ཏང་གི་ཚོགས་ཆེན་ཐེངས་བདུན་པ་ནི་ཏང་གི་ལོ་རྒྱུས་ཐོག་ལམ་ཚད་རྡོ་རིང་ལྟ་བུའི་དོན་སྙིང་གལ་ཆེན་ལྡན་པ་དང་། ང་ཚོའི་ཏང་འདི་ཉིད་ཆབ་སྲིད་དང་། བསམ་བློ། རྩ་འཛུགས་བཅས་ཀྱི་ཐོག་ནས་གནད་སྨིན་དང་འཐུས་ཚང་དུ་འགྲོ་བའི་ཕྱོགས་སུ་བསྐྱོད་པ་མཚོན་ཡོད། ཆབ་སྲིད་ཐོག་ནས་བཤད་ན། ཏང་གིས་ཡན་ཨན་དུ་ཀུན་སྤྱོད་དག་ཐེར་བྱས་པ་བརྒྱུད་དེ་ཏང་ཡོངས་མའོ་ཙེ་ཏུང་གི་དར་ཆའི་འོག་ཏུ་མཐུན་སྒྲིལ་བྱས་ནས། ཏང་གི་སྔར་བྱུང་མ་མྱོང་བའི་གཅིག་གྱུར་དང་མཐུན་སྒྲིལ་མངོན་འགྱུར་བྱུང་བ་རེད། བསམ་བློའི་ཐོག་ནས་བཤད་ན། ཏང་གིས་མའོ་ཙེ་ཏུང་གི་དགོངས་པ་དེ་ཏང་ཡོངས་ཀྱི་སློབ་སྟོན་གོ་གནས་སུ་གཏན་འཁེལ་བྱས་པ་དང་། མའོ་ཙེ་ཏུང་གི་དགོངས་པ་དེ་ཏང་གི་སྒྲིག་ཡིག་ནང་དུ་བྲིས་པ་རེད། རྩ་འཛུགས་ཀྱི་ཐོག་ནས་བཤད་ན། ཏང་ཉིད་མའོ་ཙེ་ཏུང་གི་དར་ཆ་མཐོན་པོར་སྒྲེང་བ་དང་ཚོད་བགམ་ཡུན་རིང་ཐེག་པའི་ཆབ་སྲིད་པའི་ཚོགས་ཁག་ཅིག་ཏུ་ཆགས་ཡོད། ཏང་གི་ཚོགས་ཆེན་ཐེངས་བདུན་པས་ཏང་གི་ལོ་རྒྱུས་ཐོག་གལ་འགངས་ཤིན་ཏུ་ཆེ་བའི་གོ་གནས་བཟུང་ཡོད་ལ། ཕྱིས་སུ་ཏང་གིས་རྒྱུན་ཆད་མེད་པར་རྒྱལ་ཁ་ནས་རྒྱལ་ཁའི་ཕྱོགས་སུ་བསྐྱོད་པར་ཡང་དག་པའི་ཁ་ཕྱོགས་གསལ་སྟོན་དང་ཡང་དག་པའི་འགྲོ་ལམ་བཏོད་པ་རེད།
ཡན་ཨན་གྱི་གསར་བརྗེའི་གནས་རྙིང་གིས་ང་ཚོའི་ཏང་གིས་ཡན་ཨན་དུས་སྐབས་སུ་ཀྲུང་གོའི་གསར་བརྗེར་འགོ་ཁྲིད་དང་། མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་དུ་འགྱུར་བའི་འོད་སྟོང་འཕྲོ་བའི་ལོ་རྒྱུས་ཀྱི་ལམ་བུ་འཚོལ་ཞིབ་བྱས་པ་བདེན་དཔང་བྱས་ཡོད། དེ་ནི་ནམ་ཡང་ཀློག་མི་ཚར་བའི་དཔེ་དེབ་ཅིག་རེད་དེ། བསྐྱར་དུ་ཀློག་ཐེངས་རེ་རེར་ཤེས་བྱ་གསར་པ་རེ་ཐོབ་ཡོང་བས་སློབ་གསོ་ཟབ་མོ་རེ་ཐེབས་པ་དང་བློ་སྒོ་གསར་པ་རེ་འབྱེད་ཐུབ། དོ་དམ་དང་ཞིབ་འཇུག་ཡག་པོ་བྱས་ཏེ་དོན་དངོས་དང་ཟུང་འབྲེལ་བྱས་ནས་དབྱང་ཅ་ལིང་གི་གཏམ་རྒྱུད་དང་ཏང་གི་ཚོགས་ཆེན་བདུན་པའི་གཏམ་རྒྱུད་ཡག་པོ་ཤོད་དགོས།
ཡན་ཨན་ནི་ཀྲུང་གོའི་གསར་བརྗེའི་གནས་མཆོག་དང་ཀྲུང་གོ་གསར་པའི་འབྱུང་གནས་རེད། 1935ལོ་ནས་1948ལོའི་བར་ཏང་ཀྲུང་དབྱང་དང་མའོ་ཙེ་ཏུང་སོགས་གསར་བརྗེ་པ་རྒན་རབས་ཀྱིས་ཡན་ཨན་དུ་འཚོ་བ་དང་དམག་འཐབ་ལོ་13ཙམ་གནང་བ་དང་། ཀྲུང་གོའི་གསར་བརྗེའི་བྱ་གཞག་ལ་འགོ་ཁྲིད་གནང་ནས་དམའ་རླབས་ནས་མཐོ་རླབས་སུ་བསྐྱོད་ཅིང་། ལོ་རྒྱུས་རང་བཞིན་གྱི་འཕོ་འགྱུར་མངོན་འགྱུར་དང་། ཀྲུང་གོའི་མདུན་ལམ་དང་ལས་དབང་ལ་འགྱུར་ལྡོག་བཏང་བ་རེད། བརྗིད་ཆགས་མཆོད་རྟེན་རི་བོ། ལང་ལོང་ཡན་ཨན་ཆུ་བོ། ཡན་ཨན་གྱིས་འབྲུ་རིགས་སྣ་ལྔ་སྤྱད་དེ་ཀྲུང་གོའི་གུང་ཁྲན་ཏང་འཕེལ་རྒྱས་དང་རྒྱ་སྐྱེད་བཏང་ཞིང་། ཀྲུང་གོའི་གསར་བརྗེར་རྒྱབ་སྐྱོར་བྱས་ཏེ་རྒྱལ་ཁའི་ཕྱོགས་སུ་བསྐྱོད་ཡོད། ཡན་ཨན་དང་ཡན་ཨན་མི་དམངས་ཀྱིས་ཀྲུང་གོའི་གསར་བརྗེའི་བྱ་གཞག་ལ་བྱས་རྗེས་ཧ་ཅང་ཆེན་པོ་བཞག་ཡོད་པས། ང་ཚོས་དུས་གཏན་དུ་བློ་ལ་བརྟན་པོར་ངེས་དགོས།
ངས་ཡན་ཨན་ས་ཁུལ་དུ་འཚོ་གནས་བྱས་ཏེ་ངལ་རྩོལ་ལོ་7རིང་བྱས་མྱོང་། ངའི་ཕ་རབས་ཀྱང་འདི་ནས་ཐོན་པ་ཡིན་པས། འདིར་ངས་རྒྱུས་མངའ་ཧ་ཅང་ཆེན་པོ་ཡོད། དེ་སྔ་ཧྲའན་པེར་རུ་ཁག་ཏུ་བཞུགས་སྐབས་ཡན་ཨན་བརྒྱུད་ཐེངས་རེར་ང་ཚོགས་ཆེན་བདུན་པའི་ཚོགས་ཡུལ་དང་། དབྱང་ཅ་ལིང་། ཙའོ་ཡོན། ཧྥེང་ཧོང་རི་བོ་སོགས་གསར་བརྗེའི་གནས་རྙིང་ལ་ལྟ་བར་འགྲོ་གི་ཡོད། ཀྲུང་དབྱང་དུ་ལས་ཀ་བསྒྲུབས་རྗེས། སྔ་རྗེས་སུ་ཐེངས་གསུམ་ལ་ཡན་ཨན་དུ་རྟོག་ཞིབ་དང་བརྟག་དཔྱད་བྱས། ཐེངས་འདིར་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་བློ་མཐུན་རྣམས་དང་མཉམ་དུ་ཡོང་བ་ནི། སྐབས་གསར་པའི་ཀྲུང་དབྱང་འགོ་ཁྲིད་ཚན་པས་ཡན་ཨན་དུས་སྐབས་སུ་ཆགས་པའི་ཏང་གི་གསར་བརྗེའི་སྲོལ་རྒྱུན་དང་སྤྱོད་ཚུལ་བཟང་པོ་རྒྱུན་འཛིན་དང་དར་སྤེལ་གཏོང་དགོས་པ་སྟེ། ཡན་ཨན་གྱི་སྙིང་སྟོབས་དར་སྤེལ་གཏོང་རྒྱུ་ཁྱབ་བསྒྲགས་བྱེད་པའི་ཆེད་དུ་ཡིན།
ཡན་ཨན་གྱི་དུས་སྐབས་སུ་གཟི་བརྗིད་ལྡན་པའི་སྲོལ་རྒྱུན་དང་སྤྱོད་ཚུལ་བཟང་པོ་ཆགས་པ་དང་དར་སྤེལ་བཏང་ཞིང་། ཡང་དག་པའི་ཆབ་སྲིད་ཀྱི་ཁ་ཕྱོགས་བརྟན་པོ་དང་། བསམ་བློ་བཅིངས་འགྲོལ་དང་དངོས་ཐོག་བདེན་འཚོལ་གྱི་བསམ་བློའི་ལམ་ཕྱོགས། བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི་རྩ་བའི་དགོངས་དོན། རང་སྟོབས་རང་སྤེལ་དང་དཀའ་སྤྱད་འབད་བརྩོན་གྱི་ལས་གཏོད་སྙིང་སྟོབས་བཅས་ནང་དོན་གཙོ་བོར་གྱུར་པའི་ཡན་ཨན་གྱི་སྙིང་སྟོབས་ཆགས་པ་བྱ་རྒྱུ་ནི་ཏང་གི་རྩ་ཆེའི་བསམ་པའི་རྒྱུ་ནོར་ཡིན་པས་མི་རབས་ནས་མི་རབས་བར་རྒྱུན་འཛིན་བྱེད་དགོས།
ཡང་དག་པའི་ཆབ་སྲིད་ཀྱི་ཁ་ཕྱོགས་བརྟན་པོ་ཡོང་བ་བྱ་རྒྱུ་ནི་ཡན་ཨན་གྱི་སྙིང་སྟོབས་ཀྱི་སྙིང་བཅུད་ཡིན། 1938ལོར། བློ་མཐུན་མའོ་ཙེ་ཏུང་གིས་ཡན་ཨན་ལྗར་འགོག་དམག་སྲིད་སློབ་ཆེན་དུ་“ལྗར་འགོག་དམག་སྲིད་སློབ་ཆེན་དུ་ཅི་ཞིག་སློབ་སྦྱོང་བྱེད་དགོས་པ་”ཞེས་པའི་སྐབས་སུ་“ཐོག་མར་ཆབ་སྲིད་ཀྱི་ཁ་ཕྱོགས་ཤིག་སློབ་དགོས་”ཞེས་བསྟན་ཡོད། ཏང་ཡོངས་ཀྱི་བློ་མཐུན་ཚོས་ཆབ་སྲིད་ཀྱི་ཁ་ཕྱོགས་ཡང་དག་པ་རྒྱུན་འཁྱོངས་དང་། ཏང་གི་གཞི་རྩའི་རིགས་པའི་གཞུང་ལུགས་དང་། གཞི་རྩའི་ལམ་ཕྱོགས། གཞི་རྩའི་ཇུས་གཞི་ཆེན་པོ་བཅས་ལག་ལེན་མཐར་ཕྱིན་མཐའ་གཅིག་ཏུ་བསྟར་བ། ཏང་ཀྲུང་དབྱང་གི་ཐབས་ཇུས་དང་བཀོད་སྒྲིག་དོན་འཁྱོལ་མཐའ་གཅིག་ཏུ་བྱས་ནས་གསར་བརྗེ་པ་རྒན་རབས་ཚོས་གསར་གཏོད་གནང་བའི་བྱ་གཞག་རླབས་པོ་ཆེ་གོང་དུ་སྤེལ་བར་སྐུལ་འདེད་གཏོང་དགོས།
ཡན་ཨན་གྱི་དུས་སྐབས་སུ། ཏང་གིས་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི་རྩ་བའི་དགོངས་དོན་བཏོན་པ་དང་འབྲེལ་ཏང་གི་སྒྲིག་ཡིག་ནང་བཀོད་ནས། གུང་ཁྲན་ཏང་གི་“དཔུང་སྡེ་འདི་ནི་མི་དམངས་བཅིངས་འགྲོལ་གཏོང་བའི་ཆེད་དུ་ཡིན་པ་དང་། མི་དམངས་ཀྱི་ཁེ་ཕན་གྱི་ཆེད་དུ་ལས་ཀ་མཐར་ཕྱིན་པ་སྒྲུབ་པ་ཞིག་ཡིན་”ཞེས་ནན་བཤད་བྱས་པ་དང་། ཏང་གི་ལས་བྱེད་པར་“མི་སེར་གྱི་ཕྱོགས་སུ་བརྟན་པོར་ལངས་དགོས་”ཞེས་བླང་བྱ་བཏོན་པས། “སྤྱི་དམངས་ལ་ཞབས་འདེགས་ཞུ་མཁན་ལས་དཔོན་པོ་མི་མཐོང་བ་”ཞེས་པའི་གསོན་ཉམས་ལྡན་པའི་རྣམ་པ་ཆགས་ཡོད། ཏང་ཡོངས་ཀྱི་བློ་མཐུན་ཚོས་མི་དམངས་ཀྱི་ལངས་ཕྱོགས་སུ་བརྟན་པོ་ལངས་པ་དང་། ཏང་གི་དགོངས་དོན་ལག་ལེན་བསྟར་བ། ཏང་གི་མང་ཚོགས་ལམ་ཕྱོགས་ལག་ལེན་བསྟར་བ། ཏང་དང་མི་དམངས་མང་ཚོགས་བར་གྱི་ཤ་ཁྲག་ལྟ་བུའི་འབྲེལ་བ་རྒྱུན་འཁྱོངས་བྱེད་པ། རང་རྟོགས་ངང་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་དེ་ལས་དོན་སོ་སོའི་ནང་ཁྱབ་པ་བྱེད་པ། ཐུན་མོང་ཐོག་ཕྱུག་པོ་འགྱུར་རྒྱུར་སྐུལ་འདེད་ཏན་ཏིག་གཏོང་བ་བཅས་བྱས་ནས་དེང་རབས་ཅན་འཛུགས་སྐྲུན་གྱི་གྲུབ་འབྲས་དེ་མི་དམངས་ཡོངས་ལ་སྔར་བས་མང་བ་དང་སྔར་བས་དྲང་གཞག་སྒོས་ཕན་པ་ཐོབ་པར་བྱེད་དགོས།
ཏང་ཀྲུང་དབྱང་དང་དམར་དམག་གིས་ཡན་ཨན་དུ་གཞིས་ཆགས་རྗེས། དགྲ་བོས་དམག་དོན་གྱི་མཐའ་སྐོར་བ་དང་དཔལ་འབྱོར་གྱི་བཀག་སྡོམ་བྱས་པའི་དབང་གིས་ཆ་རྐྱེན་ཧ་ཅང་ཞན། ཡན་ཨན་གྱི་དམག་དམངས་ཀྱིས་བློ་མཐུན་མའོ་ཙེ་ཏུང་གིས་བཏོན་པའི་“རང་ཉིད་ཀྱིས་ལག་པ་འགུལ་ན་ལྟོ་གོས་གཉིས་འཛོམས་ཡོང་ཐུབ་”ཅེས་པའི་འབོད་སྐུལ་དང་ལེན་ཧུར་ཐག་ཞུས་ཏེ་ཚ་ཚ་འུར་འུར་གྱི་ཐོན་སྐྱེད་ལས་འགུལ་ཆེན་པོ་སྤེལ་བ་དང་ལྗར་འགོག་གཡུལ་སར་རྒྱབ་སྐྱོར་ནུས་ལྡན་བྱས་ཡོད། ཏང་ཡོངས་ཀྱི་བློ་མཐུན་ཚོས་རང་སྟོབས་རང་སྤེལ་དང་དཀའ་སྤྱད་འབད་བརྩོན་གྱི་སྙིང་སྟོབས་དར་སྤེལ་ཤུགས་ཆེན་གཏོང་དགོས་ཤིང་། སླད་ཕྱིན་ང་ཚོས་དངོས་པོའི་འཚོ་བ་ཅི་འདྲ་ཕུན་སུམ་ཚོགས་པོ་ཡོད་ན་ཡང་། རང་སྟོབས་རང་སྤེལ་དང་དཀའ་སྤྱད་འབད་བརྩོན་གྱི་སྙིང་སྟོབས་ཅིས་ཀྱང་དོར་མི་རུང་ལ། ཏན་ཏན་ཏིག་ཏིག་དང་དཀའ་སྤྱད་དོན་གཉེར། སེམས་ཤུགས་གཅིག་ཏུ་བསྡུས་ནས་རང་ཉིད་ཀྱི་བྱ་བ་ལེགས་པོར་སྒྲུབ་པ་བཅས་བྱས་ཏེ་རྒྱལ་ཁབ་དང་མི་རིགས་འཕེལ་རྒྱས་གཏོང་རྒྱུ་དེ་རང་ཉིད་ཀྱི་སྟོབས་ཤུགས་ཀྱི་རྨང་གཞིའི་ཐོག་འཇོག་དགོས།
ལོ་དེ་གར་བློ་མཐུན་མའོ་ཙེ་ཏུང་སོགས་གསར་བརྗེ་པ་རྒན་རབས་ཚོ་ཡན་ཨན་དུ་བཞུགས་རིང་། བྲག་ཕུག་ཏུ་བསྡོད་པ་དང་། འབྲུ་རྩིང་ཟ་བ། རས་ཆས་གྱོན་པ་བཅས་གནང་ནས་“ཡན་ཨན་གྱི་སྤྱོད་ཚུལ་”ལ་བརྟེན་ནས་“ཞི་ཨན་གྱི་སྤྱོད་ཚུལ་”ཕམ་པར་གནང་བ་རེད། ཏང་ཡོངས་ཀྱི་བློ་མཐུན་ཚོས་གསར་བརྗེ་པ་རྒན་རབས་དང་གུང་ཁྲན་ཏང་མིས་བཞག་པའི་གཟི་བརྗིད་ལྡན་པའི་སྲོལ་རྒྱུན་དང་སྤྱོད་ཚུལ་བཟང་པོ་རྒྱུན་འཛིན་དང་དར་སྤེལ་ཡག་པོ་གཏོང་བ་དང་། ཏང་གིས་རང་ངོས་གསར་བརྗེ་བྱ་རྒྱུར་སྐུལ་འདེད་གཏོང་ཕོད་པ། བློ་བརྟན་འགྱུར་མེད་ངང་ཕྱོགས་ཡོངས་ནས་ཏང་ནན་པོས་སྐྱོང་རྒྱུར་སྐུལ་འདེད་གཏོང་བ། ཏང་གི་སྔོན་ཐོན་རང་བཞིན་དང་དྭངས་གཙང་རང་བཞིན་ཐོག་མཐའ་བར་གསུམ་དུ་མཐའ་འཁྱོངས་བཅས་བྱས་ནས། ཏང་འདི་ཉིད་ཐོག་མཐའ་བར་གསུམ་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བྱ་གཞག་གི་འགྱུར་མེད་སྟོབས་ལྡན་གྱི་འགོ་ཁྲིད་སྲོག་ཤིང་དུ་འགྱུར་རྒྱུའི་འགན་ལེན་བྱེད་དགོས།
ཡན་ཨན་གྱི་དུས་སྐབས། ཏང་གིས་ཞུམ་མེད་ཀྱི་འཐབ་རྩོད་སྙིང་སྟོབས་དང་འཐབ་རྩོད་བྱེད་པའི་ནུས་རྩལ་ཁྱད་དུ་འཕགས་པར་བརྟེན། ལྗར་པན་དམག་རྒྱལ་རིང་ལུགས་ཀྱི་བཙན་འཛུལ་ལ་འགོག་རྒོལ་བྱེད་པའི་འཐབ་རྩོད་ནུས་ལྡན་ངང་སྤེལ་བ་དང་། ཞི་ཨན་དུས་འགྱུར་དང་། བདུན་བདུན་དུས་འགྱུར། ཁྲུང་ཆིན་གྱི་གྲོས་མོལ་སོགས་ཀྱི་འགྲན་སློང་གལ་ཆེན་རབ་དང་རིམ་པར་ཁ་གཏད་ནུས་ལྡན་འཇལ་བ་རེད་ལ། རྒྱལ་ཡོངས་ཀྱི་གསར་བརྗེའི་འཐབ་རྩོད་ལ་འགོ་ཁྲིད་དང་བཀོད་འདོམས་ནུས་ལྡན་བྱས་པ་དང་། གོ་མིན་ཏང་དམག་དཔུང་གིས་ཧྲའན་ཀན་ཉིང་མཐའ་མཚམས་ས་ཁུལ་ལ་གཙོ་གནད་ཚུར་རྒོལ་བྱེད་པར་ཁ་གཏད་ནུས་ལྡན་འཇལ་ནས། འབྲས་དང་མེ་མདར་བརྟེན་ནས་ཀྲུང་གོའི་གསར་བརྗེའི་རྣམ་པ་གསར་པ་བཏོད་པ་རེད། ཏང་ཡོངས་ཀྱི་བློ་མཐུན་ཚོས་འཐབ་རྩོད་ཀྱི་སྙིང་སྟོབས་དར་སྤེལ་དང་འཐབ་རྩོད་ཀྱི་འཇོན་ཐང་ཆེ་རུ་བཏང་ནས། མདུན་སྐྱོད་ལམ་བུའི་ཐོག་གི་དཀའ་ངལ་དང་འགྲན་སློང་སྣ་ཚོགས་ལས་མཐའ་གཅིག་ཏུ་རྣམ་པར་རྒྱལ་ཏེ། ཞུམ་མེད་ཀྱི་འཐབ་རྩོད་ལ་བརྟེན་ནས་བྱ་གཞག་འཕེལ་རྒྱས་ཀྱི་རྣམ་པ་གསར་པ་གཏོད་དགོས།
ཏང་གི་ཚོགས་ཆེན་ཐེངས་ཉི་ཤུ་པའི་ཐོག་མིག་སྔ་དང་སླད་ཕྱིན་དུས་སྐབས་ཤིག་རིང་གི་ཏང་དང་རྒྱལ་ཁབ་ཀྱི་སྲིད་ཇུས་དང་བྱེད་ཕྱོགས་གལ་ཆེན་གཏན་འབེབས་བྱས་པ་དང་། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་བའི་བརྗིད་ཉམས་ཆེ་བའི་འཆར་གཞི་བཀོད་ཡོད། ང་ཚོ་འཐབ་ལམ་གསར་པའི་ཐོག་བསྐྱོད་དེ་འབད་འཐབ་ཀྱི་དམིགས་འབེན་གསར་པའི་ཕྱོགས་སུ་བསྐྱོད་དགོས།
ལྷག་པ་ཚེ་རིང་གིས་བསྒྱུར།