དབུལ་ཐར་གནས་ཚུལ་ལ་རྒྱུས་ལོན་དུ་བསྐྱོད་པའི་ ཟིན་ཐོ་དྲང་བདེན་གཏམ་གྱི་ཕོ་ཉ།

བྱམས་ཆེན་ཐུགས་རྗེ་ནམ་མཁའི་གུར་ཁྱིམ་ལས།།

བརྩེ་ཆེན་ཉི་མའི་སྣང་བ་འབུམ་གྱི་འོད།།

ང་དྲུག་མི་རིགས་དཔྱིད་དུ་འཇོ་བ་ཡི།།

བདེ་སྣང་དབྱར་གྱི་ལང་ཚོ་ཀུན་ཏུ་ལུད།།

གངས་ཅན་ཀན་ལྷོ་གཡང་ལྡན་ཕྱུག་པ་མོར།།

སྣུམ་སྣུམ་མཛའ་བ་ཉི་མའི་བརྩེ་བ་ཡིས།།

དབུལ་བས་ཉེན་པའི་པད་མ་དཀར་བོ་ཡང་།།

རབ་ཏུ་མྱོས་པའི་མགོ་ལྕོགས་ལས་ལ་བྲེལ།།

དབུལ་ཐར་སྲིད་ཇུས་ལག་བསྟར་བྱེད་པོ་དེ།།

ཀན་ལྷོའི་དབུལ་སྐྱོར་ལས་སྒྲུབ་གཙོ་འགན་པས།།

སྣེ་ཁྲིད་དབུལ་སྐྱོར་རྒྱུས་ལོན་བྱེད་པ་དག།

ཀླུ་རྒྱལ་རྫོང་དུ་མི་དལ་ཤར་གྱིས་བསྐྱོད།།

ཀླུ་རྫོང་ཟམ་ཚ་ཞང་དང་ཨ་ལ་ཡི།།

ཁྱིམ་ཚང་རེ་རེའི་དབུལ་ཐར་གནས་ཚུལ་ལ།།

སེམས་པ་ཞིབ་མོའི་རྒྱུས་ལོན་ཡང་དག་གིས།།

གཟིགས་སྐྱོང་སྲིད་ཇུས་དོན་ལྡན་བྱ་བར་འབད།།

དབུལ་ཐར་བྱ་བའི་རྒྱུས་ལོན་གནས་ཚུལ་ལ།།

སྡོད་ཤག་ཆུ་དང་ལམ་གྱིས་གཙོ་བྱས་པའི།།

འཚོ་བ་རྨང་གཞིའི་འཛུགས་སྐྲུན་ལ་སོགས་པ།།

ལོ་འཁོར་གཅིག་གི་ཡོང་འབབ་གཙོ་བོར་འཛིན།།

ཞང་དང་རྫོང་གི་ལས་བྱེད་དག་གིས་ཀྱང་།།

དགེ་བའི་བགྱི་བ་དོན་དུ་དབབ་པ་ལ།།

ཉིན་དང་མཚན་དུ་ཐབས་ཤེས་སྣ་མང་གིས།།

དབུལ་སྐྱོར་ལས་དེ་སྒྲུབ་པ་དོན་དང་ལྡན།།

བླ་མེད་སྲིད་ཇུས་ཉི་འོད་འཐུང་བ་ཡི།།

ལོ་ན་བགྲེས་པའི་པད་དཀར་རྒན་པོས་ཀྱང་།།

རླབས་ཆེན་ཏང་གི་བཀའ་དྲིན་གཞལ་དཀའ་ཞེས།།

བསྟོད་པའི་མཐེ་བོང་ཀེར་ཞིང་མགྲིན་པ་བརྣངས།།

གཟིགས་སྐྱོང་སྲིད་ཇུས་གླེང་མོལ་གོ་རིམ་དུ།།

འབངས་ལ་བྱམས་ཞིང་ཀུན་ལ་བརྩེ་བའི་མགོན།།

གནམ་འོག་ཉམ་ཐག་འབངས་མིའི་སྐྱབས་ཀྱི་མཆོག།

ཏང་གི་བཀའ་དྲིན་མཛད་མཐའ་མེད་ཅེས་སྨྲ།།

བཟང་ངན་རབ་འབྲིང་ཁྱིམ་ཚང་མང་པོ་ཞིག།

དབུལ་ཐར་སྲིད་ཇུས་བྱམས་བརྩེའི་མཐུ་འོག་ན།།

ཁ་རྒྱབ་ཀུན་ལ་སྡུག་བསྔལ་ཅང་མེད་པར།།

བདེ་བའི་མལ་ན་མགྲིན་གླུ་ལེན་པར་བྲེལ།།

འོན་ཀྱང་སྒྱིད་ལུག་ལེ་ལོའི་མཁན་པོ་དག།

གཟིགས་སྐྱོང་སྲིད་ཇུས་ཁོ་ནར་སྒུག་པ་ལས།།

ཐབས་ལམ་གཞན་དག་འཚོལ་བའི་མགོ་བོ་དེ།།

མལ་གྱི་ཁུང་ན་རུལ་དྲི་སྟོང་གིས་མནན།།

བསམ་ཤེས་ཁྱིམ་མི་ལ་ལ་ཞིག་གིས་ནི།།

ཏང་གི་དབུལ་ཐར་གཟིགས་སྐྱོང་སྲིད་ཇུས་དང་།།

རང་གི་ཐབས་ཤེས་ལུས་ཀྱི་ངལ་རྩོལ་གྱིས།།

ཡང་དག་སྲིད་ཇུས་དོན་འཁྱོལ་བྱ་ཞེས་མོལ།།

ཆེན་པོ་དག་ལ་ཁ་གཏོང་མི་བྱེད་ཅིང་།།

ཆུ་བོ་ཆེན་པོར་རྡོ་སྐོར་མི་བྱེད་པ།།

གནའ་བོའི་དུས་སུ་མི་ཆོས་ཡིན་སྲིད་ཀྱང་།།

ད་ལྟ་སེམས་ཅན་ཁ་ན་འཛམ་གླིང་འབར།།

བསམ་བློའི་སྟེང་གི་དབུལ་བ་མ་སེལ་བས།།

མིག་ལ་ཚད་མེད་ཁ་ལ་ཁྲིམས་མེད་པའི།།

ས་མཐའི་རྒན་པོ་མགོ་སྟོང་ལབ་སྐྱ་འགས།།

མ་བྱིན་མ་ཡོང་མི་མངགས་བརྗོད་ཅིང་གདའ།།

ལས་ལ་མི་བརྩོན་ཟ་ལ་དགའ་བ་ཡི།།

ལྟོ་ཆེན་ཕག་གི་སྤུན་ཟླར་འོས་པ་འགའ།།

ཏང་སྲིད་ཉི་མའི་འོད་ཀྱིས་བསྐྱངས་ནའང་།།

རྣམ་གཡེང་འདྲེ་མོའི་རྗེས་ན་ད་དུང་འདུར།།

གཟིགས་སྐྱོང་ཁྱིམ་མི་གཅིག་གི་ཡོང་འབབ་ལ།།

རྩྭ་སའི་ཁ་གསབ་ནགས་ཀྱི་ཁ་གསབ་དང་།།

དབུལ་སྐྱོར་དངུལ་དང་མཉམ་ལས་ཁང་གི་དངུལ།།

མི་རེའི་ཡོང་སྒོ་སྟོང་ཕྲག་ལྔ་ལས་བརྒལ།།

ད་དུང་སྡོད་ཤག་གནས་སྤོར་མ་དངུལ་ལ།།

མི་རེར་ཆ་སྙོམས་ཁྲི་ཚོ་ལྔ་དང་བཅས།།

གཟིགས་སྐྱོང་མ་དངུལ་སྣ་ཚོགས་དུས་ཚོད་ལྟར།།

འབངས་མིའི་བདེ་སྐྱིད་ཉིད་ལ་གཏོང་ཞིང་བཀོལ།།

རོང་མ་འབྲོག་གི་སྡེ་མི་རེ་འགའ་ཡིས།།

གཟིགས་སྐྱོང་མ་དངུལ་ཆུད་ཟོས་མི་བྱ་བར།།

ཁེ་སྤོགས་ལེན་པའི་ཁེ་ལས་མཉམ་ལས་ཁང་།།

གཉེར་ཞིང་འཛུགས་ལ་འབད་འབུངས་ཟུང་གིས་བྲེལ།།

རྨ་ཀླུང་སྒེག་མོའི་མཛའ་བརྩེ་དམ་འཁྱུད་པའི།།

མཛེས་ལྡན་གླིང་དཀར་སྟོད་ཀྱི་ཡུལ་གྲུ་ན།།

ལ་ལ་ཕྱུག་གི་མགོ་བོ་རྒྱག་ཅིང་མཐོ།།

འགའ་ཞིག་སྒྱིད་ལུག་ལེ་ལོས་རབ་ཏུ་ཉེན།།

ད་ལོར་ཆར་ཆུ་མོད་པའི་བཀྲ་ཤིས་སམ།།

ཡང་ན་འགྲོ་བའི་བསོད་ནམས་གང་གིས་ནི།།

གླིང་དཀར་སྟོད་ཀྱི་རི་ཀླུང་ཐང་གསུམ་དུ།།

ལྗང་མདོག་ལང་ཚོས་ཕྱུག་པ་རྨད་དུ་བྱུང་།།

གོ་ལའི་སྲོག་གི་འཁོར་རྒྱུག་ཁྲག་གི་རྒྱུན།།

རྨ་ཡུལ་ཁྲོ་ཁོའི་ན་ཆེན་མཛེས་སྡུག་ལ།།

སྔོན་ལས་ལྷག་པའི་བཀྲག་མདངས་འཚེར་བ་ནི།།

གཡང་ལྡན་ཕྱུག་མོའི་རྒྱན་དུ་ཁོ་བོས་སེམས།།

གཞན་གྱི་ལག་ནས་རྐུ་དང་གཡོ་ལེན་དང་།།

རྒྱན་འཇོག་ཤོ་རྒྱག་ཁྲམ་པ་དག་ལ་ནི།།

གཟིགས་སྐྱོང་སྲིད་ཇུས་གཟིགས་སྐྱོང་བྱེད་པ་ལས།།

རྒྱལ་ཁྲིམས་གསེར་གྱི་གཉའ་ཤིང་ཁོ་ན་མཛེས།།

བྱིས་པའི་ལུས་སེམས་ནར་ནི་མ་སོན་པར།།

དགོན་པར་རབ་བྱུང་སློབ་འཐེན་བྱེད་པ་ཡང་།།

ཞིབ་ཏུ་བསམ་ན་གདོད་མའི་མི་རིགས་འདིས།།

གླེན་རྟགས་ཞིག་ཏུ་གཟུ་བོ་དག་གིས་ནི་འདོད།།

ཁྱིམ་ཐོར་མེད་པའི་སྙིང་ཉེ་བྱིས་པ་འགའ།།

ལོ་ནི་དགུ་ལ་བུད་ཀྱང་སློབ་ཆུང་དུ།།

ད་དུང་མ་ཚུད་བྱིས་པ་གཉོར་ཁང་དུ།།

ཉི་མ་གཏོང་ཐབས་ཙམ་དུ་ངང་གིས་འགྲོ།།

གྲགས་དཀར་བ་དན་མཐོངས་ན་རབ་བསྐྱོད་པའི།།

གྲགས་ལྡན་གྲགས་པས་ཁྱབ་པའི་ནེ་རྫོང་གི།།

གྲགས་ཅན་ཁོར་ཡུག་མེ་ཏོག་དགའ་ཚལ་དུ།།

གྲགས་འབར་སྲིད་ཇུས་དབུལ་ཐར་བྱ་བས་བྲེལ།།

རི་སྟེང་རི་ཞོལ་གནས་པའི་རུ་གྲོང་དུ།།

དབུལ་ཐར་ལས་ལ་རྩེ་གཅིག་གཞོལ་བ་ཡི།།

སོ་ནམ་མཁན་དག་སིལ་སྡོང་ར་བ་དང་།།

ཞིང་གི་ཡུར་མའི་ལས་ལ་བྲེལ་ཞིང་རྒྱུག།

ཞང་གི་ལས་སྣ་རྫོང་གི་ལས་བྱེད་དག།

དབུལ་སྐྱོར་བྱ་བར་རྒྱུས་ལོན་བྱེད་པ་ལ།།

ཐོག་མའི་མཐུན་སྐྱེན་ཡིག་ཆའི་ཞིབ་ཚགས་དང་།།

ཁྱིམ་ཚང་རེ་རེའི་གནས་ཚུལ་ཀུན་ལ་བྱང་།།

ཤོ་བ་ཁང་ཐོག་རི་ལུང་ཁོར་ཡུག་ཏུ།།

ལྗང་མདོག་དབྱར་གྱི་ལང་ཚོ་རབ་རྒྱས་ཤིང་།།

བླ་མེད་སྲིད་ཇུས་འོ་མ་འཐུང་བ་ལ།།

ལྷག་བསམ་གཙང་མས་བགྱི་བ་དང་དུ་ལེན།།

སྔོན་གྱི་དུས་ན་དཔོན་པོའི་བླ་རི་དེར།།

ལྔ་ཟུང་རིག་པའི་བརྩེ་དགའ་རྟག་འབར་ཞིང་།།

མཁྱེན་ལྡན་མཁས་པའི་བྱིན་རླབས་ཚན་ཁ་ཡིས།།

ཡོངས་སུ་འཁྱུད་པའི་གཏམ་དེ་བདེན་པར་སྙམ།།

ཅི་ཕྱིར་ཞེ་ན་ས་དེའི་འབངས་མི་ཀུན།།

འཇིག་རྟེན་ལུགས་ལ་ཀུན་ནས་རབ་བྱང་བས།།

ཡིན་མིན་གནས་ལུགས་ཁ་ནས་མི་འཆད་ཅིང་།།

དོན་གྱི་གནས་ལུགས་སྙེག་པ་འདི་ཡིས་སོ།།

ཐང་སྐྱ་སྒོ་མེད་ཡུལ་གྱི་མི་སེར་དང་།།

དེ་དག་བར་གྱི་གནམ་སའི་ཁྱད་པར་འདི།།

སྔོན་ཆད་རིག་གནས་དར་དང་མ་དར་གྱིས།།

ཧེ་བག་ཆེན་པོ་ཤོར་བ་དེ་རིང་ཚོར།།

གཟིགས་སྐྱོང་ཁྱིམ་མིར་དམིགས་བསལ་སྨན་བཅོས་དང་།།

མི་སེར་ཚང་མའི་སྨན་བཅོས་སྨན་རིན་ཡང་།།

བརྒྱ་ཆའི་གོ་ལྔ་ཡན་ཆད་གསབ་པ་ཡི།།

དབུལ་ཐར་སྲིད་ཇུས་གྲགས་པ་བླ་ན་འབར།།

དབུལ་ཐར་སྲིད་ཇུས་འཇའ་འོད་གུར་ཁྱིམ་ན།།

ནེ་རྫོང་དགོན་ཆེན་ཏིང་འཛིན་དར་རྒྱས་གླིང་།།

དགེ་མཚན་སྟོང་གི་གཟི་བྱིན་ཉམས་དང་བཅས།།

ཕྱོགས་བཞིའི་མགྲོན་པོ་འགུག་པའི་རྟེན་དུ་འགྱིང་།།

རྫོང་ཁག་བདུན་ལས་ནེ་རྫོང་ཅོ་ནེ་ནི།།

ཁོར་ཡུག་གཙང་ཞིང་བཀོད་པ་རབ་མཛེས་ཤིང་།།

གཡུ་ལོ་ཐགས་སུ་བཀྲ་ཞིང་ཤང་ཤང་སྒྲས།།

མི་རྣམས་དགའ་བའི་སིམ་ཚོར་ཉིན་ཀྱིས་བཟི།།

དབུལ་སྐྱོར་དཔོན་པོ་དབྱང་གི་མཚན་ཅན་གྱིས།།

རྫོང་ཁག་རེ་ནས་ལྡོག་འདྲེན་དཔྱད་འཇོག་དང་།།

གལ་བོ་ཆེ་ལ་ནན་ཏན་རབ་བྱས་ཏེ།།

ཚོགས་ཀྱི་གཏམ་ཡང་ཤུགས་དང་ཤེད་ཀྱིས་བསྒྲགས།།

རྒྱལ་ཁབ་གང་དང་རྒྱལ་རབས་གང་ལ་ཡང་།།

ཕྱི་ནང་འཆམ་མཐུན་གཞི་རྩའི་སྲིད་ཇུས་ཏེ།།

དབུལ་སྐྱོར་སྲིད་ཇུས་བདེ་ཆེན་འོ་མའི་མཚོ།།

ཕྱོགས་སུ་ལུད་པ་འདི་རིགས་མེད་དོ་སྙམ།།

ས་ལ་བཀྲ་ཤིས་གནམ་ལ་བཀྲ་ཤིས་པའི།།

བཀྲ་ཤིས་རྒྱལ་སྐྱོང་དབུལ་ཐར་བཀྲ་ཤིས་ཀྱི།

བཀྲ་ཤིས་ཡིད་བཞིན་ནོར་བུའི་བཀྲ་ཤིས་དེ།།

བཀྲ་ཤིས་ཡར་ཟླའི་དཔལ་གྱིས་བཀྲ་ཤིས་ཤོག།