རླབས་ཆེ་བའི་ཀྲུང་གོའི་གུང་ཁྲན་ཏང་གིས་ཀྲུང་གོ་དུས་རབས་གསར་པའི་འཐབ་ལམ་ཐོག་སྣེ་ཁྲིད་བྱེད་པ།

“ཀྲུང་དབྱང་སྲིད་གཞུང་དང་། ཞང་ཀང་དམིགས་བསལ་སྲིད་འཛིན་ཁུལ་སྲིད་གཞུང་། སྤྱི་ཚོགས་ལས་རིགས་ཁག་བཅས་ཀྱི་ཐུན་མོང་འབད་བརྩོན་འོག །ཞང་ཀང་ཟིང་ཆ་ནས་བཅོས་སྐྱོང་བར་གྱི་འགྱུར་ལྡོག་ཆེན་པོ་བྱུང་ནས་བཅོས་སྐྱོང་དང་དར་རྒྱས་ཀྱི་འགག་རྩའི་དུས་སྐབས་སུ་གནས་ཡོད།” ཟླ་5ཚེས་30ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསར་དུ་བདམས་ཐོན་བྱུང་བ་དང་འབྲེལ་ཀྲུང་དབྱང་སྲིད་གཞུང་གིས་བསྐོ་གཞག་གནང་བའི་ཞང་ཀང་དམིགས་བསལ་སྲིད་འཛིན་ཁུལ་གྱི་སྲིད་འཛིན་དཔོན་ལི་ཅ་ཁྲའོ་དང་མཇལ་འཛོམས་གནང་སྐབས་དེ་ལྟར་གསུངས་པ་རེད།

“ཞང་ཀང་གི་འཕེལ་རྒྱས་ནི་ནམ་ཡང་ངའི་སེམས་ནང་དུ་ཡོད།” ལོ་5ཡི་སྔོན་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞང་ཀང་གནམ་ཐང་དུ་ཀྲུང་གོ་དང་ཕྱི་རྒྱལ་གྱི་གསར་འགོད་པར་གནང་བའི་བཀའ་མོལ་ཞིག་ལས་ཏང་དང་རྒྱལ་ཁབ་ཀྱིས་ཞང་ཀང་ལ་ཐུགས་ཁྲལ་ཟབ་མོ་གནང་ལུགས་མཚོན་པར་བྱས་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གིས་འཐབ་ཇུས་དང་ཁྱོན་ཡོངས་ནས་འགོ་རྩོམ་སྟེ་“རྒྱལ་ཁབ་གཅིག་ལ་ལམ་ལུགས་གཉིས་”དང་། ཞང་ཀང་གི་ལས་དོན་ཐད་རྣམ་བཤད་གལ་ཆེན་དང་ཐབས་ཇུས་བཀོད་སྒྲིག་གལ་ཆེན་རབ་དང་རིམ་པ་གནང་ནས་“རྒྱལ་ཁབ་གཅིག་ལ་ལམ་ལུགས་གཉིས་”ཀྱི་བྱ་གཞག་ལ་ཉམས་མྱོང་གསར་པ་ཐོབ་པ་དང་འཕེལ་རྒྱས་གསར་པ་ཡོང་རྒྱུར་སྐུལ་འདེད་བཏང་ཡོད། ལྷག་པར་དུ་ན་ནིང་ནས་བཟུང་འདེམས་བསྐོ་གསར་པའི་ལམ་ལུགས་འོག་ཞང་ཀང་གིས་སྔ་རྗེས་སུ་འདེམས་བསྐོའི་ཨུ་ཡོན་ལྷན་ཁང་འདེམས་བསྐོ་དང་། ཁྲིམས་འཛུགས་ལྷན་ཚོགས་སྐབས་བདུན་པ་འདེམས་བསྐོ། སྲིད་འཛིན་འགོ་འདོམས་ཨང་དྲུག་པ་འདེམས་བསྐོ་བཅས་བྱས་ཡོད། ད་ལྟའི་ཞང་ཀང་ནི་ཟིང་ཆ་ནས་བཅོས་སྐྱོང་བར་གྱི་འཕོ་འགྱུར་ཆེན་པོ་ཞིག་ཏུ་གྱུར་ཡོད།

རི་བོ་ལ་རྒྱབ་ཡོད་ཅིང་། ཁང་པ་ནི་གདུང་མ་ཡོད་པས་བརྟན། ཁ་ཕྱོགས་འགྱུར་མཚམས་གལ་ཆེན་འདི་མངོན་འགྱུར་བྱེད་པའི་རྩ་བ་ནི་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་ཡོད་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་དང་མཐུན་པའི་མཛུབ་ཁྲིད་ཡོད་པའི་རྐྱེན་གྱིས་རེད། ཀྲུང་གོའི་གུང་ཁྲན་ཏང་ནི་ང་ཚོའི་བྱ་གཞག་ལ་འགོ་ཁྲིད་བྱེད་མཁན་སྲོག་ཤིང་གི་སྟོབས་ཤུགས་ཤིག་ཡིན་པ་ལོ་རྒྱུས་ཀྱིས་སླར་ཡང་ར་སྤྲོད་བྱས་ཡོད། ཀྲུང་གོའི་གུང་ཁྲན་ཏང་མེད་ན། ཀྲུང་གོ་གསར་པ་ཡོད་མི་སྲིད་ལ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡང་ཡོད་མི་སྲིད།

2021ལོའི་ཟླ་7ཚེས་1ཉིན་གྱི་སྔ་དྲོ། རྒྱལ་ས་པེ་ཅིན་དུ་ཚོན་མདངས་རྣམ་པར་བཀྲ་ཞིང་དར་དམར་ལྷབ་ལྷུབ་ཏུ་གཡོ། གནམ་བདེ་སྒོ་མོ་ཆེའི་མཁར་གྲོང་བརྗིད་ཉམས་ལྡན་ལ། མི་དམངས་དཔའ་བོའི་དྲན་གསོའི་རྡོ་རིང་གི་བྱང་ངོས་སུ་མཐོ་ཚད་སྨི་7.1དང་ཞེང་ཚད་ལ་སྨི་7.1ཟིན་པའི་ཀྲུང་གོའི་གུང་ཁྲན་ཏང་གི་ཏང་རྟགས་དང་“1921”དང་“2021”ཞེས་པའི་ཡིག་རྟགས་དེ་བས་མངོན་གསལ་དོད། ཀྲུང་གོའི་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་རྟེན་འབྲེལ་ཞུ་བའི་ཚོགས་ཆེན་གནམ་བདེ་སྒོ་མོ་ཆེའི་ཐང་ཆེན་དུ་གཟབ་རྒྱས་ངང་འཚོགས་པ་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་དང་མི་དམངས་ཀྱི་ཚབ་ཞུས་ཏེ་“ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་མུ་མཐུད་འབད་འཐབ་བྱས་པ་བརྒྱུད། ལོ་བརྒྱ་དང་པོའི་འབད་འཐབ་དམིགས་འབེན་མངོན་འགྱུར་བྱུང་བ་དང་། ཀྲུང་ཧྭ་ས་གཞི་ཆེན་མོའི་སྟེང་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པ། ལོ་རྒྱུས་ཀྱི་རང་བཞིན་ལྡན་པའི་སྒོ་ནས་བལྟོས་མེད་དབུལ་པོའི་གནད་དོན་ཐག་གཅོད་བྱས་པ། སྤོབས་པ་ཆེར་སྐྱེད་ངང་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ཆེན་བསྐྲུན་པའི་ལོ་བརྒྱ་གཉིས་པའི་འབད་འཐབ་དམིགས་འབེན་ཀྱི་ཕྱོགས་སུ་སྐྱོད་བཞིན་ཡོད་”ཅེས་ཁྱབ་བསྒྲགས་གནང་བ་རེད།

ལོ་བརྒྱའི་འབད་འཐབ་བརྒྱུད། ད་ལྟ་ནི་འཕེལ་རྒྱས་ཀྱི་སྒང་ཡིན། སྔོན་ཆད་ཀྲུང་གོའི་གུང་ཁྲན་ཏང་གིས་མི་དམངས་དང་ལོ་རྒྱུས་ལ་རྒྱུགས་ཤོག་ལེགས་པོ་ཞིག་ཕུལ་ཡོད་པ་དང་། ད་ཆ་ཀྲུང་གོའི་གུང་ཁྲན་ཏང་གིས་ཀྲུང་གོའི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་སླར་ཡང་དུས་རབས་གསར་པའི་འཐབ་ལམ་གསར་པའི་ཐོག་བསྐྱོད་ཡོད།

སྔར་གྱི་ལོ་རྒྱུས་ཤེས་ན་མ་འོངས་ལམ་ལ་བསྐྱོད་པར་མཁས། འཐབ་ལམ་གསར་པར་འབད་འབུངས་བྱེད་པའི་ལོ་རྒྱུས་ཀྱི་འགག་རྩའི་དུས་སྐབས་སུ། 2021ལོའི་ཟླ་11པར་འཚོགས་པའི་ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པས་ཏང་གི་ལོ་བརྒྱའི་འབད་འཐབ་ཀྱི་གྲུབ་འབྲས་གལ་ཆེན་དང་ལོ་རྒྱུས་ཀྱི་ཉམས་མྱོང་ཕྱོགས་ཡོངས་ནས་ཕྱོགས་བསྡོམས་བྱས་པ་དང་། 《ཏང་གི་ལོ་བརྒྱའི་འབད་འཐབ་ཀྱི་གྲུབ་འབྲས་གལ་ཆེན་དང་ལོ་རྒྱུས་ཀྱི་ཉམས་མྱོང་སྐོར་གྱི་ཀྲུང་གུང་ཀྲུང་དབྱང་གི་གྲོས་ཆོད་》ལ་གྲོས་འཆམ་བྱུང་ཞིང་གཏིང་ཟབ་མོའི་སྒོ་ནས་བསྟན་དོན། “ཏང་གིས་བློ་མཐུན་ཞི་ཅིན་ཕིང་གི་ཏང་ཀྲུང་དབྱང་གི་སྲོག་ཤིང་དང་ཏང་ཡོངས་ཀྱི་སྲོག་ཤིང་གི་གོ་གནས་གཏན་འཁེལ་བྱས་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་སློབ་སྟོན་གོ་གནས་གཏན་འཁེལ་བྱས་པ། ཏང་ཡོངས་དང་། དམག་ཡོངས། རྒྱལ་ཡོངས་མི་རིགས་ཁག་གི་མི་དམངས་ཀྱི་ཐུན་མོང་གི་བསམ་འདུན་གྱིས་དུས་རབས་གསར་པའི་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ལོ་རྒྱུས་འཕེལ་རིམ་ལ་སྐུལ་འདེད་གཏོང་བར་ཐག་གཅོད་རང་བཞིན་གྱི་དོན་སྙིང་ལྡན་ཡོད།” ཆབ་སྲིད་ཀྱི་ཆོད་གཏམ་གལ་ཆེན་འདི་ནི་ཏང་གི་ལོ་བརྒྱའི་རིང་གི་འབད་འཐབ་རླབས་པོ་ཆེའི་ལོ་རྒྱུས་ཀྱི་བརྒྱུད་རིམ་ཁྲོད་དང་། དུས་རབས་གསར་པའི་འཕོ་འགྱུར་རླབས་པོ་ཆེ་དང་གྲུབ་འབྲས་རླབས་པོ་ཆེའི་ཁྲོད། “ཀྲུང་གོའི་བཅོས་སྐྱོང་”དང་“ནུབ་ཕྱོགས་ཀྱི་ཟིང་ཆ་”ཡི་མངོན་གསལ་དོད་པའི་བསྡུར་བ་ལས་ཐོབ་པའི་དངོས་ཡོད་ཀྱི་དོན་སྙིང་གལ་ཆེན་དང་ལོ་རྒྱུས་ཀྱི་དོན་སྙིང་ཟབ་མོ་ལྡན་པའི་རྩ་བའི་རང་བཞིན་གྱི་སྡོམ་ཚིག་ཅིག་དང་། ཀྲུང་གོའི་གུང་ཁྲན་ཏང་གིས་ཀྲུང་གོའི་སྣེ་ཁྲིད་དེ་དུས་རབས་གསར་པའི་འཐབ་ལམ་གྱི་ཐོག་གོམ་ཞེང་ཆེན་པོས་མདུན་སྐྱོད་བྱེད་པའི་རྩ་བའི་འགན་ལེན་ཞིག་རེད།

ད་ལོ་ནས་བཟུང་། ཏོག་གསར་གློ་ཚད་རིམས་ནད་དང་ཝུའུ་ཁོ་ལན་གྱི་ཉམས་ཉེན་ལས་གོ་ལ་ཧྲིལ་པོའི་ཉེན་ཁ་དང་འགྲན་སློང་མང་དུ་ཕྱིན་པ་དང་། བདེ་འཇགས་ཀྱི་འགྲན་སློང་སྣ་ཚོགས་རྒྱུན་ཆད་མེད་པར་བྱུང་ཞིང་། འཛམ་གླིང་གི་དཔལ་འབྱོར་སླར་གསོ་ཡོང་བར་དཀའ་ཚེགས་ཆེན་པོ་འཕྲད་ནས་གོ་ལ་ཧྲིལ་པོའི་འཕེལ་རྒྱས་ལ་འགོག་རྐྱེན་ཚབས་ཆེན་འཕྲད་ཡོད། དེ་དང་ཆབས་ཅིག་རྒྱལ་ནང་གི་རིམས་ནད་རྙོག་འཛིང་ཆེ་ལ་འགྱུར་ལྡོག་མང་བ་དང་། དཔལ་འབྱོར་འཕེལ་རྒྱས་ལ་དགོས་མཁོ་ཁུ་བསྡུ་མདུན་དུ་ལྷགས་པ། མཁོ་སྤྲོད་ཀྱི་རྡབ་རྡེག་ཕོག་པ། སྔོན་དཔག་ཞན་དུ་ཕྱིན་པ་བཅས་ཀྱི་གནོན་ཤུགས་གསུམ་འཕྲད་ཡོད། དཔལ་འབྱོར་འཕེལ་རྒྱས་ཀྱི་ཁོར་ཡུག་གི་རྙོག་འཛིང་རང་བཞིན་དང་། ཛ་དྲག་རང་བཞིན། གཏན་འཁེལ་མེད་པའི་རང་བཞིན་བཅས་ཆེ་རུ་ཕྱིན་ནས་འཕར་སྣོན་བརྟན་པོ་དང་། ལས་ཞུགས་བརྟན་པོ། ཟོག་གོང་བརྟན་པོ་བཅས་ལ་འགྲན་སློང་གསར་པ་འཕྲད་ཡོད། རྒྱལ་སྤྱི་དང་རྒྱལ་ནང་གི་གནས་བབ་ཁོར་ཡུག་ལ་འགྱུར་ལྡོག་མགྱོགས་པོ་བྱུང་བ་དང་། སྒྱུར་བཅོས་དང་། འཕེལ་རྒྱས། བརྟན་བརླིང་བཅས་ཀྱི་ལས་འགན་ལྕི་བ། འགལ་བ་དང་ཉེན་ཁ་འགྲན་སློང་མང་བ་བཅས་ནི་ང་ཚོའི་ཏང་གི་རྒྱལ་སྲིད་སྐྱོང་ལུགས་ཀྱི་ངོས་ནས་བརྗོད་ན་ཚོད་བགམ་ནན་པོ་ཞིག་རེད།

ཆར་རླུང་ཁྲོད་དུ་རི་རྒྱལ་ལྷུན་པོ་འགྱིང་། ཆུ་གཞུང་གཏིང་ན་ཀ་བ་རབ་ཏུ་བརྟན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ཀྲུང་གོའི་གུང་ཁྲན་ཏང་གིས་ཀྲུང་གོའི་མི་དམངས་ཀྱི་སྣེ་ཁྲིད་དེ་དཀའ་ངལ་དང་ཉེན་ཁ་རབ་དང་རིམ་པ་ཁྱད་བསད་བྱས་པར་གྲུབ་འབྲས་གསར་པ་རབ་དང་རིམ་པ་ཐོབ་ནས་“རླུང་འཁྱིལ་དར་དམར་འགག་སྒོ་ཆེན་མོ་ལས་སྒྲོལ་བ་”ཡི་རྒྱལ་ཁའི་གླུ་དབྱངས་བླངས་པ་རེད།

——རིམས་ནད་སྔོན་འགོག་བྱས་ཏེ་ཚད་མཐོ་ཤོས་ཀྱི་སྒོ་ནས་མི་དམངས་ཀྱི་ཚེ་སྲོག་དང་བདེ་ཐང་ལ་སྲུང་སྐྱོབ་བྱེད་པ། ཟླ་6ཚེས་1ཉིན་ནས་བཟུང་། ཧྲང་ཧའེ་ཕྱོགས་ཡོངས་ནས་རྒྱུན་གཏན་གྱི་ཐོན་སྐྱེད་དང་འཚོ་བའི་སྒྲིག་ལམ་སླར་གསོ་བྱེད་པའི་དུས་རིམ་དུ་སླེབས་པ་དང་། ཟླ་6ཚེས་6ཉིན་ནས་བཟུང་། པེ་ཅིན་གྱི་ས་ཁུལ་མང་ཆེ་བར་ཟ་ཁང་སླར་གསོ་བྱུང་ནས་ཁྲོམ་གཞུང་ཆེ་ཆུང་གང་སར་“གཡོས་སྦྱོར་གྱི་རྣམ་པ་”སླར་ཡང་མངོན། ཅི་ལིན་དང་། ཀྲེ་ཅང་། ཧྥུ་ཅན། ཧུའུ་ནན་སོགས་ཞིང་ཆེན་ཁག་དྲུག་གིས་ཞིང་ཆེན་ལས་བརྒལ་ནས་ཡུལ་སྐོར་བྱ་རྒྱུ་མུ་མཐུད་སླར་གསོ་བྱས་ཡོད། ལོ་འགོ་ནས་བཟུང་འགོས་ཤུགས་ཆེ་བའི་ཨའོ་སྨི་ཁོ་རུང་གི་གཞན་འགྱུར་སྡོང་རྐང་དེ་ཞིང་ཆེན་མང་ཆེ་བར་ཁྱབ་ནས་མི་དམངས་ཀྱི་ཚེ་སྲོག་དང་བདེ་ཐང་ལ་འཇིགས་སྐུལ་ཐེབས་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་བཀོད་འདོམས་དང་བཀོད་སྒྲིག་གནང་ནས་མི་དམངས་བླ་ན་མེད་པ་དང་ཚེ་སྲོག་བླ་ན་མེད་པ་རྒྱུན་འཁྱོངས་ཀྱིས་ཚན་རིག་དང་མཐུན་པའི་ཐབས་ཇུས་ལ་བརྟེན་ནས་དཀའ་ངལ་ཆེན་པོ་ཁྱད་དུ་བསད། ཟླ་3ཚེས་17ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་གཙོ་སྐྱོང་གནང་ནས་ཏོག་གསར་གློ་ཚད་རིམས་ནད་ཀྱི་དུས་བབ་ལ་དབྱེ་ཞིབ་དང་རིམས་ནད་སྔོན་འགོག་ཚོད་འཛིན་གྱི་ལས་དོན་དམ་འཛིན་ནན་པོ་བྱ་རྒྱུའི་བཀོད་སྒྲིག་གནང་བ་རེད། ཟླ་4ཚེས་29ཉིན། སྤྱི་ཁྱབ་ཧྲུའུ་ཅིས་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཚོགས་འདུ་གཙོ་སྐྱོང་གནང་སྟེ་ནན་གསུང་གནང་དོན། “རིམས་ནད་སྔོན་འགོག་བྱེད་དགོས་པ་དང་། དཔལ་འབྱོར་བརྟན་པོ་ཡོང་དགོས་ལ། འཕེལ་རྒྱས་བདེ་འཇགས་ཡོང་དགོས།”……སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་རང་རྒྱལ་གྱིས་རིམས་ནད་སྔོན་འགོག་ཚོད་འཛིན་གྱི་སྲུང་ཡོལ་བརྟན་དུ་བཏང་བ་དང་། རིམས་ནད་སྔོན་འགོག་ཚོད་འཛིན་གྱི་གྲུབ་འབྲས་སྲ་བརྟན་དུ་བཏང་སྟེ། སྐབས་ཤིག་རིང་རིམས་ནད་ཀྱི་རྡབ་རྡེག་ཕོག་པའི་ཐོན་སྐྱེད་དང་འཚོ་བ་རིམ་བཞིན་“སླར་གསོ་”བྱུང་ཡོད།

——དཔལ་འབྱོར་བརྟན་པོ་ཡོང་བར་བྱས་ཏེ་ཚད་མཐོ་ཤོས་ཀྱི་སྒོ་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གཞི་རྩ་བརྟན་དུ་གཏོང་གང་ཐུབ་བྱས་ཡོད། རང་རྒྱལ་གྱི་དཔལ་འབྱོར་གྱིས་རིམས་ནད་ཀྱི་ཤུགས་རྐྱེན་ངན་པ་རིམ་བཞིན་ཁྱད་བསད་བྱས་ཏེ་དམིགས་ཚད་གཙོ་བོ་མང་པོ་ཞིག་ལེགས་སུ་ཕྱིན་པ་དང་དཔལ་འབྱོར་སླར་གསོའི་རྣམ་པ་མངོན་ཡོད། ཕྱིའི་ཁོར་ཡུག་རྙོག་འཛིང་ཆེ་ལ་འགྱུར་ལྡོག་མང་བ་དང་རིམས་ནད་ཀྱི་རྡབ་རྡེག་སོགས་འགལ་རྐྱེན་གྱི་མདུན་དུ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྤྱི་འདོམས་བྱ་རྒྱུ་རྒྱུན་འཁྱོངས་དང་། སྤྱི་ཁོག་སྲིད་ཇུས་ཀྱི་སྙོམ་སྒྲིག་བྱེད་ཤུགས་ཆེ་རུ་བཏང་ནས་དཔལ་འབྱོར་བརྟན་པོ་ཡོང་བ་བྱས་ཡོད། དུས་ཚིགས་དང་པོར་རང་རྒྱལ་གྱི་རྒྱལ་ནང་ཐོན་སྐྱེད་རིན་ཐང་བསྡོམས་འབོར་དུས་མཚུངས་ལས་4.8%འཕར་བ་དང་། གཏན་འཇགས་རྒྱུ་ནོར་ལ་མ་འཇོག་(ཞིང་དུད་ཚུད་མེད་པ་)དུས་མཚུངས་ལས་9.3%འཕར་བ། གཞི་ཁྱོན་ཡན་གྱི་ལག་རྩལ་མཐོ་བའི་བཟོ་སྐྲུན་ལས་རིགས་ཀྱི་རིན་ཐང་འཕར་མ་དུས་མཚུངས་ལས་14.2%འཕར་བ་བཅས་ཀྱི་ཐོག་ནས་དཔལ་འབྱོར་འཁོར་སྐྱོད་སྤྱིའི་ཆ་ནས་བརྟན་པོའི་ངང་འགོ་ཚུགས་ཡོད། ཟླ་1པོ་ནས་5པའི་བར་རང་རྒྱལ་གྱིས་ཕྱི་རྒྱལ་གྱི་མ་དངུལ་དངོས་སུ་སྤྱོད་ཚད་མི་དམངས་ཤོག་སྒོར་དུང་ཕྱུར་5642ཟིན་པ་དེ་དུས་མཚུངས་ལས་17.3%འཕར་བ་དང་། ཟླ་5པར་ཕྱི་ཕྱོགས་ཚོང་དོན་གྱི་ཕྱིར་གཏོང་ནང་འདྲེན་གྱི་འཕར་ཚད་དེ་ཟླ་4པ་དང་བསྡུར་ན་9.2%འཕར་བ་དང་། ལྷག་པར་དུ་འབྲི་ཆུའི་ཟུར་གསུམ་ཁུལ་གྱི་ཕྱིར་གཏོང་ནང་འདྲེན་ཟླ་གོང་མ་ལས་20%ཙམ་འཕར་ཡོད།……མཐའ་གཅིག་ཏུ་འཕེལ་རྒྱས་ཀྱི་དུས་རིམ་གསར་པའི་སྤུས་ཚད་མཐོ་བའི་འཕེལ་རྒྱས་ཀྱི་དམིགས་འབེན་བརྟན་དུ་བཏང་ནས་འཕེལ་རྒྱས་ཀྱི་འདུ་ཤེས་གསར་པ་ལག་བསྟར་གཏིང་ཟབ་དང་འཕེལ་རྒྱས་ཀྱི་རྣམ་པ་གསར་པ་ཏན་ཏིག་བཏོད་དེ་ཀྲུང་གོའི་དཔལ་འབྱོར་གྱི་གྲུ་གཟིངས་ཆེན་པོ་འདི་དཀའ་ངལ་ལ་མི་འཛེམ་པར་མདུན་དུ་སྐྱོད་བཞིན་ཡོད།

——དགུན་དུས་ཨོ་རྩལ་འགྲན་ཚོགས་གཉེར་ནས་འཛམ་གླིང་ལ་སྟབས་བསྡུས་དང་། བདེ་འཇགས། ངོ་མཚར་ཆེ་བ་བཅས་ཀྱི་ལུས་རྩལ་འདུ་ཚོགས་གཟབ་རྒྱས་ཤིག་ཕུལ་ཡོད། 2022ལོའི་ཟླ་2ཚེས་20ཉིན་གྱི་དགོང་མོར། རྒྱལ་ཁབ་ལུས་རྩལ་ཐང་དུ་བཀྲག་མདངས་འཚེར་བཞིན་ཡོད་པ་དང་། “གནམ་འོག་ཁྱིམ་གཅིག་”ཅེས་པའི་ཡིག་གཟུགས་མེ་རིས་དེ་“བྱིའུ་ཚང་”གི་མཁའ་དབྱིངས་སུ་རྣམ་པར་བཀྲ་ཞིང་། འཛམ་གླིང་ཀུན་གྱི་དོ་སྣང་བྱེད་པའི་པེ་ཅིན་དགུན་དུས་ཨོ་རྩལ་འགྲན་ཚོགས་བདེ་བླག་ངང་མཇུག་བསྒྲིལ། ཟླ་2ཚེས་4ཉིན་ནས་ཟླ་3ཚེས་13ཉིན་བར། ཟླ་བ་གཅིག་ལྷག་ཙམ་གྱི་རིང་ལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་རྒྱལ་ཁབ་ལུས་རྩལ་ཐང་གི་ཀྲུའུ་ཞི་སྟེགས་བུའི་ཐོག་ཐེངས་བཞི་ཕེབས་ནས་པེ་ཅིན་དགུན་དུས་ཨོ་རྩལ་འགྲན་ཚོགས་དང་དགུན་དུས་དབང་སྐྱོན་ཨོ་རྩལ་འགྲན་ཚོགས་ཀྱི་འགོ་ཚུགས་མཛད་སྒོར་ཞུགས་པ་རེད། ཀྲུང་གོས་ཏོག་གསར་གློ་ཚད་རིམས་ནད་སོགས་ཀྱི་དཀའ་ངལ་དང་འགྲན་སློང་སྣ་ཚོགས་ཁྱད་བསད་བྱས་ཏེ་པེ་ཅིན་དགུན་དུས་ཨོ་རྩལ་འགྲན་ཚོགས་དང་དགུན་དུས་དབང་སྐྱོན་ཨོ་རྩལ་འགྲན་ཚོགས་བདེ་བླག་ངང་གཉེར་བ་དང་། རྒྱལ་སྤྱིའི་སྤྱི་ཚོགས་ལ་བརྗིད་ཉམས་ལྡན་པའི་ཁས་ལེན་བྱས་པ་ཕྱོགས་ཡོངས་ནས་དོན་ཐོག་ཏུ་འཁྱོལ་བ་བྱས་ཏེ། གཡོ་འགུལ་དང་འཕོ་འགྱུར་གྱི་དུས་སྐབས་སུ་གནས་པའི་མིའི་རིགས་ལ་ཡིད་ཆེས་དང་སྟོབས་ཤུགས་ཆེན་པོ་བསྣན་ཡོད།

——དམངས་འཚོ་ལ་ཕན་པར་བྱས་ནས་བློ་བརྟན་འགྱུར་མེད་ངང་དམངས་འཚོར་བདེ་སྐྱིད་བསྐྲུན་ཡོད། ཟླ་4ཚེས་11ཉིན་གྱི་ཕྱི་དྲོ། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཧའེ་ནན་གླིང་ཕྲན་གྱི་དབུས་ལྷོའི་རྒྱུད་ཀྱི་ཝུའུ་ཀྲི་ཧྲན་གྲོང་ཁྱེར་དུ་རྟོག་ཞིབ་གནང་བར་ཕེབས་པ་དང་། ཧྲུའེ་མན་ཞང་མའོ་ན་གྲོང་ཚོ་རུ་ཁོང་ལི་རིགས་ཀྱི་གྲོང་མིའི་ཁྱིམ་དུ་ཕེབས་ནས་སྒོ་རའི་ནང་དང་། མགྲོན་ཁང་། ཉལ་ཁང་སོགས་ལ་གཟིགས་ཞིབ་གནང་བ་རེད། སྤྱི་ཁྱབ་ཧྲུའུ་ཅི་ཡིས་ནན་གསུང་གནང་དོན། རིམ་པ་ཁག་གི་འགོ་ཁྲིད་ལས་བྱེད་པས་ཏང་གི་མང་ཚོགས་ལམ་ཕྱོགས་དོན་འཁྱོལ་བྱེད་པ་དང་། ཏང་གི་རྩ་བའི་དགོངས་དོན་ཡིད་ལ་བརྟན་པོར་འཆང་བ། མང་ཚོགས་ཀྱིས་བསམ་བློ་གཏོང་སར་བསམ་བློ་གཏོང་བ། མང་ཚོགས་ཀྱིས་སེམས་ཁྲལ་བྱེད་སར་སེམས་ཁྲལ་བྱེད་པ་བཅས་བྱས་ཏེ། སེམས་ཤུགས་ཡོད་ཚད་མི་སེར་ལ་འཚོ་བ་སྐྱིད་པོ་རོལ་དུ་འཇུག་རྒྱུའི་ཐོག་གཏོང་དགོས། དམིགས་བསལ་གྱི་དུས་སྐབས་ཇི་ཙམ་རིང་། དམངས་འཚོ་ལེགས་གཏོང་དང་བདེ་སྐྱིད་ཆེ་རུ་གཏོང་རྒྱུར་དེ་ཙམ་མཐོང་ཆེན་བྱེད་པ་དང་། སེམས་ནུས་ཡོད་རྒུ་བཏོན་ནས་མང་ཚོགས་ཀྱི་འཕྲལ་དཀའ་སྡུག་སྨོན་གྱི་གནད་དོན་ཐག་གཅོད་ཡག་པོ་བྱེད་པ། མཁོ་སྤྲོད་འགན་ལེན་དང་། ཟོག་གོང་བརྟན་པོ། ལས་ཞུགས་བརྟན་པོ་དང་རྒྱ་སྐྱེད་བྱེད་པ། དཀའ་ངལ་རོགས་སྐྱོར་ལ་ཤུགས་སྣོན་རྒྱག་པ་བཅས་བྱས་ནས་མི་དམངས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་སྣང་བཅས་རྒྱུན་མཐུད་ངང་ཆེ་རུ་གཏོང་དགོས། 2022ལོར་དཀའ་ངལ་ཡོད་པའི་མང་ཚོགས་ཀྱི་རོགས་སྐྱོབ་ཁ་གསབ་མ་དངུལ་སྒོར་དུང་ཕྱུར་1546.83བཀོད་སྒྲིག་བྱས་པ་དེ་ན་ནིང་ལས་སྒོར་དུང་ཕྱུར་70.62འཕར་བ་དང་། ལས་འཁྱུར་ངལ་གསོ་རྒྱག་མཁན་གྱི་གཞི་རྩའི་རྒན་གསོའི་དངུལ་སླར་ཡང་4%མཐོ་རུ་བཏང་ཡོད་པས། ལས་འཁྱུར་ངལ་གསོ་རྒྱག་མཁན་དུང་ཕྱུར་1.3ལྷག་ཙམ་ལ་ཕན་པ་ཐོབ་རྒྱུ་རེད།

ལོ་བརྒྱའི་འགྱུར་ལྡོག་དང་དུས་རབས་ཀྱི་རིམས་ནད་མཉམ་འདྲེས་ཀྱི་རྙོག་འཛིང་ཆེ་བའི་དུས་བབ་འོག་གྲུབ་འབྲས་དེ་དག་ཐོབ་པ་ནི་ལས་སླ་མོ་བྱུང་བ་ཞིག་མིན་པས། ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་དཔའ་མཛངས་རྟུལ་ཕོད་ཀྱིས་འཐབ་ལམ་གསར་པར་བསྐྱོད་པ་ནས་དུས་རབས་གསར་པར་བྱས་རྗེས་འཇོག་པའི་དཔའ་ཉམས་དང་ཡིད་ཆེས་སྔར་བས་ཆེ་རུ་ཕྱིན་ཡོད། “ཀྲུང་གོའི་གུང་ཁྲན་ཏང་ནི་ང་ཚོའི་བྱ་གཞག་རླབས་པོ་ཆེ་ལ་བློས་འགེལ་ཆོག་པའི་སྲོག་ཤིང་ཞིག་ཡིན་པས། ཐོག་མཐའ་བར་གསུམ་དུ་ཏང་གི་འགོ་ཁྲིད་རྒྱུན་འཁྱོངས་བྱས་ཚེ་མདུན་སྐྱོད་ལམ་བུའི་ཐོག་གི་དཀའ་ངལ་དང་ཉེན་ཁ་གང་རུང་ལས་རྣམ་པར་རྒྱལ་ཐུབ་ངེས་ཡིན་པ་དང་། ང་ཚོས་སྒྲུབ་འདོད་པའི་བྱ་བ་གང་རུང་སྒྲུབ་ཐུབ་ངེས་རེད།” སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་པེ་ཅིན་དགུན་དུས་ཨོ་རྩལ་འགྲན་ཚོགས་དང་དགུན་དུས་དབང་སྐྱོན་ཨོ་རྩལ་འགྲན་ཚོགས་ཀྱི་ཕྱོགས་བསྡོམས་གཟེངས་བསྟོད་ཚོགས་འདུའི་ཐོག་གནང་བའི་གསུང་ཚིག་ནི་སྙན་ཞིང་འཇེབས་ལ་ཤུགས་ཀྱང་ལྡན་པ་ཞིག་རེད།

ཟླ་6ཚེས་8ཉིན་གྱི་དབྱར་འབྲིང་གི་དུས་སུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སི་ཁྲོན་དུ་རྟོག་ཞིབ་གནང་སྐབས་ཟབ་མོའི་ངང་བསྟན་དོན། “ཕྱོགས་ཡོངས་ནས་སྤྱི་ཚོགས་རིང་ལུགས་ཀྱི་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པ་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་བ་བྱེད་པར་མདུན་ལམ་ནི་འོད་སྟོང་ལྡན་པ་ཞིག་ཡིན་ལ་འགྲོ་ལམ་ནི་ཀྱག་ཀྱོག་ལྡན་པ་ཞིག་ཡིན་པས། ད་དུང་ཉེན་ཁ་དང་འགྲན་སློང་སྣ་ཚོགས་འཕྲད་སྲིད་པས་ཉེན་ཁ་དང་འགྲན་སློང་སྣ་ཚོགས་བསུ་ཕོད་པ་བྱེད་དགོས། གནམ་ནས་བག་ལེབ་ལྷུང་མི་སྲིད་ལ་གྲུབ་འབྲས་ཚང་མ་ང་ཚོས་ཐུན་མོང་ཐོག་འབད་འཐབ་བྱས་ནས་འཐོབ་པ་བྱེད་དགོས།”

འཐབ་ལམ་གསར་པར་མདུན་སྐྱོད་དང་དུས་རབས་གསར་པར་བྱས་རྗེས་འཇོག་དགོས་ན། ངེས་པར་དུ་ཏང་གི་ཕྱོགས་ཡོངས་ཀྱི་འགོ་ཁྲིད་རྒྱུན་འཁྱོངས་དང་། ཏང་སྲིད་དམག་དམངས་སློབ་དང་། ཤར་ལྷོ་ནུབ་བྱང་དབུས་བཅས་ཚང་མ་ལ་འགོ་ཁྲིད་བྱེད་མཁན་ནི་ཏང་ཡིན་པ་བློ་ལ་བརྟན་པོར་ངེས་དགོས། དེང་སྐབས་འཛམ་གླིང་ལ་འགྱུར་ལྡོག་ཆེན་པོ་བྱུང་བ་དང་དེང་རབས་ཀྲུང་གོར་འགྱུར་ལྡོག་གཏིང་ཟབ་བྱུང་ཡོད། ཆར་རླུང་གི་འགྱུར་ལྡོག་ཁྲོད་དུ་འཐབ་ཇུས་ཀྱི་གཏིང་ཤུགས་ཇི་ལྟར་མཐའ་འཁྱོངས་བྱེད་དགོས་སམ། རྙོག་འཛིང་གི་ལྟར་སྣང་ཁྲོད་དུ་ལོ་རྒྱུས་ཀྱི་རང་འགུལ་ཇི་ལྟར་སྟངས་འཛིན་བྱེད་དགོས་སམ། “སྒྱུར་བཅོས་སྒོ་འབྱེད་ཀྱི་ལས་འགན་ཇི་ཙམ་ལྕི་ན་དེ་ཙམ་གྱིས་ཏང་གི་འགོ་ཁྲིད་ལ་ཤུགས་སྣོན་རྒྱག་པ་དང་ལེགས་སུ་བཏང་ནས། ཏང་འདི་ཉིད་ཐོག་མཐའ་བར་གསུམ་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བྱ་གཞག་གི་འགྱུར་མེད་སྟོབས་ལྡན་གྱི་འགོ་ཁྲིད་སྲོག་ཤིང་དུ་འགྱུར་བའི་འགན་ལེན་བྱེད་དགོས་”ཞེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བྱ་གཞག་ལེགས་འགྲུབ་ཡོང་བའི་འགག་རྩ་གསལ་སྟོན་གནང་ཡོད། ཏང་གི་ཕྱོགས་ཡོངས་ཀྱི་འགོ་ཁྲིད་རྒྱུན་འཁྱོངས་བྱེད་པར་“གཏན་འཁེལ་གཉིས་”ཀྱི་ཐག་གཅོད་རང་བཞིན་གྱི་དོན་སྙིང་ལ་སྔར་བས་ངོས་འཛིན་གཏིང་ཟབ་བྱས་ཏེ། སྔར་བས་རང་རྟོགས་ངང་“འདུ་ཤེས་བཞི་”ཆེ་རུ་སྐྱེད་པ་དང་། “གདེང་ཚོད་བཞི་”བརྟན་དུ་གཏོང་བ། “སྲུང་སྐྱོང་གཉིས་”ཐུབ་པ་བཅས་བྱེད་དགོས།

འཐབ་ལམ་གསར་པར་མདུན་སྐྱོད་དང་དུས་རབས་གསར་པར་བྱས་རྗེས་འཇོག་དགོས་ན། ངེས་པར་དུ་ཏང་འཛུགས་སྐྲུན་ལ་ཤུགས་སྣོན་རྒྱག་པ་དང་བློ་བརྟན་འགྱུར་མེད་ངང་ཕྱོགས་ཡོངས་ནས་ཏང་ནན་པོར་སྐྱོང་རྒྱུར་སྐུལ་འདེད་གཏོང་དགོས། རང་ངོས་གསར་བརྗེ་བྱེད་ཕོད་པ་ནི་ཏང་གིས་ལོ་བརྒྱའི་རིང་འབད་འཐབ་བྱས་ནས་སྐྱེད་སྲིང་བྱས་པའི་མངོན་གསལ་དོད་པའི་གཤིས་རྒྱུད་ཅིག་ཡིན་པ་དང་། ཕྱོགས་ཡོངས་ནས་ཏང་ནན་པོར་སྐྱོང་རྒྱུ་ནི་དུས་རབས་གསར་པའི་ཏང་གི་རང་ངོས་གསར་བརྗེའི་ལག་ལེན་རླབས་པོ་ཆེ་ཞིག་རེད། ང་ཚོའི་ཏང་ཉིད་ཆུང་བ་ནས་ཆེ་བ་དང་སྟོབས་ཞན་པ་ནས་སྟོབས་ལྡན་དུ་འགྱུར་ཐུབ་པ་དང་། ཐོག་མཐའ་བར་གསུམ་དུ་དུས་རབས་ཀྱི་མདུན་གྲལ་དུ་སྐྱོད་ཐུབ་པའི་རྒྱུ་མཚན་གལ་ཆེན་ཞིག་ནི་ཐོག་མཐའ་བར་གསུམ་དུ་རང་ངོས་གསར་བརྗེ་བྱེད་ཕོད་པ་དེ་ཡིན། དུས་རབས་གསར་པར་སླེབས་རྗེས། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཕྱོགས་ཡོངས་ནས་ཏང་ནན་པོར་སྐྱོང་རྒྱུ་དེ་“ཕྱོགས་ཡོངས་བཞི་”ཡི་འཐབ་ཇུས་བཀོད་སྒྲིག་ནང་བཅུག་སྟེ། རང་ངོས་གསར་བརྗེ་ལ་བརྟེན་ནས་ལོ་རྒྱུས་ཀྱི་དུས་འཁོར་ལས་སྒྲོལ་རྒྱུའི་ལན་གཉིས་པ་དེ་བཏབ་པ་རེད། ཏང་གིས་སྔར་བྱུང་མ་མྱོང་བའི་རུལ་རྒོལ་གཙང་སྤེལ་གྱི་འཐབ་རྩོད་བྱས་པར་བརྟེན། མི་དམངས་མང་ཚོགས་དང་ཤ་ཁྲག་ལྟ་བུའི་འབྲེལ་བ་མཐའ་འཁྱོངས་དང་། མི་དམངས་ཀྱིས་སྙིང་ཐག་པ་ནས་བརྩི་བཀུར་བྱེད་པའི་ལོ་རྒྱུས་ཀྱི་རང་འགུལ་ཐོབ་པ་དང་། ཏང་ཡོངས་ཀྱིས་མཐུན་སྒྲིལ་དང་གཅིག་གྱུར་ཚད་མཐོན་པོ་བྱེད་པ་དང་། དུས་རབས་ཀྱི་མདུན་གྲལ་དུ་སྐྱོད་པ། མི་དམངས་ཀྱི་སྣེ་ཁྲིད་དེ་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པ་བཅས་ཀྱི་ལོ་རྒྱུས་ཀྱི་རང་འགུལ་ཐོབ་ཡོད། འཐབ་ལམ་གསར་པའི་ཐོག་ངེས་པར་དུ་དུས་རབས་གསར་པའི་ཏང་འཛུགས་སྐྲུན་གྱི་ལས་གྲྭ་རླབས་པོ་ཆེ་གསར་པར་མུ་མཐུད་སྐུལ་འདེད་གཏོང་བ་དང་། ཏང་འཛུགས་སྐྲུན་གྱི་སྙིང་སྟོབས་རླབས་པོ་ཆེ་དར་སྤེལ་ཤུགས་ཆེན་གཏོང་བ། ཐོག་མའི་བསམ་འདུན་དང་འགན་འཁྲི་མ་བརྗེད་པར་རང་ངོས་གསར་བརྗེ་བྱེད་ཕོད་པ། བློ་བརྟན་འགྱུར་མེད་ཀྱི་སྒོ་ནས་ཏང་སྲོལ་སྲིད་གཙང་འཛུགས་སྐྲུན་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་སྐུལ་འདེད་གཏོང་བ་བཅས་བྱས་ཏེ། ཏང་གི་རང་ངོས་གསར་བརྗེས་སྤྱི་ཚོགས་ཀྱི་གསར་བརྗེ་རླབས་པོ་ཆེར་སྣེ་ཁྲིད་ཟམ་མི་འཆད་པར་བྱེད་དགོས། ཡུན་རིང་མ་འགོར་བའི་སྔོན་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་བཞི་བཅུ་པ་གཙོ་སྐྱོང་གནང་སྐབས་ནན་གསུང་གནང་དོན། “ངེས་པར་དུ་ཐོག་མཐའ་བར་གསུམ་དུ་གནད་དོན་ལ་ལྟ་སྟངས་ཡང་དག་འཛིན་པའི་བློ་སྟོབས་དང་གྲི་ཁ་ནང་ལ་བསྐོར་བའི་བློ་རྩ་བརྟན་པོ་མཐའ་འཁྱོངས་བྱས་ཏེ། མཐའ་གཅིག་ཏུ་དུག་སྐྲན་མེད་པ་བཟོ་བ་དང་། དུག་ཁུངས་གཙང་སེལ། དུག་བཞུར་གཙང་སེལ་བཅས་བྱས་ནས་ཏང་གི་ངོ་བོ་ནམ་ཡང་མི་འགྱུར་བ་དང་། དམར་པོའི་སྲིད་དབང་ནམ་ཡང་མི་འགྱུར་བའི་འགན་ལེན་བྱེད་དགོས།”

“ལམ་ཐག་ཇི་ཙམ་རིང་ཡང་ཁྱེད་རང་ང་ཚོའི་འགྲམ་དུ་ཡོད་པ་དང་། དད་སེམས་ནམ་ཡང་འགྱུར་མི་སྲིད་ལ། ཐོག་མའི་བསམ་འདུན་ནམ་ཡང་བརྗེད་མི་སྲིད།” “རླབས་ཆེ་བའི་ཀྲུང་གོའི་གུང་ཁྲན་ཏང་གིས་རླུང་བརྟེན་རླབས་གཤག་དང་གྲུ་གཡོར་བསྒྲེངས་ནས་རྒྱང་སྐྱོད་བྱས་ཏེ་ཀྲུང་གོ་ཉིད་དུས་རབས་གསར་པའི་འཐབ་ལམ་ཐོག་སྣེ་ཁྲིད་བྱེད་ཀྱི་ཡོད།” “སྣེ་ཁྲིད་”ཅེས་པའི་གླུ་གཞས་ཀྲུང་ཧྭའི་ས་གཞི་ཆེན་མོར་ཁྱབ་པ་དང་ཀྲུང་གོའི་མི་དམངས་ཀྱི་བསམ་འདུན་མཚོན་པར་བྱས་ཡོད། འཐབ་ལམ་གསར་པའི་ཐོག་ཏང་ཡོངས་དང་རྒྱལ་ཡོངས་མི་དམངས་ཀྱིས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་བྱས་ཏེ་འབད་འབུངས་ཡར་བརྩོན་དང་། རྒྱུན་འཁྱོངས་ལྷོད་མེད། བབ་བསྟུན་འཕྲལ་སྒྲུབ། རྒྱུན་མཐུད་འབད་འཐབ་བཅས་བྱས་ནས་སྔར་བར་བློ་རྩ་བརྟན་པོའི་རང་རྟོན་དང་། སྔར་བས་བློ་ཐག་ཆོད་པོའི་སྤོབས་པར་བརྟེན་ནས་ལོ་བརྒྱ་གཉིས་པའི་འབད་འཐབ་དམིགས་འབེན་གྱི་ཕྱོགས་སུ་དཔའ་ངར་ཆེར་བསྐྱེད་ཀྱིས་མདུན་སྐྱོད་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ཀྲུང་གོའི་ཕུགས་འདུན་གྱི་ཕྱོགས་སུ་དཔའ་ངར་ཆེར་བསྐྱེད་ཀྱིས་མདུན་སྐྱོད་བྱས་ཏེ། བྱ་སྤྱོད་ངོ་མའི་ཐོག་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས།

བློ་བཟང་ལྷ་མོས་བསྒྱུར།