[གནད་ཚིག] ཐན་པ། ངང་བ། རུས་སྦལ། དབྱུ་གུ།
ཐོས་བརྩོན་འཇུག་པའི་དམིགས་འབེན།
གཅིག ཤེས་རྟོགས་དམིགས་ཚད།
༡.སློབ་ཚན་འདི་བསླབས་པ་བརྒྱུད་ཁེངས་སྐྱུང་གི་སྒོ་ནས་བསླབ་བྱ་དང་དུ་བླངས་ནས་བླང་དོར་ཤེས་པ་དང་། གཞན་གྱི་དགེ་སྐྱོན་མཐོང་དགོས་ལ་རང་གི་དགེ་སྐྱོན་དེ་བས་ཀྱང་གསལ་བོར་མཐོང་དགོས་པའི་གནས་ལུགས་རྟོགས་པར་བྱེད་དགོས།
༢.གཏམ་རྒྱུད་འདི་སྒྲ་དག་ཅིང་གཅོད་མཚམས་གསལ་བོས་འབྱོང་ཀློག་ཐུབ་པའི་རྨང་གཞིའི་ཐོག་ནང་དོན་གྱི་སྤྱི་ཁོག་འཛིན་ཐུབ་པ་བྱས་ཏེ། མགོ་མཇུག་ཆ་ཚང་བར་གཞན་ལ་བཤད་ཐུབ་པར་མ་ཟད། སློབ་ཚན་གྱི་མཇུག་གི་ཚིགས་བཅད་ཤོ་ལོ་ཀ་བློར་ངེས་ཐུབ་པ་བྱེད་དགོས།
གཉིས། བརྩེ་སེམས་དམིགས་ཚད།
སློབ་ཚན་འདི་བསླབས་པ་བརྒྱུད་དེ་ཁེངས་སྐྱུང་གི་སྒོ་ནས་བསླབ་བྱ་དང་དུ་བླངས་ནས་བླང་དོར་ཤེས་པ་དང་། གཞན་གྱི་དགེ་སྐྱོན་མཐོང་དགོས་ལ་རང་གི་དགེ་སྐྱོན་དེ་བས་ཀྱང་གསལ་བོར་མཐོང་དགོས་པའི་གནས་ལུགས་རྟོགས་པར་བྱེད་དགོས།
གསུམ། དམིགས་ཡུལ་འགྲུབ་པའི་བརྒྱུད་རིམ།
གྱེར་ཀློག དབྱེ་ཞིབ། སྦྱོང་བརྡར་དང་བེད་སྤྱོད། ཕྱོགས་སྡོམ།
༡.སློབ་ཚན་སྒྲ་དག་ཅིང་ཚིག་གི་གཅོད་མཚམས་འགྲིག་པའི་སྒོ་ནས་ཀློག་ཐུབ་རྒྱུ།
༢.འཆད་ཁྲིད་དང་མཉམ་འབྲེལ་ཟུང་དུ་སྦྲེལ་བ།
༣.དྲི་བ་དང་བགྲོ་གླེང་བྱས་ཏེ་གནད་དོན་ཐག་གཅོད་པ།
༤.གཏམ་རྒྱུད་ལས་བསྟན་པའི་གནས་ལུགས་རྟོགས་རྒྱུ།
གཙོ་གནད་འོ་མའི་མར་ལོ། (གཙོ་གནད)
གཏམ་རྒྱུད་དེ་རང་ཉིད་ཀྱི་སྐད་ཆའི་ཐོག་ནས་གཞན་ལ་ཤོད་ཐུབ་པ་བྱ་རྒྱུ།
དཀའ་གནད་མདུད་པ་རང་གྲོལ། (དཀའ་གནད)
གཞན་གྱི་དགེ་སྐྱོན་མཐོང་དགོས་ལ་རང་གི་དགེ་སྐྱོན་དེ་བས་ཀྱང་གསལ་བོར་མཐོང་དགོས་པའི་གནས་ལུགས་ཤེས་རྒྱུ།
སློབ་ཁྲིད་ཀྱི་འཆར་འགོད་དགོངས་པ། སློབ་ཚན་འདིའི་ཚིག་དོན་དང་བརྗོད་བྱའི་དོན་ལ་གོ་བ་ལེན་ཐུབ་པར་བཀོད་པ།
ཁྲིད་ཐབས་དང་སློབ་ཐབས། དགེ་སློབ་མཉམ་འབྲེལ། དགེ་རྒན་གྱི་སྣེ་ཁྲིད་འོག་སློབ་མས་རང་རྟོགས་ཀྱིས་སློབ་པ།
ཁྲིད་ཆས། ས་སྨྱུག བསླབ་དེབ། སྨྱན་མང་གཟུགས། བར་བཅུག་རི་མོ།
སློབ་ཐུན་བཀོད་སྒྲིག ཐུན་གཉིས།
སློབ་ཁྲིད་འདྲེན་འཇུག
རྩེད་མཚར་རིག་པའི་དོ་ར།
ཁེད།
ལུས་ལ་སྟོད་གོས་སྲ་མོ་གྱོན། །
མགོ་སྐེ་གཉིས་ཀ་བསྐུམས་ན་ངར། །
མཚོ་ལ་རྐྱལ་དུས་སུག་བཞི་འགུལ། །
སྐམ་སར་འགྲོ་དུས་གོག་ཅིང་ནུར། །
ཁེད་ལན། རུས་སྦལ།
སྔོན་སྦྱོང་རིག་བརྒྱའི་སྒོ་མོ།
མིང་འགྲེལ།
ཐན་པ། ཆར་ཆུ་དུས་སུ་མ་བབས་པའི་ནམ་ཟླ་ལ་ཟེར།
བཟོད། བསྲན་ཐུབ་པའམ་འདུག་ཐུབ་པ།
བསྐྱུར། མ་ཁྱེར་བར་བཞག་པ།
དབྱུ་གུ། དབྱུག་པ་ཕྲ་མོའི་མིང་།
ཁྱོ་ག བཟའ་ཟླ་ཕོ་ལ་ཟེར།
བསྒོས། གཞན་ལ་འདི་ལྟར་བྱེད་དགོས་ཞེས་བཤད་པའི་དོན།
དངོས་ཁྲིད་ཡིད་ཀྱི་མུན་སེལ།
༡.སློབ་ཚན་གྱི་ཀློག་སྟངས་འཁྲིད་པ།
༢.སློབ་ཚན་ངོ་སྤྲོད།
རུས་སྦལ་མཁའ་ལས་ལྷུང་བ་ཞེས་པའི་སློབ་ཚན་འདི་ན《མཁས་བླུན་བརྟགས་པའི་བསྟན་བཅོས་དགེ་ལྡན་ལེགས་བཤད་པད་མ་དཀར་པོའི་ཆུན་པོའི་འགྲེལ་བ་ཉི་མའི་འོད་ཟེར》ཞེས་པ་ལས་བདམས་པ་དང་། སློབ་ཚན་འདི་ནི་ལེགས་བཤད་ཀྱི་གཏམ་རྒྱུད་ཅིག་ཡིན། གཏམ་རྒྱུད་ཀྱི་ནང་དུ་རང་རློམ་ཆེ་བའི་རུས་སྦལ་ཞིག་གིས་བྱམས་དང་སྙིང་རྗེ་ཆེ་བའི་ངང་བ་གཉིས་ཀྱི་ཁ་ལ་
མ་ཉན་པར། རང་གི་བློ་རིག་ཕྲ་མོ་དེ་གཞན་ལ་ངོམ་འདོད་ཀྱི་སྦྱོར་བ་ལག་ཏུ་བསྟར་བས་མཐར་རང་སྲོག་ཤོར་བའི་གནས་ཚུལ་བརྗོད་ཡོད།
ཀ དགེ་རྒན་གྱིས་ངག་གི་ཉམས་ཐོན་པའི་སྒོ་ནས་གཏམ་རྒྱུད་ཐེངས་གཅིག་ལ་བཤད་པ།
ཁ སློབ་ཚན་དབྱེ་ཞིབ།
ཁག་དང་པོ(རང་བྱུང་ཚན་པ་དང་པོ)། ལོ་མང་བོར་ཐན་པ་བྱུང་ནས་ངང་བ་གཉིས་དང་རུས་སྦལ་འཚོ་གནས་བྱེད་པའི་རྫིང་བུ་བསྐམས་པའི་སྐོར་བྲིས་ཡོད།
ཁག་གཉིས་པ(རང་བྱུང་ཚན་པ་གཉིས་པ)། ངང་བ་གཉིས་ཀྱིས་རྫིང་བུ་གཞན་དུ་གནས་སྤོ་རྒྱུའི་གྲོས་བྱས་པ་རུས་སྦལ་གྱིས་ཐོས་ནས། ཁོའང་ལོགས་སུ་མ་བསྐྱུར་བར་མཉམ་དུ་ཁྲིད་དགོས་པའི་རེ་བ་བཏོན་པའི་སྐོར་བརྗོད་ཡོད།
ཁག་གསུམ་པ(རང་བྱུང་ཚན་པ་གསུམ་པ་ནས་ལྔ་བ)། ངང་བ་གཉིས་ཀྱིས་རུས་སྦལ་འཁྱེར་ཏེ་འཕུར་ནས་འགྲོ་སྐབས། རུས་སྦལ་གྱིས་ངང་བའི་བསླབ་བྱར་མ་ཉན་པར་རང་རྒྱུད་ཕྲག་དོག་གིས་ཁེངས་ཏེ་རང་གི་རིག་པ་ངོམས་འདོད་ཀྱིས། ངག་བསྡམ་མ་ཐུབ་པར་དབྱུ་གུ་ཁ་ནས་ཤོར་ཏེ་ནམ་མཁའ་ནས་ལྷུང་བའི་སྐོར་བྲིས་ཡོད།
ཁག་བཞི་པ(མཇུག་གི་ཤོ་ལོ་ཀ)དེ་ཡིན།
བདེན་པའི་ཚིག་བཞིན་མ་ཉན་ན། །
རང་ཉིད་ཕུང་བ་ཤིན་ཏུ་སླ། །
ངང་བའི་ངག་བཞིན་མ་ཉན་ན། །
རུས་སྦལ་མཁའ་ལས་ལྷུང་ཞེས་གྲགས། །
སློབ་ཚན་གྱི་བརྗོད་དོན་ལ་ཕྱོགས་སྡོམ་བྱས་ཏེ་ནང་དོན་ཧྲིལ་བོ་ཚིགས་བཅད་ཀྱི་ལམ་ནས་བསྟན་པ་སྟེ། གཞན་གྱི་བདེན་པའི་གཏམ་ལ་མི་ཉན་པ་དང་།
རང་གི་དགེ་མཚན་ཁོ་ན་མཐོང་བ་ལས་གཞན་གྱི་དགེ་མཚན་མ་མཐོང་ན་མཐར་རང་ཉིད་ཕུང་བའི་རྒྱུ་སྟེ། དཔེར་ན། རུས་སྦལ་གྱིས་ངང་བའི་བསླབ་བྱར་མ་ཉན་པས་རང་ཉིད་ནམ་མཁའ་ནས་ལྷུང་སྟེ་སྲོག་ཤོར་བ་ཇི་བཞིན་ནོ། །
སྦྱོང་བརྡར་རིག་བརྒྱའི་སྒོ་མོ།
མི་སྣ། རུས་སྦལ་དང་ངང་བ་གཉིས།
དུས་ཚོད། སྔོན་དུས།
འབྱུང་རྐྱེན། རྫིང་བུ་བསྐམས་པ།
ས་གནས། རྫིང་བུ་ཞིག་གི་འགྲམ་དུ།
བྱུང་རིམ། (རུས་སྦལ་གྱིས་མཉམ་དུ་ཁྲིད་རྒྱུའི་རེ་བ་བཏོན་པ། ངང་བས་ཁས་ལེན་པ།)
མཇུག་འབྲས། རུས་སྦལ་མཁའ་ལས་ལྷུང་བ།
ཤེས་རྒྱ་བསྐྱེད་པའི་བང་མཛོད།
སློབ་ཚན་འདི་ནི《མཁས་བླུན་བརྟགས་པའི་བསྟན་བཅོས་དགེ་ལྡན་ལེགས་བཤད་པད་མ་དཀར་པོའི་ཆུན་པོའི་འགྲེལ་བ་ཉི་མའི་འོད་ཟེར》ཞེས་པ་ལས་བདམས།
དང་པོ། གཤམ་གྱི་དོན་འགྲིག་པར་རྟགས“√”
དང་ནོར་བར་རྟགས“×”འདི་རྒྱོབས་དང་།
༡.གཏམ་རྒྱུད་དེའི་ནང་ཁྱོན་སྲོག་ཆགས་བཞི་ཡོད། （ ）
༢.རུས་སྦལ་གྱིས་རེ་བ་བཏོན་པ་ངང་བས་སྒྲུབ་
མེད། （ ）
༣.རུས་སྦལ་ལ་རྐང་ལག་བཞི་དང་མགོ་བོ་བཅས་ཡན་ལག་ལྔ་དང་ལྡན་པས་ཡན་ལག་ལྔ་པ་ཞེས་ཟེར། （ ）
གཉིས་པ། སློབ་ཚན་གྱི་ནང་དོན་ལྟར་གཤམ་གྱི་ཚིག་གི་ཁ་སྐོངས།
ཀ རྫིང་བུ་ཞིག་གི་ནང་དུ དང ཡོད། རྗེས་སུ་ལོ་མང་པོའི་རིང་ལ དེ་
བསྐམས་པ་རེད།
ཁ རུས་སྦལ་གྱིས ངའི་ཁ་ནས ཤོར་ཚར། ཤིང་ཁ་ལ་སླར་འོངས་རྒྱུའི མེད།
ག བདེན་པའི་ཚིག་བཞིན ན། །
རང་ཉིད ཤིན་ཏུ་སླ། །
གསུམ་པ། གཤམ་གྱི་ཚིག་གི་ཁ་སྐོངས།
ཐབས་མི（ ）བར་སྣང་ནས（ ）སྨོན་ལམ（ ）འདུག་མི（ ）སྣེ་གཉིས་ནས（ ）བདེ་ས་འཇམ་ས་ཞིག་ལ（ ）
བསྐྱར་གཞིགས་ཕན་པའི་ཟེའུ་འབྲུ།﹙ཐུན་དེའི་ཚད་འཇལ﹚
གཤམ་གྱི་དྲི་བར་ལན་ཐོབས།
༡.རྫིང་བུ་བསྐམས་རྗེས་རུས་སྦལ་དང་ངང་བ་གཉིས་གནས་གཞན་དུ་སྤོར་དགོས་དོན་ཅི་ཡིན།
ལན། རུས་སྦལ་དང་ངང་བ་ནི་ཆུ་ཁར་འཚོ་བའི་སྲོག་ཆགས་ཡིན་པས་ཆུ་མེད་ན་འཚོ་ཐབས་མེད་པའི་རྐྱེན་གྱིས་ས་ཆ་གཞན་གྱི་རྫིང་བུར་འགྲོ་དགོས།
༢.རུས་སྦལ་གྱིས་རང་གི་ནུས་པ་ཁོ་ན་མཐོང་བ་ལས་གཞན་གྱི་ནུས་པ་མི་མཐོང་བས་ཅི་ཞིག་མཚོན།
ལན། རུས་སྦལ་ལ་རང་རློམ་ཆེ་བ་དང་ཕྲག་དོག་ཆེ་བ་མཚོན་ཡོད།
༣.རུས་སྦལ་གྱི་ང་རྒྱལ་ཕྲག་དོག་གི་སྤྱོད་སྟངས་ལས་ཁྱོད་ཀྱིས་ཅི་ཞིག་ཚོར་བྱུང་།
ལན། ང་རྒྱལ་དང་ཁེངས་དྲེགས་ཆེ་རྒྱུ་མང་དྲགས་ན་རང་ཉིད་ཕུང་བའི་རྒྱུ་ཡིན་པས།ཁེངས་སྐྱུང་གིས་གཞན་གྱི་བསླབ་བྱ་དང་དུ་ལེན་དགོས་པའི་ཚོར་སྣང་བྱུང་།
སྣོད་ལྡན་སློབ་མའི་ལེགས་སྐྱེས།﹙ལས་བྱ﹚
༡.སློབ་ཚན་བྱང་ཆུབ་པར་ཀློག་ཐུབ་པ་བརྒྱུད་མཇུག་གི་ཤོ་ལོ་ཀ་དེ་བློར་འཛིན་རྒྱུ།
༢.རུས་སྦལ་མཁའ་ལས་ལྷུང་བ་ཞེས་པའི་སློབ་ཚན་བསླབས་རྗེས་ཀྱི་བློ་སྐྱེད་ཕྲིས།
༣.སློབ་མ་ཚོས་རང་རང་གི་བསམ་ཚོད་ལྟར་རུས་སྦལ་མཁའ་ལས་ལྷུང་རྗེས་ལ་བསམ་གཞིག་བྱོས་དང་།
སྤྱི་སྡོམ་བདུད་རྩིའི་ཐིགས་པ།﹙ཐུན་འདིའི་སྡོམ་ཆུང﹚
ཐུན་འདིའི་ནང་དུ་རང་རློམ་ཆེ་བའི་རུས་སྦལ་ཞིག་གིས་བྱམས་དང་སྙིང་རྗེ་ཆེ་བའི་ངང་བ་གཉིས་ཀྱི་ཁ་ལ་མ་ཉན་པར། རང་གི་བློ་རིག་ཕྲ་མོ་དེ་གཞན་ལ་ངོམ་འདོད་ཀྱི་སྦྱོར་བ་ལག་ཏུ་བསྟར་བས་མཐར་རང་སྲོག་ཤོར་བའི་གནས་ཚུལ་ཤེས་སུ་བཅུག་པ་དང་། དུས་རྒྱུན་གྱི་འཚོ་བའི་ཁྲོད་དུ་ཁེངས་སྐྱུང་གི་སྒོ་ནས་གཞན་གྱི་བསླབ་བྱ་དང་དུ་བླངས་ནས། དོན་དངོས་དང་མཐུན་ཞིང་རང་ཚོད་ཟིན་པའི་མི་ཞིག་བྱེད་དགོས་པའི་གནས་ལུགས་རྟོགས་པར་བྱས་པ་ཡིན།
ལོ་མང་བོར་ཐན་པ་བྱུང་ནས་ངང་བ་དང་རུས་སྦལ་འཚོ་གནས་བྱེད་སའི་རྫིང་བུ་བསྐམས་པ་རེད།
* སྲིང་གཞིས་མཚོ། མཚོ་ལྷོ་ཁུལ་ཁྲི་ཀ་རྫོང་མི་རིགས་བཅའ་སྡོད་སློབ་གྲྭར་ཕྱག་ལས་གནང་བཞིན་ཡོད།