བརྩེ་བ་ནི་སློབ་གསོའི་སྨན་མཆོག་ཅིག་ཡིན། —— སློབ་བུ་སྐལ་བཟང་གི་འཚར་ལོངས་ལས་འཕྲོས་པའི་བསམ་གཞིག

[གནད་བསྡུས] འདིར་རང་གི་སློབ་ཁྲིད་དངོས་ཀྱི་ལག་ལེན་ཁྲོད་སློབ་བུ་སྤྱོད་པ་ལང་ཤོར་ཅན་ཞིག་ཡ་རབས་ཚུལ་ལྡན་ཞིག་ཏུ་གྱུར་པའི་བརྒྱུད་རིམ་བྲིས་ཏེ། དགེ་རྒན་ཞིག་ལ་ཤེས་བྱ་ཡོན་ཚད་ངེས་ཅན་ཞིག་ལྡན་དགོས་པ་ནི་སྨོས་མ་དགོས་ཀྱང་། དེ་ལས་ཀྱང་གལ་ཆེ་བ་ནི་ཀུན་ལ་ཕྱོགས་རིས་མེད་པའི་ལྷག་བསམ་དཀར་པོ་དང་བརྩེ་སེམས་དྲོན་མོ་ཞིག་དགོས་པ་བསྟན་ཡོད།

[གནད་ཚིག] ཁྱིམ་ཚང་སློབ་གསོ། སློབ་གྲྭའི་སློབ་གསོ། བརྩེ་བ། བསམ་གཞིག

* ཤ་བོ་སྐྱིད། མཚོ་སྔོན་ཞིང་ཆེན་གཙང་གསུམ་མི་རིགས་སློབ་འབྲིང་དུ་ཕྱག་ལས་གནང་བཞིན་ཡོད། 

ཤ་བོ་སྐྱིད། * 

དང་པོ། དོན་རྐྱེན་གྱི་རྒྱབ་ལྗོངས།

2018ལོའི་དབྱར་ཁར། ངའི་སློབ་བུ་རྣམས་ཀྱིས་མཐོ་རྒྱུགས་ལ་འབྲས་བུ་གཡུར་དུ་ཟ་བ་བླངས་ཏེ་སློབ་མཐར་ཕྱིན། སྟོན་དུས་སློབ་མགོ་བརྩམས་མ་ཐག་སློབ་གྲྭས་ཡང་བསྐྱར་མཐོ་གསུམ་འཛིན་གྲྭ་གཉིས་ང་ལ་བགོས་བྱུང་།
དགེ་གྲོགས་རྣམས་ཀྱིས། འཛིན་གྲྭ་དེ་ནི་ལོ་རིམ་ཡོངས་ལས་སྦྱངས་འབྲས་ཆེས་ཞན་པའི་འཛིན་གྲྭ་ཞིག་ཡིན་པར་བཤད། ཉིན་འགར་སློབ་ཁྲིད་བྱས་པ་བརྒྱུད་ད་གཟོད་འཛིན་གྲྭ་དེའི་སློབ་སྦྱོང་གི་ངང་ཚུལ་ཞན་པ་གཞི་ནས་རྟོགས། དེ་ལས་ཀྱང་ཡིད་སྐྱོ་བ་ཞིག་ནི། འཛིན་གྲྭ་དེར་སློབ་ཁྲིད་གང་གི་སྐབས་སུའང་བློ་བདེ་བག་ཕེབས་ཀྱིས་གཉིད་པར་གོམས་པའི་སློབ་གྲོགས་ཤིག་ཡོད་པ་རེད། ཁྲིད་འཁུར་དགེ་རྒན་གྱིས་ཁོའི་གཉིད་དེ་འགོག་ཐབས་སྣ་ཚོགས་བྱས་ཀྱང་ངལ་བ་འབྲས་མེད་དུ་གྱུར་པས། ད་ལྟ་ཁོ་ལ་ཁ་ཡ་བྱེད་ཀྱིན་མེད་ཟེར། ཐ་ན་འཛིན་བདག་ལའང་ཐབས་ཟད་དེ་སློབ་ཁྲིད་སྐབས“རང་དབང”ཐོབ་པའི་སློབ་མ་ཞིག་ཏུ་གྱུར་ཡོད་སྐད། སློབ་གྲོགས་ཚང་མས་ཁོ་ལ་སྐལ་བཟང་རྒྱ་རྡོ་ཞེས་འབོད་བཞིན་ཡོད། མིང་དངོས་ལ་སྐལ་བཟང་ཡོན་ཏན（གཤམ་དུ“སྐལ་བཟང”ཞེས་བསྡུས་མིང་ནས་འབོད་རྒྱུ་ཡིན）ཟེར་ཡང་།
རྒྱུགས་འབྲས་ནམ་ཡང་ལོ་རིམ་ཡོངས་ལས་ཆེས་ཐ་མ་ཡིན་ལ། འཛིན་གྲྭའི་སྙོམ་སྐར་རྒྱ་རྡོ་བཞིན་དུ་མར་འཐེན་བཞིན་པས། སློབ་གྲོགས་ཡོངས་ཀྱིས་སྐལ་བཟང་རྒྱ་རྡོ་ཞེས་མཚང་མིང་དུ་འབོད་པར་གྲགས།

གཉིས་པ། དོན་རྐྱེན་གྱི་འབྱུང་རྐྱེན།

ངས་ལོ་ངོ་ཉི་ཤུ་ལྷག་གི་རིང་ལ་འཛིན་བདག་བྱས་ཤིང་འདི་ལྟ་བུའི་སློབ་བུ་མང་པོར་འཕྲད་མྱོང་བའི་ཉམས་མྱོང་བརྒྱུད། སློབ་བུ་འདི་ལང་ཤོར་ཏུ་གྱུར་པར་ཕྱི་ནང་གི་རྒྱུ་རྐྱེན་གང་མང་ཡོད་པ་ཁ་ཚོན་བཅད་ཆོག་པས། དཀའ་ཚེགས་ཅི་འདྲ་ཆེ་རུང་དེའི་རྒྱུ་རྐྱེན་བཙལ་ཏེ་སློབ་བུ་འདི་འགྱུར་བ་གཏང་རྒྱུའི་དམ་བཅའ་བརྟན་པོ་ཞིག་ཡིད་ལ་བཅངས་ཤིང་། དེ་མངོན་འགྱུར་བྱེད་ཆེད། ཁྱིམ་བདག་དང་དགེ་རྒན། སློབ་གྲོགས་སོགས་ལས་རྩད་གཅོད་རབས་དང་རིམ་པ་བྱས་མཐར་གཤམ་གྱི་རྒྱུ་རྐྱེན་འདི་དག་ལྷང་ལ་བུད།

གཅིག ཁྱིམ་ཚང་སློབ་གསོ།

སློབ་བུ་སྐལ་བཟང་ནི་ཆུང་དུས་བློ་རིག་རྒོད་ཅིང་སྤྲོ་སྣང་གིས་ཁེངས་པའི་བྱིས་པ་ཡ་རབས་ཤིག་ཡིན་ལ།
ནང་ཆེན་རྫོང་མི་རིགས་སློབ་འབྲིང་གི་དམའ་འབྲིང་སློབ་མ་ཡིན་དུས་ཐེངས་དུ་མར་སྤྱོད་ཡོན་གཉིས་ལྡན་གྱི་སློབ་མའི་གཟེངས་རྟགས་ཀྱང་བླངས་ཏེ་སློབ་མཐར་ཕྱིན། འབྲིང་རྒྱུགས་ལས་རྒྱུགས་འབྲས་གཡུར་དུ་ཟ་བ་བླངས་ཏེ་ངེད་སློབ་གྲྭའི་མཐོ་གཅིག་འཛིན་གྲྭར་ཞུགས་པ་རེད།
ཏག་ཏག་ལོ་དེའི་དཔྱིད་ཀར། ཁོའི་ཨ་མ་དབྱར་རྩྭ་བརྐོ་རུ་འགྲོ་བའི་ལམ་བར་དུ་རླངས་འཁོར་གྱི་དོན་རྐྱེན་བྱུང་སྟེ་ཚེ་ལས་འདས། ཨ་ཕ་ནི་སློབ་ཆུང་གི་དགེ་རྒན་ཞིག་ཡིན་ལ་མ་འགྱངས་པར་ཡང་བསྐྱར་གཉེན་བསྒྲིགས་ཤིང་།
བྱིས་པ་ཞིག་ཀྱང་སྐྱེས་པ་ནས་བཟུང་མ་ཡར་དེ་ཕར་ཞོག
ཨ་ཕས་ཀྱང་སྐལ་བཟང་གི་སློབ་སྦྱོང་དང་འཚོ་བར་སེམས་ཁུར་ཆེར་མ་བྱས། དགུན་གནང་གི་སྐབས་ཤིག་ལ།
ཁོ་རང་ཁྱིམ་དང་འབྲལ་འདོད་ཀྱིས་ཐེངས་འགར་དགོན་པར་བྲོས་ནས་གྲྭ་པ་བྱེད་བསམས་ཀྱང་ཨ་ཕ་མ་འཐད་པས་ཕྱིར་སློབ་གྲྭར་བསྐྱལ། དེ་ནས་བཟུང་། ཁོའི་བརྩོན་ཤུགས་ཉམས་ཏེ་སློབ་སྦྱོང་བྱེད་རྒྱུ་རྩ་བ་ནས་དོར་བ་དང་ལོ་རེར་ཇེ་ཞན་དུ་གྱུར་ཏེ་མཇུག་མཐར་སློབ་གྲོགས་ཡོངས་ལས་ཆེས་ཐ་མར་ལུས། གང་ལྟར། བྱིས་པ་ནར་སོན་པ་ལ། ཕ་མ་གཉིས་ཀའི་སློབ་གསོ་ནི་མེད་དུ་མི་རུང་སྟེ། དེ་ལས་ཀྱང་ཨ་མའི་སློབ་གསོ་ནི་མིའི་རིགས་ཀྱི་སློབ་གསོའི་ཐོག་མ་ཡིན་པས། ཨ་མའི་བྱམས་བརྩེ་དང་བྲལ་ཅིང་ཨ་ཕའི་སློབ་གསོ་ཡང་མ་རེག་པའི་བྱིས་པ་ཞིག་གི་ལུས་སེམས་གཉིས་བདེ་ཐང་གིས་འཚར་ལོངས་འབྱུང་རྒྱུ་ནི་ཧ་ཅང་དཀའ་ལ། ལྷག་པར་དུ་ཕ་མ་ཆ་འཛོམ་མིན་པ་དང་གཉེན་འཐོར་བྱུང་བ་ལ་སོགས་པའི་བྱིས་པ་མང་ཆེ་བ་ཞིག་ནི་རང་གཤིས་གྱོང་པོ་ཡིན་པ་དང་སློབ་གྲོགས་ལ་འབྲེལ་འདྲིས་ཉུང་བ་བཅས། སློབ་ར་ཞིག་ལ་མཚོན་ན་ཆེས་རྒྱུན་མཐོང་གི་སྣང་ཚུལ་ཞིག་ཏུ་གྱུར་ཡོད།

གཉིས། སློབ་གྲྭའི་སློབ་གསོ།

དྭ་ཕྲུག་ལྟ་བུར་ལུས་པའི་སྐལ་བཟང་ལ་མཚོན་ན། ཆེས་མཁོ་བ་ནི་ཕ་མ་ལྟ་བུའི་དགེ་རྒན་གྱི་བྱམས་བརྩེ་དང་མིང་སྲིང་ལྟ་བུའི་སློབ་གྲོགས་ཀྱི་རོགས་རམ་དེ་ཡིན་པ་སྨོས་མ་དགོས། སློབ་བུ་སྐལ་བཟང་ནིི་ཨ་མ་ཚེ་ལས་འདས་ཤིང་།
ཨ་ཕས་ཁྱིམ་གཞིས་གསར་བ་ཞིག་སྐྱོང་བར་བྲེལ་བའི་བར་སྐབས་དེར། རིམ་གྱིས་ཨ་ཕ་དང་མ་ཡར་གཉིས་ཀ་དགྲ་རུ་འཛིན་པ་དང། སློབ་གྲྭར་དགེ་སློབ་སུ་ལའང་ཁ་བརྡ་མི་བྱེད་པར་གྲོགས་མེད་ཁེར་རྐྱང་གི་གཤིས་ཀ་ཞིག་ཆགས། རྒྱུགས་འབྲས་དམའ་བ་དེ་ལ་བརྟེན་ནས་ཁོ་ནི་བསླབ་བྱ་སོ་སོའི་དགེ་རྒན་ཡོངས་ཀྱིས་མིག་གི་ཚེར་མ་ལྟ་བུར་གྱུར་ཏེ། སྡང་གདུག་དང་སྐྱོན་བརྗོད་སྣ་ཚོགས་བྱས་ཡོད་པ་མ་ཟད། ཐ་ན་འཛིན་གྲྭའི་སྙོམས་སྐར་མར་འཐེན་པར་རྐྱེན་བྱས་ཏེ་འཛིན་གྲྭ་ལས་ཕྱིར་འབུད་དགོས་པའི་ལུགས་མཐུན་མིན་པའི་རེ་བའང་ཐེངས་འགར་བཏོན་མྱོང་ཟེར། དགེ་རྒན་གྱིས་ངེས་པར་སེམས་ཁམས་རིག་པ་སྦྱོང་དགོས་པའི་རྒྱུ་མཚན་ནི། སློབ་མའི་བསམ་བློ་བདེ་ཐང་མིན་པའི་སྐབས་དེར་དགེ་རྒན་གྱིས་ནད་པའི་ལུས་ཀྱི་ནད་དང་སེམས་ཀྱི་སྡུག་བསྔལ་སྨན་གྱིས་གསོ་བ་བཞིན་བྱས་ན། སློབ་མའི་སེམས་ཀྱི་གསང་བ་དང་མི་དགེ་བའི་མཐིལ་བརྟོལ་ཐུབ་པར་མ་ཟད། དགེ་སློབ་ཕན་ཚུན་བར་ལ་བསམ་ཚུལ་བརྗེ་རེས་ཀྱང་བྱེད་ཐུབ།བརྩེ་བ་མེད་པའི་སློབ་གསོ་ནི་ནམ་ཡང་ཕམ་ཁ་ཡིན་ཏེ། དེས་བཟོས་པའི་ཉེས་དམིགས་ཀྱིས་སློབ་བུ་སྐལ་བཟང་གི་སྤྱོད་བཟང་དང་བློ་རིག་གི་རྩ་བའང་དྲུངས་ནས་ཕྱུང་སྟེ་མེད་པར་བཟོས། དགེ་རྒན་
གྱི་གཟེངས་བསྟོད་དང་ཡིད་ཆེས་ཀྱིས་སློབ་མ་ཇེ་ལེགས་སུ་བསྒྱུར་ཐུབ་ལ། སློབ་བུ་སྐལ་བཟང་ཡང་དེ་བཞིན་ནོ། །

གསུམ། སྤྱི་ཚོགས་འབྲེལ་བ།

ཕ་མའི་ཁ་ཏ་སློབ་གསོ་དང་བྲལ་ཅིང་། དགེ་རྒན་གྱི་ཡང་དག་པའི་མཛུབ་སྟོན་དང་བརྩེ་བ་སོགས་མ་ཐོབ་པའི་སློབ་བུ་སྐལ་བཟང་ལ་མཚོན་ན། ཁྱིམ་ཚང་དང་སློབ་གྲྭ་ཕྱོགས་གཉིས་ནས་རང་ལ་དོ་སྣང་དང་སེམས་ཁུར་བྱེད་མཁན་མེད་པས། མིག་གིས་བལྟ་ས་དང་རྣ་བས་མཉན་ས། སེམས་ཀྱི་གཏད་སོ་བཅས་ནི་ཁྱིམ་ཚང་དང་སློབ་གྲྭ་ལས་བརྒལ་ཏེ་སྤྱི་ཚོགས་ཁོ་ནར་བརྟེན་དགོས་བྱུང། ཁོ་རང་སྟེང་ནས་ད་དུང་བདེན་རྫུན་དང་ལེགས་ཉེས་བརྟག་པའི་བློ་མིག་ཆེར་རྒྱས་མེད་པས། སྤྱི་ཚོགས་སྟེང་གི་སྤྱོད་པ་ཡ་མ་བརླའི་རིགས་དང་ཆ་ལུགས་ཡ་མ་ཟུང་གི་སྐོར་དེ་རིགས་ཀྱིས་ཅིག་ཅར་ཤུགས་རྐྱེན་ཆེན་པོ་ཐེབས་ཏེ། རིམ་གྱིས་དུ་བ་འཐེན་པ་དང་ཆང་འཐུང་བ། ཁ་པར་རྩེད་པ་སོགས་སློབ་གྲྭའི་སྒྲིག་ཁྲིམས་དང་འགལ་བའི་བྱ་སྤྱོད་མི་ཉུང་བ་ཞིག་རིམས་ནད་བཞིན་འགོས་པར་གྱུར། འདི་ལྟར་བསྲིངས་ཚེ་ནམ་ཞིག་ཁོ་རང་ཁྲིམས་དང་འགལ་ཏེ་སྤྱི་ཚོགས་ལ་ནག་ཉེས་བཟོ་ཡོང་བའང་གདོན་མི་ཟའོ། །

ལོ་ངོ་གཅིག་གི་རིང་ལ་སློབ་མ་འདི་ལ་རང་སྐྱོན་མཐའ་དག་སྤང་དུ་བཅུག་ནས་ཡང་བསྐྱར་སློབ་མ་དཔེ་ལེགས་ཅན་ཞིག་ཏུ་བསྒྱུར་བ་དང་མཐོ་རྒྱུགས་ལས་རྒྱལ་བའི་དམ་བཅའ་བཞག་པ་བཅས་ཐད་གཤམ་གྱི་བྱ་ཐབས་འདི་དག་སྤྱད་པ་ཡིན།

གསུམ་པ། སློབ་བུ་སྐལ་བཟང་གི་གནས་བབ་ལེགས་སྒྱུར་བྱེད་པའི་ཐབས་ལམ།

གཅིག བརྩེ་བའི་དྲོད་ཁོལ་གྱིས་བསྐྱངས་ཚུལ།

བརྩེ་བ་ནི་སློབ་གསོའི་མན་ངག་ཅིག་ཡིན་ལ། བསྟོད་པ་ནི་སློབ་གསོའི་ཐབས་མཆོག་ཅིག་ཏུ་གྲགས་པ་འདི་ནི་རང་ལ་མཚོན་ནའང་ད་ལྟའི་བར་སློབ་མ་སྐྱོང་བའི་ལག་ལེན་གྱི་དྭངས་མར་བསྟེན་བཞིན་ཡོད་པས། བདག་གིས་དགེ་རྒན་གཞན་དག་གིས་སྐལ་བཟང་ལ་བཟུང་བའི་ལྟ་ཚུལ་ལས་ལྡོག་སྟེ། ཁོའི་འདུག་སའང་ཆེས་མཇུག་གི་གྲལ་རྔའི་གྲུ་ག་དེ་ནས་རང་ཉིད་དང་ཆེས་ཉེ་སའི་གྲལ་མགོར་བསྣུར། སློབ་ཁྲིད་ཀྱི་སྐབས་སུའང་ཁོ་གཙོར་དམིགས་པ་ན། ཁོས་ཀྱང་དགེ་རྒན་གྱིས་རང་ལ་དོ་སྣང་བྱེད་བཞིན་པ་རིམ་གྱིས་ཚོར་ཏེ་ཡུན་གྱིས་མགོ་དགྱེ་ནས་སློབ་ཁྲིད་ལ་ཉན་མགོ་བརྩམས། སྐབས་རེར་དྲི་བ་སླ་མོ་རེའང་འཕངས་ནས་ལན་བཏབ་པ་ཅུང་འགྲིག་པ་ལ་བརྟེན་ནས་སློབ་གྲོགས་ཀུན་གྱི་མདུན་ནས་བསྟོད་པ་དང་། སློབ་གསེང་སྐབས་སོགས་ཁོམ་ལོང་བཙལ་ནས་ཁ་བརྡ་བྱེད་པའི་གོ་སྐབས་བཙལ་བའམ་ཟ་རྒྱུ་ཞིམ་
པོ་ཞིག་ལག་སྣེ་རུ་ཡོད་ནའང་ཁོར་སྟེར་བ། མིང་ནས་འབོད་དུས་ཀྱང་གཅེས་མིང་སྤྱོད་པ་སོགས་བྱས་པས། གཟའ་འཁོར་དུ་མའི་རྗེས་སུ་ཁོ་རང་འགུལ་གྱིས་གཞུང་སྒྲུབ་ཁང་དུ་ཡོང་ནས་མི་ཤེས་པ་འདྲི་བའམ། ཡང་ན་སློབ་གྲོགས་བཟང་པོར་འདྲི་བ། སློབ་གྲོགས་ཚོས་ཀྱང་ཁོ་ལ་འབྲེལ་འདྲིས་དང་རོགས་རམ་སོགས་བྱས་པས། མི་འགྱངས་པར་ཁོའི་རྒྱུགས་འབྲས་ཀྱང་མངོན་གསལ་གྱིས་ཇེ་ལེགས་སུ་སོང་། ཡིན་ཡང་ཁྱིམ་བདག་གི་བརྩེ་བ་དེའང་བུ་ཕྲུག་ལ་མཚོན་ན་སྒུལ་ཤུགས་གཙོ་བོ་ཞིག་ཡིན་པས་ཁྱིམ་བདག་གིས་ཀྱང་རྒྱབ་སྐྱོར་བྱེད་པར་སྐུལ་མ་བཏང་བ་ཡིན།

གཉིས། ཁྱིམ་ཚང་སློབ་གསོའི་རམ་འདེགས་ལ་བརྟེན་ཚུལ།

ཁྱིམ་ཚང་དང་སློབ་གྲྭ་གཉིས་ནི་སློབ་མའི་ཀུན་སྤྱོད་གསོ་སྐྱོང་བྱེད་སའི་གཤིན་ས་མེད་དུ་མི་རུང་བ་གཉིས་ཡིན་པས། ཕན་ཚུན་གཞོགས་འདེགས་མེད་པར་བྱིས་པའི་འགྲོ་འདུག་སྤྱོད་གསུམ་ལ་ལྟ་རྟོག་མ་བྱས་ཚེ། དགེ་རྒན་གྱི་མཛུབ་སྟོན་འོག་མི་གཤིས་ལེགས་པོ་ཞིག་ཏུ་བསྒྱུར་རུང་།
དབྱར་དགུན་གནང་དང་ཡང་ན་རྒྱུན་ལྡན་གྱི་འཚོ་བའི་ཁྲོད་སློབ་མས་སྤྱི་ཚོགས་སྟེང་གི་མིའི་སྤྱོད་པ་ལ་ལད་མོ་བྱེད་སླ་བ་དང་གོམས་གཤིས་ངན་པའང་དེ་ལས་ལོབས་སྐྱེན་པ།
དཔེར་ན། དུ་བ་འཐེན་པ་དང་ཆང་འཐུང་བ་སོགས་སྤྱོད་ངན་གོམས་སླ་བ་རེད། སློབ་གྲྭ་རུ་དགེ་རྒན་གྱིས་ཁ་ཏ་བསླབ་བྱ་དང་ངལ་གསོའི་སྐབས་ཁྱིམ་བདག་གིས་སློབ་གསོ་གཏོང་རྒྱུ་ནི་གནད་འགག་ཅིག་ཡིན་པས། སློབ་བུ་སྐལ་བཟང་གི་ཁྱིམ་དུ་དངོས་སུ་འགྲོ་བའི་སྐལ་བ་མ་བྱུང་རུང་། ཁ་པར་གྱི་ལམ་ནས་ཁོའི་ཨ་ཕར་སྔོན་གྱི་གནས་ཚུལ་དང་ད་ལྟའི་འགྱུར་ལྡོག འབྱུང་འགྱུར་གྱི་རེ་འདུན་སོགས་ཞིབ་ཏུ་བཤད་པ་ན། ཁོའི་ཨ་ཕའང་དགེ་རྒན་ཞིག་ཡིན་པས། མྱུར་དུ་དོན་དེའི་གལ་ཆེན་རང་བཞིན་རྟོགས་ཏེ། རེ་ཐག་ཆད་པའི་བུ་ལ་ཡང་བསྐྱར་རེ་བ་ཆེན་པོ་བཟུང་སྟེ། ཟླ་རེར་སྐོར་རེ་རྒྱག་པ་དང་ཁ་ཏ་སློབ་གསོ་མང་དུ་བྱས་སྟབས་སྐལ་བཟང་གི་གདོང་ལའང་གཞི་ནས་དྲོད་ཁོལ་གྱི་མདངས་ཤིག་ངང་གིས་རྒྱས་བྱུང་། དབྱར་གནང་དང་དགུན་གནང་གི་དུས་སུ་ཟུར་ཁྲིད་དང་སློབ་སྦྱོང་བྱེད་དུ་འཇུག་པ་སོགས་འགན་འཁྲི་དང་དུ་བླངས་རྐྱེན་སློབ་སྦྱོང་ལའང་གནམ་ས་བླ་འོག་བསྒྱུར་བ་ལྟ་བུའི་འགྱུར་ལྡོག་ཆེན་པོ་བྱུང་སྟེ། སློབ་སྐབས་དང་པོའི་མཇུག་རྒྱུགས་ཀྱི་རྒྱུགས་འབྲས་ཀྱང་སློབ་གྲོགས་ཡོངས་ལས་འབྲིང་གྲལ་དུ་ཚུད་པ་བྱུང་།

གསུམ། སློབ་མའི་རྒྱུད་ཀྱི་བཟང་ཆ་སྔོག་འདོན་བྱེད་ཚུལ།

སྤྱིར་སློབ་བུ་ཅི་འདྲའི་མ་རབས་ཤིག་ཡིན་རུང་དེ་
ལ་བཟང་ཆ་གང་ཡང་མེད་པ་ཞིག་མི་སྲིད་དེ། སློབ་བུ་སྐལ་བཟང་གི་རྒྱུགས་འབྲས་ནི་འཛིན་གྲྭ་ཡོངས་ལས་དམའ་ནའང་། ཁོ་ལ་ཁྱད་ཆོས་ཤིག་ཡོད་པ་ནི་སློབ་ཆུང་ནས་དབུ་ཅན་དབུ་མེད་ཡིག་གཟུགས་ལ་སྦྱོང་བ་ལེགས་པོ་ཐོབ་ཡོད་པས། ཁོའི་ཡིག་གཟུགས་མཛེས་པ་མ་ཟད་སྐབས་རེར་དགེ་རྒན་གྱི་ཡིག་གཟུགས་ལས་ཀྱང་ལེགས། ཁྱད་ཆོས་དེ་ལ་བརྟེན་ནས་ངས་ཁོ་རང་བོད་ཡིག་བསླབ་བྱའི་ཚོགས་གཙོར་བསྐོས། ཉིན་རེའི་འཁྲིད་བྱའི་སློབ་ཚན་གྱི་ཁ་བྱང་སྒོ་སམ་དུ་འབྲི་མཁན་ལ་བཞག། ཁོས་ཉིན་རེར་འོས་འགན་ལེགས་འགྲུབ་བྱེད་པའི་ཁར་སྒོ་སམ་དང་མདུན་ཅོག་སོགས་ཀྱང་གཙང་མར་ཕྱིས་ཡོད་པས། ཚོགས་གཙོ་སྔོན་མ་ལས་ཀྱང་ཞིབ་ཚགས་ལྡན། དེ་འདྲའི་ཐུན་མོང་ལ་འགན་ཁུར་བའི་མི་ཞིག་ཏུ་འགྱུར་ཐུབ་ན་རང་ཉིད་ཀྱི་སློབ་སྦྱོང་ལ་འགན་ཁུར་ཐུབ་པ་སྨོས་མི་དགོས། མ་འགྱངས་པར་ཁོའི་བོད་ཡིག་གི་རྒྱུགས་འབྲས་ཀྱང་མངོན་གསལ་གྱིས་ཇེ་ལེགས་སུ་སོང་སྟེ་འཛིན་གྲྭའི་སློབ་གྲོགས་ཡོངས་ཀྱི་རབ་གྲས་སུ་སླེབས། དེ་ལས་ཀྱང་དགའ་འོས་པ་ཞིག་ནི་བསླབ་བྱ་གཞན་པའི་རྒྱུགས་འབྲས་ཀྱང་དེ་བཞིན་མཐོར་འདེགས་བྱུང་། མལ་ཁང་གཅིག་པའི་སློབ་གྲོགས་ཚོས་བཤད་པ་ལྟར་ན། ཁོ་ལ་ད་དུང་སྐད་ངག་ཀྱང་སྙན་མོ་ཞིག་ཡོད་ཟེར། སྐབས་རེར་ངས་ཁོ་ལ་སློབ་ཁྲིད་སྔོན་དུ་གླུ་དབྱངས་རེ་ལེན་དུ་བཅུག་ནས་སློབ་ཁྲིད་སྔོན་གྱི་སློབ་མའི་སྤྲོ་བ་བསླངས་པས། ཁོའི་གདོང་ལའང་རིམ་གྱིས་སྤྲོ་བ་དང་ཡིད་ཆེས་ཀྱིས་ཁེངས།

བཞི། དགེ་སློབ་ཐུན་མོང་གི་སྟོབས་ཤུགས་ལ་བརྟེན་ཚུལ།

སློབ་བུ་སྐལ་བཟང་ལ་འགྱུར་ལྡོག་འབྱུང་བཞིན་པའི་གནས་ཚུལ་དེ་ཁྲིད་ཁུར་དགེ་རྒན་གཞན་དག་གིས་ཀྱང་ངོས་ལེན་བྱེད་ཀྱིན་ཡོད་པས། ཁོའི་གྲུབ་འབྲས་ལ་ནམ་རྒྱུན་བསྔགས་བརྗོད་དང་། སློབ་གྲོགས་ཡོངས་ཀྱིས་ཀྱང་ཁོ་ལ་མཐུན་སྒྲིལ་རོགས་རམ་བྱས་པས། གྲོགས་མེད་ཁེར་རྐྱང་དུ་འགྲོ་བའི་སྣང་ཚུལ་རིམ་གྱིས་འགྱུར་ཏེ་ཀུན་ལ་རྩེད་ཁ་དགོད་ཁ་སློང་མཁན་གྱི་སློབ་བུ་སྤྲོ་སྣང་ཅན་ཞིག་ཏུ་གྱུར། རིམ་གྱིས་ཁོ་ལ་མི་དགའ་བའི་དགེ་རྒན་མེད་ལ་སློབ་གྲོགས་ནི་དེ་བས་ཀྱང་མེད་དོ། ། སྐབས་དེར་ཁྱིམ་བདག་གིས་ཀྱང་རེ་བ་ཡོད་པ་མཐོང་སྟེ་གཉིད་ལས་སད་པ་བཞིན་དབྱར་དགུན་གནང་སྐབས་སུ། ཆེད་དུ་སྐལ་བཟང་ལ་བསླབ་བྱ་སོ་སོར་ཟུར་ཁྲིད་བྱེད་དུ་བཅུག་པས། ཁོའི་བསླབ་བྱ་སོ་སོའི་རྒྱུགས་འབྲས་ནི་འཛིན་གྲྭའི་སློབ་མ་བཟང་པོ་དག་གི་གྲས་སུ་ཚུད་ཅིང་སློབ་གྲྭའི་གཟེངས་རྟགས་ཀྱང་མང་པོ་ཐོབ། 

བཞི་པ། དོན་རྐྱེན་དེ་ལས་འཕྲོས་པའི་བསམ་གཞིག

གོང་གི་ཐབས་ལམ་དེ་དག་ལ་བརྟེན་ནས་ལོ་ངོ་གཅིག་གི་དུས་ཡུན་ཐུང་ཐུང་འདིའི་རིང་སློབ་བུ་སྐལ་བཟང་ནི་སློབ་བུ་མ་རབས་ཤིག་ནས་དགེ་རྒན་ལ་བརྩི་བཀུར་དང་སློབ་གྲོགས་ལ་མཐུན་སྒྲིལ། སློབ་གྲྭའི་སྒྲིག་ལམ་བརྩི་སྲུང་།
སློབ་སྦྱོང་ལ་འབད་བརྩོན་བྱེད་པའི་སློབ་མ་ཡ་རབས་ཤིག་ཏུ་གྱུར་ཅིང་། རྒྱུགས་འབྲས་ཀྱང་ཆེས་ཐ་མ་ནས་འབྲིང་།
འབྲིང་ནས་རབ་ཀྱི་གྲས་སུ་ཚུད་དེ། 2021ལོའི་མཐོ་རྒྱུགས་ཁྲོད་བློ་ཡུལ་ལས་འདས་པའི་སྐར་འབྲས་བླངས་ཏེ་ལྷོ་ནུབ་མི་རིགས་སློབ་ཆེན་གྱི་བོད་ཡིག་སྡེ་ཁག་ལ་རྒྱུགས་འཕྲོད་པས། ཡུལ་ཤུལ་ཁུལ་མི་དམངས་སྲིད་གཞུང་གིས་མཐོ་རྒྱུགས་ཁྲོད་བོད་ཡིག་གི་རྒྱུགས་འབྲས་གཟེངས་སུ་ཐོན་པའི་དགེ་སློབ་དག་ལ་བྱ་དགའ་གནང་བའི་གྲས་སུ་ངེད་དགེ་སློབ་གཉིས་ཀྱང་འདུས། སློབ་ཆེན་དུ་འགྲོ་ཁར་སྐལ་
བཟང་ཕ་བུ་གཉིས་ཆེད་དུ་ང་ལ་བལྟ་རུ་ཡོང་སྟེ། ཁ་བཏགས་དཀར་པོ་ཞིག་ངའི་སྐེ་ལ་འཕངས་ཤིང་ལག་པར་དམ་པོར་འཇུས་ཏེ་དགའ་བའི་མཆི་མ་ཁྲོམ་ཁྲོམ་དུ་བཞུར། སྐབས་དེར་ངའི་གདོང་ལའང་གཟི་ཉམས་ཤིག་ངང་གིས་འབར་བྱུང་། དགེ་རྒན་ཞིག་ལ་མཚོན་ན་ལོག་ལམ་དུ་འགྲོ་བཞིན་པའི་སློབ་མ་ཞིག་འདི་ལྟར་ལེགས་པའི་ལམ་དུ་དྲངས་ཏེ་གྲུབ་འབྲས་འདི་འདྲ་ཐོན་པ་ནི་ཐབས་བརྒྱ་ཇུས་སྟོང་གིས་སེམས་ནས་མི་འདོར་བ་དང་བློས་མ་བཏང་བའི་གྲུབ་འབྲས་མ་ཡིན་ནམ། ངའི་སེམས་ཁོང་དུའང་གྲུབ་འབྲས་ཆེན་པོ་ཐོབ་པའི་ཚོར་བ་ཞིག་ངང་ངམ་ཤུགས་སུ་སྐྱེས་བྱུང་། ལས་ཚེགས་ཅི་འདྲ་ཆེ་ན་ཡང་རང་ཉིད་ཀྱི་རླབས་ཆེན་ལས་རིགས་འདི་ལ་སྔར་ལས་དགའ་བ་དང་སྤྲོ་བར་གྱུར།

མདོར་ན། དགེ་རྒན་གྱི་འགན་ཁུར་ནི་དཔེ་ངོས་ཀྱི་ཤེས་བྱ་རྐྱང་རྐྱང་སློབ་མའི་རྒྱུད་ལ་འཇོག་པ་ཙམ་མ་ཡིན་པར། སློབ་མའི་ལུས་སེམས་གཉིས་ཀ་བདེ་ཐང་ངང་འཚར་ལོངས་འབྱུང་དུ་འཇུག་རྒྱུ་ནི་གཡོལ་མེད་ཀྱི་འོས་འགན་ཡིན་པ་ཡིད་ལ་དམ་པོར་བཅངས་ནས། བྱམས་པའི་སེམས་དང་འཇམ་པོའི་ངག བརྩེ་བའི་འཛུམ་གྱིས་བསྐྱང་རྒྱུ་ནི་གལ་ཆེའོ། །
“འཇམ་པོས་འཇམ་པོ་འཇོམས་བྱེད་ཅིང་། ། འཇམ་པོས་རྩུབ་པོའང་འཇོམས་པར་བྱེད། །”①ཅེས་དང།“བློ་གྲོས་ལྡན་པས་ལེགས་བསྐྱངས་ན། ། སྐྱེ་བོ་དམན་པའང་མཆོག་ཏུ་འགྱུར། །”②
ཞེས་པའི་ལེགས་བཤད་ལྟར། དགེ་རྒན་ལ་འཇམ་རྩུབ་ཟུང་འཇུག་གི་ཐབས་ཤེས་སྣ་ཚོགས་ཤིག་ལྡན་དགོས་པའང་ཤེས་བྱའི་ཆུ་ཚད་ལས་ཀྱང་ལྷག་པའི་ཆ་རྐྱེན་ཞིག་ཡིན། སློབ་བུ་སྐལ་བཟང་གི་ཐོག་མའི་གནས་བབ་དེའང་མདོར་དེད་ན་ལོ་ངོ་མང་པོར་ཁྱིམ་བདག་གི་བརྩེ་བ་དང་བྲལ་ཅིང་དགེ་རྒན་གྱི་བྱམས་བརྩེའི་ལག་ཟུང་གིས་མདུན་དུ་མ་འཁྲིད་པའི་རྐྱེན་ཡིན་པ་བསྙོན་དུ་མེད། སློབ་མ་ཞིག་སྐྱོང་བར་ཤེས་བྱ་དང་བརྩེ་བ་གཉིས་ཟུང་དུ་འཇུག་དགོས་པ་ནི་དོན་དངོས་འདིས་ར་སྤྲོད་བྱས་ཡོད། 
“ཕྱོགས་སུ་མ་ལྷུང་སྙོམས་བྱས་ན། ། མཐོ་དམན་སུས་ཀྱང་བཀའ་ལ་བརྩི། །”③ཞེས་པ་ལྟར། དགེ་རྒན་ཚད་ལྡན་ཞིག་བྱེད་ན། དུས་རྣམ་ཀུན་ཏུ་ཕྱོགས་རིས་མེད་པ་དང་བརྩེ་བའི་མ་མ་བཞིན་བྱམས་དང་སྙིང་རྗེ་ལ་བརྟེན་ན་རིམ་གྱིས་དེ་ཉིད་ཡ་རབས་ཀྱི་ཕྱོགས་སུ་བསྒྱུར་ཐུབ་པར་ཡིད་ཆེས་བྱས་ཆོག་སྙམ་མོ། །

① ས་སྐྱ་ཀུན་དགའ་རྒྱལ་མཚན། ལེགས་པར་བཤད་པ་རིན་པོ་ཆེའི་གཏེར། [M] མཚོ་སྔོན་མི་རིགས་དཔེ་སྐྲུན་ཁང་། 2008:9.

② ས་སྐྱ་ཀུན་དགའ་རྒྱལ་མཚན། ལེགས་པར་བཤད་པ་རིན་པོ་ཆེའི་གཏེར། [M] མཚོ་སྔོན་མི་རིགས་དཔེ་སྐྲུན་ཁང་། 2008:9.

③ འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོ། རྒྱལ་པོ་ལུགས་ཀྱི་བསྟན་བཅོས། [M] མཚོ་སྔོན་མི་རིགས་དཔེ་སྐྲུན་ཁང་། 2008:36.