ཀན་སུའུ་མི་རིགས་དགེ་འོས་སློབ་གྲྭ་ཆེན་མོ་ནི༡༩༨༤ལོའི་ཟླ༡༠བར་གསར་དུ་བཙུགས་པ་དང་། ༡༩༨༦ལོའི་ཟླ༥བའི་ཚེས༡༦ཉིན་སྐབས་དེའི་ཀྲུང་དབྱང་སྤྱི་ཁྱབ་ཧྲུའུ་ཅི་བློ་མཐུན་ཧུའུ་ཡའོ་པྰང་ལགས་ནས་སློབ་གྲྭའི་མིང་བྱང་དངོས་སུ་བྲིས། ༢༠༠༩ལོའི་ཟླ༣པར་སློབ་གྲྭ་ཆེད་སྦྱོང་ནས་དངོས་གཞི་རིམ་པར་འཕར་བ་དང་། ཞིང་ཆེན་ཡོངས་ཀྱི་མི་རིགས་དགེ་འོས་སློབ་ཆེན་དུ་གྱུར། ༢༠༡༣ལོར་རྒྱལ་ཁབ་མི་རིགས་དོན་གཅོད་ཨུ་ཡོན་ལྷན་ཁང་དང་ཀན་སུའུ་ཞིང་ཆེན་གཉིས་ཀྱི་མཉམ་བསྒྲུབ་སློབ་གྲྭ་རུ་བསྒྱུར། སློབ་གྲྭ་ཡོངས་ལ་བོད་རྒྱ་སྐད་གཉིས་སློབ་གསོ་གཙོས་པའི་སློབ་གླིང་དང་སྡེ་ཁག༡༦ཡོད་པ་དང་། དངོས་གཞི་རིམ་པའི་ཆེད་ལས༥༤ཡོད། དེ་དག་ལ་སློབ་གསོ་རིག་པ་དང་། ལོ་རྒྱུས་རིག་པ། སྒྱུ་རྩལ་རིག་པ། རྩིས་རིག རྩོམ་རིག ཁྲིམས་རིག་སོགས་རིག་ཚན་མི་འདྲ་བ་བཅུ་ཕྲག་ལྷག་འདུས་ཡོད། སློབ་གྲྭ་ཡོངས་ལ་དགེ་བཟོ་བ༦༩༦ཙམ་ཡོད་ལ། དེའི་ཁྲོད་ཆེད་ཁྲིད་དགེ་རྒན༥༡༠ཡོད། དེས་དགེ་བཟོ་བ་ཡོངས་ཀྱི༧༣%ཟིན། དགེ་རྒན་ཆེན་མོ༥༠དང་སློབ་དཔོན་ཆེ་གཞོན༡༧༡ཡོད། དེས་དགེ་བཟོ་བ་ཡོངས་ཀྱི༦༤.༨༥%ཟིན། སློབ་གྲྭ་ཡོངས་ལ་སློབ་དཔོན་ཆེ་གཞོན་ཡན་གྱི་དགེ་རྒན༢༢༤ཡོད། དེས་དགེ་བཟོ་བ་ཡོངས་ཀྱི༤༤%ཟིན། སློབ་མའི་ཡོང་ཁུངས་གཙོ་བོ་ཀན་སུའུ་ཡིན་པ་དང་། གཞན་ཡུན་ནན་དང་བོད་ལྗོངས། ནང་སོག ཧྲན་ཞི། ཧྲན་ཏུང་། ཧྭའེ་ལུན་ཅིང་སོགས་ཞིང་ཆེན༢༠སློབ་བསྡུ་ས་ཁུལ་དུ་གཏན་འབེབས་བྱས་ཡོད། སློབ་གྲྭ་ཡོངས་ལ་སློབ་མ༡༢༠༠༠ལྷག་ཡོད་ལ། དེར་རྒྱ་དང་བོད། ཁ་ཆེ། པའོ་ཨན། ཡུས་ཀུའུ། ཏུན་ཞང་སོགས་མི་རིགས་མི་འདྲ་བ༢༥ལྷག་གི་སློབ་མ་ཡོད། མི་རིགས་གྲངས་ཉུང་གི་སློབ་མས་སློབ་གྲྭ་ཡོངས་ཀྱི་སློབ་མའི༦༨%ཟིན་ཡོད། སློབ་གྲྭ་ཡོངས་སུ་རྒྱལ་ཁབ་རིམ་པའི་ཁྱད་འཕགས་ཆེད་ལས་འཛུགས་སྐྲུན་ལྟེ་གནས༡དང་། ཞིང་ཆེན་རིམ་པའི་ཁྱད་འཕགས་ཆེན་ལས༤ཡོད། ཞིང་ཆེན་རིམ་པའི་སློབ་ཁྲིད་དཔུང་སྡེ༣དང་། ཞིང་ཆེན་རིམ་པའི་སྤུས་ལེགས་བསླབ་ཚན༩བཅས་ཡོད་ལ། སྔ་ཕྱིར་ཞིང་ཆེན་དང་ཐིང་རིམ་པའི་སློབ་ཁྲིད་གཟེངས་རྟགས༢༦ཐོབ། རྒྱལ་ཁབ་དམངས་ཨུའི་སྤྱི་ཚོགས་ཚན་རིག་གི་གནད་ཆེན་ཞིབ་འཇུག་གནས་གཞི་གཅིག་དང་། གནད་ཆེའི་འཛུགས་སྐྲུན་རིག་ཚན་གཉིས། གནད་ཆེའི་ཞིབ་འཇུག་ལྟེ་གནས་གཅིག་བཅས་ཡོད་ལ། ཞིང་ཆེན་རིམ་པའི་གནད་ཆེའི་རིག་ཚན་ལྔ་དང་། གནད་ཆེའི་ཚོད་བཤེར་ཁང་གཅིག གནད་ཆེའི་ཞིབ་འཇུག་གསོ་སྦྱོང་གནས་གཞི་གཉིས་བཅས་ཡོད། མིག་སྔར་སློབ་གྲྭ་རུ་ཀན་སུའུ་ཞིང་ཆེན་བོད་ཡིག་དཔེ་རྙིང་བསྒྱུར་སྒྲིག་ལྟེ་གནས་དང་། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་ལས་གཞི《ཀྲུང་ཧྭ་ཚིག་མཛོད་ཆེན་མོ་ལས་བོད་ཡིག་སྐོར》གྱི་རྩོམ་སྒྲིག་ལས་ཚིགས། ཨ་མདོ་བོད་རིག་པའི་ཞིབ་འཇུག་ལྟེ་གནས། ཧུ་ཐོ་མིན (河挑岷) རིག་གནས་ཞིབ་འཇུག་ལྟེ་གནས། ནུབ་བྱང་གྲངས་ཉུང་མི་རིགས་ཀྱི་སློབ་གསོ་ཞིབ་འཇུག་ལྟེ་གནས། མཐོ་སྒང་སྐྱེ་ཁམས་མ་ལག་ཞིབ་འཇུག་ལྟེ་གནས། བོད་རྒྱ་སྐད་གཉིས་སློབ་གསོ་ཞིབ་འཇུག་ཁང་སོགས་ཞིབ་འཇུག་ལས་ཁུངས༡༤ལྷག་ཡོད། ལོ་ལྔའི་འཆར་གཞི་ཨང་བཅུ་གཉིས་པ་ལག་བསྟར་བྱས་པ་ནས་བཟུང་། སློབ་གྲྭའི་དགེ་རྒན་ཡོངས་ནས་རིག་གཞུང་དཔྱད་རྩོམ༡༧༩༦སྤེལ་ཅིང་། དཔེ་དེབ༧༢དང་བསླབ་དེབ༡༢༡དཔེ་སྐྲུན་བྱས། ཞིབ་འཇུག་ལས་གཞི༣༣༧བརྩོན་ལེན་བྱས་ཤིང་། དེར་ཞིང་ཆེན་ཡན་གྱི་བྱ་དགའ༡༢ཐོབ་ཡོད་དོ།།
གོང་དུ་བརྗོད་པ་ནི་སློབ་གྲྭའི་སྤྱིའི་གནས་ཚུལ་ཡིན། ད་ནི་བོད་རྒྱ་སྐད་གཉིས་སློབ་གསོ་སློབ་གླིང་གི་གནས་ཚུལ་མདོར་བསྡུས་ཤིག་ཞུས་ན། ཀན་སུའུ་མི་རིགས་དགེ་འོས་སློབ་གྲྭ་ཆེན་མོའི་བོད་རྒྱ་སྐད་གཉིས་སློབ་གླིང་ནི༢༠༡༤ལོར་གསར་དུ་བཙུགས་པ་དང་། དེར་བོད་རྒྱ་སྐད་གཉིས་རིག་ཚན་སློབ་ཁྲིད་སྡེ་ཁག་དང་ནུབ་བྱང་གྲགས་ཉུང་མི་རིགས་ཀྱི་སློབ་གསོ་ཞིབ་འཇུག་ལྟེ་གནས། བོད་རྒྱ་སྐད་གཉིས་སློབ་གསོ་ཞིབ་འཇུག་ཁང་། ཀན་སུའུ་ཞིང་ཆེན་གྱི་བོད་རྒྱ་སྐད་གཉིས་དགེ་རྒན་གསོ་སྦྱོང་ལྟེ་གནས་སོགས་ཁུངས་གཏོགས་ལས་ཁུངས་ལྔ་ཙམ་ཡོད། ད་ལྟའི་བར་མར་ཁེ་སི་སློབ་གླིང་དང་། རྒྱ་ཡིག་སྡེ་ཁག བོད་རྩིས་སྡེ་ཁག ལོ་རྒྱུས་རིག་གནས་སྡེ་ཁག རྩིས་འཁོར་སྡེ་ཁག དཔལ་འབྱོར་དང་སྤྱི་ཚོགས་འཕེལ་རྒྱས་སྡེ་ཁག སློབ་གསོ་སྡེ་ཁག སློབ་གླིང་དང་སྡེ་ཁག་བདུན་གྱིས་སྐྱོང་བཞིན་པའི་སྐད་གཉིས་ཆེད་གཉེར་འཛིན་གྲྭ་དག་གི་སློབ་ཁྲིད་དང་སློབ་སྦྱོང་། སློབ་མ་བདག་གཉེར་དང་དཔྱད་རྩོམ་མཛུབ་སྟོན་སོགས་ཀྱི་བྱ་བའི་འགན་གཅིག་ལྕོགས་སུ་བཞེས་ཤིང་། སྐད་གཉིས་ཆེད་ལས་ཅན་གྱི་སློབ་གླིང་དང་སྡེ་ཁག་དག་ལ་མཉམ་འབྲེལ་ལེགས་པོ་བྱས་ནས་སྐད་གཉིས་སློབ་གསོའིབྱ་བ་ཡར་རྒྱས་གོང་འཕེལ་དུ་འགྲོ་བར་འབད་བརྩོན་བྱེད་ཀྱིན་ཡོད། སློབ་གྲྭ་ཡོངས་ལ་སྐད་གཉིས་ཆེད་ལས་བཅུ་གཅིག་དང་སྐད་གཉིས་ཆེད་སྦྱོང་འཛིན་གྲྭ་བཞི་བཅུ་ཞེ་གཅིག་བཙུགས་ཡོད་པ་དང་། སྐད་གཉིས་ཆེད་གཉེར་སློབ་མ༡༨༨༤དང་དགེ་རྒན༣༦ཡོད། སྐད་གཉིས་ཆེད་གཉེར་སློབ་དཔོན༥དང་སློབ་དཔོན་གཞོན་པ༡༢། འཆད་ཁྲིད་དགེ་རྒན༡༩བཅས་ཡོད། མིག་སྔའི་བར་སྐད་གཉིས་ཆེད་གཉེར་སློབ་མ༢༠༠༠ལྷག་བདེ་བླག་ངང་སློབ་མཐར་ཕྱིན་ཅིང་། སྤྱི་ཚོགས་ལས་གནས་སོ་སོ་ན་སྐད་གཉིས་ཆེད་ལས་ཀྱི་དགེ་མཚན་རྒྱ་བསྐྱེད་གཏོང་བཞིན་ཡོད་དོ།།
ཉེ་བའི་ལོ་ཤས་རིང་གླིང་གཙོ་ལྷ་རྒྱལ་ཚེ་རིང་ལགས་ཀྱི་སྣེ་འཁྲིད་དང་མཛུབ་སྟོན་ལ་བརྟེན། ༡༠༡༥ལོ་ནས་བཟུང་བསྟུད་མར་ལོ་བཞི་ལ་ན་གཞོན་འབུམས་རམས་པ༤དང་ཞིབ་འཇུག་སློབ་མ༢བསྡུ་ལེན་བྱས་ཏེ་སྐད་གཉིས་དགེ་རྒན་གྱི་དཔུང་སྟོབས་རྒྱ་ཆེ་རུ་བསྐྱེད་པས། ད་ལྟ་སྐད་གཉིས་སློབ་གླིང་ཡར་ངོའི་ཟླ་དང་དབྱར་གྱི་མཚོ་བཞིན་འཕེལ་རྒྱས་སུ་འགྲོ་བཞིན་པའི་སྒང་ཡིན།
༡༠༡༧ལོའི་ཟླ༦པར། ངེད་སློབ་གླིང་ལ་ཀན་སུའུ་མི་རིགས་དགེ་འོས་སློབ་གྲྭ་ཆེན་མོའི“སློབ་གླིང་དཔེ་ལེགས་ཅན”ཞེས་པའི་གཟེངས་བསྟོད་བྱ་དགའ་ཐོབ།
བོད་རྒྱ་སྐད་གཉིས་སློབ་གསོ་གླིང་གིས་སྔ་ཕྱིར《བོད་ཀྱི་རྩོམ་རིག་ལོ་རྒྱུས》དང《བོད་རྒྱ་སྐད་གཉིས་གྲགས་རིག་དབྱེ་ཞིབ་རིག་པ》སྟེ། ཞིང་ཆེན་རིམ་པའི་སྤུས་ལེགས་བསླབ་ཚན་གཉིས་དང་། 《དབྱིབས་རྩིས་ཞིབ་འགྲེལ》དང《བོད་ཀྱི་དུས་རབས་རིམ་བྱུང་གི་རྩོམ་ཡིག་གཅེས་བསྡུས》ཏེ། སློབ་གྲྭ་རིམ་པའི་སྤུས་ལེགས་བསླབ་ཚན་གཉིས། 《བོད་ཡིག་དྲ་རྒྱའི་འཛུགས་སྐྲུན》དང《སྐད་བརྡའི་བྱ་རིམ་འཆར་འགོད》སོགས་སློབ་གྲྭ་རིམ་པའི་ཁྱད་ལྡན་བསླབ་ཚན་གཉིས་བཅས་བཙུགས་ཡོད་པ་མ་ཟད།《བོད་ཀྱི་དམངས་ཁྲོད་རྩོམ་རིག་སྤྱི་བཤད》དང《བོད་ཀྱི་སྲིད་རྒྱུས་མི་ཆོས་རིག་པ》《བོད་ཀྱི་དམངས་སྲོལ་རིག་པ》《ས་སྐྱ་ལེགས་བཤད》《བོད་ཀྱི་ལོ་རྒྱུས་སྤྱི་བཤད》《བོད་ཀྱི་སྐར་རྩིས་རིག་པ》《ཚན་རྩལ་ལོ་ཙཱ》སོགས་འདེམས་སྦྱང་བསླབ་ཚན་སུམ་ཅུ་ལྷག་སློབ་ཁྲིད་བྱེད་ཀྱིན་ཡོད། དེ་དག་ལས་སློབ་དཔོན་ལྷ་རྒྱལ་ཚེ་རིང་ལགས་ཀྱིས་སློབ་ཁྲིད་དང་རྩོམ་འབྲི་གནང་བའི《བོད་ཀྱི་རྩོམ་རིག་ལོ་རྒྱུས》ཞེས་པ་ལོ་ལྔའི་འཆར་གཞི་བཅུ་གཉིས་པའི་རྒྱལ་ཁབ་རིམ་པའི་སློབ་གསོའི་འཆར་གཞིའི་བསླབ་དེབ་ཏུ་བདམས། དེ་མིན། 《བོད་ཀྱི་རྩོམ་རིག་སྤྱི་བཤད》དང་།《ཁྲིམས་ལུགས་རིག་པའི་ནང་དོན་མདོར་བསྟན》《ཁྲིམས་ཡིག་དང་ཁྲིམས་ལུགས་བརྡ་ཆད་ལོ་ཙཱ》《རྩོམ་གཞུང་སྤྱི་བཤད》《བོད་ཀྱི་རིག་གནས་ལོ་རྒྱུས་སྤྱི་བཤད》《བོད་སྐད་གློག་བརྙན་རིག་པའི་སྤྱི་དོན》སོགས་བསླབ་ཚན་བཅུ་ཕྲག་ལྷག་ལ་སློབ་ཁྲིད་རྩ་འཛིན་འཆར་འགོད་དང་། བསླབ་གཞི་རྩོམ་འབྲི། བསླབ་དེབ་དཔེ་སྐྲུན་བཅས་ཀྱི་བྱ་བ་བསྒྲུབ་བཞིན་པའི་སྒང་ཡིན། གཞན་ཡང་། ངེད་སློབ་གླིང་གི་བོད་རྒྱ་སྐད་གཉིས་སློབ་གསོ་ཞིབ་འཇུག་ཁང་གིས་གཙོ་འགན་བཞེས་ནས《སྒྲ་བསྒྱུར་མེ་ལོང》ཞེས་པའི་སྐད་གཉིས་རིག་གཞུང་དུས་དེབ་ཅིག་འདོན་སྤེལ་བྱས་ཡོད། སྤྱིའི་འདོན་ཐེངས་དང་པོ་དང་གཉིས་པ་གཉིས་འབྲེལ་ཡོད་ལས་ཁུངས་དང་མི་རིགས་སློབ་གླིང་། ས་གནས་རིག་གཞུང་ལས་ཁུངས་སོགས་སུ་བཀྲམས་ཟིན་པ་དང་། ཀུན་གྱིས་གདེང་འཇོག་དང་བསྔགས་བརྗོད་ཚད་མེད་ཐོབ། ད་ལྟ་འདོན་ཐེངས་གསུམ་པ་གྲ་སྒྲིག་བྱེད་བཞིན་པའི་སྒང་ཡིན། 《སྒྲ་བསྒྱུར་མེ་ལོང》ནི་སློབ་གྲྭ་ཡོངས་ལས་ཞིབ་འཇུག་ཁང་ཞིག་གིས་རང་རྟ་སྒ་བཟུང་དང་རང་བྲོ་ཁུག་མ་བྱས་ནས་བསྒྲུབ་པའི་དུས་དེབ་ཐོག་མ་ཡིན་པས། འབྲེལ་ཡོད་སྲིད་འཛིན་ལས་ཁུངས་དང་འགོ་ཁྲིད་རྣམས་ཀྱིས་རྒྱབ་སྐྱོར་ཆེན་པོ་བྱེད་ཀྱིན་ཡོད།
ལོ་ངོ་འདི་དག་རིང་བོད་རྒྱ་སྐད་གཉིས་སློབ་གསོ་གླིང་གིས་རིག་གཞུང་ཉམས་ཞིབ་ཐད་ནས་ཀྱང་གྲུབ་འབྲས་གཡུར་དུ་ཟ་བ་བླངས་ཡོད་དེ་དཔེར་མཚོན་ཙམ་དྲངས་ན། སློབ་དཔོན་ལྷ་རྒྱལ་ཚེ་རིང་ལགས་ཀྱིས་བརྩམས་གནང་མཛད་པའི《བོད་ཀྱི་རྩོམ་རིག་བྱུང་འཕེལ་གྱི་ལོ་རྒྱུས་དང་ཁྱད་ཆོས་བྱེ་བའི་རོལ་མཚོ》དང་། སློབ་དཔོན་གཞོན་པ་ཀླུ་རྒྱལ་ཐར་ལགས་ཀྱིས་བརྩམས་གནང་མཛད་པའི《མཉམ་མེད་རྒྱལ་བ་ཙོང་ཁ་བ་ཆེན་པོའི་ཡོངས་འཛིན་དམ་པ་ཆོས་རྗེ་དོན་གྲུབ་རིན་ཆེན་དཔལ་བཟང་བོའི་འཁྲུངས་གཞིས་དང་འབྲེལ་བའི་དཔྱད་པ་ནོར་བུའི་རང་མདངས》དགེ་རྒན་ཚེ་རིང་སྐྱབས་ཀྱིས་སྒྲིག་རྩོམ་གནང་བའི《བོད་ཀྱི་རྣམ་ཐར་རྩོམ་རིག་ཞིབ་འཇུག》སོགས་ཀྱིས་མཚོན་པའི་དཔེ་དེབ་དང་། དགེ་རྒན་པད་མ་ཚེ་རིང་ལགས་ཀྱིས་བརྩོན་ལེན་བྱས་པའི་རྒྱལ་ཁབ་རིམ་པའི་ལས་གཞི“ཏུན་ཧོང་བོད་ཡིག་གན་རྒྱའི་གཞུང་ཡིག་བསྡུ་རུབ་དང་ལོ་ཙཱ་ཞིབ་འཇུག”དང་། དགེ་རྒན་ཚེ་རིང་སྐྱབས་ཀྱིས་ཞིབ་འཇུག་གི་གཙོ་འགན་བཞེས་པའི་རྒྱལ་ཁབ་རིམ་པའི་ལས་གཞི“བོད་ཀྱི་རྣམ་ཐར་རྩོམ་རིག་གི་བྱུང་འཕེལ་ལོ་རྒྱུས་ལ་དཔྱད་པ”སོགས་ཀྱིས་མཚོན་པའི་ལས་གཞི་ཆེ་ཆུང་ཅི་རིགས། 《བོད་ཀྱི་རྣམ་ཐར་ཆེན་མོ་བརྒྱད་ཀྱི་བསམ་བློའི་ནང་དོན་དང་སྒྱུ་རྩལ་ཁྱད་ཆོས་ལ་དཔྱད་པ》《རྗེ་ཞབས་དཀར་བའི་མགུར་གླུའི་ནང་དོན་དང་ཁྱད་ཆོས་ལ་དཔྱད་པ》《འཕགས་པ་ཤིང་ཀུན་དགོན་དུ་བཞུགས་པའི་བླ་མ་དོན་གྲུབ་རིན་ཆེན་གྱི་ལི་སྐུའི་སྐོར་ལ་ཐོག་མར་དཔྱད་པ》《རྗེ་མར་པ་ལོ་ཙཱ་བའི་མགུར་གླུའི་གྲངས་དང་ཁྱད་ཆོས་ལ་དཔྱད་པ》《དེབ་ཐེར་དམར་པོའི་ཞིབ་འཇུག་གི་གནས་བབ་སྐོར་ཅུང་ཙམ་གླེང་བ》《ཚལ་བ་ཀུན་དགའ་རྡོ་རྗེའི་གདུང་ཁུངས་དང་འཁྲུངས་འདས་ལོ་ཚིགས་སྐོར་གླེང་བ》《ཚལ་བ་ཀུན་དགའ་རྡོ་རྗེའི་དེབ་ཐེར་དམར་བོའི་ཡིག་ཆའི་ཁུངས་ལ་དཔྱད་པ》《བཙན་པོ་ཁྲི་ལྡེ་སྲོང་བཙན་གྱི་མཛད་རྗེས་ལ་བསྐྱར་དུ་དཔྱད་པ》《རྒྱུ་གསུམ་སྨྲ་བའི་ལྟ་བ་ལས་འཕྲོས་ཏེ་སྙན་ངག་གི་སྐྱོན་སེལ་གླེང་བ》《བོད་ཀྱི་རྣམ་ཐར་རྩོམ་རིག་གི་རིགས་དང་ཁྱད་ཆོས་མདོ་ཙམ་བརྗོད་པ》《བོད་ཀྱི་རྣམ་ཐར་རྩོམ་རིགས་ལས་རང་རྣམ་སྐོར་ལ་དཔྱད་པ》《བོད་ཀྱི་རྣམ་ཐར་རྩོམ་རིགས་ལས་གསར་རྣམ་གྱི་སྐོར་ཐོག་མར་གླེང་བ》《བོད་སྐད་བརྙན་དཔྱད་རྩོམ་རིག་སྐོར་ཅུང་ཙམ་བརྗོད་པ》《བོད་སྐད་འཁྲབ་གཞུང་གསར་རྩོམ་སྐོར་ཅུང་ཟད་གླེང་བ》《ཉེ་བའི་ལོ་ངོ་ཉི་ཤུའི་རིང་གི་བོད་ཀྱི་ལོ་རྒྱུས་རིག་པའི་ཞིབ་འཇུག་གནས་བབ》《རྗེ་ཙོང་ཁ་པའི་རྣམ་ཐར་ཐུབ་བསྟན་མཛེས་རྒྱན་རྒྱ་འགྱུར་མ་གཉིས་ཀྱི་དཔྱད་པ》སོགས་ཀྱིས་མཚོན་པའི་རིག་གཞུང་དཔྱད་རྩོམ་བཅས་ལ་རྒྱལ་ཁབ་ཕྱི་ནང་གི་རིག་གཞུང་ཉམས་ཞིབ་པའི་སྡེ་ནས་གདེང་འཇོག་དང་དགའ་བསུ་ཆེན་པོ་ཐོབ། འདི་དག་ནི་ངེད་སློབ་གླིང་གིས་སློབ་གསོ་སློབ་ཁྲིད་དང་རིག་གཞུང་ཞིབ་འཇུག་གི་བྱ་བ་ཡ་མ་བྲལ་བར་གཙིགས་འཛིན་བྱས་པའི་འབྲས་རྟགས་ཤིག་ཏུ་རློམ་ཆོག་པར་མ་ཟད། ཀྲུང་གོ་གུང་ཁྲན་ཏང་གི་ལོ་བརྒྱའི་འཁྲུངས་སྐར་བསུ་བའི་ལེགས་སྐྱེས་རྨད་དུ་བྱུང་བ་ཞིག་ཀྱང་ཡིན་ནོ།། ( ཚེ་རིང་སྐྱབས་ཀྱིས་མཁོ་སྤྲོད་གནང )
