འཐབ་ལམ་གསར་པའི་ཐོག་ཀྲུང་གོའི་གུང་ཁྲན་ཏང་མིའི་གཟབ་ནན་གྱི་གསལ་བསྒྲགས།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གོའི་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་ཉི་ཤུ་པའི་འགོ་ཚུགས་ཚོགས་འདུའི་ཐོག་ནན་གསུང་ཁ་གསལ་གནང་དོན། “ཚོགས་ཆེན་གྱི་བརྗོད་བྱ་གཙོ་བོ་ནི། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེ་མཐོན་པོར་བསྒྲེངས་ཏེ། ཕྱོགས་ཡོངས་ནས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ལག་ལེན་མཐར་ཕྱིན་བྱེད་པ་དང་། ཏང་འཛུགས་སྙིང་སྟོབས་རླབས་པོ་ཆེ་དར་སྤེལ་གཏོང་བ། རང་རྟོན་རང་དར་དང་། བདེན་སྲུང་གསར་གཏོད། ངར་སེམས་ཆེར་སྐྱེད། དཔའ་སྐྱེད་མདུན་སྐྱོད་བཅས་བྱས་ཏེ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པ་དང་། ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་ཆེད་མཐུན་སྒྲིལ་འབད་འཐབ་བྱེད་དགོས་པ་འདི་ཡིན།”

ཏང་གི་ཚོགས་ཆེན་ཐེངས་ཉི་ཤུ་པ་ནི་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་རྣམས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་འཐབ་ལམ་ཐོག་སྐྱོད་པ་དང་། ལོ་བརྒྱ་གཉིས་པའི་འབད་འཐབ་དམིགས་འབེན་གྱི་ཕྱོགས་སུ་དཔུང་འཇུག་བྱེད་པའི་འགག་རྩའི་དུས་སུ་སྐོང་འཚོགས་བྱས་པའི་གལ་འགངས་ཤིན་ཏུ་ཆེ་བའི་ཚོགས་ཆེན་ཞིག་ཡིན། དེ་ནི་དར་ཆ་མཐོན་པོར་སྒྲེང་བ་དང་། སྟོབས་ཤུགས་གོང་བུར་འགྲིལ་བ། མཐུན་སྒྲིལ་ཡར་བརྩོན་བཅས་ཀྱི་ཚོགས་ཆེན་ཞིག་ཡིན་པས། ང་ཚོའི་ཏང་གིས་དུས་རབས་གསར་པ་དང་འཐབ་ལམ་གསར་པའི་ཐོག་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་། ཕྱོགས་ཡོངས་ནས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་བར་དངོས་ཡོད་ཀྱི་དོན་སྙིང་གལ་ཆེན་དང་ལོ་རྒྱུས་ཀྱི་དོན་སྙིང་གཏིང་ཟབ་ལྡན་ཡོད།

ཚོགས་ཆེན་གྱི་བརྗོད་བྱ་གཙོ་བོ་ནི་ཚོགས་ཆེན་གྱི་དགོངས་དོན་གྱི་གཅིག་བསྡུས་མཚོན་ཚུལ་ཞིག་ཡིན་ལ། ཚོགས་ཆེན་གྱི་བླ་སྲོག་ཀྱང་ཡིན། ཏང་གི་ཚོགས་ཆེན་ཐེངས་ཉི་ཤུ་པའི་སྙན་ཞུའི་ནང་བརྗོད་བྱ་གཙོ་བོ་འབུར་དུ་བཏོན་ཏེ། ཏང་ཕྱི་ནང་དང་རྒྱལ་ཁབ་ཕྱི་ནང་ལ་ང་ཚོའི་ཏང་གིས་འཐབ་ལམ་གསར་པའི་ཐོག་དར་ཆ་གང་འདྲ་ཞིག་སྒྲེང་བ་དང་། ལམ་བུ་གང་འདྲ་ཞིག་ཏུ་བསྐྱོད་པ། བསམ་པའི་འཁྱེར་ཕྱོགས་གང་འདྲ་ཞིག་ལ་བརྟེན་པ། དམིགས་འབེན་གང་འདྲ་ཞིག་གི་ཕྱོགས་སུ་མུ་མཐུད་མདུན་སྐྱོད་བྱེད་པ་བཅས་ཀྱི་གནད་དོན་གལ་ཆེན་གསལ་པོར་བསྒྲགས་ཡོད། འདི་ནི་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏོང་བའི་སྤྱིའི་རྩ་འཛིན་ཡིན་ལ། འཐབ་ལམ་གསར་པའི་ཐོག་ཀྲུང་གོའི་གུང་ཁྲན་ཏང་མིའི་རྩ་བའི་བསྲུང་བྱ་ཡིན།

——ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེ་མཐོན་པོར་བསྒྲེངས་ཏེ། ཕྱོགས་ཡོངས་ནས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ལག་ལེན་མཐར་ཕྱིན་བསྟར་དགོས་ན། ཏང་ཡོངས་ཀྱིས་ངེས་པར་དུ་མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་གྱི་གྲུབ་འབྲས་གསར་ཤོས་སློབ་སྟོན་དུ་བཟུང་རྒྱུ་རྒྱུན་འཁྱོངས་བྱས་ནས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་གྱི་གདེང་ཚོད་དང་། རིགས་པའི་གཞུང་ལུགས་ཀྱི་གདེང་ཚོད། ལམ་ལུགས་ཀྱི་གདེང་ཚོད། རིག་གནས་ཀྱི་གདེང་ཚོད་བཅས་བརྟན་དུ་གཏོང་བ་དང་། འགྲོ་ལམ་མི་བསྒྱུར་བ་དང་ཕུགས་བསམ་མི་འདོར་བ་རྒྱུན་འཁྱོངས་བྱས་ནས་ཏང་དང་རྒྱལ་ཁབ་ཀྱི་བྱ་གཞག་ཐོག་མཐའ་བར་གསུམ་དུ་ཡང་དག་པའི་ཁ་ཕྱོགས་བརྒྱུད་ནས་རྒྱལ་ཁའི་ངང་མདུན་སྐྱོད་ཐུབ་པར་འགན་ལེན་བྱེད་དགོས་པ་གཟབ་ནན་གྱི་གསལ་བསྒྲགས་བྱེད་དགོས།

ཁ་ཕྱོགས་ཀྱིས་འགྲོ་ལམ་གཏན་འཁེལ་བྱེད་པ་དང་འགྲོ་ལམ་གྱིས་ལས་དབང་གཏན་འཁེལ་བྱེད་ཀྱི་ཡོད། ཏང་གིས་ལོ་ངོ་བརྒྱ་ཕྲག་ལ་འབད་འཐབ་བྱས་རིང་ཐོག་མཐའ་བར་གསུམ་དུ་རང་རྒྱལ་གྱི་གནས་ཚུལ་དངོས་ལ་གཞིགས་པ་རྒྱུན་འཁྱོངས་བྱས་ནས་ཀྲུང་གོའི་དོན་དངོས་དང་མཐུན་པའི་འགྲོ་ལམ་ཡང་དག་ཅིག་འཚོལ་ཞིབ་བྱས་ཤིང་ཆགས་ཐུབ་པ་བྱུང་ཡོད། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱིས་མི་རབས་ཁ་ཤས་ཀྱི་ཀྲུང་གོའི་གུང་ཁྲན་ཏང་མིའི་ཕུགས་བསམ་དང་འཚོལ་ཞིབ་མཚོན་ཡོད་པ་མ་ཟད། གྲངས་ལས་འདས་པའི་སྤྱོད་བཟང་འདུན་ཆེའི་མི་སྣའི་བསམ་འདུན་དང་རེ་སྨོན་བཅོལ་ཡོད་ལ། མི་དམངས་དུང་ཕྱུར་མང་པོའི་འབད་འཐབ་དང་ཚེ་སྲོག་ཀྱང་འདུས་ཡོད་པས། དེ་ནི་ཏང་དང་མི་དམངས་ཀྱིས་དཀའ་སྡུག་ཚད་མེད་མྱོང་བ་དང་རིན་དོད་ཆེན་པོ་བཏང་ནས་ཐོབ་པའི་རྩ་བའི་གྲུབ་འབྲས་ཡིན། ལོ་རྒྱུས་དང་དོན་དངོས་གཉིས་ཀྱི་ཐོག་ནས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ནི་ཀྲུང་གོའི་དོན་དངོས་དང་མཐུན་པ་དང་། ཀྲུང་གོའི་མི་དམངས་ཀྱི་བསམ་འདུན་མཚོན་པ། དུས་རབས་འཕེལ་རྒྱས་ཀྱི་བླང་བྱ་དང་འཚམ་པ་བཅས་ཡིན་པ་ར་སྤྲོད་གང་ལེགས་བྱུང་ཡོད། འཐབ་ལམ་གསར་པའི་ཐོག་ཏང་གི་ལོ་རྒྱུས་ཀྱི་ལས་འགན་མངོན་འགྱུར་བྱེད་པར་ཆེས་རྩ་བར་གྱུར་པ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཞེས་པའི་མཐུན་སྒྲིལ་གྱི་དར་ཆ་དང་། འབད་འབུངས་ཀྱི་དར་ཆ། རྒྱལ་ཁའི་དར་ཆ་བཅས་མཐོན་པོར་སྒྲེང་རྒྱུ་དེ་རེད།

ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་རྒྱུ་ནི་དོན་ཆེན་ཞིག་ཡིན། ཏང་གི་ཚོགས་ཆེན་ཐེངས་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྐུ་ཚབ་གཙོ་བོ་གནང་བའི་ཀྲུང་གོའི་གུང་ཁྲན་ཏང་མིས་རིགས་པའི་གཞུང་ལུགས་འཚོལ་ཞིབ་དང་། གསར་གཏོད་བྱེད་ཕོད་པ་དང་། མཐོང་རྒྱ་གསར་རྐྱང་བཅས་ཀྱི་ཐོག་ནས་གུང་ཁྲན་ཏང་གི་སྲིད་སྐྱོང་ཆོས་ཉིད་དང་། སྤྱི་ཚོགས་རིང་ལུགས་འཛུགས་སྐྲུན་གྱི་ཆོས་ཉིད། མིའི་རིགས་ཀྱི་སྤྱི་ཚོགས་འཕེལ་རྒྱས་ཀྱི་ཆོས་ཉིད་བཅས་ལ་ངོས་འཛིན་གཏིང་ཟབ་ཏུ་བཏང་སྟེ་རིགས་པའི་གཞུང་ལུགས་གསར་གཏོད་ཀྱི་གྲུབ་འབྲས་གལ་ཆེན་ཐོབ་ཡོད་པ་དེས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་གཅིག་སྡུད་ཐོག་མཚོན་གྱི་ཡོད། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ནི་དེང་རབས་ཀྱི་ཀྲུང་གོའི་མར་ཁེ་སིའི་རིང་ལུགས་དང་དུས་རབས་ཉེར་གཅིག་པའི་མར་ཁེ་སིའི་རིང་ལུགས་ཡིན་པ་དང་། ཀྲུང་ཧྭའི་རིག་གནས་དང་ཀྲུང་གོའི་སྙིང་སྟོབས་ཀྱི་དུས་རབས་ཀྱི་སྙིང་བཅུད་ཡིན་པས་མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་དུ་འགྱུར་བའི་འཕུར་སྐྱོད་གསར་པ་མངོན་འགྱུར་བྱུང་བ་རེད། དུས་རབས་གསར་པའི་ལོ་10ཡི་ནང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགོ་ཁྲིད་བརྟན་པོ་དང་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ཁྲིད་སྟོན་འོག། ང་ཚོའི་ཏང་གིས་མི་དམངས་ལ་དམ་པོར་བརྟེན་ནས་དཔལ་འབྱོར་བརྟན་པོ་ཡོང་བར་བྱེད་པ་དང་། འཕེལ་རྒྱས་ལ་སྐུལ་འདེད་གཏོང་བ། དབུལ་ཕོངས་ལས་སྒྲོལ་བ། འབྱོར་འབྲིང་ལ་བརྩོན་པ། རིམས་ནད་ཚོད་འཛིན་བྱེད་པ། གནོད་འཚེ་ཆེན་པོ་འགོག་པ། འགྱུར་ལྡོག་ལ་ཁ་གཏད་འཇལ་བ། ཉམས་ཉེན་སེལ་བ་བཅས་བྱས་ཏེ། སྤྱི་ཚོགས་རིང་ལུགས་ཀྱི་ཀྲུང་གོ་སྔར་བས་བརྗིད་ཉམས་ཆེན་པོའི་ངང་འཛམ་གླིང་གི་ཤར་ཕྱོགས་སུ་འགྱིང་ངེར་ལངས་པ་དང་། ཚན་རིག་སྤྱི་ཚོགས་རིང་ལུགས་ལ་དུས་རབས་21པའི་ཀྲུང་གོར་གསོན་ཤུགས་གསར་པ་རབ་ཏུ་རྒྱས་ཡོད། དེ་ལས་“ཀྲུང་གོའི་གུང་ཁྲན་ཏང་འཇོན་པོ་ཡོད་དོན་གང་ཡིན་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཡག་པོ་ཡོད་དོན་གང་ཡིན་པ་དེ་མཐར་གཏུགས་ནས་བཤད་ན་མར་ཁེ་སིའི་རིང་ལུགས་འཕེར་པོ་ཡོད་པ་དང་། ཀྲུང་གོ་ཅན་དང་དུས་རབས་ཅན་གྱི་མར་ཁེ་སིའི་རིང་ལུགས་འཕེར་པོ་ཡོད་པས་ཡིན་པ་”གཏིང་ཟབ་པའི་སྒོ་ནས་ར་སྤྲོད་བྱས་ཡོད།

དགོངས་དོན་དར་ཆས་ལམ་སྣ་ཁྲིད། ཡང་དག་ལམ་བུས་ལེའུ་གསར་རྩོམ། འཐབ་ལམ་གསར་པའི་ཐོག་ངེས་པར་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྟོན་དུ་བཟུང་རྒྱུ་རྒྱུན་འཁྱོངས་དང་། ཕྱོགས་ཡོངས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་འཇིག་རྟེན་ལྟ་བ་དང་བརྟག་ཐབས་སྨྲ་བ། དེའི་ནང་ཁྱབ་པའི་ལངས་ཕྱོགས་དང་ལྟ་བ་དང་བྱེད་ཐབས་བཅས་ཁོང་དུ་ཆུད་པར་བྱས་ཤིང་། “ཟུང་འབྲེལ་གཉིས་”དང་“ངེས་པར་དུ་རྒྱུན་འཁྱོངས་བྱེད་དགོས་པ་དྲུག་”ལ་གོ་བ་གཏིང་ཟབ་ལེན་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་དོན་གྱི་སྙིང་པོར་ཤེས་རྟོགས་ཡང་དག་བྱེད་ཅིང་། ལག་ལེན་གྱི་རྨང་གཞིའི་ཐོག་རིགས་པའི་གཞུང་ལུགས་གསར་གཏོད་བྱ་རྒྱུར་མུ་མཐུད་སྐུལ་འདེད་གཏོང་བ་དང་། བསམ་བློའི་སྟོབས་ཤུགས་ལ་བརྟེན་ནས་འབད་འབུངས་ཡར་བརྩོན་བྱེད་པ། རིགས་པའི་གཞུང་ལུགས་ཀྱི་རང་དབང་ལ་བརྟེན་ནས་ལོ་རྒྱུས་ཀྱི་རང་དབང་སྟངས་འཛིན་བྱས་ནས་མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་གྱི་ལེའུ་གསར་པ་རྒྱུན་ཆད་མེད་པར་རྩོམ་དགོས།

——ཏང་འཛུགས་སྙིང་སྟོབས་རླབས་པོ་ཆེ་དར་སྤེལ་གཏོང་དགོས་ན། ཏང་ཡོངས་ཀྱིས་ངེས་པར་དུ་ཏང་འཛུགས་སྙིང་སྟོབས་རླབས་པོ་ཆེ་ལ་བརྩི་སྲུང་ནན་པོ་ཞུ་བ་དང་། ཏང་དང་མི་དམངས་མང་ཚོགས་བར་གྱི་ཤ་ཁྲག་ལྟ་བུའི་འབྲེལ་བ་རྒྱུན་འཁྱོངས་བྱེད་པ། ཁེངས་སྐྱུང་གཟབ་ནན་དང་དཀའ་སྤྱད་འབད་བརྩོན་གྱི་ཆབ་སྲིད་རང་བཞིན་དང་། དེ་བཞིན་འཐབ་རྩོད་བྱེད་ཕོད་པ། རྒྱལ་ཁ་ལེན་ཕོད་པའི་བློ་སྟོབས་དང་གཤིས་རྒྱུད་རྒྱུན་འཁྱོངས་བྱས་ནས་ཏང་འདི་ཉིད་ཐོག་མཐའ་བར་གསུམ་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བྱ་གཞག་གི་འགྱུར་མེད་སྟོབས་ལྡན་གྱི་འགོ་ཁྲིད་སྲོག་ཤིང་དུ་འགྱུར་རྒྱུའི་འགན་ལེན་བྱེད་དགོས་པ་གཟབ་ནན་གྱི་གསལ་བསྒྲགས་བྱེད་དགོས།

“ཏང་འཛུགས་སྙིང་སྟོབས་རླབས་པོ་ཆེ་དར་སྤེལ་གཏོང་བ་དང་། ཡན་ཨན་གྱི་སྙིང་སྟོབས་དར་སྤེལ་གཏོང་བ། ལོ་རྒྱུས་ཀྱི་གདེང་ཚོད་བརྟན་དུ་གཏོང་བ། ལོ་རྒྱུས་ཀྱི་རང་དབང་ཆེ་རུ་གཏོང་བ། འཐབ་རྩོད་ཀྱི་སྙིང་སྟོབས་དར་སྤེལ་གཏོང་བ་བཅས་བྱས་ནས་ཏང་གི་ཚོགས་ཆེན་ཐེངས་ཉི་ཤུ་པའི་ཐོག་བཏོན་པའི་དམིགས་འབེན་ལས་འགན་མངོན་འགྱུར་བྱེད་ཆེད་མཐུན་སྒྲིལ་འབད་འཐབ་བྱེད་དགོས།” ཏང་གི་ཚོགས་ཆེན་ཉི་ཤུ་པ་གྲོལ་ནས་གཟའ་འཁོར་གཅིག་ཙམ་ཡང་མ་སོང་བར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྐབས་གསར་པའི་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུའི་སྣེ་ཁྲིད་ནས་ཡན་ཨན་གསར་བརྗེའི་དྲན་གསོ་ཁུལ་ལ་གནས་མཇལ་བྱེད་སྐབས་དེ་ལྟར་ནན་གསུང་གནང་།

ལམ་ཐག་རིང་ཞིང་འོད་སྟོང་འཕྲོ་བའི་འབྱུང་འགྱུར་ཕྱོགས་སུ་ཅི་ཙམ་བསྐྱོད་ནའང་བརྒྱུད་མྱོང་བའི་ལམ་བུ་བརྗེད་མི་རུང་ལ་རྡོག་ཐོན་བྱེད་དགོས་དོན་གང་ཡིན་པའང་བརྗེད་མི་རུང་། ང་ཚོའི་ཏང་འདི་ལོ་ངོ་བརྒྱ་ཡི་རིང་ལ་ལང་ཚོ་དར་ལ་བབ་པའི་རྒྱུ་མཚན་དང་། དཀའ་སྡུག་ཚད་མེད་མྱངས་ཀྱང་མི་རབས་ནས་མི་རབས་བར་ཉམས་པ་མེད་པ་ནི་གསར་བརྗེ་བྱས་པ་ཙམ་མ་ཟད་ཚེ་སྲོག་ཀྱང་བློས་གཏོང་ཕོད་པའི་སྙིང་སྟོབས་ཆེན་པོ་དེ་འདྲ་ཞིག་ལ་བརྟེན་པས་རེད། ལོ་ངོ་100ལྷག་གི་རིང་ལ། མི་རབས་ནས་མི་རབས་བར་ཀྲུང་གོའི་གུང་ཁྲན་ཏང་མིས་ཞུམ་མེད་འབད་འཐབ་དང་ཧུར་བརྩོན་ལྷོད་མེད་བྱས་པས། ཏང་འཛུགས་སྙིང་སྟོབས་རླབས་པོ་ཆེ་འབྱུང་རྩར་འཛིན་པའི་བསམ་པའི་མ་ལག་ཆགས་ཡོད། རྩ་ཆེའི་བསམ་པའི་རྒྱུ་ནོར་དེ་དག་ལ་“ང་ཚོ་གང་ནས་ཡོང་བ་དང་གང་དུ་བསྐྱོད་པའི་”བསམ་པའི་གསང་གྲངས་ཚུད་པ་དང་། ཏང་གི་བློ་བརྟན་འགྱུར་མེད་ཀྱི་དད་སེམས་དང་། རྩ་བའི་དགོངས་དོན། སྤྱོད་ཚུལ་བཟང་པོ་བཅས་གཅིག་སྡུད་ཐོག་མཚོན་ཞིང་། ཀྲུང་གོའི་གུང་ཁྲན་ཏང་མིའི་དཀའ་སྤྱད་འབད་འཐབ་དང་། བློས་གཏོང་ལེགས་སྐྱེས། གསར་འབྱེད་ཡར་བརྩོན་བཅས་ཀྱི་གཤིས་རྒྱུད་རླབས་པོ་ཆེ་གཅིག་ཏུ་འདུས་པ་བཅས་ལས་ང་ཚོའི་ཏང་འཛུགས་པ་དང་། ཏང་དར་བ། ཏང་སྟོབས་ལྡན་ཆགས་པ་བཅས་ལ་འཚོ་བཅུད་ཕུན་སུམ་ཚོགས་པོ་མཁོ་འདོན་བྱས་ཡོད། ཏང་གི་ཚོགས་ཆེན་ཐེངས་ཉི་ཤུ་པའི་སྙན་ཞུའི་ནང་“ཏང་འཛུགས་སྙིང་སྟོབས་རླབས་པོ་ཆེ་དར་སྤེལ་གཏོང་རྒྱུ་”དེ་ཚོགས་ཆེན་གྱི་བརྗོད་བྱ་གཙོ་བོར་བཞག་ཡོད། དེ་ནི་ཏང་ཡོངས་ཀྱིས་ཐོག་མཐའ་བར་གསུམ་དུ་ཐོག་མའི་བསམ་འདུན་དང་ལས་འགན་བརྟན་པོར་སྲུང་བར་གསལ་འདེབས་བྱེད་པ་དང་། ཐོག་མཐའ་བར་གསུམ་དུ་“མི་སེར་གྱི་ཕྱོགས་སུ་བརྟན་པོར་ལངས་པ་”དང་། རང་རྟོགས་ཀྱི་སྒོ་ནས་ཏང་གི་སྲོལ་རྒྱུན་དང་སྤྱོད་ཚུལ་བཟང་པོ་དར་སྤེལ་བཏང་སྟེ་གསར་བརྗེའི་ཁྲག་རྒྱུན་རྒྱུན་མཐུད་དང་། དམར་པོའི་སྙིང་སྟོབས་རྒྱུན་འཛིན་བྱས་ནས་ཏང་ལ་ནམ་ཡང་ལང་ཚོའི་གསོན་ཤུགས་ལྡན་པར་བྱེད་པ་དང་། གསར་བརྗེའི་སྔོན་གཤེགས་དཔའ་བོ་རྣམས་ཀྱིས་ཁྲག་བཏོན་སྲོག་དོར་བྱས་ནས་བླངས་པའི་དམར་པོའི་སྲིད་དབང་དེ་ཉིད་སྲུང་སྐྱོང་ཡག་པོ་དང་འཛུགས་སྐྱོང་ཡག་པོ་བྱེད་དགོས་པ་དེ་རེད།

“རླབས་ཆེ་བའི་ཀྲུང་གོའི་གུང་ཁྲན་ཏང་གིས་རླུང་བརྟེན་རླབས་གཤགས་དང་གྲུ་གཡོར་མཐོར་འདེགས་ཀྱིས་རྒྱང་སྐྱོད་བྱས་ཏེ་དུས་རབས་གསར་པའི་འཐབ་ལམ་ཐོག་བསྐྱོད་བཞིན་ཡོད།……” 《སྣེ་ཁྲིད་པ་》ཞེས་པའི་གཞས་དེ་ཀྲུང་ཧྭ་ས་གཞི་ཆེན་པོའི་ཐོག་སྐད་གྲགས་ཆོད་ཅིང་། དེས་ཀྲུང་གོའི་གུང་ཁྲན་ཏང་མིའི་ཐོག་མའི་བསམ་འདུན་དང་འགན་འཁྲི་མཚོན་པ་དང་། ཀྲུང་གོའི་མི་དམངས་ཀྱི་རེ་སྨོན་དང་སེམས་གཏམ་མཚོན་ཡོད། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་བའི་འགག་རྩ་ནི་ཏང་ལ་ཐུག་ཡོད། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཆེས་ངོ་བོའི་ཁྱད་ཆོས་ནི་ཀྲུང་གོའི་གུང་ཁྲན་ཏང་གི་འགོ་ཁྲིད་ཡིན་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལམ་ལུགས་ཀྱི་དགེ་མཚན་ཆེ་ཤོས་ནི་ཀྲུང་གོའི་གུང་ཁྲན་ཏང་གི་འགོ་ཁྲིད་ཡིན་ལ། ཀྲུང་གོའི་གུང་ཁྲན་ཏང་ནི་ཆབ་སྲིད་ཀྱི་འགོ་ཁྲིད་སྟོབས་ཤུགས་ཆེ་ཤོས་དེ་ཡིན། ང་ཚོའི་ཏང་ནི་འཛམ་གླིང་ཐོག་གི་མར་ཁེ་སིའི་རིང་ལུགས་ཀྱི་སྲིད་འཛིན་ཏང་ཆེ་ཤོས་ཤིག་ཡིན་པས། ཐོག་མཐའ་བར་གསུམ་དུ་མི་དམངས་ཀྱི་བརྩི་བཀུར་ཐོབ་པ་དང་། ཡུན་རིང་གི་སྲིད་སྐྱོང་གོ་གནས་སྲ་བརྟན་དུ་གཏོང་དགོས་ན། ངེས་པར་དུ་དུས་དང་རྣམ་པ་ཀུན་ཏུ་ཏང་ཆེན་པོ་ཁོ་ནར་ལྡན་པའི་དཀའ་གནད་ཐག་གཅོད་བྱ་རྒྱུའི་རིག་པ་དྭངས་གསལ་དང་བློ་རྩ་བརྟན་པོ་རྒྱུན་འཁྱོངས་བྱེད་དགོས། ཕྱོགས་ཡོངས་ནས་ཏང་ནན་པོས་སྐྱོང་རྒྱུ་དེ་ནམ་ཡང་ལམ་དུ་ཡོད་པ་དང་ཏང་གི་རང་ངོས་གསར་བརྗེ་དེ་ནམ་ཡང་ལམ་དུ་ཡོད་པས། ང་ཚོས་ཏང་གི་རང་ངོས་གསར་བརྗེར་རྒྱུན་སྲིང་ལྷོད་མེད་ངང་སྐུལ་འདེད་བཏང་སྟེ་ནམ་ཡང་ཏང་གི་ངོ་བོ་མི་འགྱུར་བ་དང་། ཚོན་མདོག་མི་འགྱུར་བ། བྲོ་བ་མི་འགྱུར་བ་བཅས་འགན་ལེན་བྱས་ནས་ཏང་འདི་ཉིད་ཐོག་མཐའ་བར་གསུམ་དུ་འབད་འབུངས་ཡར་བརྩོན་གྱི་འགྲུལ་བཞུད་ཁྲོད་ཀྱི་འདེགས་སྐྱོར་བརྟན་པོ་དང་ཆར་རླུང་གིས་འཇབ་རྒོལ་བྱེད་སྐབས་བློས་འགེལ་ཆོག་པའི་སྲོག་ཤིང་དུ་འགྱུར་བར་བྱེད་དགོས།

——རང་རྟོན་རང་དར་དང་། བདེན་སྲུང་གསར་གཏོད། ངར་སེམས་ཆེར་སྐྱེད། དཔའ་སྐྱེད་མདུན་སྐྱོད་བྱེད་དགོས་ན། ཏང་ཡོངས་ཀྱིས་ངེས་པར་དུ་གདེང་ཚོད་ཡོད་པ་དང་ཞུམ་པ་མེད་ཅིང་། འབད་བརྩོན་ལྷོད་མེད་ཀྱི་སྙིང་སྟོབས་མཐའ་འཁྱོངས་དང་། ངེས་ཤུགས་མཐའ་འཁྱོངས་དང་འཕོ་འགྱུར་བྱེད་ཕོད་པའི་ལས་ཀའི་རྣམ་འགྱུར། སྒྱིད་ལུག་གཏན་ནས་མི་བྱེད་པ་དང་། བློ་རྩ་བརྟན་པོས་ཡར་རྒྱས་བརྩོན་ལེན་བྱེད་པའི་འབད་འཐབ་རྣམ་འགྱུར་བཅས་མཐའ་འཁྱོངས་བྱས་ཏེ་ལས་དོན་ཁག་གིས་དུས་རབས་ཀྱི་རང་བཞིན་སྔར་བས་ལེགས་པར་མཚོན་པ་དང་། ཆོས་ཉིད་ཁོང་དུ་ཆུད་པ། གསར་གཏོད་རང་བཞིན་གྱིས་ཕྱུག་པ་བཅས་བྱེད་དགོས་པ་གཟབ་ནན་གྱི་གསལ་བསྒྲགས་བྱེད་དགོས།

པེ་ཅིན་འགྲེམས་སྟོན་ཁང་གིས་སྤེལ་བའི་“མདུན་སྐྱོད་ཀྱི་དུས་རབས་གསར་པ་”ཞེས་པ་བརྗོད་དོན་གཙོ་བོར་བྱས་པའི་གྲུབ་འབྲས་འགྲེམས་སྟོན་ཐོག་“ངོ་མཚར་རྟགས་ཅན་”གྱི་གཡོར་གྲུའི་དཔེ་དབྱིབས་ཤིག་གིས་ལྟད་མོ་བའི་མིག་དབང་འཕྲོག་ཡོད། དགུང་དུ་འཕྱར་བའི་གྲུ་གཡོར་སྟེང་དུ་མདའ་ཐིག་མང་པོས་རང་རྒྱལ་གྱི་ལོ་ངོ་10ཡི་རིང་གི་འཕུར་སྐྱོད་ལྟ་བུའི་འཕེལ་རྒྱས་མཚོན་ཡོད་དེ། རྒྱལ་ནང་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་ཁྲི་53.9ནས་སྒོར་དུང་ཕྱུར་ཁྲི་114.4བར་གོང་དུ་འཕར་བ་དང་། རྨང་གཞིའི་ཞིབ་འཇུག་གྲོན་དངུལ་སྒོར་དུ་ཕྱུར་499ནས་སྒོར་དུང་ཕྱུར་1817བར་འཕར་སྣོན་བྱུང་ཡོད། རྒྱང་སྐྱོད་རྟགས་ཅན་གྱི་སྐྱེལ་འདྲེན་མེ་ཤུགས་འཕུར་མདའ་ཐེངས་240ལྷག་བཏང་ཡོད།……“དུས་རབས་གསར་པའི་གྲུབ་འབྲས་རླབས་པོ་ཆེ་ནི་ཏང་དང་མི་དམངས་ཀྱིས་མཉམ་དུ་བརྩོན་ལེན་དང་། ལས་གཉེར། འབད་འཐབ་བཅས་བྱས་པ་ལས་བྱུང་བ་ཞིག་རེད།” ཏང་གི་ཚོགས་ཆེན་ཐེངས་ཉི་ཤུ་པའི་འགོ་ཚུགས་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྣང་བརྙན་ལྡན་པའི་གསུང་ཚིག་ཐོག་ནས་མི་སེམས་ལ་གཡོ་འགུལ་ཐེབས་པའི་“ཀྲུང་གོའི་གཏམ་རྒྱུད་”དང་འཛམ་གླིང་ཡོངས་ཀྱིས་དོ་སྣང་བྱེད་པའི་“ཀྲུང་གོའི་ངོ་མཚར་”གྱི་ཤུགས་སུ་གནས་པའི་བབ་ཆགས་ཀྱི་གནས་ལུགས་གསལ་སྟོན་བྱས་ཡོད།

སྙིང་སྟོབས་དབེན་པའི་སྐྱེ་བོས་མགོ་མི་ཐོན། སྙིང་སྟོབས་དབེན་པའི་རྒྱལ་ཁབ་སྟོབས་མི་རྒྱས། བསམ་བློའི་ཐོག་བརྟན་པོར་ལངས་ཐུབ་ཚེ་མི་རིགས་ཤིག་གཞི་ནས་ལོ་རྒྱུས་ཀྱི་རླབས་རྒྱུན་ཁྲོད་དཔའ་ངར་ཆེན་པོས་འགྱིང་ངེར་ལངས་ཐུབ། དཀའ་སྤྱད་འཐབ་རྩོད་བྱེད་པ་ནི་དངོས་པོའི་སྟོབས་ཤུགས་འགྲན་པ་ཡིན་ལ། བསམ་པའི་སྟོབས་ཤུགས་འགྲན་པ་ཞིག་ཀྱང་ཡིན། ལོ་ངོ་10ཡི་རིང་འབད་འབུངས་ཡར་བརྩོན་བྱས་ཏེ་གྲུབ་འབྲས་འོད་སྟོང་འབར་བ་ཐོབ་ཡོད། དུས་རབས་གསར་པའི་ལོ་ངོ་10ཡི་ནང་ཀྲུང་གོའི་མི་དམངས་ཀྱི་མདུན་སྐྱོད་སྒུལ་ཤུགས་དེ་བས་དྲག་པ་དང་། འབད་འཐབ་ཀྱི་སྙིང་སྟོབས་དེ་བས་ཆེ་བ། རྒྱལ་ཁ་ཐོབ་ངེས་ཀྱི་ཡིད་ཆེས་དེ་བས་བརྟན་པ་བཅས་དང་། ལོ་རྒྱུས་ཀྱི་རང་རྟོགས་དང་རང་དབང་གི་སྙིང་སྟོབས་དེ་བས་ཆེ་བ་ཕྱིར་བཏོན་ནས་ཀྲུང་གོའི་གུང་ཁྲན་ཏང་དང་ཀྲུང་གོའི་མི་དམངས་ཀྱིས་ཀྲུང་ཧྭ་མི་རིགས་ཡར་ལངས་པ་ནས་ཕྱུག་པོར་གྱུར་པ་དང་། དེ་ནས་སྟོབས་ལྡན་དུ་གྱུར་པའི་བར་གྱི་འཕུར་མཆོང་རླབས་པོ་ཆེ་ལ་ཡིད་ཆེས་བརྒྱ་འགྱུར་ངང་སྐུལ་འདེད་གཏོང་བཞིན་ཡོད། འདི་ནི་དུས་རབས་གསར་པར་གྲུབ་འབྲས་རླབས་པོ་ཆེ་ཐོབ་པའི་རྒྱུ་རྐྱེན་གལ་ཆེན་ཡིན་ལ། འཐབ་ལམ་གསར་པར་མདུན་སྐྱོད་དང་བྱ་གཞག་རླབས་པོ་ཆེ་གསར་པ་གཏོད་པའི་སྟོབས་ཤུགས་ཆེན་པོའང་ཡིན།

བྱ་གཞག་རླབས་པོ་ཆེ་ལ་སྙིང་སྟོབས་རླབས་པོ་ཆེ་དགོས་པ་དང་སྙིང་སྟོབས་རླབས་པོ་ཆེས་བྱ་གཞག་རླབས་པོ་ཆེ་ལ་སྐུལ་འདེད་གཏོང་དགོས། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱ་རྒྱུ་ནི་རླབས་ཆེ་ཞིང་དཀའ་ཚེགས་ཆེ་བའི་བྱ་གཞག་ཅིག་ཡིན་ཞིང་། མདུན་ལམ་འོད་སྟོང་འབར་བ་དང་ལས་འགན་ལྕི་ལ་ལམ་ཐག་རིང་བ་ཞིག་རེད། གོ་ལ་ཧྲིལ་པོར་ཕྱོགས་ཡོངས་ནས་བལྟས་ཚེ། འཛམ་གླིང་གི་ལོ་བརྒྱའི་འགྱུར་ལྡོག་དང་དུས་རབས་ཀྱི་ནད་ཡམས་གཅིག་ཐོག་གཅིག་བརྩེགས་ཡིན་པ་དང་། གོ་ལ་ཧྲིལ་པོ་ཅན་གྱི་བསམ་པའི་རླབས་རྒྱུན་བསྐྱར་དུ་འཕྱུར་ཞིང་། འཛམ་གླིང་འདི་ཟང་ཟིང་གི་འཕོ་འགྱུར་གསར་པའི་དུས་སུ་སླེབས་ཡོད། རྒྱལ་ནང་ལ་ཞིབ་ལྟ་བྱས་ན། རང་རྒྱལ་གྱི་འཕེལ་རྒྱས་དེ་འཐབ་ཇུས་ཀྱི་གོ་སྐབས་དང་ཉེན་ཁའི་འགྲན་སློང་མཉམ་དུ་གནས་པ་དང་། ངེས་གཏན་མེད་པའི་ཚོད་དཔག་བྱེད་དཀའ་བའི་རྒྱུ་རྐྱེན་མང་དུ་འགྲོ་བའི་དུས་སྐབས་སུ་སླེབས་ཡོད་པས། སྒྱུར་བཅོས་འཕེལ་རྒྱས་བརྟན་བརླིང་གསུམ་གྱི་ལས་འགན་ལྗིད་པོ་དང་། འགལ་བ་དང་ཉེན་ཁའི་འགྲན་སློང་མང་པོ། རྒྱལ་སྲིད་སྐྱོང་ལུགས་ཀྱི་ཚོད་བགམ་མང་བ་བཅས་ནི་སྔར་བྱུང་མ་མྱོང་བ་ཞིག་རེད། གཟི་བརྗིད་ཀྱིས་ང་ཚོར་སྐུལ་མ་གཏོང་བཞིན་ཡོད་ལ། ཕུགས་འདུན་གྱིས་ང་ཚོར་འབོད་སྐུལ་བྱེད་བཞིན་ཡོད། ཆུ་ཆེན་བརྒལ་ཞིང་ངར་ཤུགས་ཀྱིས་མདུན་སྐྱོད་བྱེད་སྐབས། ལྷག་པར་དུ་དཔའ་ངར་ཆེར་སྐྱེད་ཀྱི་བསམ་པའི་འཁྱེར་སོ་མཐའ་འཁྱོངས་དང་། “རི་བོ་ཐའེ་ཧྲན་གྱིས་མནན་ཡང་མགོ་བོ་མི་སྒུར་བའི་”བློ་སྤོབས་བཏེགས་པ་དང་། “སྤྲིན་ནག་འཁྲིགས་ཀྱང་སྔར་བཞིན་འཚབ་འཚུབ་མེད་པའི་”ངེས་ཤུགས་སྦྱོང་བ། “ཉི་ཟླ་མགོན་དུ་བརྟེན་ནས་གནམ་ལོ་བརྗེ་ཕོད་པའི་”ངར་ཤུགས་སྐྱོང་བ། “དཀའ་ཚེགས་ཇི་ཙམ་ཆེ་ན་དེ་ཙམ་གྱིས་མདུན་ཕྱོགས་སུ་སྐྱོད་པའི་”དཔའ་ངར་སྐྱེད་པ། “ཀྱག་ཀྱོག་གི་ལམ་ཆེན་སྙོམས་པར་བྱེད་པའི་”འཇོན་ནུས་སྐྱེད་སྲིང་བྱས་ཏེ། རང་རྟོན་རང་དར་དང་། བདེན་སྲུང་གསར་གཏོད། ངར་སེམས་ཆེར་སྐྱེད། དཔའ་སྐྱེད་མདུན་སྐྱོད་བྱེད་ཅིང་། ཞུམ་པ་མེད་པའི་འཐབ་རྩོད་ལ་བརྟེན་ནས་བྱ་གཞག་འཕེལ་རྒྱས་ཀྱི་རྣམ་པ་གསར་པ་གཏོད་དགོས།

——ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་དགོས་ན། ཏང་ཡོངས་ཀྱིས་ངེས་པར་དུ་དུས་རབས་གསར་པ་དང་འཐབ་ལམ་གསར་པའི་ཏང་གི་ལྟེ་བའི་ལས་འགན་ལ་དམ་པོར་དམིགས་ནས་སྟོབས་ཤུགས་མཐའ་དག་གཅིག་སྡུད་དང་འགོག་རྐྱེན་མཐའ་དག་ཁྱད་བསད་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་རྒྱུ་རྒྱུན་འཁྱོངས་བྱེད་དགོས་པ་གཟབ་ནན་གྱི་གསལ་བསྒྲགས་བྱེད་དགོས།

ཚན་རིག་དང་མཐུན་པར་གཏན་འཁེལ་དང་སྟོབས་ཤུགས་གཅིག་བསྡུས་ཀྱིས་ལྟེ་བའི་ལས་འགན་ལེགས་འགྲུབ་བྱེད་མཁས་པོ་བྱ་རྒྱུ་ནི་ཀྲུང་གོའི་གུང་ཁྲན་ཏང་མིའི་ཚན་རིག་དང་མཐུན་པའི་བསམ་བློ་གཏོང་སྟངས་དང་ལས་ཀ་སྒྲུབ་སྟངས་ཡིན། ལོ་ངོ་100ལྷག་རིང་དུས་བབ་དང་ཁོར་ཡུག་ལ་འགྱུར་ལྡོག་ཇི་ལྟར་བྱུང་བ་དང་ཉེན་ཁ་དང་འགྲན་སློང་གང་འདྲ་ཞིག་འཕྲད་ཀྱང་ང་ཚོའི་ཏང་གིས་ག་དུས་ཡིན་ཡང་མི་དམངས་ཀྱི་འདོད་བློ་དང་བྱ་གཞག་འཕེལ་རྒྱས་ཀྱི་བླང་བྱ་གཞིར་བཟུང་སྟེ། ལོ་རྒྱུས་ཀྱི་ཁ་ཕྱོགས་དང་འཕེལ་རྒྱས་ཀྱི་དུས་རིམ་ལ་ངོས་འཛིན་ཡང་དག་བྱས་ཤིང་། ལོ་རྒྱུས་ཀྱི་དུས་རིམ་མི་འདྲ་བའི་ནང་ཏང་གི་ལྟེ་བའི་ལས་འགན་ལ་སྟངས་འཛིན་འཕྱུགས་མེད་བྱེད་པ་དང་། ཤིན་ཏུ་ཡིད་དབང་འཕྲོག་པའི་འབད་འཐབ་དམིགས་འབེན་བཏོན་ཡོད།

“ད་ནས་བཟུང་ཀྲུང་གོའི་གུང་ཁྲན་ཏང་གི་ལྟེ་བའི་ལས་འགན་ནི་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ཆེན་བསྐྲུན་རྒྱུ་དང་ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར་བྱས་ནས་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་རྒྱུ་དེ་ཡིན།” ཏང་གི་ཚོགས་ཆེན་ཐེངས་ཉི་ཤུ་པས་ཕྱོགས་ཡོངས་ནས་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏོང་བའི་བླང་བྱ་གསར་པ་དང་མི་དམངས་མང་ཚོགས་ཀྱི་རེ་སྒུག་གསར་པ་ཁོང་དུ་ཆུད་པར་བྱས་ཏེ། དུས་རབས་གསར་པ་དང་འཐབ་ལམ་གསར་པའི་ཀྲུང་གོའི་གུང་ཁྲན་ཏང་གི་ལྟེ་བའི་ལས་འགན་གསལ་པོར་བཏོན་པ་དང་། འཐབ་ལམ་གསར་པར་ཧུར་ཐག་གིས་སྐྱོད་པ་དང་དུས་རབས་གསར་པར་བྱས་རྗེས་འཇོག་རྒྱུའི་སྤྱིའི་སྐུལ་སློང་གི་བཀའ་རྒྱ་བཏང་བ་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཏང་གི་ཚོགས་ཆེན་ཉི་ཤུ་པའི་ཀོང་ཞིའི་འཐུས་མི་ཚོགས་པའི་གྲོས་བསྡུར་ནང་ཞུགས་སྐབས་“དུས་རིམ་གོང་མ་ཞིག་ལ་ང་ཚོས་འབྱོར་འབྲིང་ལ་དམིགས་ཏེ་དབུལ་པོ་དབུལ་རྐྱང་སེལ་བར་བྱས་ཡོད། ད་ལྟ་“གོམ་པ་གཉིས་བགྲོད་”ལ་དམིགས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་མི་རིགས་བསྐྱར་དར་ཡོང་བར་སྐུལ་འདེད་གཏོང་བཞིན་ཡོད།”

ལོ་ངོ་བརྒྱ་ལྷག་གི་རིང་ལ་ང་ཚོའི་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་འབད་འཐབ་བྱས་པ་མཐའ་དག་ནི་རང་རྒྱལ་འདི་ཉིད་དེང་རབས་ཅན་གྱི་རྒྱལ་ཁབ་སྟོབས་ལྡན་ཞིག་ཏུ་འཛུགས་སྐྲུན་བྱས་ནས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་བྱ་རྒྱུའི་ཆེད་དུ་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་གིས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་ངོས་འཛིན་ཟམ་མི་འཆད་པར་གཏིང་ཟབ་ཏུ་བཏང་བ་དང་། འཐབ་ཇུས་ཐད་ཟམ་མི་འཆད་པར་འཐུས་ཚང་དུ་བཏང་བ། ལག་ལེན་ཐད་ཟམ་མི་འཆད་པར་ཕུན་སུམ་ཇེ་ཚོགས་སུ་བཏང་བ་བཅས་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་དེ་བདེ་བླག་ངང་སྐུལ་འདེད་དང་རྒྱ་སྐྱེད་བཏང་ཡོད། ཏང་གི་ཚོགས་ཆེན་ཐེངས་ཉི་ཤུ་པའི་ཐོག་ཕྱོགས་ཡོངས་ནས་ཀྲུང་གོའི་ལུགས་ཀྱི་དེང་རབས་ཅན་གྱི་ཀྲུང་གོའི་ཁྱད་ཆོས་དང་། ངོ་བོའི་བླང་བྱ། ངེས་པར་དུ་ཁོང་དུ་ཆུད་པར་བྱ་དགོས་པའི་རྩ་དོན་གལ་ཆེན་བཅས་རྒྱས་བཤད་གནང་ཡོད། དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསམ་གཞིག་གཏིང་ཟབ་གནང་རྗེས་བཏོན་གནང་བའི་ཆོད་གཏམ་གལ་ཆེན་ཞིག་སྟེ། ཀྲུང་གོའི་ལུགས་ཀྱི་དེང་རབས་ཅན་གྱི་ཚན་རིག་གི་གོ་དོན་དང་། དམིགས་བྱའི་དོན་སྙིང་། དམིགས་འབེན་དང་ལས་འགན། མངོན་འགྱུར་ཐབས་ལམ་བཅས་ཁ་གསལ་བཟོས་ཤིང་། ཀྲུང་གོའི་ལུགས་ཀྱི་དེང་རབས་ཅན་གྱི་ཐུན་མོང་མ་ཡིན་པའི་དགེ་མཚན་དང་། ལག་ལེན་གྱི་མཛུབ་ཁྲིད། འོད་སྟོང་འཕྲོ་བའི་མདུན་ལྗོངས་བཅས་གསལ་སྟོན་བྱས་ཡོད་པས། ཏང་གིས་ཀྲུང་གོའི་ལུགས་ཀྱི་དེང་རབས་ཅན་ལ་ངོས་འཛིན་བྱ་རྒྱུ་དེ་མཐོ་ཚད་གསར་པ་ཞིག་ཏུ་མཐོ་རུ་སླེབས་པ་མཚོན་པ་དང་། འཛམ་གླིང་གི་དེང་རབས་ཅན་གྱི་རིགས་པའི་གཞུང་ལུགས་ཕུན་སུམ་ཇེ་ཚོགས་དང་གོང་འཕེལ་ཆེན་པོ་བཏང་བ་དང་། འཕེལ་རྒྱས་འགྲོ་བཞིན་པའི་རྒྱལ་ཁབ་དེང་རབས་ཅན་གྱི་ཕྱོགས་སུ་སྐྱོད་པའི་ཐབས་ལམ་རྒྱ་སྐྱེད་བཏང་སྟེ། མིའི་རིགས་ཀྱིས་སྤྱི་ཚོགས་ཀྱི་ལམ་ལུགས་སྔར་ལས་ལེགས་པོ་ཞིག་འཚོལ་ཞིབ་བྱེད་པར་ཀྲུང་གོའི་ཇུས་གཞི་འདོན་སྤྲོད་བྱས་ཡོད།

2020ལོའི་ཟླ་10པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀོང་ཏུང་དུ་རྟོག་ཞིབ་གནང་བར་ཕེབས་ནས་ཧྲན་ཐོའུ་ཁེ་པུའུ་རིག་གནས་བཤམས་སྟོན་ཁང་དུ་གཟིགས་སྐོར་གནང་ཞིང་། སུན་ཀྲུང་ཧྲན་གྱི་《རྒྱལ་འཛུགས་ཇུས་གཞི་ཆེན་མོ་》ཡི་འབྲེལ་ཡོད་འཆར་འགོད་རི་མོའི་མདུན་དུ་ཕེབས་ནས་ཞིབ་པར་གཟིགས། ལོ་ངོ་100ལྷག་གི་གོང་དུ་《རྒྱལ་འཛུགས་ཇུས་གཞི་ཆེན་མོ་》ཡི་ནང་ཀྲུང་གོའི་དེང་རབས་ཅན་གྱི་འཆར་གཞི་དང་པོ་བཀོད་ཡོད། ད་ལྟ་ལྕགས་ལམ་མཚོ་བོད་ཡུལ་དུ་ཤར་གཏོང་ཐུབ་པ་དང་། གཞུང་ལམ་སྟུག་པོ་དྲ་བ་ཆགས་པ། ཆུ་རགས་བརྩིགས་ནས་མཚེའུ་འཁྱིལ་བ། གྲུ་ཁས་གླིང་ལྔ་གཅིག་ཏུ་སྦྲེལ་བ། ཐོན་ལས་སྣ་ཁ་འཛོམས་པ།……སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མྱོང་ཚོར་ཟབ་མོའི་སྒོ་ནས་“ང་ཚོའི་ཀྲུང་གོའི་གུང་ཁྲན་ཏང་མིས་གཞི་ནས་མངོན་འགྱུར་བྱེད་ཐུབ་སོང་”ཞེས་གསུངས། ལོ་བརྒྱའི་འཆར་གཞི་ཆེན་པོ་དེ་སླར་ཡང་ལག་ལེན་བསྟར་འགོ་ཚུགས། མདུན་གྱི་ལམ་བུར་རྒྱང་ལྟ་བྱེད་སྐབས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལ་གོ་བ་གཏིང་ཟབ་བླངས་ནས་ཐོག་མཐའ་བར་གསུམ་དུ་རྒྱལ་ཁབ་དང་མི་རིགས་འཕེལ་རྒྱས་གཏོང་རྒྱུ་དེ་རང་ཉིད་ཀྱི་སྟོབས་ཤུགས་ཀྱི་གཞི་རྩར་འཛིན་པ་དང་། ཀྲུང་གོ་འཕེལ་རྒྱས་དང་ཡར་ཐོན་ཡོང་བར་བྱེད་པའི་ལས་དབང་དེ་རང་ཉིད་ཀྱི་ལག་ཏུ་དམ་པོར་འཛིན་དགོས་ལ། ཕྱོགས་ཡོངས་ནས་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་རྒྱུ་རྒྱུན་འཁྱོངས་བྱེད་དགོས།

——མཐུན་སྒྲིལ་འབད་འཐབ་བྱེད་དགོས་ན། ང་ཚོས་ངེས་པར་དུ་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱི་མཐུན་སྒྲིལ་ཆེན་མོ་རྒྱུན་ཆད་མེད་པར་སྲ་བརྟན་དུ་གཏོང་བ་དང་། རྒྱལ་ཁབ་ཕྱི་ནང་གི་ཀྲུང་ཧྭའི་བུ་ཕྲུག་གི་མཐུན་སྒྲིལ་ཆེན་མོར་ཤུགས་སྣོན་བརྒྱབ་སྟེ་སེམས་པ་གཅིག་མཐུན་ངང་ཀྲུང་གོའི་ཕུགས་འདུན་མངོན་འགྱུར་བྱེད་པའི་སྡོམ་ཤུགས་ཆེན་པོ་ཞིག་ཆགས་པ་བྱེད་དགོས་པ་གཟབ་ནན་གྱི་གསལ་བསྒྲགས་བྱེད་དགོས།

“ལོ་ངོ་78གོང་དུ་《མཐུན་སྒྲིལ་ནི་སྟོབས་ཤུགས་ཡིན་》ཞེས་པ་དེ་ཁྱེད་ཚོའི་ས་ནས་ལྷང་ལྷང་དུ་གྲགས་ཤིང་མི་དམངས་དུང་ཕྱུར་མང་པོས་གཏོང་བའི་གསར་བརྗེའི་གླུ་གཞས་ཤིག་ཏུ་གྱུར།” 2021ལོའི་ཟླ་2པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཡིག་ལན་ཕུལ་ནས་ཧོ་པེ་ཞིང་ཆེན་ཕིང་ཧྲན་རྫོང་ཞི་པའེ་ཕོ་གྲོང་རྡལ་པེ་ཀྲོང་གྲོང་ཚོའི་ཏང་ཡོན་ཡོངས་ལ། “ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་འཐབ་ལམ་གསར་པའི་ཐོག་ཁྱེད་ཚོས་ཏང་ཀྲུང་དབྱང་གི་འབོད་སྐུལ་དང་ལེན་མཐའ་གཅིག་ཏུ་བྱས་ནས་གདོང་ལེན་དཔེ་བཟང་གི་ནུས་པ་འདོན་སྤེལ་གང་ལེགས་བྱས་ཤིང་། ཡུལ་མི་རྣམས་སྔར་བས་མཐུན་སྒྲིལ་ཡག་པོ་དང་གོང་བུ་གཅིག་ཏུ་སྒྲིལ་ནས་བསམ་བློ་གཅིག་མཐུན་དང་ངར་ཤུགས་གཅིག་སྒྲིལ་གྱིས་འཚོ་བ་སྔར་བས་བདེ་སྐྱིད་ལྡན་པ་ཞིག་སྐྱེལ་རྒྱུ་ཡོང་བའི་རེ་བ་ཡོད་”ཅེས་སྐུལ་མ་གནང་ཡོད།

ཀྲུང་ཧྭ་མི་རིགས་ནི་མཐུན་སྒྲིལ་འབད་འཐབ་ཀྱི་སྙིང་སྟོབས་རླབས་པོ་ཆེ་ལྡན་པའི་མི་རིགས་ཤིག་ཡིན་པ་དང་། མཐུན་སྒྲིལ་འབད་འཐབ་ཀྱི་རིན་ཐང་འདུ་ཤེས་དེ་ཀྲུང་གོ་བའི་བསམ་པའི་འཇིག་རྟེན་དང་རྒྱུན་གཏན་གྱི་བྱ་སྤྱོད་ནང་མཉམ་འདྲེས་ཟབ་མོ་བྱུང་བ་མ་ཟད་ཤུགས་རྐྱེན་ཟབ་མོ་ཐེབས་ཀྱི་ཡོད། ཀྲུང་གོའི་གུང་ཁྲན་ཏང་གིས་ཀྲུང་ཧྭ་མི་རིགས་ཀྱི་མཐུན་སྒྲིལ་འབད་འཐབ་ཀྱི་སྲོལ་རྒྱུན་བཟང་པོ་རྒྱུན་འཛིན་དང་དར་སྤེལ་བཏང་སྟེ་ཐོག་མཐའ་བར་གསུམ་དུ་མཐུན་སྒྲིལ་འབད་འཐབ་དེ་རང་གི་ལོ་རྒྱུས་ཀྱི་རྒྱུགས་ཤོག་སྟེང་གསལ་པོ་བྲིས་ཤིང་། དུས་བབ་དང་ལས་འགན་ལ་འཕེལ་རྒྱས་དང་འགྱུར་ལྡོག་འགྲོ་བ་དང་ཟུང་འབྲེལ་ཟམ་མི་འཆད་པར་བྱས་ནས་མཐུན་སྒྲིལ་འབད་འཐབ་ཀྱི་བླང་བྱ་གསར་པ་བཏོན་པ་དང་མཐུན་སྒྲིལ་འབད་འཐབ་ཀྱི་རྣམ་པ་གསར་པ་བཏོད་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། “ལྟ་བ་གསལ་སྟོན་གྱིས་ཆབ་སྲིད་ལ་དང་དོད་དང་ཏང་གི་མཐུན་སྒྲིལ་དང་གཅིག་སྡུད་གཅིག་གྱུར་འགན་ལེན་བྱ་རྒྱུ་ནི་ཏང་གི་སྲོག་རྩ་ཡིན་ལ། ང་ཚོའི་ཏང་འདི་ཉིད་ལོ་བརྒྱའི་ཏང་ཆེན་པོ་ཞིག་ཏུ་གྱུར་པ་དང་དུས་རབས་ཀྱི་བྱ་གཞག་རླབས་པོ་ཆེ་གཏོད་ཐུབ་པའི་འགག་རྩའི་ཡང་ཡིན།” ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་མཐུན་སྒྲིལ་འབད་འཐབ་ལ་ཚད་མཐོའི་མཐོང་ཆེན་གནང་། ང་ཚོའི་ཏང་ཡོན་ཁྲི་9600ལྷག་ཡོད་པའི་མར་ཁེ་སིའི་རིང་ལུགས་ཀྱི་སྲིད་ཏང་འདི་སྔར་བས་མཐུན་སྒྲིལ་གཅིག་གྱུར་དང་། ཀྲུང་ཧྭ་མི་རིགས་སྔར་བས་མཐུན་སྒྲིལ་གཅིག་གྱུར་བྱས་ཏེ། དུས་རབས་གསར་པར་གྲུབ་འབྲས་རླབས་པོ་ཆེ་ཐོབ་པར་ཆབ་སྲིད་ཀྱི་འགན་ལེན་བརྟན་པོ་ཞིག་མཁོ་འདོན་བྱས་ཡོད། ཏང་གི་ཚོགས་ཆེན་ཐེངས་ཉི་ཤུ་པས་ལོ་རྒྱུས་ཀྱི་ཁ་ཕྱོགས་གསར་པར་རྐང་པ་བཙུགས་ནས་“མཐུན་སྒྲིལ་འབད་འཐབ་”དེ་ཚོགས་ཆེན་གྱི་བརྗོད་བྱ་གཙོ་བོའི་ནང་བཀོད་དེ་“མཐུན་སྒྲིལ་འབད་འཐབ་ནི་ཀྲུང་གོའི་མི་དམངས་ཀྱིས་ལོ་རྒྱུས་ཀྱི་བྱ་གཞག་རླབས་པོ་ཆེ་གསར་སྐྲུན་བྱེད་པར་བརྒྱུད་དགོས་ངེས་ཀྱི་ལམ་བུ་ཞིག་ཡིན་”ཞེས་ནན་བཤད་བྱས་ཡོད། དེ་ནི་ལོ་བརྒྱའི་ལོ་རྒྱུས་དང་ལྷག་པར་དུ་དུས་རབས་གསར་པའི་ལོ་10ཡི་ལོ་རྒྱུས་ལ་ཕྱོགས་བསྡོམས་གཏིང་ཟབ་བྱས་པ་ཞིག་ཡིན་ལ། ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ལ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་ཆེད་མཐུན་སྒྲིལ་འབད་འཐབ་བྱེད་དགོས་པའི་འབོད་སྐུལ་བྱས་པ་ཞིག་ཀྱང་ཡིན།

“མཐུན་སྒྲིལ་ནི་སྟོབས་ཤུགས་ཡིན་ལ། མཐུན་སྒྲིལ་བྱས་ན་གཞི་ནས་རྒྱལ་ཁ་ལེན་ཐུབ།” འཐབ་ལམ་གསར་པ་ནི་གཟི་བརྗིད་དང་ཕུགས་འདུན་གྱིས་ཁེངས་པའི་རྒྱང་སྐྱོད་ཅིག་ཡིན་ཞིང་། འགན་འཁྲི་ཧ་ཅང་ལྕི་བ་དང་ལས་འགན་གཟི་བརྗིད་ལྡན་པ་ཞིག་ཡིན་པས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱི་མཐུན་སྒྲིལ་ཆེན་མོ་དེ་བས་སྲ་བརྟན་དུ་གཏོང་དགོས་ལ་རྒྱལ་ཁབ་ཕྱི་ནང་གི་ཀྲུང་ཧྭའི་བུ་ཕྲུག་གི་མཐུན་སྒྲིལ་ཆེན་མོར་དེ་བས་ཤུགས་སྣོན་རྒྱག་དགོས། མཐུན་སྒྲིལ་འབད་འཐབ་བྱེད་པའི་རྩ་བ་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་འདོད་བློ་དང་བྱ་སྤྱོད་གཅིག་གྱུར་བྱ་རྒྱུ་དེ་ཡིན། “གཏན་ཁེལ་གཉིས་”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་ཟབ་མོ་ལེན་པ་དང་། སྔར་བས་བློ་རྩ་བརྟན་ཞིང་རང་རྟོགས་ཀྱི་སྒོ་ནས་“སྲུང་སྐྱོང་གཉིས་”བྱེད་ཐུབ་པ་དང་། ཐོག་མཐའ་བར་གསུམ་དུ་ཆབ་སྲིད་ཀྱི་ལངས་ཕྱོགས་དང་། ཆབ་སྲིད་ཀྱི་ཁ་ཕྱོགས། ཆབ་སྲིད་ཀྱི་རྩ་དོན། ཆབ་སྲིད་ཀྱི་འགྲོ་ལམ་བཅས་ཀྱི་ཐད་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བ་བྱས་ནས་ཏང་གི་མཐུན་སྒྲིལ་གཅིག་གྱུར་ལ་གནོད་འཚེ་གཏོང་བའི་བྱ་སྤྱོད་ལ་འཐབ་རྩོད་མཐའ་གཅིག་ཏུ་བྱས་ཏེ་མིག་ལ་གཅེས་སྤྲས་བྱེད་པ་ལྟར་ཏང་གི་མཐུན་སྒྲིལ་གཅིག་གྱུར་ལ་གཅེས་སྐྱོང་བྱེད་དགོས། ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་རྣམས་ཏང་གི་དར་ཆའི་འོག་ཏུ་“ངར་ལྕགས་རྡོག་པོ་”ལྟར་དུ་མཐུན་སྒྲིལ་བྱས་ནས་བསམ་བློ་ཕྱོགས་གཅིག་ཏུ་གཏོང་བ་དང་ངར་ཤུགས་ཕྱོགས་གཅིག་ཏུ་སྒྲིལ་ཐུབ་ན། ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེའི་གྲུ་གཟིངས་ཆེན་པོ་དེ་རླུང་བརྟེན་རླབས་གཤགས་དང་གྲུ་གཡོར་མཐོར་འདེགས་ཀྱིས་རྒྱང་སྐྱོད་བྱེད་ཐུབ་ངེས་རེད།

ལམ་ནི་རྐང་འོག་ན་ཡོད་ལ། འོད་གསལ་ནི་མདུན་ཕྱོགས་ན་ཡོད། “ཏང་གི་ཚོགས་ཆེན་ཐེངས་ཉི་ཤུ་པའི་ཐོག་མིག་སྔ་དང་སླད་ཕྱིན་དུས་སྐབས་ཤིག་རིང་གི་ཏང་དང་རྒྱལ་ཁབ་ཀྱི་སྲིད་ཇུས་དང་བྱེད་ཕྱོགས་གནད་ཆེན་གཏན་འབེབས་བྱས་ཤིང་། ཀྲུང་གོའི་ལུགས་ཀྱི་དེང་རབས་ཅན་གྱིས་ཕྱོགས་ཡོངས་ནས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་བའི་བརྗིད་ཉམས་ཆེ་བའི་འཆར་གཞི་བཀོད་ཡོད། ང་ཚོ་འཐབ་ལམ་གསར་པའི་ཐོག་སྐྱོད་པ་དང་འབད་འཐབ་ཀྱི་དམིགས་འབེན་གསར་པའི་ཕྱོགས་སུ་བསྐྱོད་ནས་རྡོག་ཐོན་བྱེད་དགོས།” སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འབོད་སྐུལ་རླབས་པོ་ཆེ་ནི་མི་སེམས་རབ་ཏུ་འགུག་པ་དང་ཡར་བརྩོན་བྱེད་པར་ངར་སློང་བ་ཞིག་རེད།

རྟ་མགྲིན་སྐྱབས་ཀྱིས་བསྒྱུར།