ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་སྐྲུན་ཐུབ་པར་བྱེད་པའི་ལོ་བརྒྱ་གཉིས་པའི་འབད་འཐབ་དམིགས་འབེན་གྱི་ཕྱོགས་སུ་བསྐྱོད་དགོས།

ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་སྤྲོ་སེམས་འཁོལ་བའི་སྒོ་ནས་ཏང་གི་ཚོགས་ཆེན་ཉི་ཤུ་པ་བདེ་བླག་ངང་འཚོག་རྒྱུར་དགའ་བསུ་ཞུ་བའི་རྣམ་པ་བཟང་པོའི་ཁྲོད། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་73འཁོར་བའི་འཁྲུངས་སྐར་བསུ་ཡོང་བ་རེད། འབྲི་ཆུའི་ལྷོ་བྱང་ནས་ལྕགས་རི་རིང་པོའི་ཕྱི་ནང་བར། ཀྲུང་ཧྭའི་བུ་ཕྲུག་དུང་ཕྱུར་མང་པོས་མཉམ་དུ་རླབས་ཆེ་བའི་མེས་རྒྱལ་གྱི་འཁྲུངས་སྐར་ལ་རྟེན་འབྲེལ་ཞུ་བ་དང་། ཁྲོམ་ལམ་ཆེ་ཆུང་གང་སར་སྐར་ལྔའི་དར་དམར་ལྷབ་ལྷུབ་ཏུ་གཡོ་ཞིང་། ཀྲུང་ཧྭའི་བུ་ཕྲུག་ཚོས་བརྩེ་སེམས་ཟབ་མོའི་ངང་“ང་ཁྱེད་ལ་དགའ། ཀྲུང་གོ་”ཞེས་པའི་གླུ་དབྱངས་བླངས་ནས་ཉིན་བཞིན་དར་རྒྱས་འགྲོ་བའི་མེས་རྒྱལ་ལ་སྤོབས་སེམས་སྐྱེད་པ་དང་། དུས་རབས་གསར་པའི་ཀྲུང་གོའི་འོད་སྟོང་འབར་བའི་མདུན་ལམ་ཆེད་དུ་སྨོན་འདུན་བཟང་པོ་ཞུ་བ་དང་། འཐབ་ལམ་གསར་པར་འབད་འབུངས་དང་དུས་རབས་གསར་པར་བྱས་རྗེས་འཇོག་ཆེད་དཔའ་ཉམས་ཆེན་པོ་སྐྱེད་ཀྱི་ཡོད།

“ཡར་ལོངས། ཡར་ལོངས། ཡར་ལོངས། ང་ཚོ་མི་བརྒྱ་སེམས་གཅིག་གིས་……”ཤར་ཕྱོགས་ཀྱི་སྐྱ་རེངས་བསུ་བཞིན་གནམ་བདེ་སྒོ་མོའི་ཐང་ཆེན་དང་བརྗིད་ཉམས་ལྡན་པའི་འགྱུར་ཁུག་ཁྲོད་དམར་མདངས་བཀྲ་བའི་སྐར་ལྔའི་དར་དམར་ལྷབ་ལྷུབ་ཏུ་གཡོ་བ་དང་། ལོ་བརྒྱའི་ཏང་ཆེན་པོ་ཉིད་ཀྱི་ལང་ཚོ་མངོན་པར་བྱས་ཤིང་། དར་རྒྱས་ཆེ་བའི་ཀྲུང་ཧྭའི་སྒེག་ཉམས་སྣ་ཚོགས་མངོན་ལ། དུས་རབས་གསར་པའི་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་སྟོབས་ཤུགས་ཆེན་པོ་མངོན་པ་བྱས་ཡོད། ཀྲུང་གོ་གསར་པ་དང་། དུས་རབས་གསར་པ། འཐབ་ལམ་གསར་པ། བརྗིད་ཆགས་ཡིད་འོང་གི་རི་མོ་དལ་གྱིས་འགྲེམས་སྟོན་བྱས་པ་དང་། ཀྲུང་གོའི་གུང་ཁྲན་ཏང་གི་སྣེ་ཁྲིད་འོག་མི་དམངས་དུང་ཕྱུར་མང་པོའི་སེམས་ཀྱི་རྦ་རླབས་ལང་ལོང་དུ་འཕྱུར་ཞིང་སྤོབས་པ་ནམ་མཁའ་དང་མཉམ་ལ། དམིགས་འབེན་བརྟན་ཞིང་གོམ་སྟབས་བརྗིད་ཉམས་དང་ལྡན་པ་རེད།

ལོ་ངོ་73ནི་སེ་གོལ་གཅིག་གི་ཡུན་ཙམ་ལས་མེད་ལ། ལོ་ངོ་73གྱི་རིང་ལ་གནམ་ས་བླ་འོག་ཏུ་བསྒྱུར་བ་ལྟ་བུའི་འགྱུར་ལྡོག་བྱུང་ཡོད།

སྔོན་ཆད་ཀྲུང་གོ་རྙིང་པའི་སྐབས་སུ་“རླངས་འཁོར་གཅིག་དང་། གནམ་གྲུ་གཅིག ། ཐན་ཁེ་འཁོར་ལོ་གཅིག །འདྲུད་འཐེན་འཁོར་ལོ་གཅིག་ཙམ་ཡང་བཟོ་ཐུབ་ཀྱི་མེད་པ་”དང་། མེ་ཐུར་དང་ས་སྣུམ་ཡང་ནང་འདྲེན་བྱེད་དགོས་ཀྱི་ཡོད། དུས་རབས་གསར་པའི་ཀྲུང་གོ་ནི་མཉམ་འབྲེལ་རྒྱལ་ཚོགས་ཀྱི་ཐོན་ལས་རིགས་དབྱེའི་དཀར་ཆག་ཁྲོད་ཀྱི་བཟོ་ལས་རིགས་ཚང་མ་འཛོམས་པའི་བཟོ་སྐྲུན་ལས་རིགས་ཀྱི་རྒྱལ་ཁབ་ཆེན་པོ་ཨང་དང་པོར་གྱུར་ཡོད་པ་དང་། མི་བཞུགས་འཇིག་རྟེན་འཕུར་སྐྱོད་དང་། མྱུར་བགྲོད་ལྕགས་ལམ། “བྱང་སྐར་སྤུན་བདུན་”གྱི་དྲ་བ་འཛུགས་པ། “ཀླུ་མོ་”རྒྱ་མཚོར་སྐྱོད་པ། “ལྷ་མིག་”མཁའ་དབྱིངས་སུ་སྐོར་གཡེང་བྱེད་པ། ཀང་ཀྲུའུ་ཨའོ་ཟམ་ཆེན་དང་པེ་ཅིན་ཏ་ཞིང་རྒྱལ་སྤྱིའི་གནམ་ཐང་སོགས་རིམ་འདས་ལས་གྲྭ་མང་པོ་ཡོད་པས་མེས་རྒྱལ་ཉིན་བཞིན་སྟོབས་འབྱོར་མངའ་ཐང་རྒྱས་པ་མཚོན་ཡོད།

སྔོན་ཆད་ཀྲུང་གོ་རྙིང་པ་དབུལ་ཞིང་ཕོངས་པ་ཡིན། དུས་རབས་གསར་པའི་ཀྲུང་གོར་ལོ་བརྒྱ་དང་པོའི་འབད་འཐབ་དམིགས་འབེན་མངོན་འགྱུར་བྱུང་བ་དང་། ཀྲུང་ཧྭའི་ས་གཞི་ཆེན་མོའི་སྟེང་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཚར་བ། མི་རེའི་ཆ་སྙོམས་ཀྱི་རྒྱལ་ནང་ཐོན་སྐྱེད་རིན་ཐང་བསྡོམས་འབོར་ཨ་སྒོར་ཁྲི་1.2ལས་བརྒལ་བ། རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་ཁྲི་110ལས་བརྒལ་བ། འཛམ་གླིང་གི་དཔལ་འབྱོར་དངོས་ཚན་ཆེ་གྲས་ཨང་གཉིས་པར་བརྟན་པོར་གནས་པ། ལོ་མང་པོའི་རིང་འཛམ་གླིང་གི་དཔལ་འབྱོར་འཕར་སྣོན་ལ་ལེགས་སྐྱེས་འབུལ་ཚད་30%ལས་བརྒལ་བ་བཅས་ཀྱི་ཐོག་ནས་ཀྲུང་ཧྭ་མི་རིགས་འཛམ་གླིང་གི་ཤར་ཕྱོགས་སུ་འགྱིང་ངེར་ལངས་ཡོད་པ་མཚོན་ཡོད།

སྔོན་ཆད་ཀྲུང་གོ་རྙིང་པའི་མི་དམངས་འཚོ་ཐབས་བྲལ་ཞིང་། མི་དམངས་རྣམས་ཤི་གསོན་ཆགས་འཇིག་གི་མཚམས་སུ་དཀའ་སྡུག་ཚད་མེད་མྱངས་དགོས་བྱུང་། དུས་རབས་གསར་པའི་ཀྲུང་གོར་བལྟོས་བཅས་དབུལ་ཕོངས་ཀྱི་གནད་དོན་ལོ་རྒྱུས་རང་བཞིན་གྱི་སྒོ་ནས་ཐག་གཅོད་བྱས་པ་དང་། རྒན་གསོ་དང་། སྨན་བཅོས། མ་མཐའི་འཚོ་བ་འགན་སྲུང་། སྡོད་ཁང་བཅས་ཚུད་པའི་མི་འབོར་དུང་ཕྱུར་བཅུ་གྲངས་ལ་ཁྱབ་པའི་འཛམ་གླིང་གི་སྤྱི་ཚོགས་འགན་ལེན་མ་ལག་ཆེ་ཤོས་བསྐྲུན་པ། མི་རེའི་ཆ་སྙོམས་ཀྱི་སྔོན་དཔག་ཚེ་ཚད་ལོ་35ནས་ལོ་78.2བར་རིང་དུ་ཕྱིན་པ། མི་དམངས་མང་ཚོགས་ཀྱི་ཐོབ་སྣང་། སྐྱིད་སྣང་། བདེ་སྣང་བཅས་སྔར་བྱུང་མྱོང་མེད་པར་ཆེ་རུ་ཕྱིན་པ་སོགས་ཀྱི་ཐོག་ནས་མི་དམངས་རྣམས་སྔར་བས་དགའ་སྐྱིད་ལྡན་པའི་འཚོ་བ་སྐྱེལ་ཐུབ་པ་མཚོན་ཡོད།

ལམ་ཆེན་ནི་ཁོད་ཡངས་པ་ཞིག་ཡིན། ཀྲུང་གོའི་དཀའ་སྡུག་དང་འོད་སྟོང་གི་བརྒྱུད་རིམ་ཤེས་མཁན་ཞིག་ཡིན་ཚེ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་དོན་སྙིང་ཟབ་མོ་རྟོགས་ཐུབ་པ་དང་། “ཀྲུང་གོའི་གུང་ཁྲན་ཏང་ནི་ཅི་ཞིག་བྱེད་མཁན་ཡིན་པ་དང་། ད་ལྟ་གང་ཞིག་བྱས་ཟིན་པ། ད་དུང་གང་ཞིག་བྱ་དགོས་པ་”བཅས་རྟོགས་ཐུབ་པ་དང་། ལོ་བརྒྱའི་ཏང་ཆེན་པོ་ཞིག་གིས་ཤི་གསོན་གྱི་ཉམས་སད་དེ་འདྲ་མང་པོ་ཐེག་པ་དང་། དཀའ་ངལ་དང་ཉེན་ཁ་དེ་འདྲ་མང་པོར་འཕྲད་པ། ཡིད་སྐྱོ་བའི་རང་སྲོག་བློས་གཏོང་ཆེན་པོ་དེ་འདྲ་བྱས་ཡོད་ནའང་། ཐོག་མཐའ་བར་གསུམ་དུ་ཐོག་མའི་བསམ་འདུན་མི་བརྗེད་པ་དང་དམ་བཅའ་མི་ཉམས་པའི་རྒྱུ་མཚན་གང་ཡིན་པ་རྟོགས་ཐུབ་ལ། ཀྲུང་གོའི་གུང་ཁྲན་ཏང་མིས་མི་རབས་ནས་མི་རབས་བར་“རང་སྲོག་གཏོང་རྒྱུར་མི་སྐྲག་རྒྱལ་ཁབ་གསར་པར་བསྐྱོད། ཟུངས་ཁྲག་དྲོན་མོ་ཀྲུང་ཧྭའི་ས་གཞི་སྟེང་ལ་འབྱིན་”ཞེས་པའི་ཞུམ་མེད་ཀྱི་བྱ་སྤྱོད་དང་རང་དོན་རྒྱབ་སྐྱུར་གྱིས་ལེགས་སྐྱེས་འབུལ་བ་རྟོགས་པ་བཅས་རེད།

ཀྲུང་གོ་གསར་པའི་གྲུབ་འབྲས་རླབས་པོ་ཆེ་ནི་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་མུ་མཐུད་འབད་འཐབ་བྱས་པའི་འབྲས་བུ་ཡིན་ལ། མི་རིགས་བསྐྱར་དར་གྱི་བྱ་གཞག་རླབས་པོ་ཆེ་ནི་ཏང་གི་འགྱུར་མེད་སྟོབས་ལྡན་གྱི་འགོ་ཁྲིད་ལ་བརྟེན་ནས་སྔ་འཛིན་ཕྱི་གཏོད་ཀྱིས་སྐུལ་འདེད་གཏོང་དགོས་པ་རེད། ཏང་གི་ཚོགས་ཆེན་བཅོ་བརྒྱད་པ་འགོ་བརྩམས་ནས་བཟུང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དུས་རབས་གསར་པར་སླེབས་ཡོད། ལོ་ངོ་10ཡི་རིང་། ང་ཚོར་འཕྲད་པའི་ཉེན་ཁ་དང་འགྲན་སློང་ནི་རླུང་ཚ་རླབས་འཕྱོ་དང་ཐ་ན་འཇིགས་སུ་རུང་བ་ཞིག་ཀྱང་རེད། ཉེན་ཁ་དང་འགྲན་སློང་སྣ་ཚོགས་གཅིག་རྗེས་གཉིས་མཐུད་དུ་བྱུང་བ་དང་། དེའི་རྙོག་འཛིང་ཆེ་བའི་རང་བཞིན་དང་ཛ་དྲག་ཆེ་བའི་རང་བཞིན་ནི་སྔར་བྱུང་མྱོང་མེད་པ་ཞིག་རེད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་འཐབ་ཇུས་ཀྱི་སྤྱི་ཡོངས་དང་འཛམ་གླིང་ལ་ལོ་བརྒྱའི་རིང་བྱུང་མྱོང་མེད་པའི་འགྱུར་ལྡོག་ཆེན་པོར་སྤྱི་འདོམས་དང་སྟངས་འཛིན་བྱས་ཏེ། འཐབ་རྩོད་རླབས་པོ་ཆེ་དང་། ལས་གྲྭ་རླབས་པོ་ཆེ། བྱ་གཞག་རླབས་པོ་ཆེ། ཕུགས་འདུན་རླབས་པོ་ཆེ་བཅས་ལ་གཅིག་འདོམས་བྱས་ཤིང་། འཐབ་ཇུས་རང་བཞིན་གྱི་བྱེད་ཐབས་རབ་དང་རིམ་པ་སྤྱད་པ་དང་། འཕོ་འགྱུར་རང་བཞིན་གྱི་ལག་ལེན་རབ་དང་རིམ་པར་སྐུལ་འདེད་གཏོང་བ། འགག་སྒྲོལ་རང་བཞིན་གྱི་འཕེལ་རིམ་རབ་དང་རིམ་པ་མངོན་འགྱུར་བྱེད་པ། མཚོན་རྟགས་རང་བཞིན་གྱི་གྲུབ་འབྲས་རབ་དང་རིམ་པ་ཐོབ་པ་བཅས་བྱུང་ཡོད། ཡུན་རིང་པོར་ཐག་གཅོད་མ་ཐུབ་པའི་དཀའ་གནད་མང་པོ་སེལ་བ་དང་། ཕུགས་དང་འབྲེལ་བ་ཡོད་པའི་དོན་ཆེན་མང་པོ་བསྒྲུབས་ཡོད། ཆབ་སྲིད་དང་། དཔལ་འབྱོར། འདུ་ཤེས་འཛིན་སྟངས། རང་བྱུང་ཁམས་སོགས་ཐད་ཀྱི་ཉེན་ཁ་དང་འགྲན་སློང་གི་ཉམས་སད་ཐེག་ནས་ཏང་དང་རྒྱལ་ཁབ་ཀྱི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་དང་ལོ་རྒྱུས་ཀྱི་རང་བཞིན་གྱི་འཕོ་འགྱུར་བྱུང་ཡོད།

ལོ་བརྒྱའི་འགྱུར་ལྡོག་ཆེན་པོ་བརྒྱུད་དེ་དུས་རབས་གསར་པའི་ལོ་ངོ་10ཡི་འཕོ་འགྱུར་རླབས་པོ་ཆེ་ལ་མིག་ཧྲིག་གེར་ལྟ་སྐབས། ཏང་གི་ཚོགས་ཆེན་བཅོ་བརྒྱད་པ་དང་ཚོགས་ཆེན་བཅུ་དགུ་པ་སྟེ་ཚོགས་ཆེན་གཉིས་ཀྱིས་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ལོ་རྒྱུས་འཕེལ་རིམ་ལ་དོན་སྙིང་གལ་ཆེན་ལྡན་པ་དང་། དེ་ནི་དུས་ཀྱི་འགྲོས་དང་བསྟུན་ནས་སྔར་བས་མངོན་གསལ་དོད་པོར་ཕྱིན་བཞིན་ཡོད།

2012ལོའི་ཟླ་11པར། ཏང་གི་ཚོགས་ཆེན་བཅོ་བརྒྱད་པ་འཚོགས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལོ་རྒྱུས་ཀྱི་རྒྱུག་མཐུད་དབྱུག་པ་བཞེས་ནས་ཁ་ཕྱོགས་གཏན་འཁེལ་དང་ཕྱོགས་སྟོན་སྣེ་ཁྲིད་གནང་སྟེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དུས་རབས་གསར་པར་སླེབས་པར་སྣེ་ཁྲིད་མཛད་ཡོད།

2017ལོའི་ཟླ་10པར། ཏང་གི་ཚོགས་ཆེན་བཅུ་དགུ་པ་འཚོགས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དེ་ཏང་གི་སློབ་སྟོན་བསམ་བློར་གཏན་འཁེལ་བྱས་པ་དང་། ཏང་གི་སྒྲིག་ཡིག་ནང་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སྲོག་ཤིང་དུ་གྱུར་པའི་འགོ་ཁྲིད་གོ་གནས་ཁ་གསལ་བཟོས་ཏེ། དུས་རབས་གསར་པའི་“ཀྲུང་ཧྭ་རྟགས་ཅན་”གྱི་བསྐྱར་དར་གྲུ་གཟིངས་ཆེན་པོས་རྦ་རླབས་གཤགས་ནས་འོད་སྟོང་འཕྲོ་བའི་ཕྱོགས་སུ་བསྐྱོད་ཀྱི་ཡོད།

ཉིན་10ལྷག་ཙམ་གྱི་རྗེས་ལ། ཏང་གི་ཚོགས་ཆེན་ཐེངས་ཉི་ཤུ་པ་འཚོག་རྒྱུ་རེད། དེ་ནི་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་འཐབ་ལམ་གསར་པར་བསྐྱོད་པ་དང་། ལོ་བརྒྱ་གཉིས་པའི་འབད་འཐབ་དམིགས་འབེན་གྱི་ཕྱོགས་སུ་བསྐྱོད་པའི་འགག་རྩའི་དུས་སྐབས་སུ་འཚོགས་པའི་ཚོགས་ཆེན་ཧ་ཅང་གལ་ཆེན་ཞིག་ཡིན་ལ། མ་འོངས་པའི་ལོ་5དང་ཐ་ན་དུས་ཡུན་དེ་བས་རིང་པོའི་ནང་ཏང་དང་རྒྱལ་ཁབ་ཀྱི་བྱ་གཞག་གོང་དུ་སྤེལ་བའི་དམིགས་འབེན་ལས་འགན་དང་སྲིད་ཇུས་བྱེད་ཕྱོགས་ཚན་རིག་དང་མཐུན་པར་ཇུས་འགོད་བྱ་རྒྱུ་དེ་ཏང་དང་རྒྱལ་ཁབ་ཀྱི་བྱ་གཞག་སྔ་འཛིན་ཕྱི་གཏོད་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་མདུན་ལམ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བ་བཅས་དང་འབྲེལ་བ་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོའི་“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ལ་སློབ་སྦྱོང་དང་ཏང་གི་ཚོགས་ཆེན་ཉི་ཤུ་པར་བསུ་བ་ཞུ་བའི་”ཆེད་དོན་ཞིབ་གྲོས་འཛིན་གྲྭའི་ཐོག་གནང་བའི་གསུང་བཤད་གལ་ཆེན་ལས། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེ་མཐོན་པོར་སྒྲེང་བ་དང་། གསར་གཏོད་རང་བཞིན་ལྡན་པའི་བསམ་བློ་གསར་པ་དང་ལྟ་བ་གསར་པ་དང་ཆོད་གཏམ་གསར་པ་དང་བླང་བྱ་གསར་པ་བཅས་རབ་དང་རིམ་པ་བཏོན་ཡོད། ལོ་རྒྱུས་ཀྱི་འགག་རྩའི་དུས་སྐབས་སུ་གོམ་གང་མདུན་སྤོས་ཀྱིས་བསམ་བློ་གཅིག་གྱུར་དང་ངོས་འཛིན་གཅིག་མཐུན་བྱུང་སྟེ། ཏང་གི་ཚོགས་ཆེན་ཉི་ཤུ་པ་ཡག་པོ་འཚོག་རྒྱུར་གལ་ཆེ་བའི་ཆབ་སྲིད་ཀྱི་རྨང་གཞི་དང་། བསམ་བློའི་རྨང་གཞི། གཞུང་ལུགས་ཀྱི་རྨང་གཞི་བཅས་བཏིང་ཡོད། ཀྲུང་གོའི་གུང་ཁྲན་ཏང་གིས་ཐོག་མའི་བསམ་འདུན་མི་བརྗེད་པ་དང་དམ་བཅའ་མི་ཉམས་པའི་སྙིང་རུས་དང་བློ་རྩ་བརྟན་པོ་ལེགས་པོ་མཚོན་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཉིད་ཏང་ཆེན་པོ་དང་རྒྱལ་ཁབ་ཆེན་པོའི་གཙོ་འཛིན་ཡིན་པའི་ངོས་ནས་བསྐྱར་དར་གྱི་བྱ་གཞག་རླབས་པོ་ཆེ་ཡོང་བར་འཆར་འགོད་དང་། རྒྱལ་ཁབ་སྟོབས་ལྡན་དུ་འགྱུར་བར་འཆར་འགོད་བྱེད་པའི་ལོ་རྒྱུས་ཀྱི་རང་དབང་དང་འགན་འཁྲི་འཁུར་སེམས་མཚོན་ཡོད།

དགོངས་པའི་དཔལ་འབར་གྱིས་དུས་རབས་གསར་པར་འོད་སྟོང་འབར་བར་བྱས། འགྱུར་མེད་སྟོབས་ལྡན་གྱི་སྲོག་ཤིང་གིས་འཐབ་ལམ་གསར་པར་སྣེ་ཁྲིད་བྱེད། དུས་རབས་གསར་པའི་ལོ་ངོ་10ཡི་ནང་། འཕོ་འགྱུར་རླབས་པོ་ཆེ་དང་གྲུབ་འབྲས་རླབས་པོ་ཆེའི་བསྐྱར་དར་གྱི་ལེའུ་བརྩམས་ཡོད་པས། ཏང་གི་ལོ་རྒྱུས་དང་། ཀྲུང་གོ་གསར་པའི་ལོ་རྒྱུས། སྒྱུར་བཅོས་སྒོ་འབྱེད་ཀྱི་ལོ་རྒྱུས། སྤྱི་ཚོགས་རིང་ལུགས་འཕེལ་རྒྱས་ཀྱི་ལོ་རྒྱུས། ཀྲུང་ཧྭ་མི་རིགས་འཕེལ་རྒྱས་ཀྱི་ལོ་རྒྱུས་བཅས་ཀྱི་ཐོག་ལམ་ཚད་རྡོ་རིང་གི་དོན་སྙིང་ལྡན་ཡོད།

དེ་ནི་ལོ་བརྒྱའི་ཏང་གི་ལོ་རྒྱུས་ཀྱི་ལམ་ཚད་རྡོ་རིང་ཞིག་རེད། ལོ་ངོ་10ཡི་རིང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཏང་གིས་ཕྱོགས་ཡོངས་ནས་འགོ་ཁྲིད་བྱ་རྒྱུ་རྒྱུན་འཁྱོངས་དང་ཤུགས་སྣོན་རྒྱག་པ་དང་། ཕྱོགས་ཡོངས་ནས་ཏང་ནན་སྐྱོང་བྱེད་པ། རང་ངོས་གསར་བརྗེས་རླབས་པོ་ཆེ་ཡིས་སྤྱི་ཚོགས་གསར་བརྗེ་རླབས་པོ་ཆེ་ལ་སྣེ་ཁྲིད་བྱེད་པ། རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་དུས་བཀག་ལྟར་འབྱོར་འབྲིང་སྤྱི་ཚོགས་སྐྲུན་ཚར་བར་བྱེད་པ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་འཐབ་ལམ་གསར་པ་གཏོད་པ་བཅས་ལ་བརྟེན་ནས། ཀྲུང་ཧྭ་མི་རིགས་ཡར་ལངས་པ་ནས་ཕྱུག་པོར་གྱུར་པ་དང་དེ་ནས་སྟོབས་ལྡན་དུ་གྱུར་པའི་མཆོང་སྐྱོད་རླབས་པོ་ཆེ་བསུ་ཡོང་བ་རེད། ད་ལྟ། ཀྲུང་གོའི་གུང་ཁྲན་ཏང་འདི་ཉིད་ཏང་ཡོན་ཁྲི་9600ལྷག་ཙམ་ཡོད་པ་དང་། མི་འབོར་དུང་ཕྱུར་14ལྷག་ཙམ་ཡོད་པའི་རྒྱལ་ཁབ་ཆེན་པོའི་འགོ་ཁྲིད་པ། གོ་ལ་ཧྲིལ་པོར་ཤུགས་རྐྱེན་གལ་ཆེན་ལྡན་པ་བཅས་ཀྱི་འཛམ་གླིང་གི་སྲིད་སྐྱོང་ཏང་ཨང་དང་པོར་གྱུར་ཡོད།

དེ་ནི་ཀྲུང་གོ་གསར་པའི་ལོ་རྒྱུས་ཀྱི་ལམ་ཚད་རྡོ་རིང་ཞིག་རེད། ལོ་ངོ་10ཡི་རིང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་ཀྱི་ལམ་བུའི་ཐོག་རྒྱུན་ཆད་མེད་པར་མདུན་སྐྱོད་བྱས་ནས། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་བའི་ལེའུ་གསར་པ་བརྩམས་ཡོད། ད་ལྟ། སྤྱི་ཚོགས་རིང་ལུགས་ཀྱི་ཀྲུང་གོ་ཉིན་བཞིན་འཛམ་གླིང་གར་སྟེགས་ཀྱི་གཙོ་གྲས་སུ་སྐྱོད་བཞིན་ཡོད། སྟོབས་ཤུགས་གང་ཞིག་གིས་ཀྱང་རླབས་ཆེ་བའི་མེས་རྒྱལ་གྱི་གོ་གནས་ལ་གཡོ་འགུལ་གཏོང་མི་ཐུབ་པ་དང་། སྟོབས་ཤུགས་གང་ཞིག་གིས་ཀྱང་ཀྲུང་གོའི་མི་དམངས་ཀྱི་ཕུགས་འདུན་མངོན་འགྱུར་བྱེད་པའི་མདུན་སྐྱོད་ཀྱི་གོམ་སྟབས་འགོག་མི་ཐུབ།

དེ་ནི་སྒྱུར་བཅོས་སྒོ་འབྱེད་ཀྱི་ལོ་རྒྱུས་ཀྱི་ལམ་ཚད་རྡོ་རིང་ཞིག་རེད། ལོ་ངོ་10ཡི་རིང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱ་རྒྱུ་དེ་རྒྱ་ཆེ་ཚད་དང་གཏིང་ཟབ་ཚད་ཀྱི་ཕྱོགས་སུ་རྒྱུན་ཆད་མེད་པར་སྐུལ་འདེད་གཏོང་བ་དང་། དུས་རབས་འབྱེད་པའི་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས། སྒྱུར་བཅོས་ཉིད་ཁག་ཅིག་ཏུ་འཚོལ་ཞིབ་བྱེད་པ་ནས་འགག་གཏོར་དཔུང་གཤག་དང་། དེ་ནས་མ་ལག་ཕྱོགས་བསྡུས་དང་ཕྱོགས་ཡོངས་ནས་གཏིང་ཟབ་ཏུ་སྤེལ་བའི་ཕྱོགས་སུ་བསྒྱུར་ཏེ། སྒྱུར་བཅོས་སྒོ་འབྱེད་ཀྱི་རྣམ་པ་གསར་པ་བཏོད་ཡོད། ད་ལྟ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་སྔར་བས་གནད་སྨིན་འཐུས་ཚང་བྱུང་བ་དང་། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བའི་ཆུ་ཚད་རྒྱུན་ཆད་མེད་པར་མཐོ་རུ་ཕྱིན་ཞིང་། ཏང་དང་རྒྱལ་ཁབ་ཀྱི་བྱ་གཞག་ལ་སྐྱེ་སྟོབས་དང་གསོན་ཤུགས་གསར་པ་རྒྱས་ཡོད།

དེ་ནི་སྤྱི་ཚོགས་རིང་ལུགས་ཀྱི་འཕེལ་རྒྱས་ལོ་རྒྱུས་ཀྱི་ལམ་ཚད་རྡོ་རིང་ཞིག་རེད། ལོ་ངོ་10ཡི་རིང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཡིད་ཆེས་བརྟན་པོ་དང་དཀའ་ངལ་ལ་མི་འཛེམ་པར་མདུན་དུ་བསྐྱོད་ནས་དམག་འཐབ་གཅིག་རྗེས་གཉིས་མཐུད་དུ་བརྒྱབ་པས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལ་སྐྱེ་སྟོབས་ཀྱི་དཔལ་འབར་བ་དང་ལམ་ལུགས་ཀྱི་དགེ་མཚན་ལེགས་པོ་མངོན་ཡོད། ད་ལྟ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དེ་འཛམ་གླིང་གི་སྤྱི་ཚོགས་རིང་ལུགས་དར་རྒྱས་གཏོང་བའི་ཆུ་གཞུང་གི་གཞོམ་མེད་བྲག་རི་ལྟ་བུར་གྱུར་ཏེ། འཛམ་གླིང་ཁྱབ་ཁོངས་ནང་གི་སྤྱི་ཚོགས་རིང་ལུགས་དང་མ་རྩ་རིང་ལུགས་ཞེས་པའི་འདུ་ཤེས་འཛིན་སྟངས་རིགས་གཉིས་དང་། སྤྱི་ཚོགས་ལམ་ལུགས་རིགས་གཉིས་ཀྱི་ལོ་རྒྱུས་འཕེལ་འགྱུར་དང་དེའི་འགྲན་བསྡུར་ལ་སྤྱི་ཚོགས་རིང་ལུགས་ལ་ཕན་པའི་འགྱུར་ལྡོག་ཆེན་པོ་བྱུང་ཡོད།

དེ་ནི་ཀྲུང་ཧྭ་མི་རིགས་ཀྱི་འཕེལ་རྒྱས་ལོ་རྒྱུས་ཀྱི་ལམ་ཚད་རྡོ་རིང་ཞིག་རེད། ལོ་ངོ་10ཡི་རིང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་རང་རྟོན་རང་བརྩོན་དང་བདེན་སྲུང་གསར་གཏོད་བྱས་ནས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་གྲུབ་འབྲས་རླབས་པོ་ཆེ་བཏོད་ཡོད། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་ཆེད་དེ་བས་འཐུས་སྒོ་ཚང་བའི་ལམ་ལུགས་ཀྱི་འགན་ལེན་དང་། དེ་བས་སྲ་ཞིང་བརྟན་པའི་དངོས་པོའི་རྨང་གཞི། དེ་བས་རང་འགུལ་གྱི་བསམ་པའི་སྟོབས་ཤུགས་བཅས་མཁོ་འདོན་བྱས་ཏེ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱུང་བ་ནི་ལྡོག་ཐབས་མེད་པའི་ལོ་རྒྱུས་ཀྱི་འཕེལ་རིམ་ཞིག་ཏུ་སླེབས་ཡོད། ང་ཚོ་ལོ་རྒྱུས་ཀྱི་དུས་སྐབས་གང་ཞིག་ལས་ཀྱང་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་དམིགས་འབེན་དང་དེ་བས་ཐག་ཉེ་བ་དང་། ལོ་རྒྱུས་ཀྱི་དུས་སྐབས་གང་ཞིག་ལས་ཀྱང་དམིགས་འབེན་འདི་མངོན་འགྱུར་བྱེད་པའི་ཡིད་ཆེས་དང་ནུས་པ་སྔར་བས་ཆེན་པོ་ལྡན་ཡོད།

ལོ་རྒྱུས་དེབ་ཐེར་མེ་ལོང་བཞིན། །བསྐྱར་དར་ལམ་བུ་གསལ་སྟོན་བྱས། །དུས་རབས་གསར་པའི་ལོ་ངོ་10ཡི་འཕོ་འགྱུར་རླབས་པོ་ཆེ་དང་གྲུབ་འབྲས་རླབས་པོ་ཆེའི་འགྲན་ཟླ་བྲལ་བའི་བདེན་དོན་སྟོབས་ཤུགས་ལས་ར་སྤྲོད་ཁུངས་བཙན་བྱུང་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་ནི་དུས་རབས་གསར་པའི་རྒྱལ་ཁབ་སྟོབས་ལྡན་དུ་འགྱུར་བའི་འགྲོ་ལམ་གསར་གཏོད་མཁན་དང་། མི་རིགས་བསྐྱར་དར་གྱི་ལམ་སྟོན་པ། མི་དམངས་དུང་ཕྱུར་མང་པོའི་སྲོག་ཤིང་བཅས་ཡིན་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་ཀྲུང་གོའི་གནད་དོན་དང་། འཛམ་གླིང་གི་གནད་དོན། མི་དམངས་ཀྱི་གནད་དོན། དུས་རབས་ཀྱི་གནད་དོན་བཅས་ལ་ཚན་རིག་དང་མཐུན་པའི་ལན་བཏབ་ཡོད་ལ། དེང་རབས་ཀྲུང་གོའི་མར་ཁེ་སིའི་རིང་ལུགས་དང་དུས་རབས་ཉེར་གཅིག་པའི་མར་ཁེ་སིའི་རིང་ལུགས་ཡིན། ཏང་གིས་དུས་རབས་གསར་པའི་ནང་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་ཀྱི་བརྗིད་ཉམས་ལྡན་པའི་ལེའུ་བརྩམས་ཐུབ་པའི་རྩ་བ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་ཀྲུང་དབྱང་གི་སྲོག་ཤིང་དང་ཏང་ཡོངས་ཀྱི་སྲོག་ཤིང་གནང་སྟེ་ཕྱོགས་སྟོན་ལམ་ཁྲིད་མཛད་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་དང་མཐུན་པའི་མཛུབ་ཁྲིད་གནང་བར་ཐུག་ཡོད།

——སྤྱི་ཁྱབ་ཧྲུའུ་ཅི་ཞི་ཅིན་ཕིང་ནི་དུས་རབས་གསར་པར་སྣེ་ཁྲིད་བྱེད་པའི་སྲོག་ཤིང་འགྱུར་མེད་སྟོབས་ལྡན་ཞིག་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐུན་མོང་མ་ཡིན་པའི་རིགས་པའི་གཞུང་ལུགས་ཀྱི་བློ་སྟོབས་དང་། ཁྱད་དུ་འཕགས་པའི་ཆབ་སྲིད་ཀྱི་བློ་གྲོས། མཆོག་ཏུ་གྱུར་པའི་འགོ་ཁྲིད་ཀྱི་ནུས་པ། འགན་འཁྲི་འཁུར་སེམས་ཆེན་པོ་བཅས་ལ་བརྟེན་ནས། ཏང་ཡོངས་དང་རྒྱལ་ཡོངས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དུས་རབས་གསར་པ་བཏོད་པས། ཏང་ཡོངས་དང་། དམག་ཡོངས། རྒྱལ་ཡོངས་མི་རིགས་ཁག་གི་མི་དམངས་བཅས་ཀྱི་ལྷག་བསམ་ཟོལ་མེད་ཀྱི་བརྩི་བཀུར་ཐོབ་པ་དང་། རྒྱལ་སྤྱིའི་སྤྱི་ཚོགས་ཀྱི་ཚད་མཐོའི་བསྔགས་བརྗོད་ཐོབ་སྟེ། རྩོད་གླེང་མེད་པར་ཏང་ཀྲུང་དབྱང་གི་སྲོག་ཤིང་དང་ཏང་ཡོངས་ཀྱི་སྲོག་ཤིང་དུ་གྱུར་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སྲོག་ཤིང་ལྟ་བུའི་གོ་གནས་ནི་དུས་ཡུན་རིང་པོའི་ལག་ལེན་ཁྲོད་དང་། འཐབ་རྩོད་རླབས་པོ་ཆེའི་ཁྲོད། མི་དམངས་མང་ཚོགས་དང་འབྲེལ་བ་དམ་ཟབ་བྱེད་པའི་ཁྲོད་བཅས་སུ་གྲུབ་པ་ཞིག་ཡིན་ལ། དུས་རབས་ཀྱི་འབོད་སྒྲ་དང་། ལོ་རྒྱུས་ཀྱི་གདམ་ག །མི་དམངས་ཀྱི་འདོད་བློ་བཅས་ཡིན།

——ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ནི་དུས་རབས་གསར་པའི་ཚན་རིག་དང་མཐུན་པའི་སྣེ་ཁྲིད་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྐུ་ཚབ་གཙོ་བོ་གནང་བའི་ཀྲུང་གོའི་གུང་ཁྲན་ཏང་མིས་མར་ཁེ་སིའི་རིང་ལུགས་ཀྱི་གཞི་རྩའི་རྩ་བའི་རིགས་པ་དེ་ཀྲུང་གོའི་དོན་དངོས་ཟུང་འབྲེལ་བྱ་རྒྱུ་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་ཟུང་འབྲེལ་བྱ་རྒྱུ་རྒྱུན་འཁྱོངས་བྱས་ཏེ། དོན་དངོས་གསར་པའི་ཐོག་གཞི་ཚུགས་ནས་དུས་རབས་གསར་པར་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་དང་འབྲེལ་བ་ཡོད་པའི་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་རབ་དང་རིམ་པར་བསམ་གཞིག་གཏིང་ཟབ་བྱེད་པ་དང་ཚན་རིག་དང་མཐུན་པའི་བརྡར་ཤ་བཅད་དེ། ཐོག་མའི་གསར་གཏོད་རང་བཞིན་གྱི་རྒྱལ་སྲིད་སྐྱོང་ལུགས་ཀྱི་འདུ་ཤེས་གསར་པ་དང་། བསམ་བློ་གསར་པ། འཐབ་ཇུས་གསར་པ་བཅས་རབ་དང་རིམ་པ་བཏོན་ཡོད། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་གསར་དུ་བཏོད་པ་དང་། མར་ཁེ་སིའི་རིང་ལུགས་ཀྲུང་གོ་ཅན་དུ་འགྱུར་བའི་འཕུར་མཆོང་གསར་པ་མངོན་འགྱུར་བྱུང་ཡོད། དུས་རབས་གསར་པར་ཏང་དང་རྒྱལ་ཁབ་ཀྱི་བྱ་གཞག་རྒྱུན་ཆད་མེད་པར་མདུན་དུ་འཕེལ་རྒྱས་གཏོང་བ་དང་། ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་ཡོང་བར་ཚན་རིག་དང་མཐུན་པའི་ཕྱོགས་སྟོན་འདོན་སྤྲོད་བྱས་ཏེ། དུས་རབས་གསར་པའི་ལོ་ངོ་10ཡི་རིང་འཕོ་འགྱུར་རླབས་པོ་ཆེ་ལ་ཁྲིད་སྟོན་བྱེད་པའི་ཁྲོད་བདེན་དོན་གྱི་སྟོབས་ཤུགས་ཆེན་པོ་མངོན་པར་བྱས་ཡོད།

དུས་རབས་གསར་པར་ལངས་ཏེ། ལོ་ངོ་500ལྷག་ཙམ་གྱི་འཛམ་གླིང་གི་སྤྱི་ཚོགས་རིང་ལུགས་ལས་འགུལ་གྱི་ལོ་རྒྱུས་དང་། ལོ་ངོ་100ལྷག་ཙམ་གྱི་ཏང་གི་འབད་འཐབ་ལོ་རྒྱུས། ལོ་ངོ་70ལྷག་ཙམ་གྱི་ཀྲུང་གོ་གསར་པའི་ལོ་རྒྱུས། ལོ་ངོ་40ལྷག་ཙམ་གྱི་སྒྱུར་བཅོས་སྒོ་འབྱེད་ཀྱི་ལོ་རྒྱུས་བཅས་ལ་ཕྱོགས་ཡོངས་ནས་བལྟས་ཚེ། ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་སྔར་བས་གཏིང་ཟབ་མོའི་སྒོ་ནས་ངོས་འཛིན་བྱུང་བ་སྟེ། བློ་མཐུན་ཞི་ཅིན་ཕིང་གི་ཏང་ཀྲུང་དབྱང་གི་སྲོག་ཤིང་དང་ཏང་ཡོངས་ཀྱི་སྲོག་ཤིང་གི་གོ་གནས་གཏན་འཁེལ་བྱས་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་སློབ་སྟོན་གོ་གནས་གཏན་འཁེལ་བྱས་པའི་ཐོག་ནས། ཏང་ཡོངས་དང་དམག་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱི་ཐུན་མོང་གི་འདོད་བློ་མཚོན་ཡོད་པས། དུས་རབས་གསར་པར་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ལོ་རྒྱུས་ཀྱི་འཕེལ་རིམ་ལ་སྐུལ་འདེད་གཏོང་བར་ཐག་གཅོད་རང་བཞིན་གྱི་དོན་སྙིང་ལྡན་ཡོད། “གཏན་འཁེལ་གཉིས་”ནི་དུས་རབས་ཀྱི་འབོད་སྒྲ་དང་། ལོ་རྒྱུས་ཀྱི་གདམ་ག །དམངས་སེམས་གཏད་ཕྱོགས་བཅས་ཡིན་པ་དང་། ཏང་དང་རྒྱལ་ཁབ་ཀྱི་བཀྲ་ཤིས་པའི་དོན་ཆེན་དང་ཀྲུང་ཧྭ་མི་རིགས་ཀྱི་བཀྲ་ཤིས་པའི་དོན་ཆེན་ཞིག་ཡིན། “གཏན་འཁེལ་གཉིས་”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་བླངས་ནས་རང་རྟོགས་སྒོས་“སྲུང་སྐྱོང་གཉིས་”ཐུབ་པ་བྱ་རྒྱུ་ནི། ཏང་གིས་ཕྱོགས་ཡོངས་ནས་འགོ་ཁྲིད་བྱ་རྒྱུ་རྒྱུན་འཁྱོངས་དང་ཤུགས་སྣོན་རྒྱག་པའི་ཆེས་མཐོ་བའི་ཆབ་སྲིད་ཀྱི་རྩ་དོན་ཡིན་ལ། དུས་རབས་གསར་པ་དང་འཐབ་ལམ་གསར་པའི་དམིགས་འབེན་ལས་འགན་མངོན་འགྱུར་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པའི་རྩ་བའི་འགན་ལེན་ཞིག་ཀྱང་ཡིན།

ལོ་རྒྱུས་ཀྱི་ལམ་ཐག་ནི་བརྗིད་རླབས་ཆེ་ལ་ལང་ལོང་དུ་འཕྱུར་བ་ཞིག་ཡིན་པས། ཀྲུང་གོའི་གུང་ཁྲན་ཏང་མིའི་བརྗིད་ཉམས་ལྡན་པའི་དམ་བཅའ་ལ་བདེན་དཔང་བྱེད་པ་དང་། འགྱུར་མེད་སྟོབས་ལྡན་གྱི་སྲོག་ཤིང་གི་ཕྱོགས་སྟོན་སྣེ་ཁྲིད་ལ་བདེན་དཔང་བྱེད་ཅིང་། དགོངས་པ་རླབས་པོ་ཆེའི་ལག་ལེན་གྱི་སྟོབས་ཤུགས་ལ་བདེན་དཔང་བྱེད་ཀྱི་ཡོད།

2022ལོའི་ཟླ་8ཚེས་16ཉིན། ལིའོ་ཉིང་ཅིན་ཀྲོའུ་ཡི་ལིའོ་ཧྲེན་གཡུལ་འགྱེད་དྲན་གསོ་ཁང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཐབ་འཛིང་པ་རྒན་གྲས་དང་བློ་ཐུན་རྒན་གྲས། གསར་བརྗེའི་སྔོན་གཤེགས་དཔའ་བོའི་གཉེན་ཉེ་རྣམས་དང་མཇལ་འཕྲད་གནང་སྐབས་བརྩེ་སེམས་ཟབ་མོའི་ངང་གསུང་དོན། “ཀྲུང་གོ་བཅིངས་འགྲོལ་ཐོབ་པ་ནི་ལས་སླ་པོར་བྱུང་བ་ཞིག་མིན་ལ། ཀྲུང་གོ་གསར་པ་དབུ་བརྙེས་པ་ཡང་ལས་སླ་པོར་བྱུང་བ་ཞིག་མིན། བགྲང་ལས་འདས་པའི་སྔོན་གཤེགས་དཔའ་བོ་དང་མི་དམངས་ཁྲི་སྟོང་མང་པོས་རྒྱལ་སྲིད་འདི་བླངས་པ་རེད། རྒྱལ་སྲིད་ནི་མི་དམངས་ཡིན་ལ། མི་དམངས་ནི་རྒྱལ་སྲིད་ཡིན། རྒྱལ་སྲིད་ཀྱི་མདོག་འགྱུར་ན་མི་དམངས་ཀྱིས་ཁས་ལེན་གཏན་ནས་བྱས་མི་སྲིད། ང་ཚོས་རྒྱལ་སྲིད་འདི་སྲུང་སྐྱོང་ཡག་པོ་བྱས་ཏེ་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཧུར་ཐག་བྱས་ནས། གསར་བརྗེའི་སྔོན་གཤེགས་དཔའ་བོ་རྣམས་ལ་སེམས་གསོ་ཞུ་དགོས།”

ལོ་ངོ་70ལྷག་ཙམ་གྱི་གོང་རོལ་ལ་ཕྱིར་མིག་ལྟ་ཚེ། ཀྲུང་གོ་གསར་པ་དང་མི་རིགས་བསྐྱར་དར་ཡོང་ཆེད། འཐབ་འཛིང་པ་དང་མི་དམངས་བགྲང་ལས་འདས་པས་གཅིག་རྗེས་གཉིས་མཐུད་དུ་མི་རིགས་རང་བཙན་དང་མི་དམངས་བཅིངས་འགྲོལ་གཏོང་ཆེད་བློས་གཏོང་ཆེན་པོ་བྱས་ཡོད།

ད་ལྟ། གསར་བརྗེའི་སྔོན་གཤེགས་དཔའ་བོ་རྣམས་ལ་སེམས་གསོ་ཞུ་ཆོག་ལ། དེང་རབས་ཀྲུང་གོར་དཔྱིད་ཀྱི་དཔལ་ཡོན་བཞད་པ་ལྟ་བུའི་རྣམ་པ་གསར་རྐྱང་ཞིག་མངོན་པ་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ལ་སྔར་བྱུང་མྱོང་མེད་པའི་འོད་སྟོང་འབར་བའི་མདུན་ལམ་ཞིག་མངོན་ཡོད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ཀྲུང་གོ་མི་དམངས་ནི་སྔར་བས་གདེང་ཚོད་ལྡན་པ་དང་། སྔར་བས་རང་ཚུགས་ཐུབ་པ། སྔར་བས་རང་བརྩོན་ཐུབ་པ་བཅས་ཡིན་ལ། བློ་སྟོབས་དང་། སྙིང་རུས། གཏིང་ཤུགས་བཅས་སྔར་བས་ཆེ་རུ་ཕྱིན་ཡོད། ལོ་རྒྱུས་ཀྱི་འཕེལ་རིམ་ཁྲོད་བསགས་པའི་ནུས་པ་ཆེན་པོ་ལེགས་པོ་མངོན་པ་དང་། སྔར་བྱུང་མྱོང་མེད་པའི་ལོ་རྒྱུས་ཀྱི་རང་དབང་སྙིང་སྟོབས་དང་ལོ་རྒྱུས་ཀྱི་གསར་གཏོད་སྙིང་སྟོབས་འཕེལ་གྱི་ཡོད་ལ། བློ་སྟོབས་ཆེར་སྐྱེད་ཀྱིས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པའི་ལོ་བརྒྱ་གཉིས་པའི་འབད་འཐབ་དམིགས་འབེན་གྱི་ཕྱོགས་སུ་བསྐྱོད་ཀྱི་ཡོད།

ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ནི་ལས་སླ་ཚེགས་མེད་དང་རྔ་རྡུང་དར་འཕྱར་ཙམ་གྱིས་མངོན་འགྱུར་བྱེད་ཐུབ་པ་ཞིག་མིན་པར། ངེས་པར་དུ་ལོ་རྒྱུས་ཀྱི་ཁྱད་ཆོས་གསར་པ་མང་པོ་ལྡན་པའི་འཐབ་རྩོད་རླབས་པོ་ཆེ་བྱེད་ཕོད་པ་བྱས་ནས་དཀའ་ཚེགས་སྔར་ལས་ཆེ་བ་དང་དཀའ་སྤྱད་སྔར་ལས་ཆེན་པོས་འབད་བརྩོན་བྱ་རྒྱུའི་གྲ་སྒྲིག་བྱེད་དགོས། མིག་སྔར། འཛམ་གླིང་ལ་ལོ་བརྒྱའི་རིང་འཕྲད་མ་མྱོང་བའི་འགྱུར་ལྡོག་ཆེན་པོ་མགྱོགས་མྱུར་བྱུང་བ་དང་། འཛམ་གླིང་གི་འགྱུར་ལྡོག་དང་། དུས་རབས་ཀྱི་འགྱུར་ལྡོག །ལོ་རྒྱུས་ཀྱི་འགྱུར་ལྡོག་བཅས་ཀྱི་ཁྱད་ཆོས་དེ་བས་མངོན་གསལ་དོད་པོ་ཡོད། རང་རྒྱལ་གྱི་འཕེལ་རྒྱས་ལ་འཐབ་ཇུས་ཀྱི་གོ་སྐབས་གསར་པ་དང་། འཐབ་ཇུས་ཀྱི་ལས་འགན་གསར་པ། འཐབ་ཇུས་ཀྱི་དུས་རིམ་གསར་པ། འཐབ་ཇུས་ཀྱི་བླང་བྱ་གསར་པ། འཐབ་ཇུས་ཀྱི་ཁོར་ཡུག་གསར་པ་བཅས་མདུན་དུ་ལྷགས་ཡོད་ཅིང་། ཁ་གཏད་འཇལ་དགོས་པའི་ཉེན་ཁ་དང་འགྲན་སློང་དང་། ཐག་གཅོད་བྱེད་དགོས་པའི་འགལ་བ་དང་གནད་དོན་ནི་སྔར་ལས་རྙོག་འཛིང་ཆེ་བ་ཞིག་ཡིན་ཁར། འགྱུར་མེད་སྟོབས་ལྡན་གྱི་སྲོག་ཤིང་གི་འགོ་ཁྲིད་ནི་སྔར་ལས་མཁོ་ཆེ་བ་དང་། ཚན་རིག་དང་མཐུན་པའི་རིགས་པའི་གཞུང་ལུགས་ཀྱི་ཁྲིད་སྟོན་ནི་སྔར་ལས་མཁོ་ཆེ་བ་ཞིག་རེད།

མ་འོངས་པའི་ལོ་5ནི་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་འགོ་འཛུགས་པའི་འགག་རྩའི་དུས་སྐབས་ཡིན། ཏང་གི་ཚོགས་ཆེན་བཅུ་དགུ་པས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་སྐྲུན་ཐུབ་པར་བྱེད་པའི་འཐབ་ཇུས་བཀོད་སྒྲིག་བྱས་ཡོད། ཏང་གི་ཚོགས་ཆེན་ཉི་ཤུ་པས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་སྐྲུན་ཐུབ་པར་བྱེད་པའི་གོམ་སྟབས་གཉིས་ཀྱི་འཐབ་ཇུས་བཀོད་སྒྲིག་ལ་སྤྱི་ཁོག་ནས་རྒྱང་ལྟ་བྱ་དགོས་རྒྱུ་རེད། མ་འོངས་པའི་ལོ་5ཡི་འཐབ་ཇུས་ལས་འགན་དང་བྱེད་ཐབས་གལ་ཆེན་གཙོ་གནད་དུ་བཟུང་ནས་བཀོད་སྒྲིག་བྱ་རྒྱུ་དང་། ལོ་5ཡི་རིང་འཕེལ་རྒྱས་ཡག་པོ་གཏོང་རྒྱུ་ནི་ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར་བྱེད་པའི་ངོས་ནས་བརྗོད་ན་ཧ་ཅང་གལ་འགངས་ཆེ་བ་ཞིག་རེད།

ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་བྱས་ནས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་མཛུབ་ཁྲིད་འོག་མུ་མཐུད་འབད་བརྩོན་དང་འབད་འབུངས་མདུན་སྐྱོད་བྱས་ཏེ་ཕུལ་བྱུང་གི་གྲུབ་འབྲས་ཐོག་ནས་ཏང་གི་ཚོགས་ཆེན་ཉི་ཤུ་པ་བདེ་བླག་ངང་འཚོག་རྒྱུར་བསུ་བ་ཞུ་དགོས།

བློ་བཟང་ལྷ་མོས་བསྒྱུར།