ཀྲུང་གོ་གུང་ཁྲན་ཏང་དབུ་བརྙེས་ནས་ལོ༡༠༠འཁོར་བའི་ བཀྲ་ཤིས་དུས་སྟོན་ལ་ཕུལ།

སྙན་འགྱུར་བྱེ་བ་འབུམ་ཕྲག་དབྱངས་ཀྱི་མཛོད།།

རྒྱུད་སྟོང་པི་ཝང་དཀྲོལ་བའི་ངོ་མཚར་གྱིས།།

དྲི་ཟའི་འཇིག་རྟེན་ཁེངས་པ་བསྙིལ་བྱེད་པའི།།

རྒྱལ་ཡུམ་དབྱངས་ཅན་ལྷ་མོར་གུས་པར་འདུད།།

བཅུ་དྲུག་ལང་ཚོ་འབར་བའི་འཕྱོར་སྒེག་གིས།།

ཀུན་ཡིད་བརྟན་པ་དབང་མེད་འཕྲོག་བྱེད་པའི།།

དབྱངས་ཅན་ལྷ་མོའི་མཛེས་སྡུག་སྟོང་གི་དཔལ།།

དབྱར་དུས་ཆུ་སྐྱེས་པདྨའི་གཉེན་དུ་འཆར།།

བརྩེ་བའི་འཛུམ་དཀར་བདུད་རྩིའི་འོད་འཕྲོ་ཞིང་།།

ཉམས་འགྱུར་སྟོང་གི་ཡིད་འོང་གར་སྒྱུར་བའི།།

དབྱངས་ཅན་ལྷ་མོར་རྒྱུན་དུ་གསོལ་འདེབས་པས།།

དུས་བཞིའི་སྙན་ཚིག་བདུད་རྩི་སྩོལ་བ་མཛོད།།

སྔོ་བསངས་དྲི་མེད་ཀུན་གསལ་མཁའ་ལམ་མཐོངས།།

ཕུན་ཚོགས་རིན་ཆེན་རྒྱན་གྱིས་སྤྲས་པའི་སྐུ།།

འཕུར་ལྡིང་གར་གྱིས་འགྱིང་བའི་དབྱངས་ཅན་མ།།

ཁོ་བོར་ངག་གི་དངོས་གྲུབ་སྩོལ་བ་མཛོད།།

ནང་པའི་སྲོལ་གཏོད་ཤཱཀྱ་ཐུབ་པ་གཙོས།།

རྙིང་མའི་མགོན་པོ་སློབ་དཔོན་རིན་པ་ཆེ།།

འགྲོ་བ་འདྲེན་པའི་ཐོགས་མེད་མཁྱེན་དཔྱོད་ཐུགས།།

ཁོ་བོར་བློ་རིག་སྩོལ་རོགས་དབྱངས་ཅན་མ།།

གཞུང་ཆེན་བཀའ་པོད་ལྔ་དང་རྒྱུད་སྡེ་བཞི།།

སྨན་གྱི་རྒྱུད་བཞི་ལ་སོགས་རིག་གནས་བཅུ།།

ཐོགས་མེད་སྨྲ་ཞིང་མཁྱེན་པའི་ཡོན་ཏན་མཛོད།།

ཁོ་བོར་ལམ་སྟོན་སྩོལ་རོགས་དབྱངས་ཅན་མ།།

བོད་ཡིག་གཙོས་པའི་གླིང་ལྔའི་སྐད་ཡིག་ཀུན།།

ལྷག་མེད་ཡོངས་སུ་རྟོགས་པའི་བློ་གྲོས་གཏེར།།

ཤེས་རབ་རལ་གྲི་དགུང་དུ་བཏེགས་ནུས་འཐུ།།

ཁོ་བོར་ཐབས་ཤེས་སྩོལ་རོགས་དབྱངས་ཅན་མ།།

མཐོང་བ་ཙམ་གྱིས་ཡིད་དུ་ཟིན་པ་དང་།།

ཐོས་པ་ཙམ་གྱིས་སེམས་སུ་འཇགས་གྱུར་པ།།

ནམ་ཡང་བརྗེད་པ་སྤུ་ཙམ་མེད་པའི་གཟུངས།།

ཁོ་བོར་དྲན་བསྐུལ་སྩོལ་རོགས་དབྱངས་ཅན་མ།།

འཆད་ཁྲིད་སྙན་པའི་རྒྱལ་བ་བློ་བཟང་གྲགས།།

རྩོད་ལ་མི་འཇིགས་རྒྱལ་སྲས་ཞི་བ་ལྷ།།

རྩོམ་ལ་མཁས་པའི་ས་པཎ་ཀུན་དགའ་ཞབས།།

མཚུངས་པའི་དངོས་གྲུབ་སྩོལ་རོགས་དབྱངས་ཅན་མ།།

མཐོན་ཐིང་རལ་བའི་རྩེ་ན་འོད་དཀར་འཕྲོ།།

ཞལ་རས་པདྨ་རྒྱས་པའི་དཀྱིལ་འཁོར་མཛེས།།

མཐོང་བ་ཙམ་གྱིས་སྙིང་ལ་དགའ་སྟེར་བའི།།

སྙན་ངག་མཁན་པོའི་ལྷ་སྐལ་དབྱངས་ཅན་མ།།

རབ་དཀར་ཆུ་འཛིན་གསར་བའི་ལྡིང་ཁང་དུ།།

ཉམས་ལྡན་གར་ལ་རོལ་བའི་དབྱངས་ཅན་མ།།

མ་ལྟར་བྱམས་ཤིང་བརྩེ་བས་ཁོ་བོའི་ངག།

སྨྲ་བའི་དབང་ཕྱུག་ཁྱོད་དང་མཚུངས་པར་ཤོག།

ཉ་རྒྱས་ཟླ་བའི་དཔལ་ལ་འགྲན་བཟོད་པའི།།

མཛེས་སྡུག་ལྟ་བས་མི་ངོམས་དབྱངས་ཅན་མ།།

དགྱེས་པའི་འཛུམ་གྱིས་ཁོ་བོ་སྐྱོང་བ་དང་།།

ཆབས་ཅིག་སྙན་ངག་དམ་པའི་ཁྲི་སྩོལ་ཅིག།

ཟབ་ཡངས་རྒྱ་མཚོ་ལྟ་བུའི་ཐུགས་མངའ་ཞིང་།།

ཚངས་དབྱངས་ཟིལ་གྱིས་གནོན་པའི་མགྲིན་ངག་མཁན།།

བྱམས་དང་བརྩེ་བའི་གཏེར་བདག་དབྱངས་ཅན་མ།།

ནམ་ཡང་ཁོ་བོར་ངག་གི་དབང་ཕྱུག་སྩོལ།།

ཤེས་རབ་རྩལ་དུ་འདོན་པར་རབ་མཁས་པའི།།

ཡིད་འཕྲོག་ལྟ་ན་སྡུག་པའི་དབྱངས་ཅན་མ།།

འདི་ནས་བརྩམས་ཏེ་ཚེ་རབས་ཐམས་ཅད་དུ།།

བདག་གི་སྙིང་དང་བྲལ་མེད་གཏན་གནས་སྨོན།།

ཁྱོད་ཉིད་བཞུགས་སའི་གདན་ས་ཆེན་པོ་དེར།།

མི་རིགས་ཞིག་གི་སྙན་ངག་རྒྱན་ཆ་མཛེས།།

ཀྲུང་ཧྭ་ང་དྲུག་བརྩེ་དུང་འགྲོགས་པའི་སྐལ།།

གངྒཱའི་རྒྱུན་ལྟར་ཆད་མེད་སྩོལ་བར་མཁྱེན།།

ཨེ་མ་ཐུགས་རྗེའི་རླབས་ཀྱི་མེ་ཏོག་ཕྲེང་།།

ནམ་མཁར་ཁྱབ་པར་ཐོར་བའི་དབྱངས་ཅན་མ།།

ཚེ་རབས་ཀུན་ཏུ་མ་བུའི་ལས་དབང་བཞིན།།

འགྲོགས་པའི་སྐལ་བ་ནམ་ཡང་བརྟན་གྱུར་ཅིག།

དམངས་གསུམ་གསར་གཏོད་སུང་ཀྲུན་ཧྲན་མཆོག་དང་།།

ཀྲུང་གོ་གུང་ཁྲན་ཏང་གཏོད་ལི་ཏ་ཀྲའོ།།

ཀྲུང་ཧྭ་གསར་པའི་གཙོ་འཛིན་མའོ་ཙེ་ཏུང་།།

དམངས་ཀྱི་ཆེད་དུ་དངོས་ཐོག་བདེན་འཚོལ་མཁན།།

དེ་ལྟར་ཏང་གི་ཡང་དག་དབུ་ཁྲིད་འོག།

མི་རིགས་རང་སྐྱོང་སྲིད་ཇུས་ལག་སྟར་མཛད།།

བོད་ལྗོངས་གསར་བ་ལང་ཚོའི་གཟི་དཔལ་རྒྱས།།

གངས་ལྗོངས་དགྱེས་པའི་གཏམ་སྒོ་འདི་རུ་ཕྱེས།།

སྣ་ཚོགས་རིན་ཆེན་བྱེ་བས་ཡོངས་བཀང་ནས།།

དལ་བུས་ས་འཛིན་ལ་འཁྱུད་ཉམས་བརྒྱའི་གར།།

མཐོ་སྒང་ནོར་འཛིན་སྙིང་པོར་ཆགས་པའི་གནས།།

གནས་མཆོག་ལྷ་ས་སུམ་རྩེན་འཕོས་འདྲ་རྒྱན།།

གསེར་སྦྱངས་བཙོ་མའི་རིན་ཆེན་རྒྱ་ཕིབས་འོག།

ལྷ་ཡི་ཁང་བཟང་རི་བོ་གྲུ་འཛིན་མཚར།།

སྤུན་ཟླའི་མི་རིགས་རྒྱ་བོད་ཧོར་རིགས་ཚོགས།།

མཛའ་མཐུན་མཉམ་ལས་བདེ་སྐྱིད་འཚོ་བར་རོལ།།

གངས་ཅན་ལོ་རྒྱུས་ཆུ་མགོའི་བང་མཛོད་ནས།།

ཡུམ་བུ་བརླ་མཁར་གྲགས་པ་ཡོངས་སུ་ཁྱབ།།

མ་རྨོས་འབྲུ་སྔོན་ཐང་དུ་བསྙིལ་བའི་བཅུད།།

མགོ་ནག་བོད་མིར་འཚོ་བརྟེན་ཟས་སུ་གཡོས།།

གཉའ་ཁྲི་བཙན་པོའི་གདུང་རྒྱུད་དྭངས་མ་ལས།།

རང་རིགས་བོད་འབངས་བདེ་སྐྱིད་མཛད་པས་བསྐྱངས།།

ལོ་ཟླའི་འཕེལ་སྒྲིབ་དུས་ཀྱི་འགྱུར་ཁུག་ཁྲོད།།

ཡར་ཀླུང་མཚན་སྙན་ཉི་ཟླའི་འོད་དང་འཚུངས།།

ས་འཛིན་ཇོ་མོ་གླང་མས་བྲོ་གར་འཁྲབ།།

བདུད་རྩི་མྱང་ཆུ་གཙང་པོས་གླུ་དབྱངས་ལེན།།

གཙང་ཡུལ་ནོར་འཛིན་ལོ་ལེགས་གདན་ས་ནས།།

ཞིང་ལས་ཚན་རིག་ཅན་གྱི་གཏམ་བཟང་སྙན།།

ཕ་དང་ཨ་ཁུས་བུ་ལ་མིག་དཔེ་སྟོན།།

མ་དང་སྲུ་མོས་བུ་མོར་ཡ་རབས་སློབས།།

རྣམ་དཔྱོད་བློ་གྲོས་ཤེས་རིག་གཏེར་བདག་མཁན།།

གཙང་པའི་ཨོ་ལོ་ཡར་ཐོན་གོམ་འགྲོས་མཁས།།

སཱ་ལའི་ལྗོངས་འདིའི་མཛེས་པའི་དཔལ་ཡོན་དག།

ལེགས་བྱས་ལྗོན་པའི་དྲི་དང་འགྲོགས་པའི་གནས།།

སུམ་རྩེན་སྙེམས་པ་འཕྲོག་པའི་ཡུལ་ཁམས་འདིར།།

གནམ་ལྕགས་འབར་བས་ཆད་མེད་བདུད་རྩི་འཇོ།།

སོར་རྩེས་བྲིས་འདྲའི་བྲག་གསུམ་མཚེའུའི་འགྲམ།།

ཡུལ་དེར་ཨ་དར་རྒྱལ་པོའི་གཏམ་རྒྱུད་སྙན།།

ཨ་སྐྱིད་བུ་མོའི་མཛེས་སྡུག་ལང་ཚོ་འདི།།

ལྗོངས་རྒྱུའི་ཚོགས་རྣམས་ཉིང་ཁྲིར་བློ་ཁ་ཕྱོགས།།

སྙན་འགྱུར་བྱེ་བ་ཕྲག་བརྒྱའི་བསྟོད་པའི་ཚིག།

ཁམས་པའི་པི་ཝང་རོལ་ཆའི་རམ་འདེགས་འོག།

གངས་རིའི་འཇིག་རྟེན་ཁེངས་པ་བསྙིལ་བྱེད་མཁན།།

ཆུ་གཉིས་བར་ཆགས་ཆབ་མདོ་ནོར་བུའི་ས།།

གངས་ཆབ་དྭངས་མས་གསོས་པའི་རངས་ཚུགས་བརྟན།།

མི་རིགས་སྙན་པ་གླིང་བཞིར་སྒྲོག་པའི་ཆེད།།

ཨ་ཕོ་ཁམས་པས་དཀའ་སྡུག་མཉམ་སྤྱད་འབྲས།།

ཞི་མཐུན་ཅན་གྱི་དེང་རབས་ཆབ་མདོ་མཚར།།

ཁ་བའི་འདབ་མ་རླུང་གིས་གསེད་མཛད་ནས།།

སྲིད་པའི་མགུར་ལྷ་གཉའ་ཆེན་ཐང་ལྷ་བཞེངས།།

གནམ་མཚོ་ཕྱུག་མོར་མཁའ་འགྲོ་ལྷན་དུ་འཛོམས།།

བྱང་ཐང་མཛེས་སྡུག་འཐུ་བའི་རྡོ་རིང་བཙུགས།།

མརྒད་མདངས་འཛིན་སྤང་ཐང་ཡངས་པོའི་སྟེང་།།

དཀར་ནག་ཕྱུགས་ཀྱི་འཕེལ་ཁ་དབྱར་མཚོ་རྒྱས།།

ལྷག་བསམ་དཀར་བའི་ཕྱུགས་བདག་བྱང་འབྲོག་རྣམས།།

སྣང་སྲིད་དགའ་བ་སྐྱེད་པའི་རྒྱན་དུ་མཚར།།

ཏི་སེའི་རྩེ་ནས་གསེར་གྱི་ཉི་འོད་འཆར།།

ཆར་ཟིམ་བབ་ནས་མགྲོན་གྱི་བསུ་མ་མཛད།།

མ་ཕམ་གཡུ་མཚོ་མཐུན་སྒྲིལ་གསེར་ཟམ་འདྲ།།

སྣོད་བཅུད་གཉིས་ཀར་འཆི་མེད་ཞི་བདེར་རོལ།།

ཞང་ཞུང་རིག་གནས་མེ་ཏོག་ཕོ་བྲང་ནང་།།

གུ་གེ་རྒྱལ་བོའི་ཕ་མཁར་བརྗིད་ཉམས་ལྡན།།

འདུལ་བའི་སྡེ་ཆེན་མཐོ་ལྡིང་ལྷ་ཁང་ལས།།

བསྟན་པ་ཕྱི་དར་རིག་གཞུང་འཕེལ་ཁ་རྒྱས།།

མདོར་ན་གངས་ཅན་གསར་པའི་ལང་ཚོ་ཡི།།

ཡི་གར་འོང་བའི་འགྱུར་ལྡོག་འབུམ་ཕྲག་དེར།།

དབྱངས་ཅན་ལྷ་མོས་རྒྱུད་དྲུག་པི་ཝང་དཀྲོལ།།

འཛམ་གླིང་འགྲོ་བའི་སྒྲ་འཛིན་གཉེན་དུ་འཆར།།

དབྱར་མཚོ་རྒྱས་འདྲའི་བོད་གསར་གཏམ་རྒྱུད་སྙན།།

སྙན་འགྱུར་བྱེ་བ་ཕྲག་བརྒྱའི་བསྟོད་ཚིག་དབྱངས།།

དབྱངས་ཅན་རྒྱང་འབོད་སེམས་གཏམ་དཀར་པོའི་གངས།།

གངས་ལྗོངས་དགྱེས་པའི་མཆོད་སྤྲིན་བཀྲ་ཤིས་ཤོག།