འོད་ཀྱི་ལམ་བུ་ —— ཀྲུང་གོ་གུང་ཁྲན་ཏང་བཙུགས་ནས་ལོ་འཁོར་༡༠༠ལོན་པར་དགའ་སྟོན་རྟེན་འབྲེལ་ཞུ།

ངག་རིག་དབྱངས་བདུན་རབ་རྫོགས་ཤིང་།།

ཡིད་ལ་ཤེས་རབ་མཆོག་སྟེར་བའི།།

ལུས་མཛེས་སྒེག་ཉམས་སྟོང་ལྡན་གྱི།།

སྒྲ་དབྱངས་ལྷ་མོས་རམ་འདེགས་མཛོད།།

སྟོང་ཆེན་དབྱིངས་སུ་བཀལ་བ་ཡི།།

ཟླུམ་གཟུགས་གོ་ལ་རིལ་བོ་ལ།།

འབྱུང་བཞིའི་རྐྱེན་ལས་མ་ཤོར་བའི།།

སྣོད་བཅུད་བསྡེབས་པ་ཕུན་ཚོགས་སོ།།

གངྒའི་ཀླུང་གི་བྱེ་གྲངས་བཞིན།།

གང་ཟག་མོས་པ་སོ་སོ་སྟེ།།

གང་ཞིག་བདེ་བའི་འདུ་བྱེད་དེ།།

གང་ལ་གང་གིས་མི་སྒྱུར་གྲང་།།

གོས་སུ་ཤིང་ལོ་སིལ་དག་ཟས།།

བརྟེན་ལ་བྲག་སྐྱིབས་ཁྱིམ་དུ་བྱས།།

བྲན་དང་མི་བྲན་བཀས་བཀོད་པའི།།

ཚོ་ཤོག་རུས་རྒྱུད་རྒྱ་བསྐྱེད་དོ།།

ཞིང་འབྲོག་གྲོང་གི་ཡོ་ལང་འབུམ།།

སློང་བྱེད་བཟོ་ལས་དེང་རབས་ཏེ།།

རིགས་རུས་མུ་རུ་ཤུལ་འཛིན་པ།།

གཅོད་པའི་གསར་བརྗེ་རལ་གྲི་ཕྱར།།

མར་ལེ་ཞེས་བྱ་རླབས་ཀྱི་རྒྱུན།།

འཛིན་མའི་རི་ཀླུང་འགེངས་པ་ཅན།།

ནུབ་ཕྱོགས་རིག་པའི་གདེང་དང་བཅས།།

ཤར་ཕྱོགས་འཛིན་མའི་གཞི་ལ་མཆེད།།

གཞིག་མེད་སྒུལ་ཤུགས་དྲག་པོ་ཡིས།།

རྒྱལ་ཤུལ་བུ་ཡིས་རབས་འཛིན་པའི།།

མི་ལོ་སྟོང་ཕྲག་སྒྲིག་གཞི་དེ།།

དམངས་གཙོ་གསར་བའི་རླུང་གིས་གཏོར།།

དུས་ཀྱི་འགྲོས་དང་ཉེར་བསྟུན་པའི།།

མདུན་སྐྱོད་གོམ་ཁ་ལྡོག་མེད་ཀྱིས།།

བཟོ་ཞིང་མཚན་པའི་དར་དམར་པོ།།

དཔལ་དཀྱིལ་ས་ཡི་རྒྱན་དུ་བཙུགས།།

དེ་ལ་ངན་གཡོ་ཁྲམ་པ་དགུ།།

དམངས་ཀྱི་བདེ་བ་གཅོད་པ་དག།

རྩད་ནས་འཇོམས་པའི་དཔའ་གདེང་བཅས།།

གུང་ཁྲན་རིང་ལུགས་ལམ་ལ་ཆས།།

དམངས་ཀྱི་ཤ་ཁྲག་ལུས་དང་སྲོག།

མེ་འོབས་སྡུག་ལས་འགྲོལ་བ་ཡི།།

ཐོག་མའི་ཕུགས་འདུན་མ་རྙིང་བར།།

ལོ་རྒྱུས་འགན་འཁྲི་ཕྲག་ལ་བླངས།།

དམར་པོའི་གྲུ་རུ་བློ་སྣ་བསྡུས།།

གནས་གཞིར་བསམ་བློའི་མེ་ལྕེ་སྦར།།

མི་རིགས་དར་བའི་འདུན་པ་བདར།།

སྤྱི་མཐུན་ལས་ལ་སྒོ་འཕར་ཕྱེ།།

གསར་བརྗེ་མེ་ལྕེ་འབར་མཆེད་པར།།

ལོག་སྤྱོད་པ་ཡི་དྲག་ཤུགས་ཀྱིས།།

གེགས་དང་འཇིལ་བའི་ལས་སྣ་ཚོགས།།

སྤེལ་ཡང་མིང་གི་ལྷག་མར་གྱུར།།

གསར་དུ་འབུས་གྱུར་མྱུག་གཞོན་ཏེ།།

ཆུ་ལུད་དྲོད་ལ་བརྟེན་ཆེ་ཡང་།།

རང་སྟོབས་སྤེལ་བའི་འཐབ་ཇུས་སྟོང་།།

གཙོ་འཛིན་གང་གི་དཔལ་དུ་འབར།།

གང་ལ་གང་བསྟུན་རྐྱེན་དང་རྒྱུ།།

དེ་ལ་དེ་ཡི་སྦྱོར་བར་དམིགས།།

ཉིས་ཁྲི་ལྔ་སྟོང་རྒྱང་སྐྱོད་དེ་།།

བཀག་རྒྱ་ཐར་བའི་དཔུང་དུ་ཆས།།

དམངས་དམག་དཔུང་རྡང་གཅིག་སྦྲེལ་གྱིས།།

དྲག་ཤུལ་རུ་དཔུང་བསྒྱུར་བ་ཡི།།

འཇར་པན་སྦྱོར་བ་ཕྱིར་ཟློག་པར།།

ཤ་ཁྲག་ཕུང་པོ་གཅིག་ཏུ་བསྡུས།།

མི་ལོ་བཅུ་བཞིའི་ཛ་དྲག་གིས།།

མི་ཤི་རྟ་འགྱེལ་བགྲང་ཡས་ཀྱང་།།

མི་འགྱུར་སྙིང་སྟོབས་དགུ་སྒྲིག་གིས།།

མི་ཡི་ལ་རྒྱ་བརྟན་པོར་བསྲུངས།།

ཁྱོད་ཤི་ང་གསོན་ནང་འཁྲུག་ལས།།

ས་ཡི་དཀྱིལ་འཁོར་ཁྲག་གིས་བརྫིས།།

རོ་ལ་རོ་འཐམས་རི་བོའི་གཏོས།།

གཤིན་རྗེའི་ཁྲིམས་རའི་སྤུན་དུ་བྱས།།

མྱ་ངན་འོ་དོད་འགད་རྫས་སྒྲ།།

ས་ཆེན་གཡོ་བ་ཉིད་དུ་བྱུང་།།

གྱང་རོ་མཁར་ཤུལ་ཁྲག་གི་ཆུ།།

ཀྱེ་མ་མཐའ་མའི་དུས་འཇིག་གོ།

དུས་ཀྱི་ཡོ་ལང་བརྡབས་པ་ཡིས།།

ལྷ་མིན་བདུད་ཀྱི་ཆོ་འཕྲུལ་ཏེ།།

སྨྱོན་པའི་གར་དུ་འཁྲབ་པ་དག།

དྲུངས་ནས་འཇོམས་པའི་གཉེན་པོར་བསྔགས།།

དམངས་དག་གུང་ཁྲན་ཏང་ཉིད་ཀྱིས།།

དམངས་སུ་སྣེ་ཁྲིད་དམངས་ཕྱིར་འཐབ།།

དམངས་དང་བདེ་སྡུག་མཉམ་མྱོང་གིས།།

དམངས་ཀྱི་བདག་འཛིན་སྲིད་དབང་བཙུགས།།

ཤར་ཕྱོགས་ས་ཆེན་ཀོག་པོ་ལ།།

སྟོབས་ཀྱི་ལང་ཚོའི་མདངས་དགོས་ཤིང་།།

དམངས་སྲིད་རྒུད་པ་ལས་སྐྱོབ་ན།།

དཔལ་འབྱོར་གསོན་ཤུགས་འདེགས་པར་དགོངས།།

མཆོང་སྐྱོད་ལས་ཀྱི་འཆར་གཞི་སོགས།།

གོང་སྤེལ་ཇུས་འགོད་མང་བྱས་ཏེ།།

རྒྱལ་འབངས་འཚོ་ཚིས་ཡོང་འབབ་སོགས།།

གང་གང་ཡར་ངོའི་དཔལ་དུ་བརྩོན།།

བགྲང་བྱ་བཅུ་ཡིས་དགོངས་དོན་དང་།།

ལྡོག་པའི་སྲིད་འབྱོར་རིག་གསུམ་ཉིད།།

ཉེན་ཁའི་གཡང་ལ་དེད་པ་དེ།།

འཕྲལ་མར་སྐྱོབ་ཐབས་ཏང་གིས་རྙེད།།

ཚན་རིག་དང་བསྟུན་འཕེལ་རྒྱས་ཉིད།།

དོན་ལྡན་གནས་ལུགས་འབའ་འོ་ཞེས།།

དགོངས་པ་བཀྲལ་ནས་རང་ཉིད་ཀྱི།།

ཁྱད་ལྡན་སྤྱི་ཚོགས་རིང་ལུགས་སྤེལ།།

ཚོགས་ཆེན་ལྷོ་སྤྲིན་འཁྲིགས་པ་ལས།།

ཇུས་བཟང་སྦྲང་ཆར་རིས་མེད་འཇོ།།

རྒྱལ་ཁམས་འཕེལ་བའི་སྤང་ལྗོངས་སུ།།

བདེ་སྐྱིད་མེ་ཏོག་ཕྱོགས་སུ་བཞད།།

བཅོས་སྒྱུར་སྒོ་གླེགས་ཡངས་ཕྱེས་ནས།།

གླིང་བཞི་མགྲོན་དུ་ཉེར་བསུས་ཏེ།།

ཕྱི་ནང་དར་བའི་འཐབ་བཀོད་ཀྱིས།།

ཕྱུག་འགྱུར་ལམ་ལ་རིངས་པར་སྐྱོད།།

རིག་པ་ཚོང་དང་ཞབས་ཞུ་སྨན།།

གང་གང་འདོད་དོན་ཉེར་འགྲུབ་པའི།།

དོན་མཐུན་ལས་སྒོ་འདྲ་མིན་གྱིས།།

སྤྱི་ཚོགས་སྒྲིག་གཞི་འཐུས་སུ་ཚགས།།

ཚོང་ཟོང་ལོངས་སྤྱོད་འདོད་རྒུའི་ཆབ།།

མཁོ་སྤྲོད་སྐོམ་པའི་གདུང་སེལ་ལྟར།།

དམངས་ཡིད་བདེ་བའི་མལ་དག་ལ།།

དགའ་མགུར་རོལ་བ་འཕྲལ་ཡོད་མིན།།

ཚན་རྩལ་དཔྱིད་ཀྱི་ཕོ་ཉ་མོའི།།

གསུང་སྙན་རི་ཀློང་ཀུན་མཆེད་པས།།

རྒྱལ་དར་འབངས་ཕྱུག་བདེ་བ་འབུམ།།

ཡ་གླིང་ཤར་མར་ལྷང་ངེར་བཀྲ།།

ད་ཀོ་སྲིད་འབྱོར་རིག་གསུམ་དང་།།

ལུས་རྩལ་དམག་དོན་མཁའ་སྐྱོད་སོགས།།

སྔོན་ཐོན་རྩེ་གྲར་སྙེག་གྱུར་ཏེ།།

འཛམ་གླིང་འགྲན་མེད་ཟླ་རུ་འཁུམ།།

བདེ་བ་ཡར་ངོའི་རྐང་སྟེགས་འཆའ།།

སྐྱིད་པ་ལྷ་ཡང་འགྲམ་ཆུ་ལྡང།།

ལོངས་སྤྱོད་ཀླུ་རྒྱལ་འཛད་མེད་པ།།

དགའ་སྟོན་ཉིན་མཚན་མི་ཕྱེད་དོ།།

སྐྱེ་འགྲོའི་དབང་ལྔའི་སྐྱེ་མཆེད་དུ།།

གཟུགས་དང་གཟུགས་མིན་ལོངས་སྤྱོད་དེ།།

དངོས་བརྒྱུད་མྱོང་བའི་བདུད་རྩི་དཔལ།།

ཨེ་མ་རྫོགས་ལྡན་དཔྱིད་དུ་བསྟབས།།

འདི་ན་རྒྱལ་འབངས་འགྲོ་འཆག་ཀུན།།

གནམ་ས་བླ་འོག་བསྒྱུར་བ་ཡི།།

ངོ་མཚར་འཕོ་འགྱུར་བརྗོད་འདས་པ།།

སུམ་རྩེན་དཔལ་ལ་ཅོ་ཡང་འདྲི།།

རང་བྱུང་རང་གིས་གཅེས་འཛིན་གྱིས།།

མཛེས་པ་མཛེས་པའི་དཔལ་ཀུན་བདོ།།

སྐྱེ་ཁམས་སྐྱེས་པའི་འཁོར་ལོ་དེ།།

སྲིད་མཐར་སྲིད་པའི་ཤུགས་སུ་དྲངས།།

འདི་ནི་ལོ་བརྒྱའི་ལམ་བུ་སྟེ།།

མིའི་རིགས་བདེ་བ་མཆོག་གི་ཡུལ།།

སྙེག་དང་འབྱོར་ཞིང་རོལ་བ་ཡི།།

རྨད་བྱུང་ལོ་རྒྱུས་འོད་དུ་བསྟིམས།།

ཨེ་མ་ཡང་དག་ལུགས་བཟང་གིས།།

དཔལ་ཡོན་ཟུང་གི་རྒྱལ་མཚན་འདེགས།

འགྲོ་ཀུན་ཞི་མཐུན་བདེར་འགོད་པའི།།

དགའ་བ་རིང་དུ་གནས་གྱུར་ཅིག།