——ལིས་རྫོང་ཀམ་ཕུ་བོད་སྡེ་འགྲིམ་པའི་མཐོང་ཐོས།
ན་ནིང་གི་ཟླ་9བའི་ཚེས་4ཉིན། གསར་འགོད་པ་ལིས་རྫོང་ཀམ་ཕུ་བོད་སྡེར་ཐོན་དུས། ཀམ་ཕུ་བོད་སྡེ་ནི་མཐོ་ཞིང་བརྗིད་པའི་རྒྱབ་རི་བརྟན་པོའི་འདབས་རོལ་གྱི་སྒང་ཁུག་ཅིག་ཏུ་ཆགས་ཡོད་ལ། མདུན་ཕྱོགས་སུ་ཆུ་བོ་ཤག་ཤག་ཏུ་བཞུར་བཞིན་ཡོད་ལ། བཟོ་རྩལ་གྱི་ཁྱད་ཆོས་འབུར་དུ་ཐོན་པའི་རྡོ་བརྩིགས་མཁར་རྫོང་མང་པོ་ཀྲོང་ངེར་འགྲེང་ཞིང་།སྟོན་གཞུང་གི་ཉི་འོད་འོག་བརྗིད་ཆགས་ཤིང་གནའ་ཉམས་ཤིག་ཀྱང་ལྷང་ངེར་དོད་འདུག །
ཀམ་ཕུ་ཞེས་པ་ནི་རྒྱལ་རོང་སྐད་དུ་སྒང་འབུར་དུ་ཆགས་པའི་རུ་སྡེ་ཞེས་པའི་དོན་ཡིན་ལ། ལིས་རྫོང་ཀམ་ཕུ་ཡུལ་ཚོའི་ཁོངས་སུ་གཏོགས་ཤིང་། རྫོང་མཁར་དང་བར་ཐག་སྤྱི་ལེ་8ཡོད། བོད་སྡེ་འདིར་ཐོན་མ་ཐག །རྡོ་མཁར་གྱི་ཀློང་རིམ་འགྲིམ་པའི་སྣང་བ་ཞིག་སྟེར་འོང་ཏེ། གང་ས་གང་དུ་རྡོ་ཡི་ཁང་པ་དང་རྡོ་ཡི་སྒོ་ཆེན། རྡོ་ཡི་འགྲོ་ལམ་ཡོད་ལ། རྒྱལ་ཁང་ནས་མི་སེར་གྱི་གཞིས་ཁང་གང་ཡིན་ཡང་རྡོ་དང་ཤིང་གིས་བསྐྲུན་པ་ཞིག་ཡིན་ལ། གཞིས་ཁང་རེ་རེ་ཕན་ཚུན་ཕྲེང་བར་བརྒྱུས་པ་ལྟར་བསྐྲུན་འདུག །
ལོ་རྒྱུས་ཀྱི་དཔྱད་གཞི་ལྟར་ན། ཀམ་ཕུ་བོད་སྡེའི་མཁར་རྫོང་ནི་གནའ་བོའི་འཐབ་རྫོང་ཞིག་ཡིན་ལ། བརྩེགས་དང་པོ་ནི་དམག་འཁྲུག་སྐབས་སུ་འབྲུ་རིགས་དང་བཅའ་ལག་སྣ་ཚོགས་ཉར་ས་ཡིན་ལ། བརྩེགས་གཉིས་པར་དམག་འཁྲུག་སྐབས་སུ་མཁོ་བའི་སོ་ཁུང་དང་མདའ་ཁུང་ཕུག་ཡོད་ཅིང་། ནང་བཙན་ལ་མཐོ་བས་དགྲ་བོས་རྒོལ་དཀའ། དེང་སང་ད་དུང་མ་ཞིག་པར་ཡོད་པའི་མཁར་མང་ཆེ་བ་ནི་ས་སྐྱོང་རྒྱལ་པོ་དང་དཔོན་པོ་རྣམས་ལ་བསྐྲུན་པའི་གཞིས་ཁང་ཡིན་ལ། དབང་སྟོབས་ཀྱི་མཚོན་རྟགས་ཤིག་ཀྱང་ཡིན།
ཀམ་ཕུ་གྲོང་སྡེའི་ཀྲི་པུའུ་ཧྲུའུ་ཅི་ཞུའེ་ཅུན་གྱིས་མི་སེར་གྱི་གཞིས་ཁང་དང་མཁར་རྫོང་གང་ཡིན་ཡང་རྡོ་གཡའ་མས་བརྩིགས་ཤིང་། བོད་སྡེ་འདི་ནས་ནར་སོན་པའི་སྐྱེས་པ་ཞིག་ཡིན་ན་རྡོ་བརྩིགས་ལ་ཤིན་ཏུ་མཁས། རྡོ་ཁང་ནི་དབྱར་ཁ་བསིལ་ཞིང་དགུན་ཁ་དྲོན་མོ་ཡིན་ཞེས་བཤད།
ཀམ་ཕུ་བོད་སྡེ་ཡི་གཞིས་ཁང་རེ་རེར་རྒྱལ་རོང་གི་ཁྱད་ཆོས་འབུར་དུ་ཐོན་པས་རྒྱལ་རོང་ཡུལ་གྱི་བོད་སྡེ་དང་པོ་ཞེས་ཀྱང་འབོད། 2009ལོར། ཀམ་ཕུ་བོད་སྡེ་ནི་ཁག་བདུན་པའི་ཞིང་ཆེན་རིག་དངོས་སྲུང་སྐྱོང་སྡེ་ཁག་ཏུ་ཆོག་མཆན་བཀོད་ཡོད།
ཡིན་ནའང་། “5·12”ཝུན་ཁྲོན་ས་འགུལ་ཆེན་པོའི་སྐབས་སུ། ཀམ་ཕུ་བོད་སྡེའི་མཁར་རྫོང་དང་གཞིས་ཁང་བརྒྱ་ཆ་80ཡན་ལ་གས་ཁ་དང་ཆག་སྐྱོན་ཐེབས་ཡོད་ལ། བོད་སྡེ་འདིའི་ཁྱིམ་ཚང་100ལྷག་དང་མི་གྲངས་300ལྷག་ལ་འགྲོ་ས་དང་འདུག་ས་མེད་པར་གྱུར།
2009ལོར། སྔར་གཞིས་བསྐྱར་སྐྲུན། གསར་སྐྲུན་རྙིང་ལུགས་ཞེས་པའི་རྩ་དོན་ལྟར། སྐྲུན་རོགས་ལ་ཧུའུ་ནན་ཞིང་ཆེན་གྱིས་སྒོར་ཁྲི་4000བཏང་སྟེ། ཀམ་ཕུ་བོད་སྡེ་བསྐྱར་དུ་བསྐྲུན་མགོ་བརྩམས། དུས་ཐུང་ཟླ་6གི་རྗེས་སུ། ལོ་ངོ་སྟོང་ཕྲག་གི་ལོ་རྒྱུས་ལྡན་པའི་ཀམ་ཕུ་བོད་སྡེ་སླར་ཡང་རི་སྒང་འདི་རུ་བརྗིད་ཆགས་ངེར་བསྐྲུན་འདུག །
ཡུལ་ཚོའི་ཏང་ཨུ་དང་སྲིད་གཞུང་གིས་ཡུལ་དམག་གི་རིག་གནས་དང་མི་རིགས་ཀྱི་རིག་གནས། རྨོ་འདེབས་ཀྱི་རིག་གནས། རྡོ་ཡི་རིག་གནས་སོགས་གཞི་བྱས་ཏེ། རིག་གནས་དང་ལྗོངས་སྐོར་མཉམ་དུ་སྤེལ་བར་འབད་བརྩོན་ལྷོད་མེད་བྱས། ཞུའེ་ཅུན་གྱིས་དེང་སང་བོད་སྡེ་འདིར་སྐུ་མགྲོན་སྣེ་ལེན་ཁྱིམ་ཚང་168དང་མལ་ཁྲི་2600ཡོད་ཅེས་བཤད། སྡེ་མི་རྣམས་ཀྱིས་རྒྱལ་སྟོན་སྐབས་སུ་ཕྱོགས་བཞི་མཚམས་བརྒྱད་ཀྱི་མགྲོན་པོ་སྣེ་ལེན་ལ་སྟ་གོན་བྱེད་བཞིན་ཡོད།
དར་རྒྱས་བོད་ཁྱིམ་སྤྲོ་གསེང་ཁང་གི་སྦྱིན་བདག་གིས་སྔོན་ཆད་ཡིན་ན་མ་རྨོས་ལོ་ཏོག་དང་ཞོག་ཁོག་འདེབས་པ། ཡུལ་གཞན་དུ་ལས་གླར་འགྲོ་བ་སོགས་ཀྱི་ཡོང་འབབ་ཙམ་ལ་བརྟེན་ནས་ལྟོ་འགྲངས་ཐབས་དང་རྒྱབ་དྲོ་ཐབས་ལ་འབད་དགོས། དེང་སང་ཡིན་ན་བོད་ཁྱིམ་སྤྲོ་གསེང་ཁང་གཉེར་བ་དང་སྲེའུ་མངར་དང་ལི་སོབ་སོགས་དཔལ་འབྱོར་ཤིང་ཏོག་གི་སྡོང་པོ་བཙུགས་ཡོད་པས། ལོ་རེའི་ཡོང་འབབ་དགའ་འོས་པ་ཞིག་ཡོད་ཅེས་འཛུམ་དམུལ་དམུལ་ངང་བཤད།
དེང་སང་། ཀམ་ཕུ་བོད་སྡེའི་ཁྱིམ་ཚང་རེ་རེས་ལྗོངས་སྐོར་མགྲོན་བསུ་ཁང་དང་བོད་ཁྱིམ་སྤྲོ་གསེང་ཁང་གཉེར་ནས་སྐུ་མགྲོན་མང་པོར་བསུ་མ་བྱེད་བཞིན་ཡོད་པར་མ་ཟད། ལྗོངས་སྐོར་འཕེལ་རྒྱས་མཉམ་ལས་ཁང་བཙུགས་ཏེ། ཀམ་ཕུ་བོད་སྡེའི་ཁྱད་ཆོས་ལྡན་པའི་བཟའ་བཏུང་དང་རོལ་རྩེད། ལྗོངས་སྐོར། ཉོ་འཚོང་བཅས་མཉམ་དུ་འདྲེས་པའི་ཚོང་གཉེར་ཐབས་ལམ་སྤྱད་དེ་བདེ་སྐྱིད་ཀྱི་འཚོ་བར་སྙེག་བཞིན་འདུག ། 