོན་ལས་གཙོ་བོར་འགྱུར་རྒྱུ་ཡིན། །