སེམས་ཁྲལ་ལ་ཐོགས་པའི་རྟའུ།

ཉིན་འདི་དག་རིང་ཛ་དྲག་ཆེ་བའི་ཐ་སྙད་མང་པོ་ཞིག་འཚང་ཀ་རྒྱག་གིན།

ལག་འཕྲིན་གྱི་འཆར་ཤེལ་ངོས་སུ་ཤུད་ཀྱིན་འདུག་མོད།

ཆུ་ཚོད་ཉེར་བཞིའི་ཁོངས་སུ་རྒྱུ་བའི་སེམས་ཁྲལ་ཆེ་ཤོས་དེ།

རྟའུ་ཞེས་པའི་ཐ་སྙད་དེ་རུ་ཐོགས་ཏེ་ཡོད།

དེ་རིང་གི་གྲངས་ཀ་སྔ་ཉིན་ལས་འཕར་བ་མཐོང་ཚེ།

མཆིལ་མ་ཞིག་མགྲིན་པར་ཐོན་པ་ཁྲོག་གེར་མིད་བཞིན།

ཡར་ལངས་དགོས་སམ་མར་སྡོད་དགོས་པ་ཧ་མི་གོ་བར་འདུག

བསམ་ཚོད་ལ། གདེང་ཚོད་ཅིག་གིས་ཕམ་ཁ་ཁུར་བའམ།

བྱིས་བློ་གཙང་མ་ཞིག་ལ་བརྙས་བཅོས་ཤོར་བ་ལྟ་བུ་ཞིག་གིས།

མིག་མཐའ་ལ་སྐྱུར་ཞིག་ལངས་ཏེ་བྱུང་།

རྟའུ། ཁྱོད་ཤར་མཐའི་ཕྱོགས་ཀྱི།

བོད་ཀྱི་རི་ལུང་ཟབ་ས་ཞིག་ན་ཡོད་སྐད།

རྟའུ། སྔར་མདུང་རིང་འཕྱར་ནས་སྔོན་དུ་སྐྱོད་སྐབས།

རྟའུ་ཁྱོད་མདུན་གྲས་ཤིག་ན་ཡོད་ཟེར།

ད་ལྟའི་ཨ་རིའི་བཤམས་མཛོད་ཁང་གི་བོད་ཀྱི་རྟ་ཁྲབ་ཡག་པོ་དེ།

ཁྱོད་ཚོའི་ཡིན་ཡང་ཅི་ཆ། 

བོད་བཙན་པོའི་མདུན་ཅོག་སྟེང་གི།

དམ་བཅའི་རིལ་བུ་བགོ་བཤའ་བྱེད་ཉིན།

ཁྱོད་ཀྱི་ཁོང་དུ་ཁས་ལེན་མི་ཆུང་བ་ཞིག་མིད་ཡོད་ངེས།

གཅོང་རོང་ཟབ་ས་དེར་བཙན་ས་འཛིན་ཉིན།

ཁྱོད་ཁོང་གི་ཐུགས་ཀྱི་ཟབ་ས་ཞིག་ན་ཡོད།

གླིང་གེ་སར་རྒྱལ་པོས་དམག་རྩིས་གོ་རྩིས་བྱེད་ཉིན།

རྟའུ་མི་ཚོ་དམར་པོ་ཁྱོད་རང་ཡིན་ན།

ཁྱོད་ཀུན་གྱི་སེམས་ཀྱི་དམར་ས་ཞིག་ན་ཡོད། 

རྟའུ། དེང་དུས་སྲོག་འཚོའི་ཐབས་རྩལ་གྱིས་ཁྱོད་རང་སྤང་མེད་ལ།

བོད་པའི་སྨོན་ལམ་ཡོད་ཚད་ཁྱོད་ལ་ངེས་པར་ཐེབས་ངེས་ཡིན། 

རྟའུ། མི་ཤི་རྟ་འགྱེལ་དུ་མའི་ཁྲོད་ཁྱོད་ལ་བྲེད་ཤ་ལངས་མ་མྱོང་ན།

འཕྲལ་རྐྱེན་འདི་ཙམ་གྱིས་ཁྱོད་ལ་དངངས་འཚབ་སློང་བར་ག་ལ་ནུས།

འོན་ཀྱང་། 

ཐུགས་གཟབ་གནངས་དགོས། རྟའུ་ལགས།

ཐུགས་ཟབ་ཅི་ནས་གནངས་རོགས། རྟའུ་ལགས།།