རུ་དམ་གངས་ཀྱི་ར་བའི་ཀ་ལ་པིངྐའི་མགྲིན་དབྱངས་། རྫོགས་ཆེན་བསྟན་འཛིན་གྱི་གླུ་གཞས་སྒྱུ་རྩལ་གྱི་ལམ་བུ།

ངོ་སྤྲོད་རགས་བསྡུས།

གླུ་པ་རྫོགས་ཆེན་བསྟན་འཛིན་ནི་1985ལོར་ཁམས་སྡེ་དགེའི་རྫོགས་ཆེན་བ་སྲས་སྡེ་པ་རུ་སྐྱེས། ཁོང་ལ་ལྷན་སྐྱེས་ཀྱི་སྐད་ངག་སྙན་མོ་ཞིག་ཡོད་པའི་ཐོག །གླུ་གཞས་སྒྱུ་རྩལ་ལ་དགའ་ཞེན་ཤིན་ཏུ་ཆེ་བར་མ་ཟད། དབྱངས་རྟ་གསར་རྩོམ་ལ་བག་ཆགས་ཟབ་མོ་ལྡན། ལོ་དུ་མའི་རིང་བོད་ཀྱི་དམངས་ཁྲོད་སྒྱུ་རྩལ་པ་གང་མང་གི་གམ་དུ་བཅར་ནས་སློབ་སྦྱོང་བྱས་པར་མ་ཟད། སི་ཁྲོན་རོལ་དབྱངས་སློབ་ཆེན་སོགས་སུ་ཞུགས་ནས་དེང་རབས་དབྱངས་རྟའི་རིག་གནས་དང་རོལ་མོའི་རིག་གནས་ལ་སྦྱོང་པ་མི་དམན་པ་བྱས། སྔ་གཞུག་ཏུ་ཁམས་པའི་བརྙན་འཕྲིན་ཁང་དང་ཨ་མདོ་བརྙན་འཕྲིན་ཁང་གིས་ལོ་སར་དགོང་ཚོགས་སོགས་ལ་གདན་ཞུ་ཐེངས་མང་བྱས།

2009ལོར་ཆེད་བསྒྲིགས་ཟེར་སྡེར་ཐོག་མ《མཐིང་སྨུག་སྦྲ་ཆུང》འགྲེམས་སྤེལ་བྱས། དེ་ནས《ཁམས་པ་སྡེ་དགེ》《ཉི་ཟླའི་རྒྱལ་ཁམས》《གྲོགས་པོ》《གླིང་གེ་སར》《གཙུག་གི་རྒྱན》《འཁྱམ་པོའི་གླུ》《ཨ་ཕོ་ལུག་རྫི》《ཉི་མ་ལྷ་ས》《ལས་དབང》སོགས་དབྱངས་རྟ་རང་གིས་བརྩམས་པའི་རྐྱང་གཞས་མང་པོ་བླངས། གླུ་པ་གཞན་དག་ལ་བྲིས་པའི་ཕུལ་བྱུང་དབྱངས་རྟའི་བརྩམས་ཆོས་ཡང་ཧ་ཅང་མང་སྟེ། ཡར་དུང་གི《མཐིང་སྨུག་སྦྲ》དང་། ཡར་དུང་དང་བསོད་ནམས་ཆོས་སྒྲོན་གཉིས་ཀྱི《ཁམས་པ་སྡེ་དགེ》 འཇམ་དབྱངས་སྒྲོལ་མའི《པར་ཁང་བཀྲ་ཤིས་སྒོ་མང》 ཀུན་དགའི《ཡིད་ལྷུང་སློབ་གྲྭ》 ཤེར་བསྟན་གྱི《རྟེན་འབྲེལ་གྱི་ཁ་བཏགས》ཚེ་དབང་ལྷ་མོའི《གཡང་ལ་འཛོམས་པོ》 དབྱངས་ཅན་ལྷ་མཛེས་ཀྱི《ལས་བསྐོས་ཚེ་རོགས》 ནམ་མཁའ་མཚོའི《གཡང་དཀར》 རིག་འཛིན་སྒྲོལ་མའི《ས་ཡི་སྲིད་པ་དར་སོང》 སྡེ་དགེ་ཟླ་གཡང་གི《འཛམ་གླིང་སྒང་གི་རོང་འབྲོག》 ཀུན་དགའ་དང་ཚེ་དབང་ལྷ་མོ། ཤེར་བསྟན་བཅས་ཀྱིས་མཉམ་དུ་བླངས་པའི《ལོ་གཡང་མཆོད་གླུ》སོགས་མང་དུ་ཡོད།

བཅར་འདྲིའི་ལེའུ།

གསར་འགོད་པ། ཁྱེད་རང་གླུ་གཞས་སྒྱུ་རྩལ་གྱི་ལམ་དུ་ཞུགས་པའི་རྒྱུ་མཚན་ནམ་དེའི་ཀུན་སློང་གང་ཡིན།

རྫོགས་ཆེན་བསྟན་འཛིན། ང་རང་ནི་ཁམས་སྡེ་དགེའི་ཕྱོགས་ཀྱི་བྲོ་གླུ་སྒྲུང་གསུམ་ཤིན་ཏུ་དར་ཁྱབ་ཆེ་བའི་འབྲོག་སྡེ་ཕྱུག་མོ་ཞིག་ནས་འཚར་ལོངས་བྱུང་བ་ཡིན། འབྲོག་སྡེ་དེ་ལ་རུ་ཁག་འགའ་རེ་ཡོད་ཅིང་། རུ་ཁག་ལ་ལ་རུ་གླིང་སྒྲུང་གྱེར་འདོན་དང་འཁྲབ་སྟོན་སོགས་ལ་ཁྱད་ཆོས་འབུར་དུ་ཐོན་པ་དང་། ལ་ལར་དམངས་ཁྲོད་གླུ་གཞས་དང་གནའ་བྲོ། རྟ་རྒྱུག་རྩལ་འགྲན་སོགས་ལ་ཐུན་མིན་གྱི་ཁྱད་ཆོས་ཡོད། ང་རང་ཁོར་ཡུག་དེ་འདྲ་ཞིག་ནས་འཚར་ལོངས་བྱུང་བས། གླུ་གཞས་སྒྱུ་རྩལ་ལ་ངང་ངམ་ཤུགས་ཀྱིས་དགའ་མོས་ཡོད་པར་མ་ཟད། ལྷག་པར་དུ་བོད་ཀྱི་དམངས་ཁྲོད་མགུར་གླུ་དང་དེའི་དབྱངས་རྟ་ལ་དགའ་ཞེན་ཤིན་ཏུ་ཆེ་སྟབས། ནམ་རྒྱུན་ཕ་ཡུལ་གྱི་རྒན་རྒོན་ཚོའི་མདུན་དུ་བཅར་ནས་མགུར་གླུའི་དབྱངས་རྟ་དང་ཚིག་སོགས་ལ་སྦྱོང་རྒྱུ་གོམས་ཡོད།

དེ་ནས་ང་རང་ཅུང་ཆེན་པོ་ཆགས་ཏེ་རྫོགས་ཆེན་བ་སྲས་སྡེ་པ་ལ་གླུ་གར་རུ་ཁག་ཅིག་ཡོད་པ་དེའི་ནང་དུ་ཚུད་ནས་སྒྱུ་རྩལ་གྱི་ལམ་དུ་ཞུགས་འགོ་བརྩམས་པ་ཡིན་ལ། ལོ་ངོ་གསུམ་ཙམ་གྱི་རིང་དུ་གླུ་གར་རུ་ཁག་ཏུ་འཁྲབ་སྟོན་གང་མང་བྱས། དེ་ནས་སྡེ་དགེ་རྫོང་གིས་མ་ཎི་གད་འགོ་རུ་དགའ་སྟོན་གཟབ་རྒྱས་ཤིག་ཚོགས་ནས། བོད་ཀྱི་གླུ་པ་གླུ་མ་སྐད་གྲགས་ཅན་ཁག་ཅིག་གདན་འདྲེན་ཞུས་འདུག་ལ། དེ་དུས་ང་ལ་མཚོན་ན་བག་ཆགས་ཆེས་ཟབ་ཤོས་ནི་དགེ་རྒན་ཡར་དུང་གི་གླུ་གཞས་དེ་ཡིན་ཏེ། ཁོང་གི་གླུ་གཞས་ཀྱིས་ང་ལ་སྙིང་སྟོབས་དང་སྤོབས་པ་བརྗོད་ཀྱིས་མི་ལངས་པ་ཞིག་བསྩལ་བྱུང་ལ། དེ་ནས་དུས་རབས་དང་མཐུན་པའི་གླུ་གཞས་སྒྱུ་རྩལ་གྱི་ལམ་དུ་ཞུགས་རྒྱུའི་བློ་ཐག་རྦད་དེ་བཅད་པ་ཡིན།

གསར་འགོད་པ། ཁྱེད་རང་གླུ་གཞས་སྒྱུ་རྩལ་གྱི་ལམ་དུ་ཞུགས་ནས་ལོ་ག་ཚོད་ཡིན། མཚོན་བྱེད་བརྩམས་ཆོས་གང་དག་ཡོད།

རྫོགས་ཆེན་བསྟན་འཛིན། 2007ལོར་དེང་རབས་གླུ་གཞས་སྒྱུ་རྩལ་ལ་སློབ་སྦྱོང་བྱ་ཆེད། ང་རང་ཕ་ཡུལ་འབྲོག་སྡེ་ཕྱུག་མོ་ནས་ཁ་བྲལ་ཏེ་ཁྲེང་ཏུའུ་གྲོང་ཁྱེར་ཏུ་ཡོང་སྟེ་དེང་རབས་སྒྲ་སྙན་སོགས་ཀྱི་སྐོར་ལ་སློབ་སྦྱོང་བྱེད་འགོ་བརྩམས་པ་ཡིན། སྐབས་དེར་ཁྲེང་ཏུའུ་གྲོང་ཁྱེར་ཏུ་དེང་རབས་གླུ་གཞས་སྒྱུ་རྩལ་ལ་སློབ་སྦྱོང་བྱེད་དགོས་ན་དཀའ་ངལ་དུ་མ་ཞིག་ཡོད་དེ། གཅིག་ནས་སྐད་བརྡ་ཡག་པོ་མི་འཕྲོད་པ་དང་། གཉིས་ནས་ཡུལ་སྲོལ་གོམས་གཤིས་ལ་ཁྱད་པར་ཆེ་ཞིང་ཆ་རྒྱུས་མེད་པ། གསུམ་ནས་དེང་དུས་ནང་བཞིན་བོད་གཞས་སྒྱུ་རྩལ་གྱི་སྟེགས་བུ་མང་པོ་མེད། ཡིན་ནའང་དགའ་ཞེན་གྱི་དབང་གིས་དཀའ་ངལ་མཐའ་དག་གདོང་གི་བསུས་ནས་འབད་བརྩོན་ལྷོད་མེད་བྱས་པ་ཡིན།

2008ལོར་ཡང་བསྐྱར་ཁྲེང་ཏུའུ་རུ་ཡོང་ནས་རང་གི་ཆེད་བསྒྲིགས་ཐོག་མ་དེ་བཏོན་རྒྱུ་ལ་གྲ་སྒྲིག་བྱས་པ་ཡིན། ལོ་གཅིག་གི་རིང་ལ་སྒྲ་ཕབ་རྒྱུ་དང་བརྙན་ལེན་རྒྱུ་སོགས་བྱས་རྗེས་2009ལོར་དངོས་སུ་སྒོར་བཏོན་ཐུབ་པ་བྱུང་། སྐབས་དེར་ཉམས་མྱོང་མེད་པ་དང་དཔལ་འབྱོར་གྱི་ཆ་རྐྱེན་ཞན་སྟབས། དཀའ་ངལ་དུ་མ་དང་འཕྲད་བྱུང་། བརྙན་ལེན་རྒྱུ་དང་རོལ་དབྱངས་སྒྲིག་སྦྱོར། གླུ་ཚིག་སོགས་གང་ཅིའི་ཐད་ནས་འགྲོ་སོང་ཆེན་པོ་གཏོང་དགོས། ཆེད་བསྒྲིགས་དེའི་ནང་གི་གླུ་དབྱངས《གསེར་མདོག་ཉི་མ་སེར་པོ》ཟེར་བ་དེ་ལ་བརྟེན་ནས་བོད་མདོ་དབུས་ཁམས་གསུམ་གྱི་སྤུན་ཟླ་མང་པོས་ང་རང་གཞི་ནས་ངོ་ཤེས་འགོ་ཚུགས། གླུ་དབྱངས་དེའི་དབྱངས་རྟ་ནི་རང་གིས་བརྩམས་ཤིང་། རང་གི་རྔུལ་ཆུའི་ཐིགས་པ་བསགས་པའི་བརྩམས་ཆོས་ཐོག་མ་ལྟ་བུ་ཡིན། རྒྱ་ཆེའི་ཉན་མཁན་ཚོའི་དགའ་བསུ་ཐོབ་པ་མཐོང་དུས། སེམས་སུ་བརྗོད་མི་ཤེས་པའི་དགའ་སྤྲོ་སྐྱེས་པར་མ་ཟད། རང་གིས་རང་ལ་ཡིད་ཆེས་དང་བློ་སྤོབས་རྒྱས་ནས། མུ་མཐུད་དུ་གླུ་གཞས་སྒྱུ་རྩལ་ལ་ཤུགས་ཕྱུང་པའི་འདུན་པ་ཇེ་བརྟན་དུ་གྱུར།

རང་གི་གླུ་གཞས་ཀྱི་དབྱངས་རྟ་རང་ཉིད་ཀྱིས་བརྩམས་ནས་བླངས་པར་མ་ཟད། གཞན་དག་ལ་དབྱངས་རྟ་རྩོམ་རོགས་བཟོས་པ་སོགས་ཚང་མ་བསྡོམས་ན་ཕལ་ཆེར་གླུ་གཞས་200ཡས་མས་ཤིག་ཡོད། 2021ལོར་མཚོ་སྔོན་བརྙན་འཕྲིན་ཁང་གིས་སྤེལ་བའི་དགོང་ཚོགས་ཆེན་མོ་ནོར་གནག་གི་དུས་སྟོན་ཐོག་ཏུ་གླུ་མ་ནམ་མཁའ་མཚོ་ལ《གཡང་དཀར》ཞེས་པའི་གླུ་དབྱངས་གསར་པ་ཞིག་གི་དབྱངས་རྟ་བརྩམས་པ་དང་། ད་དུང་ལོ་དེར་གླུ་མ་ཚེ་དབང་ལྷ་མོ་ལ《གཡང་ལ་འཛོམས་པོ》ཞེས་པའི་གླུ་གཞས་ལ་དབྱངས་རྟ་བརྩམས་པ་ཡིན། གླུ་དེ་གཉིས་ནི་2021ལོའི་བོད་གླུའི་ཁྲོད་ནས་དགའ་བསུ་ཆེས་ཐོབ་ཆེ་ཤོས་ཀྱི་གྲས་སུ་ཚུད་ཡོད། 2022ལོའི་ལོ་འགོ་ཙམ་ལ《ལོ་གཡང་མཆོད་གླུ》ཞེས་པའི་དབྱངས་རྟ་བརྩམས་པ་ཡིན། དེའི་གླུ་ཚིག་ནི་དགེ་རྒན་ཞི་བདེ་ཉི་མས་བརྩམས་ཤིང་། གླུ་པ་ཀུན་དགའ་དང་ཤེར་བསྟན། གླུ་མ་ཚེ་དབང་ལྷ་མོ་གསུམ་གྱིས་བླངས་པ་རེད། གླུ་གཞས་དེ་2022ལོའི་བོད་གླུའི་ཁྲོད་དགའ་བསུ་ཆེན་པོ་ཐོབ་ཡོད། བརྩམས་ཆོས་དེ་གསུམ་ནི་མང་ཚོགས་ཀྱི་དགའ་བསུ་ཐོབ་པ་ཆེས་མང་བའི་བརྩམས་ཆོས་གལ་ཆེན་གསུམ་ལ་ངོས་འཛིན་བཞིན་ཡོད།

གསར་འགོད་པ། ཁྱེད་ཀྱིས་དབྱངས་རྟ་ལ་སློབ་སྦྱོང་ཇི་ལྟར་བྱས་པ་ཡིན། ཁྱེད་ཀྱིས་བརྩམས་པའི་དབྱངས་རྟ་ལ་གཞན་དང་མི་འདྲ་བའི་ཁྱད་ཆོས་ག་འདྲ་ཡོད།

རྫོགས་ཆེན་བསྟན་འཛིན། མ་གཞི་ང་རང་ཐོག་མ་ནས་དམངས་ཁྲོད་ཀྱི་མགུར་དབྱངས་སོགས་ལ་ཉན་རྒྱུ་དང་ལེན་རྒྱུ་ལ་ཤིན་ཏུ་དགའ། དམངས་ཁྲོད་ཀྱི་མགུར་མོའི་དབྱངས་རྟ་གང་མང་ཞིག་ངག་ལ་འཇགས་ཡོད་པས། མ་འོངས་པར་དེའི་ཐད་མུ་མཐུད་དུ་སློབ་སྦྱོང་དང་ཞིབ་འཇུག་བྱས་ན་འབྲས་བུ་ཡག་པོ་ཐོབ་རྒྱུའི་ཡིད་ཆེས་བརྟན་པོ་ཡོད་མྱངས། དེ་ནས་གླུ་གཞས་འདྲ་མིན་མང་པོ་བླངས་པར་མ་ཟད། དབྱངས་རྟ་ཡང་རང་གིས་རྩོམ་ཅི་ཐུབ་བྱས་པས། དབྱངས་རྟའི་ཐད་འཕེལ་རྒྱས་གང་འཚམ་བྱུང་ནས་མང་ཚོགས་ཀྱི་དགའ་བསུ་ཐོབ་ཅིང་། དབྱངས་རྟའི་དགེ་རྒན་གང་མང་ཞིག་གིས་ཁྱོད་ལ་དབྱངས་རྟའི་ཐད་བག་ཆགས་དང་ལྷན་སྐྱེས་ཀྱི་འཇོན་ནུས་ཡག་མོ་འདུག་ཅེས་སོགས་མུ་མཐུད་དུ་དབྱངས་རྟའི་གཞུང་ལུགས་དང་ལག་ལེན་ཐད་ཤུགས་ཕྱུང་རྒྱུའི་སྐུལ་མ་བྱེད་བཞིན་འདུག །དེ་ནས་2013ལོར་སི་ཁྲོན་རོལ་དབྱངས་སློབ་ཆེན་དུ་ཞུགས་ནས་དབྱངས་རྟའི་གཞུང་ལུགས་དང་ལག་ལེན་སོགས་ཀྱི་སྐོར་ལ་མ་ལག་ཅུང་ཆ་ཚང་བའི་ངང་ནས་སློབ་སྦྱོང་བྱེད་འགོ་བརྩམས་པ་ཡིན། འོན་ཀྱང་། གཅིག་ནས་རང་ཉིད་ལོ་ཅུང་ཆེན་པོ་ཆགས་ཟིན་པ་དང་། གཉིས་ནས་དེང་རབས་ཀྱི་དབྱངས་རྟའི་རྨང་གཞིའི་ཤེས་བྱ་མང་པོ་ཞིག་ལ་ཆ་རྒྱུས་མེད་པས་ཆེད་གཉེར་བྱེད་མཁན་དང་བསྡུར་ན་ཞན་ཆ་མང་ཙམ་འདུག་མོད། གླུ་གཞས་སྒྱུ་རྩལ་ལ་དགའ་ཞེན་ཆེ་ཞིང་འདི་ལྟ་བུའི་སློབ་སྦྱོང་གི་གོ་སྐབས་ཉག་ཕྲ་བར་འདོད་ནས་གཉིད་ཆག་ཟས་བརྗེད་དང་འབད་བརྩོན་ལྷོད་མེད་ཀྱིས་ལོ་དྲུག་ཙམ་གྱི་རིང་ལ་ཆེད་དུ་དབྱངས་རྟའི་གཞུང་ལུགས་དང་ལག་ལེན་བཅས་ལ་སློབ་སྦྱོང་བྱས་པ་ཡིན།

དེང་སང་བོད་ཀྱི་གླུ་གཞས་སྒྱུ་རྩལ་ཐད་ལ་ནུབ་ཕྱོགས་རིག་གནས་སོགས་ཀྱི་ཤུགས་རྐྱེན་ཆེན་པོ་ཐེབས་བཞིན་ཡོད། བོད་གཞས་ཀྱི་དབྱངས་རྟ་རྩོམ་སྐབས་རྩ་བ་དོར་ནས་ཡལ་གར་འཇུ་ཟེར་བ་ནང་ལྟར། བོད་ཀྱི་སྲོལ་རྒྱུན་དབྱངས་རྟའི་མཐིལ་མ་རྟོགས་པར་རིག་གནས་གཞན་པ་ཁོ་ན་ལ་ལད་མོ་བྱས་ཚེ། བོད་ཀྱི་དབྱངས་རྟ་དང་གླུ་གཞས་སྒྱུ་རྩལ་ཉམས་པའི་རྒྱུ་རུ་འགྱུར་བར་འདོད་ལ། ང་རང་དེའི་རིགས་ལ་དགའ་པོ་དེ་ཙམ་མེད། འོན་ཀྱང་། བོད་ཀྱི་བྲོ་བ་ཡོད་པའི་གླུ་གཞས་ཤིག་གསར་རྩོམ་བྱས་པ་ཡིན་ཟེར་ནས། རྡོ་ཆག་བཙན་སྒྲིག་གི་ཚུལ་དང་གང་བྱུང་དུ་བསོ་ཡ་རི་ལོ་དང་ཨ་ལ་ཡེ། བྱང་ཡ་རི་ལོ་སོགས་ཁ་ཤས་སྣོན་པ་ཙམ་གྱིས་བོད་གཞས་མཚན་ཉིད་ཚང་བ་ཞིག་ཡོང་དཀའ་བས། ཁོ་བོའི་བསམ་པ་ལ། བོད་རང་གི་ཐུན་མོང་མ་ཡིན་པའི་སྲོལ་རྒྱུན་གྱི་དབྱངས་རྟའི་རིག་གནས་ལ་གཞི་བཞག་ནས་དུས་རབས་ཀྱི་འགྲོས་དང་མཐུན་པ་ཞིག་དགོས་འདུག་སྟེ། ས་པཎ་གྱིས་རོལ་མོའི་བསྟན་བཅོས་ལས། དབྱངས་མཁན་རྣམས་ཀྱིས་ཐམས་ཅད་དུ། །གང་ལས་འདྲེན་དང་གང་དུ་དགུག །གང་དུ་བསྒྱུར་དང་གང་དུ་ལྟེངས། །གང་དུ་འཇོག་དང་གང་གིས་སྦྱོར། །ཞེས་གསུངས་པ་ལྟར། ངས་དབྱངས་རྟ་རྩོམ་སྐབས་དམངས་ཁྲོད་ཀྱི་བྲོའི་དབྱངས་རྟ་དང་མགུར་མོ། ལ་གླུ་སོགས་སྲོལ་རྒྱུན་གྱི་དབྱངས་རྟའི་བྲོ་བ་མ་ཉམས་པའི་ཆ་རྐྱེན་འོག །དེང་རབས་ཀྱི་དབྱངས་རྟས་ཟུར་བརྒྱན་ཅི་ཐུབ་བྱེད་བཞིན་ཡོད་ལ། དེ་ནི་བོད་གཞས་དབྱངས་རྟའི་ལམ་ཕྱོགས་ཡང་དག་པ་དེ་ཡིན་པར་འདོད་བཞིན་ཡོད།

གསར་འགོད་པས། ལས་དང་པོ་བ་ཞིག་གིས་བོད་གཞས་ཀྱི་དབྱངས་རྟ་ལ་སློབ་སྦྱོང་ཇི་ལྟར་བྱེད་དགོས། ཁྱེད་ཀྱིས་ཉམས་མྱོང་དང་སྦྲགས་ནས་ཅུང་ཙམ་གསུང་རོགས།

རྫོགས་ཆེན་བསྟན་འཛིན། དུས་རྒྱུན་པོད་ཕྲན་དང་འཁྱུག་དབྱིངས། སྐད་འཕྲིན་སོགས་ཀྱི་ཐོག་ཏུ་ང་ལ་འདྲི་བ་འདིའི་རིགས་འདྲི་མཁན་མང་པོ་རེད། ངས་བསམ་ན། ཆེད་ལས་ཀྱི་དབྱངས་རྟ་རྩོམ་པ་པོ་ཞིག་ཏུ་འགྱུར་འདོད་ཚེ་ཆེད་དུ་སློབ་གྲྭ་ལ་ཞུགས་ནས་རྒྱལ་ཕྱི་ནང་གི་དབྱངས་རྟ་དང་རོལ་མོའི་གཞུང་ལུགས་ལ་སློབ་སྦྱོང་བྱེད་དགོས་པ་ལས། མགྱོགས་མྱུར་དུ་སློབ་ནས་ལག་ལེན་བསྟར་ཐུབ་མཁན་ཞིག་ཀྱང་མ་རེད། མ་གཞི་གླུ་ཚིག་རྩོམ་པ་པོ་དང་དབྱངས་རྟ་རྩོམ་པ་པོ་གང་ཡིན་རུང་། རང་རང་སོ་སོ་ལ་བསམ་མནོ་གཏོང་ཚུལ་མི་འདྲ་བ་རེ་ཡོད་སྲིད། ཁོ་བོས་དབྱངས་རྟའི་གཞུང་ལུགས་སོགས་ཀྱི་སྐོར་ལ་སློབ་སྦྱོང་བྱེད་ཞོར་དུ་ནམ་རྒྱུན་བོད་ཀྱི་སྲོལ་རྒྱུན་གྱི་གླུ་གཞས་ལ་ཡང་ནས་བསྐྱར་དུ་ཉན་ནས་བྲོ་བ་མྱོང་བཞིན་ཡོད། དེ་ནས་ས་གནས་སོ་སོའི་གླུ་གཞས་ཀྱི་དབྱངས་རྟ་ལ་ཁྱད་ཆོས་གང་ཡོད་དབྱེ་ཞིབ་དང་ཕྱོགས་བསྡོམས་བྱེད་དགོས་ལ། རིམ་བཞིན་རང་གིས་དབྱངས་རྟ་ཐུང་ཐུང་འདྲ་བརྩམས་ན། དེ་ནས་དབྱངས་རྟ་རྩོམ་ལུགས་དེ་ཤེས་འོང་རྒྱུ་རེད། འདི་ཚོ་ནི་ང་རང་ཆེད་ལས་མིན་པའི་དབྱངས་རྟ་རྩོམ་མཁན་ཞིག་གི་ཉམས་མྱོང་ཕྲན་བུ་ཡིན་པ་ལས། ཆེད་ལས་ལྟར་སྦྱོང་དགོས་ན་གོང་དུ་ཞུས་པ་ཇི་བཞིན་ཆེད་དུ་སློབ་གྲྭར་སོང་ནས་དབྱངས་རྟའི་གཞུང་ལུགས་ལ་འཇུག་དགོས།

གསར་འགོད་པ། མ་འོངས་པར་གླུ་གཞས་སྒྱུ་རྩལ་ཐད་འཆར་གཞི་ག་འདྲ་ཡོད།

རྫོགས་ཆེན་བསྟན་འཛིན། 2023ལོར་གླུ་གཞས་གསར་པ་གསུམ་ཡོད། དེ་གསུམ་ལ་སྔར་དང་མི་འདྲ་བའི་ཁྱད་ཆོས་དམིགས་བསལ་བ་གང་མང་ཡོད། གཅིག་ནས་དུས་རབས་ཀྱི་འགྲོས་དང་མཐུན་པ། གཉིས་ནས་བོད་རང་གི་སྲོལ་རྒྱུན་གྱི་ཁྱད་ཆོས་མ་ཉམས་ཤིང་། དམངས་ཁྲོད་དང་བར་ཐག་ཉེ་ལ། མགུར་མོའི་ཁྱད་ཆོས་ཡོད་པ་ཞིག་ཡིན། དེ་བས་དུས་དང་རྣམ་པ་ཀུན་དུ་ང་ལ་རྒྱབ་སྐྱོར་བྱེད་མཁན་དང་། ངའི་གླུ་གཞས་ལ་དགའ་ཞེན་ཡོད་མཁན་ཚང་མའི་རྣ་བའི་བུ་རམ་དུ་འགྱུར་བའི་རེ་བ་ཆེན་པོ་ཡོད། མ་འོངས་པར་ངས་མུ་མཐུད་དུ་གླུ་གཞས་སྒྱུ་རྩལ་གྱི་ཐད་ལ་འབད་འབུངས་གང་མང་བྱ་རྒྱུ་ཡིན་པས། ཁྱེད་རྣམ་པས་ཀྱང་སྔར་བཞིན་རྒྱབ་སྐྱོར་དང་རོགས་རམ་གནང་རོགས་ཞུ། །