བྱིས་དུས་ཀྱི་ཁྱོད།

ལོ་དེར་ཁྱོད་ནི་བྱིས་པ་སྣབས་ལུག་ཅིག །

གཞན་གྱིས་ཁྱོད་ཉིད་མཐོང་ན་དགོད་ཁ་འཆོར། །

ནམ་རྒྱུན་རི་ལ་སོང་ནས་ཚེར་ཤིང་བཏུས། །

ཚེར་གཞུ་བཀུག་རྗེས་བྱེའུ་གསོད་དུ་འགྲོ །

རང་གི་སེམས་སུ་རང་ཉིད་འདན་མར་སྣང་། །

ཨ་ཆེན་ཧོར་གྱི་བློན་ཆེན་ཤན་པ་ཡི། །

ཀླད་རྒྱ་ཉག་ཕྲན་མདའ་ཡིས་གཏོར་བ་དང་། །

རྟ་ཁྱུ་གླིང་ལ་འདེད་མཁན་རང་ཡིན་འདོད། །

ད་དུང་ནམ་རྒྱུན་ཤིང་གི་གྲི་ཐུང་ཞིག །

ལ་གཡུག་ལུང་གཡུག་བྱས་ཏེ་རྩི་ཤིང་གཅོད། །

དཔལ་ཐུལ་ངམ་ནག་མཚོན་ལ་དྲངས་མཁན་དེ། །

དགྲ་ལྷ་མ་ཡིན་རང་ཉིད་ཡིན་པར་འདོད། །

མདོར་ན་ཁྱོད་ཀྱི་བྱིས་བློ་དྭངས་གཙང་དེ། །

སྟོང་བསམ་འཆར་ཡན་ངང་ནས་སྐྱེལ་གྱིན་གདའ། །

ད་བར་ཡལ་མེད་ལང་ཚོའི་རྒྱབ་ལྗོངས་ངོར། །

ཕྱིར་དྲན་བྱས་ཚེ་དགོད་ཁ་ཡང་ཡང་འཆོར། །