སློབ་གསོ་དྲང་བཞག་སྐུལ་འདེད་གཏོང་བར་བྱིས་པའི་ལྟ་ཀློག་ནས་མགོ་རྩོམ་དགོས།

མི་ཞིག་གི་བསམ་པའི་འཚར་སྐྱེས་ལོ་རྒྱུས་ནི་ཁོའི་ལྟ་ཀློག་གི་ལོ་རྒྱུས་ལ་རག་ལས་ཤིང་། མི་རིགས་ཤིག་གི་བསམ་པའི་གོ་རྟོགས་དེ་མི་རིགས་དེའི་ལྟ་ཀློག་ཆུ་ཚད་ལ་རག་ལས་ཡོད། ལྟ་ཀློག་དང་བྲལ་བའི་སློབ་གྲྭ་ཞིག་ལ་ནམ་ཡང་སློབ་གསོ་ངོ་མ་ཞིག་ཡོད་མི་ཐུབ། དཔེ་ཆའི་དྲི་ཞིམ་གྱིས་ཁེངས་པའི་གྲོང་ཁྱེར་དེ་ད་གཟོད་མཛེས་སྡུག་གི་བསམ་པའི་ཁྱིམ་གཞིས་སུ་འགྱུར་སྲིད་དེ། མཉམ་ཀློག་མཉམ་འབྲི་མཉམ་འཚོ་བྱས་ཚེ་ད་གཟོད་ཐུན་མོང་གི་སྐད་ཆ་དང་། ཐུན་མོང་གི་གསང་ཨང་། ཐུན་མོང་གི་རིན་ཐང་།ཐུན་མོང་གི་མདུན་ལྗོངས་བཅས་ཡོད་ངེས། ལྟ་ཀློག་ནི་སྤྱི་ཚོགས་དྲང་བཞག་ལ་སྐུལ་འདེད་དང་། མི་རིགས་གོང་བུར་འགྲིལ་ཤུགས་ལ་ཤུགས་སྣོན་པའི་ཆེས་ནུས་ལྡན་དང་།ཆེས་ཐད་ཀར། ཆེས་སྟབས་བདེ་ཡི་ཐབས་ལམ་ཞིག་ཡིན། དར་མའི་ལྟ་ཀློག་གི་ནུས་པ་དེ། བྱིས་པའི་དུས་སྐབས་ཀྱི་སྐྱེད་སྲིང་ལས་བྱུང་བ་གདོན་མི་ཟའོ། ། ལྟ་ཀློག་ནི་བྱིས་དུས་ངེས་པར་དུ་ཆགས་འོས་པའི་གོམས་སྲོལ་གལ་ཆེན་ཞིག་ཡིན།

ལྟ་ཀློག་བྱིས་དུས་ནས་མགོ་རྩོམ་དགོས།

2000ལོར། སུའུ་ཀྲིག་ཏུ་ཧྲི་ཀྲང་གཞོན་པ་སྟེ་སློབ་གསོ་དང་རིག་གནས་ལས་བགོས་ཀྱི་འགན་འཁུར་བཞིན་པའི་ངས། སློབ་གསོ་གསར་བའི་གཅིག་མཐུན་ཚོགས་པའི་ཁོངས་མིར་རོགས་འདེགས་སྒོས“བདེ་སྐྱིད་ཆ་ཚང་བའི་སློབ་གསོའི་འཚོ་བ་ཞིག་རོལ་བ”དམིགས་གཞི་ཡིན་པའི་སློབ་གསོ་གསར་བའི་ཚོད་ལྟ་ཞིག་སྤེལ། ཐོག་མར“ཤེས་ལྡན་སློབ་ར་གསར་འཛུགས་བྱེད་པ”གཙོར་བཟུང་བའི་བྱ་སྤྱོད་ཆེན་པོ་བཅུ་ཐབས་ལམ་དུ་བྱས་ཏེ། བྱིས་པའི་ལྟ་ཀློག་ལ་སྐུལ་འདེད་གཏོང་བ་རྨང་གཞི་བྱས།

ལྟ་ཀློག་ནི་བྱིས་པ་ནས་མགོ་རྩོམ་དགོས་པ་ཞིག་སྟེ།

 བྱིས་པས་བྱིས་པའི་ཀློག་དེབ་བརྒྱུད་ནས་ཕན་ཚུན་འབྲེལ་གཏུག་དང་འབྲེལ་བ་རིགས་སྣ་ཚོགས་རྟོགས་ཐུབ་པ་དང་།མི་སྣ་སོ་སོའི་ལས་དབང་དང་གཏན་ཚིགས་རྟོགས་ཐུབ། བྱིས་པས་དཔེ་དེབ་མི་འདྲ་བའི་ཁྲོད་བདེན་རྫུན་དང་།ཡག་བཙོག དགེ་སྡིག་མྱོང་ཚོར་བྱེད་ནུས་པ་དང་། མུ་མཐུད་ནས་ཉམས་སུ་མྱོང་བ། ཚོར་སྣང། ཕྱོགས་བསྡུས། ཕྱོགས་སྡོམ་བཅས་བྱས་ཏེ། བྱེ་བྲག་གི་གཟུགས་བརྙན་ནས་སྤྱི་མཚན་དུ་ཕྱོགས་ངེས་ཡིན། དེ་བས། བྱིས་དུས་ཀྱི་ལྟ་ཀློག་ནི། ཁོ་ཚོའི་བསམ་བློ་ཡར་བསྐྱེད་འབྱུང་བའི་འཚོ་བཅུད་འགངས་ཆེན་ཉིད་དོ། །

བྱིས་པའི་ལྟ་ཀློག་ཆེས་རྨང་གཞི་དང་ཡང་ན་ཆེས་འགག་རྩའི་གནད་དོན་ནི་ཅི་ཞིག་ཀློག་རྒྱུ་དེ་ཡིན། “མི་ནི་ཁོ་རང་ཉིད་ཀྱི་ཟས་རིགས་ཀྱི་ཐོན་དངོས་ཡིན།”（ཧྥའེ་ཨར་པྰ་ཧ་ཡི་ཚིག）ལྟ་ཀློག་མཐོ་ཚད་ཀྱིས་བསམ་པའི་མཐོ་ཚད་ཐག་བཅད་ཡོད། དེར་བརྟེན། ཆེས་མཛེས་པའི་དཔེ་དེབ་དེ་ཆེས་མཛེས་པའི་བྱིས་དུས་ལ་སྤྲོད་དགོས། བརྟག་འབྱེད་ནུས་པ་དམན་པའི་བྱིས་པ་ལ་མཚོན་ན། ཅི་ནུས་ཀྱིས་དཔེ་དེབ་ལེགས་པོ་ཞིག་གདམ་དགོས་ཏེ། ཁོ་ཚོར་ལྟ་ཀློག་གི་སྤྲོ་བ་ཡག་པོ་ཞིག་ཆགས་པར་རོགས་རམ་བྱས་ན། ད་གཟོད་རྗེས་ཕྱོགས་དཔྱད་རོལ་གྱི་ནུས་པ་ངོ་མ་ཞིག་འཛོམ་ཐུབ། གསུང་རབ་ཀློག་པ་ནི་ཆེས་ཁག་ཐེག་ལྡན་ལ། ལས་ཕྱོད་དང་ཕན་འབྲས་ཆེས་མཐོ་བའི་ལྟ་ཀློག་ཡིན།

 ཞིང་སྡེའི་བྱིས་པའི་ལྟ་ཀློག་གནད་དོན་ནི་ཞིང་སྡེ་སློབ་གསོ་ཚོད་འཛིན་ཐེབས་པས་ཡིན་ལ། གྲོང་ཁྱེར་དང་ཞིང་སྡེའི་སློབ་གསོ་ལ་བར་ཁྱད་བཟོ་བའི་རྒྱུ་རྐྱེན་གཙོ་བོའང་ཡིན། ལོ་འདི་དག་གི་རིང་། འོས་འགན་སློབ་གསོ་ཁྱབ་གདལ་དང་ཞིང་སྡེའི་སློབ་གྲྭ་ཚད་ལྡན་ཅན་འཛུགས་སྐྲུན་གྱི་སྐུལ་འདེད་བྱས་པ་དང་བསྟུན། ཞིང་སྡེའི་སློབ་གྲྭ་དང་གྲོང་ཁྱེར་སློབ་གྲྭའི་མཁྲེགས་ཆས་ཀྱི་བར་ཁྱད་རིམ་བཞིན་ཆུང་དུ་བཏང་མོད། འོན་ཀྱང་ལྟ་ཀློག་ཐོན་ཁུངས་བར་ཁྱད་ལ་དེ་འདྲའི་མཐོང་ཆེན་ཐོབ་མེད། ངས་ལྟ་ཞིབ་བྱས་པའི་ཞིང་སྡེའི་སློབ་གྲྭ་བརྒྱ་ལྷག་ཁྲོད། གཞི་རྩའི་ལྟ་ཀློག་ཆ་རྐྱེན་མེད་པའམ། ཡང་ན་ཕུལ་བྱུང་དང་འོས་འཚམ་གྱི་དཔེ་དེབ་དཀོན་པ། དཔེ་མཛོད་ཡོད་ཀྱང་ནུས་པ་འདོན་སྤེལ་བྱེད་ཐུབ་ཀྱི་མེད་པའང་འདུག གལ་ཏེ་བས་མཐའི་ཞིང་སྡེ་སློབ་གྲྭ་ལ་ལྟེ་བའི་གྲོང་ཁྱེར་དང་འདྲ་བའི་ལྟ་ཀློག་གི་ཐོན་ཁུངས་ལེགས་པོ་ཞིག་ཡོད་ཐུབ་པ་ཡིན་ན། ཞིང་སྡེའི་བྱིས་པའི་བསམ་པའི་འཚར་ལོངས་དེ་གྲོང་ཁྱེར་བྱིས་པ་དང་མཉམ་དུ་རྒྱུག་མགོ་འཛུགས་ས་ཐིག་གཅིག་སྟེང་འགྲེང་ཐུབ་པའང་སྲིད།

ལྟ་ཀློག་གིས་ཞིང་སྡེའི་བྱིས་པར་འོད་ཡོད་པར་བྱེད་ཐུབ།

 ད་ལྟའི་བར་དུ། སློབ་གསོ་གསར་བའི་ཚོད་ལྟས་སྔ་གཞུག་ཏུ་རྒྱལ་ཡོངས་ཀྱི་གྲོང་ཁྱེར་དང་རྫོང་དང་ས་ཁུལ172སུ་ཚོད་ལྟ་ཁུལ་བཙུགས་ཡོད་ཅིང་། བསྡོམས་པས་སློབ་གྲྭ8300ལྷག་དང་། དགེ་སློབ་ཁྲི830ལྷག་ཚོད་ལྟ་ལ་ཞུགས་ཡོད། སློབ་གསོ་གསར་བའི་ཚོད་ལྟའི་སློབ་གྲྭ་ཕྱེད་ཀ་ཡས་མས་ཞིང་སྡེ་རུ་ཡོད། ང་ཚོས་ཤེས་ལྡན་སློབ་ར་འཛུགས་པར་སྐུལ་འདེད་གཏོང་བའི་བརྒྱུད་རིམ་ཁྲོད། ཞིང་སྡེ་སློབ་གྲྭར་རོགས་སྐྱོར་བྱེད་པ་དེ་བས་གཙོ་གནད་དུ་བཟུང་སྟེ། ཞིང་སྡེ་སློབ་གྲྭར་དཔེ་མཛོད་ཁང་དང་། འཛིན་གྲྭ་རིམ་པར་དཔེ་དེབ་ཟུར་སྣེ་འཛུགས་པ་སོགས་བྱེད་ཐབས་བརྒྱུད་དེ། བྱིས་པ་རེ་རེར་དཔེ་ཆ་ཀློག་རྒྱུ་ཡོད་པ་དང་། སྤྲོ་བ་ཡོད་པའི་དཔེ་དེབ་ཀློག་ཐུབ་པར་ཁག་ཐེག་སྒོས་བྱིས་པ་རེ་རེའི་ལྟ་ཀློག་གི་སྤྲོ་སྣང་སློང་བར་བྱེད་པ་དང། བྱིས་པ་རེ་རེར་ལྟ་ཀློག་གི་གོམས་གཤིས་ཆགས་སུ་འཇུག་དགོས།

 ང་ཚོས་མཉམ་འཇོག་བྱས་པ་ན། དཔེ་མཛོད་ཁང་གི་སྤུས་ཀ་མཐོ་བ་དང་། དགེ་སློབ་ཀྱི་ལྟ་ཀློག་ངང་ཚུལ་བཟང་བའི་ཞིང་སྡེ་སློབ་གྲྭའི་དགེ་སློབ་ཀྱི་བསམ་བློའི་འདུ་ཤེས་དེ་དེ་བས་ཧུར་བརྩོན་ཡར་ཐོན་ཡིན་ལ། སློབ་ཁྲིད་སྤུས་ཀའི་ཞིབ་བཤེར་རིགས་སྣ་ཚོགས་ཀྱང་ཨང་རིམ་གྱི་མདུན་གྲས་སུ་མཆིས། ལྟ་ཀློག་གཙོ་གནད་དུ་བཟུང་བ་བརྒྱུད་ནས། སློབ་གསོའི་དམིགས་ཚད་སོ་སོ་ཆ་སྙོམས་ཀྱིས་གྲོང་ཁྱེར་སློབ་གྲྭ་ལས་བརྒལ་བའི་ཞིང་སྡེའི་སློབ་གྲྭ་ནི་ཧ་ཅང་ཡོངས་ཁྱབ་ཏུ་གྱུར་འདུག།

 ཧུའུ་པའེ་སུའེ་རྫོང་ནི་དཔེ་མཚོན་ཞིང་སྡེའི་རྫོང་ཞིག་ཡིན། 2011ལོར་སློབ་གསོ་གསར་བའི་ཚོད་ལྟའི་ཁུལ་དུ་གྱུར་པ་ནས་བཟུང་།“ཤེས་ལྡན་སློབ་ར་གསར་འཛུགས”ཀྱི་གྲོས་སྐུལ་འདི་ལག་བསྟར་བྱས་པ་བརྒྱུད། ཞིང་སྡེ་སློབ་མའི་ལྟ་ཀློག་གི་གྲངས་ཚད་དང་། བསླབ་བྱ་ཚོད་དཔྱད་ཀྱི་སྐར་འབྲས་ཚང་མ་གྲོང་ཁྱེར་སློབ་གྲྭ་ལས་ཆེས་ཆེར་བརྒལ། སུའེ་རྫོང་ཞིང་སྡེའི་སློབ་མ2ཐེངས་དང་པོར་ཀྲུང་དབྱང་བརྙན་འཕྲིན་ཁང་དཔེ་ཀློག་འཕྲིན་ལམ་འཁྲབ་གཏོང་ཁང་དུ་ཞུགས་ཏེ། རྒྱལ་ཡོངས་ཤེས་ལྡན་གཞོན་ནུའི་དཔྱད་བསྡུར་བྱ་འགུལ་ཁྲོད་སློབ་མ་གཉིས་ཀ་ཨང་རིམ35ཡི་གྲས་སུ་སླེབས། སུའེ་ཀྲིག(随州)གྲོང་ཁྱེར་ལ་བསྡོམས་པས་སློབ་འབྲིང་སློབ་གྲྭ73ཡོད་པའི་ཁྲོད། དེའི་ཁོངས་གཏོགས་སུའེ་རྫོང(随县)དུ་སློབ་གྲྭ25ཡོད་པ་སྟེ། སློབ་གྲྭ23གྲོང་ཁྱེར་ཡོངས་ཀྱི་ཕྱོགས་བསྡུས་བཤེར་བསྡུར་ཁྲོད་ཨང་རིམ30ཡི་གྲས་སུ་ཚུད་པ་དང་། སློབ་གྲྭ14ཨང་རིམ20ཡི་གྲས་སུ་ཚུད། སློབ་གྲྭ7མདུན་གྲས་ཨང་རིམ10ཡི་ནང་དུ་ཚུད། 2013ལོར་སུའེ་རྫོང་འོས་འགན་སློབ་གསོ་དོ་མཉམ་འཕེལ་རྒྱས་ལ་ཞིང་ཆེན་རིམ་པའི་གདེང་འཇོག་ཐོབ་པ་དང་། 2014ལོར་སྐར་གྲངས་ཅུང་མཐོ་བས་བདེ་བླག་ངང་རྒྱལ་ཁབ་རིམ་པའི་ཁས་ལེན་ཡང་ཐོབ། 2016ལོར། རྒྱལ་ཡོངས་སློབ་གསོ་གསར་བའི་ཚོད་ལྟའི་ཁུལ་བྱ་བའི་གྲོས་ཚོགས་དེ་སུའེ་རྫོང་དུ་བསྡུས། ཚོགས་ཞུགས་དགེ་རྒན་རྣམས་ལ་ཡ་མཚར་བའི་ཚོར་སྣང་ཞིག་བྱུང་བ་ནི། སུའེ་རྫོང་སྡེ་བའི་སློབ་ཆུང་བྱིས་པ་རྣམས་ཀྱི་མིག་ནང་དུ་འོད་ཡོད་མཁན་རྐྱང་རྐྱང་དུ་འདུག དཔེ་མཚོན་གཞན་ཞིག་ནི།ཨན་ཧོས་ཧའོ་ཆིའུ་སློབ་གསོ་གསར་བའི་ཚོད་ལྟའི་ཁུལ་ཞིང་སྡེའི་བུད་མེད་དགེ་རྒན་ཏུང་ཡེན་གྱིས་བྱིས་པའི་སྣེ་ཁྲིད་དེ“ཞོགས་སྐྱོར་གུང་ཀློག་སྲོད་གཞིིག”གི་དཔེ་ཀློག་བསླབ་ཚན་སྤེལ་བ་བརྒྱུད། བྱིས་པ་ཚང་མ་དཔེ་ཀློག་དང་རྩོམ་འབྲི་ལ་དགའ་བར་བྱས་པ་དང་། ཐ་ན་རིག་སྟོབས་ཞན་པའི་བྱིས་པས་ཀྱང་རང་ཉིད་ལ་དབང་བའི་སྙན་ངག་འབྲི་ཐུབ་པ་བྱུང་། ཞ་མོན་གྲོང་ཁྱེར་ཝུའུ་ལུའི(梧侣)སློབ་གྲྭ་ནི་ཕྱི་ཡོང་ཞོར་ལས་པའི་བུ་ཕྲུག་གཙོ་བོ་ཡིན་པའི་སློབ་གྲྭ་གསར་བ་ཞིག་ཡིན། 90%ཡན་གྱི་སློབ་མ་ནི་ཕྱི་ཡོང་གླ་བྱེད་མི་སྣའི་བྱིས་པ་ཡིན་ལ། སློབ་གྲྭ་བཙུགས་མ་ཐག་ནས་སློབ་གསོ་གསར་བའི་ཚོད་ལྟ་ལ་ཞུགས་ཏེ། ཁོར་ཡུག་གསར་སྐྲུན་དང་།བསླབ་ཚན་སྐུལ་འདེད། བྱ་འགུལ་སྤེལ་བ། ཁྱིམ་སློབ་མཉམ་ཀློག་བཅས་ལེགས་སྒྱུར་གྱི་ཐབས་ལམ་བཞི་བརྒྱུད་དེེ། ཁྱོན་ཡོངས་ནས་ཤེས་ལྡན་སློབ་ར་འཛུགས་སྐྲུན་མགོ་བརྩམས་པས། ལོ་ངོ་བཅུ་མ་འགོར་བར། ས་ཁུལ་ཡོངས་ཀྱི་ཆེས་ལེགས་པའི་མིག་དཔེའི་སློབ་གྲྭ་རུ་གྱུར། རྫོགས་མཐའ་མེད་པའི་དཔེ་མཚོན་འདི་དག་གིས། གསོན་ཉམས་ལྡན་པའི་ངང་བདེན་དཔང་ཡང་ཡང་བྱས་པ་ནི། ཞིང་སྡེའི་བྱིས་པའི་དཔེ་ཀློག་ཆུ་ཚད་ཇེ་མཐོར་བཏང་བ་བརྒྱུད་དེ། སྔར་ཡོད་ཆ་རྐྱེན་མི་འགྱུར་བའི་འོག ཁུལ་ཁོངས་ཀྱི་སློབ་གསོའི་སྐྱེ་ཁམས་མགྱོགས་མྱུར་སྒོས་ལེགས་བཅོས་དང་། རྨང་གཞི་སློབ་གསོའི་སྤུས་ཀ་ཁོད་ཆེན་པོས་ཡར་བསྐྱེད་ཐུབ་པ་ཁོ་ཐག་རེད། དཔེ་ཀློག་བརྒྱུད་དེ་མིག་ནང་དུ་འོད་ཡོད་པར་བྱས་པའི་ཞིང་སྡེའི་བྱིས་པ་འདི་དག་ནར་སོན་རྗེས། འོད་ལྡན་པའི་མི་ཞིག་ཏུ་འགྱུར་སྲིད་དོ། །

སློབ་གསོ་དྲང་བཞག་ནི་བྱིས་པའི་དཔེ་ཀློག་ནས་མགོ་རྩོམ་དགོས།

 དཔེ་དེབ་ནི་སྤྱི་ཚོགས་དྲང་བཞག་སྐུལ་སྤེལ་བྱེད་པའི་ལེགས་སྐྱེས་ཆེས་བཟང་ཤོས་དེ་ཡིན། སི་ཏི་ཧྥུན●ཁོ་ལ་ཧྲེང་གིས《དཔེ་ཀློག་གི་སྟོབས་ཤུགས》ཞེས་པར་གཞི་གྲངས་མང་པོས་ར་སྤྲོད་བྱས་པ་ལ། སློབ་གྲྭ་དང་ཁྱིམ་ཚང་གི་ལྟ་ཀློག་ཁོར་ཡུག་བཟང་ངན་དང་། དཔེ་མཛོད་ཁང་ཡོད་མེད་དང་མང་ཉུང་། ཉར་དཔེའི་མང་ཉུང་། ཕ་མ་དང་དགེ་རྒན་གྱིས་དཔེ་ཀློག་བྱེད་མིན། སློབ་མའི་དཔེ་ཀློག་ཚད་ཆེ་ཆུང་སོགས་རྒྱུ་རྐྱེན་དེ་སློབ་མའི་སྐར་འབྲས་བཟང་ངན་ལ་འབྲེལ་བ་དམ་ཟབ་ཡོད། སློབ་གྲྭ་ལ་མཚོན་ན། མཁྲེགས་ཆས་སྒྲིག་བཀོད་ནི་སློབ་གསོའི་རྨང་གཞི་ཡིན་ཡང་། སློབ་གསོའི་ཆུ་ཚད་ཐག་གཅོད་ན་མཉེན་ཆས་ཆུ་ཚད་ལ་ཐུག་ཡོད་པ་དང། མཉེན་ཆས་ཆུ་ཚད་ཐག་གཅོད་པའི་གནད་འགག་ནི་ལྟ་ཀློག་ཆུ་ཚད་ཡིན།དཔེ་ཀློག་ཐོན་ཁུངས་དྲང་བཞག་ནི་སློབ་གསོ་དྲང་བཞག་གི་རྨང་གཞི་གལ་ཆེན་ཡིན་ལ། སྤྱི་ཚོགས་དྲང་བཞག་གི་རྨང་གཞི་གལ་ཆེན་ཡང་ཡིན། ཞིང་སྡེའི་བྱིས་པ་ལ་མཚོན་ན། ཆེས་གལ་ཆེ་བ་ནི་ཇི་ལྟར་དཔེ་ཆ་ཁོ་ཚོའི་ལག་ཏུ་སྤྲོད་པ་དང་། ཁོ་ཚོར་དཔེ་ཆ་ལེགས་པོ་ཀློག་ཐུབ་པར་འཇུག་རྒྱུ་དེ་ཡིན། གལ་ཏེ་གནད་དོན་འདི་ཐག་བཅད་པ་ཡིན་ན། ཀྲུང་གོའི་སློབ་གསོ་ཡི་གནད་དོན་ཐག་གཅོད་སླ་ལ། སྤྱི་ཚོགས་དྲང་བཞག་གི་གནད་དོན་ཡང་ཐག་གཅོད་པ་ཤིན་ཏུ་སླའོ། །དེར་བརྟེན། ངས་གྲོས་གཞི་གསུམ་འདོན་པར་བྱ་སྟེ།

དང་པོ།“ལོ་ལྔའི་འཆར་གཞི་བཅུ་བཞི་པའི”སྐབས་སུ་ཞིང་སྡེའི་སློབ་གྲྭ་ཆུང་འབྲིང་གི་དཔེ་མཛོད་ཁང་འཛུགས་སྐྲུན་བྱེད་པའི་རྒྱལ་ཁབ་ཀྱི་ལས་གཞི་དངོས་སུ་འདོན་འོས་ཏེ། སྔོན་ཆད་འཚོ་བཅུད་གུང་ཚིགས་ནན་འཛིན་བྱས་པ་ནང་བཞིན། ཞིང་སྡེའི་སློབ་གྲྭ་ཆུང་འབྲིང་ལ་དཔེ་མཛོད་ཁང་ཚད་ལྡན་དུ་འགྱུར་བའི་བསྒྱུར་བཅོས་ཐེངས་ཤིག་སྤེལ་ནས། ཞིང་སྡེའི་སློབ་གྲྭ་ཆུང་འབྲིང་གི་དཔེ་མཛོད་ཁང་འཛུགས་སྐྲུན་ཚད་གཞི་དངོས་སུ་འདོན་དགོས། ཆེའི་གལ་ཆེ་བ་ནི་བྱིས་པའི་ལུས་སེམས་འཕེལ་རྒྱས་ཀྱི་ཁྱད་ཆོས་དང་ན་ཚོད་དུས་རིམ་དང་འཚམ་པའི་ཕུལ་བྱུང་དཔེ་དེབ་སྡེབ་སྒྲིག་བྱས་ཏེ། དངོས་གནས་དཔེ་ཆ་ཤེས་མཁན་དང་། དཔེ་ཆར་དགའ་མཁན་གྱི་དཔེ་དེབ་དོ་དམ་མི་སྣ་བཀོད་སྒྲིག་བྱེད་དགོས།

གཉིས་པ། ད་ལྟའི་དཔེ་དེབ་འོས་འགུག་དམའ་གོང་དམིགས་འཁེལ་རྣམ་པ་དང་སྲོལ་རྒྱུན་གནང་སྦྱིན་རྣམ་པ་བསྒྱུར་ཏེ། དཔེ་དེབ་ཉོ་སྒྲུབ་དང་གནང་སྦྱིན་གོམ་གང་མདུན་སྤོས་ཀྱིས་ཡོངས་བསྒྲགས་ཅན་དང་། མངོན་གསལ་ཅན་ཡོང་བ་བྱས་ཏེ། དོན་དངོས་ཀྱི་དཔེ་ཆ་ལེགས་པོ་སློབ་གྲྭར་ཐོན་པར་བྱེད་དགོས།

གསུམ་པ། དཔེ་ཀློག་ལས་ཁུངས་དང་གྲོང་ཁྱེར་ལྟ་ཀློག་དང་ལེན་པ་ལག་གདང་སྦྲེལ་ནས་ཞིང་སྡེའི་དཔེ་ཀློག་ཁྱབ་སྤེལ་མཁན་སྐྱེད་སྲིང་བྱེད་དགོས། དཔེ་དེབ་ཅི་འདྲ་ཕུན་སུམ་ཚོགས་ཀྱང་། གལ་ཏེ་ཀློག་མཁན་མེད་ན། ཤོག་ཧྲུལ་རྐྱང་བ་ལས་མ་འདས་སོ། ། དཔེ་ཆ་ལེགས་པོ་ཡོད་ཚེ། དངོས་གནས་ཀློག་ཤེས་དང་སྤྱོད་ཤེས་བྱེད་དགོས་པ་དང་། ཚན་རིག་གི་ལྟ་ཀློག་བྱེད་ཐབས་ཤེས་རྟོགས་བྱེད་དགོས། དཔེ་ཀློག་ཤེས་མཁན་གྱི་དགེ་རྒན་གྱིས་ད་གཟོད་ཞིང་སྡེའི་བྱིས་པའི་ལྟ་ཀློག་གི་ཧུར་བརྩོན་རང་བཞིན་ཆེར་སྐྱེད་ཐུབ་པ་དང་། ཁོ་ཚོས་དཔེ་ཆ་ལེགས་པོར་ཀློག་པར་བློ་ཁ་འདྲེན་ཐུབ། དེར་བརྟེན། ཞིང་སྡེའི་ལྟ་ཀློག་ཁྱབ་སྤེལ་པ་སྐོར་ཞིག་སྐྱེད་སྲིང་བྱེད་རྒྱུ་ཧ་ཅང་གལ་ཆེ།ང་ཚོས་གྲོང་ཁྱེར་དང་ཞིང་སྡེ་ཆ་སྒྲིག་ལ་སྐུལ་སློང་བྱས་ཏེ།ལག་གདང་མཉམ་སྦྲེལ་གྱིས་དཔེ་ཀློག་སློབ་ར་མཉམ་འཛུགས་བྱེད་དགོས།

བྱིས་པ་ནི་རྒྱལ་ཁབ་ཀྱི་མ་འོངས་པ་དང་། མི་རིགས་ཀྱི་རེ་བ་ཡིན། སྐྱེས་ཚད་རིམ་བཞིན་མར་ཆག་པའི་དེ་རིང་།སྔར་བས་ཀྱང་སློབ་གསོའི་སྤུས་ཚད་མཐོར་འདེགས་བྱས་པ་བརྒྱུད་དེ། བྱིས་པ་དེ་བས་མང་པོ་འཇོན་ཐང་ཅན་དུ་འགྱུར་བར་རོགས་རམ་བྱེད་དགོས། ལྟ་ཀློག་ནི་ཆེས་སྟབས་བདེ་དང་གོ་ཆོད་ཀྱི་བྱེད་ཐབས་ཡིན། རེ་བ་ནི་སྤྱི་ཚོགས་ཡོངས་ཀྱིས་བྱིས་པའི་ལྟ་ཀློག་ལ་དོ་ཁུར་གནང་སྟེ། བྱིས་པའི་དཔེ་ཀློག་སྤྱད་དེ་བྱིས་པའི་མཛེས་སྡུག་གི་རང་ཉིད་འབྲི་བཞེངས་བྱེད་རྒྱུ་དང་། བྱིས་པའི་དཔེ་ཀློག་སྤྱད་དེ་རྒྱལ་ཁབ་དང་མི་རིགས་ཀྱི་མཛེས་སྡུག་འབྱུང་འགྱུར་གསར་སྐྲུན་བྱེད་རྒྱུ་དེའོ། །

* ཚེ་རིང་བསམ་འགྲུབ། རྨ་ལྷོ་ཚགས་པར་ཁང་དུ་ཕྱག་ལས་གནང་བཞིན་ཡོད།