[གནད་བསྡུས] 2021ལོའི་རྒྱལ་ཡོངས་གཅིག་གྱུར་མཐོ་རྒྱུགས་རྩིས་ཚན་ཕྱོགས་བསྡུས་ཁ་པའི་སྐྱེ་དངོས་ཀྱི་རྒྱུགས་གཞིའི་ནང་དུ། མཐོ་རྒྱུགས་གདེང་འཇོག་མ་ལག་གཞིར་བཟུང་ཞིང་འགག་རྩའི་ནུས་པར་བརྟག་དཔྱད་བྱ་རྒྱུར་དམིགས་ཏེ་སྐྱེ་དངོས་རིག་ཚན་གྱི་ཁྱད་ཆོས་མངོན་ པར་བྱས་ཡོད། རྒྱུགས་གཞི་བརྟན་པོ་ཡོང་བ་བྱ་རྒྱུ་གཙོ་བོར་བཟུང་ནས་ཉེ་བའི་ལོ་ཤས་རིང་གི་འདྲི་གཞིའི་རྣམ་པ་དང་མཚོན་སྟངས་སོགས་རྒྱུན་མཐུད་དང་། སློབ་མའི་ངོས་འཛིན་ཆུ་ཚད་དང་ཉེ་བར་བཅར་བ། རྨང་གཞི་རང་བཞིན་དང་ཕྱོགས་བསྡུས་རང་བཞིན། ཉེར་སྤྱོད་རང་བཞིན། གསར་གཏོད་རང་བཞིན་བཅས་ཀྱི་ཕྱོགས་བསྡུས་རྟོག་ཞིབ་ལ་དོ་སྣང་བྱས་ཡོད། རྒྱུགས་ཤོག་ཧྲིལ་བོ་ནི་གདམ་གསེས་འདྲི་གཞི་དྲུག་དང་། ངེས་སྦྱོང་འདྲི་གཞི་བཞི་དང་འདེམ་སྦྱོང་འདྲི་གཞི་གཉིས་ཀྱིས་གྲུབ། རྩོམ་འདིར2021ལོའི་རྒྱལ་ཡོངས་གཅིག་གྱུར་མཐོ་རྒྱུགས་རྩིས་ཚན་ཕྱོགས་བསྡུས་ནུས་པའི་རྒྱུགས་གཞི་ལས་རྒྱུགས་ཤོག་ཁ་པའི་སྐྱེ་དངོས་ཀྱི་འདྲི་གཞི་ཧྲིལ་བོར་དཔྱད་ཞིབ་བྱས་ཡོད།
[གནད་ཚིག] མཐོ་རྒྱུགས། སྐྱེ་དངོས། རྒྱུགས་གཞི། དཔྱད་ཞིབ།
* ནམ་མཁའ་འཚོ། དབྱངས་ཅན་འཚོ། མཚོ་སྔོན་དགེ་འོས་སློབ་ཆེན་ཚེ་སྲོག་ཚན་རིག་སློབ་གླིང2021ལོའི་སྐྱེ་དངོས་སློབ་གསོའི་རབ་འབྱམས་ཞིབ་འཇུག་སློབ་མ།
① 教育部考试中心，中国高考评价体系说明[M]人民教育出版社2019.
2021ལོའི་མཐོ་རྒྱུགས་སྐྱེ་དངོས་རྒྱུགས་གཞིས་སྤྱོད་ཡོན་ལྡན་པའི་མི་སྣ་གསོ་སྐྱོང་བྱེད་པ་རྩ་བར་བཟུང་ཞིང་། རང་རྒྱལ་གྱི་མཐོ་རྒྱུགས་གདེང་འཇོག་མ་ལག་གསལ་བཤད①གཞིར་བཟུང་ནས་བསླབ་ཚན་གྱི་ངོ་བོར་མཐུན་པའི་སྣང་ཡུལ་གསར་འཛུགས（创设情境）བྱས་འདུག དེ་མིན་ཉེ་བའི་ལོ་འགའི་རིང་གི་རྒྱུགས་གཞིའི་རྣམ་པ་རྒྱུན་འཁྱོངས་བྱས་ཡོད་དེ། བརྟན་བརླིང་གཙིགས་འཛིན་དང་བརྟན་པོའི་ངང་འཕེལ་རྒྱས་འབྱུང་བ། སློབ་མའི་ལྟེ་གནད་བྱང་ཚད（核心素养）སྐྱེད་སྲིང་དང་མཐོར་འདེགས་གཏོང་རྒྱུར་མཛུབ་སྟོན་བྱས་པ་སོགས་བརྒྱུད་དེ། མཐོ་རྒྱུགས་ཕྱོགས་བསྡུས་བཅོས་སྒྱུར་དང་བརྟན་བརླིང་ངང་མཐོ་འབྲིང་གི་སློབ་ཐུན་བཅོས་སྒྱུར་ཕྱོགས་ལ་སྐུལ་འདེད་གཏོང་རྒྱུར་གཞོགས་འདེགས་བྱས་ཡོད། རྒྱུགས་བྱང་གི་ཁྱད་ཆོས་དང་དེའི་དབྱེ་ཞིབ་གཤམ་གསལ་ལྟར།
དང་པོ། འདྲི་གཞིའི་ནང་དོན་ལ་གོ་བ་ལེན་པ་དང་དཔྱད་གླེང་ནུས་པ་བསྲིང་རྒྱུ་དམིགས་སུ་བཟུང་བ།
2021ལོའི་མཐོ་རྒྱུགས་སྐྱེ་དངོས་རྒྱུགས་གཞི་ལས་འདེམ་སྦྱོང་གི་ཁག་ལ་པར་རིས་དང། ནང་དོན་གཞན་དག་ནི་ཡི་གེ་རྐྱང་བས་ཞིབ་བརྗོད་བྱས་ཡོད། དེས་སློབ་མའི་ཡི་གེ་ཀློག་འདོན་གྱི་ཚོར་སྐྱེན་ཚད་ལ་བརྟག་དཔྱད་ཐུབ་སྟེ། དཔེར་ན་གདམ་གསེས་ཡོད་ཚད་དང་ངེས་པར་དུ་ལན་འདེབས་དགོས་པའི་འདྲི་གཞི་ལྟ་བུ་དང། ཕྱོགས་གཞན་ནས་ཞིབ་བརྗོད་ཀྱི་ཡང་དག་ཚད་ལ་བརྟག་དཔྱད་ཐུབ་པ་སྟེ། དཔེར་ན་རྒྱུགས་ཨང་སུམ་ཅུ་པར་དངོས་བཤེར་མཇུག་འབྲས་ལ་ཕྱོགས་སྡོམ་བྱེད་དགོས་པ་ལྟ་བུའོ། །
རྒྱུགས་གཞིའི་རྩ་གནད་ལས།“འདོན་སྤྲོད་བྱས་པའི་རྒྱུ་ཆའི་ཁྲོད་འབྲེལ་ཡོད་སྐྱེ་དངོས་རིག་པའི་ཆ་འཕྲིན་སྡུད་ལེན་བྱེད་ཐུབ་ལ། ཆ་འཕྲིན་འདི་དག་བཀོལ་སྤྱོད་ཀྱང་བྱེད་ཆོག་པ་མ་ཟད། ད་དུང་སྦྱངས་ཟིན་པའི་ཤེས་བྱར་འབྲེལ་ནས་སྐྱེ་དངོས་རིག་པའི་འབྲེལ་ཡོད་གནད་དོན་ཡང་ཐག་གཅོད་བྱེད་ཐུབ།”①ཅེས་པ་ལྟར། རྒྱུགས་ཨང་སུམ་ཅུ་པས་རྒྱུགས་སྤྲོད་སློབ་མར་འདྲི་གཞིའི་ནང་དོན་ལས་འགྲན་རྩོད་ཕྱིར་ཕུད་ཀྱི་རྩ་བའི་རིགས་པར་རྒྱུས་ལོན་དང་སྡུད་ལེན་བྱས་རྗེས་ད་གཟོད་ལན་འདེབས་དགོས་པའི་བླང་བྱ་བཏོན་ཡོད་པ་རེད།
གཉིས་པ། ཤེས་བྱ་ཚད་ལེན་གྱི་ནང་དོན་བསླབ་གཞི་དང་དམ་དུ་སྦྲེལ་ཡོད་པ།
དེ་ཡང་རྨང་གཞིའི་ཤེས་བྱ་ཁོང་དུ་ཆུད་དགོས་པ་དང་སློབ་མའི་བསླབ་གཞིའི་ཤེས་བྱའི་བྱང་ཚད་ལ་ཞིབ་བཤེར་བྱེད་དགོས་པའི་རེ་བ་ནན་གྱིས་བཏོན②ཅིང་། སྒོས་སུ་མི་དམངས་སློབ་གསོ་དཔེ་སྐྲུན་ཁང་གིས་པར་སྐྲུན་བྱས་པའི་མཐོ་འབྲིང་སྐྱེ་དངོས་བསླབ་གཞི[4-8]དམིགས་སུ་འཛིན་དགོས་ཏེ། དཔེར་ན། རྒྱུགས་གཞིའི་ཆེས་ཐོག་མའི་དྲི་བ་གསུམ་ནི་ངེས་སྦྱོང་དང་པོའི་ནང་དོན་ཡིན་ཏེ། དེས་རྨང་གཞིའི་ཤེས་བྱར་ངོས་འཛིན་དང་རྒྱུས་ལོན་བྱེད་པའི་སྐོར་གཙོར་བཟུང་ཞིང་། མཐོ་རྒྱུགས་སྐྱེ་དངོས་རྒྱུགས་གཞིའི་ལྟེ་བའི་ཡོན་ཏན་ལས་ཚེ་སྲོག་འདུ་ཤེས་ལ་མཐོང་ཆེན་བྱས་པ་ཡང་གསལ་བོར་མཚོན་ཐུབ། རྒྱུགས་ཨང་བཞི་པ་ནི་ངེས་སྦྱོང་གསུམ་པའི་ནང་དོན་ཡིན་ཞིང་། དེས་མཐོ་རྒྱུགས་ཀྱིས་ཚེ་སྲོག་བདེ་ཐང་ཐད་དོ་སྣང་བྱེད་པར་སྣེ་ཁྲིད་ཀྱི་ནུས་པ་འདོན་བཞིན་པ་མངོན་ཐུབ། རྒྱུགས་ཨང་ལྔ་པ་ནི་ངེས་སྦྱོང་གཉིས་པའི་ནང་དོན་ཡིན་ལ། དེས་སློབ་མར་རང་ཉིད་ཀྱི་བདེ་ཐང་ལ་དོ་ཁུར་བྱེད་དགོས་པའི་འདུ་ཤེས་སྐུལ་སྤེལ་བྱེད་པའི་ནུས་པ་ཐོན་ཡོད། མདོར་ན་འདྲི་གཞི་འདི་ལྔ་བོ་ནི་བསླབ་དེབ་ཀྱི་རྨང་གཞིའི་ཤེས་བྱ་ཡིན་ལ་དྲིས་ལན་གདབ་རྒྱུ་དཀའ་ཁག་ཆེན་པོ་མེད། འདྲི་གཞིར་དངོས་ཡོད་སྣང་ཡུལ་ཇུས་འགོད་དང་གནད་དོན་སྒྲིག་བཀོད་བྱས་ཡོད་ལ། 2021ལོའི་གཅིག་གྱུར་མཐོ་རྒྱུགས་ལས་མི་སྣ་གསོ་སྐྱོང་བྱེད་པའི་ནུས་པ་ཡང་ཕྱོགས་ཡོངས་ནས་མངོན་པར་མཚོན་ཐུབ།
གསུམ་པ། ལྟེ་གནད་གོ་དོན་ལ་རྒྱུས་ལོན་པའི་ཚད་དང་ལག་ལེན་ནུས་པར་བརྟག་དཔྱད་བྱེད་པ་གཙོར་བཟུང་ཡོད་པ།
2021ལོའི་རྒྱལ་ཡོངས་གཅིག་གྱུར་མཐོ་རྒྱུགས་སྐྱེ་དངོས་རྒྱུགས་གཞིའི་རྒྱུགས་བྱང་ཚང་མའི་ནང་དོན་ནི་ཤེས་བྱའི་གཙོ་གནད་དག་ཡིན་ཏེ། རྒྱུགས་ཨང་དང་པོས་སི་ལྡན་ཁ་གྱེས་ཁྲོད་ཀྱི་ཚོས་གཟུགས་དངDNAཡི་འགྱུར་ལྡོག་གི་ཁྱད་ཆོས་ལ་ཞིབ་བཤེར་དང་། རྒྱུགས་ཨང་གཉིས་པས་སྐྱེ་དངོས་དངོས་བཤེར་ཁྲོད་ཀྱི་ཚོད་རྫས་གང་མང་གི་ནུས་པར་ཞིབ་བཤེར། རྒྱུགས་ཨང་གསུམ་པས་རྩི་ཤིང་གཟུགས་ཀྱི་ཆུ་དང་འབྲེལ་ཡོད་ཞིབ་བརྗོད་ལ་ཞིབ་བཤེར། རྒྱུགས་ཨང་བཞི་པས་དབང་རྩའི་སྙོམས་སྒྲིག་ཁྲོད་ཀྱི་ཟུག་རེག་གི་བརྒྱུད་འདྲེན་དང་བརྒྱུད་སྤྲོད་ཀྱི་ཁྱད་ཆོས་ལ་ཞིབ་བཤེར། རྒྱུགས་ཨང་ལྔ་པས་གློ་ཚད་རིལ་ཟུང་ཕྲ་སྲིན་གྱི་ལུས་ནང་གི་འཕོ་འགྱུར་དངོས་བཤེར་ལ་ཞིབ་བཤེར། རྒྱུགས་ཨང་དྲུག་པས་མེན་ཏེལ་གྱི་རང་ཤུགས་སྐོར་སྒྲིག་ངེས་སྲོལ་ལ་ཞིབ་བཤེར། རྒྱུགས་ཨང་ཉེར་དགུ་པས་འོད་སྦྱོར་བྱེད་ནུས་དང་འབྱིན་རྔུབ་བྱེད་ནུས་ཀྱི་ཕྱོགས་བསྡུས་བེད་སྤྱོད་ལ་ཞིབ་བཤེར། རྒྱུགས་ཨང་སུམ་ཅུ་པས་སྐྱེ་ཁམས་རིག་པའི་ཁྲོད་ཀྱི་རིགས་རྒྱུད་བར་གྱི་ཕན་ཚུན་འགྲན་རྩོད་འབྲེལ་བར་ཞིབ་བཤེར། རྒྱུགས་ཨང་སོ་གཅིག་པས་སྲོག་ཆགས་ཀྱི་སྐུལ་རྒྱུ་མང་པོའི་བྱེད་ནུས་ལ་ཞིབ་བཤེར། རྒྱུགས་ཨང་སོ་གཉིས་པས་སིལ་སྦྲང་དེ་དངོས་བཤེར་རྒྱུ་ཆ་བྱས་ནས་རང་ཤུགས་སྐོར་སྒྲིག་ངེས་སྲོལ་གྱི་བེད་སྤྱོད་ལ་ཞིབ་བཤེར། རྒྱུགས་ཨང་སོ་བདུན་པས་སྐྱེ་དངོས་ཕྲ་རབ་ཀྱི་བསྙལ་བཟོ་ལག་རྩལ་ལ་ཞིབ་བཤེར། རྒྱུགས་ཨང་སོ་བརྒྱད་པསDNAབསྐྱར་སྒྲིག་ལག་རྩལ་ལ་ཞིབ་བཤེར་བཅས་བྱས་ཡོད་པ་ལྟ་བུའོ། །
བཞི་པ།གཟབ་ནན་སྒོས་སྣང་ཡུལ་ཇུས་འགོད་དང་གནད་དོན་ཐག་གཅོད་ནུས་པ་འཕེལ་རྒྱས་གཏོང་རྒྱུ་གཙིགས་སུ་བཟུང་བ།
བསླབ་ཚན་ཚད་གཞི་གསར་བའི་དམིགས་ཚད་ཀྱི་དགོངས་པ་གཅིག་ནི“བསླབ་ཚན་དང་ཚན་རྩལ་གསར་བ་ཕན་ཚུན་ཟུང་འབྲེལ་བྱ་རྒྱུ་གཙིགས་འཛིན་བྱས་ནས་སློབ་མའི་དབྱེ་ཞིབ་ནུས་པ་མཐོར་འདེགས་དང་སློབ་མའི་བེད་སྤྱོད་ནུས་པ་འཕེལ་རྒྱས་གཏོང་རྒྱུ”དེ་ཡིན་ཞིང་། གནད་དོན་ཐག་གཅོད་ནུས་པས་སློབ་མའི་འབྱུང་འགྱུར་གྱི་འཕེལ་རྒྱས་ལ་རམ་འདེགས་བྱེད་ཐུབ་ཅིང། དེ་ནི་མཐོ་རིམ་སློབ་གྲྭར་སློབ་སྦྱོང་བྱེད་དུས་འཛོམ་དགོས་པའི་ནུས་པ་ཞིག་ཡིན་ལ་སློབ་མ་མི་སྒེར་འཚར་ལོངས་འབྱུང་བར་སྐུལ་འདེད་བྱེད་པའི་རྒྱུ་རྐྱེན་གཙོ་བོ་ཞིག་ཀྱང་ཡིན། དཔེར་ན་རྒྱུགས་ཨང་ཉེར་དགུ་པ་ལེགས་འགྲུབ་བྱེད་དགོས་ན། སློབ་མས་དེའི་འབྲེལ་ཡོད་གཞི་རྩའི་གོ་དོན་དང་། གཞི་རྩའི་བརྒྱུད་རིམ། གཞི་རྩའི་རྩ་བའི་རིགས་པ་སོགས་རྩ་བའི་གཞུང་ལུགས་ཁོང་དུ་ཆུད་དགོས་པ་ལས་གཞན་ད་དུང་ཤེས་བྱའི་དཔྱད་གཞི་གསར་བ་ཁ་སྣོན་དགོས། ཡང་དཔེར་ན་རྒྱུགས་ཨང་སུམ་ཅུ་པས་རྒྱུད་བར་གྱི་འགྲན་རྩོད་སྣང་ཚུལ་གསར་འཛུགས་བྱས་ཡོད་པར་དབྱེ་ཞིབ་དང་གནད་དོན་ཅན་གྱི་སྣང་ཡུལ་སྔོན་དཔག་བྱས་ཏེ། སློབ་མས་འདྲི་གཞིའི་ཆ་འཕྲིན་གཞིར་བཟུང་ནས་ཚན་རིག་དང་ལྡན་པའི་ངང་གནད་དོན་རྩད་ཞིབ་བྱེད་པའི་ནུས་པ་ལ་རྟོག་ཞིབ་བྱས་ཡོད། འདི་དག་གིས་སློབ་མར་བསླབ་ཚན་དང་འབྲེལ་ཡོད་ཀྱི་འཚོ་བ་དངོས་ལག་ལེན་ལ་གདོང་གཏོད་པ་དང་། ཡང་ན་གནད་དོན་ཅན་གྱི་སྣང་ཡུལ་ལ་རྩད་ཞིབ་བྱེད་པར་སློབ་སྦྱོང་བྱེད་སྐབས། ངེས་པར་དུ་གནད་དོན་ངོས་འཛིན་དང་གནད་དོན་དབྱེ་ཞིབ། གནད་དོན་ཐག་གཅོད་བཅས་བྱེད་པའི་གལ་ཆེའི་ནུས་པ་ལྡན་དགོས་པའི་བླང་བྱ་བཏོན་ཡོད་པ་རེད།
ལྔ་པ། དངོས་བཤེར་ཇུས་འགོད་དང་འབྲེལ་བའི་ཚན་རིག་ཞིབ་འཇུག་གི་ནུས་པ་མཐོར་འདེགས་གཏོང་རྒྱུ་གཙིགས་སུ་བཟུང་ཡོད་པ།
མཐོ་རྒྱུགས་སྐྱེ་དངོས་བསླབ་ཚན་གྱི་ཁྱད་ཆོས་ཆེས་ཆེ་ཤོས་ནི་དངོས་བཤེར་རྩད་ཞིབ་དཔྱད་པའི་ནུས་པ་ལྡན་དགོས་པ་དེ་ཡིན། དེ་བས་དངོས་བཤེར་རྩད་ཞིབ་དཔྱད་པའི་ནུས་པ་ཡང་ཞིབ་བཤེར་གྱི་ཚད་གཞི་ཞིག་ཡིན་ལ། དེ་སྐྱེ་དངོས་བསླབ་ཚན་གྱི་གལ་ཆེའི་ནུས་པ་ཞིག་ཀྱང་ཡིན། 2021ལོའི་རྒྱལ་ཡོངས་གཅིག་གྱུར་མཐོ་རྒྱུགས་སྐྱེ་དངོས་རྒྱུགས་གཞི་རྒྱུགས་ཨང་ཉེར་དགུ་པ་དང་སོ་གཉིས་པའི་ནང་ཐད་ཀར་སློབ་མར་དངོས་བཤེར་ཇུས་འགོད་དང་། དངོས་བཤེར་བསམ་གཞིག་དང་སྔོན་དཔག་མཇུག་འབྲས་འབྲི་དགོས་པའི་བླང་བྱ་བཏོན་ཡོད་ལ། སློབ་མས་སྔར་ལས་ལྷག་པར་དངོས་བཤེར་གྱི་རྩ་བའི་རིགས་པ་དང་རྩ་དོན་ལ་རྒྱུས་ལོན་བྱས་ན་ད་གཟོད་གདེང་ཚོད་ཡོད་པའི་སྒོ་ནས་མཐོ་རྒྱུགས་ལ་གདོང་གཏད་ཐུབ་པ་རེད།
མདོར་ན། 2021ལོའི་མཐོ་རྒྱུགས་དཀའ་ཚད་འབྲིང་ཙམ་ཡིན་པ་དང་། རྨང་གཞིར་རྐང་ཚུགས་ཤིང་གཙོ་རྐང་འབུར་དུ་ཐོན་ཡོད་ལ། བརྗོད་བྱ་ནུས་པ་སྔོག་འདོན་བྱེད་པར་དམིགས་ཤིང་གསར་གཏོད་ལ་སྐུལ་སྤེལ་གཏོང་བ་བཅས་བྱས་ཏེ། སློབ་མའི་སྣང་ཡུལ་གསར་བའི་ཁྲོད་རྨང་གཞིའི་ཤེས་བྱ་དང་གཞི་རྩའི་ནུས་རྩལ་ཁོང་དུ་ཆུད་ཚད། དེར་མ་ཟད་སྐྱེ་དངོས་རིག་པའི་ཤེས་བྱ་ཕྱོགས་བསྡུས་བེད་སྤྱོད་བྱས་ནས་གནད་དོན་དངོས་ལ་དབྱེ་ཞིབ་དང་ཐག་གཅོད་བྱེད་པའི་ནུས་པ་བཅས་ལ་རྟོག་ཞིབ་ནན་མོ་བྱས་འདུག དེ་དང་ཆབས་ཅིག་རྒྱུགས་སྤྲོད་སློབ་མས་འདྲི་གཞིར་ནན་ཏན་སྒོས་དབྱེ་ཞིབ་དང་། གནད་ལ་འཁེལ་ཞིང་ཚད་ལྡན་ངང་དྲིས་ལན་འདེབས་པའི་བླང་བྱ་ནན་མོ་བཏོན་ཡོད། རྒྱུགས་སྤྲོད་སློབ་མའི་སྐྱེ་དངོས་རིག་པའི་ཤེས་བྱའི་བྱང་ཚད་ལ་བརྟག་དཔྱད་བྱེད་ཐུབ་ཡོད་པ་མ་ཟད་བསླབ་ཚན་གྱི་ཚད་གཞི་གསར་བའི་དགོངས་པ་དང་བླང་བྱ་ཡང་མཚོན་ཡོད། །
དཔྱད་གཞིའི་ཡིག་ཆ།
[1]生物课程教材研究中心,普通高中生物学课程标准实验教科书生物必修1：分子与细胞[M]. 人民教育出版社 , 2007.
[2] 生物课程教材研究中心 ,普通高中生物学课程标准实验教科书生物必修2：遗传与进化[M]. 人民教育出版社, 2007.
[3]生物课程教材研究中心, 普通高中生物学课程标准实验教科书生物必修3：稳态与环境[M]. 人民教育出版社 , 2007.
[4] 生物课程教材研究中心 ,普通高中生物学课程标准实验教科书生物选修1：生物技术实践[M]. 人民教育出版社, 2007.
[5] 生物课程教材研究中心 ,普通高中生物学课程标准实验教科书生物选修3：现代生物科技专题[M]. 人民教育出版社, 2007.
རྒྱུགས་ཨང་།ཞིབ་བཤེར་ཁྱབ་ཁོངས།ཞིབ་བཤེར་གྱི་ནང་དོན་གཙོ་བོ།གཙོ་གནད་ཤེས་བྱ་ལག་ལེན།སྐར་མ།
1ངེས་སྦྱོང་དང་པོ།སི་ལྡན་ཁ་གྱེས།ཚེ་སྲོག་འདུ་ཤེས།6
2ངེས་སྦྱོང་དང་པོ།དངོས་བཤེར་ཚོད་རྫས།ཚེ་སྲོག་འདུ་ཤེས།6
3ངེས་སྦྱོང་དང་པོ།ཕྲ་ཕུང་ནང་གི་ཆུའི་བརྗེ་ཚབ།ཚེ་སྲོག་འདུ་ཤེས།6
4ངེས་སྦྱོང་གསུམ་པ།དབང་རྩའི་སྙོམས་སྒྲིགསྤྱི་ཚོགས་འགན་འཁྲི།6
5ངེས་སྦྱོང་གཉིས་པ།གློ་ཚད་རུལ་ཟུང་ཕྲ་སྲིན་གྱི་
འཕོ་འགྱུར་དངོས་བཤེར།ཚན་རིག་བསམ་གཞིག།6
6ངེས་སྦྱོང་གཉིས་པ།མེན་ཏེལ་གྱི་རྒྱུད་འདེད་ངེས་སྲོལ།ཚན་རིག་བསམ་གཞིག།6
29ངེས་སྦྱོང་དང་པོ།འོ་སྦྱོར་བྱེད་ནུས།ཚན་རིག་རྩད་དཔྱད།11
30ངེས་སྦྱོང་གསུམ་པ།རྒྱུད་བར་འབྲེལ་བ།ཚན་རིག་རྩད་དཔྱད།9
31ངེས་སྦྱོང་གསུམ་པ།སྲོག་ཆགས་སྐུལ་རྒྱུ།སྤྱི་ཚོགས་འགན་འཁྲི།9
32ངེས་སྦྱོང་གཉིས་པ།རྒྱུད་འདེད་ངེས་སྲོལ།ཚན་རིག་བསམ་གཞིག ཚན་རིག་རྩད་དཔྱད།10
37འདེམ་སྦྱོང་དང་པོ།སྐྱུར་བསྙལ་ལག་རྩལ།ཚན་རིག་བསམ་གཞིག ཚན་རིག་རྩད་དཔྱད།15
38འདེམ་སྦྱོང་གསུམ་པ།རྒྱུད་རྒྱུ་བཟོ་སྐྲུན།ཚན་རིག་བསམ་གཞིག ཚན་རིག་རྩད་དཔྱད།15
① 教育部考试中心,2019年普通高等学校招生全国统一考试大纲(生物)[M]高等教育出版社,2019.
② 中华人民共和国教育部,普通高中生物学课程标准[M]人民教育出版社, 2018.