ཝེ་ནེ་ཟུ་ཝེ་ལ།

ཝེ་ནེ་ཟུ་ཝེ་ལ་སྤྱི་མཐུན་རྒྱལ་ཁབ་སྟེ། བསྡུས་མིང་ལ་ཝེ་ནེ་ཟུ་ཝེ་ལ་ཞེས་འབོད་པ་ནི་མེ་གླིང་ལྷོ་མའི་བྱང་རྒྱུད་ཀྱི་རྒྱལ་ཁབ་ཅིག་ཡིན་ཞིང་། རྒྱལ་ས་ཁ་ར་ཁ་སི་ཡིན། རྒྱལ་ཁབ་འདིའི་བྱང་རྒྱུད་གྷ་རིན་བྷན་མཚོ་དང་ཉེ་བར་བཅར་ཞིང་། ནུབ་རྒྱུད་ཁོ་ལོམ་ཡི་ཡ་དང་འདབས་འབྲེལ་དུ་གནས། ལྷོ་རྒྱུད་བྷ་རེ་ཟེ་དང་མཚེས་མར་བཅར་ཡོད་པ་དང་ཤར་རྒྱུད་གྷ་ཡ་ན་དང་འབྲེལ་ཡོད། ཝེ་ནེ་ཟུ་ཝེ་ལའི་རྒྱལ་ཁོངས་ཀྱི་ས་ཁམས་ཀྱི་རྣམ་པ་ཅུང་སྣ་མང་དུ་སྣང་སྟེ། ནུབ་བྱང་ས་ཁུལ་དང་བྱང་རྒྱུད་ནི་ཨན་ངྷི་སའི་རི་རྒྱུད་ཀྱི་རི་ལག་ཡིན་པ་དང་། བར་རྒྱུད་ནི་ཨོ་ལི་ནའོ་ཁི་བདེ་ཐང་དང་། བདེ་ཐང་དེའི་ནུབ་ཕྱོགས་ནི་རྩྭ་ཆུ་མོད་པའི་རྩྭ་ཐང་ཡིན། ཤར་ལྷོའི་ཕྱོགས་ནི་གྷ་ཡ་ན་མཐོ་སྒང་ཡིན་ཞིང་། མཚོ་འཕགས་ལ་སྨི་500-600ཡོད། ཆུ་ལག་མང་ཞིང་ཆར་འབབ་ཚད་མཐོ་བས་ཆུའི་ཐོན་ཁུངས་ཕུན་སུམ་ཚོགས། ཨོ་ལི་ནའོ་ཁི་གཙང་པོ་ནི་རྒྱལ་ཡོངས་ཀྱི་བཞུར་རྒྱུན་ཆེས་རིང་བའི་གཙང་པོ་ཡིན་ཞིང་། ཆུ་ལག་མང་པོ་གཡང་གཟར་གྱི་བྲག་ངོས་ནས་དར་དཀར་གྱི་ཡོལ་བ་འཐེན་པ་དང་འདྲ་བར་དལ་གྱིས་འབབ་པས་ཀུན་གྱིས་ཝེ་ནེ་ཟུ་ཝེ་ལ་ལ་རྦབ་ཆུའི་ཕ་ས་ཞེས་ཀྱང་འབོད་དོ། །

ཝེ་ནེ་ཟུ་ཝེ་ལ་ནི་ལ་ཏིང་མེ་གླིང་གི་དཔལ་འབྱོར་འཕེལ་རྒྱས་ཀྱི་འགྲོས་ཚད་ཅུང་མགྱོགས་པའི་རྒྱལ་ཁབ་གྲས་ཀྱི་གཅིག་ཡིན་ཞིང་། རྡོ་སྣུམ་དང་རང་བྱུང་སོལ་རླངས་སྔོག་འདོན་ནི་རྒྱལ་དམངས་དཔལ་འབྱོར་གྱི་གདུང་འདེགས་ཀ་བ་ལྟ་བུའི་དཔལ་འབྱོར་གྱི་རྟེན་གཞི་གཙོ་བོར་གྱུར་ཡོད་པ་དང་། འཛམ་གླིང་གི་རྡོ་སྣུམ་ཐོན་སྐྱེད་བྱེད་མཁན་དང་ཕྱིར་འཚོང་བྱེད་མཁན་གྱི་རྒྱལ་ཁབ་གཙོ་བོ་ཞིག་ཡིན། གཞན་ངར་ལྕགས་དང་རླངས་འཁོར་གྱི་ལྷུ་ལག །གློག་ཤུགས། འཐག་ལས། ཤིང་ཆ་ལས་སྣོན་སོགས་ཀྱི་ཐོན་ལས་ཀྱང་ཤིན་ཏུ་དར་རྒྱས་ཆེ། རྒྱལ་དམངས་དཔལ་འབྱོར་ལས་ཞིང་ལས་ཀྱིས་གོ་གནས་ཆེན་པོ་བཟུང་མེད་པ་དང་། ཞིང་ལས་དང་ཕྱུགས་ལས་གཉིས་མཉམ་དུ་གཙོ་བོར་འཛིན་ཞིང་། ཞིང་ལས་ལ་གཙོ་བོ་ཆུ་འབྲས་དང་མ་རྨོས་ལོ་ཏོག །ཁྲེ་རྒོད། ཁོ་ཧྥེ། སིལ་ཏོག་སོགས་ཡོད་པ་དང་། ཕྱུགས་ལས་ལ་གཙོ་བོ་བ་གླང་དང་ཁྱིམ་བྱའི་རིགས་གསོ་སྤེལ་བྱེད།

ཚོན་མདོག་རྣམ་པར་བཀྲ་བའི་སྡོད་ཁང་། 

   ཝེ་ནེ་ཟུ་ཝེ་ལ་དང་བྷ་རེ་ཟེའི་འབྲེལ་མཚམས་སུ་གནས་པའི་ཡ་ནའོ་མཱ་སྨི་ཚོ་པ་ནི་རྔོན་གཤོར་གྱི་ལས་དང་མ་རྨོས་ལོ་ཏོག་སོགས་རང་བྱུང་ཐོན་ཁུངས་ལ་བརྟེན་ནས་འཚོ་བའི་རྒྱུན་སྐྱོང་བཞིན་ཡོད་པ་དང་།སྡོད་ཁང་ལ་སྡོང་པོའི་ཡལ་འདབ་ཀྱིས་བསྐྲུན་པའི་རྩྭ་སྤྱིལ་གཙོ་བོ་བྱེད། ཡ་ནའོ་མཱ་སྨི་མིའི་ཤ་མདངས་ནག་ཅིང་གཟུགས་གཞི་ཤིན་ཏུ་ཐུང་། ཁོ་ཚོར་རྩ་འཛུགས་ཅན་དང་མ་ལག་ཅན་གྱི་ཆོས་ལུགས་དད་མོས་གྲུབ་མེད་དེ། དམིགས་གཏད་ཀྱི་དད་གུས་བྱ་ཡུལ་གྱི་ལྷ་མེད་པར་ཆོས་ཐམས་ཅད་ལ་རྣམ་ཤེས་ཡོད་པར་འདོད་པའི་གདོད་མའི་ཆོས་ལུགས་ཀྱི་ཤེས་རིག་རྣམ་པར་གནས། ཁོ་ཚོའི་སྣང་ངོར་རང་བྱུང་ཁམས་ཀྱི་ཆོས་ཐམས་ཅད་ལ་ལེགས་ཉེས་ཀྱི་ངོས་གཉིས་ཡོད་པ་དང་། ཁོ་ཚོའི་ཤེས་རྟོག་དང་ནུས་སྟོབས་ལས་རིང་དུ་འགོངས་པའི་ལྐོག་གྱུར་གྱི་གསང་བ་དེ་ནི་ལྷའི་ནུས་མཐུ་ལ་བརྟེན་ནས་བཟློག་ཐུབ་པར་འདོད། ཡ་ནའོ་མཱ་སྨི་ཚོ་བ་ནི་གདོད་མའི་སྤྱི་ཚོགས་ཀྱི་ཁྱད་ཆོས་ལྡན་པའི་ཨིན་དིའི་ཚོ་བ་ཞིག་ཡིན་ཞིང་། ཁོ་ཚོ་ཝེ་ནེ་ཟུ་ཝེ་ལའི་ལྷོ་རྒྱུད་དང་བྷ་རེ་ཟེའི་བྱང་རྒྱུད་ཀྱི་ནགས་ཚལ་དུ་གནས། ཁོ་ཚོས་གནས་དེར་ལོ་ངོ་སྟོང་ཕྲག་དུ་མར་འཚོ་ཚིས་ཀྱི་རྒྱུན་བསྐྱངས་ཤིང་། མདའ་གཞུ་ནི་ཁོ་ཚོའི་མཚོན་ཆ་གཙོ་བོ་ཡིན་པ་དང་། གཡུལ་ལ་མཁས་ཤིང་དཔའ་མཛངས་ལྡན་པའི་ཁྱད་གཤིས་ཀྱང་ཁོ་ཚོ་གནས་འདིར་ཡུན་རིང་པོར་འཚོ་སྡོད་བྱེད་ཐུབ་པའི་མན་ངག་ལགས།

འབྲེལ་ཡོད་ལོ་རྒྱུས་དཔྱད་གཞི་ལྟར་ན། ཝེ་ནེ་ཟུ་ཝེ་ལའི་གཉུག་མའི་མི་རིགས་ནི་ཨིན་དིའི་མི་ཡིན་ཞིང་། ཨིན་དིའི་མི་ཞེས་པ་ནི་མེ་གླིང་གི་གཉུག་གནས་མི་རིགས་ཡོངས་ཀྱི་སྤྱི་མིང་དུ་འཇུག་པ་དང་། ད་ལྟའི་ངོས་འཛིན་ལྟར་ན། མེ་གླིང་ལྷོ་མ་དང་མེ་གླིང་བྱང་མའི་རྒྱལ་ཁབ་སོ་སོར་ཁྱབ་ཡོད། ཨིན་དིའི་མིས་ཆོས་ཐམས་ཅད་ལ་རྣམ་ཤེས་ཡོད་པར་སྨྲ་ཞིང་། རང་བྱུང་ཁམས་ཀྱི་རྩི་ཤིང་དང་སྐྱེ་དངོས་ཐམས་ཅད་ལ་དད་གུས་བྱེད། གུས་ལུགས་ཀྱི་ཐད་ནས་སྐྱེས་པ་ཕན་ཚུན་ངོ་འཕྲད་པ་དང་ཁ་བྲལ་སྐབས་ལག་འཇུ་བྱེད་པ་དང་། བུད་མེད་ཀྱིས་ཕན་ཚུན་གྱི་དཔུང་པར་དམ་པོར་བསྡམས་ནས་བརྩེ་བ་དང་གུས་ལུགས་མཚོན་པར་བྱེད། ཁོ་ཚོའི་ཆོས་ལུགས་འདུ་ཤེས་སུ་མིའི་ལུས་པོའི་གཡས་ཕྱོགས་ནི་ཉེས་པ་ཐམས་ཅད་ཀྱི་འབྱུང་ཁུངས་ཡིན་པར་ངོས་འཛིན་པས། ལུས་པོའི་གཡས་ཕྱོགས་ཀྱི་མགོ་ནས་རྐང་པའི་བར་སོ་སྒྱེས་དཀྲིས་ནས་གཞན་གྱིས་མི་མཐོང་བར་བྱེད་པ་དང་ལུས་པོའི་གཡོན་ཕྱོགས་ཕྱི་ལ་མངོན་དུ་འཇུག་པའི་སྲོལ་མཆིས་སོ། །

ཨིན་དིའི་མིས་བསྐྲུན་པའི་མ་ཡ་ཤེས་རིག་ནི་འཛམ་གླིང་གི་ཆེས་མིང་དུ་གྲགས་པའི་གནའ་བོའི་རིག་གནས་གྲས་ཀྱི་གཅིག་ཡིན། ཁོ་ཚོ་ལོ་ངོ་ལྔ་སྟོང་གི་སྔོན་ནས་བཟུང་དེང་གི་མེག་སི་ཁོ་དང་མེ་གླིང་བར་མའི་གུ་ཝེ་ཐི་མ་ལའི་ཞི་བདེ་རྒྱ་མཚོའི་འགྲམ་ངོགས་སོགས་སུ་འཚོ་སྡོད་ཀྱི་མེ་ཁ་གསོས་ཤིང་འཛམ་གླིང་ན་འགྲན་ཟླ་བྲལ་བའི་ཤེས་རིག་བསྐྲུན་པ་རེད།

ཨིན་དིའི་མིས་འབྲས་དང་ཀྲོ་མ་ཀྲི། སྲན་མ། ཞོག་ཁོག་མངར་མོ་དང་སུར་པན། དུ་རྩྭ་སོགས་འདེབས་གསོ་བྱས་ནས་མིའི་རིགས་ཀྱི་ཞིང་ལས་འཕེལ་རྒྱས་ལ་མཛད་རྗེས་བླ་མེད་བཞག་ཅིང་། ལྷག་དོན་འབྲས་འདེབས་འཛུགས་ཐད་ཀྱི་མཛད་རྗེས་ནི་གསུབ་ཏུ་མེད་པར་བཞེད། མ་གཞི་འབྲས་ནི་མེ་གླིང་གི་རི་སྐྱེས་སྐྱེ་དངོས་ཤིག་ཡིན་ལ། རྗེས་ནས་མ་ཡའི་མིས་རྨོ་འདེབས་བྱས་པ་བརྒྱུད་ཐོན་ཚད་མང་པའི་འབྲུ་རིགས་ཤིག་ཏུ་གྱུར་ཞིང་། འབྲས་ཀྱི་རིགས་མང་ཞིང་འཚོ་བཅུད་ཕུན་སུམ་ཚོགས་པ། ཐོན་སྐྱེད་ཀྱི་ཚད་མང་བས་མེ་གླིང་གི་དབྱིན་ཏི་ཨན་རིག་གནས་ཀྱི་དངོས་པོའི་རྨང་གཞིར་གྱུར་པ་རེད། རྗེས་ནས་ཡོ་རོབ་ཀྱི་མི་མེ་གླིང་དུ་ཐོན་རྗེས་འབྲས་ཀྱང་ཡུལ་གྲུ་མང་པོར་ཁྱབ་ནས་འཛམ་གླིང་ཡོངས་ཀྱི་བཟའ་ཆས་གཙོ་བོར་གྱུར་རོ། །

འཛམ་གླིང་གི་མཐོ་ཚད་ཆེ་མཐོ་ཞིང་གཟར་ཚད་ཆེས་ཆེ་བའི་ཨན་ཧིར་རྦབ་ཆུའི་མིང་གཞན་ལ་ཆིའུ་ལོན་མའེ་ལི་རྦབ་ཆུའང་བྱ། དེ་ནི་ཤར་ལྷོའི་རྒྱུད་ཀྱི་ཁཱ་ལོ་ནིས་གཙང་པོ་སྟོད་རྒྱུད་དུ་ཡོད། ས་གནས་དེ་གའི་ཨིན་དིའི་མིས་དེ་ལ་ཁཱ་ལོན་མད་ལི་རྦབ་ཆུ་ཟེར་ཞིང་། 1937ལོར་ཨ་རིའི་མྱུལ་དཔྱད་པ་ཀྲན་མུའུ་སི·ཨན་ཧིར་གྱིིས་མཁའ་དབྱིབས་ནས་གནས་དེར་རྟོག་ཞིབ་བྱས་པ་བརྒྱུད་རྦབ་ཆུའི་མིང་ཡང་དེ་ལྟར་ཐོགས་པར་བཞེད། རྦབ་ཆུའི་དེའི་རབ་དང་པོའི་གཟར་ཚད་ལ་སྨི་807ཡོད་པ་དང་། ཞེང་གི་རིང་ཚད་ལ་ཧ་ལམ་སྨི་150ཡོད། རབ་གཉིས་པའི་གཟར་ཚད་ལ་སྨི་172ཡོད་པ་དང་། རྦབ་ཆུའི་ཕྱོགས་བཞི་རི་བོས་མུ་ཁྱུད་དུ་བསྐོར་ཡོད། གནས་དེའི་ཡུལ་གྱི་བཀོད་པ་མཛེས་ཤིང་ལྟ་ན་སྡུག་ཅིང་། དར་དཀར་གྱི་ཡོལ་བ་འཐེན་འདྲའི་རྦབ་ཆུ་རྔམ་བརྗིད་ལྡན་པས་རླབས་ཀྱི་ཟེགས་མ་དང་ལྷན་དུ་གྲུ་ལ་བསྡད་དེ་རང་བྱུང་གི་མཛེས་པར་རོལ་མྱོང་བྱེད་མཁན་དང་། གནམ་གྲུར་བསྡད་དེ་མཁའ་དབྱིངས་ནས་རྦབ་ཆའི་བརྗིད་ཉམས་ལ་ལྟ་མཁན་གྱི་ཡུལ་སྐོར་བ་མང་ངོ་། །

གྷ་རིན་བྷན་མཚོའི་ལྷོ་རྒྱུད་དང་ཝེ་ནེ་ཟུ་ཝེ་ལའི་སྐམ་སའི་བྱང་རྒྱུད་དུ་ཡོད་པའི་རྒྱ་མཚོ་སྤྱི་གླིང་ནི་འཛམ་གླིང་ན་མིང་དུ་གྲགས་པའི་སྤྱི་གླིང་ཞིག་ཡིན། དེ་ནི་གླིང་ཕྲན་300ལྷག་གིས་གྲུབ་པ་ཡིན་ཞིང་། གནའ་ནས་བཟུང་རང་བྱུང་གི་ཉ་ར་ཆེན་པོ་ཞིག་ཡིན་པས་མཚོ་ནང་དུ་ཉ་མོས་འཁྱུག་རྩལ་འགྲན་ཞིང་མཁའ་དབྱིངས་སུ་བྱ་ཚོགས་ཀྱིས་གཤོག་རྩལ་ངོམ།

མའེ་ལི་དྷ་ཚ་ཁུལ་གྱི་གངས་རི་ནི་མཱ་ར་ཁའེ་བྷོ་མཚེའུ་ཡི་ལྷོ་རྒྱུད་དུ་ཡོད་པ་དང་། དེ་ནི་གཡུ་ལོ་སྟུག་པའི་ནགས་ཚལ་ཁྲོད་ཀྱི་མུ་ཏིག་རྡོག་གཅིག་དང་འདྲ་བར་རི་ཚོགས་ཀྱི་དབུས་ན་རྔམ་བརྗིད་ཀྱིས་འགྱིང་། རབ་དཀར་གྱི་རླབས་ཕྲེང་ཕྱོགས་བཞིར་ཐོར་བའི་གཙང་པོ་ཤག་ཤག་ཏུ་བཞུར་ཞིང་གཙང་འགྲམ་དུ་བུར་ཤིང་ར་བ་དང་ཁོ་ཧྥེ་གླིང་སོགས་ཉམས་དགའ་བའི་མཛེས་ལྗོངས་དང་། མུ་མཐའ་བྲལ་བའི་ཚ་ཁུལ་ནགས་ཚལ་སོགས་ལྷུན་ཆགས་པའི་ཡུལ་གྱི་བཀོད་པས་སྐྱེ་འགྲོ་མང་པོའི་ཡིད་ཀྱི་དང་བ་ཅིག་ཅར་དུ་འདྲེན་ངེས། མའེ་ལི་དྷ་གངས་རི་ལ་རི་བོ་ཆེན་པོ་ལྔ་ཡོད་པ་དང་རི་རྩེར་དུས་བཞི་ཁྱད་མེད་དུ་ཁ་བས་གཡོགས་ཡོད། ཁ་བས་བརྒྱན་པའི་རི་རྩེ་ལྔ་པོ་ནི་མི་རྣམས་ཀྱིས་གླག་རྒོད་དཀར་པོ་ལྔ་ལ་ངོས་འཛིན་ཞིང་། རི་བོ་ལྔ་ལས་ཆེས་མཐོ་བ་ལ་སྨི་5007ཡོད་པ་དང་། མེ་གླིང་ལྷོ་མའི་བཅིང་འགྲོལ་གཙོ་འཛིན་བྷོ་ལི་ཝ་ཨེར་ལགས་ལ་རྗེས་དྲན་བྱ་ཆེད། རི་བོ་དེའི་མིང་ལ་བྷོ་ལི་ཝ་ཨེར་རི་བོ་ཞེས་བཏགས་ཡོད་དོ། །

མཱ་ར་ཁའེ་བྷོ་མཚེའུ་ནི་ཝེ་ནེ་ཟུ་ཝེ་ལའི་ནུབ་བྱང་རྒྱུད་ཀྱི་མཚོ་འགྲམ་དུ་ཡོད་པ་དང་། དེ་ནི་མེ་གླིང་ལྷོ་མའི་ཆེས་ཆེ་བའི་མཚེའུ་ཡིན། སྤྱིའི་རྒྱ་ཁྱོན་ལ་ཧ་ལམ་སྤྱི་ལེ་གྲུ་བཞི་མ་ཁྲི་1.43ཡོད་པ་དང་། མཚེའུ་ཡི་ཆེས་རིང་བའི་གཏིང་ཚད་ལ་སྨི་34དང་། ཚྭའི་འདུས་ཚད་ལ་15%-38%ཡོད། མཱ་ར་ཁའེ་བྷོ་མཚེའུ་དང་དེའི་ཉེ་འགྲམ་གྱི་ས་ཁུལ་ཕལ་མོ་ཆེ་ནི་འཛམ་གླིང་ན་མིང་དུ་གྲགས་པའི་རྡོ་སྣུམ་ཐོན་སྐྱེད་བྱེད་ས་ཡིན་ཞིང་། མཚེའུ་ཡོངས་སུ་སྣུམ་ཁྲོན་7000དང་། ཧ་ལམ་སྣུམ་གཏེར་ཟོ་དུང་ཕྱུར་50ཡོད། བྲག་རྡོའི་གས་ཁ་ལས་རྡོ་སྣུམ་ཕྱི་ལ་བཞུར་ནས་མཚེའུ་ཡི་ངོས་སུ་ལྟེམས་ལྟེམས་སུ་སྐྱོམ་པས་ཀུན་གྱིས་དེ་ལ་རྡོ་སྣུམ་གྱི་མཚེའུ་ཞེས་ཀྱང་འབོད་དོ། ། 

（ཏིང་འཛིན་བཀྲ་ཤིས། སི་ཁྲོན་མི་རིགས་དཔེ་སྐྲུན་ཁང་། ）