ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་རྒྱུ་ཐོག་མཐའ་བར་གསུམ་དུ་དོན་འཁྱོལ་བྱེད་དགོས།

ངས་ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་རྗེས་སུ་ཀྲུང་གོ་དང་ཕྱི་རྒྱལ་གྱི་གསར་འགོད་པ་དང་ཐུག་འཕྲད་བྱེད་སྐབས། ང་ཚོའི་ཏང་གིས་མི་དམངས་ཀྱི་འགོ་ཁྲིད་ནས་སྤྱི་ཚོགས་ཀྱི་གསར་བརྗེ་རླབས་པོ་ཆེ་བྱེད་ཐུབ་པར་མ་ཟད། ཏང་ཡོངས་ཀྱི་འགོ་ཁྲིད་ནས་རང་ངོས་གསར་བརྗེ་རླབས་པོ་ཆེ་ཡང་བྱེད་ཐུབ་པ་ནི་ལག་ལེན་གྱི་ཐོག་ནས་ར་སྤྲོད་བྱུང་ཡོད་ཅེས་བཤད་པ་ཡིན། ངས་སྔོན་ལ་སྤྱི་ཚོགས་གསར་བརྗེའི་ཐད་ནས་ལྟ་ཚུལ་འགའ་བརྗོད་རྒྱུ་ཡིན།

དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ནི་ང་ཚོའི་ཏང་གིས་མི་དམངས་ཀྱི་འགོ་ཁྲིད་ནས་སྤྱི་ཚོགས་གསར་བརྗེ་རླབས་པོ་ཆེ་བྱས་པའི་གྲུབ་འབྲས་ཤིག་ཡིན་ལ། ང་ཚོའི་ཏང་གིས་མི་དམངས་ཀྱི་འགོ་ཁྲིད་ནས་སྤྱི་ཚོགས་གསར་བརྗེ་རླབས་པོ་ཆེ་བྱེད་པའི་རྒྱུན་མཐུད་ཅིག་ཀྱང་ཡིན་པས་ངེས་པར་དུ་ཐོག་མཐའ་བར་གསུམ་དུ་དོན་འཁྱོལ་བྱེད་དགོས།

ལོ་རྒྱུས་དང་དོན་དངོས་ཚང་མས་སྤྱི་ཚོགས་ཀྱི་གསར་བརྗེ་ཞིག་ལ་མཐའ་མའི་རྒྱལ་ཁ་ལེན་དགོས་ན་རྟག་པར་ལོ་རྒྱུས་ཀྱི་འཕེལ་རིམ་རིང་པོ་ཞིག་བརྒྱུད་དགོས་པ་ང་ཚོར་ཤེས་སུ་བཅུག་ཡོད། འགྲོ་ཟིན་པའི་ལམ་བུར་ཕྱིར་མིག་ལྟ་བ་དང་། གཞན་གྱི་འགྲོ་མྱོང་བའི་ལམ་བུར་བསྡུར་བ། མདུན་དུ་བསྐྱོད་དགོས་པའི་ལམ་བུར་རྒྱང་ལྟ་བཅས་བྱས་ཏེ། ང་ཚོ་གང་ནས་ཡོང་བ་དང་གང་དུ་འགྲོ་བ་གསལ་པོར་ཤེས་ན། གནད་དོན་མང་པོ་ཞིག་ད་གཟོད་གཏིང་ཟབ་ཅིག་མཐོང་ཐུབ་ལ་ཚོད་འཛིན་གནད་དུ་འཁེལ་བ་ཞིག་བྱེད་ཐུབ།

ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ནི་གནམ་ནས་ལྷུང་བ་མིན་པར། སྒྱུར་བཅོས་སྒོ་འབྱེད་ལོ་ངོ་40ཡི་རིང་གི་ལག་ལེན་རླབས་པོ་ཆེའི་ཁྲོད་དུ་བྱུང་བ་ཞིག་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་70ལ་ཉེ་བའི་རིང་གི་རྒྱུན་མཐུད་འཚོལ་ཞིབ་ཁྲོད་དུ་བྱུང་བ་ཞིག །ང་ཚོའི་ཏང་གིས་མི་དམངས་ཀྱི་འགོ་ཁྲིད་ནས་སྤྱི་ཚོགས་གསར་བརྗེ་རླབས་པོ་ཆེ་བྱས་པའི་ལོ་ངོ་97གྱི་ལག་ལེན་ཁྲོད་དུ་བྱུང་བ་ཞིག །ཉེ་རབས་ནས་བཟུང་ཀྲུང་ཧྭ་མི་རིགས་ཉམས་རྒུད་ནས་དར་རྒྱས་བྱུང་བའི་བར་གྱི་ལོ་ངོ་170ལྷག་ཙམ་རིང་གི་ལོ་རྒྱུས་འཕེལ་རིམ་ཁྲོད་དུ་བྱུང་བ་ཞིག །ལོ་ངོ་5000ལྷག་གི་ཀྲུང་ཧྭའི་ཤེས་དཔལ་རྒྱུན་འཛིན་དང་འཕེལ་རྒྱས་བཏང་བའི་ཁྲོད་དུ་བྱུང་བ་ཞིག །ཏང་དང་མི་དམངས་ཀྱིས་དཀའ་སྡུག་ཚད་མེད་མྱངས་ཤིང་དང་བློས་གཏོང་སྣ་ཚོགས་བྱས་པ་ལས་བྱུང་བའི་གྲུབ་འབྲས་རྩ་ཆེན་ཞིག་བཅས་རེད། གྲུབ་འབྲས་འདི་ཐོབ་པ་ནི་ལས་སླ་མོ་ཞིག་མ་ཡིན།

ཀྲུང་གོ་གསར་པ་མ་བཙུགས་གོང་གི་ལོ་ངོ་28རིང་ང་ཚོའི་ཏང་གིས་མི་དམངས་ཀྱི་འགོ་ཁྲིད་ནས་དམངས་གཙོ་རིང་ལུགས་གསར་པའི་གསར་བརྗེ་བྱས། ཀྲུང་གོ་གསར་པ་དབུ་བརྙེས་རྗེས། ང་ཚོའི་ཏང་གིས་མི་དམངས་ཀྱི་འགོ་ཁྲིད་ནས་སྤྱི་ཚོགས་རིང་ལུགས་ཀྱི་གསར་བརྗེ་བྱས་པ་དང་། ཀྲུང་ཧྭ་མི་རིགས་ཀྱི་ལོ་རྒྱུས་ཐོག་གི་ཆེས་རྒྱ་ཆེ་ཞིང་གཏིང་ཟབ་པའི་སྤྱི་ཚོགས་ཀྱི་འཕོ་འགྱུར་ལེགས་འགྲུབ་བྱུང་བ་རེད། རང་རྒྱལ་གྱི་སྤྱི་ཚོགས་རིང་ལུགས་ཀྱི་གཞི་རྩའི་ལམ་ལུགས་བཙུགས་རྗེས། ང་ཚོའི་ཏང་གིས་ཇི་ལྟར་བྱས་ནས་ཀྲུང་གོར་སྤྱི་ཚོགས་རིང་ལུགས་འཛུགས་སྐྲུན་བྱ་རྒྱུའི་ཐད་ཡུན་རིང་འཚོལ་ཞིབ་བྱས་ཏེ་གྲུབ་འབྲས་གལ་ཆེན་ཐོབ་ཡོད་ལ། བར་ཆད་ཚབས་ཆེན་ཡང་བརྒྱུད་མྱོང་། དེའི་ནང་གི་གནད་དོན་གཙོ་ཆེ་ཤོས་ནི་ང་ཚོ་ལྟ་བུའི་མི་སེར་སྤེལ་ཡུལ་ཕྱེད་ཙམ་དང་བཀས་བཀོད་རྒྱུད་འཛིན་ཕྱེད་ཙམ་གྱི་སྤྱི་ཚོགས་དེ་སྤྱི་ཚོགས་རིང་ལུགས་སུ་འཛུགས་སྐྲུན་བྱེད་པ་ནི་སྔར་བྱུང་མ་མྱོང་བའི་བྱ་གཞག་ཅིག་ཡིན་པས། གཞན་ལ་མིག་དཔེ་ལྟ་བའི་དཔེ་ལུགས་ཤིག་རང་སར་མེད་པ་དེ་རེད།

ཨེན་ཀེ་སིས་“‘སྤྱི་ཚོགས་རིང་ལུགས་ཀྱི་སྤྱི་ཚོགས་’ཞེས་པ་ནི་ནམ་ཡང་མི་འགྱུར་བའི་རིགས་ཤིག་མིན་པར། སྤྱི་ཚོགས་ཀྱི་ལམ་ལུགས་གཞན་དག་གང་རུང་ཞིག་དང་འདྲ་བར། རྟག་པར་འགྱུར་བ་དང་སྒྱུར་བཅོས་བྱེད་པའི་སྤྱི་ཚོགས་ཤིག་ཏུ་བརྩི་དགོས་”ཞེས་བསྟན་ཡོད། ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ཚུན། སྒྱུར་བཅོས་སྒོ་འབྱེད་ནི་ང་ཚོའི་ཏང་གིས་མི་དམངས་ཀྱི་འགོ་ཁྲིད་ནས་སྤྱི་ཚོགས་གསར་བརྗེ་རླབས་པོ་ཆེ་བྱེད་པའི་རྒྱུན་མཐུད་ཅིག་ཡིན། བློ་མཐུན་ཏེང་ཞའོ་ཕིན་གྱིས་“སྒྱུར་བཅོས་ནི་ཀྲུང་གོའི་གསར་བརྗེ་ཐེངས་གཉིས་པ་ཡིན་”ཞེས་གསུངས་ཡོད། སྒྱུར་བཅོས་སྒོ་འབྱེད་བྱས་ནས་ལོ་ངོ་40འདས་ཟིན་ཞིང་། ང་ཚོས་ཐོག་མཐའ་བར་གསུམ་དུ་ལག་ལེན་དང་འཚོལ་ཞིབ་བྱེད་ལ། ཀྲུང་གོའི་གུང་ཁྲན་ཏང་གི་འགོ་ཁྲིད་དང་རང་རྒྱལ་སྤྱི་ཚོགས་རིང་ལུགས་ཀྱི་ལམ་ལུགས་རྒྱུན་འཁྱོངས་བྱས་པའི་སྔོན་འགྲོའི་ཆ་རྐྱེན་འོག །སྤྱི་ཚོགས་རིང་ལུགས་ཀྱི་འགྲོ་ལམ་དང་། རིགས་པའི་གཞུང་ལུགས། ལམ་ལུགས། རིག་གནས་བཅས་ཀྱི་ཐད་ལ་གསར་བརྗེའི་རང་བཞིན་ལྡན་པའི་སྒྱུར་བཅོས་རབ་དང་རིམ་པ་བྱས་ཤིང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་གསར་དུ་བཏོད་པས། རང་རྒྱལ་གྱི་འཕེལ་རྒྱས་གོམ་སྟབས་ཆེན་པོས་དུས་རབས་ཀྱི་རྗེས་ཟིན་ཐུབ་པ་བྱུང་ཡོད།

ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ནི་སྒྱུར་བཅོས་སྒོ་འབྱེད་ཀྱི་དུས་སྐབས་གསར་པར་གསར་གཏོད་བྱས་མོད། འོན་ཀྱང་དེའི་གྲུབ་ཚུལ་དང་འཕེལ་རྒྱས་ཀྱི་བརྒྱུད་རིམ་ཤེས་རྟོགས་དང་། ལོ་རྒྱུས་ཀྱི་ལྡོག་མེད་རང་བཞིན་དང་ཚན་རིག་དང་མཐུན་པའི་བདེན་དོན་རང་བཞིན་ཤེས་རྟོགས་བྱེད་པར་དུས་ཚོད་ཀྱི་ཚད་གཞི་རིང་དུ་བཏང་སྟེ་འཛམ་གླིང་གི་སྤྱི་ཚོགས་རིང་ལུགས་ཀྱི་འཕེལ་རིམ་ཁྲོད་བཞག་ནས་སྟངས་འཛིན་བྱེད་དགོས། ལོ་ངོ་170ལྷག་ཙམ་གྱི་གོང་། མར་ཁེ་སི་དང་ཨེན་ཀེ་སིས་མ་རྩ་རིང་ལུགས་ཀྱི་སྤྱི་ཚོགས་ཀྱི་གཞི་རྩའི་འགལ་བར་རྟོག་ཞིབ་དང་ཞིབ་འཇུག་གཏིང་ཟབ་གནང་བའི་རྨང་གཞིའི་ཐོག །ཧྲེང་ཞི་མོན་དང་ཧྥུ་ལི་ཡེ། ཨོའུ་ཝུན་སོགས་ཀྱི་སྟོང་བསམ་སྤྱི་ཚོགས་རིང་ལུགས་ཀྱི་བསམ་བློ་རྒྱུན་འཛིན་དང་བླང་དོར་བྱས་ནས། དངོས་གཙོའི་ལོ་རྒྱུས་ལྟ་བ་དང་རིན་ཐང་ལྷག་མའི་གཞུང་ལུགས་ཀྱི་ལྟ་བ་བཏོན་ནས་སྤྱི་ཚོགས་རིང་ལུགས་ཀྱི་བསམ་བློར་ཚན་རིག་དང་མཐུན་པའི་གཞུང་ལུགས་ཀྱི་རྨང་གཞི་བཏིང་བ་དང་། ཚན་རིག་སྤྱི་ཚོགས་རིང་ལུགས་གསར་འཛུགས་བྱས་ཤིང་། སྤྱི་ཚོགས་རིང་ལུགས་དེ་ནས་བཟུང་སྟོང་བསམ་ནས་ཚན་རིག་ཏུ་གྱུར། ཚན་རིག་སྤྱི་ཚོགས་རིང་ལུགས་དང་བཟོ་པའི་ལས་འགུལ་ཟུང་འབྲེལ་བྱས་ནས་ཟླ་བ་བཅུ་པའི་གསར་བརྗེ་ལེགས་འགྲུབ་ཡོང་བར་སྐུལ་འདེད་བཏང་སྟེ། འཛམ་གླིང་ཐོག་སྤྱི་ཚོགས་རིང་ལུགས་ཀྱི་རྒྱལ་ཁབ་ཨང་དང་པོ་བཙུགས་པ་དང་། དེ་ནས་བཟུང་ཚན་རིག་སྤྱི་ཚོགས་རིང་ལུགས་དེ་རིགས་པའི་གཞུང་ལུགས་ནས་ལག་ལེན་དུ་གྱུར། འཛམ་གླིང་འཁྲུག་ཆེན་གཉིས་པ་མཇུག་བསྒྲིལ་རྗེས། སྤྱི་ཚོགས་རིང་ལུགས་ཀྱི་རྒྱལ་ཁབ་ཁག་ཅིག་དབུ་བརྙེས་པ་དང་། ལྷག་པར་དུ་ང་ཚོའི་ཏང་གིས་མི་དམངས་ཀྱི་འགོ་ཁྲིད་ནས་ཀྲུང་གོ་གསར་པ་བཙུགས་པ་མ་ཟད། སྤྱི་ཚོགས་རིང་ལུགས་ཀྱི་ལམ་ལུགས་ཀྱང་བཙུགས་པས། ཚན་རིག་སྤྱི་ཚོགས་རིང་ལུགས་དེ་རྒྱལ་ཁབ་གཅིག་གི་ལག་ལེན་ནས་རྒྱལ་ཁབ་མང་པོར་འཕེལ་རྒྱས་བྱུང་། སྐབས་དེར་སྤྱི་ཚོགས་རིང་ལུགས་ཀྱི་དཔུང་ཚོགས་དར་རྒྱས་ཆེན་པོ་བྱུང་བ་དང་། དེའི་ཐོག་ཨེ་ཤ་ཡ་དང་། ཨ་ཧྥེ་རི་ཁ། ལ་ཏིང་མེ་གླིང་བཅས་པའི་རྒྱལ་ཁབ་ཀྱིས་བཙན་རྒྱལ་རིང་ལུགས་ལ་ངོ་རྒོལ་དང་མི་སེར་སྤེལ་བའི་རིང་ལུགས་ལ་ངོ་རྒོལ་བྱེད་པའི་འཐབ་རྩོད་བྱས་སྟབས། མ་རྩ་རིང་ལུགས་ཀྱི་འཇིག་རྟེན་དང་གཞི་རྩའི་ཐོག་སྟོབས་ཤུགས་མཉམ་པའི་རྣམ་པ་ཆགས། དེར་བརྟེན་བློ་མཐུན་མའོ་ཙེ་ཏུང་གིས་“ཤར་རླུང་གིས་ནུབ་རླུང་གནོན་”ཞེས་གསུངས་པ་རེད།

འོན་ཀྱང་ལོ་རྒྱུས་ཀྱི་འཕེལ་རྒྱས་ནི་ཐོག་མ་ཉིད་ནས་དྲང་མོ་མིན་པར། ཀྱག་ཀྱོག་དང་བར་ཆད་ཀྱིས་ཁེངས་ཡོད། དུས་རབས་གོང་མའི་ལོ་རབས་80པའི་མཇུག་དང་ལོ་རབས་90པའི་དུས་འགོར། སུའུ་ལེན་ཐོར་ཞིག་ཏུ་སོང་བ་དང་། སུའུ་གུང་སྲིད་སྟེགས་ནས་ལྷུང་བ། ཡོ་རོབ་ཤར་མར་འགྱུར་བ་ཆེན་པོ་བྱུང་བ་བཅས་ཀྱིས་སྤྱི་ཚོགས་རིང་ལུགས་ཀྱི་རྒྱལ་ཁབ་དང་པོ་དང་ཡོ་རོབ་ཤར་མའི་སྤྱི་ཚོགས་རིང་ལུགས་ཀྱི་རྒྱལ་ཁབ་མེད་པར་གྱུར་པ་མ་ཟད། སྤྱི་ཚོགས་རིང་ལུགས་ལ་བློ་ཁ་ཕྱོགས་པའི་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་ཕོག་ཐུག་ཚབས་ཆེན་བཟོས་པས། འཕེལ་རྒྱས་འགྲོ་བཞིན་པའི་རྒྱལ་ཁབ་མང་པོ་ཞིག་ནུབ་ཕྱོགས་ལམ་ལུགས་ཀྱི་མ་དཔེ་འདྲ་སྤོས་བྱེད་པའི་ལམ་བུར་མི་བསྐྱོད་ཀ་མེད་བྱུང་བ་རེད། འཛམ་གླིང་ཐོག་གི་སྤྱི་ཚོགས་རིང་ལུགས་ལ་བར་ཆད་ཚབས་ཆེན་བྱུང་བ་དེ་ནི་“མེ་ཏོག་སྣ་ལྔ་སྐད་ཅིག་ལྷུང་”ཞེས་པ་ལྟར་རེད། ངས་སྤྱི་ཚོགས་རིང་ལུགས་ཀྱིས་སྟོང་བསམ་ནས་ཚན་རིག་དང་། རིགས་པའི་གཞུང་ལུགས་ནས་ལག་ལེན། རྒྱལ་ཁབ་གཅིག་ནས་རྒྱལ་ཁབ་མང་པོར་བསྐྱོད་པའི་ལོ་རྒྱུས་བརྗོད་ཡོད། འོ་ན་ད་ལྟ་གནས་སྟངས་ཅི་འདྲ་ཞིག་ཡིན་ཞེ་ན། ཞིབ་འཇུག་གཏིང་ཟབ་བྱེད་རིན་ཆེན་པོ་ལྡན་པ་རེད།

ན་ནིང་ནི་ཟླ་བ་བཅུ་པའི་གསར་བརྗེ་བྱུང་ནས་ལོ་ངོ་100འཁོར་བའི་ལོ་རེད། ངས་ཏང་གི་ཚོགས་ཆེན་བཅུ་དགུ་པའི་སྙན་ཞུ་ཁག་གཉིས་པ་འགོ་ཚུགས་མ་ཐག་ལོ་རྒྱུས་ཀྱི་དོན་ཆེན་དེའི་སྐོར་གླེང་བ་ནི་ཟླ་བ་བཅུ་པའི་གསར་བརྗེས་ཀྲུང་གོའི་གུང་ཁྲན་ཏང་དབུ་བརྙེས་པ་དང་འཕེལ་རྒྱས་ལ་ཐོན་པའི་ལོ་རྒྱུས་ཀྱི་ཤུགས་རྐྱེན་ཁྱབ་བསྒྲགས་བྱེད་ཆེད་ཡིན། ལེ་ཉིན་གྱིས་ཟླ་བཅུ་པའི་གསར་བརྗེ་བྱུང་ནས་ལོ་4འཁོར་བར་དྲན་གསོ་ཞུ་སྐབས་གཏིང་ཟབ་པའི་སྒོ་ནས་བསྟན་པ་ལྟར། “ཐེངས་དང་པོའི་རྒྱལ་ཁ་འདི་ནི་མཐའ་མཇུག་གི་རྒྱལ་ཁ་མ་རེད།” འོན་ཀྱང་“ང་ཚོས་ལས་དོན་འདི་འགོ་བརྩམས་ཡོད། རྒྱལ་ཁབ་གང་ཞིག་གི་འབྱོར་མེད་པ་རྣམས་ཀྱིས་དུས་ནམ་ཞིག་དང་མཚམས་གང་དུ་བྱ་གཞག་འདི་མཐར་ཕྱིན་པར་བསྒྲུབ་དགོས་པའི་གནད་དོན་འདི་གལ་ཆེན་པོ་ཞིག་མ་རེད། གལ་ཆེ་ཤོས་ནི་སྲ་བའི་འཁྱགས་པ་བཅག་ཟིན་ཞིང་། འགྲུལ་ལམ་ཤར་གཏོང་ཐུབ་ཟིན་ལ། འགྲོ་ལམ་གསལ་སྟོན་བྱས་ཟིན་པ་དེ་རེད།”

ལོ་རྒྱུས་ནི་རང་ཉིད་ཀྱི་གཏན་ཚིགས་ལྟར་མདུན་དུ་འཕེལ་བསྐྱོད་བྱེད་བཞིན་ཡོད། ཀྲུང་གོར་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལ་གྲུབ་འབྲས་ཧ་ཅང་ཆེན་པོ་ཐོབ་པ་དེའི་ཐོག་ནས་སྤྱི་ཚོགས་རིང་ལུགས་རྩ་མེད་དུ་སོང་མེད་པ་དང་། རྩ་མེད་དུ་འགྲོ་མི་སྲིད་པ་མ་ཟད། ད་དུང་སྐྱེ་སྟོབས་ཀྱི་དཔལ་འབར་བའི་གསོན་ཤུགས་ཀྱང་རྒྱས་ཡོད་པ་གསལ་པོར་མཚོན་ཡོད། ཀྲུང་གོར་ཚན་རིག་སྤྱི་ཚོགས་རིང་ལུགས་ལམ་ལྷོང་བྱུང་བ་དེས་མར་ཁེ་སིའི་རིང་ལུགས་དང་། ཚན་རིག་སྤྱི་ཚོགས་རིང་ལུགས་ཀྱི་དོན་སྙིང་། འཛམ་གླིང་སྤྱི་ཚོགས་རིང་ལུགས་ཀྱི་དོན་སྙིང་བཅས་ལ་མཚོན་ན་ཧ་ཅང་གལ་འགངས་ཆེ་བ་ཞིག་རེད། ཚོད་དཔག་ཅིག་བྱས་ཆོག་སྟེ། གལ་ཏེ་ཀྲུང་གོར་སྤྱི་ཚོགས་རིང་ལུགས་ལ་ད་ལྟའི་གྲུབ་འབྲས་འདི་ཐོབ་མེད་པ་དང་། གལ་ཏེ་ཀྲུང་གོའི་གུང་ཁྲན་ཏང་གི་འགོ་ཁྲིད་དང་རང་རྒྱལ་སྤྱི་ཚོགས་རིང་ལུགས་ཀྱི་ལམ་ལུགས་དེའང་སུའུ་ལེན་ཐོར་ཞིག་ཏུ་སོང་བ་དང་སུའུ་གུང་སྲིད་ཐོར་སོང་བ་དང་ཡོ་རོབ་ཤར་མར་འགྱུར་བ་དྲག་པོ་བྱུང་བ་དང་བསྟུན་ནས་ཏུའོ་སྨི་ནུའོ་རུས་སྦག་བཞིན་གཅིག་རྗེས་གཉིས་མཐུད་ངང་འགྱུར་ལྡོག་དེའི་ཁྲོད་ནས་ཐོར་ཞིག་ཏུ་སོང་ན། ཡང་ན་རྒྱུ་རྐྱེན་གཞན་དག་གི་དབང་གིས་ཕམ་པ་བྱུང་ན། སྤྱི་ཚོགས་རིང་ལུགས་ཀྱི་ལག་ལེན་དེ་མུན་ནག་གི་ནང་དུ་ཡུན་རིང་པོར་འཕེལ་མེད་སོར་གནས་བྱེད་དགོས་ལ། མར་ཁེ་སིས་གསུངས་པ་བཞིན་རྣམ་ཤེས་དེ་འཇིག་རྟེན་དུ་ཡང་ནས་བསྐྱར་དུ་འཁོར་བཞིན་འདུག་དགོས་པ་རེད།

དར་ཆ་ཡིས་ཁ་ཕྱོགས་ཐག་གཅོད་པ་དང་འགྲོ་ལམ་གྱིས་ལས་དབང་ཐག་གཅོད་ཀྱི་ཡོད། འགྲོ་ལམ་ནོར་འཁྲུལ་ཡིན་ན་ང་ཚོས་དམིགས་འབེན་འགྲུབ་མི་ཐུབ་པ་མ་ཟད། ཐ་ན་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེའི་འཕེལ་རིམ་ཡང་ཆད་སྲིད། ཏང་གི་ཚོགས་ཆེན་བཅུ་དགུ་པའི་ཐོག་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དུས་རབས་གསར་པར་སླེབས་ཡོད་ཅེས་པའི་ཆབ་སྲིད་ཀྱི་ཆོད་གཏམ་གལ་ཆེན་དེ་བཏོན་ཡོད། ང་ཚོས་ངེས་པར་དུ་ངོས་འཛིན་བྱེད་དགོས་པ་ཞིག་སྟེ། དུས་རབས་གསར་པ་དེ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དུས་རབས་གསར་པ་ཞིག་ཡིན་པ་ལས་དུས་རབས་གསར་པ་གཞན་གང་ཡང་མིན། ཏང་གིས་ལོ་རྒྱུས་ཀྱི་གནས་ས་གསར་པའི་ཐོག་དུས་རབས་གསར་པའི་ཏང་གི་ལོ་རྒྱུས་ཀྱི་ལས་འགན་མངོན་འགྱུར་བྱེད་པར་ཆེས་རྩ་བར་གྱུར་པ་ཞིག་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེ་མཐོན་པོར་སྒྲེང་བ་དེ་རེད།

བསྡོམས་རྩིས་བྱས་པར་ལྟར་ན། མིག་སྔར་འཛམ་གླིང་ཐོག་རྒྱལ་ཁབ་100ལྷག་ཙམ་གྱི་ཁྲོད་སྲིད་ཏང་130ལྷག་ཙམ་གྱིས་གུང་ཁྲན་ཏང་གི་མིང་སྔར་བཞིན་མཐའ་འཁྱོངས་བྱེད་པའམ་ཡང་ན་མར་ཁེ་སིའི་རིང་ལུགས་ཀྱི་ངོ་བོ་མཐའ་འཁྱོངས་བྱེད་ཀྱི་ཡོད། རྒྱ་ཆེ་བའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་ཀྲུང་གོར་ཡིད་སྨོན་བྱེད་པ་དང་ཀྲུང་གོར་རྒྱལ་སྲིད་སྐྱོང་བའི་ཉམས་མྱོང་སློབ་སྦྱོང་བྱ་རྒྱུ་ཡིན་ཞེས་གཅིག་རྗེས་གཉིས་མཐུད་ངང་བརྗོད་ཀྱི་ཡོད། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ནི་དུས་རབས་21པའི་ཚན་རིག་སྤྱི་ཚོགས་རིང་ལུགས་འཕེལ་རྒྱས་ཀྱི་དར་ཆ་ཡིན་ལ། འཛམ་གླིང་གི་སྤྱི་ཚོགས་རིང་ལུགས་དར་རྒྱས་གཏོང་བའི་སྲོག་ཤིང་ལྟ་བུར་གྱུར་ཡོད་པས། ང་ཚོའི་ཏང་ལ་ཚན་རིག་སྤྱི་ཚོགས་རིང་ལུགས་ཀྱི་འཕེལ་རྒྱས་གསར་པར་ལོ་རྒྱུས་ཀྱི་བྱས་རྗེས་སྔར་ལས་ཆེ་བ་འཇོག་པར་འགན་འཁྲི་དང་། ཡིད་ཆེས། ནུས་པ་བཅས་ལྡན་ཡོད།

ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་འཆང་དགོས་ཤིང་། ང་ཚོ་ནི་གུང་ཁྲན་ཏང་མི་ཡིན་པ་དང་ང་ཚོ་ནི་གསར་བརྗེ་པ་ཡིན་པས། གསར་བརྗེའི་སྙིང་སྟོབས་ཤོར་མི་རུང་། མི་ལ་ལས་ད་ལྟ་ང་ཚོའི་ཏང་ནི་“གསར་བརྗེའི་ཏང་”ནས་“སྲིད་སྐྱོང་ཏང་”དུ་གྱུར་ཡོད་ཅེས་བཤད་ཀྱི་ཡོད། བཤད་ཚུལ་དེ་ནི་ཡང་དག་པ་ཞིག་མ་རེད། ང་ཚོའི་ཏང་གི་བཤད་སྟངས་དངོས་ནི་ང་ཚོའི་ཏང་གིས་གསར་བརྗེ་དང་། འཛུགས་སྐྲུན། སྒྱུར་བཅོས་བཅས་བྱས་པ་བརྒྱུད་མི་དམངས་ཀྱི་འགོ་ཁྲིད་ནས་རྒྱལ་ཡོངས་ཀྱི་སྲིད་དབང་འཕྲོག་ལེན་བྱེད་ཆེད་འབད་འཐབ་བྱེད་པའི་ཏང་ཞིག་ནས་མི་དམངས་ཀྱི་འགོ་ཁྲིད་ནས་རྒྱལ་ཡོངས་ཀྱི་སྲིད་དབང་བཟུང་བ་དང་འབྲེལ་ཡུན་རིང་སྲིད་སྐྱོང་བྱེད་པའི་ཏང་ཞིག་ཏུ་གྱུར་ཡོད། ཕྱི་ཕྱོགས་ནས་བཀག་སྡོམ་ཐེབས་པ་དང་འཆར་ལྡན་དཔལ་འབྱོར་ལག་ལེན་བསྟར་བའི་ཆ་རྐྱེན་འོག་རྒྱལ་ཁབ་ཀྱི་འཛུགས་སྐྲུན་ལ་འགོ་ཁྲིད་བྱེད་པའི་ཏང་ཞིག་ནས་ཕྱི་ཕྱོགས་ལ་སྒོ་འབྱེད་པ་དང་སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་གོང་དུ་སྤེལ་བའི་ཆ་རྐྱེན་འོག་རྒྱལ་ཁབ་ཀྱི་འཛུགས་སྐྲུན་ལ་འགོ་ཁྲིད་བྱེད་པའི་ཏང་ཞིག་ཏུ་གྱུར་ཡོད། དེའི་ནང་དུ་“གསར་བརྗེའི་ཏང་”དང་“སྲིད་སྐྱོང་ཏང་”གཉིས་ཀྱི་དབྱེ་བ་མེད་པ་དང་། གསར་བརྗེ་དང་སྲིད་སྐྱོང་གཉིས་གཏན་ནས་མི་འདྲ་བའི་བྱ་བ་གཉིས་སུ་བརྩིས་མེད། མར་ཁེ་སིའི་རིང་ལུགས་ཀྱིས་ངོས་འཛིན་ལྟར་ན། སྤྱི་ཚོགས་གསར་བརྗེ་ནི་ཐོན་སྐྱེད་ནུས་ཤུགས་དང་ཐོན་སྐྱེད་འབྲེལ་བ་གཉིས་ཀྱི་འགལ་བའི་ལས་འགུལ་རྨང་གཞིར་བྱས་པ་སྟེ་ཆབ་སྲིད་ཀྱི་སྟེང་གི་བཀོད་པ་རྙིང་པ་མེད་པར་བཟོ་བའི་སྤྱི་ཚོགས་ཀྱི་ལས་འགུལ་ཞིག་ཡིན་པ་མ་ཟད། སྤྱི་ཚོགས་འཛུགས་སྐྲུན་གྱི་ལས་འགུལ་གསར་པ་ཞིག་ཀྱང་ཡིན། ང་ཚོའི་ཏང་ནི་མར་ཁེ་སིའི་རིང་ལུགས་ཀྱི་སྲིད་སྐྱོང་ཏང་ཞིག་ཡིན་མོད། འོན་ཀྱང་དུས་མཚུངས་སུ་མར་ཁེ་སིའི་རིང་ལུགས་ཀྱི་གསར་བརྗེའི་ཏང་ཞིག་ཡིན་པས། སྔོན་ཆད་གསར་བརྗེའི་དམག་འཁྲུག་དུས་སྐབས་ཀྱི་ངར་ཤུགས་དང་། གསར་བརྗེའི་སྤྲོ་སེམས། སྲོག་བསྡོས་ཀྱི་སྙིང་སྟོབས་བཅས་མཐའ་འཁྱོངས་བྱས་ཏེ། གསར་བརྗེའི་ལས་དོན་མཐར་ཕྱིན་པར་བསྒྲུབ་དགོས། སྐད་ཆ་འདི་ནི་བློ་མཐུན་མའོ་ཙེ་ཏུང་གིས་གསུངས་པ་རེད། བློ་མཐུན་ཏེང་ཞའོ་ཕིན་དང་། བློ་མཐུན་ཅང་ཙེ་རྨིན། བློ་མཐུན་ཧུའུ་ཅིན་ཐའོ་བཅས་ཚང་མས་གསུང་བཤད་འདི་ཐེངས་མང་གནང་མྱོང་ལ། ངས་ཀྱང་སྐད་ཆ་འདི་ཐེངས་མང་བཤད་མྱོང་།

ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་རྗེས་སུ་ངས་ཀྲུང་གོ་དང་ཕྱི་རྒྱལ་གྱི་གསར་འགོད་པ་དང་ཐུག་འཕྲད་བྱེད་སྐབས་ཀྲུང་གོའི་གུང་ཁྲན་ཏང་གིས་ཀྲུང་ཧྭ་མི་རིགས་ཀྱི་ལོ་ངོ་སྟོང་ཕྲག་གི་བྱ་གཞག་རླབས་པོ་ཆེ་ལ་གཞོལ་རྒྱུའི་སེམས་ཐག་བཅད་པ་རེད། ལོ་བརྒྱ་ནི་ཏག་ཏག་ལང་ཚོ་དར་ལ་བབས་པའི་དུས་རེད། དུས་མཚུངས་སུ། ངས་སྐད་ཆ་འདི་བཤད་དུས་རྗེས་ཡོང་སྔོན་དྲན་ཟབ་མོ་བྱས་ཡོད། རང་རྒྱལ་གྱི་ལོ་རྒྱུས་ཐོག་ནས་བལྟས་ན། རྒྱལ་རབས་ཡུན་རིང་གནས་པ་ནི་ཞ་རྒྱལ་རབས་ཀྱི་ལོ་ངོ་400ལྷག་དང་། ཧྲང་རྒྱལ་རབས་ཀྱི་ལོ་ངོ་600ཙམ། ཀྲུའུ་ནུབ་མའི་ལོ་ངོ་300ཙམ། ཀྲུའུ་ཤར་མའི་ལོ་ངོ་500ལྷག་ཙམ། ཧན་ནུབ་མའི་ལོ་ངོ་215དང་། ཧན་ཤར་མའི་ལོ་ངོ་195དང་། ཐང་རྒྱལ་རབས་ཀྱི་ལོ་ངོ་290དང་། མིང་རྒྱལ་རབས་ཀྱི་ལོ་ངོ་277དང་། ཆིང་རྒྱལ་རབས་ཀྱི་ལོ་ངོ་268 དང་། དུས་ཡུན་ཐུང་བ་ནི་ཆིན་རྒྱལ་རབས་ཀྱི་ལོ་ངོ་15དང་། རྒྱལ་ཁབ་གསུམ་གྱི་ལོ་ངོ་61དང་། སུང་རྒྱལ་རབས་བྱང་མའི་ལོ་ངོ་167དང་། སུང་རྒྱལ་རབས་ལྷོ་མའི་ལོ་ངོ་153དང་། ཡོན་རྒྱལ་རབས་ཀྱི་ལོ་ངོ་90དང་། མིན་གོ་ཡི་ལོ་ངོ་38བཅས་ཡིན་པ་དང་། རྒྱལ་རབས་ཆུང་བ་གཞན་ནི་མིང་སྐད་ཅིག་ཙམ་ལས་མ་གྲགས་པར་ཚེ་སྲོག་གི་རྒྱུན་ཕྲ་བ་གྲངས་ལས་འདས། ཆིན་རྒྱལ་རབས་དང་། སུང་བྱང་མའི་རྒྱལ་རབས། ཡོན་རྒྱལ་རབས་བཅས་ནི་འགྲན་ཟླ་བྲལ་བའི་སྟོབས་ལྡན་རྒྱལ་ཁབ་ཅིག་ཡིན་མོད། འོན་ཀྱང་མི་འགྱངས་པར་ནུབ་ཁའི་ཉི་མ་བཞིན་བཞུད་པ་རེད། དུས་ཡུན་ཅུང་རིང་བའི་རྒྱལ་རབས་དེ་དག་ཡིན་ནའང་། དུས་མཇུག་ཏུ་སྲིད་གཞུང་ལ་རུལ་སུངས་དང་། མང་ཚོགས་ཟིང་འཁྲུག །མི་དམངས་ཁོང་ཁྲོའི་མེ་ལྕེ་འབར་བ། འགོག་རྒོལ་ཟམ་མི་འཆད་པ་བྱུང་བས། མང་ཆེ་བ་ནི་དབུགས་ཆད་ལ་ཁད་དུ་གྱར་བ་དང་འཆི་ཁའི་མར་མེ་ལྟར་རེད། དེའི་ཐོག་ནས་སྲིད་དབང་ཞིག་བཙུགས་རྗེས་དར་རྒྱས་གོང་འཕེལ་དང་ཡུན་རིང་བདེ་འཁོད་ཡོང་བ་བྱ་རྒྱུ་ནི་ལས་སླ་པོ་གཏན་ནས་མིན་པ་གསལ་བཤད་བྱས་ཡོད། གལ་ཏེ་རང་བརྟག་དང་། རང་ཟོན། རང་འབད་བཅས་མ་བྱས་ན། སྲིད་དབང་ཇི་ལྟར་སྟོབས་དང་ལྡན་པ་ཞིག་ཡིན་རུང་ཚང་མ་ཐབས་ཟད་འུ་ཐུག་གི་གནས་སུ་ལྷུང་ངེས།

ད་ལྟ་ང་ཚོའི་ཏང་དབུ་བརྙེས་ནས་ལོ་ངོ་97འཁོར་བ་དང་། ཀྲུང་གོ་གསར་པ་དབུ་བརྙེས་ནས་ལོ་ངོ་69འཁོར་བ་རེད། སུའུ་གུང་ནི་ལོ་ངོ་86གནས་པ་དང་། སུའུ་ལེན་ནི་ལོ་ངོ་74གནས་པ་རེད། ང་ཚོའི་ཏང་གི་ལོ་རྒྱུས་སུའུ་གུང་ལས་བརྒལ་ཡོད་ཅིང་། ང་ཚོའི་ཏང་གིས་རྒྱལ་ཡོངས་ཀྱི་སྲིད་དབང་བཟུང་བའི་ལོ་རྒྱུས་ནི་ད་དུང་སུའུ་ལེན་ལ་མི་དོ། དུས་རབས་འདིའི་དུས་དཀྱིལ་དུ་སླེབས་སྐབས། ང་ཚོའི་ཏང་གི་ལོ་རྒྱུས་ལོ་ངོ་130ལ་ཉེ་བ་དང་། ཀྲུང་གོ་གསར་པའི་ལོ་རྒྱུས་ལོ་ངོ་100ལ་ཉེ་བ་རེད། བློ་མཐུན་ཏེང་ཞའོ་ཕིན་གྱིས་“སྤྱི་ཚོགས་རིང་ལུགས་ཀྱི་ལམ་ལུགས་སྲ་བརྟན་དང་འཕེལ་རྒྱས་གཏོང་བར་ད་དུང་ལོ་རྒྱུས་ཀྱི་དུས་རིམ་ཧ་ཅང་རིང་པོ་ཞིག་དགོས་པ་དང་། ང་ཚོ་མི་རབས་འགའ་ཤས་དང་། མི་རབས་བཅུ་གྲངས་ཁ་ཤས། ཐ་ན་མི་རབས་བཅུ་ཕྲག་ཁ་ཤས་ཀྱིས་རྒྱུན་འཁྱོངས་ལྷོད་མེད་ཀྱིས་འབད་འཐབ་བྱེད་དགོས་”ཞེས་གསུངས་པ་རེད། དེ་ནི་ལོ་ག་ཚོད་ཡིན་ནམ། ལོ་སྟོང་ལ་གཞི་བཅོལ་ནས་བརྩི་དགོས། དེ་ཡང་གསལ་པོར་བཤད་ན། ང་ཚོས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་འཛུགས་སྐྲུན་ཡག་པོ་དང་འཛུགས་སྐྲུན་བྱས་ཚར་བ་བྱེད་པར་ལོ་རྒྱུས་ཀྱི་དུས་སྐབས་ཧ་ཅང་རིང་པོ་ཞིག་དགོས་པ་རེད། ལོ་རྒྱུས་ཀྱི་འཕེལ་རིམ་རིང་པོའི་ནང་ཀྲུང་གོའི་གུང་ཁྲན་ཏང་མ་ཐོར་བ་དང་ཀྲུང་གོའི་སྤྱི་ཚོགས་རིང་ལུགས་ཀྱི་ལམ་ལུགས་མ་ཐོར་བའི་འགན་ལེན་བྱ་རྒྱུ་དེ་ནི་ཉེན་ཁ་དང་འགྲན་སློང་ཧ་ཅང་ཆེན་པོ་ཞིག་རེད། དེ་སྔ་སུའུ་གུང་དང་སུའུ་ལེན་གྱི་སྟོབས་ཤུགས་ཆེན་པོ་ཅི་འདྲ་མི་འདུག་གམ། ད་ལྟ་ནི་“མཁའ་རུ་ཟླ་འོད་འཚེར་བའི་མཚན་མོ་འདིར། ། རྒྱལ་ཁབ་དྲན་པའི་གདུང་བ་གཟོད་པར་དཀའ། །”ཞེས་པ་ལྟར་རེད། མི་རབས་ཤིག་གིས་མི་རབས་དེའི་བྱ་བ་སྒྲུབ་བཞིན་ཡོད་མོད། འོན་ཀྱང་ལོ་རྒྱུས་ཀྱི་མིག་རྒྱང་དང་ཕུགས་ཀྱི་མིག་རྒྱང་མེད་ན་དེང་སྐབས་ཀྱི་བྱ་བ་ཡང་ཡག་པོ་བསྒྲུབ་མི་ཐུབ།

ཁ་སང་གི་གྲུབ་འབྲས་ཀྱིས་མ་འོངས་པར་ནམ་ཡང་རྒྱལ་ཁ་ལོན་ཐུབ་པ་མི་མཚོན་ལ། འདས་པའི་གཟི་བྱིན་གྱིས་མ་འོངས་པར་ནམ་ཡང་གཟི་བྱིན་འབར་བའང་མཚོན་མི་ཐུབ། དུས་རབས་ནི་རྒྱུགས་ལེན་མཁན་དང་། ང་ཚོ་ནི་རྒྱུགས་སྤྲོད་མཁན། མི་དམངས་ནི་རྒྱུགས་བཤེར་མཁན་བཅས་རེད། ཏང་དང་རྒྱལ་ཁབ་ཡར་རྒྱས་གོང་འཕེལ་དང་ཡུན་རིང་བདེ་འཁོད་ཡོང་བ་བྱེད་དགོས་ན། ཏང་ཡོངས་ཀྱི་བློ་མཐུན་རྣམས་ཀྱིས་ངེས་པར་དུ་གསར་བརྗེའི་སྙིང་སྟོབས་དང་གསར་བརྗེའི་འཐབ་སེམས་མཐའ་འཁྱོངས་བྱས་པ་དང་། ང་ཚོའི་ཏང་གིས་མི་དམངས་ཀྱི་འགོ་ཁྲིད་ནས་ལོ་ངོ་97རིང་གི་སྤྱི་ཚོགས་གསར་བརྗེ་རླབས་པོ་ཆེ་མུ་མཐུད་སྐུལ་འདེད་གཏོང་ཕོད་པ་བྱེད་དགོས། རྒྱལ་ཁ་ཐོབ་པའི་དབང་གིས་ང་རྒྱལ་གཏན་ནས་བྱེད་མི་རུང་བ་དང་། གྲུབ་འབྲས་ཐོབ་པའི་དབང་གིས་སྒྱིད་ལུག་གཏན་ནས་བྱེད་མི་རུང་ལ། དཀའ་ངལ་གྱི་དབང་གིས་ཕྱིར་བཤོལ་ཡང་གཏན་ནས་བྱེད་མི་རུང་བར། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་སྔར་བས་སྟོབས་ཆེ་ལ་སྔར་བས་གོ་སྐོན་བློ་འགུག་གི་ནུས་པ་ལྡན་པའི་བདེན་དོན་གྱི་སྟོབས་ཤུགས་མངོན་གང་ཐུབ་བྱེད་དགོས།

ལྷག་པ་ཚེ་རིང་གིས་བསྒྱུར།

※འདི་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་2018ལོའི་ཟླ་དང་པོའི་ཚེས་5ཉིན་ཀྲུང་དབྱང་ཨུ་ཡོན་ལྷན་ཁང་གི་གསར་དུ་ཞུགས་པའི་ཨུ་ཡོན་དང་། རྗེས་སྣོན་ཨུ་ཡོན། ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོ་བཅས་ཀྱིས་ཞི་ཅིན་ཞིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་ལག་བསྟར་བྱེད་པའི་བགྲོ་གླེང་འཛིན་གྲྭའི་ཐོག་གནང་བའི་གསུང་བཤད་ཀྱི་ཆ་ཤས་ཤིག་རེད།