དུས་རབས་གསར་པའི་འཐབ་ཕྱོགས་གཅིག་གྱུར་གྱི་བྱ་གཞག་འཕེལ་རྒྱས་གཏོང་བའི་རྩ་བའི་ཕྱོགས་སྟོན།—སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་འཐབ་ཕྱོགས་གཅིག་གྱུར་ལས་དོན་ཚོགས་འདུའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ།

2022ལོའི་ཟླ་7ཚེས་29ཉིན་ནས་ཚེས་30ཉིན་བར་ཀྲུང་དབྱང་གི་འཐབ་ཕྱོགས་གཅིག་གྱུར་ལས་དོན་ཚོགས་འདུ་པེ་ཅིན་དུ་འཚོགས། ཐེངས་འདིའི་ཀྲུང་དབྱང་འཐབ་ཕྱོགས་གཅིག་གྱུར་ལས་དོན་ཚོགས་འདུ་ནི་ཏང་གི་ཚོགས་ཆེན་ཐེངས་ཉི་ཤུ་པ་འཚོག་གྲབས་ཡོད་པ་དང་། ང་ཚོའི་ཏང་གིས་འཐབ་ཕྱོགས་གཅིག་གྱུར་གྱི་སྲིད་ཇུས་བཏོན་ནས་ལོ་ངོ་100འཁོར་བའི་སྐབས་སུ་འཚོགས་པའི་ལམ་ཚད་རྡོ་རིང་ལྟ་བུའི་དོན་སྙིང་ལྡན་པའི་ཚོགས་འདུ་གལ་ཆེན་ཞིག་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཚོགས་འདུར་ཞུགས་པ་མ་ཟད་གསུང་བཤད་གལ་ཆེན་ཡང་གནང་བ་རེད། ལོ་བརྒྱའི་འཐབ་ཕྱོགས་གཅིག་གྱུར་གྱི་ལོ་རྒྱུས་རང་བཞིན་གྱི་བྱས་རྗེས་དང་དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་ལ་ཐོབ་པའི་ལོ་རྒྱུས་རང་བཞིན་གྱི་གྲུབ་འབྲས་ལ་ཁས་ལེན་གང་ལེགས་བྱས་པ་དང་། དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཞི་ཅིན་ཕིང་གི་དགོངས་དོན་གལ་ཆེན་རྒྱུད་རིམ་ལྡན་པའི་སྒོ་ནས་གསལ་བཤད་བྱས་པ་དང་། དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་གྱི་ལོ་རྒྱུས་ཁ་ཕྱོགས་ལ་དབྱེ་ཞིབ་ཟབ་མོ་བྱས་ཏེ། དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་གྱི་གཞི་རྩའི་ལས་འགན་དང་། ལས་ཀའི་གཙོ་གནད། རྩ་དོན་གྱི་བླང་བྱ། བྱེད་ཐབས་དང་ཐབས་བཀོད་བཅས་གསལ་པོར་བཏོན་པ་དང་། ཏང་གིས་འཐབ་ཕྱོགས་གཅིག་གྱུར་ལས་དོན་ལ་འགོ་ཁྲིད་བྱེད་པར་ཤུགས་སྣོན་རྒྱག་དགོས་པའི་བླང་བྱ་བཏོན་པ་དང་། དུས་རབས་གསར་པའི་འཐབ་ཕྱོགས་གཅིག་གྱུར་གྱི་བྱ་གཞག་འཕེལ་རྒྱས་གཏོང་བར་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་འདོན་སྤྲོད་བྱས་པ་རེད། ཀྲུང་དབྱང་གི་འཐབ་ཕྱོགས་གཅིག་གྱུར་ལས་དོན་ཚོགས་འདུའི་དགོངས་དོན་སློབ་སྦྱོང་ལག་བསྟར་དང་། ལྷག་པར་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་དེ་མིག་སྔར་དང་སླད་ཕྱིན་དུས་སྐབས་ཤིག་རིང་གི་འཐབ་ཕྱོགས་གཅིག་གྱུར་གྱི་ཆབ་སྲིད་ལས་འགན་གལ་ཆེན་ཞིག་ཏུ་བརྩིས་ནས། འཐབ་ཕྱོགས་གཅིག་གྱུར་གྱི་ཁྱབ་ཁོངས་ཁག་གི་ལས་ཀར་སྐུལ་འདེད་ཏན་ཏིག་བཏང་སྟེ། ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏོང་བར་འཐབ་ཕྱོགས་གཅིག་གྱུར་གྱི་སྟོབས་ཤུགས་འབུལ་དགོས།

གཅིག །དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་དོན་གལ་ཆེན་ལ་སློབ་སྦྱོང་དང་གོ་བ་ཟབ་མོ་ལེན་པ།

རིགས་པའི་གཞུང་ལུགས་ནི་ལག་ལེན་གྱི་སྔོན་འགྲོ་དང་། བསམ་བློ་ནི་བྱ་སྤྱོད་ཀྱི་ཕྱོགས་སྟོན་ཡིན། ཐེངས་འདིའི་གྲོས་ཚོགས་ཀྱི་ཆེས་གལ་ཆེ་བའི་རིགས་པའི་གཞུང་ལུགས་ཀྱི་གྲུབ་འབྲས་ནི་དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་དོན་གལ་ཆེན་རྒྱུད་རིམ་ལྡན་པའི་སྒོ་ནས་རྒྱས་བཤད་གནང་བ་དེ་རེད། དགོངས་དོན་གལ་ཆེན་འདི་མར་ཁེ་སིའི་རིང་ལུགས་ཀྱི་ལངས་ཕྱོགས་དང་། ལྟ་བ། བྱེད་ཐབས་བཅས་སུ་ཁྱབ་པ་དང་། ལོ་རྒྱུས་དང་། དངོས་ཡོད། མ་འོངས་པ་བཅས་ལ་ཁྱབ་ཅིང་། ཆབ་སྲིད་ཀྱི་རང་བཞིན་དང་། རིགས་པའི་གཞུང་ལུགས་ཀྱི་རང་བཞིན། མཛུབ་སྟོན་གྱི་རང་བཞིན་བཅས་ཧ་ཅང་ཆེན་པོ་ལྡན་པ་དང་། མར་ཁེ་སིའི་རིང་ལུགས་ཀྱི་བདེན་དོན་གྱི་འོད་ཟེར་འཕྲོ་བཞིན་ཡོད་པས། ང་ཚོས་ཆ་ཚང་བ་དང་ཡང་དག་པ་དང་ཕྱོགས་ཡོངས་ནས་གོ་བ་བླངས་ཏེ། ཚན་རིག་དང་མཐུན་པར་རིགས་པའི་གཞུང་ལུགས་ཀྱི་བདེན་དོན་སྟོབས་ཤུགས་ལ་བརྟེན་ནས་ལས་ཀ་ལག་བསྟར་གྱི་འཕེལ་རྒྱས་གསར་པར་སྐུལ་འདེད་གཏོང་དགོས།

དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅིའི་ཞི་ཅིན་ཕིང་གི་དགོངས་དོན་གལ་ཆེན་གྱི་རིགས་པའི་གཞུང་ལུགས་ཀྱི་རྒྱབ་ལྗོངས་ལ་གོ་བ་ཟབ་མོ་ལེན་པ། འཐབ་ཕྱོགས་གཅིག་གྱུར་ནི་མར་ཁེ་སིའི་རིང་ལུགས་ཀྱི་གཞི་རྩའི་འཐབ་ཇུས་དང་ཐབས་ཇུས་ཀྱི་གནད་དོན་ཞིག་ཡིན་ལ། ཀྲུང་གོའི་གུང་ཁྲན་ཏང་མིས་མར་ཁེ་སིའི་རིང་ལུགས་ལ་བརྟེན་ནས་ཀྲུང་གོའི་ལག་ལེན་ལ་སྐུལ་འདེད་གཏོང་བའི་ཆབ་སྲིད་ཀྱི་བློ་གྲོས་དང་ཆབ་སྲིད་ཀྱི་དགེ་མཚན་ཞིག་ཀྱང་ཡིན། ཏང་གི་ཚོགས་ཆེན་ཐེངས་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྐུ་ཚབ་གཙོ་བོ་གནང་བའི་ཀྲུང་གོའི་གུང་ཁྲན་ཏང་མིས་འཐབ་ཕྱོགས་གཅིག་གྱུར་གྱི་ལས་དོན་ལ་ཤུགས་སྣོན་དང་ལེགས་བཅོས་བྱ་རྒྱུའི་ཐད་འདུ་ཤེས་གསར་པ་དང་། བསམ་བློ་གསར་པ། འཐབ་ཇུས་གསར་པ་བཅས་རབ་དང་རིམ་པ་བཏོན་པ་དང་། དུས་རབས་གསར་པར་ཅིའི་ཕྱིར་འཐབ་ཕྱོགས་གཅིག་གྱུར་བྱེད་དགོས་པ་དང་། འཐབ་ཕྱོགས་གཅིག་གྱུར་གང་འདྲ་ཞིག་བྱེད་དགོས་པ། འཐབ་ཕྱོགས་གཅིག་གྱུར་ཇི་ལྟར་སྲ་བརྟན་དང་འཕེལ་རྒྱས་གཏོང་དགོས་པ་སོགས་ཀྱི་གནད་དོན་གལ་ཆེན་ལ་དྲིས་ལན་ཟབ་མོ་འདེབས་པར་བརྟེན། དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་དོན་གལ་ཆེན་གྲུབ་པ་རེད། དགོངས་དོན་གལ་ཆེན་འདི་མར་ཁེ་སིའི་རིང་ལུགས་ཀྱི་འཐབ་ཕྱོགས་གཅིག་གྱུར་གྱི་རིགས་པའི་གཞུང་ལུགས་དང་གཅིག་རྒྱུན་གཅིག་འཛིན་ཡིན་ལ། འཛམ་གླིང་གི་འགྱུར་ལྡོག་དང་། དུས་རབས་ཀྱི་འགྱུར་ལྡོག །ལོ་རྒྱུས་ཀྱི་འགྱུར་ལྡོག་བཅས་ལ་ཨ་ལན་བཟང་པོ་སྤྲད་དེ་རྒྱུན་ཆད་མེད་པར་ཕུན་སུམ་ཇེ་ཚོགས་དང་འཕེལ་རྒྱས་བཏང་བས། མར་ཁེ་སིའི་རིང་ལུགས་ཀྱི་མངོན་གསལ་དོད་པའི་རིགས་པའི་གཞུང་ལུགས་ཀྱི་ཆུ་ཚད་དང་ཀྲུང་གོའི་གུང་ཁྲན་ཏང་མིའི་བློ་བརྟན་འགྱུར་མེད་ཀྱི་རིགས་པའི་གཞུང་ལུགས་ཀྱི་གདེང་ཚོད་མངོན་ཡོད། དགོངས་དོན་གལ་ཆེན་འདིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཁྲོད་ཀྱི་“གཅིག་གྱུར་ཆེན་པོ་”དང་“སྣ་མང་གཞི་གཅིག་”དང་། “བསྟུན་མཁས་ཀྱང་གཞན་རྗེས་མི་འབྲང་བ།” “མཐུན་འགྲིག་མཉམ་གནས་”སོགས་ཀྱི་བློ་གྲོས་དང་སྙིང་བཅུད་བསྡུ་ལེན་གང་ལེགས་བྱས་ཡོད་ལ། དུས་རབས་གསར་པའི་འཐབ་ཕྱོགས་གཅིག་གྱུར་གྱི་འཐབ་ཇུས་ལག་ལེན་ཐོག་བེད་སྤྱོད་བྱས་པས་རིག་གནས་ཀྱི་རྨང་གཞི་ཟབ་མོ་དང་རིག་གནས་ཀྱི་གདེང་ཚོད་བརྟན་པོ་མངོན་ཡོད་པ་དང་། མར་ཁེ་སིའི་རིང་ལུགས་ཀྱི་འཐབ་ཕྱོགས་གཅིག་གྱུར་གྱི་རིགས་པའི་གཞུང་ལུགས་ཀྲུང་གོ་ཅན་དང་དུས་རབས་ཅན་གྱི་མཐོང་ལམ་གསར་པ་བཏོད་པ་རེད།

དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་དོན་གལ་ཆེན་གྱི་ལག་ལེན་གྱི་རྨང་གཞིར་གོ་བ་ཟབ་མོ་ལེན་པ། འཐབ་ཕྱོགས་གཅིག་གྱུར་གྱི་ལོ་ངོ་བརྒྱ་ཕྲག་རིང་གི་འཕེལ་རྒྱས་ལོ་རྒྱུས་ནི་ཀྲུང་གོའི་གསར་བརྗེ་དང་། འཛུགས་སྐྲུན། སྒྱུར་བཅོས་བཅས་ཀྱི་ལག་ལེན་དང་མཉམ་དར་ཡང་ཡང་བྱས་པའི་ལོ་རྒྱུས་ཀྱི་འཕེལ་རིམ་རླབས་པོ་ཆེ་ཞིག་ཡིན་ལ། ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏོང་བར་ལོ་རྒྱུས་རང་བཞིན་ལྡན་པའི་བྱས་རྗེས་ཕུལ་བའི་འཕེལ་རིམ་གལ་ཆེན་ཡང་ཡིན། ལྷག་པར་དུ་ཏང་གི་ཚོགས་ཆེན་ཐེངས་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་ཡོང་བའི་འཐབ་ཇུས་ཁྱོན་ཡོངས་དང་འཛམ་གླིང་གི་ལོ་ངོ་བརྒྱ་ལྷག་རིང་བྱུང་མ་མྱོང་བའི་འཕོ་འགྱུར་ཆེན་པོ་གཅིག་གྱུར་གྱིས་འཆར་འགོད་བྱས་ནས། ཏང་གིས་འཐབ་ཕྱོགས་གཅིག་གྱུར་ལས་དོན་ལ་ཕྱོགས་ཡོངས་ནས་འགོ་ཁྲིད་བྱ་རྒྱུར་སྔར་བས་ཤུགས་སྣོན་བརྒྱབ་སྟེ་རྒྱལ་སྲིད་སྐྱོང་ལུགས་ཀྱི་འཐབ་ཇུས་མཐོ་ཚད་ཐོག་འཐབ་ཕྱོགས་གཅིག་གྱུར་ལས་དོན་ལ་དམིགས་ནས་ཚོགས་འདུ་གལ་ཆེན་རབ་དང་རིམ་པ་འཚོགས་པ་དང་། ཁྲིམས་སྲོལ་དང་ཡིག་ཆ་གལ་ཆེན་རབ་དང་རིམ་པ་བཏོན་ནས་ཐབས་ཇུས་བཀོད་སྒྲིག་གལ་ཆེན་རབ་དང་རིམ་པ་བྱས་ཏེ། འཐབ་ཕྱོགས་གཅིག་གྱུར་ཆེན་པོའི་ལས་དོན་གྱི་རྣམ་པ་རིམ་བཞིན་ཆགས་པས་ཏང་ཡོངས་ཀྱིས་མཐོང་ཆེན་དང་ཚང་མས་ཐུན་མོང་ཐོག་སྒྲུབ་པའི་སྡོམ་ཤུགས་མངོན་གསལ་དོད་པོས་ཆེ་རུ་ཕྱིན་ཡོད། རང་རྒྱལ་གྱི་སྲིད་ཏང་ལམ་ལུགས་གསར་པ་རྒྱུན་འཁྱོངས་དང་འཐུས་ཚང་དུ་གཏོང་བ་དང་། ཐུན་མོང་གི་བསམ་བློའི་ཆབ་སྲིད་རྨང་གཞི་སྲ་བརྟན་དུ་གཏོང་བ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་སྲིད་ཞུགས་ཏང་འཛུགས་སྐྲུན་བྱེད་ཤུགས་ཟམ་མི་འཆད་པར་ཆེ་རུ་གཏོང་བ་བཅས་བྱེད་དགོས། བློ་བརྟན་འགྱུར་མེད་ངང་ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་འགྲོ་ལམ་ཡང་དག་པའི་ཐོག་བསྐྱོད་པ་དང་། མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་བ། ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་བརྟན་དུ་གཏོང་བ་བཅས་བྱས་ནས། “ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། སེམས་པ་གཅིག་གིས་ཀྲུང་གོའི་ཕུགས་འདུན་བསྐྲུན་”ཞེས་པའི་གསོན་ཉམས་དོད་པའི་རྣམ་པ་སྔར་བས་སྲ་བརྟན་དུ་གཏོང་དགོས། རང་རྒྱལ་གྱི་ཆོས་ལུགས་ཀྲུང་གོ་ཅན་དུ་འགྱུར་བའི་ཁ་ཕྱོགས་རྒྱུན་འཁྱོངས་དང་། ཆོས་ལུགས་ལས་ཀ་ཁྲིམས་སྐྱོང་ཅན་དུ་འགྱུར་བའི་ཆུ་ཚད་མཐོ་རུ་གཏོང་ཞིང་། རང་རྒྱལ་གྱི་ཆོས་ལུགས་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་པ་ཡོང་བར་བྱེད་པའི་གོམ་སྟབས་གསར་པ་སྤོས་དགོས། ཏང་ཕྱིའི་ཤེས་ཡོན་ཅན་དང་སྤྱི་ཚོགས་ཀྱི་རིམ་གྲས་གསར་པའི་མི་སྣར་བསམ་བློ་དང་ཆབ་སྲིད་ཀྱི་ཁྲིད་སྟོན་བྱེད་ཤུགས་ཆེ་རུ་བཏང་ནས་སྒྲིག་འཛུགས་དང་སྐུལ་སློང་བྱེད་ཤུགས་སྔར་ལས་ཆེ་རུ་གཏོང་བ་དང་། སྔར་ལས་ཕན་ལྡན་གྱི་ནུས་པ་འདོན་དུ་འཇུག་དགོས། སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་སྐྱོན་བྲལ་ངང་འཕེལ་རྒྱས་དང་སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་མི་སྣ་སྐྱོན་བྲལ་ངང་འཚར་ལོངས་ཡོང་བར་སྐུལ་འདེད་གཏོང་བ་དང་། མཛའ་མཐུན་ལྷད་མེད་ཀྱི་སྲིད་ཚོང་གི་འབྲེལ་བ་འཛུགས་པར་སྐུལ་འདེད་བཏང་སྟེ། དམངས་གཉེར་དཔལ་འབྱོར་མི་སྣའི་བློ་ཁ་ཕྱོགས་ཤུགས་དང་གོང་བུར་འགྲིལ་ཤུགས་སྔར་ལས་ཇེ་ཆེར་གཏོང་དགོས། ཞང་ཀང་དང་། ཨའོ་མོན། ཐའེ་ཝན་བཅས་དང་ཕྱི་རྒྱལ་ནས་མི་སེམས་འགུག་ཐབས་བྱེད་པའི་ལས་ཀ་ལེགས་པོར་བསྒྲུབ་རྒྱུ་དང་། རྒྱལ་གཅེས་ཀང་གཅེས་དང་། རྒྱལ་གཅེས་ཨའོ་གཅེས་ཀྱི་སྟོབས་ཤུགས། ཐའེ་ཝན་རྒྱལ་གཅེས་གཅིག་གྱུར་གྱི་སྟོབས་ཤུགས་བཅས་འཕེལ་རྒྱས་དང་རྒྱ་སྐྱེད་གཏོང་རྒྱུ་དང་། ཕྱིར་སྡོད་རང་མིའི་སྟོབས་ཤུགས་གོང་བུར་གཅིག་འགྲིལ་བྱས་ཏེ། རྒྱལ་ཁབ་ཕྱི་ནང་གི་ཀྲུང་ཧྭའི་བུ་ཕྲུག་གི་མཐུན་སྒྲིལ་ཆེན་པོར་རྒྱུན་ཆད་མེད་པར་ཤུགས་སྣོན་རྒྱག་དགོས། དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་དོན་གལ་ཆེན་ནི་ཏང་གི་འཐབ་ཕྱོགས་གཅིག་གྱུར་གྱི་ལོ་བརྒྱའི་འཕེལ་རྒྱས་ལོ་རྒྱུས་ཀྱི་བློ་གྲོས་ཀྱི་སྙིང་བཅུད་དང་དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པའི་ཚན་རིག་དང་མཐུན་པའི་རིགས་པའི་གཞུང་ལུགས་ཤིག་ཡིན་པས་བདེན་དོན་གྱི་སྟོབས་ཤུགས་དང་བསམ་བློའི་སྟོབས་ཤུགས་ཆེན་པོ་མངོན་ཡོད།

དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་དོན་གལ་ཆེན་གྱི་ལྟེ་བའི་དོན་སྙིང་ལ་གོ་བ་ཟབ་མོ་ལེན་པ། ཐེངས་འདིའི་ཀྲུང་དབྱང་འཐབ་ཕྱོགས་གཅིག་གྱུར་ལས་དོན་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་དགོངས་དོན་གལ་ཆེན་དེ་“ངེས་པར་དུ་བྱེད་དགོས་པ་བཅུ་གཉིས་”ནང་སྙིང་བསྡུས་བྱས་ཡོད། “ངེས་པར་དུ་བྱེད་དགོས་པ་བཅུ་གཉིས་”ནི་གཏན་ཚིགས་ཚགས་དམ་པོ་དང་ནང་གནས་གཅིག་གྱུར་གྱི་གཞི་མཐུན་པའི་ཚོགས་སྤྱི་ཞིག་དང་ཆ་ཚང་བའི་རིགས་པའི་གཞུང་ལུགས་ཀྱི་མ་ལག་ཅིག་ཡིན་པ་སྟེ། དེས་ཏང་དང་རྒྱལ་ཁབ་ཀྱི་བྱ་གཞག་ཁྱོན་ཡོངས་ནང་གི་འཐབ་ཕྱོགས་གཅིག་གྱུར་གྱི་མཆོག་ནོར་གྱི་གོ་གནས་ནན་བཤད་བྱས་ཡོད་ལ། འཐབ་ཕྱོགས་གཅིག་གྱུར་ལས་དོན་གྱིས་མི་སེམས་དང་སྟོབས་ཤུགས་ཀྱི་གནད་དོན་ཐག་གཅོད་ཡག་པོ་བྱེད་པའི་ངོ་བོའི་བླང་བྱ་ཡང་ཁ་གསལ་བཏོན་ཡོད། གཅིག་མཐུན་རང་བཞིན་དང་སྣ་མང་རང་བཞིན་གྱི་འབྲེལ་བ་ཐག་གཅོད་ཡང་དག་བྱ་རྒྱུའི་འཐབ་ཕྱོགས་གཅིག་གྱུར་ལས་དོན་གྱི་བྱེད་ཕྱོགས་ནན་བཤད་བྱས་ཡོད་ལ། ཁྱབ་ཁོངས་ཁག་གི་འཐབ་ཕྱོགས་གཅིག་གྱུར་ལས་དོན་གྱི་ལས་འགན་གྱི་གཙོ་གནད་ཀྱང་ཁ་གསལ་བྱས་ཡོད། ཏང་གིས་འཐབ་ཕྱོགས་གཅིག་གྱུར་ལས་དོན་ལ་ཕྱོགས་ཡོངས་ནས་འགོ་ཁྲིད་བྱེད་པའི་རྩ་བའི་འགན་ལེན་འདི་ནན་བཤད་བྱས་ཡོད་ལ། འཐབ་ཕྱོགས་གཅིག་གྱུར་ལས་དོན་གྱི་ཆོས་ཉིད་ཁོང་དུ་ཆུད་པར་བྱེད་པའི་གཞི་རྩའི་བླང་བྱ་གསལ་པོར་བྱས་ཡོད། “ངེས་པར་དུ་བྱེད་དགོས་པ་བཅུ་གཉིས་”ནི་དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་འཕེལ་རྒྱས་དང་སྟོབས་ཆེར་གཏོང་རྒྱུའི་མཐོ་རིམ་ཇུས་འགོད་དང་ཕྱོགས་ཡོངས་ཀྱི་བཀོད་སྒྲིག་ཅིག་ཡིན་པ་སྟེ། ཁྱོན་ཡོངས་ལ་དམིགས་པ་དང་གནད་ཆེན་གཙོ་བོར་བཟུང་བ། ཁ་ཕྱོགས་གསལ་སྟོན་བྱས་ལ་ཐབས་ལམ་ཡང་གསལ་སྟོན་བྱས་ཡོད། དེ་དག་ཚང་མ་ནི་འཐབ་ཕྱོགས་གཅིག་གྱུར་ལས་དོན་གྱི་ཡུན་རིང་ལག་ལེན་ཉམས་མྱོང་ལ་ཕྱོགས་བསྡོམས་ཟབ་མོ་དང་ཞུན་བརྡར་བྱས་པ་ཞིག་ཡིན་ཞིང་། དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་གྱི་རྩ་བའི་རང་བཞིན་གྱི་བླང་བྱ་དང་། ཁྱོན་ཡོངས་རང་བཞིན་གྱི་ལས་འགན། དུས་རབས་རང་བཞིན་གྱི་ཞིབ་འཇུག་བྱ་གཞི་བཅས་གསལ་བཤད་བྱས་ཡོད་པས་དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་པར་རྩ་བའི་མཛུབ་སྟོན་མཁོ་འདོན་བྱས་ཡོད།

གཉིས། དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་གྱི་ལོ་རྒྱུས་ཁ་ཕྱོགས་ལ་གོ་བ་ཟབ་མོ་ལེན་པ་དང་སྟངས་འཛིན་བྱེད་དགོས།

འཐབ་ཕྱོགས་གནད་ལ་འཁེལ་ཞིང་ལུགས་དང་མཐུན་པར་བྱེད་དགོས། ད་ལྟ་འཐབ་ཕྱོགས་གཅིག་གྱུར་གྱི་མདུན་དུ་ལྷགས་པའི་དུས་བབ་དང་གནས་བབ། ཕྲག་ཏུ་འཁུར་བའི་འགན་འཁྲི་དང་ལས་འགན་བཅས་ལ་འགྱུར་ལྡོག་ཆེན་པོ་འགའ་ཞིག་བྱུང་ཡོད། དེས་འཐབ་ཕྱོགས་གཅིག་གྱུར་གྱི་ལས་དོན་ནི་དུས་ལས་ཡོལ་ཞིང་གལ་མི་ཆེ་བ་ཞིག་ཡིན་པ་མཚོན་པ་མིན་ལ། དེ་ལས་གལ་འགངས་ཆེ་བ་ཞིག་ཡིན་པ་མཚོན་ཡོད། ལོ་རྒྱུས་ཀྱི་ཁ་ཕྱོགས་གསར་པས་འཐབ་ཕྱོགས་གཅིག་གྱུར་གྱི་ལོ་རྒྱུས་ལས་འགན་དང་དམིགས་འབེན་ལས་འགན་ལ་དུས་རབས་ཀྱི་ནང་དོན་གསར་པ་བསྣན་ཡོད་པས། ང་ཚོས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཁག་ལ་གོ་བ་ཡང་དག་ལེན་པ་དང་དོན་འཁྱོལ་ནུས་ལྡན་བྱེད་པར་དུས་རབས་ཀྱི་གནས་ཚད་དང་ཚན་རིག་དང་མཐུན་པའི་གཞི་འཛིན་ས་མཁོ་འདོན་བྱས་ཡོད། ང་ཚོས་དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་གྱི་ལོ་རྒྱུས་ཁ་ཕྱོགས་སྐོར་གྱི་སྤྱི་ཁྱབ་ཧྲུའུ་ཞི་ཅིན་ཕིང་གི་བརྡར་གཅོད་གལ་ཆེན་ལ་གོ་བ་ཟབ་མོ་ལེན་པ་དང་། དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་འཕེལ་རྒྱས་དང་སྟོབས་ཆེར་གཏོང་བའི་དོན་སྙིང་གལ་ཆེན་ལ་གོ་བ་ཟབ་མོ་ལེན་པ། དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་གྱི་ལས་འགན་སྒྲུབ་སེམས་དང་འགན་འཁྲིའི་བསམ་པ་ཆེ་རུ་གཏོང་བ་བཅས་བྱེད་དགོས།

དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་སྔ་མཐུད་ཕྱི་སྐྱོང་དང་། སྔར་སོང་རྒྱུན་འཛིན་གྱིས་མ་འོངས་གསར་གཏོད་བྱེད་པའི་ལོ་རྒྱུས་འཕེལ་རྒྱས་ཀྱི་དུས་མཚམས་གསར་པར་སླེབས་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། ཏང་གནས་སའི་ལོ་རྒྱུས་ཀྱི་ཁ་ཕྱོགས་དང་། མདུན་དུ་ལྷགས་པའི་ཕྱི་ནང་གི་གནས་བབ། ཕྲག་ཐོག་ཏུ་བབས་པའི་ལས་འགན་བཅས་ལ་འགྱུར་ལྡོག་ཆེན་པོ་བྱུང་ཡོད། འགྱུར་ལྡོག་ཇི་ཙམ་ཆེ་ན་དེ་ཙམ་གྱིས་འཐབ་ཕྱོགས་གཅིག་གྱུར་འཕེལ་རྒྱས་ཡག་པོ་གཏོང་བ་དང་འཐབ་ཕྱོགས་གཅིག་གྱུར་གྱི་ལས་དོན་ལེགས་པོ་བསྒྲུབ་དགོས། ཏང་གི་ལོ་ངོ་བརྒྱ་ཕྲག་རིང་གི་འབད་འཐབ་ལོ་རྒྱུས་ཁྲོད། ང་ཚོའི་ཏང་གིས་ཐོག་མཐའ་བར་གསུམ་དུ་འཐབ་ཕྱོགས་གཅིག་གྱུར་དེ་གོ་གནས་གལ་ཆེན་དུ་བཞག་ནས་མཐུན་སྒྲིལ་ཆེན་པོ་དང་མཉམ་འབྲེལ་ཆེན་པོ་རྒྱུན་འཁྱོངས་བྱས་པ་དང་། གཅིག་མཐུན་རང་བཞིན་དང་སྣ་མང་རང་བཞིན་གྱི་འབྲེལ་བ་ཐག་གཅོད་ཡང་དག་བྱ་རྒྱུ་རྒྱུན་འཁྱོངས་བྱས་ལ། ལོ་རྒྱུས་ཀྱི་དུས་སྐབས་སོ་སོའི་ལྟེ་བའི་ལས་ཀར་དམིགས་ཤིང་། མཐུན་སྒྲིལ་བྱེད་ཐུབ་པའི་སྟོབས་ཤུགས་མཐའ་དག་ལ་མཐུན་སྒྲིལ་དང་སྐུལ་སློང་བྱེད་ཐུབ་པའི་མཐུན་རྐྱེན་མཐའ་དག་སྐུལ་སློང་བྱས་ཏེ། དམངས་གཙོ་རིང་ལུགས་གསར་པའི་གསར་བརྗེར་རྒྱལ་ཁ་ཐོབ་པ་དང་། སྤྱི་ཚོགས་རིང་ལུགས་ཀྱི་གསར་བརྗེ་དང་འཛུགས་སྐྲུན་ལ་སྐུལ་འདེད་གཏོང་བ། སྒྱུར་བཅོས་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་དུ་འགྱུར་བའི་འཛུགས་སྐྲུན་གྱི་རྣམ་པ་གསར་པ་གཏོད་པ་བཅས་ཀྱི་ཐད་ནུས་པ་གལ་ཆེན་བཏོན་ཡོད་པས། འཐབ་ཕྱོགས་གཅིག་གྱུར་དེ་ཏང་གིས་དགྲ་འདུལ་གཡུལ་རྒྱལ་དང་སྲིད་སྐྱོང་རྒྱལ་དར་གྱི་མཆོག་ནོར་གལ་ཆེན་ཞིག་ཏུ་གྱུར་ཡོད། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དུས་རབས་གསར་པར་སླེབས་པ་དང་ཆབས་ཅིག་ང་ཚོའི་ཏང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ། ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པ་བྱས་ནས་ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར་བྱེད་པའི་འཐབ་ལམ་གསར་པའི་ཐོག་བསྐྱོད་འགོ་ཚུགས་པ་དང་། འཐབ་ཕྱོགས་གཅིག་གྱུར་ཡང་ལོ་རྒྱུས་ཀྱི་དུས་མཚམས་གསར་པར་སླེབས་ནས་དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་ཞིག་ཏུ་འཕེལ་རྒྱས་ཕྱིན་ཡོད། འཐབ་ལམ་གསར་པའི་ཐོག །ང་ཚོས་ངེས་པར་དུ་འཐབ་ཕྱོགས་གཅིག་གྱུར་གྱི་ལོ་རྒྱུས་ཉམས་མྱོང་དང་སྲོལ་རྒྱུན་བཟང་པོ་རྒྱུན་འཛིན་བྱེད་དགོས་ལ། མི་སེམས་གཅིག་སྒྲིལ་དང་སྟོབས་ཤུགས་གཅིག་སྒྲིལ་གྱི་ཆབ་སྲིད་ནུས་པ་འདོན་སྤེལ་དང་། སྲིད་ཏང་གི་འབྲེལ་བ་དང་། མི་རིགས་ཀྱི་འབྲེལ་བ། ཆོས་ལུགས་ཀྱི་འབྲེལ་བ། རིམ་གྲས་ཀྱི་འབྲེལ་བ། རྒྱལ་ཁབ་ཕྱི་ནང་གི་སྤུན་ཟླའི་འབྲེལ་བ་བཅས་ཞི་མཐུན་ཡོང་བར་སྐུལ་འདེད་དང་། རྒྱལ་ཁབ་ཕྱི་ནང་གི་ཀྲུང་ཧྭའི་བུ་ཕྲུག་གིས་མཐུན་སྒྲིལ་འབད་འཐབ་བྱེད་པར་སྐུལ་འདེད་བཏང་སྟེ། འཐབ་ཕྱོགས་གཅིག་གྱུར་དེ་གོམ་གང་མདུན་སྤོས་སྒོས་རྒྱལ་ཁབ་ཕྱི་ནང་གི་ཀྲུང་ཧྭའི་བུ་ཕྲུག་ཡོངས་ལ་མཐུན་སྒྲིལ་བྱས་ནས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་བྱེད་པའི་ཐབས་མཆོག་གལ་ཆེན་ཞིག་ཏུ་འགྱུར་བར་བྱས་ཏེ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་སྐྲུན་ཐུབ་པ་དང་། ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་ཡོང་ཆེད་བརྗིད་རྔམ་ལྡན་པའི་སྟོབས་ཤུགས་གཅིག་འདྲིལ་བྱེད་དགོས།

དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་གྱི་ཉེན་ཁ་དང་འགྲན་སློང་ཇེ་མང་དུ་ཕྱིན་པ་དང་། རྒྱལ་ཁབ་ཀྱི་བདག་དབང་དང་བདེ་འཇགས་དང་འཕེལ་རྒྱས་དང་ཁེ་ཕན་བཅས་སྲུང་སྐྱོང་བྱེད་པའི་ལས་འགན་སྔར་བས་ཇེ་ལྕི་རུ་སོང་ཡོད། དེང་སྐབས་འཛམ་གླིང་གི་ལོ་བརྒྱར་བྱུང་མ་མྱོང་བའི་འཕོ་འགྱུར་ཆེན་པོ་མགྱོགས་མྱུར་ངང་འཕེལ་བཞིན་ཡོད་པ་དང་། རྒྱལ་སྤྱིའི་སྟོབས་ཤུགས་ཀྱི་བསྡུར་བར་ལེགས་སྒྲིག་གཏིང་ཟབ་བྱུང་བ། ཕྱོགས་རྐྱང་རིང་ལུགས་དང་། སྲུང་སྐྱོབ་རིང་ལུགས། བཙན་དབང་རིང་ལུགས། བཙན་དབང་ཆབ་སྲིད་བཅས་ཀྱིས་འཛམ་གླིང་གི་ཞི་བདེ་དང་འཕེལ་རྒྱས་ལ་འཇིགས་སྣང་སྐུལ་ཚད་ཇེ་ཆེར་སོང་བ་དང་། དཔལ་འབྱོར་གོ་ལ་ཧྲིལ་པོ་ཅན་དུ་འགྱུར་བ་ལ་བར་ཆད་བྱུང་བ། དུས་རབས་ཀྱི་རིམས་ནད་མུ་མཐུད་དུ་མཆེད་པ། རྒྱལ་ཁབ་ཆེན་པོའི་འཐབ་རྩོད་རྒྱུན་མཐུད་ངང་ཤུགས་ཆེ་རུ་ཕྱིན་པ། འཛམ་གླིང་འདི་ཉིད་ཟང་ཟིང་གི་འཕོ་འགྱུར་གསར་པའི་དུས་སུ་སླེབས་པ་དང་། རང་རྒྱལ་གྱི་མདུན་དུ་རྙོག་འཛིང་ཆེ་ཞིང་ཛ་དྲག་ཆེ་བའི་རྒྱལ་སྤྱིའི་གནས་བབ་དང་སྔར་བྱུང་མ་མྱོང་བའི་ཉེན་ཁ་དང་འགྲན་སློང་ལྷགས་པ་བཅས་རེད། འཐབ་ཕྱོགས་གཅིག་གྱུར་ནི་མི་རིགས་དང་ཆོས་ལུགས། བོད་ལྗོངས། ཞིན་ཅང་། ཀང་ཨའོ་ཐའེ་བཅས་ལས་ཀ་སྣ་མང་དང་འབྲེལ་བ་ཡོད་ཅིང་། མདུན་དུ་ལྷགས་པའི་ཕྱི་རོལ་གྱི་གནོན་ཤུགས་དང་ཉེན་ཁ་དང་འགྲན་སློང་ཡང་སྔར་ན་མེད་པར་ཇེ་ཆེར་སོང་བས། འཐབ་ཕྱོགས་གཅིག་གྱུར་གྱིས་སིམ་འཛུལ་འགོག་པ་དང་། ཉེན་ཁ་འགོག་སེལ། རྒྱལ་ཁབ་ཀྱི་བདེ་འཇགས་སྲུང་སྐྱོང་བཅས་བྱེད་པའི་ལས་འགན་སྔར་བས་དཀའ་ཚེགས་དང་ལྗིད་རྫོབ་ཆེ་ལ། མི་སེམས་གོང་བུར་འགྲིལ་བ་དང་སྟོབས་ཤུགས་གཅིག་སྒྲིལ་བྱེད་པའི་ལས་ཀ་སྔར་བས་ཁ་ཚ་དགོས་གཏུག་ཏུ་གྱུར་ཡོད། འདིས་ང་ཚོར་ཉམས་ཉེན་རྟག་དྲན་གྱི་འདུ་ཤེས་དང་མཐའ་ཚད་ཀྱི་བསམ་བློ་ཆེ་རུ་བཏང་ནས་“དམངས་གཙོ་”དང་། “རང་དབང་།” “འགྲོ་བ་མིའི་ཐོབ་ཐང་”སོགས་ཟེར་བ་དེ་དག་ལ་ཁ་གཡར་ནས་རྒྱལ་ཁབ་གཞན་གྱི་ནང་སྲིད་ལ་གང་འདོད་དུ་ཐེ་ཇུས་བྱེད་པའི་བྱ་སྤྱོད་ལ་འཐབ་རྩོད་མཐའ་གཅིག་ཏུ་བྱས་ཏེ་སྐོར་རྒོལ་དང་། མགོ་གནོན་པ། རྩ་སློག་གཏོང་བ། ཁ་ཕྲལ་གཏོང་བ་བཅས་ཀྱི་བྱ་སྤྱོད་སྣ་ཚོགས་ལ་འཐབ་རྩོད་དང་། རྒྱལ་ཁབ་ཀྱི་ལྟེ་བའི་ཁེ་ཕན་བློ་རྩ་བརྟན་པོས་སྲུང་བ་དང་རྒྱལ་ཁབ་ཀྱི་ཆབ་སྲིད་བདེ་འཇགས་སྲུང་དགོས་པའི་བླང་བྱ་བཏོན་ཡོད། དུས་མཚུངས་སུ་འབྲེལ་གཏུག་རྒྱ་ཆེན་པོ་དང་། སྒྲ་ཆུང་འཇམ་ཆར་ཇི་བཞིན་ངང་རྒྱུད་རིང་པོའི་དགེ་མཚན་འདོན་སྤེལ་གང་ལེགས་བྱེད་པ་དང་། སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཀྱི་སྤེལ་རེས་བྱེད་རྒྱ་ཆེ་རུ་གཏོང་བ་དང་། ཕྱི་ཕྱོགས་སུ་ཀྲུང་གོའི་གཏམ་རྒྱུད་ཡག་པོ་ཤོད་པ་བཅས་བྱས་ཏེ། ཀྲུང་གོར་རྒྱུས་མངའ་ཡོད་པ་དང་ཀྲུང་གོར་མཛའ་མཐུན་ཡིན་པའི་སྟོབས་ཤུགས་ཟམ་མི་འཆད་པར་ཆེ་རུ་སྐྱེད་པ་དང་རང་རྒྱལ་ལ་ཕན་པའི་རྒྱལ་སྤྱིའི་ཁོར་ཡུག་གཏོད་དགོས།

དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་གྱི་ལྟེ་བར་དམིགས་ཤིང་སྤྱི་ཡོངས་ལ་ཞབས་འདེགས་ཞུ་བ་དང་། སེམས་ནུས་གཅིག་སྒྲིལ་གྱིས་ཐུན་མོང་ཐོག་བསྐྱར་དར་དོན་གཉེར་བྱེད་པའི་འགན་འཁྲི་སྔར་བས་ལྕི་པོ་ཡོད། འཐབ་ཕྱོགས་གཅིག་གྱུར་ནི་ཏང་གི་སྤྱིའི་ལམ་ཕྱོགས་དང་སྤྱིའི་སྲིད་ཇུས་ཀྱི་གྲུབ་ཆ་གལ་ཆེན་ཞིག་ཡིན་པས། གནའ་ནས་བཟུང་ལྟེ་བར་དམིགས་པ་དང་། སྤྱི་ཡོངས་ལ་ཞབས་འདེགས་ཞུ་རྒྱུ་དེ་གཞི་རྩའི་ལས་འགན་དུ་བརྩི་བ་ཡིན། རང་རྒྱལ་ནི་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་འཐབ་ལམ་ཐོག་སྐྱོད་བཞིན་ཡོད་པས། ང་ཚོ་ལོ་རྒྱུས་ཐོག་གི་དུས་སྐབས་གང་ཞིག་ལས་ཀྱང་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་བརྗིད་ཉམས་ལྡན་པའི་དམིགས་འབེན་མངོན་འགྱུར་བྱེད་པ་དང་དེ་བས་ཐག་ཉེ་ཞིང་། དེ་བས་གདེང་ཚོད་ཡོད་པ། དེ་བས་ནུས་པ་ལྡན་པ་བཅས་རེད། དུས་མཚུངས་སུ་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་རྒྱུ་དེ་“གཏིང་ཟབ་སར་”སླེབས་པ་དང་། འཕེལ་རྒྱས་དོ་མི་མཉམ་ཞིང་དཔྱིས་ཕྱིན་པ་ཞིག་མ་བྱུང་བའི་གནད་དོན་འབུར་དུ་ཐོན་པ། སྔར་ཡོད་ཀྱི་ཁེ་ཕན་བཀག་རྒྱ་འཕྲལ་སེལ་དགོས་པ། དུས་ཐུང་གི་གནད་དོན་དང་ཡུན་རིང་གི་གནད་དོན་མཉམ་དུ་འདྲེས་པ། སྒྱུར་བཅོས་དང་འཕེལ་རྒྱས་ཀྱི་ལས་འགན་ལྗིད་པོ་དང་རྒྱལ་སྲིད་སྐྱོང་ལུགས་ཀྱི་ཉམས་སད་ཆེ་བ་བཅས་ནི་སྔར་བྱུང་མ་མྱོང་བ་ཞིག་ཡིན། འདི་ལྟ་བུའི་རྒྱབ་ལྗོངས་འོག་ང་ཚོའི་ཏང་གིས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་དང་། གྲོང་གསེབ་དར་རྒྱས། ཐུན་མོང་ཕྱུག་འགྱུར་ལ་སྐུལ་འདེད་གཏོང་བ་སོགས་འཕེལ་རྒྱས་ཀྱི་འཐབ་ཇུས་གལ་ཆེན་རབ་དང་རིམ་པ་བཏོན་པ་དེས། འཐབ་ཕྱོགས་གཅིག་གྱུར་གྱིས་ཏང་དང་རྒྱལ་ཁབ་ཀྱི་ལས་ཀ་སྤྱི་ཡོངས་ལ་ཞབས་འདེགས་ཞུ་བའི་ཐད་བླང་བྱ་གསར་པ་སྔར་ལས་མཐོ་བ་བཏོན་པ་མ་ཟད། ད་དུང་འཐབ་ཕྱོགས་གཅིག་གྱུར་གྱིས་སེམས་ཤུགས་གཅིག་སྒྲིལ་གྱི་ནུས་པ་གལ་ཆེན་འདོན་སྤེལ་བྱེད་པར་ལས་སྟེགས་རྒྱ་ཆེན་པོ་འདོན་སྤྲོད་བྱས་ཡོད། འཐབ་ཕྱོགས་གཅིག་གྱུར་ལ་ཤེས་ལྡན་མི་སྣ་མང་བ་དང་། རིག་སྟོབས་མང་པོ་འདུས་བ། འབྲེལ་བ་རྒྱ་ཆེ་བ་སོགས་ཀྱི་དགེ་མཚན་ལྡན་པས། རྒྱ་ཆེའི་འཐབ་ཕྱོགས་གཅིག་གྱུར་གྱི་ཁོངས་མི་རྣམས་ཀྱིས་“རྒྱལ་ཁབ་ཀྱི་དོན་ཆེན་”ཡིད་ལ་བཅངས་པ་དང་འགན་འཁྲི་ལྗིད་མོ་འཁུར་བར་སྣེ་ཁྲིད་དང་རྒྱབ་སྐྱོར་བྱས་ནས། འཐབ་ཕྱོགས་གཅིག་གྱུར་གྱི་དགེ་མཚན་དེ་ལྟེ་བ་དང་སྤྱི་ཡོངས་ཀྱི་དགོས་མཁོ་དང་ཟུང་འབྲེལ་བྱས་པ་དང་། ཕྱོགས་གང་ཅིའི་ཐད་ཀྱི་བློ་གྲོས་དང་སྟོབས་ཤུགས་གཅིག་སྡུད་གང་ཐུབ་བྱས་ཏེ། རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་སྒྱུར་བཅོས་འཕེལ་རྒྱས་བརྟན་བརླིང་ལ་ཞབས་འདེགས་ཞུ་བར་ཐབས་དང་ནུས་ཤུགས་འདོན་དུ་འཇུག་དགོས།

དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་གྱི་གྲུབ་ཚུལ་ཁ་ཐོར་དང་བསམ་བློ་སྣ་མང་ཡིན་པས། ཐུན་མོང་གི་བསམ་བློ་དང་ཆབ་སྲིད་ཀྱི་རྨང་གཞི་བརྟན་དུ་གཏོང་བའི་བླང་བྱ་སྔར་ལས་ཁ་ཚ་དགོས་གཏུག་ཏུ་གྱུར་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། རང་རྒྱལ་གྱི་སྤྱི་ཚོགས་གྲུབ་ཚུལ་ལ་འགྱུར་ལྡོག་ཆེན་པོ་བྱུང་བ་དང་། འཐབ་ཕྱོགས་གཅིག་གྱུར་གྱིས་ཏང་གི་གྲལ་རིམ་རྨང་གཞི་བརྟན་དུ་གཏོང་བ་དང་། ཏང་གི་མང་ཚོགས་ཀྱི་རྨང་གཞིའི་ཐོག་གི་ནུས་པ་ཆེ་རུ་གཏོང་བ་སྔར་ལས་གལ་ཆེན་དུ་གྱུར་ཡོད། མིག་སྔར། བཟོ་ཞིང་མནའ་འབྲེལ་ནི་འཐབ་ཕྱོགས་གཅིག་གྱུར་གྱི་རྨང་གཞི་ཡིན་པར་འགྱུར་ལྡོག་བྱུང་མེད་མོད། འོན་ཀྱང་བཟོ་པ་དང་ཞིང་པའི་ཐོབ་ཐང་ལ་འགྱུར་ལྡོག་བྱུང་སྟེ། ཐོན་ལས་བཟོ་པ་གསར་པ་དང་གླ་རྒྱག་ཞིང་པ་སོགས་འབོར་ཆེན་བྱུང་ཡོད། སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་གཞི་ཁྱོན་དང་ཤུགས་རྐྱེན་ཐེབས་ཤུགས་མུ་མཐུད་ཆེ་རུ་ཕྱིན་ནས་ཁྲིམས་ལྟར་ཚད་ལྡན་གྱི་ཁྲིད་སྟོན་ལ་ཤུགས་སྣོན་རྒྱག་རྒྱུའི་ཐད་བླང་བྱ་གསར་པ་བཏོན་ཡོད། ཤེས་ཡོན་ཅན་མང་ཚོགས་ཅན་དུ་འགྱུར་བའི་འཕེལ་ཕྱོགས་ཉིན་བཞིན་མངོན་གསལ་དོད་དུ་འགྲོ་བ་དང་། སྤྱི་ཚོགས་ཀྱི་རིམ་གྲས་གསར་པའི་མི་སྣའི་དཔུང་ཁག་རྒྱུན་ཆད་མེད་པར་སྟོབས་ཆེར་འགྲོ་ཞིང་། ལས་ཞུགས་གསར་པའི་ཚོགས་སྤྱི་མགྱོགས་མྱུར་འཕར་བཞིན་ཡོད། ཕྱིར་སྡོད་རང་མི་དང་ཕྱི་ཁོངས་ཀྲུང་གོ་བ། ཕྱིར་སྡོད་ཀྲུང་གོ་བའི་རྒྱུད་པ་བཅས་མི་རབས་གསར་པ་རྣམས་ནི་ཕྱིར་སྡོད་རང་མིའི་ཚོགས་པའི་བྱེད་པོར་འགྱུར་བཞིན་ཡོད་མོད། འོན་ཀྱང་མི་རབས་གསར་པ་ཁག་ཅིག་གིས་མེས་རྒྱལ་（ཕ་ཡུལ་）ལ་བཅངས་པའི་བརྩེ་སེམས་མི་རབས་ནས་མི་རབས་ལས་ཉམས་པའི་སྣང་ཚུལ་མངོན་གསལ་དོད་པོ་ཡིན། ལྷག་པར་དུ་དྲ་སྦྲེལ་འཕེལ་རྒྱས་མྱུར་པོ་ཕྱིན་ནས་དྲ་རྒྱའི་ཚོགས་སྤྱི་དང་དྲ་རྒྱའི་གླེང་ཕྱོགས་འབོར་ཆེན་ཟམ་མི་འཆད་པར་ཐོན་བཞིན་ཡོད་པས་དྲ་སྦྲེལ་དེ་ཉིད་གླེང་ཕྱོགས་ཀྱི་འབྱུང་གནས་དང་། ཆ་འཕྲིན་བརྒྱུད་སྤེལ་གྱི་བསྡུ་འགྲེམས་ལྟེ་གནས་དང་བསམ་བློའི་གདོང་ཐུག་གི་གཡུལ་ས་གཙོ་བོ་བཅས་སུ་འགྱུར་བཞིན་ཡོད། འགྱུར་ལྡོག་དེ་དག་ཚང་མས་འཐབ་ཕྱོགས་གཅིག་གྱུར་གྱིས་ཕྱོགས་གང་ཅིའི་སྟོབས་ཤུགས་མཐུན་སྒྲིལ་དང་སྡེབ་སྒྲིག་བྱེད་པ་དང་། ཆབ་སྲིད་ཀྱི་ངོས་འཛིན་གཅིག་མཐུན་ཡོང་བར་བླང་བྱ་སྔར་ལས་མཐོ་བ་བཏོན་ཡོད། འཐབ་ཕྱོགས་གཅིག་གྱུར་གྱིས་ངེས་པར་དུ་ཏང་གི་མང་ཚོགས་ལམ་ཕྱོགས་རྒྱུན་འཁྱོངས་བྱས་ནས་བསམ་ཕྱོགས་ཀྱི་འདུ་ཤེས་དང་། སྲིད་ཇུས་ཀྱི་བྱེད་ཐབས། ཐབས་ཤེས་དང་ཐབས་བཀོད་བཅས་གོམ་གང་མདུན་སྤོས་ཀྱིས་གསར་གཏོད་བྱས་ཏེ། ཐུན་མོང་གི་བསམ་བློ་དང་ཆབ་སྲིད་ཀྱི་རྨང་གཞི་རྒྱུན་ཆད་མེད་པར་བརྟན་དུ་གཏོང་བ་དང་། ཏང་ཤོག་མི་འདྲ་བ་དང་། མི་རིགས་མི་འདྲ་བ། རིམ་གྲས་མི་འདྲ་བ། ཚོགས་སྤྱི་མི་འདྲ་བ་བཅས་ཀྱིས་ཏང་ལ་བློ་ཁ་ཕྱོགས་ཤུགས་ཆེ་རུ་གཏོང་བ་དང་ཏང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་ཡོང་བར་བྱེད་དགོས།

གསུམ། ཏང་ཀྲུང་དབྱང་གི་ཐབས་ཇུས་དང་བཀོད་སྒྲིག་གལ་ཆེན་ལག་བསྟར་དོན་འཁྱོལ་བྱེད་པར་སྐུལ་འདེད་ཏན་ཏིག་གཏོང་དགོས།

ཁ་ཕྱོགས་གཏན་འཁེལ་གསལ་པོ་དང་འཆར་གཞི་བཀོད་ཟིན་པས་འགག་རྩ་ནི་དོན་འཁྱོལ་བྱ་རྒྱུར་ཐུག་ཡོད། དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་དགོས་ན། ངེས་པར་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་དགོངས་དོན་གལ་ཆེན་སློབ་སྟོན་དུ་འཛིན་རྒྱུ་རྒྱུན་འཁྱོངས་བྱས་ནས། འཐབ་ཕྱོགས་གཅིག་གྱུར་སྐོར་གྱི་ཏང་ཀྲུང་དབྱང་གི་ཐབས་ཇུས་བཀོད་སྒྲིག་གལ་ཆེན་ལག་བསྟར་དོན་འཁྱོལ་བྱ་རྒྱུ་དམ་འཛིན་མཐའ་གཅིག་ཏུ་བྱས་ཏེ། དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་གྱི་རྣམ་པ་གསར་པ་གཏོད་པར་སྐུལ་འདེད་གཏོང་དགོས།

རྩ་བ་ནི་ཏང་གིས་འཐབ་ཕྱོགས་གཅིག་གྱུར་ལས་དོན་ལ་ཕྱོགས་ཡོངས་ནས་འགོ་ཁྲིད་བྱེད་པར་ཤུགས་སྣོན་རྒྱག་རྒྱུ་དེ་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་ལ་ཤུགས་སྣོན་རྒྱག་པའི་རྩ་བ་ནི་ཏང་གི་འགོ་ཁྲིད་རྒྱུན་འཁྱོངས་བྱས་ནས་ཏང་ཡོངས་ཀྱི་གོང་འོག་ཚང་མས་ལག་གདང་སྦྲེལ་བ་དང་། འབྲེལ་ཡོད་ཕྱོགས་ཀྱིས་མཐུན་སྦྱོར་མཉམ་འགུལ་བྱེད་པའི་ལས་ཀའི་རྣམ་པ་ཞིག་ཆགས་པ་བྱེད་དགོས། འཐབ་ཕྱོགས་གཅིག་གྱུར་ནི་ཏང་གིས་འགོ་ཁྲིད་བྱེད་པའི་འཐབ་ཕྱོགས་གཅིག་གྱུར་ཞིག་ཡིན་པ་དང་། ཏང་གིས་འཐབ་ཕྱོགས་གཅིག་གྱུར་ལས་དོན་ལ་ཕྱོགས་ཡོངས་ནས་འགོ་ཁྲིད་བྱ་རྒྱུ་རྒྱུན་འཁྱོངས་བྱེད་པ་ནི་དུས་རབས་གསར་པའི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་པའི་རྩ་བའི་ཆབ་སྲིད་ཀྱི་འགན་ལེན་ཡིན། ཏང་གི་འགོ་ཁྲིད་བྱ་རྒྱུ་དེ་འཐབ་ཕྱོགས་གཅིག་གྱུར་ལས་དོན་གྱི་བརྒྱུད་རིམ་ཧྲིལ་པོར་ཁྱབ་པ་བྱས་ནས་འཐབ་ཕྱོགས་གཅིག་གྱུར་ལས་དོན་དེ་ཐོག་མཐའ་བར་གསུམ་དུ་ཡང་དག་པའི་ཆབ་སྲིད་ཀྱི་ཁ་ཕྱོགས་སུ་མདུན་སྐྱོད་ཐུབ་པ་འགན་ལེན་བྱེད་དགོས། ཏང་ཡོངས་ཀྱིས་མཐོང་ཆེན་དང་ཚང་མས་ཐུན་མོང་ཐོག་སྒྲུབ་པའི་སྤྱིའི་བླང་བྱ་ལྟར་བྱེད་པོའི་འགན་འཁྲི་ཏན་ཏིག་འཁུར་བ་དང་། སྒྲིག་སྲོལ་དང་ལམ་སྲོལ་འཐུས་ཚང་དུ་གཏོང་བ། འཐབ་ཕྱོགས་གཅིག་གྱུར་ཆེན་པོའི་ལས་དོན་གྱི་རྣམ་པ་གཏིང་ཟབ་ཏུ་གཏོང་བ་བཅས་བྱེད་དགོས། འཐབ་ཕྱོགས་གཅིག་གྱུར་ཆེན་པོའི་ལས་དོན་གྱི་གྲུབ་ཚུལ་ཁྲོད། རིམ་ཁག་ཏང་ཨུའི་འཐབ་ཕྱོགས་གཅིག་གྱུར་གྱི་ལས་དོན་འགོ་ཁྲིད་ཚོ་ཆུང་གིས་ནུས་པ་འདོན་སྤེལ་བྱེད་པར་དོ་སྣང་བྱས་ཏེ། ཞིབ་འཇུག་བཀོད་སྒྲིག་དང་། མཐུན་སྦྱོར་ཁྲིད་སྟོན། སྐུལ་འདེད་ཞིབ་བཤེར་བཅས་ཀྱི་འགན་འཁྲི་ཏན་ཏིག་བསྒྲུབ་དགོས། འཐབ་ཕྱོགས་གཅིག་གྱུར་པུའུ་ཡིས་ཁྱོན་ཡོངས་ལ་དམིགས་ནས་འཐབ་ཕྱོགས་གཅིག་གྱུར་གྱི་གནད་དོན་གལ་ཆེན་ལ་ཞིབ་འཇུག་བྱས་ཏེ། ཇུས་འདོན་དང་། སྒྲིག་འཛུགས། མཐུན་སྦྱོར། ལྟ་སྐུལ་བཅས་ཀྱི་ནུས་པ་གལ་ཆེན་འདོན་སྤེལ་གང་ལེགས་དང་། འབྲེལ་ཡོད་ཕྱོགས་དང་མཉམ་དུ་མཉམ་འཛིན་མཉམ་སྒྲུབ་བྱས་ཏེ། ལས་ཀའི་སྡོམ་ཤུགས་ཆེན་པོ་ཆགས་པར་བྱེད་དགོས། གྲངས་ཉུང་མི་རིགས་དང་། ཆོས་ལུགས་ལས་རིགས། སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར། སྤྱི་ཚོགས་རིམ་གྲས་གསར་པའི་མི་སྣ་སོགས་འཐབ་ཕྱོགས་གཅིག་གྱུར་གྱི་ལས་དོན་སྒྲུབ་ཡུལ་འབོར་ཆེན་ཞིག་གཞི་རིམ་དུ་ཁྱབ་ཡོད་པས། གཞི་རིམ་ཏང་རྩ་འཛུགས་ཀྱི་འཐབ་འཛིང་བཙན་རྫོང་གི་ནུས་པ་འདོན་སྤེལ་བྱས་ཏེ། འཐབ་ཕྱོགས་གཅིག་གྱུར་གྱི་ལས་དོན་དེ་གཞི་རིམ་ཏང་འཛུགས་སྐྲུན་དང་སྤྱི་ཚོགས་བཅོས་སྐྱོང་མ་ལག་ནང་འདྲེས་པར་བྱེད་པ་དང་། ལས་ཀ་དམ་འཛིན་བྱེད་མཁན་དང་དོ་དམ་བྱེད་མཁན་ཡོད་པར་ཁག་ཐེག་བྱས་ནས། གཞི་རིམ་གྱི་འཐབ་ཕྱོགས་གཅིག་གྱུར་ལས་དོན་ཏན་ཏིག་ངང་ལེགས་པོར་བསྒྲུབ་དགོས།

འགག་རྩ་ནི་ཕྱོགས་བཞིའི་ཐད་ཀྱི་འབྲེལ་བ་ཐག་གཅོད་ཡང་དག་དང་ཁོང་དུ་ཆུད་པ་བྱ་རྒྱུར་ཐུག་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དུས་རབས་གསར་པར་ཀྲུང་ཧྭའི་བུ་ཕྲུག་གི་མཐུན་སྒྲིལ་ཆེན་པོ་ཡོང་བར་སྐུལ་འདེད་གཏོང་བའི་ལས་དོན་ཡག་པོ་བསྒྲུབ་དགོས་ན། ངེས་པར་དུ་ཕྱོགས་བཞིའི་ཐད་ཀྱི་འབྲེལ་བ་སྟངས་འཛིན་ཡག་པོ་བྱེད་དགོས་ཞེས་ནན་གསུང་གནང་ཡོད། ཕྱོགས་བཞིའི་འབྲེལ་བ་དེས་“གནད་གཉིས་སྨྲ་བ་”གླེང་ཡོད་ལ་“གཙོ་གནད་སྨྲ་བ་”ཡང་གླེང་ཡོད། འགལ་བའི་ཡོངས་ཁྱབ་རང་བཞིན་གླེང་ཡོད་ལ་འགལ་བའི་དམིགས་བསལ་རང་བཞིན་ཡང་གླེང་ཡོད། མར་ཁེ་སིའི་རིང་ལུགས་ཀྱི་ཤེས་རྟོགས་སྨྲ་བ་དང་བརྟག་ཐབས་སྨྲ་བ་གཅིག་གྱུར་དམ་ཚགས་ཡོད་པ་མཚོན་ནས། ང་ཚོས་འཐབ་ཕྱོགས་གཅིག་གྱུར་གྱི་ཆབ་སྲིད་ཀྱི་རང་བཞིན་དང་ཐབས་ཇུས་ཀྱི་རང་བཞིན་ཁོང་དུ་ཆུད་པ་དང་། འཐབ་ཕྱོགས་གཅིག་གྱུར་གྱི་ལས་དོན་སྤུས་ཚད་མཐོན་པོའི་སྒོ་ནས་གོང་དུ་སྤེལ་བར་སྐུལ་འདེད་གཏོང་བར་གཞི་འཛིན་ས་གལ་ཆེན་འདོན་སྤྲོད་བྱས་ཡོད། ལྟེ་བ་བརྟན་སྲུང་དང་ཐུན་མོང་གི་ངོས་འཛིན་རྒྱ་ཆེར་གཏོང་རྒྱུའི་འབྲེལ་བ་སྟངས་འཛིན་ཡག་པོ་བྱེད་པ་སྟེ། ཀྲུང་གོའི་གུང་ཁྲན་ཏང་གི་འགོ་ཁྲིད་ལྟེ་བར་བྱས་ནས་མཐུན་སྒྲིལ་གྱི་རྨང་གཞི་བརྟན་པོ་འཛུགས་པ་དང་ཆབས་ཅིག །ཐུན་མོང་གི་ངོས་འཛིན་རྒྱུན་ཆད་མེད་པར་ཟབ་ཏུ་གཏོང་བ་དང་མཐུན་སྒྲིལ་གྱི་ཁྱབ་ཁོངས་རྒྱ་ཆེར་བཏང་ནས་སེམས་པ་གཅིག་མཐུན་དེ་བས་ཆེན་པོར་ཆགས་དགོས་པ་དེ་ཡིན། མངོན་མེད་གྲུབ་འབྲས་དང་མངོན་ཡོད་གྲུབ་འབྲས་བར་གྱི་འབྲེལ་བ་སྟངས་འཛིན་ཡག་པོ་བྱེད་དགོས་པ་སྟེ། སྲིད་སྐྱོང་བྱས་འབྲས་ཀྱི་ལྟ་བ་ཡང་དག་རྒྱུན་འཁྱོངས་བྱས་ནས་མངོན་ཡོད་ཀྱི་གྲུབ་འབྲས་རིགས་བསྒྲུབ་དགོས་ལ། རྨང་གཞི་འདིང་བ་དང་ཕུགས་ལ་ཕན་པའི་མངོན་མེད་གྲུབ་འབྲས་དེ་བས་ཀྱང་བསྒྲུབ་དགོས། ཏན་ཏན་ཏིག་ཏིག་དང་གོམ་རེར་སྒར་རེ་བརྒྱབ་ནས་སྒུག་མི་རུང་བའི་གནད་དོན་ཐག་གཅོད་ཡག་པོ་བྱེད་དགོས་ལ། རྒྱུན་སྲིང་ལྷོད་མེད་དང་སྙིང་རུས་གཏན་འཁྱོངས་ཀྱིས་བྲེལ་འཚུབ་བྱས་མི་རུང་བའི་གནད་དོན་ཐག་གཅོད་ཡག་པོ་བྱེད་དགོས། རྩ་དོན་རང་བཞིན་དང་སྟབས་བསྟུན་རང་བཞིན་གྱི་འབྲེལ་བ་སྟངས་འཛིན་ཡག་པོ་བྱེད་དགོས་པ་སྟེ། བྱེད་ཕྱོགས་དང་སྲིད་ཇུས་ཀྱི་རྩ་དོན་རང་བཞིན་དང་ཐབས་ཇུས་ཀྱི་བབ་བསྟུན་རང་བཞིན་ཟུང་འབྲེལ་བྱས་ནས། ལངས་ཕྱོགས་བརྟན་པོ་དང་རྩ་དོན་གྱི་གནད་དོན་ཐད་གོམ་པ་གང་ཡང་མི་གློད་པ་དང་། བྱེ་བྲག་གི་གནད་དོན་ལ་བྱེ་བྲག་གིས་དབྱེ་ཞིབ་བྱས་ནས་ཚོད་རན་པོ་དང་ཚད་གཞི་སྟངས་འཛིན་ཡག་པོ་བྱས་ཏེ་དམ་ལྷོད་ནོར་འཁྲུལ་མི་ཡོང་བ་བྱེད་དགོས། མཐུན་སྒྲིལ་དང་འཐབ་རྩོད་བར་གྱི་འབྲེལ་བ་དམ་འཛིན་ལེགས་པོ་བྱེད་དགོས་པ་སྟེ། མཐུན་སྒྲིལ་དང་འཐབ་རྩོད་གཅིག་གྱུར་བྱས་ཏེ། མཐུན་སྒྲིལ་བྱེད་མཁས་པོ་དང་། རྩ་དོན་ཡོད་པ་དང་འགན་འཁུར་བའི་མཐུན་སྒྲིལ་ཡོང་བ་བྱེད་དགོས་ལ། འཐབ་རྩོད་བྱེད་མཁས་པོའང་བྱས་ཏེ། འཐབ་རྩོད་བྱེད་རིང་དུ་མཐུན་སྒྲིལ་ཡོང་ཐབས་བྱས་ནས་འགྱུར་བ་མེད་པའི་མཐུན་སྒྲིལ་ངོ་མ་ཞིག་ཆགས་པར་འབད་བརྩོན་བྱེད་དགོས།

གཙོ་གནད་ནི་འཐབ་ཕྱོགས་གཅིག་གྱུར་གྱི་ཁྱབ་ཁོངས་ཁག་གི་ལས་ཀའི་ཤུགས་རྒྱག་ས་གནད་འཁེལ་བ་འཚོལ་རྒྱུ་དེ་ཡིན། གཙོ་བོ་བསྒྲུབས་ན་ཕལ་བ་ཤུགས་ཀྱིས་འགྲུབ། རྩ་བ་བཟུང་ན་ཡན་ལག་ངང་གིས་ཐོན། གནད་དོན་ཕྱོགས་སྟོན་དུ་འཛིན་རྒྱུ་རྒྱུན་འཁྱོངས་བྱས་ཏེ་དམིགས་ས་དང་ཤུགས་རྒྱག་ས་གནད་འཁེལ་བ་ཞིག་འཚོལ་ན། གཙོ་གནད་དང་དཀའ་གནད་ཆེ་བའི་ལས་ཀར་སྐུལ་འདེད་བཏང་བ་བརྒྱུད་ཁྱོན་ཡོངས་ཀྱི་ལས་ཀ་སྒྲུབ་པར་སྐུལ་ཁྲིད་བྱས་ཐུབ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐེངས་འདིའི་གྲོས་ཚོགས་ཐོག་ནན་གསུང་གནང་དོན། ཏང་ཀྲུང་དབྱང་གི་བོད་ལྗོངས་དང་། ཞིན་ཅང་། མི་རིགས། ཆོས་ལུགས་ལ་སོགས་པའི་ལས་དོན་སྐོར་གྱི་ཚོགས་འདུའི་དགོངས་དོན་གལ་ཆེན་དོན་འཁྱོལ་བྱེད་རྒྱུ་དམ་འཛིན་ཡག་པོ་བྱེད་དགོས་ལ། མིག་སྔའི་གཙོ་གནད་ཡིན་པའི་ལས་ཀ་འགའ་ཡང་དམ་འཛིན་ཡག་པོ་བྱེད་དགོས། དམངས་གཙོའི་ཏང་ཤོག་དང་ཏང་ཤོག་གང་ལའང་མི་གཏོགས་པའི་མི་སྣའི་ལས་དོན་ཐད། རང་རྒྱལ་གྱི་སྲིད་ཏང་ལམ་ལུགས་གསར་པའི་ཕན་ནུས་འདོན་སྤེལ་བྱ་རྒྱུར་གཞིགས་ནས་དམངས་གཙོའི་ཏང་ཤོག་གི་ཁྱད་ཆོས་དང་མཐུན་པ་དང་། རྒྱུད་རིམ་ལྡན་ལ་ཚད་དང་ལྡན་པའི་སྲིད་ཞུགས་ཏང་འཛུགས་སྐྲུན་བྱེད་པའི་ལམ་ལུགས་དང་ལམ་སྲོལ་འཛུགས་པ་དང་འཐུས་ཚང་དུ་བཏང་ནས། དུས་རབས་གསར་པར་ཏང་མང་མཉམ་ལས་སྔར་བས་ཚད་ལྡན་དང་། གོ་རིམ་ལྡན་པ། སྐྱེ་སྟོབས་ཀྱི་དཔལ་འབར་བ་བཅས་ཡོང་བར་སྐུལ་འདེད་གཏོང་དགོས། ཏང་ཕྱིའི་ཤེས་ཡོན་ཅན་དང་སྤྱི་ཚོགས་ཀྱི་རིམ་གྲས་གསར་པའི་མི་སྣའི་འཐབ་ཕྱོགས་གཅིག་གྱུར་ལས་དོན་ཐད། ཏང་ཕྱིའི་ཤེས་ཡོན་ཅན་དང་། སྤྱི་ཚོགས་ཀྱི་རིམ་གྲས་གསར་པའི་མི་སྣའི་རྩ་འཛུགས་བྱེད་སྟངས་འཐུས་ཚང་དུ་གཏོང་རྒྱུ་དེ་འཛིན་སྤྱད་དུ་བྱས་ནས། ཁོངས་མི་ཡོད་ཀྱང་རྩ་འཛུགས་མེད་པ་དང་། རྩ་འཛུགས་ཡོད་ཀྱང་བྱེད་སྒོ་མེད་པ། བྱེད་སྒོ་ཡོད་ཀྱང་ཕན་འབྲས་མེད་པ་བཅས་ཀྱི་འབུར་ཐོན་གནད་དོན་མཐག་གཅོད་བྱེད་དགོས། སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་ཁྱབ་ཁོངས་ཀྱི་འཐབ་ཕྱོགས་གཅིག་གྱུར་ལས་དོན་ཐད། “བློ་བརྟན་འགྱུར་མེད་གཉིས་”རྒྱུན་འཁྱོངས་དང་“བདེ་ཐང་གཉིས་”ལ་སྐུལ་འདེད་གཏོང་རྒྱུར་དམིགས་ཏེ་མཛའ་བརྩེ་ལྷད་མེད་ཀྱི་སྲིད་ཚོང་གི་འབྲེལ་བ་ཧུར་ཐག་གིས་བཙུགས་ནས། དམངས་གཉེར་དཔལ་འབྱོར་སྤུས་ཚད་མཐོན་པོའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཆེད་ཆ་རྐྱེན་བསྐྲུན་དགོས། ཞང་ཀང་དང་ཨའོ་མོན། ཐའེ་ཝན་བཅས་ཀྱི་ཕྱི་རྒྱལ་གྱི་འཐབ་ཕྱོགས་གཅིག་གྱུར་ལས་དོན་དང་ཕྱིར་སྡོད་རང་མིའི་ལས་དོན་ཐད་མི་སེམས་འགུག་ཐབས་དང་། མཐུན་སྒྲིལ་དང་བརྩོན་ལེན་གྱི་ལས་ཀ་མང་ཙམ་སྒྲུབ་པ། རྒྱལ་གཅེས་སྟོབས་ཤུགས་འཕེལ་རྒྱས་དང་སྟོབས་ཆེར་གཏོང་བ་བཅས་བྱས་ནས་སེམས་པ་གཅིག་མཐུན་ཆེ་ཤོས་གཏོད་དགོས། དྲ་རྒྱའི་འཐབ་ཕྱོགས་གཅིག་གྱུར་ལས་དོན་ཐད། དྲ་ཤེས་དང་དྲ་མཁས། དྲ་སྤྱོད་ཤེས་པ་བཅས་བྱས་ནས་དྲ་སྦྲེལ་གྱི་བསམ་གཞིག་སྤྱད་དེ་ལས་ཀ་བསྒྲུབས་ནས་“གདོང་དང་གདོང་གཏུག་པ་”དང་“མཐེབ་གཞོང་དང་མཐེབ་གཞོང་གཏུག་པ་”ཟུང་འབྲེལ་བྱས་ཏེ་དྲ་རྒྱའི་མང་ཚོགས་ཀྱིས་འདུ་ཤེས་འཛིན་སྟངས་ཀྱི་བདེ་འཇགས་སྲུང་སྐྱོང་བྱེད་ཆེད་དྲང་ཕྱོགས་ཀྱི་ནུས་པ་འདོན་པར་རྒྱབ་སྐྱོར་བྱེད་དགོས། ཚོགས་འདུའི་དགོངས་དོན་ལག་བསྟར་དོན་འཁྱོལ་བྱེད་པར་ས་གནས་ཁག་གི་དོན་དངོས་དང་ཟུང་འབྲེལ་བྱས་ནས་སྤྱི་འདོམས་མཐུན་སྦྱོར་དང་གཅིག་གྱུར་ཐོག་སྐུལ་འདེད་བཏང་སྟེ་དུས་རབས་གསར་པའི་འཐབ་ཕྱོགས་གཅིག་གྱུར་གྱི་བྱ་གཞག་ཕྱོགས་ཡོངས་ནས་གསར་གཏོད་འཕེལ་རྒྱས་ཡོང་བ་མངོན་འགྱུར་བྱེད་དགོས།

གནད་འགག་ནི་འཐབ་ཕྱོགས་གཅིག་གྱུར་ཁྱབ་ཁོངས་ཀྱི་ཉེན་ཁ་ཚབས་ཆེན་འགོག་ཟོན་དང་སེལ་ཐབས་བྱ་རྒྱུ་དེ་ཡིན། འཐབ་ཕྱོགས་གཅིག་གྱུར་ཁྱབ་ཁོངས་ཀྱི་ཞི་མཐུན་བརྟན་བརླིང་སྲུང་སྐྱོང་བྱས་ནས་ཉེན་ཁ་འབྱུང་གཞི་སྔོན་འགོག་དང་སེལ་ཐབས་བྱེད་པའི་ཁྲོད་དུ་སོ་ལྟ་པ་ཡག་པོ་བྱེད་དགོས་པ་སྟེ། འཐབ་ཕྱོགས་གཅིག་གྱུར་གྱིས་མཆོག་ནོར་གྱི་ནུས་པ་འདོན་སྤེལ་བྱེད་པའི་མཚོན་ཚུལ་གལ་ཆེན་ཞིག་ཡིན་ལ། ང་ཚོའི་ཏང་གིས་འཐབ་ཕྱོགས་གཅིག་གྱུར་ལས་དོན་ལ་བཏོན་པའི་མཐའ་ཚད་ཀྱི་བླང་བྱ་ཞིག་ཀྱང་ཡིན། མཐའ་ཚད་ཀྱི་བསམ་གཞིག་རྒྱུན་འཁྱོངས་བྱས་ཏེ་སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་བརྟན་པོ་བཙུགས་ནས་མི་རིགས་དང་། ཆོས་ལུགས། ཞིན་ཅང་དང་བོད་བཅས་དང་འབྲེལ་བ་ཡོད་པ་དང་། ཞང་ཀང་དང་ཐའེ་ཝན་དང་འབྲེལ་བ་ཡོད་པ། ཕྱི་རྒྱལ་དང་འབྲེལ་བ་ཡོད་པ་སོགས་འཐབ་ཕྱོགས་གཅིག་གྱུར་ལས་དོན་གྱི་གཙོ་གནད་ཁྱབ་ཁོངས་ཀྱི་ཉེན་ཁ་འབྱུང་གཞི་གྲལ་བཤེར་གཏིང་ཟབ་བྱེད་དགོས། ལྟ་ཞིབ་ཚད་ལེན་དང་ཉེན་ཟོན་སྔོན་བརྡ་གཏོང་བ་དང་། དབྱེ་ཞིབ་དང་ཞིབ་འཇུག་བརྡར་གཅོད་བྱེད་པ། འཕྲལ་སྡོམ་ཐག་གཅོད་བྱེད་པ་སོགས་ཀྱི་ལས་ཀ་ཡག་པོ་བསྒྲུབས་ཏེ་ཉེན་ཁ་འབྱུང་གཞི་འགོ་འབུས་ཙམ་ནས་མེད་པ་བཟོ་དགོས། ཕྱོགས་གཅིག་ནས་བསམ་བློ་དང་ཆབ་སྲིད་ཀྱི་ཁྲིད་སྟོན་དམ་འཛིན་དང་། ཕྱོགས་གཅིག་ནས་སིམ་འཛུལ་དང་གཏོར་བཤིག་འགོག་ཟོན་བྱ་རྒྱུ་དམ་འཛིན་བྱས་ཏེ། ཆ་ཤས་ཀྱི་ཉེན་ཁ་དེ་ཁྱོན་ཡོངས་ཀྱི་ཉེན་ཁར་འགྱུར་རིགས་དང་། དཔལ་འབྱོར་དང་སྤྱི་ཚོགས་ཀྱི་ཉེན་ཁ་དེ་ཆབ་སྲིད་ཀྱི་ཉེན་ཁར་འགྱུར་རིགས། རྒྱལ་སྤྱིའི་ཉེན་ཁ་དེ་རྒྱལ་ནང་གི་ཉེན་ཁར་འགྱུར་རིགས། རྒྱུད་རིམ་རང་བཞིན་གྱི་ཉེན་ཁ་དང་ཉེན་ཁ་ཆེན་པོ་མི་འབྱུང་བའི་མཐའ་ཚད་བརྟན་པོར་བསྲུང་དགོས། ཉེན་ཟོན་ལམ་སྲོལ་འཐུས་ཚང་དུ་བཏང་ནས་ཉེན་ཁ་འབྱུང་གཞི་སྔོན་འགོག་དང་སེལ་ཐབས་བྱེད་པའི་འགོ་ཁྲིད་ཀྱི་འགན་འཁྲི་དང་ལས་ཀའི་འགན་འཁྲི་དོན་འཁྱོལ་བྱས་ཏེ། ཉེན་ཁ་འབྱུང་གཞི་སྔོན་འགོག་དང་སེལ་ཐབས་བྱེད་པའི་ལས་ཀའི་སྤྱི་ཡོངས་རང་བཞིན་དང་མཐུན་སྦྱོར་རང་བཞིན་དང་ཕན་འབྲས་རང་བཞིན་བཅས་སྔར་བས་ཆེ་རུ་གཏོང་དགོས། དྲ་ཐོག་དང་དྲ་ཕྱི་གཅིག་གྱུར་འཆར་འགོད་དང་། སྤྱི་ཚོགས་ཐོག་གླེང་ཆ་ཆེ་བའི་ཚོར་སྣང་སྐྱེན་པའི་དོན་རྐྱེན་ལ་ཁ་གཏད་འོས་འཚམ་འཇལ་བ། དྲ་ཕྱི་ནས་གནད་དོན་ཐག་གཅོད་དང་དྲ་ཐོག་ནས་ཨ་ལན་སློག་པར་སྣེ་ཁྲིད་ནུས་ལྡན་བྱེད་པ་ཟུང་འབྲེལ་བྱ་རྒྱུ་རྒྱུན་འཁྱོངས་བྱས་ཏེ། ཉེན་ཁ་རྩེག་སྣོན་བྱུང་ནས་“ངང་པ་ནག་པོ་”དང་“བསེ་རུ་སྐྱ་བོའི་”དོན་རྐྱེན་འབྱུང་བར་སྔོན་འགོག་བྱེད་དགོས།

རྨང་གཞི་ནི་འཐབ་ཕྱོགས་གཅིག་གྱུར་གྱི་“དཔུང་སྡེ་གཉིས་”འཛུགས་སྐྲུན་བྱེད་ཤུགས་ཆེ་རུ་གཏོང་རྒྱུ་དེ་ཡིན། བྱང་ཚད་མཐོ་བའི་ཏང་ཕྱིའི་འཐུས་མིའི་དཔུང་ཁག་དང་འཐབ་ཕྱོགས་གཅིག་གྱུར་གྱི་ལས་བྱེད་པའི་དཔུང་ཁག་གསོ་སྐྱོང་བྱ་རྒྱུ་སྟེ། དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་སྲ་བརྟན་དང་འཕེལ་རྒྱས་གཏོང་བའི་རྩ་འཛུགས་ཀྱི་འགན་ལེན་གལ་ཆེན་ཞིག་ཡིན། འཐབ་ཕྱོགས་གཅིག་གྱུར་གྱི་བྱ་གཞག་ཡུན་རིང་འཕེལ་རྒྱས་གཏོང་བར་དམིགས་ཏེ་ཆབ་སྲིད་ཀྱི་གསོ་སྦྱོང་གཙོ་བོར་འཛིན་རྒྱུ་རྒྱུན་འཁྱོངས་དང་། རྩ་འཛུགས་ཀྱི་གསོ་སྐྱོང་བྱེད་ཤུགས་ཆེ་རུ་གཏོང་བ། ཏང་ཕྱིའི་འཐུས་ཚབ་མི་སྣའི་ཕུགས་བསམ་དང་དད་སེམས་བརྟན་དུ་གཏོང་བ་དང་། ཆབ་སྲིད་ཀྱི་ངོས་འཛིན་གཅིག་མཐུན་ཆེ་རུ་གཏོང་བ། ཆབ་སྲིད་ཀྱི་ལངས་ཕྱོགས་བརྟན་པོ་འཛིན་པ་བཅས་ཀྱི་ཁྲིད་སྟོན་བྱས་ཏེ་ཏང་དང་བློ་གཅིག་སེམས་གཅིག་དང་བྱང་ཚད་མཐོ་བའི་ཏང་ཕྱིའི་འཐུས་ཚབ་མི་སྣའི་དཔུང་ཁག་ཅིག་ཧུར་ཐག་གིས་གསོ་སྐྱོང་དང་སྐྱེད་སྲིང་བྱེད་དགོས། ཆབ་སྲིད་ཀྱི་སྦྱོང་བརྡར་དང་ལས་སྒོའི་སྦྱོང་བརྡར་བྱེད་ཤུགས་ཆེ་རུ་གཏོང་བ་དང་། འཐབ་ཕྱོགས་གཅིག་གྱུར་ལས་བྱེད་པའི་ཆབ་སྲིད་ཀྱི་བརྡར་ཤ་གཅོད་ནུས་དང་། ཆབ་སྲིད་ཀྱི་གོ་རྟོགས་ནུས་པ། ཆབ་སྲིད་ཀྱི་ལག་བསྟར་བྱེད་ནུས་བཅས་ཇེ་ཆེར་གཏོང་བར་ཤུགས་རྒྱག་པ་དང་། རིགས་པའི་གཞུང་ལུགས་དང་སྲིད་ཇུས་ཀྱི་ཆུ་ཚད་དང་ལས་སྒོའི་འཇོན་ནུས་ཉམས་སད་ཐེག་ཐུབ་པ་གསོ་སྐྱོང་བྱས་ཏེ། ཏང་གཤིས་བརྟན་པོ་དང་འཇོན་ཐང་ཆེ་བ། ཤེས་ཡོན་ཕུན་སུམ་ཚོགས་པ། སྤྱོད་ཚུལ་བཟང་པོ་བཅས་ལྡན་པའི་བྱང་ཚད་མཐོ་བའི་འཐབ་ཕྱོགས་གཅིག་གྱུར་གྱི་ལས་བྱེད་པའི་དཔུང་སྡེ་ཞིག་འཛུགས་སྐྱོང་བྱེད་དགོས།

དུས་རབས་གསར་པར་རེ་སྒུག་གསར་པ་ཡོད་ལ། འཐབ་ལམ་གསར་པས་བྱས་རྗེས་གསར་པ་འབོད་སྐུལ་བྱེད། ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་སྐོར་དུ་མཐུན་སྒྲིལ་སྔར་ལས་དམ་ཟབ་དང་། དུས་རབས་གསར་པའི་ཏང་གི་འཐབ་ཕྱོགས་གཅིག་གྱུར་ལས་དོན་ལེགས་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་དོན་གལ་ཆེན་ཕྱོགས་ཡོངས་ནས་ལག་ལེན་མཐར་ཕྱིན་བསྟར་བ། སེམས་ཤུགས་གཅིག་སྒྲིལ་དང་གསར་གཏོད་ཡར་བརྩོན་བྱས་ནས་ཆེས་རྒྱ་ཆེ་བའི་དུས་རབས་གསར་པའི་རྒྱལ་གཅེས་འཐབ་ཕྱོགས་གཅིག་གྱུར་རྒྱུན་ཆད་མེད་པར་སྲ་བརྟན་དང་འཕེལ་རྒྱས་བཏང་སྟེ། བྱ་སྤྱོད་དངོས་ཀྱི་ཐོག་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་བྱས་ཏེ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་ཡོང་བར་བྱས་རྗེས་གསར་པ་དེ་བས་ཆེ་བ་འབུལ་དགོས།

དབང་ལྡན་ཚེ་རིང་གིས་བསྒྱུར།