མི་སེམས་སྟོང་པས་ལག་པ་སྟོངས།

ལུང་པ་དོག་པོ་ཞིག་ལས། ཆུ་ཆུང་ཆུང་ཞིག་དུས་བཞིར་འཕེལ་འགྲིབ་མེད་པར་བཞུར་བཞིན་ཡོད་ལ། དེའི་ཕ་རོལ་ན་ཐང་མར་བརྡལ་བའི་རྩྭ་ཐང་དུ། དགུན་དུས་མ་གཏོགས་དཔྱིད་དབྱར་སྟོན་གསུམ་ལ་མེ་ཏོག་སེར་པོ་དང་དམར་པོ། དཀར་པོ་གཙོ་བོར་བྱས་ཏེ་ཁྲ་ཆིལ་ལེར་བཞད་པས། ཚང་མས་དེ་ལ་མེ་ཏོག་ཐང་ཞེས་འབོད།

མེ་ཏོག་ཐང་གི་འགྲམ་ན་ཁྱིམ་དུད་ཞིག་ཡོད། བདག་པོ་ནི་ལོ་ཚོད་དར་ལ་བབ་པའི་སྐྱེས་པ་ཞིག་ལས། དེ་མིན་སུ་ཡོད་མེད་སུས་ཀྱང་མ་ཤེས་ལ་མཐོང་ཡང་མ་མྱོང་། ལོ་གཉིས་ཙམ་གྱི་རིང་དུ་ཁང་པའི་སྐར་ཁུང་ཕྱེ་མ་མྱོང་ལ་དུ་ཁུང་ལས་དུ་བའི་རྒྱུན་ཡང་ཆད་པས། ཁང་པའི་ཕྱི་ནང་དང་རྩིག་པར་རྩྭ་ལྡུམ་སྐྱེས་ཏེ་ཁང་ཤུལ་ཞིག་དང་འདྲ།

ཡིན་ན་ཡང་། ལོ་ཞིག་གི་དཔྱིད་ཀར་ཁང་ཐོག་ནས་དུ་བ་སྔོ་ལྷོག་ལྷོག་ཏུ་འཕྱུར་བ་དང་། སྒོ་རའི་ནང་ལས་ལ་བྲེལ་བའི་རྒྱབ་གཟུགས་ཤིག་མཐོང་། ཡུན་རིང་མ་འགོར་བར་ཁང་པའི་ཕྱི་ནང་ཀུན་ལ་མེ་ཏོག་འདྲ་མིན་སྣ་ཚོགས་རྣམ་པར་བཞད་པས། མི་ཚང་མས་དུད་ཚང་དེ་ལ་མེ་ཏོག་ཚང་ཞེས་འབོད།

སྐྱེས་པ་དེ་ནི་གཟུགས་སྟོབས་ཆེ་ལ་ངོ་མདོག་ནག་ཅིང་། རྒྱ་བོ་དང་ཨག་ཚོམ་མང་པོ་སྐྱེས་ཡོད་པས། ཕྱི་ལ་བལྟས་ན་མི་རྩུབ་པོ་ཞིག་དང་འདྲ་ཡང་། ནང་གཤིས་ཀ་ནི་འཇམ་པོ་ཞིག་ཡིན་ཚོད་འདུག་སྟེ། དབྱར་ཁར་མེ་ཏོག་རྣམས་འཚིག་པར་དོགས་ནས་གྲིབ་བསིལ་ནང་བསྐྱལ་ཞིང་། དགུན་ཁར་མེ་ཏོག་རྣམས་འཁེང་དོགས་ཀྱིས་ཉི་འོད་ནང་དྲངས་ཏེ། སྐྱེས་པ་ཚོས་བུད་མེད་རྣམས་མེ་ཏོག་ལྟར་གསོས་པ་ནང་བཞིན། ཁོང་གིས་མེ་ཏོག་རྣམས་བུད་མེད་ལྟར་གསོ་ཞིང་སྐྱོང་།

ས་སྲོད་ལ་མེ་ཏོག་རེ་རེར་ཆུ་བླུགས་པ་ནི། རང་སེམས་འདུལ་སྦྱོང་བྱེད་པའི་དགེ་ལས་སུ་བརྩིས་པས། རྨི་ལམ་ནང་མེ་ཏོག་གི་གོང་བུ་རྣམས་དལ་མོར་བཞད་དུས། ཁོ་རང་མ་གཏོགས་སུས་ཀྱང་ཉན་མི་ཤེས་པའི་སྙིང་གཏམ་རྣ་བའི་གསོས་སུ་གྱུར་ལ། འགྲོ་ལམ་དུ་བུང་བ་ཡི་གཤོག་གླུ་དར་དིར་དུ་སྒྲོག་དུས། གང་ལའང་འབུལ་མ་མྱོང་བའི་མེ་ཏོག་གི་ཟེའུ་འབྲུ་མཆོད་པར་འབུལ་འདོད་མོད། མེ་ཏོག་ཚང་གི་མེ་ཏོག་གཅིག་ལའང་བུང་བ་མི་འཁོར་བ་ནི་ཁོང་གི་སེམས་ནད་ཅིག་རེད།

ཆར་པ་ཟིམ་ཟིམ་བབས་རྗེས་ཀྱི་ཕྱི་དྲོ་ཞིག་ལ། མེ་ཏོག་ཚང་དང་མེ་ཏོག་ཐང་གཉིས་འཇའ་ཚོན་གཞུ་ཡི་དབྱིབས་དང་ལྡན་པ་ཞིག་གིས་སྦྲེལ། བྱིས་པ་ཚོས་རྩེད་མོ་རྩེ་བའི་དགོད་སྒྲ་རྒྱུན་མི་ཆད་པར་རྣ་ལམ་དུ་གྲག་པས། ཁོང་ཡང་འདུག་ཚུགས་མེད་པར་དེའི་ཕྱོགས་སུ་སོང་།

མེ་ཏོག་ཐང་ན་མེ་ཏོག་དཀར་སེར་དམར་ལྗང་མང་པོ་བཞད་འདུག་པའི་ཐོག་ལ། བུང་བ་རྣམས་ཕར་འཕུར་ཚུར་འཕུར་གྱིས་ཟེའུ་འབྲུ་ཁུར་དུ་ལེན་བཞིན་མཆིས་པ་དང་། བྱིས་པ་རྣམས་ནི་ཕྱེ་མ་ལེབ་ལྟར་མེ་ཏོག་ལ་རེག་རེག་དང་སྣོམ་སྣོམ་བྱེད་བཞིན་འདུག

ཁོང་གིས་མེ་ཏོག་ཐང་ན་སྐྱེས་པའི་མེ་ཏོག་སྣ་ཚོགས་དང་། མེ་ཏོག་ཚང་ན་གསོས་པའི་མེ་ཏོག་རྣམས་ཁ་དོག་དང་རྣམ་པ་སོགས་གང་ཅིའི་ཐད་ནས་བསྡུར་ཐབས་མེད་མོད། བུང་བ་དང་ཕྱེ་མ་ལེབ་རྣམས་ཚ་ཚ་འུར་འུར་གྱིས་མེ་ཏོག་ཐང་ན་འཕུར་བ་ལས། མེ་ཏོག་ཚང་ལ་མི་འཁོར་བ་ཅི་ཡིས་ལན་ནམ་སྙམ།

གློ་བུར་དུ་ཅི་ཞིག་དྲན་པ་ལྟར། མགོ་བོ་བསྒུར་ནས་ཤིང་གི་ཕུར་པ་ཡིས་མིང་མི་ཤེས་པའི་མེ་ཏོག་བརྐོས་ཀྱང་། ཡུན་མ་རིང་བར་མུན་རུབ་པས་མེ་ཏོག་དམར་པོ་དང་སེར་པོ་གཉིས་ལག་ཏུ་ལོན་པ་ལས། དེ་མིན་རྣམས་ལ་ལྟ་ཁོམ་ཙམ་ཡང་མ་བྱུང་བར་ཁྱིམ་དུ་མི་ལོག་ཀ་མེད་གྱུར།

ཕྱིར་ལོག་པའི་ལམ་བར་དུ། བྱིས་པ་རྣམས་ཀྱིས་ངས་མེ་ཏོག་ཅིག་ཅིག་རིག་བྱུང་། ངས་ཉིག་ཉིག་རིག་བྱུང་ཞེས་རང་རང་སོ་སོའི་མཐོང་ཐོས་རྣམས་བཤད་པས་མ་ཚད། སང་ཉིན་ཡང་མེ་ཏོག་ཐང་དུ་ཡོང་རྒྱུའི་ཁ་ཆད་བཞག་དུས། ཁོང་གིས་རང་ཉིད་ཀྱིས་མེ་ཏོག་ཐང་ན་མེ་ཏོག་དམར་སེར་གཉིས་ལས་མཐོང་མ་ཐུབ་ནའང་། རྟག་པར་མེ་ཏོག་ཐང་དུ་ཡོང་བ་ལས། མེ་ཏོག་རེ་གཉིས་རྩ་བ་ནས་བརྐོས་ཏེ་ཁྱིམ་ནང་གསོས་ན་ཉི་མ་ཤར་ཡང་རུང་། ཆར་པ་བབ་ནའང་འདྲ། ཁྱིམ་ཕྱི་ནང་གི་མེ་ཏོག་འདྲ་མིན་སྣ་ཚོགས་ལ་བུང་བའི་གླུ་དབྱངས་དང་། ཕྱེ་མ་ལེབ་ཀྱི་གར་སྟབས་རྒྱུན་ཆད་མི་སྲིད་སྙམ་སྟེ། བྱིས་པ་རྣམས་ཀྱི་བྱིས་སེམས་ལ་ཁོང་དགོད་ཤོར་ཞིང་། རང་ཉིད་ཀྱི་སྤྱང་གྲུང་ལ་ང་རྒྱལ་སྐྱེས་ཏེ། ལག་ཁུང་ནང་གི་མེ་ཏོག་དམར་སེར་གཉིས་དམ་པོར་བསྡམས་ནས་ཁྱིམ་དུ་ལོག་རྗེས། མེ་ཏོག་དེ་གཉིས་རྫ་བུམ་གཅིག་གི་ནང་ལ་བཙུགས་ཏེ་སྐར་ཁུང་འགྲམ་དུ་བཞག

ཞོགས་པ་སྔ་མོ་ནས་གཉིད་ལས་སད་མ་ཐག་སྐར་ཁུང་གི་ཕྱོགས་སུ་ལྟ་དུས། མེ་ཏོག་དེ་གཉིས་ཐུར་དུ་གུག་སྟེ་རྫ་བུམ་གྱི་ཁ་ལ་འབྱར་ཞིང་། ལོ་མ་རྣམས་ཧྲིལ་མོར་དྲིལ་ཡོད་པས་མ་ཚད། ཟུར་ལ་བུང་བའི་རོ་ཞིག་ཀྱང་མཐོང་།

སྐབས་དེར། ཉི་མའི་འོད་ཟེར་སྐར་ཁུང་ནས་ཉལ་ཁྲིའི་ཐོག་ལ་ཕོག །ཁོང་གིས་ལག་པ་སྟོང་པ་གཉིས་ལ་ལྟ་བཞིན་ལོ་ངོ་ལྔ་ཡི་སྔོན་གྱི་ཞོགས་པ་སྔ་མོ་ཞིག་ལ། ཉམ་ཆུང་མེ་ཏོག་འདྲ་བའི་བཟའ་ཟླ་དང་བུ་མོ་གཉིས་ཕྱི་བལྟས་ཙམ་ཡང་མེད་པར་རྒྱང་རིང་ལ་སོང་ཚུལ་ཡང་ནས་ཡང་དུ་དྲན། །