ཁང་བ་གླ་དུས་མཉམ་འཇོག་དགོས་པའི་གནད་དོན་འགའ།

1.གན་རྒྱ་མི་འཇོག་པར་ཐད་ཀར་ཁང་བ་གླས་ན་ཆོག་གམ།

དེ་ག་ལ་ཆོག་སྟེ། ཁང་བ་གླ་བའི་ཡིག་ཐོག་གི་གན་རྒྱ་ནི་ངེས་པར་དུ་འཇོག་དགོས། གལ་ཏེ་ཁང་བ་གླ་བའི་གན་རྒྱ་མ་བཞག་ཚེ་ཁང་བ་གླ་བའི་དུས་ཡུན་ལ་ཚད་བཀག་མེད་པ་དང་། ནམ་ཞིག་ཁང་བདག་གིས་ཁང་བ་གླ་འདོད་མེད་པར་ཕྱིར་བླངས་ནའང་ཆོག་པས། དེ་ལྟར་ན་ཁང་བ་གླ་མཁན་གྱི་ཁེ་དབང་ལ་གནོད་པ་བཟོ་སྲིད།

2.ཁང་བ་གཞན་ལ་གླས་ཡོད་དུས་ཁང་བདག་གིས་མི་གཞན་ལ་བཙོང་ན་ཆོག་གམ།

ཁང་བདག་གིས་ཁང་བ་ཕྱིར་བཙོངས་ཆོག་མོད། ཕྱིར་བཙོང་བའི་བྱ་སྤྱོད་ཀྱིས་ཁང་བ་གླ་མཁན་གྱི་ཁེ་དབང་ལ་ཤན་ཤུགས་ཐེབས་མི་རུང་། ཁང་བ་གླ་ཡུན་ནི་གན་རྒྱའི་དུས་བཅད་ལྟར་ལག་བསྟར་བྱེད་དགོས། དེར་མ་ཟད་ཁང་བདག་གིས་ཁང་བ་ཕྱིར་བཙོང་ན་གླ་མཁན་གྱིས་ཐོག་མར་ཉོས་ཆོག་པ་ཡིན།

3.ཁང་བ་གླ་ཡུན་ལོ་100བྲིས་ན་ཆོག་གམ། དེ་ལྟར་ན་གཏན་དུ་ཁྱིམ་སྤོ་བྱེད་མི་དགོས་པ་དང་། གན་རྒྱའི་དུས་བཅད་ཀྱི་ནང་དུ་ཁང་བདག་གིས་ཁང་བ་ཕྱིར་བླངས་མི་ཆོག་པ་ཨེ་ཡིན།

དེ་མི་ཆོག་སྟེ། 《 ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གན་རྒྱའི་བཅའ་ཁྲིམས།》ལྟར་ན། ཁང་བ་གླ་བའི་དུས་ཡུན་ལོ20ལས་བརྒལ་མི་ཆོག་སྟེ། ཁང་བ་གླ་བའི་གན་རྒྱའི་ནང་ངེས་པར་དུ་གླ་ཡུན་འབྲི་དགོས་པར་མ་ཟད། ཁང་བ་གླ་ཕྱོགས་གཉིས་ཀས་གན་རྒྱ་བརྩི་སྲུང་བྱས་ནས་གང་འདོད་དུ་ཕྱིར་འཐེན་བྱས་མི་ཆོག་པ་ཡིན། གསལ་བོར་བཤད་ན་ཁང་བདག་གིས་ཁང་བ་མི་གཞན་ལ་གླས་ཡོད་དུས་ཁང་བ་ཕྱིར་བླངས་མི་ཆོག་པ་དང་། ཁང་བ་གླ་མཁན་གྱིས་ཀྱང་རང་འདོད་ལྟར་མི་གླ་བར་ཁྱིམ་སྤོ་བྱས་མི་ཆོག གལ་ཏེ་དོན་དག་དེ་འདྲ་བྱུང་ཚེ་གན་རྒྱར་འགལ་བའི་ཕྱོགས་དེས་ཕ་རོལ་པོའི་གྱོང་གུན་ལ་སྐྱིན་ཚབ་འཇལ་དགོས། ཡིན་ནའང་ཐུག་ཐབས་ཟད་ཀྱི་གནས་ཚུལ་འོག་ཁང་བདག་དང་གླ་མཁན་གཉིས་ཀས་དུས་བཅད་མ་ཐོན་པའི་སྔོན་ལ་གན་རྒྱ་ཕྱིར་འཐེན་བྱས་ཆོག དཔེར་ན། གླ་མཁན་གྱིས་གླ་རིན་མི་སྤྲོད་པའམ་ཁང་བ་ཉེན་ཁའི་བཟོ་བཀོད་ཀྱི་གྲས་སུ་ཚུད་དེ་གཏན་སྡོད་བྱེད་པར་མི་འཚམ་པ་སོགས། །