སྐུ་རྗེ་སེང་ཆེན་ནོར་བུ་དགྲ་འདུལ་གྱི་བཞེངས་བསྐུལ།

སྟོབས་བཅུ་མི་འཇིགས་ཡེ་ཤེས་མེ་དཔུང་གིས།།

 མ་རུང་གདུལ་དཀའ་འཇོམས་པའི་དཔལ་འབར་བ།།

 སྣང་སྲིད་དྲེགས་པའི་རང་གཟུགས་མཐུ་བོ་ཆེ།།

 རིག་ལྡན་དྲག་པོའི་མངོན་རྟགས་བཞེངས་སུ་གསོལ།།

 མི་འཇིགས་དཔའ་སྙིང་སྟག་གི་མཆེ་སྡེར་ཅན།།

 གཡུལ་རྒྱལ་ལྷ་ཡི་བ་དན་འཛིན་པའི་གདུང་།།

 སྲིད་གསུམ་ཟིལ་གནོན་རྔམ་པའི་ངར་སྐད་ཅན།།

 འཁོར་ཚོགས་གདུལ་བྱའི་དབུས་ནས་ད་བྱོན་ཅིག །

 སྟོབས་ལྡན་སེང་གེའི་གཡུ་རལ་ངོམ་པའི་གཟིས།།

 སྣང་སྲིད་དྲེགས་པའི་ཚོགས་ཀྱང་སྐྲག་བྱེད་པའི།།

 མཆེ་སྡེར་ལན་དགུ་བསིགས་པའི་ངར་སྐད་བཅས།།

 དྲག་པོའི་སྐུ་ཡི་རང་གཟུགས་བཞེངས་ཤིག་ཀྱེ།།

 དབང་ཐང་བསོད་ནམས་འབར་བའི་རང་མདངས་ལ།།

 ཟིལ་གནོན་ཁྱུ༵ང་གི་རྩལ་གཤོག་མཐུ་རྒྱས་པ།།

 ལས་བཞི་འཕྲིན་ལས་རོལ་མོས་སྲིད་པའི་འཁོར།།

 མྱུར་སྡུད་རྟགས་ཀྱི་འཁོར་ལོར་དབང་སྒྱུར་ཤོག །

 སྙན་གྲགས་གཡུ་འབྲུ༵ག་ལྡིར་བའི་རྔམ་བརྗིད་ཀྱིས།།

 དྲག་ཤུལ་དགྲ་ལྷའི་བཙན་རྫོང་གནས་བཅས་ཏེ།།

 དབང་དྲག་གློག་གི་ཞགས་པས་སྣང་བཞིའི་སྲིད།།

 དབང་སྡུད་ཡེ་ཤེས་འཁྲུལ་འཁོར་མྱུར་ཐོབ་ཤོག །

 ཁ་ལས་དབང་ཐང་མྱུར་མགྱོག་རླུང་རྟའི་བང་།།

 ལས་བཞིའི་བསོད་ནམས་འབར་བས་མཐུ་རྫོགས་ཏེ།།

 རིགས་ལྡན་དྲག་པོའི་ཐུགས་སྟོབས་མ་ལུས་པའི།།

 འཕྲིན་ལས་མདུན་མཆོངས་གསར་བའི་དཔལ་ལ་སྤྱོན།།