གངས་ལྗོངས་ས་མཐོའི་ཡུལ་དུ་དྲོ་འཇམ་ཉི་ཟེར་རབ་ཏུ་འཕྲོས་།

སྔོན་འགྲོའི་གཏམ། 

ཏང་གི་ཚོགས་ཆེན་ཉི་ཤུ་པའི་དགོངས་དོན་དང་ཞིང་ཆེན་ཏང་ཨུའི་སྐབས་བཅུ་གཉིས་པའི་ཚང་འཛོམས་གྲོས་ཚོགས་ཐེངས་གཉིས་པའི་དགོངས་དོན་སློབ་སྦྱོང་དང་དྲིལ་བསྒྲགས། དོན་འཁྱོལ་བྱ་རྒྱུ་ནི་མིག་སྔར་དང་རྗེས་ཕྱོགས་ཀྱི་དུས་སྐབས་ཤིག་གི་ཆབ་སྲིད་ཀྱི་ལས་འགན་གཙོ་བོ་ཡིན། དུས་ཚོད་ངེས་ཅན་ཞིག་གི་ནང་། སི་ཁྲོན་བོད་འབྲེལ་ཁུལ་དང་རྫོང་གིས་ཏང་གི་ཚོགས་ཆེན་ཉི་ཤུ་པའི་དགོངས་དོན་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སི་ཁྲོན་ལས་དོན་ཐད་གནང་བའི་མཛུབ་སྟོན་གལ་ཆེན་གྱི་དགོངས་དོན་རབ་དང་རིམ་པ། ཞིང་ཆེན་ཏང་ཨུའི་སྐབས་བཅུ་གཉིས་པའི་ཚང་འཛོམས་གྲོས་ཚོགས་ཐེངས་གཉིས་པའི་དགོངས་དོན་བཅས་སློབ་སྦྱོང་དོན་འཁྱོལ་བྱ་རྒྱུ་ཟུང་གཅིག་ཏུ་སྦྲེལ་བ་དང་། ཀྲུང་དབྱང་གི་བོད་ལྗོངས་ལས་དོན་གྱི་བཞུགས་མོལ་གྲོས་ཚོགས་ཐེངས་བདུན་པའི་དགོངས་དོན་དང་ཀྲུང་དབྱང་འཐབ་ཕྱོགས་གཅིག་གྱུར་ལས་དོན་གྲོས་ཚོགས་ཀྱི་དགོངས་དོན། ཞིང་ཆེན་ཏང་ཨུའི་བོད་འབྲེལ་ལས་དོན་གྲོས་ཚོགས་ཀྱི་དགོངས་དོན། ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་ལས་དོན་གྲོས་ཚོགས་ཀྱི་དགོངས་དོན་དོན་འཁྱོལ་ལག་བསྟར་བྱ་རྒྱུ་ཟུང་དུ་སྦྲེལ་ནས། ངེས་པ་དོན་གྱིས་བསམ་བློ་དང་བྱ་སྤྱོད་ཀྲུང་དབྱང་དང་ཞིང་ཆེན་ཏང་ཨུའི་ཐབས་ཇུས་བཀོད་སྒྲིག་ཐོག་གཅིག་གྱུར་བྱས་པ་རེད། སི་ཁྲོན་བོད་འབྲེལ་ཁུལ་དང་རྫོང་གིས་སློབ་སྦྱོང་གི་རྣམ་པ་དང་བརྒྱུད་བསྒྲགས་ཀྱི་རྣམ་པ་གསར་གཏོད་བྱས་ཏེ། ཏང་གི་ཚོགས་ཆེན་ཉི་ཤུ་པའི་དགོངས་དོན་དང་ཞིང་ཆེན་ཏང་ཨུའི་སྐབས་བཅུ་གཉིས་པའི་ཚང་འཛོམས་གྲོས་ཚོགས་ཐེངས་གཉིས་པའི་དགོངས་དོན་ཞིང་འབྲོག་མང་ཚོགས་ཁྲོད་ཟབ་མོ་སྤེལ་ཏེ། མི་རིགས་ས་ཁུལ་གྱི་མཐུན་སྒྲིལ་ཡར་ཐོན་དང་འབྱོར་ཕྱུག་འཕེལ་རྒྱས་ལ་སྐུལ་འདེད་བཏང་བར་མ་ཟད། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་བསྐྲུན་པར་སི་ཁྲོན་གྱི་སྟོབས་ཤུགས་བསྩལ་ཡོད།

སི་ཁྲོན་བོད་འབྲེལ་ས་ཁུལ་གྱིས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལ་སློབ་སྦྱོང་དྲིལ་བསྒྲགས་དོན་འཁྱོལ་བྱས་པ།

གསར་གཏོད་རྣམ་པའི་ཐོག་ཏང་གི་ཚོགས་ཆེན་ཉི་ཤུ་པའི་དགོངས་དོན་ཞིང་འབྲོག་མང་ཚོགས་ཁྲོད་བསྐྱལ།

ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོགས་ཚུན། སི་ཁྲོན་བོད་འབྲེལ་ས་ཁུལ་དུ་མགྱོགས་མྱུར་སྒོས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་དྲིལ་བསྒྲགས། དོན་འཁྱོལ་བྱེད་པའི་ཚ་རླབས་འཕྱུར་བར་མ་ཟད། ཞིང་ཨུའི་སྐབས་བཅུ་གཉིས་པའི་ཚང་འཛོམས་གྲོས་ཚོགས་ཐེངས་གཉིས་པའི་དགོངས་དོན་སློབ་སྦྱོང་བྱེད་པ་དང་ཟུང་འབྲེལ་བྱས་ནས། སྒྲོག་འགྲེལ་ཚོགས་པ་སོ་སོ་དང་སྒྲོག་འགྲེལ་རུ་ཁག་གི་ཁོངས་མི། དེ་མིན་སྤྱི་ཚོགས་ཀྱི་ལས་རིགས་སོ་སོའི་སྒྲོག་འགྲེལ་རང་འདུན་པ་སོགས་ཀྱིས་རང་གི་ཆེད་ལས་ཀྱི་འཇོན་ཐང་མངོན་དུ་ཕྱུང་བ་དང་། མང་ཚོགས་ཀྱི་རྣ་ལ་སྙན་ཞིང་ཡིད་ལ་བབ་པའི་རྣམ་པ་ལ་བརྟེན་ནས། བྱེད་ཡུལ་ཅན་དང་ཕན་ཚུན་སྐུལ་འདེད་ཅན་གྱི་སྒྲོག་འགྲེལ་རྒྱ་ཆེན་པོ་སྤེལ་བར་བརྒྱུད། ཏང་གི་ཚོགས་ཆེན་ཉི་ཤུ་པའི་དགོངས་དོན་ཀུན་གྱིས་རྟོགས་པར་སྐུལ་འདེད་བཏང་བ་རེད།

དཀར་མཛེས་ཁུལ་སྡེ་རོང་རྫོང་དུ་ཏང་གི་ཚོགས་ཆེན་ཉི་ཤུ་པའི་དགོངས་དོན་རྒྱ་བོད་སྐད་གཉིས་ཀྱི་སྒྲོག་འགྲེལ་བྱེད་པའི་ཚོགས་པ་བཙུགས་ཏེ། ཡུལ་ཤོག་དང་གྲོང་སྡེ་རུ་སྐྱོད་ནས། ཚོགས་ཆེན་གྱི་བརྗོད་བྱའི་སྙིང་པོ་དང་གྲུབ་འབྲས་གཙོ་བོ། དོན་སྙིང་གལ་ཆེན་བཅས་ཀྱི་ཐད་ནས། མུ་མཐུད་དུ་དབུལ་གྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་བསྐྱེད་གཏོང་བ། ཁྱོན་ཡོངས་ནས་གྲོང་གསེབ་དར་རྒྱས་ལ་སྐུལ་འདེད་གཏོང་བ། མི་དམངས་ཡོངས་རྫོགས་མཉམ་དུ་འབྱོར་ཕྱུག་ལྡན་པར་མངོན་འགྱུར་ཡོང་བ་བཅས་དང་ཟུང་འབྲེལ་སྒོས་བརྗོད་དོན་ཟབ་ཅིང་གོ་བདེ་བའི་འགྲེལ་བཤད་བྱས། ལྷག་པར་དུ་ཏང་ཀྲུང་དབྱང་གིས་མི་རིགས་ས་ཁུལ་དུ་ལག་བསྟར་བྱས་པའི་གཟིགས་སྐྱོང་སྲིད་ཇུས་ཁག་འགྲེལ་བཤད་བྱས་ནས། མང་ཚོགས་ལ་ཏང་གི་ཚོགས་ཆེན་ཉི་ཤུ་པའི་དགོངས་དོན་ལ་གོ་བ་ཟབ་མོ་ལེན་དུ་བཅུག་པ་དང་། མུ་མཐུད་དུ“མི་རིགས་མཐུན་སྒྲིལ་ཁྱིམ་དུ་སྐྱོད་པའི”ལག་ལེན་བྱ་སྤྱོད་གཏིང་ཇེ་ཟབ་བཏང་བ་རེད།

དཀར་མཛེས་ཁུལ་ལི་ཐང་རྫོང་གིས་ཏང་གི་ཚོགས་ཆེན་ཉི་ཤུ་པའི་དགོངས་དོན་ཞིང་འབྲོག་ཁུལ་དུ་བསྐྱལ་བ་དང། རྫོང་ཨུའི་སྒྲོག་འགྲེལ་ཚོགས་པ་ཡུལ་ཤོག་དང་གྲོང་རྡལ་དུ་ཕྱིན་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་སྒྲོག་འགྲེལ་བྱས། “མཛའ་བརྩེའི་སེམས་ཚོར། འཚོ་བའི་བྲོ་བ། ཡུལ་གྱི་ཁྱད་ཆོས”བཅས་ཀྱིས་ཁེངས་པའི་སྒྲོག་འགྲེལ་བྱས་པས། སྒྲོག་འགྲེལ་བྱས་པ་བརྒྱུད་མི་དམངས་མང་ཚོགས་ལ“སྦྱོང་པ་ལེགས། བློ་ལ་འཇགས། བརྗོད་ཐུབ་པ”བཅས་བྱུང་ཡོད། ལི་ཐང་རྫོང་གི་ལས་བྱེད་པ་རྒན་པའི་ཀྲི་པུའུ་ཧྲུའུ་ཅི་གཞོན་པ་ངག་དབང་གིས་སྒྲོག་འགྲེལ་བྱེད་སྐབས“སྔོ་ལྗང་རི་ཆུ་ནི་གསེར་རི་དངུལ་རི་ཡིན། གངས་འཁྱགས་རི་ཀླུང་ནི་གསེར་རི་དངུལ་རི་ཡིན། ཚང་མས་ངེས་པར་དུ་སྐྱེ་ཁམས་ཁོར་ཡུག་ལ་སྲུང་སྐྱོབ་ཡག་པོ་བྱེད་དགོས། རྩྭ་དང་རྩི་ཤིང་རྐང་གཅིག་ལའང་སྲུང་སྐྱོབ་བྱེད་དགོས། མི་དང་རང་བྱུང་ཁམས་ཞི་བདེ་མཉམ་གནས་ཡོང་ཐབས་བྱེད་དགོས། ཏང་ལ་དགའ་བ་དང་རྒྱལ་ཁབ་ལ་དགའ་བ། ཏང་གི་དྲིན་དྲན་པ་དང་ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་དགོས”ཞེས་བཤད།

རྔ་བ་ཁུལ་ཁྲོ་ཆུ་རྫོང་འདྲི་ཏོ་ཡུལ་ཤོག་གིས་རིམས་ནད་སྔོན་འགོག་དང་ཐོན་ལས་འཕེལ་རྒྱས། ནགས་ཚལ་རྩྭ་ཐང་མེ་ཟོན། བདེ་འཇགས་ཐོན་སྐྱེད། རྩོད་གླེང་རིམ་བཤེར། ཁོར་ཡུག་འཕྲོད་བསྟེན་ལེགས་སྒྲིག་སོགས་ལས་དོན་གལ་ཆེན་དང་ཟུང་འབྲེལ་སྒོས། གྲོང་སྡེ་སོ་སོའི་ཏང་ཡོན་ལས་བྱེད་པ་རྣམས་ཞིང་པའི་དུད་ཁྱིམ་དང་ཞིང་ཁ་ལ་སྐྱོད་ནས། མང་ཚོགས་ལ་ཡུལ་དངོས་ནས་ཏང་གི་ཚོགས་ཆེན་ཉི་ཤུ་པའི་སྙན་ཞུ་ནང་བཏོན་པའི་འཚོ་བའི་རྣམ་པ་གསར་པ་ངོ་སྤྲོད་བྱས།

རྔ་བ་ཁུལ་ཆུ་ཆེན་རྫོང་མ་ཎི་ཁོག་སྡེ་པས“སྤྲོ་ཚོགས”རྣམ་པའི་སྒོ་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་དྲིལ་བསྒྲགས་བྱས། ཚང་མ་སྐོར་བ་བྱས་ནས་མཉམ་དུ་བསྡད་རྗེས། ནན་ཏན་སྒོས་སློབ་སྦྱོང་དང་བགྲོ་གླེང་བྱས་པ་དང་། “ངས་འདོན་ཁྱོས་ཉོན”དང“ཁྱོས་འདྲི་ངས་ལན་འདེབས་པ”སོགས་ཀྱི་རྣམ་པས་ཏང་ཡོན་ལས་བྱེད་པས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལ་རྒྱུས་ལོན་ཇེ་ཟབ་ཏུ་བཏང་ཡོད། ། 

སྒྲོག་འགྲེལ་གྱིས་ཕྱོགས་ཡོངས་ཁེབས་ཏེ་མང་ཚོགས་གང་དུ་ཡོད་ན་དེ་རུ་ཏང་གི་གསུང་སྐད་ཡོད།

ཉིན་ཤས་རིང་། དཀར་མཛེས་ཁུལ་དཔལ་ཡུལ་རྫོང་གིས་ལས་ཁུངས་ཀྱི་ཏང་ཡོན་ལས་བྱེད་པ་དང་ཞིང་འབྲོག་མང་ཚོགས། ཁེ་ལས་ལས་བཟོ་པ། སློབ་གྲྭའི་དགེ་སློབ། དགོན་སྡེའི་གྲྭ་བཙུན་སོགས་ཀྱི་སྒྲོག་འགྲེལ་བྱེད་ཡུལ་དགོས་མཁོ་དང་གནས་ཚུལ་ལ་གཞིགས་ནས་བོད་རྒྱ་སྐད་གཉིས་ཀྱི་རྣམ་པ་མི་འདྲ་བ་བརྒྱུད་ནས་སྒྲོག་འགྲེལ་རྒྱུ་ཆ་བསྒྲིགས་པ་དང་། རྫོང་ཨུའི་གཞི་རིམ་མང་ཚོགས་སྒྲོག་འགྲེལ་ཚོགས་པས་ཞིང་འབྲོག་མང་ཚོགས་ཡོངས་ལ་སྒྲོག་འགྲེལ་བྱེད་པ་དང་། དུས་རབས་གསར་པའི་ཤེས་དཔལ་ལག་ལེན་གྱི་ན་གཞོན་སྒྲོག་འགྲེལ་ཚོགས་པས་ལས་ཁུངས་ཀྱི་ལས་བྱེད་པ་ཡོངས་ལ་སྒྲོག་འགྲེལ་བྱེད་པ། ལས་ཁུངས་ལས་རིགས་ཀྱི་སྒྲོག་འགྲེལ་ཚོགས་པས་ལས་རིགས་མ་ལག་ཡོངས་ལ་སྒྲོག་འགྲེལ་བྱེད་པ། ཁེ་ལས་སྒྲོག་འགྲེལ་ཚོགས་པས་གཙོ་གནད་ཁེ་ལས་ཀྱི་ལས་བཟོ་པ་ཡོངས་ལ་སྒྲོག་འགྲེལ་བྱེད་པ། སློབ་གྲྭའི་སྒྲོག་འགྲེལ་ཚོགས་པས་སློབ་གྲྭའི་དགེ་སློབ་ཡོངས་ལ་སྒྲོག་འགྲེལ་བྱེད་པ། དགོན་སྡེའི་སྒྲོག་འགྲེལ་ཚོགས་པས་དགོན་སྡེའི་གྲྭ་བཙུན་ཡོངས་ལ་སྒྲོག་འགྲེལ་བྱེད་པའི་བྱེད་ཐབས་སྤྱད་དེ། རྫོང་དང་ཡུལ་ཤོག །གྲོང་ཚོ་བཅས་སུ་རིམ་པ་གསུམ་གྱི་སྒྲོག་འགྲེལ་མ་ལག་བཙུགས་ནས། ཏང་གི་ཚོགས་ཆེན་ཉི་ཤུ་པའི་དགོངས་དོན་ལས་ཁུངས་དང་ཞིང་གྲོང་། སློབ་གྲྭ །ཁེ་ལས། དགོན་སྡེ་སོགས་སུ་སྒྲོག་འགྲེལ་བྱས་པ་བརྒྱུད། མང་ཚོགས་གང་དུ་ཡོད་ན་དེ་རུ་ཏང་གི་གསུང་སྐད་ཡོད་པ་ཁག་ཐེག་བྱས་ཏེ། ངེས་པ་དོན་གྱིས་གཞི་རིམ་གྱི་རིག་གཞུང་སྒྲོག་འགྲེལ་གཞི་རིམ་མང་ཚོགས་ཀྱི་སེམས་ལ་ཟུག་པར་བྱས་ཡོད།

ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྔར་བས་སྲ་བརྟན་དང་། ཏང་གི་ཚོགས་ཆེན་ཉི་ཤུ་པའི་དགོངས་དོན་སྒྲོག་འགྲེལ་དོན་འཁྱོལ་ཟབ་སྤེལ་བྱེད་པ། གྲྭ་པས་རང་འགུལ་གྱིས་མི་རིགས་མཐུན་སྒྲིལ་གྱི་འདུ་ཤེས་ཤུགས་སྣོན་བྱེད་པར་ནུས་ལྡན་སྣེ་ཁྲིད་བྱ་ཆེད། 2022ལོའི་ལོ་མཇུག་ཏུ། དཀར་མཛེས་རྫོང་ཨུའི་རྩ་འཛུགས་པུའུ་ཡིས་ལས་བྱེད་པ་རྩ་འཛུགས་བྱས་ཏེ་ཁ་ནོན་དགོན་པར་ཏང་གི་ཚོགས་ཆེན་ཉི་ཤུ་པའི་དགོངས་དོན་སྒྲོག་འགྲེལ་དང་། “སེམས་པ་གཅིག་ཏུ་ཕྱོགས། དུད་ཁྱིམ་གྲྭ་གཞིས་སྦྲེལ”ཞེས་པའི་བརྗོད་དོན་གཙོ་བོའི་བྱེད་སྒོ་སྤེལ་བར་མ་ཟད། གྲྭ་པ་རྣམས་ལ་དགུན་དུས་ཀྱི་ཉེར་མཁོའི་དངོས་རྫས་ཕུལ་བ་དང་། རོགས་སྒྲིག་གྲྭ་པའི་འཚོ་བའི་གནས་ཚུལ་དང་བདེ་ཐང་གནས་ཚུལ་ལ་རྒྱུས་ལོན་བྱས། ། 

ཕན་འབྲས་མངོན་གསལ་དོད་པས་སྤུས་ཚད་མཐོ་བའི་འཕེལ་རྒྱས་ལ་བསམ་བློའི་སྒུལ་ཤུགས་སྟོབས་ཆེན་བསྩལ།

ཉེ་སྔོན། ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་སྒྲོག་འགྲེལ་བྱེད་པའི་དཀར་མཛེས་ཁུལ་ཨུའི་སྒྲོག་འགྲེལ་ཚོགས་པའི་ཡན་ལག་ཚོགས་པ་བཅུ་གཅིག་པ་འབའ་ཐང་རྫོང་ཁམས་ལྷོའི་མཐོ་རིམ་སློབ་འབྲིང་དང་གཙོ་གནད་རྣམ་གྲངས་འཛུགས་སྐྲུན་ནང་ཞུགས་པའི་ཁེ་ལས། དགའ་ལྡན་ཕུན་ཚོགས་གླིང་བཅས་སུ་སྒྲོག་འགྲེལ་སྙན་ཞུའི་ཚོགས་འདུ་འཚོགས་ཏེ། ཏང་གི་ཚོགས་ཆེན་ཉི་ཤུ་པའི་དགོངས་དོན་གཞི་རིམ་དུ་རྐང་ཚུགས་ཤིང་འབྲས་བུ་སྨིན་དུ་བཅུག །ཁམས་ལྷོའི་མི་རིགས་མཐོ་རིམ་སློབ་འབྲིང་གི་འབྲེལ་ཡོད་འགན་ཁུར་པས་སྙན་ཞུའི་ཚོགས་འདུ་གཙོ་སྐྱོང་བྱེད་སྐབས། སློབ་གྲྭས་སྔར་བས་བསམ་བློ་ཏང་གི་ཚོགས་ཆེན་ཉི་ཤུ་པའི་དགོངས་དོན་ཐོག་གཅིག་གྱུར་ཡོང་བ་དང་། རྩ་བའི་ལས་འགན་ལག་བསྟར་བྱས་ཏེ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་སློབ་གྲྭ་སྤུས་ཚད་མཐོ་བའི་སྒོས་འཕེལ་རྒྱས་ལ་སྐུལ་འདེད་གཏོང་ཆེད་ཤེས་རིག་དང་སྟོབས་ཤུགས་དབུལ་རྒྱུ་ཡིན་ཞེས་བཤད།

ཉེ་ཆར། “ཏང་གི་ཚོགས་ཆེན་ཉི་ཤུ་པའི་དགོངས་དོན་དོན་འཁྱོལ་དང་ཏང་གི་རྗེས་སུ་འབྲངས་ནས་མདུན་དུ་བསྐྱོད་ཅིང་། ཕུ་ཐུང་བརྫེས་ནས་ངར་ཤུགས་སྒྲིམས་ཏེ་བསྐྱར་དར་ལམ་བུའི་ཐོག་བྱས་རྗེས་འཇོག”ཅེས་པ་དང་། “ཚོགས་འདུའི་ཐོག་ཁ་ཕྱོགས་ཆེན་པོ་གསལ་པོ་བཏོན། ཏང་གི་དར་ཆ་མཐོན་པོར་བསྒྲེངས”ཞེས་དཀར་མཛེས་ཁུལ་རོང་བྲག་རྫོང་གིས“ཕུགས་བསམ་གྱི་མཛེས་མའི་ལུང་པ”ཞེས་པའི་དུས་རབས་གསར་པའི་ཤེས་དཔལ་ལག་ལེན་གྱི་ན་གཞོན་གསེར་གྱི་རྟགས་མའི་སྒྲོག་འགྲེལ་རུ་ཁག་གིས《ཏང་གི་ཚོགས་ཆེན་ཉི་ཤུ་པར་བསྔགས་བརྗོད་དང་དུས་རབས་གསར་པར་བསྔགས་བརྗོད་བྱེད་པའི་རྒྱང་སྐྱོད་ལམ་བུ་གསར་པ》དང་། 《ཏང་གི་ཚོགས་ཆེན་ཉི་ཤུ་པའི་དགོངས་དོན་གྱི་ཁ་ཕྱོགས》ཞེས་པ་བརྒྱུད་ས་གནས་ཀྱི་མང་ཚོགས་ཚོར་རྣམ་པ་གསར་པ་དང་རྣམ་པ་སྣ་ཚོགས་ཀྱི་སྒྲོག་འགྲེལ་བྱས་ཏེ་ཡུལ་དངོས་ཀྱི་སློབ་སྦྱོང་རྣམ་པའི་མཐོ་རླབས་ཤིག་འཕྱུར་བ་རེད། རོང་བྲག་རྫོང་ཡོ་ཙ་ཐང་གྲོང་ཚོའི་གྲོང་མི་ཀྲོའུ་ཞིང་ཚའེ་ཡིས། སྒྲོག་འགྲེལ་རུ་མི་ཚོས་གོ་བདེ་ལ་ཤེས་སླ་བའི་སྐད་ཆའི་ཐོག་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་གནད་ལ་འཁེལ་བས་ཁ་གསལ་གོ་བདེ་རེད། ད་ཆ་ང་ཚོས་བདེ་སྐྱིད་ལྡན་པའི་འཚོ་བ་རོལ་བཞིན་ཡོད། སླད་ཕྱིན་ང་ཚོས་དེ་བས་འབད་བརྩོན་ཧུར་ཐག་བྱས་ནས་ནམ་ཡང་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་ངེས་ཡིན་ཞེས་བཤད།

རྔ་བ་ཁུལ་ཨུའི་ཏང་གི་སློབ་གྲྭ་ནས་ཁྲེན་ཝང་ཧུའེ་ཡི་སྒྲོག་འགྲེལ་ཉན་རྗེས་ཚང་མས་གཅིག་རྗེས་གཉིས་མཐུད་ངང་ཏང་གི་ཚོགས་ཆེན་ཉི་ཤུ་པའི་འཐུས་མིས་གཞི་རིམ་དུ་སྒྲོག་འགྲེལ་བྱས་པ་དང་མང་ཚོགས་ཀྱི་གོ་སླ་བའི་སྐད་ཆས་གསོན་ཉམས་དོད་པའི་གཏམ་རྒྱུད་བཤད་དེ་མི་ཚང་མར་མིག་དཔེ་ཡོད་པ་དང་། དམིགས་འབེན་ཡོད་པ། སློབ་སྦྱོང་བྱེད་ས་ཡོད་པ་བཅས་ཀྱི་ཐོག་ནས་ཏང་གཤིས་ཀྱི་བློ་སྦྱོང་རྒྱུན་ཆད་མེད་པར་ཆེ་རུ་གཏོང་བ་དང་དམངས་ལ་བཅངས་པའི་བརྩེ་སེམས་ཟབ་ཏུ་བཏང་སྟེ། སྤུས་ཚད་མཐོན་པོས“ཁུལ་གཅིག་དང་ཆུས་གཉིས། ཁྱིམ་གཞིས་གསུམ”སྐྲུན་ཆེད་ལེགས་སྐྱེས་དེ་བས་ཆེ་བ་དབུལ་རྒྱུ་ཡིན་ཞེས་བཤད། ། 

ཚོགས་ཆེན་ཉི་ཤུ་པའི་འཐུས་མི་གཞི་རིམ་དུ་བསྐྱོད་དེ་སྒྲོག་འགྲེལ་ལས་དོན་ནན་མོ་སྤེལ།

སྦྲག་ལམ་བརྟན་པོར་བསྲུང་བཞིན། བོད་འབྲེལ་ས་ཁུལ་གྱི་མང་ཚོགས་ལ་སྲི་ཞུ་བསྒྲུབས།

ཉེ་ཆར། ཀྲུང་གོའི་སྦྲག་སྲིད་ཚོགས་པ་ཚད་ཡོད་སྤྱི་གཉེར་ཁང་སི་ཁྲོན་ཞིང་ཆེན་ཡན་ལག་སྤྱི་གཉེར་ཁང་ཏང་ཨུ་ཡིས་ཞིང་ཆེན་ཡོངས་ཀྱི་སྦྲག་སྲིད་ཀྱིས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལ་སློབ་སྦྱོང་བྱེད་པའི་ཆེད་དོན་འཆད་ཁྲིད་སྤེལ་བ་དང་། ཏང་གི་ཚོགས་ཆེན་ཉི་ཤུ་པའི་འཐུས་མི། སི་ཁྲོན་ཞིང་ཆེན་དཀར་མཛེས་ཁུལ་སྦྲག་སྲིད་ཡན་ལག་སྤྱི་གཉེར་ཁང་གི་རྒྱང་སྐྱོད་སྦྲག་སྲིད་རླངས་འཁོར་ཁ་ལོ་པ་དང་ཟོག་འདྲེན་ཚོ་ཆུང་གི་ཚོགས་གཙོ་འཆི་མེད་རྡོ་རྗེས་སློབ་སྦྱོང་གི་མྱོང་ཚོར་མཉམ་སྤྱོད་གནང་བ་རེད།

འཆི་མེད་རྡོ་རྗེས《མི་དམངས་ལ་དགོས་མཁོ་ཡོད་ཚེ། ང་ནམ་ཡང་འགྲོ་རྒྱུར་གྲ་སྒྲིག་བྱས་ཡོད》ཅེས་པ་བརྗོད་དོན་བྱས་ནས། ལས་ཀའི་བརྒྱུད་རིམ་དང་ཏང་གི་ཚོགས་ཆེན་ཉི་ཤུ་པར་ཞུགས་པའི་རང་ཉིད་ཀྱི་མྱོང་ཚོར་གཉིས་ཟུང་འབྲེལ་སྒོས། ནམ་ཡང་དྲིན་དྲན་པ་དང་། མི་དམངས་བླ་ན་མེད་པ་རྒྱུན་འཁྱོངས། འབད་བརྩོན་གྱིས་མི་སྲིད་པ་དེ་སྲིད་པ་ལ་བསྒྱུར་བ་བཅས་ཕྱོགས་གསུམ་གྱི་ཐད་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལ་སློབ་སྦྱོང་བྱས་པའི་བློ་སྐྱེད་མྱོང་ཚོར་མཉམ་སྤྱོད་བྱས་པ་བརྒྱུད། ཚང་མར་ཏང་གི་ཚོགས་ཆེན་ཉི་ཤུ་པའི་དགོངས་དོན་གྱི་བསམ་བློའི་དྲག་ཆས་སྤྲས་ནས། “མི་དམངས་སྦྲག་སྲིད་ཀྱིས་མི་དམངས་ལ་ཞབས་ཞུ་སྒྲུབ་པའི”ཐོག་མའི་བསམ་འདུན་བརྟན་སྲུང་དང་། རང་རང་སོ་སོའི“གངས་ཐིག་སྦྲག་ལམ”ཐོག་ངར་སེམས་ཆེར་སྐྱེད་དང་སྤོབས་པ་ཆེན་པོས་མདུན་དུ་སྐྱོད་པར་མ་ཟད། འབད་བརྩོན་གྱིས་ངོ་མཚར་ཆེ་བའི་ལེའུ་གསར་པ་བརྩམ་པར་སྐུལ་འདེད་བྱས།

“རྒྱང་སྐྱོད་སྦྲག་སྲིད་རླངས་འཁོར་གྱི་ཁ་ལོ་པ་དཀྱུས་མ་ཞིག་ཡིན་པའི་ཆ་ནས། ‘གངས་ཐིག་སྦྲག་ལམ’ནས་མི་དམངས་ཚོགས་ཁང་ཆེན་པོ་ལ་སླེབས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སྙན་ཞུ་ལ་ཉན་རྒྱུ་རག་པས། ངའི་སེམས་སུ་དགའ་བ་འབུམ་གྱིས་ཁེངས་བྱུང་། ལོ་འདི་དག་གི་རིང་ང་ནམ་ཡང་གཞི་རིམ་གྱི་འཐབ་ར་དང་པོའི་ནང་ཞུགས་པ་ཡིན་ལ། ཉེ་འགྲམ་གྱི་བླ་ན་མེད་པའི་འཕོ་འགྱུར་དང་། མི་དམངས་མང་ཚོགས་ཀྱི་ཐོབ་པའི་སེམས་ཚོར་དང་བདེ་སྐྱིད་ཀྱི་སེམས་ཚོར། བདེ་འཇགས་ཀྱི་སེམས་ཚོར་བཅས་འཕར་བཞིན་པའི་ཐད་བཅོས་མིན་གྱི་སེམས་ཚོར་ཡོད”ཅེས་མཉམ་སྤྱོད་བྱེད་སྐབས། འཆི་མེད་རྡོ་རྗེས་བགྲང་བྱ་སུམ་ཅུ་ལྷག་གི་རིང་ལ“གངས་ཐིག་སྦྲག་ལམ”བརྟན་སྲུང་བྱས་པའི་འབད་བརྩོན་གྱི་རྒྱུད་རིམ་དང་རང་ཉིད་ཀྱི་མྱོང་ཚོར་དངོས་གཉིས་ཟུང་འབྲེལ་སྒོས། དུས་རབས་ཀྱི་འཕོ་འགྱུར་གླེང་བ་དང་ཕ་ཡུལ་གྱི་འཕེལ་རྒྱས་ལ་ལྟ་བ། ཏང་གི་དྲིན་ལ་བསྟོད་པ་ཕུལ་བས། ཡིད་དབང་འཕྲོག་པའི་གཏམ་རྒྱུད་རེ་རེ་དང་བཅོས་མིན་གྱི་སེམས་ཚོར་རེ་རེ་ལྷུག་པོ་བརྗོད་པ་ལས། ཡུལ་དངོས་སུ་སྤྲོ་སེམས་འཁོལ་བའི་ཐལ་མོའི་རྡེབ་སྒྲས་ཁེངས།

ཕོ་ལོ་59ལ་སོན་པའི་འཆི་མེད་རྡོ་རྗེ་ཁོང་ནི། མཚོ་འཕགས་ཆེས་མཐོ་ཞིང་ལམ་གྱི་གནས་ཚུལ་ཆེས་རྙོག་འཛིང་ཆེ་བའི་དཀར་མཛེས་རྫོང་ནས་སྡེ་དགེ་རྫོང་བར་གྱི་གངས་ཐིག་སྦྲག་ལམ་ཐོག་ཏུ་ཟླ་རེར་མ་མཐའ་ཡང་ཕར་འགྲོ་ཚུར་འོང་ཐེངས་20བྱེད་ཀྱི་ཡོད་ལ། ལམ་བར་ནས་མཚོ་འཕགས་སྨི་6168ཡོད་ཅིང་། “ཁྲོན་བོད་ཀྱི་ལམ་མཐོ་ཤོས་དང་། ཁྲོན་བོད་ཀྱི་ཉེན་ཁ་ཆེ་ཤོས”ཞེས་མིང་ཐོགས་པའི་ཁྲོ་ལ་རི་བོ་ནས་བརྒལ་དགོས་ཤིང་། ལམ་དེ་སྲུང་ཐེངས་གཅིག་གིས་བགྲང་བྱ་33རིང་སྲུང་ཡོད། ཁོང་ལ་སྔ་གཞུག་ཏུ“2018ལོའི་ལོ་འཁོར་གྱི་ཀྲུང་གོའི་སེམས་འགུལ་ཐེབས་པའི་མི་སྣ”དང་“རྒྱལ་ཡོངས་ཀྱི་ལས་གུས་གཏོང་ཕོད་དཔེ་བཟང་ཅན”“རྒྱལ་ཡོངས་ཀྱི་ངལ་རྩོལ་དཔེ་བཟང་ཅན”“རྒྱལ་ཡོངས་ཀྱི་ཕུལ་བྱུང་གུང་ཁྲན་ཏང་ཡོན”སོགས་ཀྱི་གཟི་བརྗིད་མཚན་སྙན་ཐོབ་ཡོད།

འཆི་མེད་རྡོ་རྗེས“2019ལོར། ངས་བསོད་ནམས་ཆེན་པོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཕྱག་ནས‘རྒྱལ་ཡོངས་མི་རིགས་མཐུན་སྒྲིལ་སྔོན་ཐོན་དཔེ་བཟང་མི་སྒེར’གྱི་བྱ་དགའ་བླངས་པ་དང་། ཐག་ཉེར་ས་ནས་སྤྱི་ཁྱབ་ཧྲུའུ་ཅིའི་བཀའ་གསུང་ལ་ཉན་རྒྱུ་རག་བྱུང་བས། ངས‘མི་དམངས་སྦྲག་སྲིད་ཀྱིས་མི་དམངས་ལ་ཞབས་ཞུ་སྒྲུབ’ཅེས་པའི་ཞབས་ཞུའི་སྙིང་དོན་དེ་སྒྲུབ་པའི་འདུན་པ་ཇེ་བརྟན་དུ་གྱུར་སོང”ཞེས་དང་། “མི་དམངས་ལ་དགོས་མཁོ་ཡོད་ཚེ། ང་ནམ་ཡང་འགྲོ་རྒྱུར་གྲ་སྒྲིག་བྱས་ཡོད”ཅེས་གསུངས།

འཆི་མེད་རྡོ་རྗེས“ཏང་གི་ཚོགས་ཆེན་ཉི་ཤུ་པའི་འཐུས་མི་ལ་བདམས་རྗེས། ངའི་སེམས་པ་རབ་ཏུ་དགའ་བྱུང་། ཀྲུང་གོའི་སྦྲག་སྲིད་ཀྱི་གཞི་རིམ་ཏང་ཡོན་ཞིག་ཡིན་པའི་ཆ་ནས། གཟི་བརྗིད་ཆེན་པོ་ཞིག་ཡིན་པར་འདོད། ད་དུང་རང་ཉིད་ལོ་ཉུང་ཙམ་ཡིན་ན་ཅི་མ་རུང་། སྦྲག་ལམ་དུ་མང་ཙམ་འགྲོད་ནས། རྒྱ་ཆེའི་བོད་འབྲེལ་ས་ཁུལ་གྱི་མི་སེར་ཚོ་ལ་ཞབས་ཞུ་སྒྲུབ་ཆོག་རྒྱུ་རེད”ཅེས་གསུངས།

ལོ་ངོ་33རིང་། འཆི་མེད་རྡོ་རྗེས་ནམ་ཡིན་ཡང་སྦྲག་ལམ་དུ་དྲོད་ཚད་ཐིག་ལེའི་མན་གྱི་ཏུའུ་གྲངས་བཅུ་ཕྲག་ཡིན་པའི་གྲང་ལྷགས་འོག །རང་འགུལ་གྱིས་སྤྱི་ཚོགས་ཀྱི་རླངས་འཁོར་གཞན་དག་ལ་འདྲེད་འགོག་ལྕགས་ཐག་འདོགས་རྒྱུ་དང་ཆེས་ཉེན་ཁ་ཆེ་བའི་ལམ་ནས་རླངས་འཁོར་སྐོར་རོགས་བྱེད་པ། རྒྱུན་དུ་རང་འགུལ་གྱིས་རི་འདབས་ནས་ལམ་བཅོས་ས་ཚིགས་ཀྱི་བཟོ་པ་ཚོར་དགོས་མཁོ་ཆེ་བའི་འཚོ་བའི་དངོས་རྫས་ཁུར་རོགས་བྱེད་བཞིན་ཡོད་ལ། ནམ་རྒྱུན་སྦྲག་སྲིད་རླངས་འཁོར་ཐོག་རང་གིས་ཁུར་ཡོད་པའི་གསོ་རླུང་དམ་བེ་དང་སྨན་རྫས་རྣམས་མྱུར་སྐྱོབ་བྱེད་དགོས་པའི་ཡུལ་སྐོར་བ་ལ་སྦྱིན་གྱི་ཡོད།

“སྦྲག་ལམ་ཐོག་ཡག་པོ་བགྲོད། སྦྲག་དངོས་རྣམས་ཡག་པོ་སྐྱེལ། དཀའ་ངལ་ཡོད་མཁན་དང་འཕྲད་དུས་ངེས་པར་དུ་རོགས་བྱེད། འདི་ནི་གངས་ཐིག་སྦྲག་ལམ་ཐོག་མི་རབས་ནས་མི་རབས་སུ་རྒྱུད་པའི་སྲོལ་རྒྱུན་ཡིན་པས། དེ་རྩ་བ་ནས་འདོར་མི་རུང”ཞེས་གསུངས། འཆི་མེད་རྡོ་རྗེའི་སེམས་སུ། གཞན་གྱི་དཀའ་ངལ་སེལ་ཐབས་བྱེད་སྐབས“དཀའ་ཉེན་ལ་མགོ་མི་སྒུར། མི་དམངས་ཀྱི་ཆེད་དུ་ཡོད་ཚད་འབུལ། ལྷག་བསམ་དང་འགན་ཁུར་སེམས་ཡོད་པ། མཐུན་སྒྲིལ་དང་མཛའ་བཤེས་ཆེ་བའི”གངས་ཐིག་སྦྲག་ལམ་གྱི་སྙིང་སྟོབས་གཤིས་རྒྱུད་རྒྱུན་འཛིན་བྱེད་དགོས་པ་དང་། དེའང“ལམ་གཉིས”ཀྱི་སྙིང་སྟོབས་རྒྱུན་སྲིང་བྱེད་པ་དང་གཅིག་མཚུངས་ཡིན་པར་འདོད།

ཐད་གཏོང་དང་ཕབ་གཏོང་། དྲ་ཐོག་དང་ཡུལ་དངོས། 2022ལོའི་ཟླ་12པའི་ཟླ་སྟོད་དུ། འཆི་མེད་རྡོ་རྗེས་རྣམ་པ་སྣ་ཚོགས་ཀྱི་སྒོ་ནས་ཕ་ཡུལ་དཀར་མཛེས་ཁུལ་དུ་ཏང་གི་ཚོགས་ཆེན་ཉི་ཤུ་པའི་དགོངས་དོན་སྒྲོག་འགྲེལ་གྱི་བྱེད་སྒོ་གཅིག་རྗེས་གཉིས་མཐུད་དུ་སྤེལ་བ་རེད། ། 

རྒྱ་སེ་མེ་ཏོག་འདེབས་འཛུགས་བྱས་ཏེ། ཁྱིམ་ཚང་ཁྲི་སྟོང་ཕྱུག་འགྱུར་ལམ་དུ་ཁྲིད།

“ང་ནི་རྔ་བ་ཁུལ་བཙན་ལྷ་རྫོང་ཏ་ཡུང་གྲོང་རྡལ་མའོ་ཧྲུའེ་གྲོང་ཚོའི་ཏང་ཀྲི་པུའུ་ཧྲུའུ་ཅི་ཁྲེན་ཝང་ཧུའེ་ཡིན། གཞི་རིམ་གྱི་ཏང་གི་འཐུས་མི་ཞིག་ཡིན་པའི་ཆ་ནས། ང་རང་ཀྲུང་གོའི་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་ཉི་ཤུ་པར་ཞུགས་ཐུབ་པ་ནི་གཟི་བརྗིད་ཅིག་ཅི་ལ་མིན”ཞེས་བཤད་བཞིན། པེ་ཅིན་དུ་ཚོགས་ཞུགས་བྱས་ནས་ཕྱིར་འབྱོར་བའི་ཁྲེན་ཝང་ཧུའེ་ཚོགས་ཆེན་ཉི་ཤུ་པའི་དགོངས་དོན་སྒྲོག་འགྲེལ་ཚོགས་འདུ་ཆེ་ཆུང་40ཉེ་བ་ལ་ཞུགས་ཏེ། བཟོ་གྲྭ་དང་ཞིང་ཁ་སོགས་མང་ཚོགས་ཀྱི་ཁྲོད་དུ་ཟབ་ཞུགས་བྱས་ཏེ་སྒྲོག་འགྲེལ་བྱས།

ཁྲེན་ཝང་ཧུའེ་ཡིས“ཏང་གི་ཚོགས་ཆེན་ཉི་ཤུ་པའི་སྙན་ཞུ་ལ་ཉན་བཞིན་ཉན་བཞིན་སེམས་ཤུགས་དང་སྤོབས་པ་བསྐྱེད་བྱུང་། རྒྱལ་སྲིད་ནི་མི་དམངས་ཡིན་ཞིང་། མི་དམངས་ནི་རྒྱལ་སྲིད་ཡིན། ཀྲུང་གོའི་གུང་ཁྲན་ཏང་གིས་མི་དམངས་ཀྱི་སྣེ་ཁྲིད་དེ་རྒྱལ་སྲིད་བཙུགས་ཤིང་རྒྱལ་སྲིད་སྐྱོང་བ་དང་། སྐྱོང་བྱ་ནི་མི་དམངས་ཀྱི་སེམས་ཡིན། མི་དམངས་བླ་ན་མེད་ཅིང་།

ཚེ་སྲོག་བླ་ན་མེད་པ། གང་ནུས་ཅི་ལྕོགས་དང་རང་ནུས་ཅི་ཐུབ་རྒྱུན་འཁྱོངས་བྱས་ཏེ། ཆེས་རྒྱ་ཆེའི་མི་དམངས་ཀྱི་རྩ་བའི་ཁེ་ཕན་མངོན་འགྱུར་ཡག་པོ་དང་།

སྲུང་སྐྱོང་ཡག་པོ། འཕེལ་རྒྱས་ཡག་པོ་བྱེད་དགོས”ཞེས་པའི་ཚིག་འདི་དག་ལ་དྲོད་ཁོལ་དང་ནུས་ཤུགས་ལྡན་པས། ང་ཚོར་སེམས་འགུལ་དྲག་པོ་ཐེབས་ཤིང་ཚིག་འབྲུ་རེ་རེས་མང་ཚོགས་ཀྱི་སེམས་གཏམ་མཚོན་ཡོད་ཅེས་བཤད།

ཁྲེན་ཝང་ཧུའེ་ཡིས་བཤད་རྒྱུར། ཏང་གི་ཚོགས་ཆེན་བཅོ་བརྒྱད་པའི་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དུས་དང་རྣམ་པ་ཀུན་དུ་དབུལ་ཕོངས་མང་ཚོགས་ལ་ཐུགས་ཁུར་གནང་སྟེ། དབུལ་སྐྱོར་ལས་དོན་ཐད་ནུས་ཤུགས་གང་མང་བཏོན་ཞིང་ཐེངས་མང་པོར་དབུལ་ཕོངས་ས་ཁུལ་དུ་གཟིགས་ཞིབ་གནང་བར་ཕེབས་ཡོད། སི་ཁྲོན་གྱི་མི་རིགས་ས་ཁུལ་ནི་སྔོན་ཆད་རྒྱལ་ཡོངས་ཀྱི་གཅིག་སྡུད་དབུལ་ནག་ས་ཁུལ་གྱི་གྲས་ཡིན་ཞིང་། སྤྱི་ཁྱབ་ཧྲུའུ་ཅི་ཡིས་ཐུགས་ཁུར་ཟབ་མོ་གནང་བའི་ས་གནས་ཀྱི་གྲས་ཡིན།

ཁྲེན་ཝང་ཧུའེ་ཡིས“ང་རང་འཚོ་གནས་བྱེད་སའི་བཙན་ལྷ་རྫོང་མའོ་ཧྲུའེ་གྲོང་ཚོ་ནི་སྔོན་ཆད་ས་གནས་འདིའི་ཚབ་མཚོན་དབུལ་ཕོངས་གྲོང་ཚོ་ཡིན་ལ། གྲོག་རོང་གཡང་གཟར་དང་ས་གཤིས་ཤིན་ཏུ་ཞན་པས་ཞིང་ལས་ཐོན་སྐྱེད་ཚད་ཤིན་ཏུ་དམའ། སྐབས་དེར་རི་ནང་གི་ཕག་རྒོད་ཀྱིས་ཀྱང་རྒྱུན་པར་ཞིང་ལ་གནོད་འཚེ་གཏོང་སྲིད་པས། གྲོང་མིའི་འཚོ་བ་ཡོངས་ཁྱབ་ཏུ་ཆ་རྐྱེན་སྡུག་པོ་འདུག”ཅེས་སྐྱོ་ཉམས་དང་བཅས་ཏེ་བཤད།

ཁྲེན་ཝང་ཧུའེ་ཡིས་བདེ་སྐྱིད་ནི་འབད་བརྩོན་གྱིས་བརྩོན་ལེན་བྱས་པ་ཞིག་ཡིན་ཞིང་། འབད་བརྩོན་ལྷུར་ལེན་བྱས་ན་ད་གཟོད་ཕུགས་འདུན་མངོན་འགྱུར་འབྱུང་ཐུབ་པར་ཐེ་ཚོམ་མེད་ཅེས་ཟེར།

“ལོ་ངོ་བཅུའི་ཡར་སྔོན་ང་རང་ཡུལ་མི་རྣམས་ཀྱིས་གྲོང་ཚོའི་ཨུ་ལྷན་གྱི་ཀྲུའུ་རེན་དུ་བདམས་པ་རེད། ཐེངས་ཤིག་ལ་ཕག་རྒོད་ཀྱིས་གཏོར་བརླག་བཏང་བའི་ཞིང་སར་ལྟ་ཞིབ་བྱེད་སྐབས། ཕག་རྒོད་ཀྱིས་ཞིང་ས་མ་གཏོགས་ཉེ་འགྲམ་གྱི་རྒྱ་སེ་མེ་ཏོག་མི་ཟ་བ་ཤེས། དེ་དུས་ངས་རྒྱ་སེ་མེ་ཏོག་ལ་ཚེར་མ་སྐྱེས་ཡོད་ཅིང་འབྲུ་རིགས་ཀྱི་བྲོ་བ་མེད་སྟབས་ཕག་རྒོད་ཀྱིས་མི་ཟ་བ་ཤེས་ཤིང་། རྒྱ་སེ་མེ་ཏོག་འདེབས་འཛུགས་བྱེད་པའི་བསམ་བློ་སྐྱེས་བྱུང་”ཞེས་བཤད།

རྒྱ་སེ་མེ་ཏོག་འདེབས་འཛུགས་ཀྱི་བསམ་བློ་བྱུང་རྗེས། ཁྲེན་ཝང་ཧུའེ་ཀན་སུའུ་དང་ཧྲན་ཞི། ཡུན་ནན་སོགས་ཞིང་ཆེན་དང་གྲོང་ཁྱེར་8ཀྱི་རྒྱ་སེ་མེ་ཏོག་འདེབས་འཛུགས་ལ་རྟོག་ཞིབ་བྱས་རྗེས། རང་གིས་མ་དངུལ་བཏང་ནས་རྒྱ་སེ་མེ་ཏོག་གི་ས་བོན་ནང་འདྲེན་བྱས་ཤིང་གཅིག་སྡུད་སྒོས་ཚོད་ལྟ་བྱས་མཐར། རང་ས་གནས་སུ་འདེབས་གསོ་ཐུབ་པའི་ས་བོན་གཏན་འཁེལ་བྱས་པར་མ་ཟད། རྒྱ་སེ་མེ་ཏོག་འདེབས་འཛུགས་ཀྱི་ཆེད་ལས་མཉམ་ལས་ཁང་བཙུགས།

ད་ལྟ། བཙན་ལྷ་རྫོང་གི་རྒྱ་སེ་མེ་ཏོག་འདེབས་འཛུགས་ཤང་གྲོང་13དང་གྲོང་ཚོ་46ལ་ཁྱབ་ཡོད། 2019ལོར། “བཙན་ལྷའི་རྒྱ་སེ་མེ་ཏོག”དྲིལ་བསྒྲགས་བྱ་ཆེད། བཙན་ལྷ་རྫོང་ཨུ་དང་རྫོང་སྲིད་གཞུང་གིས“ཀྲུང་གོའི་བཙན་ལྷའི་མཐོ་སྒང་གི་རྒྱ་སེ་མེ་ཏོག་དུས་ཆེན་སྐབས་དང་པོ་དང་དགའ་རོགས་དུས་ཚིགས”ཞེས་པའི་བྱེད་སྒོ་སྤེལ་ཏེ། ཀྲུང་གོའི་རྒྱ་སེ་མེ་ཏོག་ལས་རིགས་ཀྱི་སློབ་དཔོན་ཆེན་མོ་དང་ཆེད་མཁས་པ་བཙན་ལྷའི་རྒྱ་སེ་མེ་ཏོག་འདེབས་འཛུགས་ལས་གཞིར་ཡུལ་དངོས་རྟོག་ཞིབ་བྱེད་པར་གདན་ཞུ་བྱས།

བཙན་ལྷ་རྫོང་ནི“འཛམ་གླིང་མཐོ་སྒང་གི་རྒྱ་སེ་མེ་ཏོག་གི་ཕ་ས”རུ་གྲགས། བཙན་ལྷའི་རྒྱ་སེ་མེ་ཏོག་ཐོན་ལས་དང་གྲོང་གསེབ་དར་རྒྱས་ནུས་ལྡན་སྒོས་སྦྲེལ་མཐུད་བྱས་ཏེ། “བཙན་ལྷའི་རྒྱ་སེ་མེ་ཏོག”ཐོན་ལས་རིམ་སྒྱུར་དང་རིག་གནས་ཡུལ་སྐོར་མཉམ་འདྲེས་མཐུན་སྦྱོར་གོང་འཕེལ། དེ་མིན་མཐོ་སྒང་གི་གྲོང་གསེབ་དར་རྒྱས་དང་ཁོངས་ཡོངས་ཡུལ་སྐོར་འཕེལ་རྒྱས་ལ་སྐུལ་འདེད་གཏོང་བར་གསར་གཏོད་ཀྱི་ལམ་བུ་ཞིག་བཏོད་པ་རེད།

“བཙན་ལྷའི་རྒྱ་སེ་མེ་ཏོག་མེད་པ་ནས་ཡོད་པ་དང་། འདེབས་འཛུགས་ནས་ཚོང་འགྲེམ་བྱེད་པའི་བརྒྱུད་རིམ་ཁྲོད་དཀའ་ཁག་མང་པོ་འཕྲད་ཡོད། སྔོན་ཆད་མི་ལ་ལས་ཨ་ཅེ་རྒྱ་སེ་མེ་ཏོག་གིས་སྨྱོན་པའི་བསམ་བློ་དང་གླེན་པའི་ཐབས་ཤེས་བརྒྱུད་ནས་བཙན་ལྷའི་རྒྱ་སེ་མེ་ཏོག་གི་ཐོན་ལས་ལེགས་གྲུབ་བྱུང་སྟེ། རྒྱ་སེ་མེ་ཏོག་རྐང་གཅིག་གིས་ཁྱིམ་ཚང་ཁྲི་སྟོང་ལ་འབྱོར་ཕྱུག་བསྐྲུན་ཡོད”ཅེས་ཁྲེན་ཝང་ཧུའེ་ཡིས་མཚམས་སྦྱོར་བྱེད་བཞིན། “ད་ལོར་རྒྱ་སེ་མེ་ཏོག་ཏུན་1276བསྡུ་ཉོ་བྱས་ཡོད། ”ཟེར།

“རྗེས་མར། ང་རང་གིས་མུ་མཐུད་དུ་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་དོན་འཁྱོལ། དྲིལ་བསྒྲགས་ཡག་པོ་བྱ་རྒྱུ་དང་། སྙན་ཞུའི་དགོངས་དོན་དྲིལ་བསྒྲགས་ཡག་པོ་བྱས་ཏེ་ཉེ་འཁོར་གྱི་མི་རྣམས་ལ་དྲིན་དྲན་བཞིན་ཧུར་བརྩོན་མདུན་སྐྱོད་ཀྱི་སྐུལ་མ་བྱ་རྒྱུ་ཡིན”ཞེས་ཁྲེན་ཝང་ཧུའེ་ཡིས་བཤད་རྒྱུར། རང་ཉིད་ཀྱིས་གྲོང་ཚོ་ཡོངས་ཀྱི་ཏང་ཡོན་ལས་བྱེད་མང་ཚོགས་ཀྱི་སྣེ་ཁྲིད་དེ། གྲོང་གསེབ་དར་རྒྱས་ཀྱི་ཕྱོགས་བསྡུས་བཅོས་བསྒྱུར་དཔེ་སྟོན་གྲོང་ཚོའི་འཛུགས་སྐྲུན་ཇེ་མགྱོགས་བཏང་སྟེ། རྒྱ་སེ་མེ་ཏོག་རྟེན་གཞིའི་ཐོན་ལས་གླིང་གིས་ཐེག་བྱེད་བྱས་ནས་གྲངས་ཅན་གྲོང་ཚོ་དང་གྲངས་ཅན་ཐོན་ལས་དཔལ་འབྱོར་འཕེལ་རྒྱས་བཏང་བ་བརྒྱུད། ཞིང་གྲོང་གསར་པའི་འཛུགས་སྐྲུན་ལ་སྐུལ་འདེད་དང་སྐྱེ་ཁམས་ཐོན་ལས་ཀྱི་ཞིང་གྲོང་དངོས་གཟུགས་དཔལ་འབྱོར་འཕེལ་རྒྱས་གཏོང་བ་དང་། ཐུན་མོང་དཔལ་འབྱོར་ཇེ་རྒྱས་སུ་བཏང་ནས“མཐོ་སྒང་གི་རྒྱ་སེ་མེ་ཏོག་རྐང་རེ་རེས་ཁྱིམ་ཚང་ཁྲི་སྟོང་ལ་སླར་ཡང་འབྱོར་ཕྱུག་བསྐྲུན་པར་བྱ་རྒྱུ་ཡིན”ཞེས་བཤད། །