ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང་།

དོན་ཚན་བཅུ་དགུ་པ། རང་ལོ་བརྒྱད་ཡན་ལ་སོན་པའི་ནར་མ་སོན་པའི་མི་ནི་དམངས་དོན་བྱ་སྤྱོད་སྤེལ་ནུས་ཚོད་འཛིན་བྱས་པའི་མི་ཡིན་ཞིང་། དེས་དམངས་དོན་བཅའ་ཁྲིམས་བྱ་སྤྱོད་སྤེལ་བར་ཁོའི་ཁྲིམས་བཀོད་ལས་ཚབ་པས་ལས་ཚབ་བྱེད་པའམ་ཁོའི་ཁྲིམས་བཀོད་ལས་ཚབ་པས་ཁས་ལེན་དང་རྗེས་བྱུང་ཁས་ལེན་བྱེད་དགོས། ཡིན་ན་ཡང་ཁེ་ཕན་འཐོབ་རྒྱུ་ཁོ་ནར་དམིགས་པའི་དམངས་དོན་བཅའ་ཁྲིམས་བྱ་སྤྱོད་དམ་ཁོའི་ན་ཚོད་དང་རིག་སྟོབས་ལ་འཚམ་པའི་དམངས་དོན་བཅའ་ཁྲིམས་བྱ་སྤྱོད་རང་ཚུགས་ཀྱིས་སྤེལ་ཆོག །

དོན་ཚན་ཉི་ཤུ་པ། རང་ལོ་བརྒྱད་ལ་མ་སོན་པའི་ནར་མ་སོན་པའི་མི་ནི་དམངས་དོན་བྱ་སྤྱོད་སྤེལ་ནུས་མེད་པའི་མི་ཡིན་ཞིང་། དེའི་ཁྲིམས་བཀོད་ལས་པས་ཁོའི་ཚབ་བྱས་ནས་དམངས་དོན་བཅའ་ཁྲིམས་བྱ་སྤྱོད་སྤེལ་དགོས།

དོན་ཚན་ཉེར་གཅིག་པ། རང་ཉིད་ཀྱི་བྱ་སྤྱོད་ངོས་འཛིན་བྱེད་མི་ཐུབ་པའི་ནར་སོན་པའི་མི་ནི་དམངས་དོན་བྱ་སྤྱོད་སྤེལ་ནུས་མེད་པའི་མི་ཡིན་ཞིང་། དེའི་ཁྲིམས་བཀོད་ལས་ཚབ་པས་ཁོའི་ཚབ་བྱས་ནས་དམངས་དོན་བཅའ་ཁྲིམས་བྱ་སྤྱོད་སྤེལ་དགོས།

རང་ཉིད་ཀྱི་བྱ་སྤྱོད་ངོས་འཛིན་བྱེད་མི་ཐུབ་པའི་ལོ་བརྒྱད་ཡན་ལ་སོན་པའི་ནར་མ་སོན་པའི་མི་ལ་དོན་ཚན་གོང་མའི་གཏན་འབེབས་སྤྱད་འཐུས།

དོན་ཚན་ཉེར་གཉིས་པ། རང་ཉིད་ཀྱི་བྱ་སྤྱོད་རྦད་དེ་ངོས་འཛིན་བྱེད་མི་ཐུབ་པའི་ནར་སོན་པའི་མི་ནི་དམངས་དོན་བྱ་སྤྱོད་སྤེལ་ནུས་ཚོད་འཛིན་བྱེད་པའི་མི་ཡིན། དེས་དམངས་དོན་བཅའ་ཁྲིམས་བྱ་སྤྱོད་སྤེལ་བར་ཁོའི་ཁྲིམས་བཀོད་ལས་ཚབ་པས་ལས་ཚབ་བྱེད་པའམ་ཁོའི་ཁྲིམས་བཀོད་ལས་ཚབ་པས་ཁས་ལེན་དང་རྗེས་བྱུང་ཁས་ལེན་བྱེད་དགོས། ཡིན་ན་ཡང་ཁེ་ཕན་འཐོབ་རྒྱུ་ཁོ་ནར་དམིགས་པའི་དམངས་དོན་བཅའ་ཁྲིམས་བྱ་སྤྱོད་དམ་ཁོའི་རིག་སྟོབས་དང་སེམས་ཁམས་བདེ་ཐང་ལ་འཚམ་པའི་དམངས་དོན་བཅའ་ཁྲིམས་བྱ་སྤྱོད་རང་ཚུགས་ཀྱིས་སྤེལ་ཆོག །

དོན་ཚན་ཉེར་གསུམ་པ། དམངས་དོན་བྱ་སྤྱོད་སྤེལ་ནུས་མེད་པའི་མི་དང་དམངས་དོན་བྱ་སྤྱོད་སྤེལ་ནུས་ཚོད་འཛིན་བྱས་པའི་མིའི་ལྟ་སྐྱོང་བ་ནི་དེའི་ཁྲིམས་བཀོད་ལས་ཚབ་པ་ཡིན།

དོན་ཚན་ཉེར་བཞི་པ། རང་ཉིད་ཀྱི་བྱ་སྤྱོད་ངོས་འཛིན་བྱེད་མི་ཐུབ་པའམ་རྦད་དེ་ངོས་འཛིན་བྱེད་མི་ཐུབ་པའི་ནར་མ་སོན་པའི་མི་ཡིན་ན། དེ་དང་ཁེ་གྱོང་འབྲེལ་བ་ཡོད་པའི་མིའམ་འབྲེལ་ཡོད་རྩ་འཛུགས་ཀྱིས་མི་དམངས་ཁྲིམས་ཁང་ལ་ནར་སོན་པའི་མི་དེ་དམངས་དོན་བྱ་སྤྱོད་སྤེལ་ནུས་མེད་པའི་མིའམ་དམངས་དོན་བྱ་སྤྱོད་སྤེལ་ནུས་ཚོད་འཛིན་བྱས་པའི་མི་ལ་ངོས་འཛིན་བྱེད་དགོས་པའི་རེ་འདུན་ཞུས་ཆོག །

མི་དམངས་ཁྲིམས་ཁང་གིས་དམངས་དོན་བྱ་སྤྱོད་སྤེལ་ནུས་མེད་པའི་མིའམ་དམངས་དོན་བྱ་སྤྱོད་སྤེལ་ནུས་ཚོད་འཛིན་བྱས་པའི་མི་ལ་ངོས་འཛིན་བྱས་པ་ཡིན་ན། རང་ཉིད་དང་། ཁེ་གྱོང་ལ་འབྲེལ་བ་ཡོད་པའི་མིའམ་འབྲེལ་ཡོད་རྩ་འཛུགས་ཀྱིས་རེ་འདུན་ཞུས་པ་བརྒྱུད། མི་དམངས་ཁྲིམས་ཁང་གིས་ཁོའི་རིག་སྟོབས་དང་སེམས་ཁམས་བདེ་ཐང་སླར་གསོ་བྱུང་ཚུལ་གཞིར་བཟུང་ནས། ནར་སོན་པའི་མི་དེ་དམངས་དོན་བྱ་སྤྱོད་སྤེལ་ནུས་ཚོད་འཛིན་བྱས་པའི་མིའམ་དམངས་དོན་བྱ་སྤྱོད་སྤེལ་ནུས་ཆ་ཚང་ཡོད་པའི་མི་ལ་ཕྱིར་ལྡོག་བྱས་པར་ངོས་འཛིན་བྱས་ཆོག །

དོན་ཚན་འདིར་བསྟན་པའི་འབྲེལ་ཡོད་རྩ་འཛུགས་ཀྱི་ཁོངས་སུ་གྲོང་མི་ཨུ་ཡོན་ལྷན་ཁང་དང་། ཡུལ་མི་ཨུ་ཡོན་ལྷན་ཁང་། སློབ་གྲྭ །སྨན་བཅོས་ལས་ཁུངས། བུད་མེད་མཉམ་འབྲེལ་ལྷན་ཚོགས། དབང་པོ་སྐྱོན་ཅན་མཉམ་འབྲེལ་ལྷན་ཚོགས། ཁྲིམས་ལྟར་བཙུགས་པའི་བགྲེས་སོང་གི་རྩ་འཛུགས། དམངས་སྲིད་སྡེ་ཁག་སོགས་འདུས་ཡོད།

དོན་ཚན་ཉེར་ལྔ་པ། རང་བྱུང་གི་མི་ཡིན་ན་ཐེམ་ཐོའི་ཟིན་ཐོའམ་དེ་མིན་གྱི་རྩིས་འགྲོ་ཡོད་པའི་ཐོབ་ཐང་ཟིན་ཐོ་གཞན་དག་ལ་བཀོད་པའི་སྡོད་གནས་དེ་གཞིས་གནས་ལ་བརྩི་དགོས། དུས་རྒྱུན་གྱི་སྡོད་གནས་དང་གཞིས་གནས་གཅིག་མཚུངས་མིན་ན། དུས་རྒྱུན་གྱི་སྡོད་གནས་དེ་གཞིས་གནས་ལ་བརྩི་དགོས།

ས་བཅད་གཉིས་པ། ལྟ་སྐྱོང་།
དོན་ཚན་ཉེར་དྲུག་པ། ཕ་མར་ནར་མ་སོན་པའི་བུ་ཕྲུག་གསོ་སྐྱོང་དང་། སློབ་གསོ། སྲུང་སྐྱོབ་བཅས་བྱེད་པའི་འོས་འགན་ཡོད། ནར་སོན་པའི་བུ་ཕྲུག་ལ་ཕ་མར་ཞབས་ཏོག་དང་། རོགས་སྐྱོར། སྲུང་སྐྱོབ་བཅས་བྱེད་པའི་འོས་འགན་ཡོད།

དོན་ཚན་ཉེར་བདུན་པ། ཕ་མ་ནི་ནར་མ་སོན་པའི་བུ་ཕྲུག་གི་ལྟ་སྐྱོང་བ་ཡིན། ནར་མ་སོན་པའི་མིའི་ཕ་མ་ཤི་བའམ་ལྟ་སྐྱོང་བྱེད་ནུས་མེད་པ་ཡིན་ན། གཤམ་གསལ་ལྟ་སྐྱོང་བྱེད་ནུས་ཡོད་པའི་མི་རྣམས་ཀྱིས་གོ་རིམ་སྔ་གཞུག་ལྟར་ལྟ་སྐྱོང་བ་བྱེད་དགོས།

(གཅིག)ཕ་རྒྱུད་སྤོ་བོ་རྨོ་བོ། མ་རྒྱུད་སྤོ་བོ་རྨོ་བོ།

(གཉིས།)གཅེན་པོ། གཅེན་མོ།

(གསུམ།)ལྟ་སྐྱོང་བ་བྱེད་འདོད་ཡོད་པའི་མི་སྒེར་རམ་འབྲེལ་ཡོད་རྩ་འཛུགས། ཡིན་ན་ཡང་ནར་མ་སོན་པའི་མིའི་གཞིས་གནས་ཀྱི་གྲོང་མི་ཨུ་ཡོན་ལྷན་ཁང་དང་། ཡུལ་མི་ཨུ་ཡོན་ལྷན་ཁང་ངམ་དམངས་སྲིད་སྡེ་ཁག་གི་མོས་མཐུན་འཐོབ་དགོས།

དོན་ཚན་ཉེར་བརྒྱད་པ། དམངས་དོན་བྱ་སྤྱོད་སྤེལ་ནུས་མེད་པའམ་དམངས་དོན་བྱ་སྤྱོད་སྤེལ་ནུས་ཚོད་འཛིན་བྱས་པའི་ནར་སོན་པའི་མིའི་ལྟ་སྐྱོང་བ་ནི་གཤམ་གསལ་ལྟ་སྐྱོང་བྱེད་ནུས་ཡོད་པའི་མིས་གོ་རིམ་སྔ་གཞུག་ལྟར་བྱེད་དགོས།

(གཅིག)བཟའ་ཟླ།

(གཉིས།)ཕ་མ། བུ་ཕྲུག །

(གསུམ།)གཉེན་ཉེ་གཞན་དག །

(བཞི།)ལྟ་སྐྱོང་བ་བྱེད་འདོད་ཡོད་པའི་མི་སྒེར་རམ་རྩ་འཛུགས། ཡིན་ན་ཡང་ལྟ་སྐྱོང་བྱ་ཡུལ་གྱི་མིའི་གཞིས་གནས་གྲོང་མི་ཨུ་ཡོན་ལྷན་ཁང་དང་། ཡུལ་མི་ཨུ་ཡོན་ལྷན་ཁང་ངམ་དམངས་སྲིད་སྡེ་ཁག་གི་མོས་མཐུན་འཐོབ་དགོས།

དོན་ཚན་ཉེར་དགུ་པ། ལྟ་སྐྱོང་བྱ་ཡུལ་གྱི་མིའི་ཕ་མས་ལྟ་སྐྱོང་བ་བྱས་ཡོད་པ་ཡིན་ན། ཁ་ཆེམས་ཐོག་ནས་ལྟ་སྐྱོང་བ་དམིགས་འཛུགས་བྱས་ཆོག །

དོན་ཚན་སུམ་ཅུ་པ། ཁྲིམས་ལྟར་ལྟ་སྐྱོང་ཐོབ་ཐང་ཡོད་པའི་མིའི་བར་དུ་གྲོས་མཐུན་བཞག་ནས་ལྟ་སྐྱོང་བ་གཏན་འཁེལ་བྱས་ཆོག །གྲོས་མཐུན་བཞག་ནས་ལྟ་སྐྱོང་བ་གཏན་འཁེལ་བྱེད་ན་ལྟ་སྐྱོང་བྱ་ཡུལ་གྱི་མིའི་འདོད་བློ་ངོ་མར་བརྩི་འཇོག་བྱེད་དགོས།