སློབ་ཁྲིད་བཅོས་སྒྱུར་ཁྲོད་ཀྱི་དཀའ་གནད་ཇི་ལྟར་སེལ་བའི་སྐོར་གླེང་བ།

[གནད་བསྡུས] དཔྱད་རྩོམ་འདིར་སློབ་ཁྲིད་བཅོས་སྒྱུར་ཁྲོད་ཀྱི་དཀའ་གནད་ཇི་ལྟར་སེལ་བའི་སྐོར་གླེང་ཡོད་ལ། སློབ་ཁྲིད་བཅོས་སྒྱུར་ལ་དཀའ་གནད་གང་དག་ཡོད་པ་དང་། སློབ་ཁྲིད་བཅོས་སྒྱུར་གྱི་དཀའ་གནད་དེ་དག་བྱུང་བའི་རྒྱུ་མཚན་ཅི་ཞིག་ཡིན་པ། སློབ་ཁྲིད་བཅོས་སྒྱུར་གཏིང་ཟབ་ཏུ་སྤེལ་བར་དཀའ་གནད་ཇི་ལྟར་སེལ་དགོས་པ་བཅས་ལ་རགས་ཙམ་དཔྱད་ཡོད།

[གནད་ཚིག] བསླབ་ཚན་གསར་བ། སློབ་ཁྲིད་བཅོས་སྒྱུར། དཀའ་གནད་སེལ་ཐབས།

དང་པོ། སློབ་ཁྲིད་བཅོས་སྒྱུར་གྱི་དཀའ་གནད།

མི་ལོ་བཅུ་ཕྲག་ལྷག་གི་བསླབ་ཚན་གསར་བ་བཅོས་སྒྱུར་ཁྲོད་དུ། སློབ་གྲྭ་ཆུང་འབྲིང་གི་སློབ་ཁང་སློབ་ཁྲིད་ཐད་གཞུང་ལུགས་དང་ལག་ལེན་གཉིས་ཆ་ནས་འཕེལ་རྒྱས་ཆེན་པོ་བྱུང་ཡོད་དེ། དགེ་རྒན་ཚོར་མཚོན་ན། སློབ་ཁང་སློབ་ཁྲིད་ཁྲོད་སློབ་མ་གཞིར་འཛིན་དགོས་པའི་ངེས་ཤེས་སྐྱེས་ཡོད་པ་མ་ཟད། སློབ་ཁྲིད་ཀྱི་ཕན་འབྲས་ལ་དང་དོད་བྱེད་ཤུགས་ཇེ་ཆེར་ཕྱིན་པ་དང་བསྟུན་ནས་སློབ་ཁྲིད་ཀྱི་རྣམ་པ་དང་ཐབས་ལམ། ཁྲིད་སྟངས་མི་འདྲ་བ་ཅི་རིགས་ཤིག་བྱུང་དང་འབྱུང་བཞིན་ཡོད། ཡིན་ནའང་།འདུ་ཤེས་དང་ཐབས་ཤེས་བཅོས་སྒྱུར་བྱས་པ་ཙམ་གྱིས་སློབ་ཁང་སློབ་ཁྲིད་ཀྱི་ངོ་བོ་རྩ་བ་ནས་བསྒྱུར་དཀའ་ཞིང་།ཕན་འབྲས་ལྡན་པའི་སློབ་ཁྲིད་ཅིག་ཧ་ཅང་འཁྱོངས་དཀའ། ད་ལྟའི་སློབ་ཁང་སློབ་ཁྲིད་ཀྱི་ལག་ལེན་དངོས་ལ་བརྟགས་ཚེ། སློབ་ཁང་སློབ་ཁྲིད་ཀྱི་རྩ་གནད་དེ་སློབ་ཁྲིད་དངོས་དང་རིང་དུ་གྱེས་ཤིང་། སློབ་ཁང་སློབ་ཁྲིད་ཀྱི་གཞི་རྩའི་རྩ་གནད་ཀྱི་རིགས་ལམ་ལ་བརྟག་དཔྱད་ཞིབ་འཇུག་མི་བྱེད་པ་ནི། མིག་སྔའི་སློབ་ཁང་སློབ་གསོ་བཅོས་སྒྱུར་གྱི་བཀག་རྡོ་ལྟ་བུར་གྱུར་ཡོད། 

གཅིག ཤེས་པས་ཕྱུག་ཀྱང་ལག་ལེན་གྱིས་སྟོང་བ། 

མང་དུ་ཐོས་ཤིང་ཤེས་པས་ཕྱུག་པ་ནི་ཡོན་ཏན་ཀུན་གྱི་གཞིར་འཛིན་ཅིང་། ལེགས་ཉེས་འབྱེད་པར་དཀའ་ཞིང་ལག་ལེན་གྱིས་སྟོང་བ་ནི་སློབ་ཁང་སློབ་ཁྲིད་ཀྱི་གེགས་སུ་འགྱུར་ཉེན་ཆེ། ད་ལྟའི་བར་དུ་སྲོལ་རྒྱུན་སློབ་གསོའི་གཞུང་ལུགས་ཀྱིས་སློབ་ཁང་སློབ་གསོར་ཁ་ཕྱོགས་སྟོན་རྒྱུ་ཕར་ཞོག ཐ་ན་སློབ་གསོ་དངོས་དང་མི་མཐུན་པ་དང་། འགྲེལ་བཤད་གོ་ལྡོག་པ། རིན་ཐང་ལྟ་བ་ནོར་བ། མི་ཚེའི་གདམ་ག་འཛོལ་བ་ལྟ་བུའི་གཞུང་ལུགས་དང་ལག་ལེན་བར་འགལ་འདུ་ཆེན་པོ་བྱུང་མྱོང་། དེང་རབས་སློབ་ཁྲིད་བཅོས་སྒྱུར་གྱི་བརྡབ་གསིག་ལས་སྲོལ་རྒྱུན་སློབ་གསོའི་གཞུང་ལུགས་ལ་ཕྱིར་རྟོག་དང་དགག་བཞག་གང་མང་གནང་ཡོད་པ་མ་ཟད། སློབ་ཁྲིད་བཅོས་སྒྱུར་དང་འཕེལ་རྒྱས་ཀྱི་གེགས་སུ་འགྲོ་ཉེན་ཡོད། དགེ་རྒན་ཚོའི་སློབ་ཁྲིད་འདུ་ཤེས་འཛིན་སྟངས་བསྒྱུར་རྒྱུ་དང་། སྔོན་ཐོན་དང་དེང་རབས་ཀྱི་ཁྲིད་ཐབས་སྤྱོད་པ། ལག་ལེན་དང་ཉམས་མྱོང་གི་མྱོང་ཚོར་ལེན་པ། གཞུང་ལུགས་དང་ཤེས་རབ་ཀྱིས་སྣེ་སྟོན་བྱེད་པ་ནི་སློབ་ཁང་སློབ་ཁྲིད་འཕེལ་རྒྱས་སུ་འགྲོ་བའི་སྔོན་འགྲོའི་ཆ་རྐྱེན་ཡིན་ལ། དགེ་རྒན་རང་ངོས་ནས་སྐྱེས་སྟོབས་ཀྱི་ཤེས་རབ་དང་སྦྱངས་སྟོབས་ཀྱི་ཡོན་ཏན། ཕུན་སུམ་ཚོགས་པའི་སློབ་གསོའི་ཉམས་མྱོང་ལ་བརྟེན་ནས། གཞན་དབང་གི་ཇུས་གཏོགས་མེད་པའི་སྒོ་ནས་སློབ་ཁང་སློབ་ཁྲིད་ཀྱི་རྩ་གནད་མ་བོར་བར་ལག་ལེན་དངོས་ཀྱི་ཁྲོད་ནས་མྱོང་བ་ཕྱོགས་བསྡུས་བྱས་ཏེ། རང་རྐྱ་ཐུབ་པའི་སྒོ་ནས་སློབ་ཁྲིད་ཡང་དག་ཅན་དང་ཕན་འབྲས་ཅན། ཁྱད་ཆོས་ཅན་དང་སྤྲོ་ནུས་ཅན་ཞིག་བྱ་རྒྱུ་དེ་ཤིན་ཏུ་གལ་ཆེའོ། ། 

གཉིས། རྣམ་པ་ཙམ་ལས་སྒྲུབ་བྱེད་ཀྱིས་ཕོངས་པ། 

ཉེ་ལམ། སློབ་གྲྭ་ཆུང་འབྲིང་མང་ཆེ་བས་ཡུལ་དུས་དང་འཚམ་པའི་ཁྲིད་ཐབས་རིགས་མི་འདྲ་བ་བཅུ་ལྷག་གསར་དུ་བཙུགས་ཡོད་ན་ཡང་།“ཡོན་ཏན་མེད་པའི་ཤིང་སྐམ་ལ། ། ཅོད་པན་བཏགས་ཀྱང་ག་ལ་མཛེས། །”ཞེས་པ་ལྟར་ཕྱིའི་རྣམ་པ་རྫིག་པ་ལས་བྱེ་བྲག་གི་ནང་དོན་དང་སྒྲུབ་བྱེད་སྟོང་འདུག གཅིག་ནས་དགེ་རྒན་གྱི་ངོས་ནས་རང་གི་ཁྲིད་ཐབས་སྣ་གཅིག་ལ་བརྟེན་པ་ལས་གཞན་དཔེར་མི་བལྟ་བ། གཉིས་ནས་སློབ་གྲྭའི་ངོས་ནས་སློབ་ཁང་སློབ་ཁྲིད་ཀྱི་རྩ་གནད་དེ་ཁ་བཤད་ཙམ་ལས་བྱེ་བྲག་གི་ལག་ལེན་དུ་མི་བསྟར་བ། གསུམ་ནས་ཡང་དག་ཅིང་ཁུངས་བཙུན་པའི་སློབ་གསོའི་གཞུང་ལུགས་ལ་མི་བསྟུན་པ། བཞི་ནས་དགེ་རྒན་ལ་ལར་སློབ་ཁྲིད་ཀྱི་རྣམ་པ་དང་འཆར་ཟིན། ཐབས་ལམ་བཅས་ཀྱི་བར་མཚམས་གསལ་བོ་ཞིག་མེད་པར་ད་དུང་སྲོལ་རྒྱུན་གྱི་ཁྲིད་ཐབས་ཁོ་ནར་བརྟེན་འདུག་པ། ལྔ་ནས་དགེ་རྒན་མང་ཤོས་ཤིག་གིས་སློབ་མའི་སློབ་སྦྱོང་དང་ཡར་ཐོན་གྱི་ཆོས་ཉིད་ལ་ཞིབ་འཇུག་མི་བྱེད་པར་རང་འདོད་ཀྱིས་སློབ་ཁྲིད་བྱེད་པ་བཅས་ཀྱི་གནད་དོན་མང་དུ་མཆིས།

གང་ལྟར། སློབ་གསོའི་གཞུང་ལུགས་རྐང་ཚུགས་ཐུབ་པ་དང་། ཁྲིད་ཐབས་ཚན་རིག་དང་མཐུན་པའི་སློབ་ཁྲིད་ཀྱི་རྣམ་པ་དང་སྒྲུབ་བྱེད་ཡང་དག་པ་ཞིག་ཆགས་པ་ལ་མ་མཐའ་ཡང་གཤམ་གསལ་གྱི་ཆ་རྐྱེན་འདི་དག་ཚང་དགོས་ཏེ། གཅིག སློབ་ཁྲིད་ཀྱི་ཐོག་མའི་དམིགས་ཡུལ་ཤིན་ཏུ་གསལ་བ། གཉིས། ཁྲིད་ཐབས་ཁུངས་བཙུན་ཞིང་གཞུང་ལུགས་ཀྱི་རྒྱབ་རྟེན་ཡོད་པ། གསུམ། དོན་དངོས་དང་མཐུན་ཞིང་ཕན་ཁེ་ལྡན་པའི་སློབ་གསོའི་ཁྲིད་ཐབས་ཆ་ཚང་ཞིག་གམ། དེ་དང་འབྲེལ་བའི་སློབ་ཁྲིད་ཀྱི་འཆར་ཟིན་དང་ཐབས་ལམ་གསལ་ཞིང་དག་པ་ཞིག་མངའ་བ། བཞི། སློབ་ཁང་སློབ་ཁྲིད་ཀྱི་རྣམ་པ་འདིའི་རིགས་ལ་ཁྲིད་སྟོན་དང་དཔྱད་འཇོག་བྱེད་པའི་སྒྲིག་སྲོལ་འཐུས་ཚང་བ་ཞིག་དགོས། 

གསུམ། དོན་སྙིང་བོར་ཏེ་རྣམ་པར་ཞེན་པ། 

སློབ་ཁྲིད་ཀྱི་ནང་དོན་དང་ཁྲིད་ཐབས་བར་གྱི་འགལ་འབྲེལ་གནད་དུ་བཟུང་སྟེ། ཁྲིད་ཐབས་གང་རུང་གི་ལམ་ནས་འཁྲིད་བྱའི་ནང་དོན་གསལ་བོར་སྟོན་དགོས་ཏེ། མ་གཞི་སློབ་ཁྲིད་ཀྱི་ནང་དོན་དང་འཆར་ཟིན། དཔྱད་འཇོག་བཅས་གཞི་གཅིག་ལ་གྲུབ་ཏུ་འཇུག་པ་ནི་སློབ་ཁང་སློབ་ཁྲིད་ཀྱི་རྩ་བའི་བླང་བྱ་ཡིན་མོད། འོན་ཀྱང་དངོས་ཡོད་སློབ་ཁྲིད་ཁྲོད་དགེ་རྒན་རྣམས་ཁྲིད་ཐབས་ཀྱི་རྣམ་པ་ཙམ་ལ་གཞོལ་དྲགས་ཤིང་འཁྲིད་བྱའི་ནང་དོན་ལ་དེ་འདྲའི་དོ་སྣང་བྱེད་ཀྱིན་མེད། 

སློབ་ཁྲིད་བཅོས་སྒྱུར་གྱི་སྐབས་སུ། དགེ་རྒན་མང་པོ་ཞིག་གིས་རང་རང་གི་སློབ་ཁྲིད་ཀྱི་ངོ་བོ་དང་ནང་དོན་ཇི་བཞིན་རྟོགས་མེད་པས་དཀའ་ཁག་རབས་དང་རིམ་པར་འཕྲད་ཀྱིན་ཡོད་ལ། ཁོ་ཚོ་སློབ་ཁྲིད་བཅོས་སྒྱུར་གྱི་རྣམ་པ་ཙམ་ལ་གཡེང་སྟེ་སློབ་ཁྲིད་ཀྱི་རྩ་བའི་དོན་སྙིང་ལ་རྒྱུས་ལོན་མི་བྱེད། ཁོ་ཚོའི་སེམས་སུ་སློབ་ཁྲིད་ནི་རྩ་འཛུགས་ཤིག་དང་ལས་བགོས་ཤིག་ཏུ་ངོས་འཛིན་པ་ལས་སློབ་ཁྲིད་ཀྱི་སྙིང་བོ་ངོ་མ་དེར་བསམ་གཞིགས་གཏོང་གིན་མེད། 

དེ་བས། སློབ་ཁང་སློབ་ཁྲིད་ཀྱི་སྐབས་སུ་དགེ་རྒན་གྱིས་སློབ་ཁྲིད་རྐྱང་བར་མི་བརྟེན་པར་སློབ་མའི་རང་བདག་ནུས་པ་གསོ་སྐྱོང་དང་མཐོར་འདེགས་བྱེད་པ་དང་། དགེ་སློབ་ཕན་ཚུན་བར་བསམ་བློ་བརྗེ་རེས་བྱས་ཏེ་མཉམ་དུ་གནད་དོན་ཞིབ་བསྡུར་བྱེད་པ། སློབ་ཐུན་སྐབས་སུ་དགེ་སློབ་མཉམ་ཞུགས། མཉམ་གླེང་། མཉམ་གྲོས། མཉམ་སློབ་ཀྱི་སྒོ་ནས་བསླབ་ཚན་གྱི་ནང་དོན་དཔྱིས་ཕྱིན་པར་སྦྱོང་བ། སྤྲོ་སྣང་ལྡན་པའི་སྒོ་ནས་སློབ་ཐུན་སྐབས་ཀྱི་གནད་དོན་སུན་འབྱིན་བྱེད་པ་དང་། གནད་དོན་དབྱེ་ཞིབ་བྱེད་པ། གནད་དོན་ཐག་གཅོད་བྱེད་པ། གསོན་ཉམས་ལྡན་པའི་ཁྲིད་སྟངས་མི་འདྲ་བས་སློབ་མའི་ཡིད་ཀྱི་དང་བ་ཅིག་ཅར་དུ་འཕྲོག་པ། མཇུག་མཐར་དགེ་རྒན་གྱིས་སློབ་ཁྲིད་ལ་ཕན་འབྲས་ཅི་ཞིག་ཐོན་ཡོད་པར་རྩད་ཞིབ་བྱས་ཏེ་སློབ་ཁྲིད་ཀྱི་རྣམ་པ་ཙམ་ལ་མི་ཞེན་པར་དོན་གྱི་སྙིང་བོ་འཛིན་རྒྱུ་ནི་ཤིན་ཏུ་གལ་ཆེ། 

བཞི། ལད་ཟློས་དྲགས་པས་རང་ཉིད་བོར་བ། 

སློབ་གསོའི་ཉམས་མྱོང་བརྗེ་རེས་དང་མཉམ་འབྲེལ་གོ་སྐབས་ཇེ་མང་དུ་འགྲོ་བ། ཆ་འཕྲིན་དྲ་རྒྱ་དར་བ་དང་བསྟུན་ནས་དགེ་རྒན་དག་གིས་སྔོན་ཐོན་གྱི་སློབ་ཁྲིད་གཞུང་ལུགས་དང་ཁྲིད་དཔེ་མང་པོ་དྲ་སྟེང་ནས་མཐོང་ཐུབ་ཅིང་། དེ་ལ་སློབ་སྦྱོང་དང་ཟུར་བལྟ། ལད་ཟློས། ཕབ་བཤུ། བརྐུ་འཁྱེར། ཚུར་ལེན་བཅས་བྱེད་པ་ཇེ་མང་ནས་ཇེ་མང་དུ་འགྲོ་བས་ན། ཡོད་ཚད་གཞན་བསྟེན་དང་གཞན་བསྟུན་གྱི་ལས་ལ་བརྩོན་པ་སྤངས་ཏེ། མི་རིགས་རང་དང་སློབ་གྲྭ་རང་ལ་ཡོད་པའི་སྲོལ་རྒྱུན་གྱི་སློབ་ཁྲིད། རིག་གནས་སྙིང་སྟོབས། སྒེར་ཚུགས་སྙིང་སྟོབས། གསར་གཏོད་སྙིང་སྟོབས་བཅས་རྒྱུན་འཁྱོངས་དང་སྲུང་འཛིན་བྱ་དགོས་ལ། སློབ་གྲྭ་རང་གི་ཁྱད་ཆོས་ལྡན་ཞིང་ཕན་འབྲས་ཡོད་པའི་སློབ་ཁྲིད་ཉམས་མྱོང་ནི་ཅིས་ཀྱང་རྒྱུན་འཛིན་དང་དར་སྤེལ་གཏོང་དགོས་པ་དཔེར་ན། གཅིག སློབ་གྲྭར་མ་གཞི་ནས་ཡོད་པའི་ཁྲིད་སྲོལ་བཟང་པོ་རྒྱུན་འཁྱོངས་བྱས་ཏེ་ཕན་འབྲས་ལྡན་པའི་སློབ་ཁྲིད་ཉམས་མྱོང་དར་སྤེལ་གཏོང་བ། གཉིས། སློབ་ཁང་སློབ་ཁྲིད་ཁྲོད་ཀྱི་མི་འདང་ས་གང་ཡིན་པ་དེར་དམིགས་ཏེ་གནད་དོན་དུས་ཐོག་ཏུ་སེལ་བར་འབད་པ། གསུམ། སློབ་ཁང་སློབ་ཁྲིད་འཕེལ་རྒྱས་ཀྱི་གོ་སྐབས་དམ་འཛིན་བྱས་ཏེ་སྐབས་བསྟུན་སློབ་གསོ་ལེགས་པོར་སྤེལ་བ། བཞི། རིག་པའི་གཞུང་ལུགས་ལ་གཞི་བཅོལ་ཏེ་སློབ་ཁྲིད་གནད་དོན་ལ་དབྱེ་ཞིབ་ལེགས་པོ་བྱས་ཏེ་གནད་དོན་ཇི་ལྟར་སེལ་བའི་ཐབས་ཤེས་འཚོལ་བ། ལྔ། སྔོན་ཐོན་ཅན་གྱི་སློབ་ཁྲིད་བྱེད་ཐབས་ལག་བསྟར་བྱས་ཏེ་ཁྲིད་ཐབས་བཅོས་སྒྱུར་བྱ་དགོས། 

མདོར་ན། ཐབས་ལམ་གང་འདྲ་ཞིག་ལ་བརྟེན་རུང་། སློབ་ཁྲིད་བཅོས་སྒྱུར་གྱི་གཞི་རྩ་དེ་སློབ་གྲྭ་རང་གི་རིག་གནས་གོམས་སྲོལ་རྒྱུན་འཛིན་དང་དཔེ་ལེགས་སློབ་ཁྲིད་བཅོས་སྒྱུར། དཔེ་ཁྲིད་ཉམས་མྱོང་ཕྱོགས་བསྡུས་བྱ་རྒྱུ་དེ་ཡིན་ལ། སློབ་གྲྭ་མང་པོ་ཞིག་གིས་གཞན་ལ་ལད་ཟློས་བྱེད་པ་ལས་རང་ཉིད་མ་གཞི་ནས་བོར་བ་ནི་ཐང་གི་རྡོ་བླངས་ནས་རུམ་གྱི་བྲོ་ལྷུང་ཞེས་པའི་དཔེ་རུ་སོང་བ་མ་ཡིན་ནམ ། 

ལྔ། ཉམས་མྱོང་གི་རྒྱ་རུ་ཚུད་དེ་ཞིབ་འཇུག་ལ་མི་སྤྲོ་བ། 

བྱ་བ་གང་ཞིག་ལ་གོམས་པ་དང་བྱང་བ། དེ་ལ་རྒྱུས་མངའ་བ། དོན་ཤེས་པ། མཐིལ་རྟོགས་པ་ནི་ཡོན་ཏན་ཀུན་གྱི་མཆོག་ཏུ་བརྩིས་ཆོག་མོད། འོན་ཀྱང་ཉམས་མྱོང་ཕྲན་ཙམ་གྱི་རྒྱ་རུ་ཚུད་དེ་ང་རྒྱལ་མཛོ་འདྲ་ཞིག་ལངས་པ་དང་།ངའོ་སྙམ་པའི་ཁེངས་སེམས་ཀྱིས་ཀུན་ནས་སློང་མཁན་གྱི་སློབ་ཁང་སློབ་ཁྲིད་ལ་ཞིབ་འཇུག་ཅི་ཡང་མེད་པའི་དགེ་རྒན་ཞིག་ལ་མཚོན་ན། ཉམས་མྱོང་ཁོ་ནར་མི་བརྟེན་པར། གཅིག བསླབ་ཚན་གསར་བའི་བཅོས་སྒྱུར་གྱི་གནད་གང་ཡིན་པ་དང་བསླབ་ཚན་གསར་བའི“གསར་བ”ཡི་ཆ་དེ་གང་དུ་ཡོད་པ་རྟོགས་དགོས། གཉིས། དུས་རྒྱུན་དུ་ཁྲིད་ཐབས་གསར་བ་དང་ཁྲིད་སྟངས་གསར་བ་དང་ལེན་བྱ་དགོས། གསུམ། བསླབ་ཚན་གསར་བའི་ནང་དོན་ལ་གཏིང་ཟབ་པའི་སྒོ་ནས་ཞིབ་འཇུག་མི་གནང་བར་རང་ཉིད་ཀྱི་ཉམས་མྱོང་ལྟར་སློབ་ཐུན་དབྱེ་ཞིབ་རེ་དང་ཤེས་བྱ་འདོར་ལེན་རེ་བྱེད་པ་ནི་སློབ་ཁྲིད་ཀྱི་མཆོག་ཏུ་མི་བརྩི། བཞི།“གཞི་གཉིས་སློབ་ཁྲིད”ཀྱི་བླང་བྱ་ལྟར་རྟག་པར་བསླབ་གཞི་ལ་ཞིབ་འཇུག་དང་དབྱེ་ཞིབ་བྱ་རྒྱུར་གོམས་པར་བྱས་ཏེ་རང་ཉིད་ཀྱི་ཤེས་རྒྱ་དང་མཐོང་རྒྱ་རྒྱ་ཆེར་བསྐྱེད་དགོས། ལྔ། དགེ་རྒན་རྣམས་ཀྱིས་བསླབ་ཚན་སློབ་ཁྲིད་ཁྲོད་ཀྱི“ཤེས་བྱ”དང“རིག་སྟོབས”“འཇོན་ནུས”“སློབ་སྦྱོང”“ཡར་ཐོན”བཅས་ལ་ངེས་ཤེས་གསལ་བོ་རྙེད་དགོས་པ་མ་ཟད། ད་དུང་ཆེད་མཁས་པའི་སློབ་གསོར་གདམས་པ་ཇི་བཞིན་དུ་རྟོགས་པའི་ཁར། རང་ཚུགས་ཡོད་པའི་སྒོ་ནས་བསླབ་ཚན་ལ་ཞིབ་ཕྲའི་དབྱེ་ཞིབ་བྱ་དགོས། 

གཉིས་པ། སློབ་ཁྲིད་བཅོས་སྒྱུར་ལ་དཀའ་གནད་བྱུང་བའི་རྒྱུ་མཚན།

སློབ་ཁྲིད་བཅོས་སྒྱུར་ཁྲོད་དཀའ་གནད་འདི་དག་བྱུང་བའི་རྒྱུ་རྐྱེན་དང་། དཀའ་གནད་དེ་དག་སེལ་དཀའ་བའི་རྒྱུ་མཚན་གང་ལ་ཐུག་ཡོད་ཅེ་ན། དེ་ནི་སློབ་ཁྲིད་བཅོས་སྒྱུར་རང་ངོས་ཀྱི་རྙོག་འཛིང་རང་བཞིན་ལ་རག་ལས་ཤིང་། ལྷག་པར་དུ་སློབ་ཁྲིད་བཅོས་སྒྱུར་གྱི་རྩ་བའི་གནད་དོན་དག་ལ་རྒྱུས་གསལ་བོ་ལོན་མེད་པ་ལ་ཡང་རག་ལས་ཡོད།

གཅིག འགལ་བ་ལྟག་སྤྲོད་རིགས་ལམ་གྱི་རྒྱ་རུ་ཚུད་པ།

མིག་སྔའི་སློབ་ཁྲིད་བྱེད་སྟངས་ཀྱི་གནད་དོན་ཆེས་གཙོ་བོ་ནི་འཕེལ་རྒྱས་དོ་མི་མཉམ་པའི་གནད་དོན་དེ་རེད། བྱེ་བྲག་ཏུ་བཤད་ན་རྩིས་ཚན་དང་རིག་ཚན་དོ་མི་མཉམ་པ་དང་། གཞུང་ལུགས་དང་ལག་ལེན་དོ་མི་མཉམ་པ། སྤྱི་དང་བྱེ་བྲག་དོ་མི་མཉམ་པ། བསླབ་ཚན་སོ་སོ་དང་ཕྱོགས་བསྡུས་ནུས་ཚད་དོ་མི་མཉམ་པ། སློབ་ཐུན་དང་བསླབ་ཕྱི་དོ་མི་མཉམ་པ། ཁྲིད་དང་སློབ་དོ་མི་མཉམ་པ།སློབ་ཁྲིད་དང་འཚོ་བ་དོ་མི་མཉམ་པ། འཛིན་གྲྭའི་སློབ་ཁྲིད་དང་། མཉམ་འབྲེལ་སློབ་སྦྱོང་དང་རང་དབང་གི་སློབ་སྦྱོང་དོ་མི་མཉམ་པ། སྤྱི་སྒེར་གྱི་འཕེལ་རྒྱས་དོ་མི་མཉམ་པ་སོགས་ཀྱིས་མཚོན་པའི་དོ་མི་མཉམ་པའི་སློབ་ཁྲིད་ཀྱིས་སློབ་མའི་འཕེལ་རྒྱས་ལ་དོ་མི་མཉམ་པའི་གནད་དོན་བསླངས་པ་རེད། གནད་དོན་འདིའི་འབྱུང་རྩ་ནི་དགེ་རྒན་མང་པོ་ཞིག་གིས་སློབ་ཁྲིད་ཀྱི་སྐབས་སུ།སེམས་ཁོང་གི་དོ་མི་མཉམ་པའི་འགལ་བ་རྐྱང་རྐྱང་འཆར་ཏེ། རང་རྐྱ་ཐུབ་པའི་སློབ་ཁྲིད་ཀྱི་བསམ་བློ་དང་།སློབ་ཁྲིད་ཀྱི་འཆར་གཞི། སློབ་ཁྲིད་ཀྱི་དམིགས་འབེན། སློབ་ཁྲིད་ཀྱི་འབྲས་བུ་སོགས་སྟོན་རྒྱུ་མེད་པ་ནི། འགལ་བ་ལྟག་སྤྲོད་རིགས་ལམ་གྱི་རྒྱ་རུ་ཚུད་པས་ཡིན་ནོ། ། 

གཉིས། སློབ་གྲྭའི་རྒྱུན་སྲོལ་རིག་གནས་ཀྱི་བཀག་རྒྱ་ལས་མ་ཐར་བ།

རིག་གནས་རྒྱུན་འཛིན་གྱི་ངོས་ནས་བལྟས་ན།སློབ་ཁྲིད་བཅོས་སྒྱུར་ལ་སློབ་གྲྭའི་རིག་གནས་ཀྱི་རྒྱུན་སྲོལ་དག་སྔོན་འགྲོའི་ཆ་རྐྱེན་དུ་འཛིན་དགོས་མོད། འོན་ཀྱང་སྤྱིའི་ཆ་ནས་བལྟས་ན། ད་ཡོད་སློབ་གྲྭའི་རིག་གནས་རྣམ་པ་དང་སློབ་ཁྲིད་བཅོས་སྒྱུར་བར་དུ་འགལ་བའི་ཆ་མང་དུ་ཡོད་ལ། དགེ་རྒན་གྱི་ཁྲིད་དང་སློབ་མའི་བསླབ་གང་ཡིན་ཡང་གསར་གཏོད་ཀྱི་ནུས་པ་མེད། སྤྱོད་ལམ་ཕལ་ཆེ་བ་གཞན་གྱི་ཉམས་མྱོང་ལད་ཟློས་བྱེད་པ་ཁོ་ན་རེད། བསླབ་ཚན་གསར་བའི་སློབ་ཁྲིད་བཅོས་སྒྱུར་ནི་དཔྱོད་ཤེས་དང་ཚན་རིག་ཤེས་བྱ་རྨང་གཞི་བྱས་ཏེ། སློབ་མ་སློབ་ཁྲིད་ཁྲོད་ཟབ་ཞུགས་བྱེད་པའི་འདུ་ཤེས་དང་། གསར་གཏོད་ཀྱི་འདུ་ཤེས་སོགས་ལ་བརྟེན་ནས་སློབ་ཁྲིད་བཅོས་སྒྱུར་ཁྲོད་ཀྱི་དཀའ་གནད་སེལ་བར། ད་ཡོད་སློབ་གྲྭའི་རིག་གནས་ཀྱི་རྣམ་པ་ངེས་པར་ལེགས་བཅོས་དང་བཅོས་སྒྱུར་གཏོང་དགོས་ལ། དེའི་གནད་གཙོ་བོ་ནི་སློབ་གྲྭ་ལས་གཞན་དུ་མེད་པས། དགེ་རྒན་རྣམས་ཀྱིས་དེང་རབས་ཅན་དང་གསར་གཏོད་རང་བཞིན་གྱི་རིག་གནས་སྤུས་ཚད་གསོ་སྐྱོང་བྱ་རྒྱུ་ནི་ཤིན་ཏུ་འགངས་ཆེ་བར་མཐོང་།

གསུམ།“གཞི་གཉིས”སློབ་ཁྲིད་ཀྱི་མཐོང་རྒྱའི་བཀག་རྒྱ་ཆེ་བ།

དུས་རབས20པའི་ལོ་རབས70པ་ནས་བཟུང་སྟེ། རང་རྒྱལ་དུ་རྨང་གཞིའི་ཤེས་བྱ་དང་རྩ་བའི་ནུས་རྩལ་གཉིས་གཞི་རྩར་འཛིན་པའི“གཞི་གཉིས”སློབ་ཁྲིད་གཙིགས་སུ་བཟུང་ཡོད་དེ། གཅིག བསླབ་གཞིའི་བྱང་ཚད་དང་འགྲེལ་བརྗོད་ནས་སློབ་ཁྲིད་དམིགས་ཡུལ་དབྱེ་ཞིབ་དང་གཏན་འབེབས་བྱེད་པ། གཉིས། སློབ་ཁྲིད་ནང་དོན་ལྟར་སྒྲིག་འགོད་གྲལ་དག་བྱས་ཏེ་ཁྲིད་ཐབས་གདམ་གསེས་བྱེད་པ། གསུམ། དཔེ་ལེགས་ཅན་གྱི་སློབ་ཐུན་མ་དཔེ་ཚད་གཞིར་བཟུང་སྟེ་སློབ་ཁྲིད་ལ་གདེང་འཇོག་བྱེད་པ། བཞི། སློབ་གྲྭ་ཆུང་འབྲིང་གི་སློབ་ཁང་སློབ་གསོ་ཚད་ལྡན་དང་སྤུས་དག་ཡོང་བར“གཞི་གཉིས” སློབ་ཁྲིད་ཀྱིས་གསུབ་ཏུ་མེད་པའི་དགེ་མཚན་ཐོན་དགོས། ལྔ། དགེ་རྒན་རྣམས་བསླབ་ཚན་སློབ་ཁྲིད་བཅོས་སྒྱུར་གྱི་བྱ་གཞག་ལ་ཐོག་མར་འཇུག་པའི་སྐབས་སུ། སྤྱིའི་དོན་སྙིང་ལ་དོ་སྣང་དང་བསམ་གཞིག་གཏོང་དགོས། དྲུག དགེ་རྒན་དག་གིས་སྔར་བཞིན་ཤེས་བྱ་ཐར་ཐོར་རེ་ཁྲིད་པ་དང་སློབ་མའི་རྒྱུགས་སྤྲོད་འཇོན་ནུས་སྐྱེད་སྲིང་བྱེད་པ་དང་སློབ་གསེང་སྦྱོང་བརྡར་སློབ་ཁྲིད་ཀྱི་སྙིང་བོར་འཛིན་པར་གོམས་མི་རིགས། བདུན། དགེ་རྒན་ཁོ་ནའི་ཁྲིད་ལ་བརྟེན་པ་ལས་དགེ་སློབ་བར་ལ་རྩད་བསྡུར་མེད་པ།བརྒྱད། ཡོད་ཚད་རྒྱུགས་འབྲས་ཁོ་ནས་ཐག་ཆོད་པར་དགོངས་ཏེ། སློབ་མའི་སློབ་སྦྱོང་གི་འགན་ཁུར་ཉིན་རེར་ཇེ་ལྕིར་འགྲོ་བ། དེ་བས། སློབ་ཁྲིད་བཅོས་སྒྱུར་གཏིང་ཟབ་ཏུ་སྤེལ་བ་ལ་ཐོག་མར་དགེ་རྒན་དག་གིས“གཞི་གཉིས” སློབ་ཁྲིད་དང་བསླབ་ཚན་གྱི་གཞི་རྩའི་གྲུབ་ཚུལ། བསླབ་ཚན་གྱི་ངོ་བོའམ་སྙིང་བོ་སློབ་ཁྲིད་ཀྱི་གནད་དོན་དབྱེ་ཞིབ་ཡོད་པའི་སྒོ་ནས་བློ་རྒྱ་དང་མཐོང་རྒྱ་ཇེ་ཆེར་བསྐྱེད་དགོས།

བཞི། སློབ་ཁྲིད་ཀྱི་ཐོག་མའི་རྩ་གནད་ལ་ཞིབ་འཇུག་མེད་པ།

ཁ་ན་ཏའི་སློབ་གསོ་པ་གྲགས་ཅན་མེར་ཁེར་ཧྥུ་ལན（M.Fullan）གྱིས“གནད་དོན་ནི་ང་ཚོའི་གྲོགས་པོ་ཡིན་པ”དང་།“ང་ཚོས་ཧུར་ཐག་སྒོས་ཐག་གཅོད་དཀའ་བའི་གནད་དོན་དངོས་འཚོལ་བ་དང་། དེའི་ཕྱོགས་ལ་བསམ་གཞིག་ཟབ་མོ་བཏང་ན། ད་གཟོད་རྙོག་འཛིང་གི་གནད་དོན་དག་ཇི་ལྟར་ཐག་གཅོད་དགོས་པའི་ཐབས་ལམ་ཡག་ཤོས་རྙེད་ངེས”ཞེས་པ་ལྟར། སློབ་ཁྲིད་བཅོས་སྒྱུར་ལ་ཐབས་ཤེས་གང་འདྲ་ཞིག་འཐེན་རུང་།སློབ་ཁྲིད་རང་ངོས་ཀྱི་གནད་དོན་དག་ནམ་ཡང“ཐོག་མའི་རྩ་གནད”དུ་འཛིན་དགོས་མོད། འོན་ཀྱང་། དངོས་ཡོད་སློབ་ཁྲིད་བཅོས་སྒྱུར་གྱི“རྩ་གནད”མང་ཤོས་ནི་སློབ་ཁྲིད་ལས་རིང་དུ་གྱེས་ཏེ། བླང་དོར་དཔྱད་འཇོག་གང་ཡང་མེད་པར་སློབ་ཁྲིད་ཀྱི་གཞུང་ལུགས་དང་སློབ་ཁྲིད་ཐབས་ལམ་གསར་བ་ཚུར་ལེན་པ་ལས། སློབ་ཁྲིད་རང་གི་གནས་སྟངས་དང་གནད་དོན་ལ་བློ་ཞིབ་མོས་དཔྱད་པ་མི་གཏོང་། སློབ་ཁྲིད་བཅོས་སྒྱུར་གྱི་རྩ་གནད་གང་ཡིན་པ་དང་དེ་སློབ་ཁྲིད་དངོས་དང་རིང་དུ་གྱེས་མི་ཉན་པ་དང་དེ་སློབ་ཁྲིད་བཅོས་སྒྱུར་གྱི་དཀའ་གནད་གླེང་བའི་སྐབས་སུ་འཆད་ཟིན་པས་འདིར་བསྐྱར་དུ་མི་ཞུ་བར་བྱ།

གསུམ་པ།“སློབ་ཁྲིད”བཅོས་སྒྱུར་ཁྲོད་ཀྱི་དཀའ་གནད་སེལ་ཐབས།

རང་རྒྱལ་གྱི་བསླབ་ཚན་གསར་བའི་འཆར་འགོད་ཚོད་ལྟ་སྤེལ་བ་ནས་བཟུང་སློབ་ཁང་སློབ་གསོའི་ཕན་འབྲས་ཡག་པོ་ཞིག་ཐོན་པར་དགེ་སློབ་ཀུན་གྱིས་གཙིགས་མཐོང་བྱེད་བཞིན་ཡོད་ལ། ཕན་འབྲས་ཅན་གྱི་སློབ་ཁྲིད་བྱེད་པ་ལ་ཐོག་མར་སྲོལ་རྒྱུན་སློབ་ཁང་སློབ་ཁྲིད་ཀྱི་འདུ་ཤེས་བཅོས་སྒྱུར་བྱས་ཏེ། རྣམ་པ་གསར་བ། ཇུས་གཞི་ལེགས་པོ། ཐབས་ལམ་ཡག་ཤོས་བཅས་ཁྲིད་ཐབས་གསར་བ་སྤྱད་དེ་སློབ་མའི་བློ་རིག་གི་སྒོ་མོ་འབྱེད་པ་དང་། སློབ་གསོ་འཕེལ་རྒྱས་ཀྱི་ཆོས་ཉིད་དང་། སློབ་ཁྲིད་བཅོས་སྒྱུར་གྱི་གཞུང་ལུགས་དང་བསྟུན་པ། སློབ་མའི་བློ་སྦྱོང་ལ་ཡར་ཐོན་འབྱུང་ངེས་ཀྱི་སློབ་ཁྲིད་བཅོས་སྒྱུར་ཁྲོད་ཀྱི་དཀའ་གནད་སེལ་ཐབས་ཙམ་གླེང་ན།

གཅིག “བསླབ་ཚན”ངོས་འཛིན་གྱི་དཀའ་གནད་སེལ་དགོས་པ།

སློབ་ཁྲིད་བཅོས་སྒྱུར་གྱི་ཁྲོད་དུ་དགེ་རྒན་རྣམས་ལ་སྲོལ་རྒྱུན་ཁོ་ན་མ་ཡིན་པར་དེང་རབས་ཁྲིད་སྟངས་ཀྱི་ངེས་ཤེས་ཟབ་མོ་ཞིག་དང་མིག་ཤེས་རྣོན་པོ་ཞིག་ཡོད་དགོས་ལ། བསླབ་ཚན་ལ་གོ་བ་ཟབ་མོ་ལོན་པ་དང་སློབ་ཁྲིད་ནང་དོན་ལ་བྱང་ཆ་ཡོད་པའི་ཁར་སློབ་ཁྲིད་ཀྱི་བརྗོད་བྱའི་སྙིང་བོ་བློ་ལ་གསལ་ལེར་འཆར་བ། ཤེས་བྱ་དང་བསམ་གཞིག འཇོན་ནུས་གསུམ་ནི་བསླབ་ཚན་སློབ་ཁྲིད་ཀྱི་གྲུབ་ཆ་གསུམ་ཡིན་ལ། སློབ་མས་ཤེས་བྱ་བསྡུ་གསོག་བྱས་ཚུལ་དང་བསླབ་ཚན་ལ་བསམ་གཞིག་བཏང་ཚུལ། དགེ་སློབ་གཉིས་ཀྱིས་སློབ་ཁྲིད་སྐབས་འཇོན་ནུས་ག་འདྲ་འདོན་ཚུལ་ནི་བསླབ་ཚན་ངོས་འཛིན་ཁྲོད་ཀྱི་དཀའ་གནད་གཙོ་བོ་ཡིན། བསླབ་ཚན་གསར་བའི་འཆར་འགོད་ཁྲོད་ཤེས་བྱ་ངོས་འཛིན་བྱེད་སྟངས་གསར་བ་ཞིག་ཡོད་པ་ནི།

བསླབ་ཚན་གྱི་ཤེས་བྱ་ལ་དབྱེ་ན། བསླབ་ཚན་རང་ངོས་ཀྱི་ཤེས་བྱ་དང་བསླབ་ཚན་ལས་བརྒལ་བའི་ཤེས་བྱ།ཁྲིད་མ་ཐག་ཏུ་གསལ་ཐག་ཆོད་པའི་ཤེས་བྱ། ཡོངས་གྲགས་མ་ཡིན་པའི་ཤེས་བྱ། ཁྱབ་རྒྱ་དང་བསྟན་བྱ་སྣ་མང་ཅན་གྱི་ཤེས་བྱ། ཁྱབ་རྒྱ་ཆུང་ལ་བསྟན་བྱ་ངེས་ཅན་ལས་མེད་པའི་ཤེས་བྱ། གཞུང་ལུགས་དང་འབྲེལ་བའི་ཤེས་བྱ།ཉམས་མྱོང་རྫོགས་པའི་ཤེས་བྱ་བཅས་ཤེས་བྱའི་རིགས་ཤིན་ཏུ་མང་ལ། བསླབ་ཚན་སློབ་ཁྲིད་བྱེད་མཁན་གྱི་དགེ་རྒན་ཞིག་ལ་མཚོན་ན། བསླབ་ཚན་སློབ་ཁྲིད་ཁྲོད་ཀྱི་ཤེས་བྱ་དངོས་དང་བསླབ་ཚན་གྱི་སྤྱི་དོན་ཤེས་བྱ། ཇུས་གཞིའི་ཤེས་བྱ། ཕྱིར་རྟོག་གི་ཤེས་བྱ་བཅས་བཞི་བོ་ཅིས་ཀྱང་ངོས་འཛིན་གསལ་བོ་གནང་དགོས་ཏེ། བསླབ་ཚན་ཤེས་བྱ་མ་ལུས་པ་ཁོང་དུ་ཆུད་པར་བྱས་ཏེ་ཤེས་བྱའི་ཁྱབ་ཁོངས་དང་། ཤེས་བྱའི་རྣམ་གྲངས། ཤེས་བྱའི་གནད་བསྡུས། ཤེས་བྱའི་ངོ་བོ། ཤེས་བྱའི་གྲུབ་སྟངས་སོགས་ལ་བསམ་གཞིག་ཡང་དག་གཏོང་བ་ནི་བསླབ་ཚན་ངོས་འཛིན་གྱི་ཐབས་ལམ་གཙོ་བོ་ཡིན་ལ། བསླབ་ཚན་གྱི་ཤེས་བྱ་རེ་རེའི་གྲུབ་ཆ་དང་འབྱུང་ཁུངས། ཁྱབ་ཁོངས། བསྟན་དོན་གྱི་ཆ། གོ་དོན་གྱི་ཆ། བྱེད་ནུས་ཀྱི་ཆ། སྤྱི་ཚོགས་ཀྱི་ཆ། ལོ་རྒྱུས་ཀྱི་ཆ། རྙོག་འཛིང་གི་ཆ། བདེན་དོན་གྱི་ཆ་བཅས་ལ་གོ་བ་གཏིང་ཟབ་ལེན་དགོས།

འཇོན་ནུས་ལ་དབྱེ་ན། བསླབ་ཚན་སློབ་ཁྲིད་ལས་དགེ་རྒན་གྱིས་ཅི་ཞིག་འཇོན་ནུས་པ་དང་སློབ་མས་ཅི་ཞིག་འཇོན་སོང་བ་གཉིས་སུ་དགར་ཆོག་ལ། འདིར་འཇོན་ནུས་ཟེར་བ་ནི་སློབ་ཁྲིད་གཅིག་ལས་དགེ་སློབ་གཉིས་ལ་ཡིད་འཛིན་ག་འདྲ་ཡོད་པ་དང་། བསླབ་ཚན་ལ་རྒྱུས་ལོན་ག་འདྲ་གནང་སོང་བ། ཤེས་བྱ་དེར་བཀོལ་སྤྱོད་ཀྱི་རིན་ཐང་ག་འདྲ་ཡོད་པ། འཁྲིད་བྱའི་ནང་དོན་ལ་དབྱེ་ཞིབ་དང་བསམ་གཞིག་ག་འདྲ་གནང་བ། སློབ་ཁྲིད་ལ་གདེང་འཇོག་ག་འདྲ་ཐོབ་པ། གསར་སྐྲུན་ག་འདྲ་གནང་བ་བཅས་བསམ་གཞིག་གནད་དུ་ཐིངས་པ་བཏང་སྟེ། གོང་གི་འཇོན་ནུས་དེ་དག་སློབ་ཁྲིད་ལག་ལེན་དུ་བསྟར་ཐུབ་པ་ཡིན་ཚེ་བསླབ་ཚན་ངོས་འཛིན་གྱི་དཀའ་གནད་ཡོངས་སུ་སེལ་སོང་བ་ཡིན།

གཉིས། སློབ་སྦྱོང་ངོས་འཛིན་གྱི་དཀའ་གནད་སེལ་དགོས་པ།

སློབ་ནི་ཁྲིད་པའི་དམིགས་ཡུལ་ཡིན་ལ། ཁྲིད་ནི་སློབ་པའི་གཞི་རྩ་ཡིན་པས། སློབ་མའི་སློབ་སྦྱོང་གི་གནས་ཚུལ་ལ་རྒྱུས་དཔྱིས་ཕྱིན་པ་བླངས་ཏེ་སློབ་ཁྲིད་གཞི་བྱས་ཁྲིད་ཐབས་སྣ་ཚོགས་པར་བསྟེན་པ་ནི་སློབ་ཁྲིད་བཅོས་སྒྱུར་གྱི་སྔོན་འགྲོའི་རྨང་གཞི་ཡིན་ལ། དེང་རབས་སློབ་སྦྱོང་གཞུང་ལུགས་ལ་ཐབས་ལམ་རིང་ལུགས་ཀྱི་སློབ་སྦྱོང་དང་། ཤེས་རྟོགས་རིང་ལུགས་ཀྱི་སློབ་སྦྱོང་། མི་གཞི་རིང་ལུགས་ཀྱི་སློབ་སྦྱོང་། གསར་གཏོད་རིང་ལུགས་ཀྱི་སློབ་སྦྱོང་བཅས་སློབ་སྦྱོང་གི་རིགས་མི་འདྲ་བ་མང་སྟེ། སློབ་ཁྲིད་ཀྱི་བརྒྱུད་རིམ་ཁྲོད་དགེ་རྒན་ཚོ་ཐབས་ལམ་རིང་ལུགས་ཀྱི་སློབ་སྦྱོང་ལ་མགོ་འཁོར་ཏེ། སློབ་ཁྲིད་སྐབས་སུན་སྣང་མེད་པར་བསླབ་ཚན་ཤེས་བྱ་འགྲེལ་བརྗོད་བྱེད་པ་དང་། ཁ་རྒྱུགས་ནས་ཡིག་རྒྱུགས་ལེན་པ། ལས་བྱ་ནས་ལས་བྱ་བྲི་བ། བསྐྱར་སྦྱངས་ནས་བསྐྱར་སྦྱོང་བྱེད་པ་སོགས་སློབ་མའི་སློབ་སྦྱོང་གི་གནས་སྟངས་ལ་འགྱུར་བ་ཅི་ཡང་མེད་པར་ལུས། དེ་བས། སློབ་ཁྲིད་བཅོས་སྒྱུར་གྱི་དཀའ་གནད་སེལ་དགོས་ན། དགེ་རྒན་གྱིས་ངེས་པར་དུ་བསླབ་ཚན་གྱི་ནང་དོན་བྱང་ཆུབ་པར་བྱས་ཏེ་སློབ་ཁྲིད་གོ་རིམ་ལྡན་པ་དང་། ཆོས་ཉིད་དང་མཐུན་པ། ཐབས་ཤེས་ཡོད་པ། འབྲེལ་འདྲིས་ཆེ་བ། གླེང་མོལ་བྱེད་པ།བརྗེ་རེས་བྱེད་པ། སྐུལ་ལྕག་ནུས་པ་ལྡན་པ། སྤྲོ་བ་ཡོད་པའི་ངང་སློབ་སྦྱོང་བྱེད་ཐུབ་པ་དང་། སློབ་མས་བསླབ་ཚན་ལ་བསམ་གཞིག་དང་སློབ་སྦྱོང་། ཞིབ་བསྡུར་བྱེད་སྟངས་ལ་སོགས་པའི་གནད་དོན་དག་ལ་ཞིབ་འཇུག་མཐའ་ཆོད་པ་ཞིག་བྱེད་ཐུབ་ཚེ་སློབ་སྦྱོང་གི་དཀའ་གནད་སེལ་བ་ཡིན།

གསུམ།“ཡར་ཐོན”ངོས་འཛིན་གྱི་དཀའ་གནད་སེལ་དགོས་པ། 

སློབ་སྦྱོང་དང“ཡར་ཐོན”ནི་ད་ལྟའི་བསླབ་ཚན་གསར་བའི་གཞུང་ལུགས་སུ་འཆད་པའི་སློབ་ཁྲིད་བཅོས་སྒྱུར་གྱི་བརྗོད་བྱ་གཙོ་བོ་ཡིན་ལ། སློབ་མས་སློབ་ཐུན་དུ་ཇི་ལྟར་སློབ་སྦྱོང་བྱེད་པ་དང་ཇི་ལྟར་ཡར་ཐོན་ཡོང་བ་ནི་སློབ་ཁྲིད་བཅོས་སྒྱུར་གྱི་གཞི་འཛིན་ས་གཙོ་བོ་གཉིས་ཀྱང་ཡིན། གལ་སྲིད། ངེད་ཅག་གིས་སློབ་མའི་སློབ་སྦྱོང་ཇི་ལྟར་བྱེད་པའི་ཚུལ་ཇི་བཞིན་དུ་མ་རྟོགས་ན། སློབ་མ་ཇི་ལྟར་ཡར་ཐོན་ཡོང་བ་དང་འབྲེལ་བའི་གནད་དོན་དག་ཇི་བཞིན་རྟོགས་ཐབས་བྲལ་ལོ། ། སྐད་ཅིག་སྐད་ཅིག་ལ་འགྱུར་འགྲོ་བ་ནི་དངོས་པོའི་ཆོས་ཉིད་ཡིན་པས་གཏན་འཇགས་མ་ཡིན་པ་དངོས་པོའི་གནས་སྟངས་ཏེ། འགྲོ་བ་མིའི་རིགས་ཀྱང་འདུས་བྱས་སུ་གཏོགས་ལ་དངོས་པོ་མི་རྟག་པ་ཡིན་པས་འཇིག་སླ་ལ་འཕེལ་ཡང་སྐྱེན། མིའི་ཡར་ཐོན་གྱི་ཆ་དེའང་གཏན་འཇགས་མ་ཡིན་པ་ལས་བྱུང་བ་ཡིན་ཏེ། སློབ་གསོ་དང་སློབ་ཁྲིད། ཡར་ཐོན་གསུམ་ཡང་གཏན་འཇགས་མ་ཡིན་པའི་ཀྱག་ཀྱོག་གི་སློབ་གསོའི་བརྒྱུད་རིམ་ལས་བྱུང་བ་ཡིན་པས། ཡར་ཐོན་གཙང་མ་ཞིག་གམ་ཡར་ཐོན་གཏན་འཇགས་ཤིག་ཡོང་དགོས་ན། སློབ་གསོའི་གཞུང་ལུགས་ལ་རྒྱུན་མི་ཆད་པར་སློབ་སྦྱོང་ཡག་པོ་བྱས་ཏེ་སློབ་གསོའི་ཉམས་མྱོང་ལ་ཕྱོགས་སྡོམ་དང་། སློབ་ཁྲིད་ལག་ལེན་ཞིབ་འཇུག སློབ་ཁྲིད་ཐབས་ལམ་ལ་དབྱེ་ཞིབ། སློབ་ཁྲིད་རྣམ་པ་བསྒྱུར་བཅོས། སློབ་ཁྲིད་དམིགས་ཡུལ་གཏན་འབེབས། སློབ་ཁྲིད་ཇུས་འགོད་གསར་གཏོད། སློབ་ཁྲིད་བརྒྱུད་རིམ་དབྱེ་ཞིབ། སློབ་ཁྲིད་ཧྲིལ་བོ་སྤྱི་སྡོམ་བཅས་བྱས་ཏེ། སློབ་མའི་སློབ་ཉན་གྱི་ཕན་འབྲས་དང།ལྟ་ཀློག་གི་ནུས་པ། བསམ་གཞིག་གི་ཚད་རིམ། སློབ་སྦྱོང་གི་འཇོན་ནུས། གསར་གཏོད་ཀྱི་འཇོན་ནུས། ལག་ལེན་གྱི་འཇོན་ནུས་སོགས་འཕེལ་རྒྱས་སུ་སོང་ཚེ། སློབ་ཁྲིད་བཅོས་སྒྱུར་རྩ་བ་ནས་འཕོ་འགྱུར་ཆེན་པོ་བྱུང་བ་ཡིན་ལ། སློབ་ཁྲིད་ཀྱི་སྤུས་ཚད་ཡར་ཐོན་དང་གོང་འཕེལ་དུ་སོང་བའང་ཡིན་པས་སློབ་ཁྲིད་བཅོས་སྒྱུར་གྱི་དཀའ་གནད་ཡོངས་སུ་སེལ་བ་ཡིན་ནོ། །

* བསོད་ནམས་རྡོ་རྗེ། མཚོ་ལྷོ་ཁུལ་སློབ་གསོ་སློབ་ཁྲིད་ཞིབ་འཇུག་ལྟེ་གནས་སུ་ཕྱག་ལས་གནང་བཞིན་ཡོད།