ཁྱེད་ནི་ང་ཡི་ཕ་ཡུལ་མ་ཡིན་ཡང་།
ཕ་ཡུལ་ལས་ལྷག་པའི་བརྩེ་བ་ཁྱེད་ལ་ཆགས་སོང་།
མཛེས་པའི་རྟའུ། དགའ་བའི་ཡུལ་ལུང་།
ཁྱེད་ནི་ང་ཡི་རྣ་ཐོས་ཙམ་ལས།
མིག་ལམ་དུ་དངོས་སུ་མཇལ་མྱོང་མེད་ན་ཡང་།
ང་ཡི་སྙིང་ཁོངས་སུ་ཡལ་མེད་ཁྱེད་རང་དྲན་སོང་།
དེ་ཡང་ཕག་ལོ་ཕར་ལ་སྐྱེལ།
བྱི་ལོ་ཚུར་ལ་བསུ་ལ་ཉེ་བའི་དུས་ཏེ།
དགུན་དཔྱིད་གཉིས་ཀྱི་སོ་མཚམས་ན།
ཉི་འོད་སྤྲིན་ནག་གིས་མོག་མོག་པོར་བསྒྲིབས་ཤིང་།
ལྷགས་རླུང་འུར་འུར་བར་མེད་དུ་ལྡང་བའི་ཉིན་ཞིག་ལ།
ཝུའུ་ཧན་ནས་ཏོག་གསར་གློ་ཚད་ནད་ཡམས་དེ།
ཀྲུང་ཧྭའི་ས་ཕྱོགས་གང་སར་མེ་ལྟར་མཆེད་ཅིང་།
རྟའུ་ལ་ཡང་ནད་དུག་འགོས་པའི་མི་གསུམ་གྱི་ཨང་གྲངས་དེ།
དྲ་ལམ་དུ་ཡང་ནས་ཡང་དུ་མངོན་དུས།
ང་ཡི་སེམས་ལ་བཟོད་པར་དཀའ་བའི་ན་ཚ་ཞིག་བཟོས་སོང་།
དུས་དེ་ནས་བཟུང་། ཉིན་ལྟར་ཞོགས་པ་ཆུ་ཚོད་བརྒྱད་པའི་ཐོག
དུས་ཐོག་ཏུ་སྨན་འཐུང་བ་ལྟར།
དྲ་ལམ་ཐོག་༼རྟའུ༽ཞེས་པའི་ཡིག་འབྲུ་གཉིས་པོ་དེ།
ཡང་ནས་ཡང་དུ་མིག་བཤེར་ཕབ་ཅིང་།
ང་ཡི་དོ་སྣང་བྱ་ཡུལ་གྱི་གཙོ་གནད་དུ་གྱུར།
རྟའུ་ན་གནས་པའི་གདོང་དམར་བའི་རིགས་རྒྱུད་རྣམས།
ང་ཡི་འཁྲེང་སེམས་གྱི་ལྟེ་བ་རུ་གྱུར།
ཉིན་ལྟར་ནད་ཡམས་མྱུར་དུ་ཡལ་བའི་སྨོན་ལམ་ཡང་ཡང་བཏབ་ཀྱང་།
དོན་དངོས་ལ་ངོ་ཚ་མི་འདུག་སྟེ།
ནད་པའི་གྲངས་ཀ་ནི་གནས་སྐབས་ཇེ་མང་ཇེ་མང་དུ་སོང་།
སྐབས་དེ་དག་དང་དུས་དེའི་སྐབས་སུ།
རྟའུ་ཡི་གྲོང་དང་གྲོང་ཁྱེར་དག་ན།
རྒན་རྒོན་རྣམས་ཀྱི་དགོད་སྒྲ་ཆད།
དར་མ་རྣམས་ཀྱི་འབོད་སྒྲ་ཆད།
གཞོན་ནུ་རྣམས་ཀྱི་གླུ་སྒྲ་ཆད།
བྱིས་པ་རྣམས་ཀྱི་དཔེ་ཀློག་གི་སྒྲ་ཡང་ཆད་ལ།
ཐ་ན་ཡུལ་ཆུ་སྔོན་མོའི་བཞུར་སྒྲ་ཡང་ཆད་པར་གོར་མ་ཆགས།
འོན་ཏེ། ཀྲུང་དབྱང་གི་གཅིག་གྱུར་ཐབས་བཀོད་དང་།
ཕྱོགས་མང་པོའི་ཤུགས་ཆེའི་རྒྱབ་སྐྱོར།
སྨན་དོན་དང་ཉེན་རྟོག་མི་སྣའི་སྲོག་སྡོས་འབད་འཐབ་ཐོག
རྟའུ་རིགས་ཁག་མི་དམངས་ཀྱི་གཞོགས་འདེགས་འོག
མགྱོགས་ནས་མྱུར་དུ་ནད་ཡམས་ཀྱི་རླབས་ངན་ཕར་ལ་བཟློག་སྟེ།
བདེ་ཐང་དང་བདེ་སྐྱིད་ཀྱི་སྐྱ་རེངས་བསུ་ལ་འབད།
རྟགས་དང་རྟེན་འབྲེལ་བཟང་པོ་ཞིག་ལ།
བོད་ལོའི་ལོ་གསར་གྱི་བཀྲ་ཤིས་ཉིན་མོ་ནས།
ནད་པ་འཕར་བའི་གྲངས་ཀ་དེ་ཐིག་ལེར་གྱུར།
ང་ཡི་སེམས་ཡང་དེ་མར་ལྷོད་ལ་བབས་སོང་།
རྟའུ་ཡ་རྟའུ། རིག་པ་སྒྲིམས་ཤོག
དྲོད་འཇམ་དཔྱིད་ཀྱི་ཉི་གཞོན་འཆར་ལ་ཉེ་སོང་ལ།
ཡར་ལྷ་བཞག་བྲའི་མཛུམ་མདངས་ཀྱང་གྲོལ་ལ་ཉེ་སོང་།
རྟའུ་ཡི་སྣོད་བཅུད་མཛེས་སྡུག་སླར་ཡང་ངོམ་ལ་ཉེ་སོང་ལ།
ནད་ཡམས་ལ་འཐབ་པའི་མཐའ་མའི་རྒྱལ་ཁ་ཡང་བླང་ལ་ཉེ་སོང་།
རྟའུ། རིག་པ་སྒྲིམས་ཤོག
མུ་མཐུད་ནས་རིག་པ་དམ་པོར་སྒྲིམས་ཤོག