འགའ་ཞིག་གིས་ང་ལ་རླབས་ཆེན་མ་ཡུམ་གྱི་བྱམས་བརྩེ་ཟེར་བ་ཁྱོན་ནས་མི་འདུག་པར་འཁང་ར་བྱས་མྱོང་། ཁོ་ཚོས་བཤད་པ་བདེན་ཡང་སྲིད། ཡིན་ཡང་ང་ལ་མ་གཞི་ནས་གཤིས་ཀ་འཇམ་པོ་མེད་པས། རི་བོ་བརྐོ་ཐུབ་ཀྱང་རང་གཤིས་འཇོམས་མི་ཐུབ་ཟེར་བའི་དཔེ་བཞིན་དུ་སྐྱེ་བ་ད་ཐེངས་ཐབས་བཀོད་མི་འདུག
དྲང་མོར་ལབ་ན་བྱིས་པ་ནི་ཤ་ལས་ཆད་པའི་གོང་བུ་དང་ཚེ་སྲོག་གི་ཡལ་ག་ཡིན། འཚོ་བ་འདུར་རྒྱུག་དང་མི་ཚེ་རེ་བས་ཁེངས་པ་ཡང་བྱིས་པ་ཟེར་བའི་སྙིང་ལ་ཟུག་འོངས་པའི་སེམས་ཀྱི་རྟེན་ཕུར་ཞིག་ཡོད་པས་ལོས་ཡིན།
གཅེས་ཕྲུག་ལ་གྲུབ་འབྲས་ཏོག་ཙམ་དང་འཕེལ་རྒྱས་ཏིལ་འབྲུ་ཙམ་ཞིག་མཆིས་ཚེ། བསྟོད་ཚིག་མེ་ཏོག་གི་མགུལ་རྒྱན་བརྒྱ་བསླས་སྟོང་བསླས་བྱས་པ་ཐེངས་གཅིག་མིན་ཡང་། པང་དུ་བླངས་ཤིང་སྐེ་ལ་ཞོན་དུ་འཇུག་སྲོལ་ལར་ནས་མེད། དེ་ཡང་བུ་ཕྲུག་ལ་གཅེས་སྟངས་ཁྱད་པར་ཅན་ཞིག་ཡིན་ཡང་སྲིད།
ང་རང་རྒྱུ་མཚན་ཡོད་པའི་སྒོ་ནས་བུ་ཕྲུག་གི་དགའ་ཕྱོགས་ལ་བརྩི་བཀུར་བྱེད་པར་དགའ། མ་ཟད་མོས་པ་ལ་ཕྱར་བ་གྲུ་འདེགས་བྱེད་པར་དེ་བས་མོས། རྒྱུ་མཚན་དེའི་དབང་གིས་བུ་མོ་ཡང་མོའི་དགའ་ཕྱོགས་ལྟར་སྒྱུ་རྩལ་སློབ་གྲྭ་ཞིག་ཏུ་མངགས་དགོས་བྱུང་སོང་།
སྒོ་ང་བཞིན་གཤོག་འོག་ཏུ་ཡུན་རིང་དྲོད་ཀྱིས་རུམ་མྱོང་བའི་བུ་མོ་ཐག་རིང་གི་གྲོང་ཁྱེར་ཞིག་ལ་ཆས་སོང་། མོ་ལ་ད་དུང་གཤོག་པ་ཐོགས་མེད་པས། ནམ་རྒྱུན་ཡིད་ལ་དྲན་ཐེངས་རེ་རེར་སེམས་ཀྱི་ཟབ་སར་རྨུག་ཡོང་། བརྩེ་བའི་མཐུ་དང་ཞེན་པའི་སྟོབས་ཟེར་བ་དངོས་གནས་ཡ་མཚན་རེད། ཨ་མ་ཟེར་བ་ལན་རེར་ངོ་མ་སྙིང་རྗེ་བོ་འདུག་ཨང་།
ད་ཐེངས་མེ་འཁོར་དུ་བསྡད་དེ་བུ་མོར་ཐུག་པའི་འགྲུལ་བཞུད་དུ་ཞུགས་པ་ཡིན། མེ་འཁོར་ཞེས་པ་གཡག་རྒན་སྣ་ལོ་ཞིག་ལ་ཞོན་པ་ལྟར་ཆུ་ཚོད་དྲུག་བདུན་ཞིག་ཕྱིན་རྗེས་ཀྱི་ཕྱི་དྲོ་ཞིག་ལ། འཇིག་རྟེན་ཆ་མེད་ཀྱི་གྲུ་ག་ཞིག་ནས་སྙིང་ཉེ་བའི་བུ་མོ་མཐོང་བྱུང་། སྲོག་གི་ཕྱེད་ཀ་དེའི་འཚོ་བའི་རི་མོ་མཐོང་བྱུང་། བུ་མོའི་འཛུམ་མདངས་གསེང་གི་མིག་ཆུ་གོར་མོའི་འབབ་ཚུལ་མཐོང་སོང་།
དུས་རྒྱུན་དཀའ་སྡུག་ཅི་ལ་ཐུག་ཀྱང་། དཔའ་ཞུམ་པར་མི་སྤྲོ་བའི་བདག་གིས། བུ་མོའི་སེམས་སུ་དཔའ་མོ་ཞིག་གི་སྣང་བརྙན་བསྐྲུན་མྱོང་། འཚོ་བའི་བཙིར་གནོན་གང་ལ་ཐུག་ཀྱང་མིག་ཆུ་ལྷུང་མ་མྱོང་བའི་བདག་གིས། བུ་མོའི་སེམས་སུ་སྙིང་སྟོབས་ཞེས་པའི་ཚིག་གི་མགོ་རྐང་སྒྲིག་ཡོད། ཡིན་ཡང་ད་རེས་ལུས་སྦྱོང་གི་ལམ་ཁ་ནས་བུ་མོའི་ལག་པ་ཆུང་ཆུང་གི་ཚིགས་མགོ་ཀུན་ཏུ་ཤ་འབུར་རེས་མོས་སུ་ཐོགས་པའི་རྨ་ཤུལ་དེས། ང་ལ་གསང་བརྡ་ཚ་མོའི་ངག་ཅིག་ཁྲོལ་སོང་།
བུ་མོའི་མིག་ཆུའི་ཕྲེང་བས་བདག་གི་སེམས་ཁ་སྐྱོམ་མ་མྱོང་ལ། བུ་མོའི་དྲན་པའི་ངག་གིས་ཀྱང་བདག་གི་མིག་མཐའ་མཆི་མས་བརླན་མ་མྱོང་མོད། ད་ཐེངས་བུ་མོའི་ལག་པ་ཆུང་ཆུང་གི་ཁྱད་པར་བའི་ངག་ཁྲོལ་ཚུལ་དེས། ངའི་གློ་སྙིང་མཆིན་གསུམ་ལ་ཟུག་རྔུ་སྦྱིན་སོང་།
གཅེས་ཕྲུག འཚོ་བ་ནི་འོས་འགན་ཞིག་ཡིན་ན། ཅིས་ཀྱང་སྦྱོང་བརྡར་མཁོ། མི་ཚེ་ནི་འགྲུལ་བཞུད་ཅིག་ཏུ་ངེས་ན། འདི་ནི་ཁྱོད་ཀྱིས་ངེས་པར་དུ་བརྒྱུད་དགོས་པའི་འབབ་ཚུགས་མགོ་མ་དེ་ཡིན།
གཅེས་ཕྲུག སྐྱེ་བ་འདིར་ཨ་མས་ཁྱོད་རང་སེམས་ཀྱིས་འཚོས་ཤིང་། སྙིང་གི་དཀྱིལ་ལ་བཞག་ཡོད། ཁྱོད་རང་བདེ་ཐང་གིས་འཚར་ལོངས་བྱུང་ཞིང་། བདེ་སྐྱིད་ལྡན་པར་སྐད་གསེང་མཐོན་པོས་འབོད་སྐུལ་གཏོང་མཁན་གྱི་མི་དེ་སྙིང་ཉེ་བའི་ཨ་མ་ཡིན།
སྙིང་སྟོབས་བསྐྱེད་ཅིག གཅེས་ཕྲུག རྔུལ་ཆུ་བཞུར་ཕོད་ན། འཚོ་བ་གླུ་རུ་གྱེར་བའི་སང་ཉིན་གྱིས་ཁྱོད་ལ་ངེས་པར་དུ་སྒུག་ཡོད། །