སློབ་ཆུང་དབྱིན་ཡིག་སློབ་ཁྲིད་སྤུས་ཚད་མཐོར་འདེགས་གཏོང་ཐབས་སྐོར་གྱི་ཉམས་མྱོང་རོབ་ཙམ་གླེང་བ།

[གནད་བསྡུས] ལོ་དགུའི་འོས་འགན་སློབ་གསོའི་བསླབ་ཚན་ཚད་གཞི་ལྟར་སློབ་ཆུང་ལོ་རིམ་གསུམ་པ་ནས་བཟུང་དབྱིན་ཡིག་གི་བསླབ་ཚན་བཀོད་སྒྲིག་བྱས་ཡོད་པ་དང་། ལོ་ངོ་བཅུ་ཕྲག་གི་རིང་ལ་དབྱིན་ཡིག་སློབ་ཁྲིད་རྒྱུན་ཆད་མ་མྱོང་། ཡིན་ན་ཡང་ཉེ་བའི་ལོ་འདི་དག་གི་སློབ་མའི་སྦྱངས་འབྲས་ལ་དབྱེ་ཞིབ་བྱས་པ་ལྟར་ན། སློབ་མའི་འབྲི་རྒྱུགས་ལ་འབྲས་བུ་ཅུང་ཙམ་རེ་བླངས་ཡོད་ཀྱང། སྤྱིའི་གོ་བརྡ་སྤྲོད་པའི་ནུས་པ་སྐྱེད་སྲིང་ཕྱོགས་ལ་འཕེལ་རྒྱས་ཆེན་པོ་མེད། སློབ་སྦྱོང་གོ་རིམ་ཁྲོད་སློབ་མའི་རིགས་ལམ་གསར་གཏོད་ཀྱི་ནུས་པ་ཉམས་པ་དང། དགེ་རྒན་གྱི་སློབ་ཁྲིད་ཐབས་ལམ་གུ་དོག་པ། དབྱིན་སྐད་བཀོལ་སྤྱོད་ཀྱི་ཁོར་ཡུག་ཆུང་བ་བཅས་ཀྱི་གནད་དོན་འགའ་སློབ་དཔྱོད་བྱ་བའི་གོ་རིམ་ཁྲོད་མངོན་སུམ་དུ་མཐོང་ཡོང་བས་ན། དེའི་ཐད་ཀྱི་གནད་དོན་ལེགས་བཅོས་བྱེད་པའི་ཐབས་ཤེས་རེ་འགའ་ངོ་སྤྲོད་བྱས་ཡོད་དོ། །

[གནད་ཚིག] སློབ་གྲྭ་ཆུང་འབྲིང་། དབྱིན་སྐད་སློབ་གསོ། དབྱིན་ཡིག་གི་བསླབ་གཞི། སློབ་ཁྲིད་གྲ་སྒྲིག།

དང་པོ། ཐབས་སྣ་མང་སྤྱད་ནས་སློབ་ཁྲིད་གྲ་སྒྲིག་བྱེད་པ། 

འོས་འགན་སློབ་གསོའི《དབྱིན་ཡིག་བསླབ་ཚན་ཚད་གཞིའི》དོན་ཚན་བཞི་པའིི་ལག་བསྟར་གྲོས་གཞི་ལས་སློབ་ཁྲིད་གྲོས་གཞིའི་ཚན་ཆུང་དང་པོ་ལྟར་ན།“སློབ་ཁྲིད་བྱ་བའི་ཁྲོད་དུ་དགེ་རྒན་རྣམས་ཀྱིས་ངེས་པར་དུ་སློབ་མ་དཀྱིལ་སྙིང་དུ་འཛིན་པ་དང་། སློབ་མ་ཡོངས་ལ་ཁ་ཕྱོགས་པ། སློབ་མ་སོ་སོའི་ཁྱད་ཆོས་ལ་དོ་ཁུར་བྱེད་པ། སློབ་ཁྲིད་ཀྱི་ཐབས་ལམ་ལེགས་བཅོས་བྱས་ཏེ་སློབ་ཁྲིད་ཀྱི་ཆུ་ཚད་མཐོ་རུ་འདེགས་པ་སོགས་མཐའ་གཅིག་ཏུ་རྒྱུན་འཁྱོངས་སྒོས། སློབ་མ་རྣམས་མུ་མཐུད་དུ་སློབ་སྦྱོང་གི་ལས་ལ་ཞུགས་པར་རྨང་གཞི་བརྟན་པོ་འདིང་བ། སློབ་མའི་མིག་སྔར་གྱི་དབྱིན་ཡིག་ཆུ་ཚད་དང་འཕེལ་རྒྱས་དགོས་མཁོ། སློབ་མ་རེ་རེའི་སློབ་སྦྱོང་ཉམས་མྱོང་དང་ཐུན་མོང་མ་ཡིན་པའི་ཁྱད་ཆོས་སོགས་ལ་ཕྱོགས་ཡོངས་ནས་རྒྱུས་ལོན་གཏིང་ཟབ་བྱས་ཏེ་གང་ལ་གང་འཚམ་གྱིས་སློབ་ཁྲིད་གྲ་སྒྲིག་བྱེད་པ་དང་། སློབ་ཁྲིད་ཀྱི་ཐབས་ལམ་སྣ་ཚོགས་བཀོལ་སྤྱོད་བྱེད་པ། སློབ་ཁྲིད་ཀྱི་དཀའ་གཙོ་གནད་ཐག་གཅོད་གང་ལེགས་བྱས་ཏེ་སློབ་མའི་བརྩོན་སེམས་ཇེ་བརྟན་དུ་གཏོང་་བ། ཁོ་ཚོའི་དབྱིན་ཡིག་སྦྱོང་བའི་འདུན་པ་རྒྱུན་འཁྱོངས་དང་། དགའ་སྣང་ཉམས་ལེན་བྱས་པ་བརྒྱུད། དབྱིན་ཡིག་སྦྱངས་པའི་རྒྱལ་ཁའི་ཚོར་སྣང་ཐོབ་ཏུ་འཇུག་པ། བསླབ་རིམ་སོ་སོའི་སློབ་སྦྱོང་ཁྲོད་ཚད་མི་འདྲ་བའི་ངང་རིམ་བཞིན་འཕེལ་རྒྱས་འབྱུང་བར་བྱ་དགོས།”ཞེས་བསྟན་ཡོད། དཔེར་ན། སློབ་ཆུང་ལོ་རིམ་བཞི་པའི་སྟོད་ཆའི་སློབ་ཚན་དང་པོ།“Unit One. My classroom”ལྟ་བུར་མཚོན་ན། གཅིག་ནས་དགེ་རྒན་གྱིས་སློབ་ཁྲིད་གྲ་སྒྲིག་བྱེད་སྐབས་ཐོག་མར་སློབ་ཚན་འདིའི་སློབ་ཁྲིད་ཀྱི་དམིགས་ཚད་གང་ཡིན་པ་དེ་གསལ་བོར་ཤེས་དགོས། གཉིས་ནས་སློབ་ཁྲིད་ཀྱི་ནང་དོན་གཙོ་བོ་དེ་གང་ཡིན་ཤེས་དགོས། གསུམ་ནས་སློབ་ཁྲིད་བྱ་འགུལ་ཇི་ལྟར་བཀོད་སྒྲིག་བྱེད་པར་འཆར་གཞི་འགོད་པ། བཞི་ནས་སློབ་ཁྲིད་ཀྱི་བརྒྱུད་རིམ་ཡིད་ལ་གསལ་བོར་ངེས་པར་བྱས་ཏེ་སློབ་མའི་ཆུ་ཚད་དང་དགོས་མཁོ་ལ་བསྟུན་ནས་སློབ་ཁྲིད་གྲ་སྒྲིག་དང་བཀོལ་སྤྱོད་བྱས་ན་ཕ་རོལ་ལ་ཡང་དག་པར་བརྡ་སྤྲོད་པའི་ནུས་པ་སྐྱེད་སྲིང་བྱེད་ཐུབ་པ་མ་ཟད། ད་དུང་སློབ་མས་མུ་མཐུད་དུ་སློབ་འདོད་པའི་རྨང་གཞི་བརྟན་པོ་འདིང་ཐུབ། 

གཉིས་པ། དབྱིན་སྐད་བེད་སྤྱད་དེ་དབྱིན་ཡིག་གི་རྒྱུན་སྲོལ་སློབ་ཁྲིད་བྱེད་ཐབས། 

ད་ལྟ་ང་ཚོའི་དབྱིན་ཡིག་སློབ་ཁྲིད་ཁྲོད་དུ་རྒྱ་སྐད་དམ་བོད་སྐད་ལམ་ནས་སློབ་ཁྲིད་བྱེད་པའི་སྣང་ཚུལ་མང་དུ་མཐོང་བས་ངེས་པར་དུ་བཅོས་སྒྱུར་བྱེད་དགོས་སྙམ། རྒྱུ་མཚན་གང་ཞེ་ན། འོས་འགན་སློབ་གསོའི《དབྱིན་ཡིག་བསླབ་ཚན་ཚད་གཞིའི》དོན་ཚན་བཞི་པའི་ལག་བསྟར་གྲོས་གཞི་ལས་སློབ་ཁྲིད་གྲོས་གཞིའི་ཚན་ཆུང་གཉིས་པ་ལྟར་ན།“སློབ་མས་དབྱིན་སྐད་བེད་སྤྱད་དེ་བྱ་བ་སྒྲུབ་པ་གཙོ་བོར་བཟུང་ནས་བསླབ་རིམ་སོ་སོའི་དམིགས་ཚད་དང་རེ་འདུན་ལ་འཆར་གཞི་འགོད་པ་ནི་སྐད་ཆ་གོ་བརྡ་སྤྲོད་པའི་ནུས་པ་སྐྱེད་སྲིང་བྱེད་ཆེད་ཡིན་ལ། སྐད་ཡིག་བེད་སྤྱོད་བྱེད་པ་གཞི་རུ་བཟུང་སྟེ་སློབ་མའི་དབྱིན་ཡིག་བེད་སྤྱོད་བྱ་བར་ཞབས་འདེགས་ཞུ་དགོས”ཞེས་བསྟན་འདུག དགེ་རྒན་རྣམ་པས་འཚོ་བ་དངོས་དང་འབྲེལ་བའི་སྐད་ཆའི་ཁོར་ཡུག་སྣ་ཚོགས་བཞེངས་སྐྲུན་བྱེད་པ་དང་། རིམ་པ་ལྟར་འཕེལ་བའི་སྐད་ཡིག་ལག་ལེན་བྱ་འགུལ་ལག་བསྟར་དང་དེ་མིན་བརྒྱུད་རིམ་དང་མཇུག་འབྲས་གཉིས་ལ་གདེང་འཇོག་བྱེད་པའི་སློབ་གསོའི་ཐབས་ལམ་སྣ་ཚོགས་སྤྱད་དེ། ལས་འགན་རང་བཞིན་གྱི་སྐད་ཡིག་སློབ་གསོའི་ཐབས་ཤེས་སོགས་ལ་བརྟེན་ནས་སློབ་ཁྲིད་བྱས་ན་སློབ་མའི་དབྱིན་སྐད་བེད་སྤྱོད་བྱེད་པའི་ནུས་པ་མཐོར་འདེགས་སུ་གཏོང་ཐུབ། དེ་བས། དབྱིན་ཡིག་སློབ་ཁྲིད་ཁྲོད་དུ་དགེ་རྒན་རྣམ་པས་ཆེས་སྤྱིར་བཏང་གི་སློབ་ཁྲིད་དངོས་དང་འབྲེལ་བ་ཡོད་པའི་དབྱིན་སྐད་བཀོལ་སྤྱོད་བྱེད་རྒྱུ་ཧ་ཅང་གལ་ཆེན་ཡིན་སྙམ། དཔེར་ན།“Good morning/ afternoon, Stand up /sit down please, Who is on duty today? Is everyone here today? Who is absent today?”ལྟ་བུར་མཚོན་ན་དུས་དང་རྣམ་པ་ཀུན་ཏུ་དགེ་སློབ་བར་དུ་ངེས་པར་དུ་སྤྱོད་བཞིན་པའི་དབྱིན་སྐད་དཀྱུས་མ་དག་ཡིན་པས་ལོ་རིམ་དམའ་ཤོས་ནས་མགོ་བརྩམས་ཏེ་སློབ་མའི་རྣ་ལམ་དུ་ཡང་ཡང་ཀློག་པ་དང་སྦྱོང་བརྡར་བྱས་ན་རིམ་བཞིན་ཁོ་ཚོའི་ཡིད་ལ་འཇགས་ཐུབ་པ་དང་། དབྱིན་སྐད་བེད་སྤྱད་དེ་བྱ་བ་སྒྲུབ་པར་ཕན་པ་ཆེན་པོ་ཡོད། སྒོས་སུ་དབྱིན་སྐད་བཤད་པ་བརྒྱུད་ནས་གནད་དོན་ཐག་གཅོད་པ།བརྡ་འཕྲིན་སྡུད་ལེན་དང་བརྒྱུད་སྤེལ། མི་སྒེར་གྱི་ལྟ་ཚུལ་དང་མྱོང་ཚོར་སོགས་སྟབས་བདེ་ངང་སློབ་གྲོགས་ཕན་ཚུན་བར་བཤད་ན་དོན་དངོས་ནས་དབྱིན་སྐད་བེད་སྤྱོད་ཀྱི་ནུས་པ་མཐོར་འདེགས་སུ་གཏོང་ཐུབ་པ་ཡིན། ང་ཚོས་སློབ་ཁྲིད་ལག་ལེན་བྱ་འགུལ་བཀོད་སྒྲིག་དེ་སློབ་མའི་ལོ་ཚོད་དང་ཤེས་རྟོགས་ཀྱི་ཆུ་ཚད། འཚོ་བའི་ཉམས་མྱོང་དང་དགའ་ཕྱོགས་སོགས་ལ་བསྟུན་ཅི་ཐུབ་བྱེད་དགོས། དཔེར་ན། སློབ་ཆུང་ལོ་རིམ་དྲུག་པའི་སྟོད་ཆའི་སློབ་ཚན་དང་པོ།“Unit One. How can I get there?”ལྟ་བུའི་ནང་གི་ལག་ལེན་བྱ་འགུལ་ལ་མཚོན་ན་གཤམ་གྱི་རེ་འདུན་དག་ཚང་དགོས་སྙམ། གཅིག བྱ་འགུལ་འཚོ་བ་དངོས་དང་མཐུན་དགོས་ཤིང་འབྲེལ་འདྲིས་ཀྱི་དམིགས་ཡུལ་ལྡན་པ། གཉིས། བྱ་འགུལ་དེ་བྱེ་བྲག་ཏུ་ཇི་ལྟར་ལག་བསྟར་བྱེད་པའི་རེ་འདུན་དང་གོ་རིམ་ཡོད་པ། གསུམ། སློབ་མར་སློབ་སྦྱོང་གི་འབྲས་བུ་འགྲེམ་སྟོན་བྱེད་པའི་གོ་སྐབས་བསྐྲུན་ཏེ་མི་སྒེར་རམ་མཉམ་ལས་ཀྱི་ལག་ལེན་བྱ་འགུལ་ཁྲོད་དུ་ཁོ་ཚོའི་སྐད་ཡིག་དང་བསམ་གཞིག་གི་ནུས་པ་གོང་འཕེལ་གཏོང་བ། བཞི། བྱ་འགུལ་གྱི་ཁྲོད་དུ་རྒྱལ་ཁའི་ཚོར་བ་མྱོང་དུ་འཇུག་པ་བཅས་ཀྱི་དམིགས་ཡུལ་ལྡན་པར་བྱེད་དགོས། 

གསུམ་པ། རྒྱུ་ཆ་སྣ་ཚོགས་བེད་སྤྱད་དེ་དབྱིན་ཡིག་སློབ་ཁྲིད་བྱེད་ཐབས། 

དེང་རབས་དབྱིན་ཡིག་སློབ་ཁྲིད་དང་སྲོལ་རྒྱུན་དབྱིན་ཡིག་སློབ་ཁྲིད་གཉིས་ལ་མི་འདྲ་ས་ཞིག་ཡོད་པ་ནི་དེང་སྐབས་སྨྱན་མང་གཟུགས་བསླབ་ཆས་གསར་བ་བཀོལ་སྤྱོད་བྱས་ཏེ་སློབ་ཁྲིད་བྱེད་པ་དེ་རེད། སྲོལ་རྒྱུན་སློབ་ཁྲིད་ཁྲོད་དུ་སློབ་མའི་མིག་ལམ་དུ་དགེ་རྒན་དང་དཔེ་ཆ། ནག་པང་དང་ས་སྨྱུག དེ་ལས་ཀྱང་ཚབས་ཆེ་བ་ནི་དགེ་རྒན་གྱིས་ཁྲིད་པ་གཅིག་པུར་བརྟེན་ནས་ཁྲིད་གཙོ་བོར་འཛིན་པའི་སློབ་ཁྲིད་ཀྱི་ཐབས་ལམ་དང་།སློབ་མ་ལ་མཐའ་གཅིག་ཏུ་ཀློག་འདོན་དང་ཉན་འབྲི། སྐྱོར་སྦྱོང་དང་ཞིབ་བཤེར་བྱེད་པའི་སློབ་ཁྲིད་ཀྱི་རྣམ་

པའོ། ། དེ་ན་སྨྱན་མང་གཟུགས་བསླབ་ཆས་ལ་དགེ་མཚན་ག་འདྲ་ལྡན་ཞེ་ན། སྨྱན་མང་གཟུགས་བསླབ་ཆས་ལ་གཟུགས་བརྙན་རང་བཞིན། སྣ་མང་རང་བཞིན། ངོ་མཚར་རང་བཞིན། ཐད་མཐོང་རང་བཞིན་དང་སྤྲོ་སྣང་རང་བཞིན་སོགས་ཀྱི་ཁྱད་ཆོས་ལྡན་པས་སློབ་མ་རྣམས་ལྗོངས་རྣམ་དེར་རོལ་མྱོང་བྱེད་པའི་སྤྲོ་བ་སློང་ཐུབ་པ་མ་ཟད། ད་དུང་རང་འགུལ་གྱིས་སློབ་སྦྱོང་བྱེད་པའི་འདུན་པའང་རྒྱས་ཐུབ། དབྱིན་ཡིག་སློབ་ཁྲིད་ཁྲོད་དུ་དགེ་རྒན་གྱིས་ངེས་པར་དུ་སྨྱན་མང་གཟུགས་བསླབ་ཆས་བཀོལ་སྤྱོད་བྱེད་པའི་ཐབས་རྩལ་ནང་བྱན་ཆུད་པར་བྱས་ཏེ། བསླབ་ཆས་གསར་བ་དེ་དག་སྤྱད་ནས་སློབ་གསོ་སློབ་ཁྲིད་ལ་རམ་འདེགས་བྱེད་དུ་བཅུག་ན་སྔར་ལས་གསོན་ཉམས་ལྡན་པ་དང་དགའ་སྤྲོས་ཁེངས་པ་ཞིག་ཏུ་འགྱུར་ཐུབ་ལ། སློབ་གསོའི་གྲུབ་འབྲས་ལའང་མངོན་གསལ་གྱིས་སྐུལ་སྤེལ་གྱི་ནུས་པ་ཐོན་ཐུབ། ཡིན་ནའང་།གལ་ཏེ་དགེ་རྒན་གྱིས་རང་གི་སློབ་མའི་ལོ་ཚོད་དང་ཤེས་རྟོགས་ཀྱི་ཆུ་ཚད། འཚོ་བའི་ཉམས་མྱོང་དང་ཡུལ་སྲོལ་གོམས་གཤིས་སོགས་ལ་རྒྱུས་ལོན་དང་དབྱེ་ཞིབ་ཅི་ཡང་མེད་པར་ཐད་ཀར་དུ་དྲ་ལམ་ནས་ཐད་བཤུས་བྱས་ཏེ་བཟོ་བཅོས་ཅི་ཡང་མེད་པར་སློབ་ཁྲིད་ཁྲོད་བཀོལ་ན་འབྲས་བུ་ལེགས་པོ་ཞིག་ཐོན་མི་ཐུབ། དེའི་རྒྱུ་མཚན་ནི་དྲ་ལམ་གྱིི་བསླབ་ཆས་སྣ་ཚོགས་ནི་རང་རྒྱལ་ནང་ལོགས་ས་ཁུལ་སློབ་གསོའི་ཆུ་ཚད་ཅུང་སྔོན་ཐོན་ཡིན་པའི་ས་གནས་དག་ལས་ཐོན་པ་ཡིན་པས་ང་ཚོའི་སློབ་མའི་འདོད་བློ་དང་ཆུ་ཚད། ཁོར་ཡུག ཡུལ་སྲོལ་གོམས་གཤིས་སོགས་ཕྱོགས་གང་ཅིའི་ཐད་ནས་ཀྱང་ས་ཆུ་མི་འཕྲོད་པ་ལྟ་བུའི་གནས་ཚུལ་འབྱུང་སྲིད་པས་ཤིན་ཏུ་གཟབ་གཟབ་བྱེད་དགོས་པའི་གནས་སུ་གྱུར་འདུག དོར་ཞི་ཚང་གིས“མི་རིགས་རང་ཉིད་ཤེས་རབ་སྙིང་སྟོབས་ཀྱི། ། ཡར་སྐྱེད་གོམ་པ་རང་སྤོས་མ་བྱས་པར། ། གཞན་གྱིས་སྐྱོར་ཅིང་ལམ་ཁྲིད་ལ་བརྟེན་ན། ། བསྐལ་བརྒྱར་འདས་ཀྱང་རྗེས་ལུས་ཉིད་ལས་མེད། །”ཅེས་གསུངས་པ་ནང་བཞིན། ང་ཚོས་ངེས་པར་དུ་སློབ་མའི་གནས་བབ་དང་བསྟུན་ནས་བསླབ་ཆས་གསར་བ་བཀོལ་སྤྱོད་བྱས་ན་ད་གཟོད་འབྲས་བུ་ཡག་པོ་ཞིག་འབྱུང་སྲིད། སྒྲ་ཕབ་འཕྲུལ་ཆས། སྨྱན་མང་གཟུགས་བསླབ་ཆས། མིང་ཚིག་དང་རི་མོ་ཟུང་འབྲེལ་གྱི་ཤོག་བྱང་། བརྙན་རིས་སོགས་སྤྱད་ནས་སློབ་མའི་བསམ་བློ་ཀུན་སྤྱོད་དང་རྒྱལ་གཅེས་སློབ་གསོ་བརྒྱུད་སྒྲོག་བྱེད་པའི་དེང་རབས་དབྱིན་ཡིག་སློབ་ཁྲིད་ཀྱི་ཁ་ཕྱོགས་ཡང་དག་དེ་རྙེད་དགོས། 

བཞི་པ། དབྱིན་ཡིག་དགེ་རྒན་གྱི་ཆེད་ལས་ཆུ་ཚད་དང་སློབ་ཁྲིད་ནུས་རྩལ་མཐོར་འདེགས་གཏོང་ཐབས། 

དགེ་རྒན་གྱིིས་ཐོག་མར་དབྱིན་ཡིག་སློབ་དེབ་དང་སློབ་ཁྲིད་དཔྱད་གཞི། འོས་འགན་སློབ་གསོའི《དབྱིན་ཡིག་བསླབ་ཚན་ཚད་གཞི》ཡིི་སློབ་ཆུང་ལོ་རིམ་སོ་སོའི་རིམ་ཕྱེ་དམིགས་ཚད་དང་བསླབ་རིམ་སོ་སོའི་རིམ་ཕྱེ་ཚད་གཞི། ཚད་གཞི་ཞིབ་འགྲེལ། སློབ་ཁྲིད་གྲོས་གཞི། སློབ་དེབ་རྩོམ་སྒྲིག་གྲོས་གཞི་སོགས་ལ་སློབ་སྦྱོང་དང་ཞིབ་འཇུག་ནན་མོ་བྱས་ཏེ་རང་ཉིད་ཀྱི་ཆེད་ལས་ཆུ་ཚད་མཐོར་འདེགས་སུ་གཏོང་དགོས། གཅིག མི་རིགས་སློབ་གསོ་དཔེ་སྐྲུན་ཁང་གིས་པར་དུ་བསྐྲུན་པའི་འོས་འགན་སློབ་གསོའི་དབྱིན་ཡིག་སློབ་དེབ་ཀྱི་སྒྲ་ཕབ་སྤྱིན་ཐག་དང་བརྙན་ཕབ་སྤྱིན་ཐག་ཆ་ཚང་། དབྱིན་ཇིའི་རྒྱང་བསྒྲགས་ཀྱི་རིག་རྩལ་ལེ་ཚན་དང་། གཏམ་བཤད་ཡག་ཤོས་སོགས་ལ་ཡང་དང་ཡང་དུ་ཉན་པ་དང་། གཞན་ད་དུང་དབྱིན་སྐད་གློག་བརྙན་སོགས་ལ་བལྟས་ན་རང་གི་དབྱིན་སྐད་ཀྱི་སྒྲ་གདངས་དང་སྨྲ་རྩལ་ལ་བླ་ལྷག་གི་འཕེལ་འགྱུར་ཡོང་སྲིད་པ་མ་ཟད། ད་དུང་ལྟ་རྒྱ་དང་ཐོས་རྒྱ་ཡང་རིམ་བཞིན་ཕུན་སུམ་ཚོགས་པར་གཏོང་ཐུབ། གཉིས། དགེ་རྒན་གྱིས་དབྱིན་ཡིག་སློབ་ཁྲིད་ཁྲོད་སློབ་ཁྲིད་དངོས་དང་འབྲེལ་བ་ཡོད་པའི་ཆེས་སྤྱིར་བཏང་གི་དབྱིན་སྐད་འཆད་པ་གཙོར་འཛིན་པ་ལས་གཞན་གཞུང་ལས་ཁང་དུ་དབྱིན་ཡིག་དགེ་གྲོགས་ཕན་ཚུན་བར་དབྱིན་སྐད་རྐྱང་རྐྱང་གིས་འབྲེལ་འདྲིས་བྱེད་པའི་སྒྲིག་ལམ་བཙུགས་ཏེ་རྒྱུན་སྤྱོད་འཚོ་བའི་ཁ་བརྡ་བྱེད་པ་དང།དབྱིན་ཡིག་སློབ་དཔྱོད་ཁང་གིས་དབྱིན་སྐད་གཏམ་བཤད་དང་སློབ་ཁྲིད་འགྲན་བསྡུར་སྤེལ་བ། རྒྱལ་ནང་དྲ་ལམ་ཁག་གི་ཕུལ་བྱུང་དགེ་རྒན་དག་གི་དཔེ་སྟོན་སློབ་ཁྲིད་བཤེར་འཚོལ་བྱས་ཏེ་ཉན་པ། ཉན་རྗེས་སློབ་ཁྲིད་དེ་ལ་དབྱེ་ཞིབ་དང་བསམ་ཞིབ་ནན་མོ་བཏང་སྟེ་སྙིགས་འདོར་བཅུད་ལེན་གྱིས་རང་གི་སློབ་ཁྲིད་ཁྲོད་བཀོལ་སྤྱོད་བྱས་ན་གཅིག་ནས་རང་ཉིད་ཀྱི་སྐད་ཡིག་ཕྱོགས་བསྡུས་བེད་སྤྱོད་ནུས་པ་སྐྱེད་སྲིང་བྱེད་ཐུབ་པ་དང་། གཉིས་ནས་སློབ་ཁྲིད་ནུས་རྩལ་སྔར་ལས་ལྷག་པར་འཕེལ་རྒྱས་སུ་གཏོང་ཐུབ་སྙམ། གསུམ། དཔེ་ཀློག་གོམས་གཤིས་ལོབས་སུ་བཅུག་ནས་དུས་དང་རྣམ་པ་ཀུན་ཏུ་དབྱིན་ཡིག་ཚགས་པར་དང་སྒྲུང་གཏམ་སོགས་ལ་བལྟ་བའི་འཆར་གཞི་བཀོད་དེ་ཀློག་འདོན་རྒྱུན་འཁྱོངས་བྱས་ན་ཕྱོགས་གཅིག་ནས་དབྱིན་ཡིག་གི་མིང་བརྡ་གསོག་འཇོག་དང་བཀོལ་སྤྱོད་ལ་ཕན་པ་དང་། ཕྱོགས་གཞན་ཞིག་ནས་འཚོ་བའི་རྒྱུན་སྤྱོད་ཀྱི་ཁ་བརྡ་དང་འབྲེལ་འདྲིས་ལའང་ཕན་ཐོག་ཆེ། དུས་རྒྱུན་རང་རྒྱལ་དང་འཛམ་གླིང་གི་གསར་འགྱུར་སོགས་ལ་རྒྱུས་ལོན་བྱས་ན་རང་ཉིད་ཤེས་བྱ་ཕྱོགས་བསྡུས་ཅན་གྱི་ཕུལ་བྱུང་དགེ་རྒན་ཞིག་ཏུ་འགྱུར་ཐུབ་པར་རེ་བ་ཡོད། བཞི། སློབ་གསོ་པ་ཡེ་ལན（叶澜）གྱིས“གལ་ཏེ་དགེ་རྒན་ཞིག་གིས་མི་ཚེ་ཧྲིལ་བོར་ཁྲིད་ཡིག་བྲིས་ཏེ་དུས་ཚོད་འདའ་བ་ཡིན་ན་ཁོ་ནི་དགེ་རྒན་ཕུལ་དུ་བྱུང་བ་ཞིག་ཏུ་འགྱུར་མི་སྲིད་ལ། གལ་ཏེ་ཁོས་བསྟུད་མར་ལོ་གསུམ་ལ་སློབ་ཁྲིད་ཕྱིར་རྟོག་བྲིས་པ་ཡིན་ན་ཁོ་རང་ཕལ་ཆེར་དགེ་རྒན་ཕུལ་དུ་བྱུང་བ་ཞིག་ཏུ་འགྱུར་སྲིད་དོ། །”ཞེས་གསུངས་པ་བཞིན། དགེ་རྒན་ཞིག་ལ་མཚོན་ན་སློབ་ཁྲིད་བྱ་བའི་ཁྲོད་རང་ཉིད་ཀྱི་སློབ་ཁྲིད་མྱོང་ཚོར་དང་ཁྲིད་རྗེས་ཀྱི་ཕྱིར་རྟོག་སོགས་ཡིག་ཐོག་ཏུ་དགོད་རྒྱུ་ནི་ཤིན་ཏུ་གལ་འགངས་ཆེ་བས། དུས་རྒྱུན་དཔེ་ཀློག་མང་པོ་བྱས་ཏེ་སློབ་གསོའི་ཕྱོགས་ཀྱི་ཉམས་མྱོང་དང་ཐབས་ཇུས་སོགས་དུས་དེབ་དང་ཚགས་པར་སྟེང་བཀོད་ན་རང་གི་སློབ་ཁྲིད་ཀྱི་རྩལ་ནུས་མཐོ་རུ་འདེགས་ཐུབ། 

མདོར་ན། འོས་འགན་སློབ་གསོའི་དུས་རིམ་ནང་དུ་དབྱིན་ཡིག་སློབ་གསོ་སློབ་ཁྲིད་སྤུས་ཚད་མཐོར་འདེགས་བྱེད་པ་དམིགས་ཡུལ་དང་། གསར་གཏོད་སྙིང་སྟོབས་དང་ལག་ལེན་ནུས་པ་སྐྱེད་སྲིང་བྱེད་པ་དེ་གནད་དུ་བཟུང་སྟེ།སློབ་མ་རྣམས་ཕྱོགས་ཡོངས་ནས་དེང་རབས་ཅན་ལ་ཁ་ཕྱོགས་པ་དང་། འཛམ་གླིང་ལ་ཁ་ཕྱོགས་པ། མ་འོངས་པར་ཁ་ཕྱོགས་པའི་སྒོ་ནས་འཕེལ་རྒྱས་ཡོང་བར་ནན་སྐུལ་མཛུབ་སྟོན་གནང་རྒྱུ་ཧ་ཅང་གལ་ཆེའོ། ། ཡང་གཅིག་བཤད་ན་སྐད་ཡིག་ནི་སྤྱི་ཚོགས་འབྲེལ་འདྲིས་ཀྱི་ཡོ་བྱད་ཅིག་ཡིན་ལ་བསམ་གཞིག་གཏོང་བའི་ལག་ཆ་ཞིག་ཀྱང་ཡིན། སྐད་ཡིག་སྣ་གཅིག་ལྷག་མར་སྦྱངས་པ་ན་སློབ་མའི་བློ་རིག་འཕེལ་བར་སྐུལ་འདེད་གཏོང་ཐུབ་ལ།སློབ་མ་ཕྱོགས་ཡོངས་ནས་རིག་གནས་སྣ་མང་ལ་ངོས་འཛིན་བྱེད་པར་ཡང་ཕན་ནུས་ཆེན་པོ་ལྡན། རྒྱལ་ཁབ་ཕྱི་ནང་གི་རིག་གནས་ཀྱི་ཁྱད་པར་ལ་ཉམས་ཞིབ་བྱས་ཏེ་ཕྱིའི་རིག་གནས་ལ་སློབ་སྦྱོང་བྱེད་པའི་འདུ་ཤེས་ཆགས་པ་དང་། རྒྱལ་སྤྱིའི་ཐུན་མོང་གི་ལྟ་བ་གོང་དུ་སྤེལ་བ། རྒྱལ་གཅེས་རིང་ལུགས་ཀྱི་སྙིང་སྟོབས་དར་སྤེལ་གཏོང་བ།སྤྱི་ཚོགས་ཀྱི་འགན་འཁྲི་དང་གསར་གཏོད་ཀྱི་འདུ་ཤེས་ཆགས་སུ་འཇུག་པ། སྤྱི་ཚོགས་རིག་གནས་ཀྱི་བྱང་ཚད་གོང་དུ་སྤེལ་བ་བཅས་ལ་ནུས་པ་བླ་ལྷག་ཐོན་ཐུབ་པས།གཞོན་སྐྱེས་དགེ་རྒན་རྣམས་ཀྱིས་དུས་དང་རྣམ་པ་ཀུན་ཏུ་རང་ཉིད་ཀྱི་ཆེད་ལས་ཆུ་ཚད་དང་། སློབ་ཁྲིད་རྩལ་ནུས།སློབ་གསོ་སློབ་ཁྲིད་ཀྱི་ཐབས་ཇུས་སོགས་ཇེ་བཟང་ཇེ་ལེགས་སུ་གཏོང་བ་དང་ཆབས་ཅིག དཔེ་ཀློག་ལ་གོམས་པ་དང་། དེང་གི་སློབ་གསོའི་ཁ་ཕྱོགས་ཤེས་པ། གསར་གཏོད་ཀྱི་བློ་སྤོབས་ཡོད་པ། སློབ་མ་རང་གི་བུ་དང་། སློབ་གྲྭ་རང་གི་ཁྱིམ་གྱི་འདུ་ཤེས་འཛིན་ཐུབ་པའི་ཀུན་སློང་རྣམ་དག་ལྡན་པའི་དགེ་རྒན་ཞིག་ཏུ་འགྱུར་བར་འབད་པ་རུས་ཐག་ཆོད་པ་ཞིག་བྱེད་རྒྱུ་ནི་དུས་རབས21པའི་དབྱིན་ཡིག་དགེ་རྒན་རྣམས་ཀྱི་ཕྲག་ཏུ་བབས་པའི་འོས་འགན་ཉག་གཅིག་གོ། 

* བསོད་ནམས་བཀྲ་ཤིས། གུང་ཧོ་རྫོང་སློབ་གསོ་ཞིབ་འཇུག་ཁང་དུ་ཕྱག་ལས་གནང་བཞིན་ཡོད།