ཆེད་བརྗོད།
ལོ་ཟླ་ཆུ་བོའི་རྒྱུན་བཞིན་མདུན་དུ་སྐྱོད་པ་དང་། ཀྲུང་གོའི་མི་དམངས་ཡིད་ཆེས་ཀྱིས་ཁེངས་པའི་སྒོ་ནས་ལོ་གསར་པར་སླེབས་ཡོད།
འདས་མ་ཐག་པའི་2022ལོ་ནི་ཏང་དང་རྒྱལ་ཁབ་ཀྱི་ལོ་རྒྱུས་ཐོག་གལ་འགངས་ཤིན་ཏུ་ཆེ་བའི་ལོ་ཞིག་རེད། ང་ཚོའི་ཏང་གིས་རྒྱལ་ཡོངས་འཐུས་མིའི་ཚོགས་ཆེན་ཐེངས་ཉི་ཤུ་པ་བདེ་བླག་ངང་འཚོགས་པ་དང་། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་འཐབ་ལམ་གསར་པའི་ཐོག་གོམ་སྟབས་བརྟན་པོ་སྤོས་ཡོད། ལོ་གཅིག་གི་རིང་ལ། རླུང་ཚ་རླབས་འཕྱོའི་རྒྱལ་སྤྱིའི་ཁོར་ཡུག་དང་དཀའ་ཚེགས་ཆེ་ལ་ལྗིད་རྫོབ་ཆེ་བའི་རྒྱལ་ནང་གི་སྒྱུར་བཅོས་འཕེལ་རྒྱས་བརྟན་བརླིང་གསུམ་གྱི་ལས་འགན་མདུན་དུ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་དཀའ་ངལ་ལ་མི་འཛེམ་པར་འབད་འབུངས་དང་མདུན་སྐྱོད་བྱས་ཏེ་དཔལ་འབྱོར་དང་སྤྱི་ཚོགས་ཁྱོན་ཡོངས་བརྟན་བརླིང་ཡོང་བ་མཐའ་འཁྱོངས་བྱས་ཡོད། ལོ་འདིའི་གྲུབ་འབྲས་ནི་རྙེད་དཀའ་བ་ཞིག་ཡིན་ལ། གཅེས་སྤྲས་ལྡབ་བརྒྱ་བྱེད་དགོས་ཤིང་། དུས་རབས་གསར་པའི་འཐབ་ལམ་གསར་པ་དང་བྱ་གཞག་རླབས་པོ་ཆེ་གསར་པར་སྒུལ་ཤུགས་ཆེན་པོ་བསྣན་ཡོད།
འདས་ཟིན་པའི་ལོ་5ལ་ཕྱིར་མིག་བལྟས་ཚེ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག། ང་ཚོས་འཛམ་གླིང་གི་འཕོ་འགྱུར་མགྱོགས་མྱུར་ཕྱིན་པ་དང་། ཏོག་གསར་གློ་ཚད་རིམས་ནད་ཀྱི་ཕོག་ཐུག་བྱུང་བ། རྒྱལ་ནང་གི་དཔལ་འབྱོར་མར་ཆག་པ་སོགས་ཀྱི་ཚོད་བགམ་མང་པོ་ཐེག་པས། མི་དམངས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ལ་སྲུང་སྐྱོང་ནུས་ལྡན་བྱས་པ་དང་། ཡུན་རིང་ཐག་གཅོད་མ་ཐུབ་པའི་དཀའ་གནད་མང་པོ་ཁྱད་བསད་བྱས་པ། ཕུགས་དང་འབྲེལ་བའི་དོན་དག་གལ་ཆེན་མང་པོ་བསྒྲུབས་པ་བཅས་ལ་བརྟེན་ནས། ཏང་དང་རྒྱལ་ཁབ་ཀྱི་བྱ་གཞག་ལ་འཛམ་གླིང་སྐྱེ་བོ་ཀུན་གྱིས་དོ་སྣང་བྱེད་པའི་གྲུབ་འབྲས་གལ་ཆེན་ཐོབ་པར་སྐུལ་འདེད་བཏང་ཡོད། ལོ་5པོ་འདི་ནི་རྒྱུན་ལྡན་གཏན་ནས་མ་ཡིན་པ་དང་སྤྱིར་བཏང་གཏན་ནས་མ་ཡིན་པས། དུས་རབས་གསར་པའི་བརྗིད་ཆགས་ཉམས་ལྡན་གྱི་ལེའུ་ཁྲོད་ཚོན་མདངས་རྣམ་པ་བཀྲ་བའི་རི་མོ་ཞིག་བྲིས་ཡོད།
ཏང་གི་ཚོགས་ཆེན་བཅོ་བརྒྱད་པ་འཚོགས་པ་ནས་བཟུང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དུས་རབས་གསར་པར་སླེབས་ཡོད། དུས་རབས་གསར་པའི་ལོ་10ཡི་རིང་། གྲམ་ཐང་ནང་ཟུག་པའི་ཉེན་ཁ་དང་། ལ་མོ་བརྒྱབ་པའི་དཀའ་ངལ། འགག་སྒྲོལ་གྱི་དཀའ་ངལ་བཅས་ཡོད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ། དཔལ་འབྱོར་བརྟན་པོ་ཡོང་བར་བྱེད་པ་དང་། འཕེལ་རྒྱས་ལ་སྐུལ་འདེད་གཏོང་བ། དབུལ་ཕོངས་ལས་སྒྲོལ་བ། འབྱོར་འབྲིང་ལ་བརྩོན་པ། རིམས་ནད་ཚོད་འཛིན་བྱེད་པ། གནོད་འཚེ་ཆེན་པོ་འགོག་པ། འགྱུར་ལྡོག་ལ་ཁ་གཏད་འཇལ་བ། ཉམས་ཉེན་སེལ་བ་བཅས་ཕར་བལྟས་ན་འགག་སྒྲོལ་བྱེད་མི་ཐུབ་པའི་དཀའ་གནད་རེ་རེ་བཞིན་བསལ་བ་དང་། མི་རྣམས་ཀྱིས་ལྟ་སྟངས་གསར་པ་འཛིན་པའི་མི་ཡུལ་གྱི་ངོ་མཚར་རེ་རེ་བཞིན་བཏོད་ཡོད་པ་དང་། ཆབ་སྲིད་དང་། དཔལ་འབྱོར། འདུ་ཤེས་འཛིན་སྟངས། རང་བྱུང་ཁམས་སོགས་ཀྱི་ཐད་ནས་བྱུང་བའི་ཉེན་ཁ་དང་འགྲན་སློང་གི་ཚོད་བགམ་ཐེག་ཡོད། ཏང་དང་རྒྱལ་ཁབ་ཀྱི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་ལོ་རྒྱུས་རང་བཞིན་གྱི་འཕོ་འགྱུར་བྱུང་སྟེ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱུང་བ་དེ་ལྡོག་ཐབས་མེད་པའི་ལོ་རྒྱུས་ཀྱི་འཕེལ་རིམ་ཞིག་ཏུ་སླེབས་ཡོད།
ལོ་10ནི་མིའི་རིགས་ཀྱི་ལོ་རྒྱུས་ཐོག་སྐད་ཅིག་ཙམ་ཡིན་མོད། འོན་ཀྱང་དུས་རབས་གསར་པའི་སྤྱིར་བཏང་མ་ཡིན་པའི་ལོ་10ནི་ཟིལ་རླབས་དགུང་འཕྱུར་དང་རྣམ་པར་བཀྲ་བའི་ལོ་10ཡིན་པས། ཀྲུང་གོའི་གུང་ཁྲན་ཏང་དང་། ཀྲུང་གོའི་མི་དམངས། སྤྱི་ཚོགས་རིང་ལུགས་དེང་རབས་ཅན་གྱི་འཛུགས་སྐྲུན། ཚན་རིག་སྤྱི་ཚོགས་རིང་ལུགས་དུས་རབས་21པའི་ཀྲུང་གོར་འཕེལ་རྒྱས་འགྲོ་བ་སོགས་ཀྱི་ཐད་ལ་ཤུགས་རྐྱེན་གལ་ཆེ་ཞིང་གཏིང་ཟབ་པོ་ཐེབས་ཡོད། དུས་རབས་གསར་པའི་ལོ་10ཡི་འཕོ་འགྱུར་རླབས་པོ་ཆེ་ནི་ཕྱོགས་ཆ་ཀུན་དང་། གཏིང་ཟབ་པ། རྩ་བའི་རང་བཞིན། གསར་གཏོད་རང་བཞིན་བཅས་ལྡན་པས་ཏང་གི་ལོ་རྒྱུས་དང་། ཀྲུང་གོ་གསར་པའི་ལོ་རྒྱུས། སྒྱུར་བཅོས་སྒོ་འབྱེད་ཀྱི་ལོ་རྒྱུས། སྤྱི་ཚོགས་རིང་ལུགས་འཕེལ་རྒྱས་ཀྱི་ལོ་རྒྱུས། ཀྲུང་ཧྭ་མི་རིགས་འཕེལ་རྒྱས་ཀྱི་ལོ་རྒྱུས་བཅས་ཀྱི་ཐོག་ལམ་ཚད་རྡོ་རིང་ལྟ་བུའི་དོན་སྙིང་ལྡན་ཡོད།
འགྱུར་མེད་སྟོབས་ལྡན་གྱི་སྲོག་ཤིང་གིས་དཔའ་ངར་ཆེར་སྐྱེད་ཀྱིས་མདུན་དུ་སྐྱོད་པའི་སྟོབས་ཤུགས་གཅིག་ཏུ་སྒྲིལ་བ་དང་། ཚན་རིག་དང་མཐུན་པའི་རིགས་པའི་གཞུང་ལུགས་ཀྱིས་མདུན་སྐྱོད་ཀྱི་ཁ་ཕྱོགས་ཁྲིད་སྟོན་བྱེད། དུས་རབས་གསར་པའི་ལོ་10ཡི་འཕོ་འགྱུར་རླབས་པོ་ཆེའི་རྩ་བ་ནི། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་ཀྲུང་དབྱང་གི་སྲོག་ཤིང་དང་ཏང་ཡོངས་ཀྱི་སྲོག་ཤིང་གནང་ནས་ཁ་ཕྱོགས་སྟོན་ཞིང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་དང་མཐུན་པའི་མཛུབ་ཁྲིད་ཡོད་པར་ཐུག་ཡོད། ལག་ལེན་གྱི་ཐོག་ནས་ར་འཕྲོད་བྱུང་དོན། ཏང་གིས་བློ་མཐུན་ཞི་ཅིན་ཕིང་ཏང་ཀྲུང་དབྱང་གི་སྲོག་ཤིང་དང་ཏང་ཡོངས་ཀྱི་སྲོག་ཤིང་གི་གོ་གནས་གཏན་འཁེལ་བྱས་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་སློབ་སྟོན་གྱི་གོ་གནས་གཏན་འཁེལ་བྱས་པ་དེའི་ཐོག་ནས་ཏང་ཡོངས་དང་། དམག་ཡོངས། རྒྱལ་ཡོངས་མི་རིགས་ཁག་གི་མི་དམངས་བཅས་ཀྱི་ཐུན་མོང་གི་བསམ་འདུན་མཚོན་པ་དང་། དུས་རབས་གསར་པའི་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ལོ་རྒྱུས་ཀྱི་འཕེལ་རིམ་ལ་སྐུལ་འདེད་གཏོང་བར་ཐག་གཅོད་རང་བཞིན་གྱི་དོན་སྙིང་ལྡན་ཡོད། “གཏན་འཁེལ་གཉིས་”ནི་དུས་རབས་གསར་པར་ཏང་ལ་ཐོབ་པའི་ཆབ་སྲིད་ཀྱི་གྲུབ་འབྲས་གལ་ཆེན་ཞིག་དང་། ཏང་དང་རྒྱལ་ཁབ་ཀྱི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་ལོ་རྒྱུས་རང་བཞིན་གྱི་འཕོ་འགྱུར་ཡོང་བར་སྐུལ་འདེད་གཏོང་བའི་ཐག་གཅོད་རང་བཞིན་གྱི་རྒྱུ་རྐྱེན་ཞིག་རེད།
ང་ཚོས་གདེང་ཚོད་ཆེན་པོ་དང་སྤོབས་པ་ཚད་མེད་ཀྱི་སྒོ་ནས་“གཏན་འཁེལ་གཉིས་”ནི་དུས་རབས་གསར་པའི་ལོ་10ཡི་འཕོ་འགྱུར་རླབས་པོ་ཆེ་དང་། ཏང་དང་རྒྱལ་ཁབ་ཀྱི་བྱ་གཞག་དབྱར་མཚོ་རྒྱས་པ་ལྟར་གྱི་རྣམ་པ་བཟང་པོ་ཡོང་བའི་རྩ་བའི་འགན་ལེན་རེད་ཅེས་བརྗོད་ཆོག། “གཏན་འཁེལ་གཉིས་”ཀྱིས་ཏང་སེམས་དང་དམག་སེམས་དང་དམངས་སེམས་བཅས་ཀྱི་གཏད་ཕྱོགས་མཚོན་པ་དང་། དེར་མང་ཚོགས་ཀྱི་རྨང་གཞི་དང་། སྤྱི་ཚོགས་ཀྱི་རྨང་གཞི། བརྩེ་དུང་གི་རྨང་གཞི་བཅས་བརྟན་པོ་ལྡན་པས་ལོ་རྒྱུས་དང་མི་དམངས་ཀྱི་གདམ་ག་ཡིན་པ་དང་། ང་ཚོས་དཀའ་ངལ་དང་ཉེན་ཁ་མཐའ་དག་ལས་རྣམ་པར་རྒྱལ་བ་དང་། ངེས་གཏན་མེད་པའི་རང་བཞིན་མཐའ་དག་ལ་ཁ་གཏད་འཇལ་བའི་ངེས་གཏན་རང་བཞིན་ཆེ་ཤོས་དང་། གཏིང་ཤུགས་ཆེ་ཤོས། འགན་ལེན་ཆེ་ཤོས་བཅས་རེད།
དུས་རབས་གསར་པ་རླབས་པོ་ཆེས་ཤོག་ལྷེ་གསར་པ་ཕྱེ་བ་དང་དུས་ཚོད་ཀྱིས་ནང་དོན་གསར་པ་འབྲི་འགོ་ཚུགས།
“ད་ལྟ་ནས་བཟུང་། ཀྲུང་གོའི་གུང་ཁྲན་ཏང་གི་ལྟེ་བའི་ལས་འགན་ནི་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་འཛུགས་སྐྲུན་བྱས་པ་དང་ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་རྒྱུ་དེ་རེད།”
དེང་རབས་ཅན་ནི་ཀྲུང་གོའི་གུང་ཁྲན་ཏང་དང་ཀྲུང་གོའི་མི་དམངས་ཀྱི་ངོས་ནས་བཤད་ན། དམིགས་བསལ་གྱི་དོན་སྙིང་ཧ་ཅང་གལ་ཆེན་ལྡན་ཡོད། ཉེ་རབས་ནས་བཟུང་། ཀྲུང་ཧྭ་མི་རིགས་ལ་སྔར་བྱུང་མྱོང་མེད་པའི་དཀའ་སྡུག་འཕྲད་པ་དང་། ཀྲུང་གོའི་མི་དམངས་དང་གྲངས་ལས་འདས་པའི་སྤྱོད་བཟང་འདུན་ཆེའི་མི་སྣས་དཔའ་ངར་ཞུམ་མེད་ཀྱིས་ཀྲུང་གོའི་དེང་རབས་ཅན་གྱི་ལམ་བུ་འཚོལ་ཞིབ་བྱས་ཡོད་མོད། འོན་ཀྱང་མི་སེར་སྤེལ་ཡུལ་ཕྱེད་ཙམ་དང་བཀས་བཀོད་རྒྱུད་འཛིན་ཕྱེད་ཙམ་གྱི་སྤྱི་ཚོགས་ཆ་རྐྱེན་འོག་ལེགས་འགྲུབ་བྱུང་མེད་ལ་འབྱུང་ཡང་མི་སྲིད་པས། དུས་རབས་ཀྱི་ལས་འགན་ལྗིད་པོ་དང་མི་དམངས་ཀྱི་རེ་སྒུག་དེ་ལོ་རྒྱུས་ཀྱི་རང་བཞིན་ལྡན་པའི་སྒོ་ནས་ཀྲུང་གོའི་གུང་ཁྲན་ཏང་གི་ཕྲག་ཏུ་བབས་པ་རེད། གནམ་ས་བླ་འོག་ཏུ་བསྒྱུར་བའི་ཀྲུང་གོའི་གུང་ཁྲན་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་ཁྲག་དྲོན་དང་མེ་ལྕེའི་ཁྲོད་དུ་འགྲོ་ལམ་བདེ་པོ་བཏོད་པ་དང་། རླུང་དང་རྦ་རླབས་ཀྱི་ཁྲོད་དུ་འགྲོ་ལམ་གསར་པ་བཏོད་ཅིང་། དཀའ་ངལ་རེ་རེ་བཞིན་རྐང་འོག་ཏུ་མནན་པ་དང་། རྒྱལ་ཁ་རེ་རེ་བཞིན་ལོ་རྒྱུས་ཀྱི་མཛད་རྗེས་རྡོ་རིང་ཐོག་བཀོད་དེ་མིའི་རིགས་དེང་རབས་ཅན་གྱི་ཀྲུང་གོའི་ངོ་མཚར་བཏོད་པ་རེད།
ཀྲུང་གོ་གསར་པ་དབུ་བརྙེས་པ་དང་ལྷག་པར་དུ་སྒྱུར་བཅོས་སྒོ་འབྱེད་བྱས་ཚུན་གྱི་ཡུན་རིང་འཚོལ་ཞིབ་དང་ལག་ལེན་གྱི་རྨང་གཞིའི་ཐོག ། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་གྱི་རིགས་པའི་གཞུང་ལུགས་དང་ལག་ལེན་ཐད་གསར་གཏོད་འགག་སྒྲོལ་བྱས་པ་བརྒྱུད། ང་ཚོའི་ཏང་གིས་ཀྲུང་གོའི་ལུགས་ཀྱི་དེང་རབས་ཅན་ལ་བདེ་བླག་ངང་སྐུལ་འདེད་དང་རྒྱ་སྐྱེད་བཏང་ཡོད། ཀྲུང་གོའི་ལུགས་ཀྱི་དེང་རབས་ཅན་ནི། ཀྲུང་གོའི་གུང་ཁྲན་ཏང་གིས་འགོ་ཁྲིད་བྱེད་པའི་སྤྱི་ཚོགས་རིང་ལུགས་ཀྱི་དེང་རབས་ཅན་ཡིན་པས། རྒྱལ་ཁབ་ཁག་གི་དེང་རབས་ཅན་གྱི་ཐུན་མོང་གི་ཁྱད་ཆོས་ལྡན་ལ། རང་ཉིད་རྒྱལ་ཁབ་ཀྱི་གནས་ཚུལ་ལ་གཞིགས་པའི་ཀྲུང་གོའི་ཁྱད་ཆོས་ཀྱང་ལྡན། ཀྲུང་གོའི་ལུགས་ཀྱི་དེང་རབས་ཅན་གྱི་ངོ་བོའི་བླང་བྱ་ནི། ཀྲུང་གོའི་གུང་ཁྲན་ཏང་གི་འགོ་ཁྲིད་རྒྱུན་འཁྱོངས་བྱེད་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་བྱེད་པ། སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པ། བརྒྱུད་རིམ་ཧྲིལ་པོའི་མི་དམངས་དམངས་གཙོ་འཕེལ་རྒྱས་གཏོང་བ། མི་དམངས་ཀྱི་བསམ་པའི་འཇིག་རྟེན་ཕུན་སུམ་ཚོགས་སུ་གཏོང་བ། མི་དམངས་ཡོངས་རྫོགས་ཐུན་མོང་ཐོག་ཕྱུག་པོར་འགྱུར་བ། མི་དང་རང་བྱུང་ཁམས་ཞི་མཐུན་མཉམ་གནས་ལ་སྐུལ་འདེད་གཏོང་བ། མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་རྒྱུར་སྐུལ་འདེད་གཏོང་བ། མིའི་རིགས་ཀྱི་ཤེས་དཔལ་གྱི་རྣམ་པ་གསར་པ་གཏོད་པ་བཅས་རེད།
ཀྲུང་གོའི་ལུགས་ཀྱི་དེང་རབས་ཅན་ནི། རླབས་ཆེ་བ་དང་དཀའ་ཚེགས་ཆེ་བའི་བྱ་གཞག་ཅིག་ཡིན། ཏང་གི་ཚོགས་ཆེན་ཉི་ཤུ་པས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པའི་གོམ་སྟབས་གཉིས་ཀྱི་འཐབ་ཇུས་བཀོད་སྒྲིག་ལ་སྤྱི་ཁོག་ནས་རྒྱང་ལྟ་བྱས་པ་དང་། མ་འོངས་པའི་ལོ་5ཡི་འཐབ་ཇུས་ལས་འགན་དང་བྱེད་ཐབས་གལ་ཆེན་གཙོ་གནད་དུ་བཟུང་ནས་བཀོད་སྒྲིག་བྱས་ཡོད། 2023ལོ་ནི་ཕྱོགས་ཡོངས་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་བསྟར་དོན་འཁྱོལ་བྱེད་འགོ་ཚུགས་པའི་ལོ་ཞིག་ཡིན་པས་ལས་དོན་ཁག་འཆར་འགོད་ཡག་པོ་དང་སྐུལ་འདེད་ཡག་པོ་གཏོང་རྒྱུ་ནི་གལ་འགངས་ཤིན་ཏུ་ཆེ་བ་ཞིག་རེད། ཉེ་ཆར་འཚོགས་པའི་ཀྲུང་དབྱང་གི་དཔལ་འབྱོར་ལས་དོན་གྲོས་ཚོགས་ནི་ཏང་གི་ཚོགས་ཆེན་ཉི་ཤུ་པ་འཚོགས་རྗེས་ཀྱི་ཀྲུང་དབྱང་གིས་འཚོགས་པའི་གལ་འགངས་ཤིན་ཏུ་ཆེ་བའི་ཚོགས་འདུ་ཞིག་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཚོགས་འདུའི་ཐོག་གསུང་བཤད་གལ་ཆེན་གནང་ནས་2022ལོའི་དཔལ་འབྱོར་ལས་དོན་ལ་ཕྱོགས་ཡོངས་ནས་ཕྱོགས་བསྡོམས་དང་། མིག་སྔའི་རྒྱལ་ཁབ་ཕྱི་ནང་གི་དཔལ་འབྱོར་དུས་བབ་ལ་དབྱེ་ཞིབ་གཏིང་ཟབ། 2023ལོའི་དཔལ་འབྱོར་ལས་དོན་རྒྱུད་རིམ་ལྡན་པའི་ངང་བཀོད་སྒྲིག་བཅས་གནང་ཡོད། ས་ཁུལ་ཁག་དང་སྡེ་ཚན་ཁག་དང་རིམ་པ་ཁག་གི་འགོ་ཁྲིད་ལས་བྱེད་པས་བསམ་བློ་དང་བྱ་སྤྱོད་དེ་ཏང་གི་ཚོགས་ཆེན་ཉི་ཤུ་པའི་དགོངས་དོན་ཐོག་སྔར་བས་གཅིག་གྱུར་དང་། ཀྲུང་དབྱང་གི་དཔལ་འབྱོར་ལས་དོན་གྲོས་ཚོགས་དང་ཀྲུང་དབྱང་གི་གྲོང་གསེབ་ལས་དོན་གྲོས་ཚོགས་ཀྱི་དགོངས་དོན་ཐོག་སྔར་བས་གཅིག་གྱུར། ད་ལོའི་ལས་དོན་ཁག་ཡག་པོ་བསྒྲུབ་རྒྱུའི་སྐོར་གྱི་ཏང་ཀྲུང་དབྱང་གི་འཐབ་ཇུས་བཀོད་སྒྲིག་ཐོག་སྔར་བས་གཅིག་གྱུར་བཅས་བྱས་ཏེ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དེ་ཁྱབ་ཁོངས་སོ་སོ་དང་ཕྱོགས་སོ་སོ་རུ་ཇི་མ་ཇི་བཞིན་ལག་བསྟར་དོན་འཁྱོལ་བྱས་ནས། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་བསྐྲུན་ཆེད་འགོ་ལེགས་པོ་ཚུགས་པ་དང་གོམ་སྟབས་བརྟན་པོས་སྤོ་དགོས།
ལོ་གསར་པའི་འགོ་ལེགས་པོ་ཚུགས་པ་དང་གོམ་སྟབས་བརྟན་པོ་སྤོ་དགོས་ན། ངེས་པར་དུ་བློ་བརྟན་འགྱུར་མེད་ངང་ཏང་གི་ཕྱོགས་ཡོངས་ཀྱི་འགོ་ཁྲིད་རྒྱུན་འཁྱོངས་བྱེད་དགོས། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་། ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་བའི་གནད་འགག་ནི་ཏང་ལ་ཐུག་ཡོད། གནས་བབ་རྙོག་འཛིང་ཇི་ཙམ་ཆེ་བ་དང་འགྲན་སློང་ཇི་ཙམ་ཛ་དྲག་ཡིན་ན། ཏང་ཀྲུང་དབྱང་གི་གཅིག་སྡུད་གཅིག་གྱུར་གྱི་འགོ་ཁྲིད་ཀྱི་གདུང་འདེགས་ཀ་བའི་ནུས་པ་དེ་ཙམ་གྱིས་འདོན་སྤེལ་བྱས་ཏེ། བསམ་བློ་ཕྱོགས་གཅིག་ཏུ་གཏོང་བ་དང་ངར་ཤུགས་ཕྱོགས་གཅིག་ཏུ་སྒྲིལ་བའི་སྡོམ་ཤུགས་ཆེན་པོ་ཆགས་པར་བྱེད་དགོས། ཏང་ཡོངས་ཀྱིས་“གཏན་འཁེལ་གཉིས་”ཀྱི་ཐག་གཅོད་རང་བཞིན་གྱི་དོན་སྙིང་ལ་སྔར་བས་གོ་བ་གཏིང་ཟབ་ལེན་པ་དང་། “འདུ་ཤེས་བཞི་”ཆེ་རུ་སྐྱེད་པ། “གདེང་ཚོད་བཞི་”བརྟན་དུ་གཏོང་བ “སྲུང་སྐྱོང་གཉིས་”ཐུབ་པ་བཅས་བྱས་ཏེ་ཏང་གི་འགོ་ཁྲིད་དེ་ཏང་དང་རྒྱལ་ཁབ་བྱ་གཞག་གི་ཁྱབ་ཁོངས་སོ་སོ་དང་ཕྱོགས་སོ་སོ་དང་ལྷུ་ཚིགས་སོ་སོ་རུ་དོན་འཁྱོལ་བྱས་ནས་ཏང་འདི་ཉིད་ཐོག་མཐའ་བར་གསུམ་དུ་ཆར་རླུང་འཚུབ་སྐབས་མི་དམངས་ཡོངས་ཀྱི་བློས་འགེལ་ཆོག་པའི་སྲོག་ཤིང་དུ་འགྱུར་བར་བྱེད་དགོས། རང་རྒྱལ་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བྱེད་པའི་ཡང་དག་པའི་ཁ་ཕྱོགས་འགན་ལེན་དང་། མཐུན་སྒྲིལ་འབད་འཐབ་བྱེད་པའི་སྟོབས་ཆེའི་ཆབ་སྲིད་གོང་བུར་འདྲིལ་ཤུགས་དང་འཕེལ་རྒྱས་ཀྱི་གདེང་ཚོད་ལྡན་པ་འགན་ལེན་བྱས་ཏེ། མི་བརྒྱ་སེམས་གཅིག་དང་ཐུན་མོང་དུ་དཀའ་ངལ་སེལ་བའི་སྟོབས་ཤུགས་ཆེན་པོ་གཅིག་འདྲིལ་བྱེད་དགོས།
ལོ་གསར་པའི་འགོ་ལེགས་པོ་ཚུགས་པ་དང་གོམ་སྟབས་བརྟན་པོ་སྤོ་དགོས་ན། ངེས་པར་དུ་ཏང་གི་སྲིད་སྐྱོང་རྒྱལ་དར་གྱི་ལས་འགན་ཨང་དང་པོ་སྟེ་འཕེལ་རྒྱས་ཞེས་པ་འདི་རྒྱུན་འཁྱོངས་བྱེད་དགོས། དངོས་པོ་དང་ལག་རྩལ་གྱི་རྨང་གཞི་བརྟན་པོ་ཞིག་མེད་ན་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་འཛུགས་སྐྲུན་བྱེད་མི་ཐུབ། དུས་རབས་གསར་པའི་འཐབ་ལམ་གསར་པའི་ཐོག་རང་རྒྱལ་འདི་ཉིད་སྤུས་ཚད་མཐོ་བའི་འཕེལ་རྒྱས་ཀྱི་དུས་རིམ་དུ་སླེབས་པ་དང་། སྤུས་ཚད་མཐོ་བའི་འཕེལ་རྒྱས་ནི་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་ལས་འགན་ཨང་དང་པོ་ཡིན། ངེས་པར་དུ་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་དང་། ཡང་དག། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་དགོས་པ་དང་། འཕེལ་རྒྱས་ཀྱི་རྣམ་པ་གསར་པ་མགྱོགས་སུ་གཏོད་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཤུགས་ཆེན་གཏོང་བ། རིམས་ནད་སྔོན་འགོག་ཚོད་འཛིན་དང་དཔལ་འབྱོར་སྤྱི་ཚོགས་འཕེལ་རྒྱས་ལ་སྤྱི་འདོམས་དེ་བས་ལེགས་པོ་བྱེད་པ། འཕེལ་རྒྱས་དང་བདེ་འཇགས་ལ་དེ་བས་ལེགས་པའི་སྒོ་ནས་སྤྱི་འདོམས་བྱེད་པ། ཕྱོགས་ཡོངས་ནས་སྒྱུར་བཅོས་སྒོ་འབྱེད་གཏིང་ཟབ་ཏུ་སྤེལ་བ། ཚོང་རའི་གདེང་ཚོད་མཐོར་འདེགས་གཏོང་བ། ནང་མཁོ་རྒྱ་ཆེར་གཏོང་བའི་འཐབ་ཇུས་ལག་བསྟར་དེ་མཁོ་སྤྲོད་ཕྱོགས་ཀྱི་གྲུབ་ཚུལ་རང་བཞིན་གྱི་སྒྱུར་བཅོས་ཟབ་སྤེལ་གཏོང་རྒྱུ་དང་ཟུང་འབྲེལ་དམ་པོ་བྱེད་པ་བཅས་ལ་བརྟེན་ནས། འབུར་དུ་ཐོན་ནས་ཡོང་འབབ་བརྟན་པོ་དང་ལས་ཞུགས་བརྟན་པོ། ཟོག་གོང་བརྟན་པོ་ཡོང་བའི་ལས་དོན་ཡག་པོ་བསྒྲུབས་པ་དང་། ཉེན་ཁ་ཆེན་པོ་སྔོན་འགོག་དང་ཐག་གཅོད་ལེགས་པོ་བྱས་པ་དང་། དཔལ་འབྱོར་འགུལ་སྐྱོད་སྤྱིའི་ཆ་ནས་ལེགས་པོ་ཡོང་བར་སྐུལ་འདེད་བཏང་སྟེ། སྤུས་ཚད་ཀྱི་ཐད་མཐོར་འདེགས་ནུས་ལྡན་དང་གྲངས་འབོར་གྱི་ཐད་ལུགས་མཐུན་འཕར་སྣོན་ཡོང་བ་མངོན་འགྱུར་བྱེད་དགོས།
ལོ་གསར་པའི་འགོ་ལེགས་པོ་ཚུགས་པ་དང་གོམ་སྟབས་བརྟན་པོ་སྤོ་དགོས་ན། ངེས་པར་དུ་དཀའ་ངལ་དང་འགྲན་སློང་མཐའ་དག་ལས་རྣམ་པར་རྒྱལ་བའི་ཡིད་ཆེས་བརྟན་དུ་གཏོང་དགོས། མིག་སྔར། འཛམ་གླིང་གི་འགྱུར་ལྡོག་དང་། དུས་རབས་ཀྱི་འགྱུར་ལྡོག། ལོ་རྒྱུས་ཀྱི་འགྱུར་ལྡོག་བཅས་སྔར་བྱུང་མྱོང་མེད་པའི་རྣམ་པའི་ཐོག་ནས་འབྱུང་བཞིན་ཡོད། རང་རྒྱལ་གྱི་དཔལ་འབྱོར་སླར་གསོའི་རྨང་གཞི་ད་དུང་བརྟན་པོ་མེད་པ་དང་། དགོས་མཁོ་ཉུང་དུ་འགྲོ་བ། མཁོ་སྤྲོད་ལ་ཕོག་ཐུག་བྱུང་བ། སྔོན་དཔག་ཉམས་དམས་སུ་འགྲོ་བ་བཅས་ཀྱི་གནོན་ཤུགས་གསུམ་སྔར་བཞིན་ཅུང་ཆེ་བ་དང་། ཕྱི་ཕྱོགས་ཀྱི་ཁོར་ཡུག་བདེ་འཇགས་མིན་པས་རང་རྒྱལ་གྱི་དཔལ་འབྱོར་ལ་ཤུགས་རྐྱེན་ཐེབས་ཤུགས་ཆེ་རུ་ཕྱིན་ཡོད། དཀའ་ངལ་ཇི་ཙམ་ཆེ་ན་དེ་ཙམ་གྱིས་ཡིད་ཆེས་བརྟན་དུ་གཏོང་དགོས། མཐོང་དགོས་པ་ཞིག་སྟེ། རང་རྒྱལ་དཔལ་འབྱོར་གྱི་ལྡེམ་ཤུགས་ཆེ་བ་དང་། བག་ཉལ་སྟོབས་ཤུགས་ཆེ་བ། གསོན་ཤུགས་རྒྱས་པ། ཡུན་རིང་ལེགས་སུ་འགྲོ་བ་བཅས་ཀྱི་གཞི་རྩའི་རྣམ་པར་འགྱུར་ལྡོག་འགྲོ་མི་སྲིད། རང་རྒྱལ་གྱི་འཕེལ་རྒྱས་ལ་འཛོམས་དགོས་པའི་འཐབ་ཇུས་རང་བཞིན་གྱི་མཐུན་རྐྱེན་ལྔ་ནི་འཐབ་ལམ་གསར་པའི་ཐོག་གི་འགྱུར་ལྡོག་ལ་ཁ་གཏད་འཇལ་བ་དང་། རྣམ་པ་གསར་པ་གཏོད་པ། ལོ་རྒྱུས་ཀྱི་རང་དབང་ཁོང་དུ་ཆུད་པ་བཅས་ཀྱི་གཏིང་ཤུགས་ཆེན་པོ་གནས་ས་དེ་ཡིན། མདུན་ཕྱོགས་སུ་བསྐྱོད་ན། དུས་དང་གནས་བབ་ང་ཚོའི་ཕྱོགས་སུ་ཡོད་པས། འཐབ་ཇུས་ཀྱི་གོ་སྐབས་གསར་པ་དང་འཕེལ་རྒྱས་ཀྱི་རང་དབང་ང་ཚོའི་ལག་ཏུ་ཡོད། “ག་དུས་ཡིན་ཡང་དཀའ་ངལ་མེད་མི་སྲིད་པར། དཀའ་ངལ་རེ་རེ་བཞིན་སེལ་བ་དང་། ལོ་རེ་རེ་བཞིན་སྐྱེལ་བ་དང་ལོ་རེ་རེ་བཞིན་ཡག་པོ་བྱུང་བ། ཀྲུང་ཧྭ་མི་རིགས་ཀྱི་ལོ་ངོ་5000ལྷག་གི་རིང་ལ་དེ་ལྟར་རེད། རི་འཛེགས་ལུང་བརྒལ་བྱེད་པའི་འགག་རྩ་ནི་ཡིད་ཆེས་ཆེ་རུ་གཏོང་རྒྱུ་དེ་ཡིན།” ཉིན་ཤས་སྔོན་འཚོགས་པའི་ཀྲུང་དབྱང་གི་དཔལ་འབྱོར་ལས་དོན་གྲོས་ཚོགས་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སླར་ཡང་ནན་གསུང་གནང་དོན། “འཐབ་ཇུས་ཀྱི་གདེང་ཚོད་”ཅེས་པ་སྟེ། “གནོན་ཤུགས་འགོག་པ་དང་། ནང་ནུས་སྦྱོང་བ། རྐང་པ་བརྟན་པོ་འཛུགས་པ་བཅས་བྱས་ན་སེལ་མི་ཐུབ་པའི་དཀའ་གནད་མེད།”
ལོ་གསར་པའི་འགོ་ལེགས་པོ་ཚུགས་པ་དང་གོམ་སྟབས་བརྟན་པོ་སྤོ་དགོས་ན། ངེས་པར་དུ་བློ་བརྟན་འགྱུར་མེད་ངང་སེམས་ནུས་གཅིག་སྒྲིལ་གྱིས་རང་ཉིད་ཀྱི་བྱ་བ་ཡག་པོ་བསྒྲུབ་དགོས། “ངེས་ཤུགས་མཐའ་འཁྱོངས་དང་། ཡིད་ཆེས་ཆེར་གཏོང་། སེམས་ནུས་གཅིག་སྒྲིལ་བཅས་ཀྱི་སྒོ་ནས་རང་ཉིད་ཀྱི་བྱ་བ་ཡག་པོ་བསྒྲུབ་རྒྱུ་ནི་ང་ཚོས་ཉེན་ཁ་དང་འགྲན་སློང་སྣ་ཚོགས་ལ་ཁ་གཏད་འཇལ་བའི་འགག་རྩ་ཡིན།” རྒྱལ་ཁབ་འཕེལ་རྒྱས་དང་ཡར་ཐོན་ཡོང་བའི་ལས་དབང་དེ་རང་ཉིད་ཀྱི་ལག་ཏུ་དམ་པོར་འཛིན་ཐུབ་མིན་དང་། འཛམ་གླིང་གི་འགྱུར་ལྡོག་ཆེན་པོའི་ཁྲོད་དུ་རང་རྒྱལ་འཕེལ་རྒྱས་ཀྱི་རྣམ་པ་གསར་པ་གཏོད་ཐུབ་མིན་དེ་མཐར་གཏུགས་ནས་བཤད་ན་ནང་རྐྱེན་ལ་བལྟ་དགོས་པ་དང་། སེམས་ཤུགས་གཅིག་སྒྲིལ་གྱིས་རང་ཉིད་ཀྱི་བྱ་བ་ལེགས་པར་བསྒྲུབ་ཐུབ་མིན་ལ་བལྟ་དགོས། ཉེན་ཁ་དང་འགྲན་སློང་གང་འདྲ་ཞིག་འཕྲད་རུང་ང་ཚོས་ཐོག་མཐའ་བར་གསུམ་དུ་འཐབ་ཇུས་ཀྱི་ངེས་ཤུགས་མཐའ་འཁྱོངས་དང་གཏན་ལ་ཕབ་པའི་དམིགས་འབེན་བརྟན་པོ་བྱས་ཏེ། འབད་འབུངས་ཡར་བརྩོན་གྱི་བསམ་པའི་འཁྱེར་སོ་དང་“དུས་དང་རྣམ་པ་ཀུན་ཏུ་སེམས་ཁུར་བྱེད་པའི་”འགན་འཁྲིའི་འདུ་ཤེས་ཐོག་ནས་ལས་དོན་ཁག་ཡག་པོ་སྒྲུབ་པ་དང་། བྱ་སྤྱོད་དངོས་ཀྱི་ཐོག་ནས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཐོག་དོན་འཁྱོལ་བྱས་ཚེ། “སྤྲིན་ནག་འཁྲིགས་ཀྱང་སྔར་བཞིན་འཚབ་འཚུབ་མེད་པ་”དང་“ཕྱོགས་བཞིའི་དྲག་རླུང་ལྡང་ཡང་ཅི་ལ་སྐྱོན་”ཞེས་པའི་འབད་འཐབ་ཁྲོད་རང་དབང་དང་། དགེ་མཚན། འབྱུང་འགྱུར་བཅས་འཐོབ་ངེས་རེད།
ལོ་10ཡི་སྔོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྤོབས་ཉམས་ལྡན་པ་དང་བློ་རྩ་བརྟན་པོའི་སྒོ་ནས་གསལ་བསྒྲགས་གནང་དོན། “ད་ལྟ་ང་ཚོ་ལོ་རྒྱུས་ཀྱི་དུས་སྐབས་གང་ཞིག་ལས་ཀྱང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་དམིགས་འབེན་དང་དེ་བས་ཐག་ཉེ་བ་དང་། ལོ་རྒྱུས་ཀྱི་དུས་སྐབས་གང་ཞིག་ལས་ཀྱང་དམིགས་འབེན་དེ་མངོན་འགྱུར་བྱེད་པའི་ཡིད་ཆེས་དང་ནུས་པ་དེ་བས་ཆེན་པོ་ལྡན་ཡོད།”
ཏང་གི་ཚོགས་ཆེན་ཉི་ཤུ་པའི་སྙན་ཞུའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གོམ་གང་མདུན་སྤོས་ཀྱིས་ཏང་ཡོངས་ལ་གསལ་བསྒྲགས་གནང་དོན། “དེ་རིང་། ང་ཚོ་ལོ་རྒྱུས་ཐོག་གི་དུས་སྐབས་གང་ཞིག་ལས་ཀྱང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་དམིགས་འབེན་མངོན་འགྱུར་བྱེད་པར་ཐག་ཉེ་བ་དང་གདེང་ཚོད་ལྡན་པ་དང་ནུས་པ་སྔར་ལས་ཆེ་བ་ཡོད། དུས་མཚུངས་སུ་ངེས་པར་དུ་དཀའ་ཚེགས་དང་དཀའ་སྡུག་སྔར་ལས་ཆེ་བའི་འབད་བརྩོན་བྱེད་དགོས།”
འཆར་འགོད་བྲིས་ཟིན་པ་དང་དུང་བརྡ་བཏང་ཟིན་པ་རེད། མདུན་སྐྱོད་ཀྱི་ལམ་བུའི་ཐོག་ཏང་ཡོངས་དང་། དམག་ཡོངས། རྒྱལ་ཡོངས་མི་རིགས་ཁག་གི་མི་དམངས་བཅས་ཀྱིས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་བྱས་ཏེ། ཕྱོགས་ཡོངས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ལག་བསྟར་བྱེད་པ་དང་། ཡིད་ཆེས་བརྟན་དུ་གཏོང་བ། བློ་རྩ་བརྟན་པོས་ཡར་རྒྱས་བརྩོན་ལེན་བྱེད་པ། ཕུ་ཐུང་བརྫེས་ནས་ངར་ཤུགས་སྒྲིམ་པ། དཀའ་ངལ་ཁྱད་བསད་ཀྱིས་མདུན་སྐྱོད་བྱེད་པ། གོམ་པ་རིམ་བགྲོད་ཀྱིས་ཏང་གི་ཚོགས་ཆེན་ཉི་ཤུ་པའི་ཐོག་བཏོན་པའི་འཐབ་ཇུས་ཀྱི་ཐབས་ཇུས་དང་བཀོད་སྒྲིག་ཁག་རྣམས་བྱ་སྤྱོད་ཐོག་ཏུ་དོན་འཁྱོལ་དང་ཕན་ནུས་ཐོབ་པར་བྱས་ཏེ། དཔའ་ངར་ཆེ་སྐྱེད་ཀྱིས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་རྒྱལ་ཁ་གསར་པ་བརྩོན་ལེན་བྱེད་དགོས།
བློ་བཟང་ལྷ་མོས་བསྒྱུར།