འཁོར་བའི་སྣང་བརྙན་དམར་རྗེན་མ།

སྔོ་བསངས་བུ་མོས་ཤུགས་ཀྱིས་ཡར་བཏེགས་ཤིང་། །

སྣང་བྱེད་ཟླུམ་པོའི་མཐའ་ནས་སྐྱོད་མཁན་མ། །

སེམས་ཅན་ཐམས་ཅད་སྐྱོང་བའི་ཡུམ་ཆེན་མ། །

སྒོ་ངའི་དབྱིབས་སུ་འཛིན་པའི་དྲིན་ཆེན་མ། །

ཆུ་ཆེན་བསྡུས་ནས་མཚོ་ཆེན་བསྐྱིལ་མཁས་མ། །

རྡུལ་ཕྲན་བསགས་ནས་རི་རབ་བརྩིགས་མཁས་མ། །

ཤིང་རིགས་གསོས་ནས་ནགས་ཚལ་བསྐྲུན་མཁན་མ། །

རྩྭ་སྔོན་བཏབ་ནས་སྤང་ལྗོངས་བཟོ་མཁན་མ། །

དྲིན་ཆེན་མ་ཡི་མཚོ་གླིང་བརྒལ་བ་ན། །

སྐམ་ས་ཞེས་པའི་ས་ཡི་ལྟེ་བ་ཡོད། །

ས་ཡི་ལྟེ་བ་སྨན་ལྗོངས་བསིལ་མོ་ན། །

རི་ཡི་རྒྱལ་པོ་རི་རྒྱལ་ལྷུན་པོ་བཞུགས། །

རི་རྒྱལ་ལྷུན་པོའི་རྩ་ནས་རྩེ་མོ་བར། །

ཀྱ་མ་ཀྱུ་ཡི་ལམ་ཞིག་གཏོད་ནས་ཡོད། །

ལམ་དེའི་རིང་ཐུང་འཇལ་ན་རིང་བ་སྟེ། །

གཡས་དང་གཡོན་ན་བྲག་གི་ཐེམ་པ་མང་། །

མཐོ་རིས་ལམ་དེར་མ་བརྒྱུད་གང་ཟག་མེད། །

མཐོ་རིས་ལམ་དེ་སྲིད་པའི་བགྲོད་ལམ་ཡིན། །

མཐོ་རིས་ལམ་དེ་འཁོར་བའི་འགྲོ་ལམ་ཡིན། །

མཐོ་རིས་ལམ་དེ་འགྲོ་བའི་བཞུད་ལམ་ཡིན། །

ཆུང་ནས་བཟུང་སྟེ་བགྲོད་ལམ་དེར་བསྙེགས་ཀྱང་། །

ད་དུང་ལམ་གྱི་རྩེ་ལ་མ་སླེབས་འདུག །

རྒས་དུས་ལམ་དེའི་རྩེ་མོར་ཐོན་པ་ན། །

རེ་ཞིག་འཁོར་བའི་གནས་ལས་ཐར་བར་གསུངས། །

འཇིག་རྟེན་འཁོར་བ་མ་ཎྀ་རང་འཁོར་རེད། །

འབངས་དང་གཡོག་གི་ཐ་སྙད་དེ་ལས་བྱུང་། །

གོང་དང་འོག་གི་རིམ་པ་དེ་ཡིས་དབྱེ། །

དབུལ་དང་ཕྱུག་གི་ཁྱད་པར་དེ་ནས་ཐོན། །

ཨ་ཕ་རྒན་པོ་འཁོར་བའི་འགོ་འཛིན་འདྲ། །

ཨ་མ་བགྲེས་མོ་འཁོར་བའི་བདག་མོ་འདྲ། །

ཁྱིམ་མཚེས་གཡས་གཡོན་འཁོར་བའི་བྲན་པ་འདྲ། །

སྲིད་པའི་འཁོར་བ་ཚོང་འདུས་མགྲོན་པོ་འདྲ། །

ཐབས་ལམ་ལྡན་ན་འཁོར་བ་ཡར་འགྲོ་རེད། །

འབྲེལ་འདྲིས་ལེགས་ན་འཁོར་བ་བདེ་སྐྱིད་རེད། །

ཁ་ལྕེ་བཟང་ན་འཁོར་བ་ལམ་བཟང་རེད། །

ཚོང་ཟོག་མང་ན་འཁོར་བ་བདེ་འཇགས་རེད། །

སྲིད་པའི་འཁོར་བ་རིན་ཆེན་གསེར་དང་འདྲ། །

བཟའ་ཚང་ཁྱིམ་མི་འཁོར་བའི་མིག་དང་འདྲ། །

འདུག་ཁང་རྐུབ་སྟེགས་འཁོར་བའི་ཁྱམས་དང་འདྲ། །

སེམས་ཅན་ཐམས་ཅད་འཁོར་བའི་གཡོག་དང་འདྲ། །

འཇིག་རྟེན་འཁོར་བའི་བཞུད་ལམ་རིང་མོའི་ནང་། །

གཅིག་རྐུབ་གཅིག་གིས་སྐྱོར་བའི་ལམ་པ་མང་། །

གཅིག་གདོང་གཅིག་གིས་འགེབས་པའི་ཁྲམ་པ་མང་། །

སྐྱུག་མེར་ལངས་བའི་གཡོ་སྒྱུ་རྫུན་བཟོ་མང་། །

མཚམས་མཚམས་དགའ་དང་སྤྲོ་བས་མཛུམ་གྱིས་ཁེངས། །

མཚམས་མཚམས་མིག་མཐར་མཆི་མ་ཙར་ཙར་འཛེགས། །

སྐབས་སྐབས་ཕོ་མོའི་བརྩེ་བས་སྡུག་ལ་གཏད། །

སྐབས་སྐབས་ཆགས་སྡང་རྨོངས་པའི་དྲ་རུ་ཚུད། །

འཁོར་བ་འཁོར་ནས་མཐོ་རིས་གནས་ཀྱང་ཟིན། །

ད་དུང་ཉོན་མོངས་གཉིད་ལས་མ་ཐར་བཞུགས། །

ཉེ་རིང་ཆགས་པས་གློ་སྙིང་གབ་ནས་འདུག །

འགྲོ་བ་སེམས་ཅན་བྲན་དུ་བཀོལ་ནས་བཞག །

འཁོར་བ་རྫོགས་མཐའ་མེད་ཀྱང་སྡུག་གི་ཡུལ།

མི་ཚེ་ཟད་མཐའ་ཡོད་ཀྱང་སྐྱོ་བའི་གཞི། །

ཐར་པའི་ལམ་ནས་གྲུབ་པ་མ་ཐོབ་ན། །

ལོ་བརྒྱ་འཚོ་ཡང་སྟོང་པའི་གནས་ལས་མེད། །