རང་ཞིང་གིས་ཇ་སྟོན་ཚོགས་འདུ་འཚོགས་ཏེ་བོད་ཆུ་ཡོས་ལོའི་ལོ་སར་བསུས།
སྤྱི་ཟླ་2པའི་ཚེས་21ཉིན། ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའུ་དང་། ཞིང་ཆེན་ཏང་ཨུའི་བོད་འབྲེལ་གཞུང་ལས་ཁང་། ཞིང་ཆེན་མི་རིགས་ཆོས་ལུགས་ཨུ་ལྷན་བཅས་ཀྱིས་ཁྲེང་ཏུའུ་རུ་བོད་ཆུ་ཡོས་ལོའི་ལོ་སར་བསུ་བའི་ཇ་སྟོན་ཚོགས་འདུ་འཚོགས་ཏེ། ཁྲེང་ཏུའུ་རུ་བཅའ་སྡོད་བྱས་པའི་བོད་རིགས་སྤུན་ཟླ་ཁག་ཅིག་དང་རིགས་སོ་སོའི་འཐུས་མི་མཉམ་དུ་འཛོམས་ནས་དུས་ཆེན་རོལ་བཞིན་འཕེལ་རྒྱས་གླེང་བ་རེད།
ཞིང་དཔོན་གཞོན་པ་ཧུའུ་ཡུན་ཇ་སྟོན་ཚོགས་འདུར་ཞུགས་པར་མ་ཟད་ཤིས་ཚིག་ཕུལ་ཏེ། ཞིང་ཆེན་ཡོངས་ཀྱི་བོད་རིགས་སྤུན་ཟླ་རྣམས་ལ་དུས་ཆེན་གྱི་རྟེན་འབྲེལ་དང་ལོ་སར་གྱི་འཚམས་འདྲི་གནང་། ཧུའུ་ཡུན་གྱིས་ཤིས་ཚིག་ཁྲོད། 2023ལོ་ནི་ཕྱོགས་ཡོངས་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་དོན་འཁྱོལ་ལག་བསྟར་འགོ་ཚུགས་པའི་ལོ་ཡིན་ཏེ། ཞིང་ཆེན་ཡོངས་ཀྱི་རིགས་སོ་སོའི་མང་ཚོགས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་རླབས་ཆེན་དར་ཆ་མཐོ་རུ་བསྒྲེང་དགོས་པ་དང་། དུས་དང་རྣམ་པ་ཀུན་ཏུ་སྤྱི་ཁྱབ་ཧྲུའུ་ཅི་ཡིས་སི་ཁྲོན་ལ་མངགས་བཅོལ་ནན་མོ་གནང་བ་མི་བརྗེད། “འདུ་ཤེས་བཞི”བརྟན་པོ་འཛིན་པ། “རང་རྟོན་བཞི”བརྟན་དུ་གཏོང་བ། “སྲུང་སྐྱོང་གཉིས”སྒྲུབ་ཐུབ་པ་བཅས་བྱས་ཏེ། “ཅན་བཞི་མཉམ་སྐྱོད། ཞིང་གྲོང་མཉམ་འདྲེས། ཁོངས་ལྔ་མཉམ་དར”བཅས་དམ་འཛིན་བྱས་ཏེ། འབད་འབུངས་ཡར་བརྩོན་དང་ཞུམ་མེད་མདུན་སྐྱོད་ཀྱིས་དུས་རབས་གསར་པའི་མི་རིགས་མཐུན་སྒྲིལ་ཡར་ཐོན་གྱི་བྱ་གཞག་དེ་ཁྱོན་ཡོངས་ནས་སྤུས་ཚད་མཐོ་བའི་འཕེལ་རྒྱས་གཏོང་བ་དང་། མི་རིགས་ཁག་མཉམ་དུ་སྤྱི་ཚོགས་རིང་ལུགས་དེང་རབས་ཅན་གྱི་ཕྱོགས་སུ་བསྐྱོད་རྒྱུར་སྟོབས་ཤུགས་འབུལ་གང་ཐུབ་བྱེད་དགོས་ཞེས་གསུངས་པ་རེད།
ཞིང་ཆེན་དམངས་ཆེན་རྒྱུན་ལས་ཨུ་ལྷན་གྱི་ཀྲུའུ་ཆེན་གཞོན་པ་ཧོ་ཡན་ཀྲེང་། ཞིང་ཆེན་གྱི་བློ་མཐུན་རྒན་པ་ཡངས་གླིང་རྡོ་རྗེ་སོགས་ཇ་སྟོན་ཚོགས་འདུར་ཞུགས། །
བུ་ཁེ་ཚང་གི་བོད་ལུགས་ལོ་སར།
བོད་ཆུ་ཡོས་ལོའི་ལོ་སར་ཚེས་པ་གཅིག་ཉིན། དཀར་མཛེས་བོད་རིགས་རང་སྐྱོང་ཁུལ་གྱི་ས་གནས་སོ་སོ་རུ་ལོ་སར་གྱི་སྤྲོ་བས་ཁེངས་ཤིང་། བོད་རིགས་མང་ཚོགས་ཀྱིས་སྤྲོ་སེམས་འཁོལ་བའི་ངང་བོད་ཆུ་ཡོས་ལོའི་ལོ་སར་བསུས།
སྡེ་དགེ་རྫོང་གི་ཁུལ་རིམ་པའི་གེ་སར་སྒྲུང་གིི་དངོས་མིན་ཤུལ་བཞག་རིག་གནས་ཀྱི་རྒྱུན་འཛིན་པ་བུ་ཁེའི་ཁྱིམ་དུ་དགའ་སྤྲོའི་དགོད་སྒྲས་ཁེངས་ཤིང་།
ཁྱིམ་མི་ཉེ་འབྲེལ་རྣམས་ལྷན་དུ་འཛོམས་ནས་དུས་ཆེན་གྱི་དགྱེས་སྟོན་ལ་རོལ་བཞིན་ཡོད། འབུར་བརྐོས་དང་ཚོན་རྩི་ཡིས་རྒྱན་པའི་བོད་ཁང་དུ་སྤོས་དུད་འཁྲིགས་ཤིང་། བོད་ལུགས་ཅོག་ཙེའི་སྟེང་དུ་བཏུང་བྱའི་རིགས་དང་ཤིང་ཏོག་གི་རིགས། ཟོར་ཤ་དང་གྲོ་མ་སོགས་ཟས་རིགས་ཀྱིས་ཁེངས་པ་དང་། བུ་ཁེས་ལོ་སར་ལ་མགྲོན་འབོད་བྱས་པའི་སྐུ་མགྲོན་རྣམས་སྣེ་ལེན་བྱེད་ཞོར་རོ་བཅུད་ལྡན་པའི་ཇ་སྲུ་མ་ལྡུད་པ་དང་། ཚང་མ་གདན་དུ་འཁོད་ནས་དགའ་སྤྲོའི་དགོད་སྒྲས་ཁེངས།
བུ་ཁེས་བོད་ཀྱི་ལོ་སར་ཚེས་པས། ང་ཚོའི་ཁྱིམ་མི་རྣམས་ལྷན་དུ་འཛོམས་ནས་ལོ་སར་སྐྱིད་པོ་གཏོང་བཞིན་ཡོད། ཏང་དང་རྒྱལ་ཁབ་ཀྱིས་ང་ཚོ་ལ་གཟིགས་སྐྱོང་སྲིད་ཇུས་འདི་ལྟར་མང་པོ་གནང་བར་བཀའ་དྲིན་དྲན་གྱི་ཡོད་ལ། ད་ལྟ་འཚོ་བ་ཇེ་སྐྱིད་ནས་ཇེ་སྐྱིད་རེད། ངས་བོད་རིགས་སྤུན་ཟླ་ཡོངས་ལ་ལོ་སར་བཀྲ་ཤིས་བདེ་ལེགས་ཞུ་ཡིན་ཞེས་ཟེར། །
བྲག་འགོ་རྫོང་གིས་ལོ་སར་གྱི་འགྲོས་རྒྱུག་བྱེད་སྒོ་སྤེལ།
སྤྱི་ཟླ་2པའི་ཚེས་16ཉིན། དཀར་མཛེས་ཁུལ་བྲག་འགོ་རྫོང་ཆུ་བར་སྡེ་པས་འཁྲུག་ཆ་དོད་པའི་འགྲོས་རྒྱུག་བྱེད་སྒོ་ཞིག་སྤེལ་འགོ་ཚུགས་པ་རེད། བྲག་འགོ་རྫོང་གི་ཡུལ་ཤོག་དང་གྲོང་རྡལ་ཁག་ནས་ཡོང་བའི་རྟ་རྩལ་པ་60ཐེངས་འདིའི་འགྲོས་རྒྱུག་སུ་ཞུགས་ཤིང་། ལྟད་མོ་བ་རྣམས་སྤྲོ་སེམས་རབ་ཏུ་འཕེལ། གློ་བུར་དུ་སྤྲོ་སེམས་འཁོལ་བའི་འགྲེལ་བཤད་དང་། རྟ་ཕོའི་མཚེར་སྒྲ། ལྟད་མོ་བ་ཚོའི་ཀི་སྒྲ་བཅས་མཉམ་དུ་འདྲེས།
ཤེས་རྟོགས་བྱུང་བར་གཞིགས་ན། ཐེངས་འདིའི་བྱེད་སྒོར་ཞུགས་པའི་རྟ་རྩལ་པ་ལོ་ན་ཆེ་བར་ལོ་68དང་། ཆུང་བར་ལོ་ན་18ལས་ཟིན་གྱི་མེད་པ་རེད། ཁོ་ཚོས་བྱེད་སྒོའི་ཁྲོད་རང་ཉིད་ཀྱི་འཇོན་ཐང་ལ་བརྟེན་ནས་རང་སོ་སོའི་ཁྱད་ཆོས་མངོན་འདུག །
ཁྲེང་ཏུའུ་གྲོང་ཁྱེར་དུ་བོད་ལུགས་ལོ་སར་ལ་མྱོང་རོལ་བྱས།
སྤྱི་ཟླ་2པའི་ཚེས་21ཉིན་ནི་བོད་ཀྱི་ལོ་སར་ཚེས་གཅིག་རེད། གྲོང་ཁྱེར་གྱི་བོད་མི་ཚོས་ལོ་གཅིག་གི་དུས་ཆེན་གལ་ཆེན་འདི་ཇི་ལྟར་རོལ་བཞིན་ཡོད་དམ། ཚེས་གཅིག་ཉིན། གངས་ལྗོངས་ཉི་གཞོན་འཕྲིན་སྦྱོར་ཀུན་འདུས་ལྟེ་གནས་ཀྱི་གསར་འགོད་པ་ཁྲེང་ཏུའུ་གྲོང་ཁྱེར་གྱི་བོད་རིགས་འདུ་འཛོམས་ཆེ་སའི་ཧྲོང་ལིའུ་ཆུས་ཨོའུ་ཁྲེང་མེ་ཏོག་ལྡུམ་རའི་སྡོད་ཁུལ་དུ་བཅར་འདྲི་བྱེད་དུ་ཕྱིན།
བཀྲ་ཤིས་ཆོས་མཚོ་བཟའ་མི་གང་པོས་བྲེལ་བ་ཆེན་པོས་སྔ་དྲོ་ནས་གཉེན་ཉེ་གྲོགས་པོ་ཚོ་དང་མཉམ་དུ་ཤ་མོག་བཅའ་བ་སོགས་ཟས་སྣ་མང་པོ་གཡོ་སྐོལ་གྱི་ལས་ལ་བྲེལ་ཞིང་། ཤ་སྐམ་དང་རྒྱུ་མ། ཞོ་དང་གྲོ་མ་མར་ཁུ་སོགས་ཀྱི་སྡེར་ཁ་གྱ་ནོམ་པ་བསྒྲིགས་ཡོད་པ་དང་། གཉེན་ཉེ་དང་མགྲོན་པོ་རྣམས་ཀྱང་གཅིག་རྗེས་གཉིས་མཐུད་དུ་མོའི་ཁྱིམ་དུ་ལོ་སར་ལ་བཀྲ་ཤིས་བདེ་ལེགས་ཞུ་བར་ཕེབས་བཞིན་འདུག།
གནམ་ལོ་གསར་ཚེས་ཀྱི་ཉིན་དང་པོར་ཆོས་མཚོ་དང་གཉེན་ཉེ་གྲོགས་པོ་ཚོས་གླུ་ལེན་གར་རྩེད་བྱས་ཏེ་དགའ་སྐྱིད་དཔལ་ལ་རོལ། །
རྔ་བའི་ལོ་སར་སྐབས་ཀྱི་སྨོན་ལམ་ཆེན་མོ།
བཀྲ་ཤིས་གཡང་གི་དུང་སྒྲ། བདེ་སྐྱིད་སེམས་ཀྱི་ལོངས་སྤྱོད། དགའ་བའི་འཛུམ་དང་སྤྲོ་བའི་སེམས་ཀྱིས་རྔ་བ་རྫོང་གི་བོད་རིགས་མང་ཚོགས་ཀྱིས་ལོ་སར་ལ་བསུ་མ་བྱས། དེ་ཡང་ལོ་སར་ཚེས་3ཉིན་གྱི་ཕྱི་དྲོ་ནས་སྒོ་མང་དགོན་པས་སྨོན་ལམ་ཆོ་འཕྲུལ་ཆེན་མོའི་འགོ་དངོས་སུ་ཚུགས་པ་རེད། སྨོན་ལམ་ཆེན་མོ་ནི་ས་གནས་དེའི་རིག་གནས་བྱེད་སྒོ་གལ་ཆེན་ཞིག་ཡིན་པ་དང་ལོ་རེའི་ལོ་སར་གྱི་ཚེས་3ནས་ཚེས་16བར་འཚོག་པ་དང་། སྨོན་ཞུ་དང་གོས་སྐུ་གཤོམ་པ། ཤོམ་འགྲོ། ཆམ། མཆོད་མཇལ། བྱམས་པ་གླིང་སྐོར་སོགས་ཀྱི་ཆོས་ལུགས་རིག་གནས་ཀྱི་བྱེད་སྒོ་གྱ་ནོམ་པ་ཞིག་སྤེལ་ནས་མི་དམངས་ཀྱི་འཚོ་བར་གསོན་ཤུགས་གསར་པ་སྦྱིན། །