རྩ་ཆེ་ཞིང་སྟོངས་ཉེ་ཡོད་པའི་རྔ་དཀར་མཚོ་གླག་རྔ་བ་རྫོང་དུ་མཐོང་རྒྱུ་བྱུང་། ཉེ་ཆར། ས་གནས་དེ་གའི་པར་རྒྱག་མཁས་ཅན་གྱིས་རྔ་བ་རྫོང་ཆུ་འགོའི་ཁུལ་དང་ན་འདམ་རྩྭ་ཐང་དུ་རྩ་ཆེའི་བརྙན་ཕབ་རྒྱུ་ཆ་ཐོག་མར་པར་ལེན་བྱས་པ་དང་། འདབ་ཆགས་ལ་དགའ་པོ་བྱེད་མཁན་ཚོས་ཟླ་10པའི་གཡས་གཡོན་དུ་མཚོ་གླག་མཇུག་དཀར་གྱི་དཔའ་ཉམས་པར་ལེན་བྱ་རྒྱུ་སྒུག་ནས་སྡོད་བཞིན་ཡོད། འཛམ་གླིང་རང་བྱུང་སྲུང་སྐྱོང་མནའ་འབྲེལ་གྱིས་རྩོམ་སྒྲིག་བྱས་པའི《ཀྲུང་གོའི་སྟོངས་ཉེར་ཡོད་པའི་སྲོག་ཆགས་ཀྱི་རྒྱབ་ཤ་དམར་པོའི་དེབ》ནང་ཀྲུང་གོའི་སྟོངས་ཉེར་ཡོད་པའི་སྲོག་ཆགས་ཀྱི་གནས་ཚུལ་དང་། ཉེན་ཡོད་རྒྱུ་རྐྱེན། སྲུང་སྐྱོང་བྱ་ཐབས་སོགས་བཀོད་ཅིང་། ཞིབ་ཅིང་ཕྲ་བའི་སྒོས་སྟོངས་ཉེར་ཡོད་པའི་མཚོ་གླག་མཇུག་དཀར་བྲིས་ཡོད། ཀྲུང་གོའི་སྟོངས་ཉེར་ཡོད་པའི་བྱ་རིགས་སྲུང་སྐྱོང་དང་རྒྱུན་སྲིང་བེད་སྤྱོད་བྱ་རྒྱུར་ཚན་རིག་དང་མཐུན་པའི་གཞི་འཛིན་སའང་མཁོ་འདོན་བྱས་ཡོད།
མཚོ་གླག་མཇུག་དཀར་ནི་རྒྱལ་ཁབ་ཀྱི་རིམ་པ་དང་པོའི་གཙོ་གནད་སྲུང་སྐྱོབ་སྲོག་ཆགས་ཡིན་པ་དང་། ཀྲུང་གོའི་མངའ་ཁོངས་སུ་མཐོང་དཀོན། དེའི་གཟུགས་པོའི་རིང་ཚད་ལ་ལི་སྨི་84ནས་91བར་ཡོད། གཟུགས་པོའི་ལྗིད་ཚད་ཆ་སྙོམས་རྒྱ་མ་2ནས་4བར་ཡོད། དེ་ལ་རྣོ་ངར་གྱི་མིག་དང་། སྡེར་མོ། མཆུ་ཏོ་བཅས་ཡོད། ལུས་པོའི་སྤུ་མང་ཆེ་བ་སྨུག་པོར་ཡིན་ཞིང་། ལྟག་རྒྱབ་དང་བྲང་སྤུ་ནི་སྒྲོ་དང་འདྲ་ཞིང་ཅུང་རིང་བ། སྐེ་སྒྲོའི་མདོག་ནི་བྱེ་མདོག་དང་རྔ་སྒྲོ་ནི་ཁྱིའུ་དབྱིབས་དང་ཁ་དོག་དཀར་པོ་ཡིན། ད་དུང་ཟན་འཚོལ་གྱི་ནུས་པ་དྲག་པོ་ཡོད། སྤྱིར་བཏང་མ་ཡིན་པའི་སྡེར་མོ་དེ་ནི་ཁོ་ཚོའི་ཆེས་ལེགས་པའི་མཚོན་ཆ་ཡིན་ལ། འགུལ་སྐྱོད་ཀྱི་མཐོ་ཚད་ལ་སྨི་2500ནས་5300བར་ཡོད། སྐབས་འགར་ཆུ་ངོས་དམའ་སར་འཕུར་སྐྱོད་བྱས་ནས་ཉ་རིགས་འཚོལ་བ་དང་། ཉ་མོ་ཆུ་ནང་ནས་ལས་སླ་མོའི་འཛིན་པ་རེད། སྐབས་འགར་ཕོ་མོ་མཉམ་འབྲེལ་བྱས་ནས་དགྲ་བསླུས་བྱེད་ཐབས་སྤྱད་དེ་འདབ་ཆགས་གཞན་དག་དང་འོ་འཐུང་སྲོག་ཆགས་འབྲིང་ཆུང་རིགས་འཛིན་པ་དང་། སྐབས་འགར་ཁེར་རྐྱང་ངམ་ཡང་ན་མཚོ་ངོས་སུ་འཕུར་སྐྱོད་བྱེད་པ་བཅས་མཐོང་ཐུབ།
མཚོ་གླག་མཇུག་དཀར་གྱི་ཡུལ་སྤོ་བ་ལ་བླང་བྱ་ནན་མོ་འདོན་པ་སྟེ། མང་ཆེ་བ་གཙང་པོ་དང་མཚེའུ་ཉེ་འགྲམ་གྱི་འདམ་རྫབ་ཁུལ་དུ་འཚོ་བ་དང་།
མཚེའུ་དང་གཙང་པོ། མཚོ་འགྲམ། ཆུ་མདོ་ཁུལ་བཅས་སུ་འཚོ། གཙོ་བོ་ཆུ་དྲོད་དང་། བཟའ་བཅའ། རང་བྱུང་ཁོར་ཡུག་གི་ཕྱོགས་ནས་བསམ་བློ་གཏོང་དགོས། མཚོ་གླག་མཇུག་དཀར་རྔ་བ་རྫོང་དུ་ཐོན་པ་དེ་ནི་གློ་བུར་དུ་བྱུང་བ་ཞིག་མིན་པར། རྔ་བ་རྫོང་ནི་འབྲི་ཆུ་དང་རྨ་ཆུའི་ཆུ་འགོ་ཡིན་པ་དང་། ཆུ་འགོ་ཁུལ་གལ་ཆེན་དུ་གནས་པས། དེ་གའི་སྲོག་ཆགས་མང་པོ་སྐྱེས་ཡོད་པར་མ་ཟད། མཚོ་གླག་མཇུག་དཀར་གྱི་དགུན་སྒྲོལ་ཁུལ་དང་མཚམས་འཇོག་ཁུལ་གྱི་གྲས་ཤིག་ཀྱང་རེད།
ས་གནས་དེ་གའི་སྐྱེ་ཁམས་སྲུང་སྐྱོང་བྱེད་ཤུགས་ཇེ་ཆེར་སོང་བ་དང་བསྟུན། སྐྱེ་ཁམས་ཁོར་ཡུག་གི་སྤུས་ཚད་ཟམ་མི་ཆད་པར་གོང་མཐོར་ཕྱིན་ཞིང་། བདག་ཏུ་མ་བཟུང་བའི་སྲོག་ཆགས་འཚོ་སྡོད་བྱེད་པའི་ཁོར་ཡུག་རྒྱུན་མཐུད་ནས་ལེགས་ཕྱོགས་སུ་འཕེལ་བཞིན་ཡོད་རྐྱེན། མཚོ་གླག་མཇུག་དཀར་དང་ཀྲུང་ཧྭ་ཆིའུ་ཧྲ་ངང་པ། གསེར་གླག་སོགས་དཀོན་ཞིང་རྩ་ཆེ་བའི་སྲོག་ཆགས་མང་པོ་འདུས། དེའང་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་སྲོག་ཆགས་ཁྲུང་ཁྲུང་རྐེ་ནག་ཤར་རྒྱུད་ཀྱི་ཁྱུ་ཚོགས་སྐྱེ་འཕེལ་བྱ་ཡུལ་གྱི་གྲས་ཤིག་ཡིན་པ་དང་། འདབ་ཆགས་གནས་སྤོ་བྱེད་ཐེངས་རེར་འདབ་ཆགས་མང་པོ་ཞིག་དེ་གར་འདུ་འཛོམས་བྱེད་ཀྱི་ཡོད་པ་མཐོང་ཐུབ། པར་རྒྱག་ཚོད་ཆེས་ཡག་ཤོས་ནི་ལོ་རེའི་ཟླ་11པའི་ཟླ་མཇུག་ནས་ཕྱི་ལོའི་ཟླ་2པའི་ཟླ་མཇུག་བར་ཡིན། དེ་དག་དང་སྲོག་ཆགས་གཞན་དག་གི་ཚེ་སྲོག་གི་དྲ་བ་འདྲེས་ནས། སྐྱེ་ཁམས་ཀྱི་ཡུལ་ལྗོངས་འདྲ་མིན་སྣ་ཚོགས་ཆགས་ཡོད། །