ཁ་རས་རྒྱག་རྒྱུ་ལག་པ་བཀྲུ་རྒྱུ་དང་།
ག་སར་མ་འགྲོ་ནང་དུ་སྡོད་རྒྱུ་བཅས།
ང་ཚོའི་ཏོག་དབྱིབས་ནད་འགོག་ཐབས་ཤེས་གསུམ།
ཅ་ཅོའི་དཀྲོག་གཏམ་མ་ཤོད་ཁ་རོག་སྡོད།
ཆ་མེད་ལྟོ་ཆས་མ་ཟ་ཡིད་གཟབ་མཛོད།
ཇ་ཆང་འདུ་འཛིར་མ་འགྲོ་ཁྱིམ་དུ་སྡོད།
ཉ་ཉུང་མཉམ་བསྲེས་བྱ་བ་མཐའ་དག་སྤོངས།
ལྟ་བ་འཁྲུལ་མེད་དོན་མེད་འཇིགས་སྣང་གཅིག
ཐ་ཤལ་ཁྲམ་པའི་དཀྲོག་གཏམ་ཉན་པ་གཉིས།
ད་དུང་ཅ་དངོས་ཉོ་བར་ཧབ་ཐོབ་སོགས།
ན་ཚོད་སྨིན་ཀྱང་ཕྲུ་གུའི་བྱེད་སྟངས་རེད།
པ་ཊའི་ཁང་བཟང་སྒེའུ་ཁུང་ཡངས་པོར་ཕྱེ།
ཕ་མ་ཉེ་དུར་ནད་འགོག་རྒྱུན་ཤེས་སློབ།
བ་ར་ལུག་གསུམ་ཕྱུགས་རིགས་འཇོག་ས་སོགས།
མ་ལུས་ཀུན་ལ་དུག་སེལ་གཙང་སྦྲ་བགྱིས།
རྩ་བའི་ནད་རྟགས་འགག་ཞིག་སྣང་ན་ཡང་།
ཚ་བ་རྒྱས་ཤིང་སྐམ་གློ་ལུ་བ་དང་།
ཛ་དྲག་དབུགས་ཀྱི་འབྱིན་རྔུབ་དཀའ་བ་གསུམ།
ཝ་ལེར་གསལ་བའི་ནད་རྟགས་ཆེ་གསུམ་ཡིན།
ཞྭ་གོས་དྲོད་སྲུང་ཆམ་རིམས་སྔོན་འགོག་དང་།
ཟ་མ་ཚོས་པོར་བཙོས་ནས་བཞེས་པ་དང་།
འ་ལད་སྣབས་ལུད་གང་སར་མི་གཡུགས་པར།
ཡ་མཚན་ནད་ལ་ཚན་རིག་འགོག་སྲུང་གནང་།
ར་གན་གསེར་བརྫུས་སྨན་རྫས་རྫུན་མར་དོགས།
ལ་ཀླུང་བརྒལ་བའི་ཕྱི་ཡི་མགྲོན་པོར་གཟབ།
ཤ་རུས་ན་ན་སྨན་དང་ལྷ་རྗེ་བསྟེན།
སྭ་ཧྭ་སྔགས་རིམ་ཐམས་ཅད་སྟོང་པ་ཡིན།
ཧ་གོ་དོན་རྟོགས་མཁས་རློམ་མ་གནང་བར།
ཨ་གསར་དུས་བསྟུན་གྲགས་འདོད་རྙོག་བཤད་མིན།
ཧ་ལས་ཏོག་དབྱིབས་ནད་དུག་སྐོར་གླེང་དུས།
ཨ་རོགས་ཁྱེད་ཚོར་ཕན་ཕྱིར་འདི་སྐད་ཐལ།