སྤྱིར་གྲུམ་བུའི་ནད་འདི་དེང་དུས་མི་རྣམས་ཀྱི་འཚོ་བའི་ཆ་རྐྱེན་ལེགས་པ་དང་འཚོ་བ་སྐྱེལ་ཚུལ་མ་ལེགས་པས་དང། འགུལ་སྐྱོད་ཉུང་དྲགས་པ་དང་ཟས་འཚོ་བཅུད་དྲགས་པ་སོགས་མང་བའི་དབང་གིས་མ་ཞུ་བ་བསྐྱེད་པས་དྭངས་མ་མ་སྨིན་པའི་དབང་གིས་ཁྲག་ངན་དང་ཆུ་སེར་མང་པོ་འཕེལ་བ་དང་བྱེར་བའི་དབང་གིས་ན་མཁན་ཤིན་ཏུ་མང་བ་ཡིན་སྟབས། འདིར་སྔོན་བྱོན་མེས་པོའི་ཉམས་ཡིག་དང་ཞལ་ཁྲིད་། དེ་བཞིན་རང་ཉིད་ཀྱིས་ལག་ལེན་ལོ་མང་བྱས་པའི་མྱོང་བ་བཅས་བསྡུས་ནས་ཅུང་ཟད་གླེང་བ།
དང་པོ། གྲུམ་བུའི་ནད་ཀྱི་མཚན་ཉིད།
གྲུམ་པུའི་ནད་ནི་དྭངས་མ་མ་སྨིན་པའི་རྐྱེན་གྱིས་ཆུ་སེར་ཚད་ལས་བརྒལ་བ་རྒྱས་ཏེ་ཤ་དང་རུས་པ། རྩ་དང་ཆུ་རྒྱུས་བཅས་ཀྱི་གནས་སུ་ན་བའི་ནད་དེ། གྲུམ་ཞེས་པ་ནི་ཆག་ནས་ཞིབ་ཞིབ་འགྱུར་བའི་དོན་ཏེ།འདིར་ནད་འདི་ཡིན་པའི་རྟགས་ཀྱི་མིང་ནད་ལ་བཏགས་པ་སྟེ། སྒྲ་བཤད་ལ། སྟག་ཚང་ལོ་ཙ་བ་ཤེས་རབ་རིན་ཆེན་གྱིས། ཚིགས་མིག་ཆུ་སེར་འཕེལ་བ་ཡིས། །འབྱོར་བྱེད་བྱེད་ལས་ཉམས་གྱུར་ཏེ། །ཚིག་ཀུན་ཆག་གྲུམ་ཤོར་བ་ལྟར། །གྱུར་པས་གྲུམ་བུ་ཞེས་སུ་བཤད། །ཡང་གསོ་རིག་སྙིང་བསྡུས་སྐྱ་རེངས་གསར་པ་ལས། གྲུམ་ནད་ཟེར་བ་ནི་གཙོ་རུས་ཚིགས་ལ་ཆུ་སེར་ཞེན་ནས་གཉན་ཁ་རྒྱས་པའི་ནད་གཞི་རེད། ཅེས་གསུངས་པས་སོ། །སྐྱ་རེངས་གསར་པའི་ས་བཅད་ནང་རུས་རྐང་གི་ནད་ཅེས་གྲུམ་བུ་གསོ་ཐབས་བཞག་ཡོད།
གཉིས། གྲུབ་བུའི་ནད་ཀྱི་རྒྱུ་རྐྱེན།
རྒྱུ་རྐྱེན་ནི་གཙང་སྟོད་པད་མ་མགོན་པོས་མཛད་པའི་ཟིན་ཏིག་ལས།དེ་རྒྱུ་ཆུ་སེར་དཀར་ནག་ཡིན། །ཞེས་གསུངས་པ་དང་། གྲུམ་པུའི་ནད་ནི་རླན་གཤེར་ཆེ་བའི་ཡུལ་དང་སྣུམ་པ་སྟེ་རྩི་ཤིང་ནགས་ཚལ་བཏུགས་པའི་ཡུལ་དུ་ཡུན་རིང་བསྡན་པ། ཆུ་དང་བརླན་གཤེར་ཆེ་སར་ལས་ཀ་ཡུན་དུ་བྱས་པ། ཁ་ཟས་ཀྱང་སྣུམ་ལ་བཅུད་ཅན་གྱི་རིགས་ཡུན་དུ་བསྟེན་དྲགས་པའི་རྐྱེན་ལས། ཟས་ཟོས་པའི་དྭངས་མ་ཚུལ་བཞིན་རང་གནས་སུ་སྨིན་མ་ཐུབ་པ། ལུས་ལ་ཆུ་སེར་ཚད་ལ་བརྒལ་བ་རྒྱས་ཏེ། དེ་ཉིད་ཤ་དང་རུས་པ།རྩ་དང་ཆུ་རྒྱུས་བཅས་ཀྱི་གནས་སུ་ཆག་གྲུམ་ཤོར་བ་ལྟར་ན་ཟུག་ཆེན་པོ་ལྡང་ནས་ན་བ་ཡིན་ཏེ། གཡུ་ཐོག་བུ་དོན་མ་ལས། རྒྱུ་ནི་རླན་སྣུམ་ཡུལ་དག་གིས། དྭངས་མ་མ་སྨིན་རླུང་ཚད་དང་། །ཆུ་སེར་བད་མཁྲིས་རྐྱེན་གྱིས་བྱེར། །ཤ་རུས་རྩ་རྒྱུས་གནས་ནས་སྐྱེད། །རིགས་ལ་བཞི་ཏྲེམ་དང་གྲུམ་བུ་གཉིས། །ཏྲེམ་ལ་རུས་ཏྲེམ་ཤ་ཏྲེམ་དང་། །རྩ་ཏྲེམ་ཆུ་ཏྲེམ་བཞི་དག་གོ །གྲུམ་བུ་དཀར་ནག་རྣམ་པ་གཉིས། །ཞེས་སོ། །
གསུམ་པ། གྲུབ་བུའི་ནད་ཀྱི་དབྱེ་བ།
གྲུམ་བུའི་ནད་ཀྱི་དབྱེ་བ་མན་ངག་ཡོན་ཏན་རྒྱུད་ལས། དབྱེ་བ་ཤ་ཏྲེམ་རུས་ཏྲེམ་རྩ་ཏྲེམ་དང་། །ཆུ་ཏྲེམ་ཏྲེམ་དཀར་ཏྲེམ་ནག་རྣམ་པ་དྲུག །ཞེས་གསུངས་པ་ལྟར་དྲུག་ཏུ་དབྱེ་ནས་བསྟན་པ་དང་། ཡང་ན་དེ་དག་རྣམ་པ་གཉིས་སུ་བསྡུ་ནས་གསུང་པའང་ཚ་གྲུམ་དང་གྲང་གྲུམ་གཉིས་ཏེ་ཁྲག་མཁྲིས་ཚ་བ་ཤས་ཆེ་བའི་ཚ་གྲུམ་མམ་ཏྲེམ་ནག་དང་། བད་རླུང་གྲང་བ་ཤས་ཆེ་བའི་ཏྲེམ་དཀར་རམ་གྲང་གྲུམ་གཉིས་སུ་དབྱེ་ནས་བསྡུ་བ་ནི་སྤྱི་རག་པའི་དབང་དུའོ། །
བཞི། གྲུབ་བུའི་ནད་ཀྱི་དབྱེ་བ་ངོས་བཟུང་བ།
སྤྱིར་གྲུམ་བུའི་ནད་ནི་མཚན་ཉིད་དང་ངོ་བོ་ལྟར་ཡན་ལག་ཆག་གྲུམ་ཤོར་བ་ལྟར་ན་ཟུག་ཆེས་ཆེར་ལྡང་བ་ནས་ན་བ་ཡིན་ཏེ། རྒྱུད་ཀྱི་གྲུམ་ནད་གསོ་བའི་ལེའུ་ལས། སྤྱི་རྟགས་གྲང་ཤུམ་ཡུན་རིང་ཤ་ལྤགས་རྩེ། །གདོང་སྣུམ་མགོ་བོ་རྐེད་པ་དཔྱི་མིག་ཟུག།།ཤེད་ཆུང་སྒྱིད་སྐྱུར་ཤ་འབྲོང་རྔུལ་ཁ་སྙི། །རུས་ཚིགས་ཤ་རུས་འཁོཞ་ཞིང་ཆུ་རྒྱུས་གྱོང་། །འགུལ་ཚེ་ལྷག་པར་ན་ཞིང་སྐད་ངན་འཆོར། །ཞེས་གསུངས་པ་ལྟར་གྲུབ་བུའི་ནད་ཀྱི་སྤྱི་རྟགས་ལ་ལུས་ལ་འཁྱགས་སྣང་ཡུན་རིང་ཞུགས་པ་དང་། ཤ་ལྤགས་བར་ན་ཟུག་ཚ་ཤར་བྱེད་པ། གདོང་ལ་སྣུམ་བག་མང་བ། མགོ་བོ་དང་རྐེད་པ། དཔྱི་མིག་སོགས་ན་ཟུག་ཆེས་ཆེར་ལྡང་བ། ལུས་ཤེད་ཆུང་བ། ལུས་འགུལ་སྤྱོད་མི་འདོད་པའམ་ལས་གང་ཡང་བྱེད་མི་འདོད་པ། ཤ་འབྲོང་པ་སྟེ་ཤ་སྐེམས་པོའམ་ལུས་ཟུངས་ཀྱི་ཉམས་སྟོབས་ཆུང་དུ་སོང་བ་དང་། ལུས་ནས་རྔུལ་ཆུ་འབྱུང་སླ་བ་སྟེ་རྩོལ་བ་ཅུང་ཟད་ཙམ་གྱིས་ཀྱང་རྔུལ་དོན་པ། རུས་ཚིགས་དང་ཤ་རྒོད་སོགས་ཆུ་འཁོལ་བ་ལྟར་ན་ཟུག་དྲགས་པོས་ལྡང་བ། ཆུ་རྒྱུས་གྱོང་པོ་ཆགས་ནས་ཡན་ལག་འགུལ་བསྐྱོད་དཀའ་བ། གལ་ཏེ་འགུལ་ན་ལྷག་པར་ན་ཟུག་ཆེ་ལ་ན་ཟུག་ཆེ་བའི་སྐད་ངན་ཀྱང་མཉམ་དུ་འདོན་པ་བྱེད་པ།
ལྔ་བ། གསོ་བཅོས་མདོ་བསྡུས།
དེ་ཡང་གསོ་བཅོས་མདོ་བསྡུས་ནི་རྒྱུད་བཞིའི་རྩ་བ་ལས་བསྟན་པ་ལྟར། ཀུན་ལ་སྐྱེད་ཆུང་རུས་རྩ་གཏར་བ་དང་། །གཟེབ་ཏུ་བཅུག་ལ་ཁ་བཅིང་ལན་མང་སྒྲིལ། །རྟ་ལ་བསྐྱོད་ཏེ་གསང་ལ་ཆུ་ནང་སྐྱུར། །ཞེས་དང་ཡང་ཡན་ལག་བརྒྱད་པའི་སྙིང་པོ་བསྡུས་པ་ཡིད་བཞིན་ནོར་བུ་ལས། ཀུན་གྱིས་བསྐྱེད་ཆུང་རུས་པའི་རྩ་གཏར་ལ། །གོས་ཀྱིས་བྱིབས་ལ་ལན་མང་སྒྲིལ་བྱ་ཞིང་། །རྟ་ལ་སྐྱོན་ཏེ་གསང་ལ་ཆུ་ནང་སྐྱུར། །གློ་བུར་སྐྲག་སྔངས་བྱུང་ན་ཕན་པ་ཡིན། །ཞེས་གསུངས་པ་བཞིན་གསོ་བཅོས་བྱ་དགོས་པ་སྟེ། བཅོས་ཐབས་ཟས་སྤྱོད་སྨན་དང་དཔྱད། །ཟས་ལ་ནས་རྙིང་གསར་པའི་ཟན། །བ་ར་འབྲི་མཛོད་དར་བ་དང་། །རི་དྭགས་རྒྱ་དང་ལག་བུའི་ཤ།།སྤྱོད་ལམ་བསིལ་དྲོད་སྙོམས་པར་བྱ། །སྨན་ལ་དང་པོ་བསྡུ་བ་དང་། །བར་དུ་བསད་དང་ཕྱི་རྗེས་བཅད། །ཕྱི་ནས་བྱུག་ལུམ་བྱེད་དང་བཞི། །ཞེས་པ་ལྟར་གསོ་བཅོས་བྱས་ན་ནད་སེལ་བར་ནུས་ལྡན་ནོ། །
དྲུག རྗེས་གཅོད།
རྗེས་གཅོད་ལ། ཟིན་ཏིག་བདུད་རྩིའི་ཐིགས་པ་ལས་གསུངས་པ་ལྟར། དྲེག་རྩའམ་ཆུ་སེར་གདོང་རྩ་ཅུང་ཟད་གཏར་བ་དང་། ཟིན་ཏིག་བསམ་འཕེལ་ནོར་བུ་ལས། རྗེས་གཅོད་ལྕུམ་རྩའི་འཇམ་ཁྲུས་ཤིས། །ཉེས་བྱེད་རྩ་བ་འབྱིན་པའི་ཐབས། །རྩ་ལྟོ་སྦྲག་ལ་ཡང་ཡང་བཏང་། །ཞེས་དང་། ཡང་དེ་ཉིད་ལས། གཞན་ཡང་རྔབ་རུ་ཚིགས་ཐུར་བྱ། །བཅོ་བརྒྱད་བཅུ་དགུ་ཉི་ཤུ་ཡི། །གྲུམ་གསང་དགུ་རྣམས་བསྲེག་པར་བྱ། །ཞེས་གསུངས་པ་ལྟར་བྱས་ནས་ཕན་པོ་ཡོད་དོ། །