སྤྱི་ཟླ་3པའི་ཚེས་1ཉིན་གྱི་ཞོགས་པའི་ཆུ་ཚོད་8པ་ཡོལ་མ་ཐག །ལི་ཐང་རྫོང་འཛོམ་པ་ཡུལ་ཚོ་ནས་ཡིན་པའི་ལི་ཐང་ནོར་གནག་ཐོན་ལས་གླིང་ཁུལ་གྱི་ལས་སྒྲུབ་པ་འབྲོག་པ་བློ་ཚེ་རིང་གིས་རང་འགུལ་གཟན་གཏོར་འཕྲུལ་འཁོར་བསྐོར་ནས། ལྷས་རའི་ནང་གི་ནོར་གནག་ལ་གཟན་ཆག་ཁ་གསབ་བྱེད་འགོ་བརྩམས་ཤིང་། ཁོས་གླིང་ཁུལ་གྱི་ནོར་གནག་ཚོའི་ཆ་རྐྱེན་ཤིན་ཏུ་བཟང་། དེང་རབས་ཅན་གྱི་ལྷས་ར་ཡོད་པ་མ་ཟད། ཉིན་ལྟར་དུག་སེལ་བྱེད་བཞིན་ཡོད་ལ། གཟན་ཆས་ཤིན་ཏུ་བཟང་། སྔོན་མར་ང་ཚོས་ནོར་གནག་གསོ་ཚགས་བྱེད་སྐབས་གངས་སྐྱོན་དང་གཟན་ཆས་ཆད་པར་དོགས་དགོས་ཀྱང་ད་ལྟ་དེ་འདྲ་མིན་ཞེས་བཤད།
ནོར་གནག་ཐོན་ལས་གླིང་ཁུལ་གྱི་ལས་སྒྲུབ་པ་གྱུར་པ་ནས། བློ་ཚེ་རིང་ལ་ཟླ་ཕོགས་སྒོར་5000ལྷག་གི་ཡོང་སྒོ་ཡོད་ཅིང་། སྐབས་འགར་ཅ་ལག་འབེབས་རོགས་སོགས་བྱས་ཚེ། ཡོང་འབབ་ཁ་ཁ་རྩི་བཞིན་ཡོད། གླིང་ཁུལ་འབྲོག་ལས་ཀྱི་འགན་ཁུར་མི་སྣ་ཧྥུ་ཆང་གིས་ངོ་སྤྲོད་བྱས་པ་ལྟར་ན། གླིང་ཁུལ་དུ་གསོ་ཚགས་བཟོ་པ་6ཡོད་པ་དང་། ལྷས་ར་12ཀྱི་ནོར་གནག་3000ལྷག་ལ་གཟན་སྦྱིན་བཞིན་ཡོད། ཞོགས་པའི་ཆུ་ཚོད་8པ་དང་ཕྱི་དྲོའི་ཆུ་ཚོད་4པ་ལ་གཟན་རེ་སྦྱིན་པ་དང་། “རྩྭ་ཆུ་དང་འགྲོགས་ནས་རུ་སྤོ་བ། རྩྭ་ཆུ་དང་འགྲོགས་ནས་ཕྱུགས་འཚོ་བ་”ཡི་ཕྱུགས་འཚོའི་རྣམ་པ་ཡིན་ཚེ་དགུན་གྲང་ལྷགས་ཀྱིས་ནོར་གནག་གི་ཤ་ཤེད་ཞུམ་པས་དེ་འགོག་བཞིན་ཡོད་ལ། ད་དུང་གྲང་ལྷགས་ཆེ་བའི་འབྲོག་ཁུལ་དུ་ནོར་གནག་ཚོ“དབྱར་རྒྱགས། སྟོན་ཚོ། དགུན་ཞན། དཔྱིད་འཆི་བ་”ཡི་འཁོར་སྐྱོད་ངན་པ་མེད་པར་བཟོས་ཡོད།མིག་སྔར། གླིང་ཁུལ་གྱི་འཛུགས་སྐྲུན་རྒྱ་ཁྱོན་མུའུ་ཆིག་འབུམ་ཉིས་ཁྲི་ལ་ཟིན་པ་དང་། མཐོ་སྒང་དང་ཧོ་སྙིང་། དཔོན་སྐོར་སོགས་ཡུལ་ཚོ་（གྲོང་རྡལ་）3གྱི་གྲོང་པ་22གཙོ་བོར་བྱས་ཏེ། གཞི་ཁྱོན་ལྡན་པའི་སྒོ་ནས་ནོར་གནག་མགོ་གྲངས་ཁྲི་4.89གསོ་ཚགས་དང་བཤས་གཏོང་ཚད་མགོ་གྲངས་ཁྲི་1.33ཟིན་ཡོད་པ་རེད། གླིང་ཁུལ་གྱིས་“སྣོད་བཅུད་གསོ་ཚགས་དང་ཐོན་ལས་དང་གྲོང་ཚོ་མཉམ་འདྲེས། ལྗང་མདོག་འཕེལ་རྒྱས་”ཀྱི་འདུ་ཤེས་ལ་བརྩི་སྲུང་བྱས་ནས། “ལྟེ་དབུས་ཁུལ་བཞིའི་”ཐོན་ལས་ཀྱི་བར་སྟོང་བཀོད་སྒྲིག་གཞིར་བཟུང་། “རྩྭ་འདེབས་འབྲོག་ལས་དང་ཚན་རྩལ་གསར་གཏོད། ལས་སྣོན་ཞིབ་ཚགས། སྤུས་རྟགས་ཚོང་གཉེར། རིག་ལྡན་ཞིང་ལས་”བཅས་ལྷུ་ལག་ཆེ་གྲས་ལྔ་ཕྱོགས་སྟོན་དུ་བྱས་ནས་གཅིག་སྡུད་ཅན་དང་། གཞི་ཁྱོན་ཅན། སྣོད་བཅུད་ཅན། ཕན་འབྲས་ཅན་བཅས་ཀྱི་གསོ་ཚགས་ལ་སྐུལ་འདེད་ཤུགས་ཆེན་བཏང་བ་རེད། གླིང་ཁུལ་གྱི་སྣེ་ཁྲིད་དང་རྟེན་གཞིས་སྐུལ་ཁྲིད་བྱས་པར་བརྒྱུད། འབྲོག་པའི་དབུལ་སེལ་ཕྱུག་འགྱུར་གྱི་ནང་གནས་སྒུལ་ཤུགས་ཇེ་བརྟན་དུ་ཕྱིན་པ་དང་གྲོང་གསེབ་དར་རྒྱས་གཏོང་བའི་གོམ་སྟབས་ཇེ་མགྱོགས་སུ་ཕྱིན་ཡོད་ལ། 2021ལོར་གླིང་ཁུལ་གྱི་ཕྱོགས་བསྡུས་ཐོན་རྫས་རིན་ཐང་སྒོར་དུང་ཕྱུར་2.17ཟིན་ཡོད། །