དཔའ་བོའི་བཤུལ་ལམ།

སློབ་གྲྭར་འགྲིམས་དང་མ་འགྲིམ་པའི་སྔ་གཞུག་ལ།

བུ་དཔའ་བོ་ཇག་ལ་ཆས་དགོས།

སྨན་བུ་མོའི་དཀར་ལས་ཡག་དགོས་ཟེར།

ལང་ཚོ་སྨིན་དང་མ་སྨིན་པའི་སྔ་གཞུག་ལ།

སྒ་ཐོག་གི་སྟག་ཤར་ར་ལུ་ཅན་དང་།

དུང་ཞེན་མནའ་ཚིག་ཅན་ལ་དཔའ་བོར་བལྟས།

ཡིག་ངོ་ཆོད་དང་མི་ཆོད་པའི་སྔ་གཞུག་ལ།

ཨ་ཕས་དཔའ་བོའི་མཚོན་ཆ་སྨྱུ་གུར་འབོད།

ཨ་མས་བུ་མོའི་མཛངས་མཛེས་བློ་རིག་ལ་བོས།

ལ་གཟར་འགག་ལ་བརྒྱུད་པའི་སྔ་གཞུག་ཏུ།

དམར་དམག་རྒྱང་བསྐྱོད་ཀྱི་དཔའ་བོའི་ལོ་རྒྱུས་རིང་མོས།

ལན་རེར་རྒྱལ་དང་ཕམ་ལ་ངེས་པ་མེད་ཀྱང་།

དཔའ་མི་ཞུམ་པའི། སྙིང་མི་འདར་བའི། ཡ་མི་ང་བའི།

ཁྲག་གི་བཤུལ་ལམ་འགོད་སྟངས་ལ་ཡ་རེ་མཚན།

མགོ་རྗེ་སྔོན་ཤུལ་དུ་ལྷགས་པའི་སྔ་གཞུག་ཏུ།

ཕོ་རབ་ཅིག་གི་བློ་རྩེ་ལས་ཕོ་འབྲིང་གསུམ་གྱི་བློ་གྲོས་ཟེར་བའི།

ཕ་མེས་ཡང་མེས་ཀྱི་བསླབ་བྱ་དེ་དག་ལ།

ཡང་བསྐྱར་བསམ་གཞིགས་ཀྱི་འཇམ་ཤ་གླན་དགོས་བྱུང་།

ཅོ་ནེ་དཔོན་པོར་སེམས་ངོ་སྦྱར་བའི་སྔ་གཞུག་ཏུ།

ཁམས་གསུམ་ཟིལ་གྱིས་གནོན་མྱོང་བའི་དཔའ་བོ་ཞིག་གམ།

སྲིད་གསུམ་དབང་དུ་བསྒྱུར་མྱོང་བའི་མི་ཕོ་ཞིག

ནམ་མཁའ་འམ་ས་གཞིའི་ཁྱོན་དུ།

ལྷ་རྟ་རྐྱང་དམར་ལ་ཆིབས་ཁ་བསྒྱུར་ཏེ།

དཔའ་བོའི་རྟོགས་བརྗོད་རིང་མོའི་མགོ་རྐང་ལ།

ཤ་དང་རུས་པའི་གསེར་ཤན་བཅིངས་ཚུལ་མཐོང་འོངས།

དུས་རབས་གསར་རྙིང་གཉིས་ཀྱི་སོ་མཚམས་སུ་ལངས་ཏེ།

རང་ཉིད་ཡང་སྙིང་གང་ནས་འོངས་ཤིང་།

ད་ཆ་གང་ལ་ཆས་དགོས་པར་དོགས་འདྲི་བྱས།

 ༢༠༢༡ལོའི་ཟླ༦པའི་ཚེས༢༡ཉིན་ཅོ་ནེ་ནས།